1 Kings 20

Lahu Bible Edited © Thailand Bible Society and Bible Society of Myanmar, 2010, 2020.

1Suˇriˆ jawˇmawˇ Beˍhaˍdaˆ lehˬ awˬ nu ve jawˇmawˇ 32 gʼaˇ hta‸ shiˍ veu laˇ leh, Saˍmaˍriˆ venˇ hta‸ ca bawˆ la ve yoˬ.

2Oˇ htaˇ yawˇ lehˬ, Iˉsaˍreˍlaˆ jawˇmawˇ Aˍhaˆ hta‸ tawˇ chi hkʼe shanˍ feu piˇ ve yoˬ.

3Nawˬ geh cawˬ ve hpu, shi, yaˇ miˇ leh awˬ gʼaˇ uiˍ ve chaw teˇ hpaˍ ngaˬ hta‸ chiˇ a‸ laˇ-oˆ, teh‸ kʼoˆ ve yoˬ.

4Oˇ htaˇ jawˇmawˇ Aˍhaˆ lehˬ, Nawˬ kʼoˆ ve hkʼe ngaˬ te tuˬ yoˬ. Nawˬ loˍ ve mawˇ hkʼa peu-eˬ ngaˬ nawˬ hta‸ pe‸ laˇ tuˬ yoˬ, teh‸ kʼaw‸ kʼoˆ feu piˇ ve yoˬ.

5Oˇ ve hkʼaw‸ nawˉ maˇ maw maw, Beˍhaˍdaˆ jawˇmawˇ Aˍhaˆ hta‸ chi hkʼe kʼaw‸ kʼoˆ feu laˇ ve yoˬ. Nawˬ ve hpu, shi, yaˇ miˇ leh awˬ gʼaˇ uiˍ ve chaw teˇ hpaˍ ngaˬ hta‸ gʼa piˇ laˇ ve yoˬ, teh‸ ngaˬ nawˬ hta‸ kʼoˆ feu piˇ taˍ peuˬ ve yoˬ.

6Chi hkʼoˆ ka‸, shawˉ pawˍ chi teˇ yanˇ gaˬ kʼo, ngaˬ ve ma‸ poˍ lonˉ teˇ hpaˍ nawˬ geh peu laˇ leh, nawˬ ve hawˉ yehˬ leh nawˬ ve ma‸ poˍ lonˉ teˇ hpaˍ ve yehˬ hkʼaw cawˬ ve awˬ hpfuhˇ hkʼaˆ ve mawˇ teˇ hpaˍ hta‸ ca yuˬ peu laˇ tuˬ yoˬ, teh‸ yawˇ hta‸ kʼoˆ piˇ ve yoˬ.

7Oˇ htaˇ jawˇmawˇ Aˍhaˆ lehˬ, mvuhˇmiˬ awˬ hoˉ awˬ naˬ hkʼa peu-eˬ ve hta‸ kuˬ yuˬ leh, Chaw chi hpaˇ ngaˬ hui hta‸ te luˬ gaˇ ve yoˬ. Yawˇ lehˬ, ngaˬ miˇ ma teˇ hpaˍ, ngaˬ ve yaˇ teˇ hpaˍ leh ngaˬ ve hpu shi teˇ hpaˍ hta‸ lawˬ yuˬ chehˇ ve yoˬ. Yawˇ kʼoˆ ve hkʼe te piˇ tuˬ ngaˬ dawˇ nyi chehˇ ve yoˬ, teh‸ yawˇ hui hta‸ kʼoˆ piˇ ve yoˬ.

8Ya‸ hkʼaˇ, awˬ hoˉ awˬ naˬ oˇ ve teˇ hpaˍ lehˬ, Yawˇ ve tawˇ hta‸ taˇ na, teh‸ yawˇ hta‸ kʼaw‸ yaw hkʼaw‸ piˇ ve yoˬ.

