1 Kings 13

Lahu Bible Edited © Thailand Bible Society and Bible Society of Myanmar, 2010, 2020.

← Chapter 12 Jump to: Chapter 14 →

1Gʼuiˬsha tawˇ piˇ ve pa taw, Yuˇda‸ mvuhˇmiˬ hkʼaw chehˇ ve tcuh kaˍ paˍ teˇ gʼaˇ Yeˍyawˇ baoˍ tuˉ tanˇ chehˇ kuiˬ Beˍteˍlaˆ venˇ lo gaˬ la ve yoˬ.

2Tcuh kaˍ paˍ oˇ ve lehˬ, yawˇ hui tuˉ tanˇ chehˇ ve tuˉ tanˇ kuiˬ oˇ ve hta‸ venˇbaˆ taˍ leh kʼoˆ ve, Tuˉ tanˇ kuiˬ-oˬ, Yawˇshiˆ teh‸ kʼoˆ ve yaˇ paˍ teˇ gʼaˇ Daˍviˆ ve awˬ ceuˬ awˬ hkʼaˇ awˬ hkʼaw lo paw la tuˬ yoˬ. Yawˇ lehˬ, paw hkuˇ chi teˇ hpaˍ leh, chaw yaˇ ve awˬ mu‸ ku teˇ hpaˍ hta‸ nawˬ awˬ hkʼoˆ lo teh leh, tuˉ tanˇ ve hta‸ nawˬ gʼa hkanˍ tuˬ yoˬ.

3Tuˉ tanˇ kuiˬ chi luˬ kʼai leh, oˇ ve awˬ hkʼoˆ lo cawˬ taˍ ve hkʼaw‸ laˉ teˇ hpaˍ mehˉ kʼai tuˬ yoˬ. Oˇ htaˇ, Gʼuiˬsha ngaˬ hta‸ cuˇ leh nawˬ hui hta‸ tawˇ yaw laˇ chehˇ ve hta‸ nawˬ hui shiˍ la tuˬ yoˬ, teh‸ kʼoˆ ve yoˬ.

4Tawˇ oˇ ve hta‸ jawˇmawˇ Yeˍyawˇbaoˍ gʼa kaˇ ve teˇ yanˇ, yawˇ hta‸ la‸ naw juˆ taˍ leh, Chaw chi hpaˇ hta‸ hpeh yuˬ-o‸, teh‸ tawˇ piˇ ve yoˬ. Yawˇ oˇ hkʼe kʼoˆ chehˇ ve teˇ hkui, yawˇ ve la‸ sheh teˇ hkoˇ baˉ suh kʼai leh, che taˍ ve la‸ sheh hta‸ kʼaw‸ gʼawˬ hkʼaw‸ maˇ gʼa ve yoˬ.

5Gʼuiˬsha ve tcuh kaˍ paˍ kʼoˆ taˍ peuˬ ve hkʼe, tuˉ tanˇ kuiˬ oˇ ve htawˇ paˆ ce sheˬ leh, hkʼaw‸ laˉ teˇ hpaˍ sheˆ kʼai ve yoˬ.

6Oˇ htaˇ, jawˇmawˇ Yeˍyawˇbaoˍ lehˬ, Ngaˬ ve la‸ sheh kʼaw‸ da‸ la tuˬ, nawˬ ve Gʼuiˬsha geh bon a ciˉ lawˬ laˇ-oˆ, teh‸ tcuh kaˍ paˍ hta‸ kʼoˆ piˇ ve yoˬ. Hkʼe te leh, tcuh kaˍ paˍ yawˇ awˬ pon bon lawˬ piˇ leh, yawˇ ve la‸sheh kʼaw‸ da‸ la ve yoˬ.

7Oˇ ve hkʼaw‸ nawˉ jawˇmawˇ lehˬ, Ngaˬ ve yehˬ lo laˬ leh ngaˬ geh awˍ ca caˇ la-o. Nawˬ ngaˬ hta‸ te laˇ ve kanˉ awˬ pon, ngaˬ nawˬ hta‸ awˬ bon kʼaw‸ te hkʼaw‸ laˇ gaˇ ve yoˬ, teh‸ tcuh kaˍ paˍ hta‸ kʼoˆ piˇ ve yoˬ.

