1 Kings 12

Lahu Bible Edited © Thailand Bible Society and Bible Society of Myanmar, 2010, 2020.

← Chapter 11 Jump to: Chapter 13 →

1Yawˇbaoˍ lehˬ, jawˇmawˇ ve aˉ yaˇ hta‸ yuˬ tuˬ Sheˍhkenˍ venˇ lo kʼai leh, Iˉsaˍreˍlaˆ chaw hkʼa peu-eˬ oˇ kaˬ lo hpawnˬ laˬ ve yoˬ.

2Eˇjiˇtu‸ mvuhˇmiˬ lo hpaw-e taˍ ve Yeˍyawˇbaoˍ lehˬ, awˬ lawn chi hta‸ gʼa kaˇ ve teˇ yanˇ, aˉ hkʼaw lo kʼaw‸ la ve yoˬ.

3Hkʼe te leh, Iˉsaˍreˍlaˆ chaw teˇ hpaˍ Yeˍyawˇbaoˍ hta‸ htawˇ kuˬ yuˬ peuˬ hkʼaw‸ nawˉ, Sheˍhkenˍ venˇ lo kʼai leh Yawˇbaoˍ hta‸ chi hkʼe kʼoˆ piˇ ve yoˬ.

4Nawˬ pa Sawˉla‸monˍ lehˬ, ngaˬ hui hta‸ kanˉ hehnˇ chaweh nyiˉ te tcuh laˇ ve yoˬ. Nawˬ ngaˬ hui hta‸ kanˉ chi taw taw maˇ kʼaw‸ te tcuh laˇ ve kʼo, ngaˬ hui nawˬ uˉ peunˍ ve hawˉ chehˇ tuˬ yoˬ, teh‸ yawˇ hta‸ kʼoˆ piˇ ve yoˬ.

5Oˇ htaˇ Yawˇbaoˬ lehˬ, Shehˆ nyi ponˬ peuˬ hkʼaw‸ nawˉ, nawˬ hui ngaˬ geh teˇ pawˆ kʼaw‸ laˬ-o‸. Oˇ htaˇ heh‸ ngaˬ hkʼaˬ hkʼe dawˇ taˍ ve nawˬ hui hta‸ kʼoˆ laˇ tuˬ yoˬ, teh‸ yawˇ hui hta‸ kʼoˆ piˇ ve yoˬ. Hkʼe te leh, yawˇ hui hpoˆ kʼo‸-e ve yoˬ.

6Jawˇmawˇ Yawˇbaoˍ lehˬ, yawˇ awˬ pa Sawˉla‸monˍ awˬ co-e htaˇ ka‸ dawˇ hkʼaˇ piˇ shehˍ hpaˇ te chehˇ ve chaw mawˇ teˇ hpaˍ hta‸ kuˬ yuˬ leh, Chaw oˇ ve teˇ hpaˍ hta‸ ngaˬ hkʼaˬ hkʼe kʼoˆ hkʼaw‸ piˇ cawˇ le, teh‸ yawˇ hui hta‸ na nyi ve yoˬ.

7Yawˇ hui kʼaw‸ yaw hkʼaw‸ leh kʼoˆ ve, Nawˬ yawˇ hui hta‸ na sha ve tawˇ yaw piˇ leh, yawˇ hui lawˬ ve hkʼe te piˇ ve kʼo, yawˇ hui nawˬ ve tawˇ hta‸ hkʼa deh‸ na yuˬ tuˬ yoˬ, teh‸ yawˇ hta‸ kʼoˆ piˇ ve yoˬ.

8Ya‸ hkʼaˇ, yawˇ lehˬ chaw mawˇ teˇ hpaˍ piˇ ve dawˇ hkʼaˇ hta‸ maˇ ha‸ yuˬ. Yawˇ geh teˇ geh uiˍ taˆ la leh, chi beu‸ yawˇ hta‸ dawˇ hkʼaˇ piˇ shehˍ hpaˇ te chehˇ ve yaˇ nehˬ teˇ hpaˍ geh kʼaw‸ kʼai ve yoˬ.

9Nawˬ hui hkʼaˬ hkʼe kʼoˆ laˇ tuˬ ve le. Chaw oˇ ve teˇ hpaˍ hta‸ ngaˬ hkʼaˬ hkʼe gʼa kʼaw‸ kʼoˆ piˇ tuˬ ve le, teh‸ yawˇ hui hta‸ na nyi ve yoˬ.