9Hkʼe te leh, jawˇmawˇ Aˍhaˆ Beˍhaˍdaˆ hta‸ chi hkʼe kʼaw‸ kʼoˆ hkʼaw‸ feu piˇ ve yoˬ. Nawˬ awˉ lawˉ peuˇ teˇ pawˆ shanˍ laˇ ve tawˇ hta‸ ceh ngaˬ te laˇ hpeh‸ tuˬ yoˬ. Nawˬ nyiˇ pawˆ teˇ pawˆ shanˍ laˇ ve tawˇ hta‸ ngaˬ ha‸ yuˬ maˇ hpeh‸, teh‸ kʼoˆ feu piˇ ve yoˬ.

10Oˇ htaˇ, Beˍhaˍdaˆ yawˇ hta‸ chi hkʼe kʼaw‸ kʼoˆ hkʼaw‸ feu piˇ ve yoˬ. Nawˬ ve venˇ chi hta‸ te luˬ tuˬ, ma‸ moˍ lonˉ hta‸ ngaˬ shiˍ veu laˇ tuˬ yoˬ. Yawˇ hui lehˬ, venˇ chi hkʼaw ve je‸ meu-e teˇ gʼaˇ teˇ kaˆ yuˬ kʼo‸-e tuˬ yoˬ. Ngaˬ oˇ hkʼe maˇ te ve kʼo, gʼuiˬsha teˇ hpaˍ ngaˬ hta‸ tiˇ pehˍ laˇ piˇ-oˆ, teh‸ kʼoˆ feu piˇ ve yoˬ.

11Aˍhaˆ kʼaw‸ yaw hkʼaw‸ leh kʼoˆ ve, Cheuˬ ve ma‸ yaˇ teˇ gʼaˇ lehˬ, ma‸ maˇ bawˆ sheˍ htaˇ nyi ma uiˍ hkawˇ maˇ yaw. Ma‸ bawˆ peuˬ heh‸ yaw ve yoˬ, teh‸ Beˍhaˍdaˆ hta‸ kʼaw‸ kʼoˆhkʼaw‸ feu piˇ ve yoˬ.

12Aˍhaˆ ve tawˇ oˇ ve gaˬ la htaˇ, Beˍhaˍdaˆ leh yawˇ ve awˬ chawˇ teˇ hpaˍ aˉ po kʼo hkʼaw tzuhˬ hpoˆ dawˬ chehˇ ve yoˬ. Hkʼe te leh, ma‸ bawˆ tuˬ tawˇ piˇ leh yawˇ hui hkʼa peu-eˬ tawˆ kʼai ve yoˬ.

13Oˇ htaˇ, Gʼuiˬsha ve tcuh kaˍ paˍ teˇ gʼaˇ jawˇmawˇ Aˍhaˆ geh kʼai leh, Canˇ paˍ oˇ ve teˇ hpaˍ hta‸ taˇ kawˆ. Ya‸ nyi nawˬ ma‸ bawˆ gʼaˇ tuˬ yoˬ. Oˇ htaˇ, ngaˬ Gʼuiˬsha hpeh‸ ve hta‸ nawˬ shiˍ la tuˬ yoˬ, teh‸ Gʼuiˬsha kʼoˆ ve yoˬ, teh‸ yawˇ hta‸ kʼoˆ piˇ ve yoˬ.

14A shu awˬ hoˉ te leh ma‸ shiˍ bawˆ laˇ tuˬ le, teh‸ Aˍhaˆ tcuh kaˍ paˍ oˇ ve hta‸ na nyi ve yoˬ. A sha‸ i sheˍ ve ma‸ yaˇ teˇ hpaˍ yoˬ, teh‸ Gʼuiˬsha kʼoˆ ve yoˬ, teh‸ tcuh kaˍ paˍ kʼaw‸ yaw hkʼaw‸ piˇ ve yoˬ. Hkʼa peu-eˬ hkʼoˆ a shu awˬ hoˉ te tuˬ le, teh‸ Aˍhaˆ kʼaw‸ na nyi htaˇ, Nawˬ gʼa te ve yoˬ, teh‸ tcuh kaˍ paˍ kʼaw‸ yaw hkʼaw‸ piˇ ve yoˬ.

