1 Kings 19

Lahu Bible Edited © Thailand Bible Society and Bible Society of Myanmar, 2010, 2020.

← Chapter 18 Jump to: Chapter 20 →

1Eˇliˇya‸ te ve kanˉ hkʼa peu-eˬ leh, Baˍlaˆ ve paw hkuˇ teˇ hpaˍ hta‸ yawˇ hkʼaˬ hkʼe te tiˇ pehˍ ve awˬ lawn hkʼa peu-eˬ, jawˇmawˇ Aˍhaˆ yawˇ ve awˬ miˇ ma Yeˍsaˍbeˍlaˆ hta‸ kʼoˆ maˍ piˇ ve yoˬ.

2Hkʼe te leh, Yeˍsaˍbeˍlaˆ Eˇliˇya‸ hta‸ chi hkʼe kʼoˆ feu piˇ ve yoˬ. Paw hkuˇ oˇ ve teˇ hpaˍ hta‸ nawˬ te piˇ ve hkʼe, shawˉ pawˍ chi teˇ yanˇ ngaˬ nawˬ hta‸ oˇ hkʼe maˇ kʼaw‸ te hkʼaw‸ laˇ ve kʼo, gʼuiˬsha teˇ hpaˍ ngaˬ hta‸ tiˇ pehˍ laˇ piˇ-oˆ, teh‸ yawˇ hta‸ kʼoˆ feu piˇ ve yoˬ.

3Eˇliˇya‸ lehˬ, tawˇ oˇ ve hta‸ gʼa kaˇ ve teˇ yanˇ kawˆ jaˇ leh, yawˇ gʼa ponˬ tuˬ yawˇ ve awˬ ceˬ paˍ hta‸ shiˍ veu leh, Yuˇda‸ mvuhˇmiˬ hkʼaw cawˬ ve Beˍraˍsheˍbaˆ venˇ lo hpaw-e ve yoˬ. Yawˇ ve awˬ ceˬ paˍ hta‸ oˇ kaˬ lo teh taˉ peuˬ hkʼaw‸ nawˉ,

4teˇ nyi tanˇ vanˇ heh puiˉ hkʼaw lo te toˇ ve yoˬ. Yawˇ suhˆ cehˬ teˇ cehˬ awˬ hawˉ lo mui taˍ leh, Ngaˬ suh-e ve kʼo hkʼaˬ ma da‸ tuˬ le, teh‸ dawˇ chehˇ ve yoˬ. Yawˇ Gʼuiˬsha geh bon lawˬ leh, Gʼuiˬsha-oˬ, ngaˬ ve co ha hta‸ yuˬ hkʼaw‸ laˇ-oˆ. Ngaˬ suh gaˇ jaˇ peuˬ, teh‸ kʼoˆ ve yoˬ.

5Yawˇ oˇ hkʼe bon lawˬ peuˬ hkʼaw‸ nawˉ, suhˆ cehˬ hawˉ lo paˍ zuh‸ leh zuh‸ muiˉ kʼa sheˬ ve yoˬ. Oˇ htaˇ, mvuhˇ naw tcuh yaˇ teˇ gʼaˇ yawˇ hta‸ ca htawˇ la leh, Tu loˬ. Caˇ tuˬ caˇ-oˆ, teh‸ yawˇ hta‸ kʼoˆ piˇ ve yoˬ.

6Yawˇ tu leh nyi ve teˇ yanˇ, yawˇ ve oˉ kʼoˍ paˇ lo hkaoˍmonˇ teˇ shiˍ leh iˉ kaˆ teˇ kawˆ teh taˍ laˇ ve hta‸ gʼa mawˬ ve yoˬ. Yawˇ caˇ peuˬ dawˬ peuˬ leh teˇ pawˆ kʼaw‸ zuh‸ taˍ ve yoˬ.

7Mvuhˇ naw tcuh yaˇ yawˇ hta‸ nyiˇ pawˆ teˇ pawˆ kʼaw‸ nawˍ piˇ leh, Tu-o. Caˇ tuˬ caˇ-oˆ. Nawˬ gʼa kʼai tuˬ ve ya‸ kʼaw vuiˇ jaˇ ve yoˬ, teh‸ yawˇ hta‸ kʼoˆ piˇ ve yoˬ.

8Eˇliˇya‸ tu la leh, caˇ tuˬ teˇ pawˆ kʼaw‸ caˇ ve yoˬ. Caˇ tuˬ oˇ ve hta‸ caˇ peuˬ hkʼaw‸ nawˉ, da‸ kehˬ ve Siˉnaˆ hkʼaw lo 40 nyi gʼa kʼai tuˬ ve ya‸ kʼaw awˬ pon awˬ gʼaˇ cawˬ la ve yoˬ.

