1 Kings 21

Lahu Bible Edited © Thailand Bible Society and Bible Society of Myanmar, 2010, 2020.

← Chapter 20 Jump to: Chapter 22 →

1Jawˇmawˇ Aˍhaˆ ve hawˉ yehˬ paˇ lo, Yeˍsaˍreˍlaˆ venˇ yaˇ Naˍboˆ ve a pehˉ meuˇ hko teˇ maˬ cawˬ ve yoˬ.

2Teˇ nyi htaˇ, Aˍhaˆ Naˍboˆ hta‸ chi hkʼe kʼoˆ piˇ ve yoˬ. Nawˬ ve a pehˉ meuˇ hko ngaˬ hta‸ pe‸ laˇ-oˆ. Awˬ lawn kʼo, hko oˇ ve lehˬ ngaˬ ve hawˉ yehˬ paˇ lo cawˬ leh, ngaˬ gʼawˇ caˉ ti gaˇ ve yoˬ. Hko oˇ ve awˬ tan ngaˬ nawˬ hta‸ leuˉ leh da‸ ve a pehˉ meuˇ hko teˇ maˬ pe‸ laˇ tuˬ yoˬ. Maˇ heˆ kʼo, ngaˬ awˬ hpfuhˇ hkʼa deh‸ piˇ laˇ tuˬ yoˬ, teh‸ Naˍboˆ hta‸ kʼoˆ piˇ ve yoˬ.

3Oˇ htaˇ Naˍboˆ lehˬ, Hko oˇ ve ngaˬ puˍ ngaˬ pi hui piˇ taˉ laˇ ve awˬ shinˉ hpeh‸ ve pa taw, nawˬ hta‸ piˇ laˇ maˇ hpeh‸, teh‸ jawˇmawˇ hta‸ kʼaw‸ yaw hkʼaw‸ piˇ ve yoˬ.

4Tawˇ oˇ ve hta‸ Aˍhaˆ gʼa kaˇ htaˇ, yawˇ nyi ma luˬ jaˇ leh aˉ hkʼaw kʼo‸-e ve yoˬ. Yawˇ te‸ chiˉ maˇ caˇ maˇ dawˬ leh, zuh‸ hpui hkʼoˆ zuh‸ chehˇ taˍ ve yoˬ.

5Oˇ htaˇ, yawˇ miˇ ma Yeˍsaˍbeˍlaˆ lo‸ la leh, Aˬ hto‸ ma pa taw nawˬ nyi ma luˬ leh maˇ caˇ maˇ dawˬ te chehˇ ve le, teh‸ yawˇ hta‸ na nyi ve yoˬ.

6Aˍhaˆ kʼaw‸ yaw hkʼaw‸ leh kʼoˆ ve, Ngaˬ Naˍboˆ ve hko hta‸ vuiˬ yuˬ tuˬ, maˇ heˆ kʼo yawˇ hta‸ a pehˉ meuˇ hko awˬ suhˉ teˇ maˬ ca piˇ tuˬ, ngaˬ yawˇ hta‸ kʼoˆ piˇ ve yoˬ. Ya‸ hkʼaˇ, hko oˇ ve yawˇ ngaˬ hta‸ piˇ laˇ maˇ hpeh‸ ceˇ, teh‸ yawˇ miˇ ma hta‸ kʼoˆ piˇ ve yoˬ.

7Oˇ htaˇ Yeˍsaˍbeˍlaˆ lehˬ, Nawˬ jawˇmawˇ hpeh‸ ve maˇ heˆ laˇ. Tu leh caˇ tuˬ caˇ-oˆ. Nawˬ Naˍboˆ ve hko hta‸ gʼa tuˬ ngaˬ te laˇ tuˬ yoˬ, teh‸ yawˇ hta‸ kʼoˆ piˇ ve yoˬ.

8Oˇ ve hkʼaw‸ nawˉ, Yeˍsaˍbeˍlaˆ li‸ teˇ kʼoˆ bvuh‸ leh, jawˇmawˇ Aˍhaˆ ve yinˉ tcuhˉ ve yoˬ. Oˇ hkʼe te peuˬ hkʼaw‸ nawˉ, li‸ oˇ ve hta‸ Yeˍsaˍreˍlaˆ venˇ hkʼaw chehˇ ve awˬ hoˉ awˬ naˬ teˇ hpaˍ hta‸ feu piˇ ve yoˬ.

9Li‸ oˇ ve hkʼaw chi hkʼe bvuh‸ taˍ ve yoˬ. Caˇ tuˬ ce ve awˬ nyi teˇ nyi yuˬ leh, chaw hkʼa peu-eˬ hta‸ teˇ geh kuˬ hpawnˬ-o‸. Oˇ kaˬ lo Naˍboˆ hta‸ awˬ me‸ awˬ hponˇ cawˬ ve chehˇ kuiˬ lo mui tcuh-o.

