1 Kings 1 — Lahu Bible Edited © Thailand Bible Society and Bible Society of Myanmar, 2010, 2020.

1Jawˇmawˇ Daˍviˆ lehˬ, a sha‸ mawˇ la peuˬ ve yoˬ. Yawˇ ve awˬ ceˬ teˇ hpaˍ yawˇ hta‸ aˉ boˆ hkʼaˬ ma yuˬ kaw piˇ ve htawˇ, lehˬ la maˇ gʼa.

2Hkʼe te leh, yawˇ ve ma‸ poˍ lonˉ teˇ hpaˍ yawˇ geh laˬ leh, Jawˇmawˇ-oˬ, nawˬ hta‸ nyi ha‸ shaˉ laˇ tuˬ ngaˬ hui nawˬ awˬ pon yaˇ miˇ haˉ teˇ gʼaˇ ca laˇ shaˍ. Yawˇ nawˬ geh zuh‸ leh nawˬ hta‸ lehˬ la piˇ tuˬ yoˬ, teh‸ yawˇ hta‸ kʼoˆ piˇ ve yoˬ.

3Hkʼe te leh, yawˇ hui Iˉsaˍreˍlaˆ mvuhˇmiˬ hkʼaˬ ti chi ti lo awˬ hkiˇ awˬ naˬ da‸ ve yaˇ miˇ haˉ teˇ gʼaˇ hta‸ ca nyi ve yoˬ. Shuˆnenˍ venˇ hkʼaw lo Aˍbiˇshehˆ meh ve yaˇ miˇ haˉ teˇ gʼaˇ hta‸ yawˇ hui ca mawˬ leh, yawˇ hta‸ jawˇmawˇ geh shiˍ laˬ ve yoˬ.

4Yaˇ miˇoˇ ve lehˬ, awˬ hkiˇ awˬ naˬ da‸ jaˇ leh, jawˇmawˇ hta‸ ha‸ shaˉ piˇ chehˇ ve yoˬ. Ya‸ hkʼaˇ, jawˇmawˇ yawˇ hta‸ awˬ chawˇ maˇ muiˬ piˇ.

5Aˍbaˆsaˍlonˍ suh peuˬ ve pa taw, Daˍviˆ miˇ ma Haˍgiˆ ve yaˇ teˇ hpaˍ awˬ hkʼaw lo Aˍdawˇniˇyaˆ lehˬ yaˇ paˍ uiˍ hpeh‸ ve yoˬ. Yawˇ lehˬ awˬ hkiˇ awˬ naˬ da‸ jaˇ ve yoˬ. Daˍviˆ yawˇ hta‸ teˇ pawˆ ka‸ maˇ gʼa deˇ maˍ piˇ jaw. Hkʼe te leh, yawˇ jawˇmawˇ te gaˇ jaˇ ve yoˬ.

6Yawˇ lehˬ iˉ mvuhˇ lawˬ, iˉ mvuhˇ teˇ hpaˍ, leh a sha‸ shaw shehˍ hpaˇ 50 gʼaˇ ca teh taˍ ve yoˬ.

7Oˇ hkʼe te peuˬ hkʼaw‸ nawˉ, yawˇ lehˬ Zeˍruˆyaˍ ve yaˇ paˍ Yaˍbaˆ leh, paw hkuˇ Aˍbyaˍtaˍ hui hta‸ na‸ uˉ ca te da‸ ve yoˬ. Yawˇ huiˉ maˬ yawˇ hta‸ jawˇmawˇ te tcuh tuˬ nyi ma cawˇ ve yoˬ.

8Ya‸ hkʼaˇ, paw hkuˇ Zaˍdoˆ, Yawˇyaˍdaˆ ve yaˇ Beˍnaˍyaˆ, tcuh kaˍ paˍ Naˍtanˍ, Sheˍmiˆ, Reˍiˆ leh Daˍviˆ ve a sha‸ shaw shehˍ hpaˇ teˇ hpaˍ lehˬ, Aˍdawˇniˇyaˆ hta‸ nyi ma maˇ cawˇ.