15Hkʼe te leh, jawˇmawˇ lehˬ a sha‸ i sheˍ ve ma‸ yaˇ teˇ hpaˍ hta‸ kuˬ yuˬ ve yoˬ. Yawˇ hui hkʼa peu-eˬ 232 gʼaˇ cawˬ ve yoˬ. Oˇ hkʼe te peuˬ hkʼaw‸ nawˉ, Iˉsaˍreˍlaˆ ma‸ yaˇ 7,000 gʼaˇ hta‸ kuˬ yuˬ ve yoˬ.

16Yawˇ hui lehˬ, Beˍhaˍdaˆ leh yawˇ ve awˬ chawˇ jawˇmawˇ 32 gʼaˇ hui mvuhˇ law‸ kʼaw htaˇ aˉ po kʼo hkʼaw tzuhˬ dawˬ bvuhˆ chehˇ ve teˇ yanˇ, yawˇ hui hta‸ lo‸ bawˆ piˇ ve yoˬ.

17A sha‸ i sheˍ ve ma‸ yaˇ teˇ hpaˍ awˉ lawˉ lo‸ bawˆ ve yoˬ. Beˍhaˍdaˆ hpehˇ taˍ ve chaw jaˆ teˇ hpaˍ kʼaw‸ la leh, Saˍmaˍriˆ venˇ hkʼaw ma‸ moˍ lonˉ tawˆ la chehˇ ve awˬ lawn Beˍhaˍdaˆ hta‸ kʼoˆ piˇ ve yoˬ.

18Oˇ htaˇ Beˍhaˍdaˆ lehˬ, Yawˇ hui ngaˬ hui hta‸ ca bawˆ la chehˇ ve maˇ kʼoˆ, ngaˬ hui geh shaˉ caˆ ca caˇ la chehˇ ve maˇ kʼoˆ, hkʼaˬ hkʼe ka‸ yawˇ hui hta‸ awˬ te‸ te‸ hpeh yuˬ-o‸, teh‸ yawˇ ve chaw teˇ hpaˍ hta‸ tawˇ piˇ ve yoˬ.

19A sha‸ i sheˍ ve yaˇ nehˬ teˇ hpaˍ awˉ lawˉ bawˆ kʼai leh, Iˉsaˍreˍlaˆ ma‸ yaˇ teˇ hpaˍ yawˇ hui hkʼaˇ suh gʼa‸ laˬ ve yoˬ.

20Yawˇ hui lehˬ hkʼa mawˬ ve canˇ paˍ teˇ hpaˍ hta‸ tiˇ pehˍ kʼai ve yoˬ. Hkʼe te leh, Suˇriˆ maˬ yaˇ teˇ hpaˍ gʼuiˇ hpaw-e ve yoˬ. Beˍhaˍdaˆ htawˇ iˉ mvuhˇ ciˇ ve ma‸ yaˇ teˇ moˍ hta‸ shiˍ leh hpaw-e ve yoˬ.

21Jawˇmawˇ Aˍhaˆ lehˬ ti mi cawˬ kuiˬ hpawˇ lo kʼai leh, iˉ mvuhˇ leh iˉ mvuhˇ lawˬ teˇ hpaˍ hta‸ yuˬ gʼa ve yoˬ. Suˇriˆ ma‸ yaˇ teˇ hpaˍ suh maˇ jaˇ ve yoˬ.

22Oˇ ve hkʼaw‸ nawˉ, tcuh kaˍ paˍ Aˍhaˆ geh kʼai leh, Kʼo‸-e leh nawˬ ve ta‸ yehˬ teˇ hpaˍ hta‸ hkʼa deh‸ ca kʼaw‸ gu te taˍ-o‸. Suˇriˆ chaw hui ca kʼaw‸ bawˆ la tuˬ sheˍ ve yoˬ, teh‸ yawˇ hta‸ kʼoˆ piˇ ve yoˬ.