10Peuˬ ve kʼo, chaw haiˬ nyiˇ gʼaˇ hta‸ kuˬ leh, Naˍboˆ lehˬ Gʼuiˬsha hta‸ maˇ kʼoˆ, jawˇmawˇ hta‸ maˇ kʼoˆ, hkeu ve yoˬ teh‸ shaˉ hkiˆ hkanˍ tcuh-o. Oˇ hkʼe te peuˬ hkʼaw‸ nawˉ, yawˇ hta‸ venˇ baˬ lo shiˍ kʼai leh, haˉ pui baˬ pehˍ piˇ-oˆ, teh‸ bvuh‸ taˍ ve yoˬ.

11Yeˍsaˍreˍlaˆ venˇ hkʼaw chehˇ ve awˬ hoˉ awˬ naˬ teˇ hpaˍ lehˬ, Yeˍsaˍbeˍlaˆ kʼoˆ ve hkʼe te ve yoˬ.

12Yawˇ hui caˇ tuˬ ce tuˬ ve awˬ nyi teˇ nyi yuˬ leh, chaw hkʼa peu-eˬ ve hta‸ teˇ geh kuˬ hpawnˬ ve yoˬ. Naˍboˆ hta‸ awˬ me‸ awˬ hponˇ cawˬ ve chehˇ kuiˬ lo mui tcuh ve yoˬ.

13Oˇ hkʼe te peuˬ hkʼaw‸ nawˉ, haiˬ ve chaw nyiˇ gʼaˇ tu la leh, Naˍboˆ lehˬ Gʼuiˬsha hta‸ maˇ kʼoˆ, jawˇmawˇ hta‸ maˇ kʼoˆ hkeu ve yoˬ, teh‸ shaˉ hkiˆ hkanˬ ve yoˬ. Hkʼe te leh yawˇ hui Naˍboˆ hta‸ venˇ baˬ lo shiˍ kʼai leh, haˉ pui baˬ pehˍ piˇ ve yoˬ.

14Oˇ ve hkʼaw‸ nawˉ yawˇ hui lehˬ, Naˍboˆ suh peuˬ, teh‸ Yeˍsaˍbeˍlaˆ geh li‸ bvuh‸ feu piˇ ve yoˬ.

15Li‸ oˇ ve hta‸ Yeˍsaˍbeˍlaˆ gʼa mawˬ htaˇ, yawˇ Aˍhaˆ geh kʼai leh, Naˍboˆ suh peuˬ. Chi beu‸ hko oˇ ve hta‸ nawˬ ca yuˬ loˬ, teh‸ yawˇ hta‸ kʼoˆ piˇ ve yoˬ.

16Oˇ htaˇ, Aˍhaˆ teˇ cawˬ haˉ tu la leh, hko oˇ ve hta‸ ca yuˬ ve yoˬ.

17Oˇ htaˇ Gʼuiˬsha lehˬ, Tiˉshaˍbiˆ venˇ yaˇ tcuh kaˍ paˍ Eˇliˇya‸ hta‸ chi hkʼe kʼoˆpiˇ ve yoˬ.

18Saˍmaˍriˆ venˇ hkʼaw chehˇ ve jawˇmawˇ Aˍhaˆ geh kʼai-o. Yawˇ lehˬ, Naˍboˆ ve hko hkʼaw chehˇ taˍ laˇ ve hta‸ nawˬ gʼa mawˬ tuˬ yoˬ.

19Ngaˬ chi hkʼe kʼoˆ ve yoˬ, teh‸ yawˇ hta‸ kʼoˆ piˇ-oˆ. Hko shehˍ hpaˇ hta‸ tiˇ pehˍ leh, hko hta‸ nawˬ yuˬ-a teh‸ te chehˇ ve laˇ. Naˍboˆ ve awˬ suhˍ hta‸ hpuiˇ leh‸ ve chehˇ kuiˬ lo, nawˬ ve awˬ suhˍ hta‸ htawˇ hpuiˇ leh‸ tuˬ yoˬ, teh‸ yawˇ hta‸ kʼoˆ piˇ-oˆ, teh‸ Eˇliˇya‸ hta‸ kʼoˆ piˇ ve yoˬ.

20Jawˇmawˇ Aˍhaˆ Eˇliˇya‸ hta‸ mawˬ htaˇ, Ngaˬ ve canˇ paˍ-oˬ, nawˬ ngaˬ hta‸ ca mawˬ peuˬ laˇ, teh‸ yawˇ hta‸ kʼoˆ piˇ ve yoˬ. Oˇ htaˇ Eˇliˇya‸ kʼaw‸ yaw hkʼaw‸ leh kʼoˆ ve, Yoˬ, ngaˬ nawˬ hta‸ ca mawˬ peuˬ. Gʼuiˬsha nyi ma maˇ cawˇ ve kanˉ hta‸ nawˬ te taˍ peuˬ ve yoˬ.