9Teˇ nyi htaˇ, Aˍdawˇniˇyaˆ lehˬ, Enˍyawˇgeˍlaˆ iˉ kaˆ lawˬ paˇ lo cawˬ ve Vuiˬ haˉ pui shiˍ teh‸ kʼoˆ ve chehˇ kuiˬ lo, nuˇ leh yawˬ teˇ hpaˍ hta‸ tuˉ tanˇ chehˇ ve yoˬ. Yawˇ lehˬ awˬ nu ve Daˍviˆ ve yaˇ teˇ hpaˍ leh, Yuˇda‸ mvuhˇmiˬ hkʼaw chehˇ ve ma‸ poˍ lonˉ teˇ hpaˍ hta‸ oˇ kaˬ lo kuˬ hpawnˬ ve yoˬ.

10Ya‸ hkʼaˇ, yawˇ lehˬ yawˇ ve awˬ nyi paˍ Sawˉla‸monˍ, tcuh kaˍ paˍ Naˍtanˍ, Beˍnaˍyaˆ leh jawˇmawˇ ve a sha‸ shaw shehˍ hpaˇ teˇ hpaˍ hta‸ maˇ kuˬ piˇ.

11Oˇ htaˇ, Naˍtanˍ Sawˉla‸monˍ ve awˬ e Baˍtaˍsheˍbaˆ geh kʼai leh chi hkʼe kʼoˆ piˇ ve yoˬ. Haˍgiˆ ve yaˇ paˍ Aˍdawˇniˇyaˆ lehˬ jawˇmawˇ gʼa te tuˬ awˬ hkʼaˇ gu chehˇ ve hta‸ nawˬ maˇ shiˍ laˇ. Awˬ lawn chi hta‸ jawˇmawˇ Daˍviˆ ka‸ maˇ gʼa shiˍ sheˍ.

12Nawˬ leh nawˬ yaˇ paˍ Sawˉla‸monˍ nawˬ huiˉ maˬ a sha‸ te‸ chehˇ gaˇ sheˍ ve kʼo, ngaˬ kʼoˆ ve hkʼe te-o.

13Chi beu‸ jawˇmawˇ Daˍviˆ geh kʼai leh chi hkʼe ca kʼoˆ piˇ-oˆ. Jawˇmawˇ-oˬ, ngaˬ yaˇ paˍ Sawˉla‸monˍ hta‸ jawˇmawˇ te tcuh tuˬ, nawˬ ngaˬ hta‸ kʼoˆ laˇ taˍ peuˬ ve maˇ heˆ laˇ. Aˬ hto‸ ma pa taw, chi beu‸ Aˍdawˇniˇyaˆ jawˇmawˇ hpeh‸ la chehˇ ve le, teh‸ yawˇ hta‸ ca kʼoˆ piˇ-oˆ.

14Nawˬ jawˇmawˇ hta‸ oˇ hkʼe kʼoˆ piˇ chehˇ ve teˇ yanˇ, ngaˬ lo‸ la leh ngaˬ ka‸ jawˇmawˇ hta‸ oˇ hkʼe gʼa ga kʼoˆ piˇ tuˬ yoˬ, teh‸ Baˍtaˍsheˍbaˆ hta‸ kʼoˆ piˇ ve yoˬ.

15Hkʼe te leh, Baˍtaˍsheˍbaˆ jawˇmawˇ geh kʼai ve yoˬ. Jawˇmawˇ lehˬ mawˇ jaˇ peuˬ leh, Shuˆnenˍ venˇ yaˇ Aˍbiˇshehˆ yawˇ hta‸ ha‸ shaˉ piˇ chehˇ ve yoˬ.

16Baˍtaˍsheˍbaˆ lehˬ, jawˇmawˇ gʼuˇ suhˍ boˆ taˍ ve yoˬ. Oˇ htaˇ jawˇmawˇ lehˬ, Nawˬ aˬ hto‸ ma loˍ ve le, teh‸ Baˍtaˍsheˍbaˆ hta‸ kʼoˆ piˇ ve yoˬ.