8Tcuh kaˍ paˍ kʼaw‸ yaw hkʼaw‸ leh kʼoˆ ve, Nawˬ geh cawˬ ve hpu shi mawˇ jeˬ teˇ hkoˇ ngaˬ hta‸ pe‸ laˇ ve htawˇ, ngaˬ nawˬ geh kʼai leh awˍ caˇ tuˬ ve maˇ heˆ.

9Oˇ kaˬ lo te‸ chiˉ taˇ caˇ taˇ dawˬ. Nawˬ kʼai ve ya‸ kʼaw hta‸ taˇ te kʼaw‸ la, teh‸ Gʼuiˬsha ngaˬ hta‸ kʼoˆ laˇ taˍ ve yoˬ, teh‸ jawˇmawˇ hta‸ kʼoˆ piˇ ve yoˬ.

10Hkʼe te leh, yawˇ lehˬ awˬ kaˍ awˬ nu ve ya‸ kʼaw teˇ caˆ hta‸ cuˇ leh Yuˇda‸ mvuhˇmiˬ lo kʼaw‸ kʼo‸-e ve yoˬ.

11Awˬ yanˇ oˇ ve hkʼaw, Beˍteˍlaˆ venˇ hkʼaw a sha‸ mawˇ peuˬ ve tcuh kaˍ paˍ teˇ gʼaˇ chehˇ taˍ ve yoˬ. Yawˇ ve yaˇ teˇ hpaˍ yawˇ geh laˬ leh, Yuˇda‸ mvuhˇmiˬ hkʼaw ve tcuh kaˍ paˍ teˇ gʼaˇ hkʼaˬ hkʼe te ve awˬ lawn leh, yawˇ jawˇmawˇ Yeˍyawˇbaoˍ hta‸ hkʼaˬ hkʼe kʼoˆ piˇ ve awˬ lawn teˇ hpaˍ yawˇ hta‸ kʼoˆ maˍ piˇ ve yoˬ.

12Oˇ htaˇ, tcuh kaˍ paˍ chaw mawˇ oˇ ve lehˬ, Yawˇ ya‸ kʼaw hkʼaˬ ve teˇ caˆ hta‸ kʼaw‸ kʼo‸-e ve le, teh‸ yawˇ ve yaˇ teˇ hpaˍ hta‸ na nyi ve yoˬ. Hkʼe te leh, yawˇ hui yawˇ kʼo‸-e ve ya‸ kʼaw hta‸ maˍ piˇ ve yoˬ.

13Oˇ htaˇ, yawˇ lehˬ yawˇ ve yaˇ teˇ hpaˍ hta‸ yawˇ ciˇ tuˬ ve piˉ laˬ teˇ hkeh haˆ haˆ gu tcuh ve yoˬ. Hkʼe te leh, yawˇ hui yawˇ awˬ pon piˉ laˬ teˇ hkeh sheh veu laˇ leh,

14yawˇ lehˬ Yuˇda‸ mvuhˇmiˬ lo laˬ ve tcuh kaˍ paˍ oˇ ve hkʼaˇ suh gʼa‸ yuˬ kʼai ve yoˬ. Tcuh kaˍ paˍ oˇ ve maˉ kuˇ cehˬ hawˉ lo mui chehˇ taˍ laˇ ve hta‸ yawˇ gʼa mawˬ leh, Nawˬ Yuˇda‸ mvuhˇmiˬ lo laˬve tcuh kaˍ paˍ laˇ, teh‸ yawˇ hta‸ na nyi ve yoˬ. Yoˬ, teh‸ tcuh kaˍ paˍ oˇ ve kʼaw‸ yaw hkʼaw‸ piˇ ve yoˬ.

15Ngaˬ ve aˉ hkʼaw lo laˬ leh, ngaˬ geh awˍ ca caˇ la-o, teh‸ yawˇ hta‸ kʼoˆ piˇ ve yoˬ.

16Ya‸ hkʼaˇ, Yuˇda‸ mvuhˇmiˬ lo laˬ taˍ ve tcuh kaˍ paˍ oˇ ve kʼaw‸ yaw hkʼaw‸ leh kʼoˆ ve, Ngaˬ nawˬ ve yehˬ lo kʼai leh awˍ ca caˇ maˇ hpeh‸.