9Yawˇ oˇ kaˬ lo gaˬ htaˇ, gʼaˇ jehˇ tuˬ haˉ kʼoˍ teˇ maˬ hkʼaw lo‸-e ve yoˬ. Oˇ htaˇ Gʼuiˬsha lehˬ, Eˇliˇya‸-oˬ, nawˬ choˬ kaˬ lo aˬ hto‸ ma te chehˇ ve le, teh‸ yawˇ hta‸ kʼoˆ piˇ ve yoˬ.

10Eˇliˇya‸ kʼaw‸ yaw hkʼaw‸ leh kʼoˆ ve, Gʼuiˬsha-oˬ, ngaˬ lehˬ nawˬ ve kanˉ hta‸ hkʼaˬ htaˆ ka‸ te chehˇ ve yoˬ. Ya‸ hkʼaˇ, Iˉsaˍreˍlaˆ chaw teˇ hpaˍ nawˬ hta‸ baˬ taˉ peuˬ. Yawˇ hui lehˬ, nawˬ ve tuˉ tanˇ kuiˬ hta‸ te luˬ leh, nawˬ ve tcuh kaˍ paˍ hkʼa peu-eˬ hta‸ tiˇ pehˍ piˇ peuˬ. Ngaˬ teˇ gʼaˇ ceh tiˉ cawˬ taˉ ve yoˬ. Ngaˬ hta‸ ka‸ yawˇ hui tiˇ pehˍ gaˇ chehˇ ve yoˬ, teh‸ kʼoˆ ve yoˬ.

11Oˇ htaˇ Gʼuiˬsha lehˬ, Hkʼaw hkʼoˆ lo taˆ-e leh, ngaˬ mehˆ gʼuˇ suhˍ lo huˉ taˍ-o‸, teh‸ Eˇliˇya‸ hta‸ kʼoˆ piˇ ve yoˬ. Oˇ htaˇ, Gʼuiˬsha mvuhˇ haw lonˉ meuˆ laˬ piˇ lawˬ leh, hkʼaw pui leh haˉ hpawˇ teˇ hpaˍ hta‸ hkoˇ kʼai piˇ lawˬ ve yoˬ. Ya‸ hkʼaˇ, Gʼuiˬsha lehˬ mvuhˇ haw lonˉ oˇ ve hkʼaw maˇ chehˇ. Mvuhˇ haw lonˉ meuˆ ve jehˇ peuˬ hkʼaw‸ nawˉ, miˬ kʼaw‸ hiˆ la ve yoˬ. Ya‸ hkʼaˇ, Gʼuiˬsha lehˬ miˬ hiˆ ve hkʼaw maˇ chehˇ.

12Miˬ hiˆ ve jehˇ peuˬ hkʼaw‸ nawˉ, aˬ miˍ to‸ tawˆ la ve yoˬ. Ya‸ hkʼaˇ, Gʼuiˬsha lehˬ aˬ miˬ oˇ ve hkʼaw maˇ chehˇ. Aˬ miˍ to‸ ve mehˉ kʼai peuˬ hkʼaw‸ nawˉ, awˬ hkawˇ nuˇ lehˍ tawˇ yaw ve awˬ hkawˇ tawˆ la ve yoˬ.

13Awˬ hkawˇ oˇ ve hta‸ Eˇliˇya‸ gʼa kaˇ ve teˇ yanˇ, yawˇ ve mehˆ hpfuhˇ hta‸ aˉ po‸ yuˬ beh leh haˉ kʼoˍ hkʼaw tawˆ-e ve yoˬ. Eˇliˇya‸-oˬ, nawˬ choˬ kaˬ lo aˬ hto‸ ma te chehˇ ve le, teh‸ awˬ hkawˇ oˇ ve yawˇ hta‸ kʼoˆ piˇ ve yoˬ.

14Eˇliˇya‸ kʼaw‸ yaw hkʼaw‸ leh kʼoˆ ve, Gʼuiˬsha-oˬ, ngaˬ lehˬ nawˬ ve kanˉ hta‸ hkʼaˬ htaˆ ka‸ te chehˇ ve yoˬ. Ya‸ hkʼaˇ, Iˉsaˍreˍlaˆ chaw teˇ hpaˍ nawˬ hta‸ baˬ taˉ peuˬ. Yawˇ hui lehˬ, nawˬ ve tuˉ tanˇ kuiˬ hta‸ te luˬ leh, nawˬ ve tcuh kaˍ paˍ hkʼa peu-eˬ hta‸ tiˇ pehˍ peuˬ. Ngaˬ teˇ gʼaˇ ceh tiˉ cawˬ taˉ ve yoˬ. Ngaˬ hta‸ ka‸ yawˇ hui tiˇ pehˍ gaˇ chehˇ ve yoˬ, teh‸ kʼoˆ ve yoˬ.