17Yawˇ kʼaw‸ kʼoˆ ve, Jawˇmawˇ-oˬ, nawˬ lehˬ ngaˬ yaˇ paˍ Sawˉla‸monˍ hta‸ jawˇmawˇ te tcuh tuˬ yoˬ, teh‸ Gʼuiˬsha ve awˬ meh hkʼaw ngaˬ hta‸ ka ti‸ te laˇ taˍ peuˬ ve yoˬ.

18Ya‸ hkʼaˇ, chi beu‸ Aˍdawˉniˍyaˆ lehˬ jawˇmawˇ hpeh‸ la chehˇ ve yoˬ. Awˬ lawn chi hta‸ nawˬ a ciˉ ka‸ maˇ shiˍ sheˍ ve law.

19Yawˇ lehˬ, nuˇ leh yawˬ maˇ maˇ tuˉ tanˇ chehˇ leh, nawˬ ve yaˇ teˇ hpaˍ, paw hkuˇ Aˍbyaˍtaˍ, nawˬ ve ma‸ poˍ lonˉ Yaˍbaˆ hui hta‸ oˇ kaˬ lo kuˬ hpawnˬ chehˇ ve yoˬ. Ya‸ hkʼaˇ, yawˇ lehˬ nawˬ ve yaˇ paˍ Sawˉla‸monˍ hta‸ maˇ kuˬ piˇ.

20Jawˇmawˇ-oˬ, Iˉsaˍreˍlaˆ chaw teˇ hpaˍ lehˬ, nawˬ leuˆ laˇ tuˬ ve jawˇmawˇ hta‸ law nyi chehˇ taˍ ve yoˬ.

21Nawˬ oˇ hkʼe maˇ te laˇ ve kʼo, nawˬ suh peuˬ hkʼaw‸ nawˉ Sawˉla‸monˍ ngaˬ huiˉ maˬ lehˬ shu hpeh yuˬ leh tiˇ pehˍ ve hta‸ gʼa hkanˍ tuˬ yoˬ, teh‸ jawˇmawˇ hta‸ kʼoˆ piˇ ve yoˬ.

22Yawˇ jawˇmawˇ hta‸ oˇ hkʼe kʼoˆ piˇ chehˇ ve teˇ hkui, Naˍtanˍ hawˉ yehˬ hkʼaw gaˬ la ve yoˬ.

23Yawˇ oˇ kaˬ lo gaˬ la ve awˬ lawn shu jawˇmawˇ hta‸ ca kʼoˆpiˇ leh, Naˍtanˍ jawˇmawˇ geh kʼai leh, yawˇ mehˆ gʼuˇ suhˍ boˆ taˍ ve yoˬ.

24Oˇ htaˇ, yawˇ jawˇmawˇ hta‸ chi hkʼe kʼoˆ piˇ ve yoˬ. Jawˇmawˇ-oˬ, Aˍdawˉ niˍyaˆ hta‸ jawˇmawˇ te tuˬ nawˬ kʼoˆ piˇ taˍ ve laˇ.

25Ya‸ nyi yawˇ tawˆ kʼai leh, nuˇ, yawˬ, teˇ hpaˍ tuˉ tanˇ piˇ chehˇ ve yoˬ. Yawˇ lehˬ nawˬ ve yaˇ paˍ hkʼa peu-eˬ, nawˬ ve ma‸ poˍ lonˉ Yaˍbaˆ, paw hkuˇ Aˍbyaˍtaˍ hui hta‸ kuˬ yuˬ leh, hti caˇ hti dawˬ chehˇ ve yoˬ. Jawˇmawˇ Aˍ dawˇniˍyaˆ co zuhˬ ha zuhˬ cawˬ piˇ-oˆ, teh‸ yawˇ hui hpoˆ kuˬ chehˇ ve yoˬ.

26Ya‸ hkʼaˇ, yawˇ hui ngaˬ hta‸ maˇ kʼoˆ, paw hkuˇ Zaˍdoˆ, Beˍnaˍyaˆ leh nawˬve yaˇ paˍ Sawˉla‸monˍ hta‸ maˇ kʼoˆ maˇ kuˬ.