10Yawˇ hui kʼaw‸ yaw hkʼaw‸ leh kʼoˆ ve, Yawˇ hui hta‸ chi hkʼe kʼoˆ piˇ-oˆ. Ngaˬ ve la‸ naw lehˬ, ngaˬ pa ve caw‸ cehˍ nyi a‸ kehˉ htu jaˇ ve yoˬ.

11Ngaˬ pa nawˬ hui hta‸ hawˇ ve mawˇ taˆ tcuh ve yoˬ. Ngaˬ lehˬ oˇ ve a‸ kehˉ leuˉ leh hawˇ ve mawˇ taˆ tcuh laˇ tuˬ yoˬ. Ngaˬ pa lehˬ, nawˬ hui hta‸ gawˇ taˬ yuˬ jaw‸ laˇ ve yoˬ. Ngaˬ nawˬ hui hta‸ iˉ mvuhˇ hta‸ jaw‸ ve shaˍ guiˬ caˆ yuˬ jaw‸ laˇ tuˬ yoˬ, teh‸ yawˇ hui hta‸ kʼoˆ piˇ-oˆ, teh‸ yawˇ hta‸ kʼoˆ piˇ ve yoˬ.

12Shehˆ nyi ponˬ peuˬ hkʼaw‸ nawˉ, Yeˍyawˇbaoˍ leh awˬ nu ve Iˉsaˍreˍlaˆ chaw hkʼa peu-eˬ, jawˇmawˇ Yawˇbaoˍ geh kʼaw‸ hpawnˬ laˬ ve yoˬ.

13Jawˇmawˇ lehˬ, chaw mawˇ teˇ hpaˍ piˇ ve dawˇ hkʼaˇ hkʼe maˇ te leh, yaˇ nehˬ teˇ hpaˍ kʼoˆ ve hkʼe chaw oˇ ve teˇ hpaˍ hta‸ tawˇ hehnˇ chaweh yaw piˇ ve yoˬ.

14Yawˇ kʼoˆ ve, Ngaˬ pa lehˬ nawˬ hui hta‸ hawˇ ve mawˇ taˆ tcuh laˇ ve yoˬ. Ngaˬ lehˬ oˇ ve a‸ kehˉ leuˉ leh hawˇ jaˇ ve mawˇ taˆ tcuh laˇ tuˬ yoˬ. Yawˇ lehˬ nawˬ hui hta‸ gawˇ taˬ yuˬ jaw‸ laˇ ve yoˬ. Ngaˬ nawˬ hui hta‸ iˉ mvuhˇ hta‸ jaw‸ ve shaˍ guiˬ caˆ yuˬ jaw‸ laˇ tuˬ yoˬ, teh‸ yawˇ hui hta‸ kʼoˆ piˇ ve yoˬ.

15Gʼuiˬsha lehˬ, Shiˉlonˍ venˇ hkʼaw chehˇ ve tcuh kaˍ paˍ Aˍhiˇyaˆ hta‸ cuˇ leh, Neˍbaˆ ve yaˇ Yeˍyawˇbaoˍ hta‸ kʼoˆ piˇ taˍ peuˬ ve tawˇ hta‸ biˇ la piˇ lawˬ ve yoˬ. Hkʼe te leh, jawˇmawˇ lehˬ Iˉsaˍreˍlaˆ chaw hui ve tawˇ hta‸ maˇ na yuˬ piˇ.

16Jawˇmawˇ lehˬ, yawˇ hui ve tawˇ hta‸ maˇ na yuˬ piˇ ve hta‸ chaw moˍ lonˉ gʼa mawˬ ve teˇ yanˇ, yawˇ hui ga hpoˆ kuˬ leh kʼoˆ ve, Daˍviˆ leh yawˇ ve yehˬ yaˇ kʼa yaˇ teˇ hpaˍ luˬ suh sheˆ suh-e piˇ-oˆ. Ngaˬ hui awˬ pon yawˇ hui aˬ hto‸ ma te laˇ taˍ ve le. Iˉsaˍreˍlaˆ chaw hui-oˬ, ngaˬ hui aˉ hkʼaw lo kʼaw‸ kʼo‸-e veuˬ. Yawˇbaoˍ yawˇ hkʼaˇ yawˇ chehˇ taˉ piˇ-oˆ, teh‸ kʼoˆ ve yoˬ.