23Jawˇmawˇ Beˍhaˍdaˆ ve ma‸ poˍ lonˉ teˇ hpaˍ yawˇ hta‸ chi hkʼe kʼoˆ piˇ ve yoˬ. Iˉsaˍreˍ laˆ ve gʼuiˬsha teˇ hpaˍ lehˬ, hkʼaw pui teˇ hpaˍ hta‸ uˉ peunˍ chehˇ ve gʼuiˬsha hpeh‸ ve yoˬ. Chi hta‸ pa taw, yawˇ hui ma‸ bawˆ gʼaˇ ve yoˬ. Ya‸ hkʼaˇ, miˬ tawˬ kuiˬ lo ngaˬ hui yawˇ hui hta‸ bawˆ da‸ ve kʼo, ngaˬ hui gʼaˇ tuˬ yoˬ.

24Chi beu‸ jawˇmawˇ oˇ ve 32 gʼaˇ hta‸ yuˬ baˬ leh, yawˇ hui awˬ tan miˬ tawˬ kuiˬ lo ma‸ bawˆ puiˉ ve jawˇmawˇ teˇ hpaˍ hta‸ kʼaw‸ leuˆ yuˬ-o‸.

25Oˇ hkʼe te peuˬ hkʼaw‸ nawˉ, ponˬ laˬ htaˇ teˇ pawˆ hkʼe taw maˇ ve ma‸ yaˇ, iˉ mvuhˇ leh iˉ mvuhˇ lawˬ teˇ hpaˍ hta‸ kʼaw‸ ca keu-o. Chi teˇ pawˆ, Iˉsaˍreˍlaˆ chaw hui hta‸ miˬ tawˬ kuiˬ lo ma‸ bawˆ leh, ngaˬ hui gʼaˇ tuˬ yoˬ, teh‸ Beˍhaˍdaˆ hta‸ kʼoˆ piˇ ve yoˬ. Beˍ haˍdaˆ lehˬ, yawˇ hui dawˇ hkʼaˇ piˇ ve hkʼe te ve yoˬ.

26Beˍhaˍdaˆ lehˬ yawˇ ve ma‸ moˍ hta‸ shiˍ veu laˇ leh, Iˉsaˍreˍlaˆ chaw hui hta‸ ca bawˆ tuˬ, Aˍhpehˆ venˇ lo kʼai ve yoˬ.

27Iˉsaˍreˍlaˆ chaw hui htawˇ, ma‸ bawˆ tuˬ hkʼa deh‸ gu taˍ ve yoˬ. Yawˇ hui nyiˇ moˍ pehˬ leh Suˇriˆ chaw hta‸ law chehˇ taˍ ve yoˬ. Suˇriˆ chaw hta‸ tehˆ da‸ nyi ve teˇ yanˇ, Iˉsaˍ reˍlaˆ chaw lehˬ aˉ che‸ moˍ ehˉ nyiˇ moˍ hkʼe ceh hpeh‸ ve yoˬ.

28Gʼuiˬsha ve tcuh kaˍ paˍ teˇ gʼaˇ jawˇmawˇ Aˍhaˆ geh kʼai leh, yawˇ hta‸ chi hkʼe kʼoˆ piˇ ve yoˬ. Gʼuiˬsha kʼoˆ ve, Suˇriˆ chaw teˇ hpaˍ lehˬ, ngaˬ hta‸ hkʼaw pui teˇ hpaˍ hta‸ ceh uˉ peunˍ ve Gʼuiˬsha hpeh‸ ve, teh‸ kʼoˆ ve pa taw, yawˇ hui hta‸ nawˬ ve la‸ sheh hkʼaw ngaˬ chiˇ a‸ laˇ tuˬ yoˬ. Oˇ htaˇ, nawˬ leh nawˬ ve chaw teˇ hpaˍ lehˬ, ngaˬ Gʼuiˬsha hpeh‸ ve hta‸ shiˍ la tuˬ yoˬ, teh‸ yawˇ hta‸ kʼoˆ piˇ ve yoˬ.

