1 Kings 11

Lahu Bible Edited © Thailand Bible Society and Bible Society of Myanmar, 2010, 2020.

1Sawˉla‸monˍ lehˬ, buiˇshaˆaˉnaˆ yaˇ miˇ laiˉ gʼaˇ hta‸ heuˆ ve yoˬ. Eˇjiˇtu‸ jawˇmawˇ yaˇ miˇ hta‸ ceh tiˉ heuˆ ve maˇ heˆ. Yawˇ lehˬ, Hiˇtiˆ, Mawˇbaˆ, Aˍmonˍ, Eˇdonˍ leh Siˉdonˍ mvuhˇmiˬ hkʼaw chehˇ ve yaˇ miˇ teˇ hpaˍ hta‸ ka‸ heuˆ ve yoˬ.

2Buiˇshaˆaˉnaˆ chaw chi teˇ hpaˍ hta‸ maˇ gʼa heuˆ tuˬ Gʼuiˬsha tawˇ piˇ taˍ ve htawˇ, yawˇ lehˬ yaˇ miˇ oˇ ve teˇ hpaˍ hta‸ heuˆ ve yoˬ.

3Sawˉla‸monˍ lehˬ awˬ miˇ ma suhˍ ha gʼaˇ cawˬ leh, awˬ miˇ ma i shehˆ ha gʼaˇ cawˬ ve yoˬ. Hkʼe te leh, yawˇ Gʼuiˬsha hta‸ baˬ taˉ tuˬ yawˇ hui te piˇ ve yoˬ.

4Yawˇ mawˇ la htaˇ, yawˇ hui yawˇ hta‸ awˬ nu ve gʼuiˬsha teˇ hpaˍ hta‸ oˉ kʼoˍ pui tcuh ve yoˬ. Yawˇ lehˬ yawˇ ve awˬ pa Daˍviˆ hkʼa shuˍ, Gʼuiˬsha hta‸ ka ti‸ maˇ yeˬ.

5Yawˇ lehˬ, Siˉdonˍ chaw hui ve Aˍshaˆtaˍrehˆ gʼuiˬsha ma leh, Aˍmonˍ chaw hui ve Miˆlaˍkonˍ gʼuiˬsha hta‸ oˉ kʼoˍ pui ve yoˬ.

6Yawˇ lehˬ Gʼuiˬsha hta‸ te ya‸ jaˇ leh, yawˇ awˬ paˍ Daˍviˆ hkʼa shuˍ, Gʼuiˬsha hta‸ ka ti‸ maˇ yeˬ.

7Yeˍruˆsaˍlehnˍ venˇ mvuhˇ nyi tawˆ hpawˇ lo cawˬ ve hkʼaw pui hkʼoˆ lo Mawˇbaˆ chaw hui ve Hkeˍmoˆ gʼuiˬsha leh, Aˍmonˍ chaw hui ve Miˆlaˍkonˍ gʼuiˬsha hta‸ oˉ kʼoˍ pui kuiˬ teˇ kaˬ te taˍ ve yoˬ.

8Yawˇ ve awˬ miˇ ma teˇ hpaˍ a shu yawˇ ve gʼuiˬsha teˇ hpaˍ hta‸ oˉ kʼo pui leh tuˉ tanˇ kuiˬ teˇ hpaˍ htawˇ chehˇ kuiˬ laiˉ kaˬ lo te piˇ taˍ ve yoˬ.

9Gʼuiˬsha Sawˉla‸monˍ geh nyiˇ pawˆ laˬ leh, awˬ kaˍ awˬ nu ve gʼuiˬsha teˇ hpaˍ hta‸ oˉ kʼoˍ maˇ gʼa pui tuˬ ca kʼoˆ piˇ la ve htawˇ, yawˇ Gʼuiˬsha ve tawˇ hta‸ maˇ na yuˬ.

10Yawˇ Gʼuiˬsha hta‸ baˬ taˉ ve yoˬ. Hkʼe te leh, Gʼuiˬsha nyi ma zuhˆ jaˇ leh yawˇ hta‸ chi hkʼe kʼoˆ piˇ ve yoˬ.

11Nawˬ lehˬ ngaˬ ve tawˇ hta‸ ponˬ leuˉ leh, ngaˬ ve ka ti‸ hta‸ te luˬ ve pa taw, mvuhˇmiˬ chi hta‸ nawˬ ve la‸ sheh hkʼaw lo ngaˬ kʼaw‸ yuˬ hkʼaw‸ leh, nawˬ ve ma‸ poˍ lonˉ teˇ gʼaˇ hta‸ piˇ tuˬ yoˬ.