17Hkʼe te leh, Iˉsaˍreˍlaˆ chaw teˇ hpaˍ Yawˇbaoˍ hta‸ kʼaw‸ hpfuhˆ leh, Yuˇda‸ chaw hui ve mvuhˇmiˬ hta‸ ceh tiˉ uˉ peunˍ tuˬ, yawˇ hta‸ oˇ kaˬ lo teh taˉ piˇ ve yoˬ.

18Oˇ ve hkʼaw‸ nawˉ, Yawˇbaoˍ lehˬ kanˉ nyi paˍ awˬ hoˉ Aˍdawˇniˍranˍ hta‸ Iˉsaˍreˍlaˆ chaw hui geh kʼai peu ve yoˬ. Ya‸ hkʼaˇ, yawˇ hui yawˇ hta‸ haˉ pui baˬ pehˍ piˇ ve yoˬ. Oˇ htaˇ, Yawˇbaoˍ iˉ mvuhˇ lawˬ ciˇ leh Yeˍruˆsaˍlehnˍ venˇ lo hpaw kʼo‸-e ve yoˬ.

19Oˇ ve teˇ nyi hta‸ te leh, Iˉsaˍreˍlaˆ chaw teˇ hpaˍ Daˍviˆ ve awˬ ceuˬ awˬ hkʼaˇ teˇ hpaˍ hta‸ kʼaw‸ hpfuhˆ ve yoˬ.

20Iˉsaˍreˍlaˆ chaw teˇ hpaˍ lehˬ, Yeˍyawˇbaoˍ Eˇjiˇtu‸ mvuhˇmiˬ lo kʼaw‸ la taˍ peuˬ ve awˬ hkawˇ hta‸ gʼa kaˇ ve teˇ yanˇ, yawˇ hui yawˇ hta‸ kuˬ yuˬ leh Iˉsaˍ reˍlaˆ jawˇmawˇ te tcuh ve yoˬ. Yuˇda‸ awˬ ceuˬ awˬ hkʼaˇ teˇ hpaˍ ceh tiˉ Daˍviˆ ve awˬ ceuˬ awˬ hkʼaˇ teˇ hpaˍ hta‸ nyi ma kʼaw ve yoˬ.

21Yawˇbaoˍ Yeˍruˆsaˍlehnˍ venˇ hkʼaw lo kʼaw‸ gaˬ la ve teˇ yanˇ, yawˇ lehˬ Yuˇda‸ leh Beˍyaˍmenˍ awˬ ceuˬ awˬ hkʼaˇ awˬ hkʼaw lo ve cheuˬ jaˇ ve ma‸ yaˇ 180,000 gʼaˇ hta‸ leuˆ yuˬ leh, awˬ nu ve Iˉsaˍreˍlaˆ chaw teˇ hpaˍ hta‸ ca bawˆ tuˬ dawˇ taˍ ve yoˬ.

22Ya‸ hkʼaˇ, Gʼuiˬsha tcuh kaˍ paˍ Sheˍmaˍyaˆ hta‸ kuˬ yuˬ leh,

23Yawˇbaoˍ leh Yuˇda‸ chaw oˇ ve teˇ hpaˍ hta‸ chi hkʼe ca kʼoˆ piˇ tcuh ve yoˬ.

24Nawˬ hui ve awˬ viˉ awˬ nyi Iˉsaˍreˍlaˆ chaw teˇ hpaˍ hta‸ taˇ ca bawˆ-e. Ngaˬ ve a loˍ cawˇ ve pa taw yoˬ, teh‸ ca kʼoˆ piˇ tcuh ve yoˬ. Chaw oˇ ve hkʼa peu-eˬ Gʼuiˬsha ve tawˇ hta‸ na leh, a shu yawˇ ve yehˬ lo kʼo‸-e ve yoˬ.

25Jawˇmawˇ Yeˍyawˇbaoˍ lehˬ, Eˇhpaˍrenˍ mvuhˇmiˬ hkʼaw cawˬ ve Sheˍhkenˍ venˇ hta‸ hkʼa deh‸ kʼaw‸ gu te leh, oˇ kaˬ lo teˇ tcuhˉ teˇ jaw chehˇ taˍ ve yoˬ. Oˇ ve hkʼaw‸ nawˉ, oˇ kaˬ lo kʼaw‸ tawˆ-e leh, Peˍnoeˍlaˆ venˇ hta‸ ca kʼaw‸ gu chehˇ kʼai ve yoˬ.