29Suhˍ nyi hkʼa gaˬ, Iˉsaˍreˍlaˆ chaw leh Suˇriˆ ma‸ yaˇ teˇ hpaˍ a shu yawˇ ve ta‸ hkʼaw ceh tiˉ chehˇ taˍ ve yoˬ. Suhˍ nyi teˇ nyi gaˬ htaˇ, yawˇ hui tanˬ bawˆ da‸ leh, Iˉsaˍreˍlaˆ chaw lehˬ Suˇriˆ ma‸ yaˇ 100,000 gʼaˇ hta‸ tiˇ pehˍ piˇ ve yoˬ.

30Cawˬ taˍ sheˍ ve Suˇriˆ ma‸ yaˇ teˇ hpaˍ Aˍhpehˆ venˇ lo gʼuiˇ kʼo‸-e ve yoˬ. Lanˇ venˇ kʼaw‸ paˆ teˍ leh, Suˇriˆ ma‸ yaˇ 27,000 gʼaˇ suh-e ve yoˬ. Beˍhaˍdaˆ htawˇ venˇ oˇ ve hkʼaw gʼuiˇ lo‸-e leh, yehˬ teˇ maˬ hkʼaw ca va‸ taˍ ve yoˬ.

31Oˇ htaˇ yawˇ ve ma‸ poˍ lonˉ teˇ hpaˍ yawˇ geh laˬ leh kʼoˆ ve, Iˉsaˍreˍlaˆ ve jawˇmawˇ teˇ hpaˍ lehˬ ha kʼaˉ puiˉ jaˇ ve yoˬ, teh‸ kʼoˆ ve hkawˇ ngaˬ hui gʼa kaˇ jaw ve yoˬ. Ngaˬ hui meh htuˉ pui hpa veu‸ deh leh, a shu yawˇ ve kʼawˍ peˍ hta‸ aˉ caˆ hkeh hpeh peuˬ hkʼaw‸ nawˉ, Iˉsaˍreˍlaˆ ve jawˇmawˇ geh kʼai tuˬ, ngaˬ hui hta‸ a hkaw-anˬ peˬ laˇ-oˆ. Oˇ hkʼe te ve kʼo, yawˇ nawˬ hta‸ ponˬ laˇ tuˬ yoˬ hehˉ, teh‸ Beˍhaˍdaˆ hta‸ kʼoˆ piˇ ve yoˬ.

32Hkʼe te leh, Yawˇ hui meh htuˉ pui hpa veu‸ deh peuˬ hkʼaw‸ nawˉ, a shu yawˇ ve kʼawˍ peˍ hta‸ aˉ caˆ hkeh hpeh leh, Aˍhaˆ geh laˬ ve yoˬ. Nawˬ ve awˬ ceˬ Beˍhaˍdaˆ a sha‸ gʼa ponˬ tuˬ, nawˬ hta‸ ca lawˬ hkawˉ la ve yoˬ, teh‸ yawˇ hui Aˍhaˆ hta‸ kʼoˆ piˇ ve yoˬ. Yawˇ te‸ chehˇ sheˍ laˇ. Oˇ hkʼe yoˬ kʼo, da‸ ve yoˬ. Yawˇ lehˬ ngaˬ ve awˬ viˉ paˍ hkʼe hpeh‸ ve yoˬ, teh‸ Aˍhaˆ yawˇ hui hta‸ kʼoˆ piˇ ve yoˬ.