17Awˬ lawn kʼo, Gʼuiˬsha lehˬ choˬ kaˬ lo te‸ chiˉ taˇ caˇ taˇ dawˬ. Nawˬ laˬ ve ya‸ kʼaw hta‸ taˇ te kʼaw‸ la, teh‸ ngaˬ hta‸ kʼoˆ laˇ taˍ ve yoˬ, teh‸ yawˇ hta‸ kʼoˆ piˇ ve yoˬ.

18Oˇ htaˇ, Beˍteˍlaˆ venˇ hkʼaw chehˇ ve tcuh kaˍ paˍ chaw mawˇ oˇ ve lehˬ, Ngaˬ htawˇ nawˬ hkʼa shuˍ tcuh kaˍ paˍ hpeh‸ ve yoˬ. Gʼuiˬsha ve mvuhˇ naw ma tcuh yaˇ teˇ gʼaˇ ngaˬ geh laˬ leh, nawˬ hta‸ ha‸ yuˬ piˇ tuˬ kʼoˆ laˇ ve yoˬ, teh‸ kʼoˆ leh yawˇ hta‸ heˍ piˇ ve yoˬ.

19Hkʼe te leh, Yuˇda‸ mvuhˇmiˬ lo laˬ ve tcuh kaˍ paˍ oˇ ve yawˇ hkʼaˇ suh gʼa‸ kʼai leh, yawˇ ve yehˬ hkʼaw lo awˍ ca caˇ-e ve yoˬ.

20Yawˇ huiˉ maˬ awˍ mui caˇ chehˇ ve teˇ yanˇ, Gʼuiˬsha ve tawˇ tcuh kaˍ paˍ chaw mawˇ oˇ ve geh gaˬ la leh,

21Yuˇda‸ mvuhˇmiˬ lo laˬ ve tcuh kaˍ paˍ oˇ ve hta‸ chi hkʼe kʼoˆ piˇ ve yoˬ. Gʼuiˬsha kʼoˆ ve, Nawˬ lehˬ ngaˬ ve tawˇ hta‸ maˇ na yuˬ. Ngaˬ kʼoˆ ve hkʼe nawˬ maˇ te.

22Nawˬ kʼaw‸ hpfuhˆ kʼaw‸ la leh, choˬ kaˬ lo awˍ ca mui caˇ chehˇ ve pa taw, nawˬ gʼa suh tuˬ yoˬ. Nawˬ lehˬ, nawˬ puˍ nawˬ pi hui ve tuˍ hpfuh paˇ lo gʼa tuˍ tuˬ ve maˇ heˆ, teh‸ Gʼuiˬsha kʼoˆ ve yoˬ, teh‸ yawˇ hta‸ kʼoˆ piˇ ve yoˬ.

23Yawˇ hui caˇ peuˬ dawˬ peuˬ hkʼaw‸ nawˉ, tcuh kaˍ paˍ chaw mawˇ oˇ ve lehˬ, Yuˇda‸ mvuhˇmiˬ lo laˬ ve tcuh kaˍ paˍ oˇ ve awˬ pon piˉ laˬ teˇ hkeh ca piˇ leh, yawˇ ciˇ kʼo‸-e ve yoˬ.

24Ya‸ kʼaw kʼaˉ lo, laˇ caˬ shiˉ teˇ hkeh tawˆ la leh yawˇ hta‸ che‸ pehˍ ve yoˬ. Yawˇ ve awˬ to ya‸ kʼaw hpuiˇ lo ce leh, piˉ laˬ leh laˇ caˬ shiˉ yawˇ ve awˬ to paˇ lo huˉ chehˇ taˍ ve yoˬ.

25Chaw teˇ hpaˍ hpaˍ oˇ kaˬ lo hpanˍ kʼai cawˇ leh, suh taˍ ve tcuh kaˍ paˍ hta‸ maˇ kʼoˆ, oˇ kaˬ lo huˉ chehˇ ve laˇ caˬ shiˉ hta‸ maˇ kʼoˆ gʼa mawˬ ve yoˬ. Hkʼe te leh, yawˇ hui Beˍteˍlaˆ venˇ lo kʼo‸-e leh, awˬ lawn oˇ ve shu hta‸ hto maˍ piˇ ve yoˬ.