12Yaˬ hkʼaˇ, nawˬ pa Daˍviˆ ve mehˆ hpfuhˇ hta‸ ngaˬ nyi leh, nawˬ te‸ chehˇ sheˍ ve awˬ yanˇ hkʼaw ngaˬ oˇ hkʼe maˇ te sheˍ. Nawˬ ve yaˇ paˍ awˬ co-e gaˬ htaˇ heh‸ ngaˬ oˇ hkʼe te tuˬ yoˬ.

13Ya‸ hkʼaˇ, mvuhˇmiˬ chi hkʼa peu-eˬ ve hta‸ ngaˬ yawˇ ve la‸ sheh hkʼaw yuˬ tawˆ piˇ tuˬ ve maˇ he. Nawˬ pa Daˍviˆ leh, ngaˬ leuˆ yuˬ taˍ ve Yeˍruˆsaˍlehnˍ venˇ hta‸ pa taw, Iˉsaˍreˍlaˆ chaw ceuˬ teˇ ceuˬ hta‸ ngaˬ teh taˉ laˇ tuˬ sheˍ ve yoˬ, teh‸ Sawˉla‸monˍ hta‸ kʼoˆ piˇ ve yoˬ.

14Oˇ ve hkʼaw‸ nawˉ, Gʼuiˬsha lehˬ Eˇdonˍ chaw Haˍdaˆ hta‸ nyi ma gu piˇ leh, Sawˉla‸monˍ hta‸ kʼaw‸ hpfuhˆ tcuh ve yoˬ.

15Ponˬ laˬ htaˇ Daˍviˆ Eˇdonˍ mvuhˇmiˬ hta‸ bawˆ yuˬ gʼa peuˬ htaˇ, Daˍviˆ ve ma‸ ponˍ lonˉ Yaˍbaˆ mvuhˇmiˬ oˇ ve hkʼaw lo kʼai leh suh taˍ ve chaw teˇ hpaˍ hta‸ ca tuˍ piˇ jaw ve yoˬ.

16Yaˍbaˆ leh yawˇ ve ma‸ yaˇ teˇ hpaˍ oˇ kaˬ lo ha pa hkaw‸ maˬ chehˇ leh, Eˇdonˍ chaw hawˉ hkʼaˆ paˍ hkʼa peu-eˬ ve hta‸ tiˇ pehˍ piˇ ve yoˬ.

17Ya‸ hkʼaˇ, Haˍdaˆ leh yawˇ ve awˬ ceuˬ awˬ hkʼaˇ teˇ hpaˍ, Eˇjiˇtu‸ mvuhˇmiˬ lo hpaw-e ve yoˬ. (Oˇ ve teˇ yanˇ Haˍdaˆ lehˬ yaˇ ehˉ hpeh‸ chehˇ sheˍ ve yoˬ.)

18Yawˇ hui Meˇdiˍanˍ mvuhˇmiˬ lo kʼai taˉ peuˬ hkʼaw‸ nawˉ, Paˍranˍ mvuhˇmiˬ lo kʼaw‸ kʼai ve yoˬ. Chaw teˇ hpaˍ hpaˍ yawˇ hui hta‸ ca pawnˇ la ve yoˬ. Oˇ ve hkʼaw‸ nawˉ yawˇ hui Eˇjiˇtu‸ mvuhˇmiˬ lo kʼai leh, Eˇjiˇtu‸ jawˇmawˇ Haˍdaˆ hta‸ chehˇ kuiˬ yehˬ piˇ leh, caˍ piˇ taw piˇ taˍ ve yoˬ.

19Haˍdaˆ lehˬ Eˇjiˇtu‸ jawˇmawˇ hta‸ awˬ chawˇ hpeh‸ la leh, Eˇjiˇtu‸ jawˇmawˇ lehˬ Haˍdaˆ hta‸ yawˇ ve awˬ miˇ ma Taˍpaˍnehˆ ve awˬ nyi ma piˇ ve yoˬ.

20Yaˇ miˇ oˇ ve lehˬ, Geˍnuˇbaˆ teh‸ kʼoˆ ve yaˇ paˍ teˇ gʼaˇ paw la ve yoˬ. Yaˇ paˍ oˇ ve lehˬ, Eˇjiˇtu‸ jawˇmawˇ ve hawˉ yehˬ hkʼaw uiˍ la ve yoˬ.