33Beˍhaˍdaˆ ve ma‸ poˍ lonˉ teˇ hpaˍ lehˬ, Aˍhaˆ ve tawˇ hta‸ hkʼa deh‸ na chehˇ leh, Yawˇ lehˬ ngaˬ ve awˬ viˉ paˍ hkʼe hpeh‸ ve yoˬ, teh‸ kʼoˆ ve tawˇ hta‸ gʼa kaˇ htaˇ, Yoˬ, nawˬ kʼoˆ ve hkʼe yoˬ. Yawˇ lehˬ nawˬ ve awˬ viˉ paˍ hkʼe hpeh‸ ve yoˬ, teh‸ yawˇ hta‸ kʼoˆ piˇ ve yoˬ. Yawˇ hta‸ ngaˬ geh shiˍ veu laˇ-oˆ, teh‸ Aˍhaˆ yawˇ hui hta‸ kʼoˆ piˇ ve yoˬ. Beˍhaˍdaˆ gaˬ la ve teˇ yanˇ, Aˍhaˆ lehˬ yawˇ hta‸ yawˇ ve iˉ mvuhˇ lawˬ hkʼaw ciˇ tcuh ve yoˬ.

34Oˇ htaˇ Beˍhaˍdaˆ kʼoˆ ve, Ngaˬ pa nawˬ ve awˬ pa geh bawˆ yuˬ taˍ ve venˇ teˇ hpaˍ, ngaˬ nawˬ hta‸ kʼaw‸ hkʼaw‸ laˇ tuˬ yoˬ. Ngaˬ pa lehˬ, Saˍmaˍriˆ venˇ hkʼaw mawˇ hawˇ mawˇ vuiˬ ve chehˇ kuiˬ hpaw taˍ ve hkʼe, nawˬ htawˇ Daˍmaˍsehˆ venˇ hkʼaw oˇ hkʼe te hpeh‸ ve yoˬ, teh‸ Aˍhaˆ hta‸ kʼoˆ piˇ ve yoˬ. Oˇ hkʼe yoˬ kʼo, ngaˬ nawˬ hta‸ ponˬ laˇ tuˬ yoˬ, teh‸ Aˍhaˆ yawˇ hta‸ kʼoˆ piˇ ve yoˬ. Hkʼe te leh, yawˇ Beˍhaˍdaˆ geh shaˉ caˆ caˇ leh yawˇ hta‸ ponˬ piˇ ve yoˬ.

35Oˇ htaˇ Gʼuiˬsha kʼoˆ piˇ ve hkʼe, tcuh kaˍ paˍ teˇ gʼaˇ lehˬ awˬ nu ve tcuh kaˍ paˍ teˇ gʼaˇ geh kʼai leh, Ngaˬ hta‸ a ciˉ chu-iˬ hpehˇ laˇ-oˆ, teh‸ yawˇ hta‸ kʼoˆ piˇ ve yoˬ. Ya‸ hkʼaˇ, yawˇ maˇ chu-iˬ hpehˇ piˇ.

36Hkʼe te leh yawˇ kʼoˆ ve, Nawˬ lehˬ Gʼuiˬsha ve tawˇ hta‸ maˇ na yuˬ ve pa taw, chi beu‸ nawˬ ngaˬ hta‸ hpaˆ da‸ taˉ leh tawˆ-e ve kʼo, laˇ caˬ shiˉ che‸ pehˍ ve hta‸ gʼa hkanˍ tuˬ yoˬ, teh‸ yawˇ hta‸ kʼoˆ piˇ ve yoˬ. Yawˇ kʼoˆ ve hkʼe, tcuh kaˍ paˍ oˇ ve lehˬ laˇ caˬ shiˉ che‸ pehˍ ve hta‸ gʼa hkanˍ ve yoˬ.