26Oˇ htaˇ, yawˇ chi hkʼe dawˇ tawˆ la ve yoˬ. Chi beu‸ hpeh‸ chehˇ ve hkʼe, ngaˬ ve chaw teˇ hpaˍ Yeˍruˆsaˍlehnˍ venˇ lo tiˉ kʼai leh oˇ kaˬ lo Gʼuiˬsha hta‸ ca tuˉ tanˇ piˇ ve kʼo,

27yawˇ hui Yawˇbaoˍ ve tawˇ hta‸ na leh, ngaˬ hta‸ tiˇ pehˍ laˇ tuˬ yoˬ, teh‸ dawˇ ve yoˬ.

28Yawˇ oˇ hkʼe dawˇ gʼa peuˬ hkʼaw‸ nawˉ, shi nuˇ paˍ lonˉ nyiˇ maˬ te leh, yawˇ ve chaw teˇ hpaˍ hta‸ chi hkʼe kʼoˆ piˇ ve yoˬ. Nawˬ hui lehˬ Gʼuiˬsha hta‸ oˉ kʼoˍ ca pui tuˬ, Yeˍruˆsaˍlehnˍ venˇ lo tiˉ kʼai chehˇ ve yoˬ. Iˉsaˍreˍlaˆ chaw hui-oˬ, choˬ kaˬ nyi sheˍ. Gʼuiˬsha chi teˇ hpaˍ lehˬ, nawˬ hui hta‸ Eˇjiˇtu‸ mvuhˇmiˬ hkʼaw shiˍ tawˆ laˇ shehˍ hpaˇ teˇ hpaˍ hpeh‸ ve yoˬ, teh‸ yawˇ hui hta‸ kʼoˆ piˇ ve yoˬ.

29Yawˇ lehˬ shi nuˇ paˍ lonˉ oˇ ve teˇ hkeh hta‸ Beˍteˍlaˆ venˇ hkʼaw teh taˍ leh, awˬ nu ve teˇ hkeh hta‸ Danˍ venˇ hkʼaw teh taˍ ve yoˬ.

30Hkʼe te leh, Iˉsaˍreˍlaˆ chaw teˇ hpaˍ Beˍteˍlaˆ leh Danˍ venˇ hkʼaw lo oˉ kʼoˍ ca pui leh, Gʼuiˬsha hta‸ te ya‸ jaˇ ve yoˬ.

31Yeˍyawˇbaoˍ lehˬ, hkʼaw pui teˇ hpaˍ awˬ hkʼoˆ lo htawˇ oˉ kʼoˍ pui kuiˬ teˇ hpaˍ te taˍ leh, oˇ kaˬ lo paw hkuˇ te tuˬ Leˍviˆ awˬ ceuˬ awˬ hkʼaˇ maˇ heˆ ve chaw teˇ hpaˍ hta‸ leuˆ yuˬ leh paw hkuˇ te tcuh taˍ ve yoˬ.

32Yeˍyawˇbaoˍ lehˬ, Yuˇda‸ mvuhˇmiˬ hkʼaw te chehˇ ve pawehˇ hkʼe ve teˇ maˬ hta‸, ha pa hiˉ maˬ teˇ maˬ, 15 nyi htaˇ te tuˬ awˬ hkʼaˇ gu piˇ taˍ ve yoˬ. Beˍteˍlaˆ venˇ hkʼaw lo yawˇ te teh taˍ ve shi nuˇ paˍ lonˉ hta‸ yawˇ tuˉ tanˇ piˇ leh, oˇ kaˬ lo kanˉ te tuˬ ve paw hkuˇ teˇ hpaˍ hta‸ htawˇ leuˆ yuˬ piˇ taˍ ve yoˬ.

33Ha pa 8 maˬ teˇ maˬ, 15 nyi gaˬ ve teˇ yanˇ, yawˇ Beˍteˍlaˆ venˇ lo kʼai leh, Iˉsaˍ reˍlaˆ chaw awˬ pon yawˇ awˬ hkʼaˇ gu piˇ taˍ ve pawehˇ oˇ ve hta‸ ca te ve yoˬ.

← Chapter 11 Jump to: Chapter 13 →