21Haˍdaˆ Eˇjiˇtu‸ mvuhˇmiˬ hkʼaw chehˇ taˍ ve teˇ yanˇ, Daˍviˆ leh yawˇ ve ma‸ poˍ lonˉ Yaˍbaˆ hui suh kʼai peuˬ ve awˬ hkawˇ hta‸ gʼa kaˇ ve yoˬ. Hkʼe te leh, yawˇ jawˇmawˇ geh kʼai leh, Ngaˬ hta‸ ngaˬ ve mvuhˇmiˬ lo kʼaw‸ kʼo‸-e tuˬ a hkaw-anˬ pe‸ laˇ-oˆ, teh‸ jawˇmawˇ hta‸ kʼoˆ piˇ ve yoˬ.

22Oˇ htaˇ jawˇmawˇ lehˬ, Aˬ hto‸ ma pa taw le. Nawˬ choˬ kaˬ lo chehˇ ve aˬ hto‸ ma nyi ma maˇ sha kuiˬ cawˬ le, teh‸ Haˍdaˆ hta‸ kʼaw‸ kʼoˆ piˇ ve yoˬ. Ngaˬ hta‸ a ciˉ kʼaw‸ kʼo‸-e peu laˇ-oˆ, teh‸ Haˍdaˆ jawˇmawˇ hta‸ kʼaw‸ yaw hkʼaw‸ piˇ ve yoˬ. Oˇ ve hkʼaw‸ nawˉ yawˇ ve mvuhˇmiˬ lo kʼaw‸ kʼo‸-e ve yoˬ. Haˍdaˆ lehˬ, Eˇdonˍ chaw hui ve jawˇmawˇ hpeh‸ leh, Iˉsaˍreˍlaˆ chaw hui ve canˇ paˍ lonˉ hpeh‸ ve yoˬ.

23Gʼuiˬsha lehˬ, Eˇlaˍdaˆ ve yaˇ Reˍzonˍ hta‸ htawˇ nyi ma gu piˇ leh, Sawˉla‸ monˍ hta‸ kʼaw‸ hpfuhˆ tcuh ve yoˬ. Reˍzonˍ lehˬ yawˇ ve awˬ shehˍ hpaˇ Zawˇbaˆ jawˇmawˇ Haˍdaˍdeˍzaˍ hta‸ kʼaw‸ hpfuhˆ leh,

24chaw hpfuhˆ teˇ moˍ hta‸ awˬ hoˉ te chehˇ ve yoˬ. (Chi hkʼe hpeh‸ la ve lehˬ, Daˍviˆ Haˍdaˍ deˍzaˍ hta‸ ma‸ bawˆ gʼaˇ leh, Suˇriˆ ma‸ yaˇ teˇ hpaˍ hta‸ tiˇ pehˍ piˇ peuˬ hkʼaw‸ nawˉ htaˇ yoˬ.) Reˍzonˍ leh yawˇ ve chaw teˇ hpaˍ Daˍmaˍsehˆ venˇ lo kʼai leh, yawˇ hui yawˇ hta‸ Suˇriˆ mvuhˇmiˬ ve jawˇmawˇ te tcuh ve yoˬ.

25Sawˉla‸monˍ jawˇmawˇ te chehˇ ve teˇ co-e, yawˇ htawˇ Iˉsaˍreˍlaˆ chaw hui ve canˇ paˍ hpeh‸ chehˇ ve yoˬ.

26Jawˇmawˇ Sawˉla‸monˍ hta‸ kʼaw‸ hpfuhˆ ve awˬ nu ve chaw teˇ gʼaˇ lehˬ, Eˇhpaˍrenˍ mvuhˇ miˍ Zeˍreˍdaˆ venˇ hkʼaw chehˇ ve Neˍbaˆ ve yaˇ Yeˍyawˇ baoˍ hpeh‸ ve yoˬ. Yawˇ lehˬ Sawˉla‸monˍ ve ma‸ poˍ lonˉ hpeh‸ leh, yawˇ ve awˬ-e lehˬ Zeˍruˇaˍ teh‸ kʼoˆ ve mehˇchawˇma hpeh‸ ve yoˬ.

27Yawˇ Sawˉla‸monˍ hta‸ gʼa hpfuhˆ ve awˬ lawn chi hkʼe cawˬ ve yoˬ. Sawˉla‸monˍ lehˬ, Miˆlawˇ teh‸ kʼoˆ ve ta‸ yehˬ leh lanˇ venˇ hta‸ kʼaw‸ gu kawˍ ve yoˬ.