37Oˇ ve hkʼaw‸ nawˉ, tcuh kaˍ paˍ oˇ ve awˬ nu ve chaw teˇ gʼaˇ geh kʼaw‸ kʼai leh, Ngaˬ hta‸ a ciˉ chu-iˬ hpehˇ laˇ-oˆ, teh‸ yawˇ hta‸ kʼoˆ piˇ ve yoˬ. Chaw oˇ ve yawˇ hta‸ hkʼa jaˇ-ehˬ teˇ hkʼe chu-iˬ hpehˇ piˇ ve yoˬ.

38Oˇ htaˇ, tcuh kaˍ paˍ oˇ ve lehˬ yawˇ hta‸ shu maˇ tawnˇ gʼa tuˬ te gaˇ ve pa taw, yawˇ ve mehˆ hpfuhˇ hta‸ hpa yuˬ beh leh, Iˉsaˍreˍlaˆ jawˇmawˇ kʼaw‸ la tuˬ ve ya‸ kʼaw hpuiˇ lo ca law taˍ ve yoˬ.

39Jawˇmawˇ kʼaw‸ la ve teˇ yanˇ, yawˇ jawˇmawˇ hta‸ chi hkʼe kʼoˆ piˇ ve yoˬ. Jawˇmawˇ-oˬ, ngaˬ ma‸ bawˆ chehˇ ve teˇ yanˇ, awˬ nu ve ma‸ yaˇ teˇ gʼaˇ canˇ paˍ teˇ gʼaˇ hta‸ hpeh veu laˇ leh, ngaˬ hta‸ chi hkʼe kʼoˆ laˇ ve yoˬ. Chaw chi hpaˇ hta‸ hkʼa deh‸ shaw taˍ-o‸. Yawˇ hpaw tawˆ-e ve kʼo, nawˬ yawˇ awˬ tan gʼa suh tuˬ yoˬ, maˇ heˆ kʼo, hpu 3,000 gʼa keu tuˬ yoˬ, teh‸ ngaˬ hta‸ kʼoˆ laˇ ve yoˬ.

40Ya‸ hkʼaˇ, ngaˬ lehˬ awˬ nu ve kanˉ teˇ hpaˍ hta‸ te chehˇ ve teˇ yanˇ, chaw oˇ ve hpaw tawˆ-e ve yoˬ, teh‸ jawˇmawˇ hta‸ kʼoˆ piˇ ve yoˬ. Oˇ htaˇ jawˇmawˇ lehˬ, Kʼoˆ taˍ ve hkʼe nawˬ gʼa hkanˍ ve tiˉ cawˬ ve yoˬ, teh‸ yawˇ hta‸ kʼaw‸ yaw hkʼaw‸ piˇ ve yoˬ.

41Oˇ htaˇ, tcuh kaˍ paˍ oˇ ve lehˬ, yawˇ ve mehˆ hpfuhˇ hta‸ beh taˍ ve hpa hta‸ yehˬ baˬ ve yoˬ. Hkʼe te leh, yawˇ lehˬ tcuh kaˍ paˍ teˇ gʼaˇ hpeh‸ ve hta‸ jawˇmawˇ shiˍ la ve yoˬ.

42Oˇ htaˇ tcuh kaˍ paˍ jawˇmawˇ hta‸ chi hkʼe kʼoˆ piˇ ve yoˬ. Gʼuiˬsha kʼoˆ ve, ngaˬ nawˬ hta‸ tiˇ pehˍ tcuh taˍ ve chaw hta‸ nawˬ ponˬ piˇ ve pa taw, yawˇ awˬ tan nawˬ gʼa suh leh, nawˬ ve ma‸ yaˇ teˇ hpaˍ luˬ kʼai sheˆ kʼai tuˬ yoˬ, teh‸ yawˇ hta‸ kʼoˆ piˇ ve yoˬ.

43Tawˇ oˇ ve hta‸ jawˇmawˇ gʼa kaˇ htaˇ, dawˇ haˍ jaˇ leh Saˍmaˍriˆ venˇ lo kʼo‸-e ve yoˬ.

← Chapter 19 Jump to: Chapter 21 →