27Yawˇ hui chi hkʼe te chehˇ ve hta‸ nawˬ nyi ma cawˇ chehˇ ve laˇ. Awˬ lawn kʼo, a shu teˇ gʼaˇ jawˇmawˇ te cawˇ ve hta‸ nawˬ awˬ to maˇ gʼa leuˆ yuˬ sheˍ ve yoˬ, teh‸ jawˇmawˇ hta‸ kʼoˆ piˇ ve yoˬ.

28Oˇ htaˇ jawˇmawˇ Daˍviˆ lehˬ, Baˍtaˍsheˍbaˆ hta‸ choˬ kaˬ laˬ tuˬ hto piˇ-oˆ, teh‸ kʼoˆ ve yoˬ. Hkʼe te leh, Baˍtaˍsheˍbaˆ lo‸ la leh, yawˇ gʼuˇ suhˍ lo huˉ taˍ ve yoˬ.

29Oˇ htaˇ jawˇmawˇ Daˍviˆ yawˇ hta‸ chi hkʼe kʼoˆpiˇ ve yoˬ. Ngaˬ hta‸ dawˇ haˍ kuiˬ hkʼaw ponˬ laˇ shehˍ hpaˇ te‸ chehˇ ve Gʼuiˬsha ve awˬ meh hkʼaw nawˬ hta‸ ka ti‸ te piˇ taˍ peuˬ ve hkʼe,

30ya‸ nyi nawˬ yaˇ paˍ Sawˉla‸monˍ hta‸ ngaˬ jawˇmawˇ te tcuh piˇ tuˬ yoˬ, teh‸ yawˇ hta‸ kʼoˆ piˇ ve yoˬ.

31Oˇ htaˇ, Baˍtaˍsheˍbaˆ miˬ chaˇ hkʼoˆ boˆ taˍ leh, Ngaˬ ve jawˇmawˇ co zuhˬ ha zuhˬ cawˬ piˇ-oˆ, teh‸ kʼoˆ ve yoˬ.

32Oˇ ve hkʼaw‸ nawˉ, jawˇmawˇ lehˬ Zaˍdoˆ, Naˍtanˍ leh Beˍnaˍyaˆ hui hta‸ ca kʼaw‸ kuˬ tcuh ve yoˬ. Yawˇ hui gaˬ la htaˇ, jawˇmawˇ yawˇ hui hta‸ chi hkʼe kʼoˆ piˇ ve yoˬ.

33Ngaˬ yaˇ paˍ Sawˉla‸monˍ hta‸ ngaˬ ve piˉ laˬ hkʼoˆ ciˇ tcuh leh, Giˇhonˍ teh‸ kʼoˆ ve chehˇ kuiˬ lo shiˍ kʼai-o. Ngaˬ ve a ma‸ lonˉ teˇ hpaˍ hta‸ htawˇ shiˍ kʼai-o.

34Oˇ kaˬ lo gaˬ htaˇ, Zaˍdoˆ leh Naˍtanˍ nawˬ huiˉ maˬ yawˇ hta‸ naˍ manˇ pfuhˍ piˇ-oˆ. Oˇ hkʼe te peuˬ hkʼaw‸ nawˉ, behˬ heh ma meuˆ leh, jawˇmawˇ Sawˉla‸ monˍ co zuhˬ ha zuhˬ cawˬ piˇ-oˆ, teh‸ kuˬ-o‸.

35Peuˬ ve kʼo, yawˇ hta‸ choˬ kaˬ lo kʼaw‸ shiˍ hkʼaw‸ veu laˇ leh, ngaˬ ve kʼaw jaw hkʼoˆ mui tcuh piˇ-oˆ. Awˬ lawn kʼo, Iˉsaˍreˍlaˆ leh Yuˇda‸ mvuhˇmiˬ hta‸ uˉ peunˍ tuˬ, ngaˬ yawˇ hta‸ leuˆ yuˬ taˍ peuˬ ve yoˬ, teh‸ yawˇ hui hta‸ kʼoˆ piˇ ve yoˬ.

36Beˍnaˍyaˆ kʼaw‸ kʼoˆ ve, Jawˇmawˇ nawˬ kʼoˆ laˇ ve hkʼe ngaˬ hui te tuˬ yoˬ. Chi hkʼe te ve hta‸ Gʼuiˬsha ka‸ nyi ma cawˇ piˇ-oˆ.