26Tcuh kaˍ paˍ chaw mawˇ lehˬ, awˬ lawn oˇ ve hta‸ gʼa kaˇ htaˇ, Chaw oˇ ve lehˬ Gʼuiˬsha ve tawˇ hta‸ maˇ na yuˬ ve Yuˇda‸ mvuhˇmiˬ lo laˬ ve tcuh kaˍ paˍ hpeh‸ ve yoˬ. Gʼuiˬsha kʼoˆ taˍ peuˬ ve hkʼe, yawˇ lehˬ laˇ caˬ shiˉ che‸ pehˍ ve hta‸ gʼa hkanˍ ve yoˬ, teh‸ kʼoˆ ve yoˬ.

27Oˇ ve hkʼaw‸ nawˉ yawˇ lehˬ, Ngaˬ awˬ pon piˉ laˬ teˇ hkeh gu laˇ-oˆ, teh‸ yawˇ ve yaˇ teˇ hpaˍ hta‸ kʼoˆ piˇ ve yoˬ.

28Yawˇ hui yawˇ awˬ pon piˉ laˬ teˇ hkeh gu piˇ leh, yawˇ ciˇ tawˆ-e ve yoˬ. Ya‸ kʼaw kʼaˉ lo, tcuh kaˍ paˍ oˇ ve awˬ to hta‸ gʼa mawˬ ve yoˬ. Piˉ laˬ leh laˇ caˬ shiˉ htawˇ oˇ kaˬ lo huˉ chehˇ taˍ laˇ sheˍ ve yoˬ. Laˇ caˬ shiˉ lehˬ, yawˇ ve awˬ shaˍ hta‸ maˇ caˇ. Piˉ laˬ hta‸ htawˇ te‸ chiˉ maˇ te piˇ.

29Tcuh kaˍ paˍ chaw mawˇ oˇ ve lehˬ, suh taˍ ve awˬ to oˇ ve hta‸ gʼawˆ yuˬ leh yawˇ ve piˉ laˬ hkʼoˆ taˍ peuˬ hkʼaw‸ nawˉ, Beˍteˍlaˆ venˇ lo kʼaw‸ yuˬ kʼaw‸ la ve yoˬ.

30Yawˇ lehˬ chaw suh oˇ ve hta‸ yawˇ hui ve tuˍ hpfuh lo tuˍ piˇ leh, Ngaˬ ve awˬ nyi paˍ-oˬ, teh‸ kʼoˆ kuˬ hawˬ ve yoˬ.

31Yawˇ hta‸ tuˍ piˇ peuˬ hkʼaw‸ nawˉ, tcuh kaˍ paˍ chaw mawˇ oˇ ve yawˇ ve yaˇ teˇ hpaˍ hta‸ chi hkʼe kʼoˆ piˇ ve yoˬ. Ngaˬ suh-e ve kʼo, tcuh kaˍ paˍ chi ve awˬ paˇ lo tuˍ laˇ-oˆ.

32Beˍteˍlaˆ venˇ hkʼaw cawˬ ve tuˉ tanˇ kuiˬ chi ve leh, awˬ nu ve Saˍmaˍriˆ venˇ hkʼaw cawˬ ve oˉ kʼoˍ pui kuiˬ teˇ hpaˍ awˬ lawn Gʼuiˬsha kʼoˆ taˍ peuˬ ve tawˇ teˇ hpaˍ awˬ tehˬ awˬ na biˇ la tuˬ yoˬ, teh‸ yawˇ ve yaˇ teˇ hpaˍ hta‸ kʼoˆ piˇ ve yoˬ.

33Iˉsaˍreˍlaˆ jawˇmawˇ Yeˍyawˇbaoˍ lehˬ, venˇbaˆ maˇ dawˇ hpfuhˆ. Yawˇ te taˍ ve tuˉ tanˇ kuiˬ teˇ hpaˍ lo kanˉ te tuˬ, Leˍviˆ chaw maˇ heˆ ve awˬ nu ve chaw teˇ hpaˍ hta‸ paw hkuˇ te tcuh taˍ ve yoˬ. Paw hkuˇ teˇ gaˇ ve chaw hta‸ yawˇ paw hkuˇ ve aˉ yaˇ tcuhˉ piˇ ve yoˬ.

34Yawˇ chi hkʼe te ve pa taw, yawˇ ve awˬ ceuˬ awˬ hkʼaˇ teˇ hpaˍ luˬ kʼai sheˆ kʼai ve yoˬ.

← Chapter 12 Jump to: Chapter 14 →