28Yeˍyawˇbaoˍ lehˬ, kanˉ te puiˉ ve yaˇ nehˬ teˇ gʼaˇ hpeh‸ ve hta‸ Sawˉla‸monˍ gʼa shiˍ leh, Maˍnaˍseˍ leh Eˇhpaˍrenˍ mvuhˇmiˬ hkʼaw kanˉ te paˍ hkʼa peu-eˬ hkʼoˆ yawˇ hta‸ kanˉ nyi paˍ awˬ hoˉ te tcuh taˍ ve yoˬ.

29Teˇ nyi htaˇ, Yeˍyawˇbaoˍ Yeˍruˆsaˍlehnˍ venˇ hkʼaw tawˆ la chehˇ ve teˇ yanˇ, Shiˉlonˍ venˇ hkʼaw chehˇ ve Gʼuiˬsha ve tcuh kaˍ paˍ Aˍhiˇyaˆ yawˇ hta‸ ya‸ kʼaw kʼaˉ lo ca hpuˇ da‸ la ve yoˬ.

30Aˍhiˇyaˆ lehˬ, yawˇ veu‸ deh taˍ ve veu‸ kʼaˇ hta‸ 12 peˆ tzuh‸ suhˍ leh, Yeˍyawˇbaoˍ hta‸ chi hkʼe kʼoˆ piˇ ve yoˬ.

31Hpa chi ve 10 peˆ hta‸ nawˬ yuˬ taˍ-o‸. Awˬ lawn kʼo, Iˉsaˍreˍlaˆ ve Gʼuiˬsha nawˬ hta‸ chi hkʼe ca kʼoˆ piˇ-oˆ, teh‸ ngaˬ hta‸ kʼoˆ laˇ ve yoˬ. Mvuhˇmiˬ chi ve hta‸ Sawˉla‸monˍ ve la‸ sheh hkʼaw ngaˬ yuˬ tawˆ leh, nawˬ hta‸ chaw 10 ceuˬ pe‸ laˇ tuˬ yoˬ.

32Ngaˬ ve awˬ ceˬ Daˍviˆ ve mehˆ hpfuhˆ leh, ngaˬ leuˆ yuˬ taˍ ve Yeˍruˆsaˍlehnˍ venˇ hta‸ pa taw, ngaˬ Sawˉla‸monˍ hta‸ chaw teˇ ceuˬ ceh tiˉ piˇ tuˬ yoˬ.

33Ngaˬ chi hkʼe gʼa te ve lehˬ, Sawˉla‸monˍ ngaˬ hta‸ chiˇ baˬ taˉ leh, Siˉdonˍ chaw hui ve Aˍshaˆtaˍrehˆ gʼuiˬsha ma, Mawˇbaˆ chaw hui ve Hkeˍmoˆ gʼuiˬsha, Aˍmonˍ chaw hui ve Miˆlaˍkonˍ gʼuiˬsha, chi teˇ hpaˍ hta‸ oˉ kʼoˍ pui ve pa taw yoˬ. Sawˉla‸monˍ lehˬ yawˇ awˬ paˍ Daˍviˆ hkʼa shuˍ ngaˬ ve tawˇ hta‸ maˇ na yuˬ. Yawˇ lehˬ ngaˬ ve awˬliˇtawˇhkawˇ teˇ hpaˍ hta‸ ponˬ leuˉ leh, ngaˬ hta‸ te ya‸ jaˇ peuˬ.

34Ya‸ hkʼaˇ, ngaˬ ve awˬliˇtawˇhkawˇ teˇ hpaˍ hta‸ na yuˬ puiˉ ve ngaˬ ve awˬ ceˬ paˍ Daˍviˆ ve mehˆ hpfuhˇ hta‸ nyi leh, mvuhˇmiˬ chi ve hkʼa peu-eˬ hta‸ Sawˉla‸monˍ ve la‸ sheh hkʼaw yuˬ hkʼaw‸ piˇ tuˬ ve maˇ heˆ. Yawˇ a sha‸ te‸ chehˇ ve teˇ co-e ngaˬ yawˇ hta‸ awˬ me‸ awˬ hponˇ leh kanˇ paˆ piˇ taˍ sheˍ ve yoˬ.

35Sawˉla‸monˍ ve yaˇ teˇ co-e kʼaw‸ gaˬ htaˇ, mvuhˇmiˬ chi hta‸ ngaˬ yuˬ hkʼaw‸ leh, nawˬ hta‸ chaw ceuˬ 10 ceuˬ piˇ laˇ tuˬ yoˬ.