37Gʼuiˬsha nawˬ geh chehˇ ve hkʼe, Sawˉla‸monˍ geh ka‸ chehˇ leh, nawˬ uˉ peunˍ chehˇ ve awˬ yanˇ htaˇ a‸ kehˉ mvuhˇmiˬ uiˍ la da‸ la piˇ-oˆ, teh‸ kʼoˆ ve yoˬ.

38Hkʼe te leh, Zaˍdoˆ, Naˍtanˍ, Beˍnaˍyaˆ leh jawˇmawˇ ve a sha‸ shaw shehˍ hpaˇ teˇ hpaˍ, Sawˉla‸monˍ hta‸ jawˇmawˇ ve piˉ laˬ hkʼoˆ ciˇ tcuh leh, Giˇhonˍ lo shiˍ kʼai ve yoˬ.

39Zaˍdoˆ lehˬ Gʼuiˬsha ve bon yehˬ hkʼaw yuˬ veu laˇ ve shaˍlonˍ chu hta‸ yuˬ leh, Sawˉla‸ monˍ hta‸ pfuhˍ piˇ ve yoˬ. Yawˇ hui behˬ heh ma meuˆ leh, Jawˇmawˇ Sawˉla‸monˍ co zuhˬha zuhˬ cawˬ piˇ-oˆ, teh‸ hpoˆ kuˬ ve yoˬ.

40Oˇ hkʼe te peuˬ hkʼaw‸ nawˉ, yawˇ hui lehˉ lu meuˆ leh ha lehˬ ha kʼa hawˉ yehˬ lo kʼaw‸ la ve yoˬ. Yawˇ hui kuˬ ve awˬ hkawˇ lehˬ, miˬguiˬ hta‸ hiˆ piˇ gʼa law‸ law‸ awˬ hkawˇ bvuhˬ ve yoˬ.

41Aˍdawˇniˇyaˆ leh yawˇ ve awˬ chawˇ teˇ hpaˍ hti caˇ hti dawˬ ve peuˬ la paˇ neˇ ve teˇ yanˇ, kuˬ hkawˇ oˇ ve hta‸ yawˇ hui gʼa kaˇ ve yoˬ. Behˬ heh ma meuˆ chehˇ ve awˬ hkawˇ hta‸ Yaˍbaˆ gʼa kaˇ ve teˇ yanˇ, Venˇ hkʼaw lo aˬ hto‸ ma hpeh‸ ve le, teh‸ shu hta‸ na nyi ve yoˬ.

42Yawˇ tawˇ yaw ve maˇ peuˬ sheˍ ka‸, paw hkuˇ Aˍbyaˍtaˍ ve yaˇ paˍ Yawˇnaˆ tanˍ gʼuiˇ gaˬ la ve yoˬ. Oˇ htaˇ, Aˍdawˇniˇyaˆ lehˬ, Laˬ-o‸. Nawˬ lehˬ chaw da‸ teˇ gʼaˇ hpeh‸ leh, da‸ ve awˬ lawn sha tanˇ ca yuˬ kʼoˬ la ve yoˬ, teh‸ yawˇ hta‸ kʼoˆ piˇ ve yoˬ.

43Yawˇnaˆtanˍ kʼaw‸ yaw hkʼaw‸ leh kʼoˆ ve, Da‸ ve awˬ lawn sha tanˇ maˇ heˆ. Jawˇmawˇ Daˍviˆ lehˬ, Sawˉla‸monˍ hta‸ jawˇmawˇ te tcuh peuˬ.

44Yawˇ lehˬ, Zaˍdoˆ, Naˍtanˍ, Beˍnaˍyaˆ leh yawˇ ve a sha‸ shaw shehˍ hpaˇ teˇ hpaˍ hta‸ tawˇ piˇ leh, yawˇ hui lehˬ Sawˉla‸monˍ hta‸ jawˇmawˇ ve piˉlaˬ hkʼoˆ ciˇ tcuh ve yoˬ.