21Hkʼe te leh, Gʼuiˬsha chi hkʼe kʼoˆ ve yoˬ. Dawˇ haˍ tuˬ awˬ ceuˬ ngaˬ nawˬ awˬ hkʼoˆ lo gaˬ la piˇ tuˬ yoˬ. Nawˬ leh nawˬ ve yehˬ hkʼaw chehˇ ve hawˉ hkʼaˆ paˍ hkʼa peu-eˬ ve hta‸ ngaˬ yuˬ baˬ tuˬ yoˬ.

22Nawˬ ve yehˬ yaˇ kʼa yaˇ teˇ hpaˍ lehˬ, Neˍbaˆ ve yaˇ jawˇmawˇ Yeˍyawˇbaoˍ leh, Aˍhiˇyaˆ ve yaˇ jawˇmawˇ Baˍshanˍ hui ve yehˬ yaˇ kʼa yaˇ hui hkʼa shuˍ, Iˉsaˍreˍlaˆ chaw hui hta‸ ya‸ kʼaw sheh ya‸ leh, ngaˬ nyi ma zuhˆ tuˬ te laˇ peuˬ, teh‸ Gʼuiˬsha kʼoˆ ve yoˬ.

23Nawˬ miˇ ma Yeˍsaˍbeˍlaˆ lehˬ, Yeˍsaˍreˍlaˆ venˇ hkʼaw hpuiˇ che‸ caˇ ve hta‸ gʼa hkanˍ tuˬ yoˬ.

24Venˇ hkʼaw suh-e ve nawˬ ve awˬ ceuˬ awˬ hkʼaˇ teˇ hpaˍ htawˇ, hpuiˇ che‸ caˇ ve hta‸ gʼa hkanˍ leh, heh puiˉ hkʼaw lo suh-e ve chaw teˇ hpaˍ lehˬ, naˬ beu‸ ngaˆ htawˆ caˇ ve hta‸ gʼa hkanˍ tuˬ yoˬ, teh‸ yawˇ hta‸ kʼoˆ piˇ ve yoˬ.

25(Aˍhaˆ hkʼe taw, Gʼuiˬsha hta‸ te ya‸ ve chaw teˇ gʼaˇ ka‸ maˇ cawˬ. Yawˇ lehˬ, awˬ miˇ ma hkʼa kʼoˆ ve hkʼa peu-eˬ hta‸ gʼa‸ te ve yoˬ.

26Yawˇ lehˬ, Aˍmawˇriˆ chaw hui hkʼa shuˍ shaˉ ho‸ teˇ hpaˍ hta‸ oˉ kʼoˍ pui leh, ya‸ taw tuˬ uiˍ jaˇ ve kanˉ hta‸ te ve yoˬ. Chaw oˇ ve teˇ hpaˍ lehˬ, Iˉsaˍreˍlaˆ chaw Hkaˍnanˍ mvuhˇmiˬ hkʼaw lo‸ la htaˇ, Gʼuiˬsha gʼa‸ kʼoˬ piˇ taˍ ve chaw teˇ hpaˍ hpeh‸ ve yoˬ.)

27Eˇliˇya‸ kʼoˆ ve tawˇ oˇ ve teˇ hpaˍ hta‸ Aˍhaˆ gʼa kaˇ htaˇ, yawˇ ve veu‸ kʼaˇ hta‸ tzuh‸ suhˍ leh, meh htuˉ pui hpa veu‸ deh ve yoˬ. Yawˇ caˇ tuˬ ka‸ maˇ caˇ leh dawˇ haˍ chehˇ ve yoˬ.

28Oˇ htaˇ, Gʼuiˬsha Eˇliˬya‸ hta‸ chi hkʼe kʼaw‸ kʼoˆ piˇ ve yoˬ.

29Ngaˬ mehˆ gʼuˇ suhˍ lo Aˍhaˆ nyi ma hkʼaˬ ma nuˇ nehˬ la peuˬ ve hta‸ nawˬ mawˬ aw laˇ. Yawˇ chi hkʼe te ve pa taw, yawˇ a sha‸ te‸ chehˇ ve teˇ co-e, dawˇ haˍ tuˬ awˬ ceuˬ ngaˬ yawˇ awˬ hkʼoˆ lo gaˬ la piˇ tuˬ ve maˇ heˆ. Yawˇ ve awˬ yaˇ teˇ co-e htaˇ heh‸, ngaˬ kʼaw‸ gaˬ la piˇ tuˬ yoˬ, teh‸ Eˇliˇya‸ hta‸ kʼoˆ piˇ ve yoˬ.

← Chapter 20 Jump to: Chapter 22 →