36Ya‸ hkʼaˇ, ngaˬ hta‸ oˉ kʼoˍ pui kuiˬ hpeh‸ ve Yeˍruˆsaˍlehnˍ venˇ chi hkʼaw lo, ngaˬ ve awˬ ceˬ paˍ Daˍviˆ ve awˬ ceuˬ awˬ hkʼaˇ teˇ gʼaˇ peuˬ teˇ gʼaˇ uˉ peunˍ chehˇ hpeh‸ tuˬ, chaw ceuˬ teˇ ceuˬ hta‸ Sawˉla‸monˍ ve yaˇ uˉ peunˍ tuˬ ngaˬ a hkaw-anˬ piˇ tuˬ yoˬ.

37Yeˍyawˇbaoˍ-oˬ, ngaˬ nawˬ hta‸ Iˉsaˍreˍlaˆ chaw hui ve jawˇmawˇ te tcuh laˇ tuˬ yoˬ. Nawˬ uˉ peunˍ gaˇ ve Iˉsaˍreˍlaˆ chaw hui ve mvuhˇmiˬ ehˉ chi teˇ hpaˍ hta‸ nawˬ gʼa uˉ peunˍ tuˬ yoˬ.

38Nawˬ lehˬ, ngaˬ ve awˬ ceˬ paˍ Daˍviˆ hkʼa shuˍ, ngaˬ ve awˬliˇtawˇhkawˇ teˇ hpaˍ hta‸ hkʼa deh‸ na yuˬ leh te chehˇ ve kʼo, hkʼaˬ htaˆ ka‸ ngaˬ nawˬ geh chehˇ tuˬ yoˬ. Ngaˬ nawˬ hta‸ Iˉsaˍreˍlaˆ ve jawˇmawˇ te tcuh laˇ leh, Daˍviˆ hta‸ ngaˬ te piˇ taˍ ve hkʼe, nawˬ ve awˬ ceuˬ awˬ hkʼaˇ teˇ gʼaˇ peuˬ teˇ gʼaˇ hta‸ ngaˬ jawˇmawˇ te tcuh piˇ tuˬ yoˬ.

39Sawˉla‸monˍ venˇbaˆ te ve pa taw, Daˍviˆ ve awˬ ceuˬ awˬ hkʼaˇ teˇ hpaˍ hta‸ ngaˬ ciˍ yanˍ piˇ tuˬ yoˬ. Ya‸ hkʼaˇ, co co taiˍ taiˍ chi hkʼe te piˇ tuˬ ve maˇ heˆ, teh‸ Gʼuiˬsha kʼoˆ ve yoˬ, teh‸ Aˍhiˇyaˆ Yeˍyawˇbaoˍ hta‸ kʼoˆ piˇ ve yoˬ.

40Oˇ htaˇ Sawˉla‸monˍ lehˬ, Yeˍyawˇbaoˍ hta‸ tiˇ pehˍ tuˬ gʼa‸ ca ve yoˬ. Hkʼe te leh Yeˍyawˇ baoˍ Eˇjiˇtu‸ jawˇmawˇ Shiˇshehˆ geh hpaw-e leh, Sawˉla‸monˍ suh htaˇ hkʼa gaˬ oˇ kaˬ lo ca chehˇ taˍ ve yoˬ.

41Sawˉla‸monˍ hkʼa te taˉ ve kanˉ leh, yawˇ cuˇ yiˍ hkʼaˬ ma uiˍ ve awˬ lawn teˇ hpaˍ hta‸ Sawˉla‸monˍ ve li‸ daw hkʼaw bvuh‸ keu taˍ ve yoˬ.

42Yawˇ lehˬ, Yeˍruˆsaˍlehnˍ venˇ hkʼaw chehˇ leh Iˉsaˍreˍlaˆ chaw hui hta‸ 40 hkʼaw‸ uˉ peunˍ ve yoˬ.

43Oˇ ve hkʼaw‸ nawˉ yawˇ suh-e leh, shu yawˇ hta‸ Daˍviˆ ve venˇ hkʼaw tuˍ piˇ ve yoˬ. Hkʼe te leh, yawˇ ve yaˇ paˍ Yawˇbaoˍ yawˇ awˬ tan jawˇmawˇ te ve yoˬ.

← Chapter 10 Jump to: Chapter 12 →