45Hkʼe te leh, Zaˍdoˆ leh Naˍtanˍ yawˇ hta‸ Giˇhonˍ teh‸ kʼoˆ ve chehˇ kuiˬ lo naˍ manˇ pfuhˍ piˇ ve yoˬ. Oˇ hkʼe te peuˬ hkʼaw‸ nawˉ, yawˇ hui ha lehˬ ha kʼa venˇ hkʼaw kʼo‸-e leh, venˇ yaˇ teˇ hpaˍ hpoˆ kuˬ chehˇ ve yoˬ.

46Sawˉla‸monˍ lehˬ, chi beu‸ jaw mawˇ hpeh‸ la peuˬ.

47Chi hkʼoˆ ka‸, a ma‸ lonˉ teˇ hpaˍ jawˇmawˇ Daˍviˆ geh kʼai leh, Nawˬ ve Gʼuiˬsha lehˬ Sawˉla‸monˍ hta‸ nawˬ a‸ kehˉ awˬ meh bvuhˬ ve jawˇmawˇ hpeh‸ la tuˬ te laˇ piˇ-oˆ. Yawˇ uˉ peunˍ ve awˬ yanˇ lehˬ, nawˬ uˉ peunˍ ve awˬ yanˇ a‸ kehˉ mvuhˇmiˬ uiˍ la da‸ la piˇ-oˆ, teh‸ yawˇ hta‸ kʼoˆ piˇ chehˇ ve yoˬ. Oˇ htaˇ, Daˍviˆ lehˬ ku-iˍ hkʼoˆ boˆ taˍ leh bon chi hkʼe lawˬ ve yoˬ.

48Iˉsaˍreˍlaˆ ve Gʼuiˬsha hta‸ ngaˬ hui chiˇ mvuh piˇ-a veuˬ. Awˬ lawn kʼo, yawˇ lehˬ ya‸ nyi ngaˬ ve awˬ ceuˬ awˬ hkʼaˇ teˇ gʼaˇ hta‸ leuˆ yuˬ leh ngaˬ awˬ tan jawˇmawˇ te tcuh piˇ peuˬ, teh‸ kʼoˆ leh bon lawˬ ve yoˬ, teh‸ Yawˇnaˆ tanˍ yawˇ hta‸ kʼoˆ piˇ ve yoˬ.

49Oˇ htaˇ, Aˍdawˇniˇyaˆ ve awˬ chawˇ teˇ hpaˍ kawˆ jaˇ leh, tawˬ miˇ tawˬ hkʼaˇ tawˆ kʼai ve yoˬ.

50Aˍdawˇniˇyaˆ htawˇ kawˆ jaˇ ve pa taw, Gʼuiˬsha ve bon yehˬ hkʼaw lo‸-e leh, tuˉ tanˇ kuiˬ hta‸ ca kʼuˉ tiˍ taˍ ve yoˬ.

51Yawˇ oˇ kaˬ lo chehˇ taˍ leh lawˬ hkawˉ chehˇ ve awˬ hkawˇ hta‸ jawˇmawˇ Sawˉla‸monˍ gʼa kaˇ ve teˇ yanˇ, yawˇ hta‸ chi hkʼe kʼoˆ feu piˇ ve yoˬ.

52Yawˇ lehˬ ka ti‸ yeˬ chehˇ ve kʼo, yawˇ ve uˉ hkeh mvuh teˇ mvuh ka‸ miˬ chaˇ hkʼoˆ gʼa ce tuˬ ve maˇ heˆ. Ya‸ hkʼaˇ, yawˇ lehˬ ka ti‸ maˇ yeˬ ve kʼo, gʼa suh tuˬ yoˬ, teh‸ kʼoˆ feu piˇ ve yoˬ.

53Oˇ ve hkʼaw‸ nawˉ, jawˇmawˇ Sawˉla‸monˍ Aˍdawˇniˇyaˆ htaˬ ca kuˬ tcuh ve yoˬ. Hkʼe te leh, Aˍdawˇniˇyaˆ jawˇmawˇ geh kʼai leh, yawˇ mehˆ gʼuˇ suhˍ boˆ taˍ ve yoˬ. Oˇ htaˇ jawˇmawˇ lehˬ, Aˉ hkʼaw kʼo‸-e loˬ, teh‸ yawˇ hta‸ kʼoˆ piˇ ve yoˬ.