15Oˇ htaˇ Gʼuiˬsha kʼoˆ ve, Daˍmaˍsehˆ venˇ lo kʼo‸-e leh, Suˉriˆ mvuhˇmiˬ hta‸ uˉ peunˍ tuˬ Haˍzeˍlaˆ hta‸ naˍ manˇ pfuhˍ piˇ-oˆ.

16Neˍshiˆ ve yaˇ Yeˍhuˆ hta‸ Iˉsaˍreˍlaˆ ve jawˇmawˇ hpeh‸ la piˇ tuˬ, yawˇ hta‸ htawˇ naˍ manˇ pfuhˍ piˇ-oˆ. Aˍbeˍlaˆmaˍhawˍlaˆ venˇ hkʼaw chehˇ ve Shaˍhpaˆ ve yaˇ Eˇliˇshehˇ hta‸ nawˬ awˬ tan tcuh kaˍ paˍ te tuˬ, yawˇ hta‸ naˍ manˇ pfuhˍ piˇ-oˆ.

17Haˍzeˍlaˆ la‸ sheh hkʼaw ponˬ tawˆ-e ve chaw hta‸ Yeˍhuˆ tiˇpehˍ piˇ tuˬ yoˬ. Yeˍhuˆ la‸ sheh hkʼaw ponˬ tawˆ-e ve chaw hta‸ Eˇliˇshehˇ tiˇ pehˍ piˇ tuˬ yoˬ.

18Iˉsaˍreˍlaˆ mvuhˇmiˬ hkʼaw ngaˬ hta‸ ka ti‸ yeˬ chehˇ leh Baˍlaˆ gʼuiˬsha hta‸ oˉ kʼoˍ maˇ pui ve chaw suhˍ hinˉ gʼaˇ cawˬ sheˍ ve yoˬ, teh‸ Eˇliˇya‸ hta‸ kʼoˆ piˇ ve yoˬ.

19Eˇliˇya‸ oˇ kaˬ lo tawˆ kʼai leh, Eˇliˇshehˇ ti mi mehˇ chehˇ ve hta‸ yawˇ gʼa mawˬ ve yoˬ. Oˇ kaˬ lo ti mi mehˇ chehˇ ve chaw 12 gʼaˇ cawˬ leh, Eˇliˇshehˇ lehˬ shu hkʼaw‸ nawˉ leh leh lo ti mi mehˇ chehˇ ve yoˬ. Oˇ htaˇ Eˇliˇya‸ yawˇ ve aˉ po‸ kʼehˆ leh, Eˇliˇshehˇ ve la‸ kʼaˉ hkʼoˆ lo teh piˇ ve yoˬ.

20Oˇ htaˇ, Eˇliˇshehˇ lehˬ ti mi mehˇ chehˇ ve hta‸ baˬ taˉ leh, Eˇliˇya‸ hkʼaˇ suh gʼuiˇ kʼai peuˬ hkʼaw‸ nawˉ, Ngaˬ pa ngaˬ e hta‸ ca hto piˇ taˉ shaˍ. Peuˬ kʼo, ngaˬ nawˬ hkʼaˇ suh gʼa‸ laˬ tuˬ yoˬ, teh‸ yawˇ hta‸ kʼoˆ piˇ ve yoˬ. Oˇ htaˇ Eˇliˇya‸ lehˬ, Kʼo‸-e loˬ. Ngaˬ nawˬ hta‸ maˇ tawˍ taˍ, teh‸ Eˇliˇshehˇ hta‸ kʼoˆ piˇ ve yoˬ.

21Oˇ ve hkʼaw‸ nawˉ, Eˇliˇshehˇ yawˇ ti mi lo kʼaw‸ kʼo‸-e leh, ti mi mehˇ chehˇ ve nuˇ paˍ lonˉ oˇ ve nyiˇ hkeh hta‸ tiˇ pehˍ peuˬ hkʼaw‸ nawˉ, awˍ chiˇ hkʼa deh‸ te leh, oˇ kaˬ lo kanˉ te chehˇ ve chaw hui hta‸ caˍ piˇ ve yoˬ. Oˇ hkʼe te taˉ peuˬ hkʼaw‸ nawˉ, yawˇ Eˇliˇya‸ hkʼaˇ suh gʼa‸ kʼai ve yoˬ.

← Chapter 18 Jump to: Chapter 20 →