1 Kings 17

Lahu Bible Edited © Thailand Bible Society and Bible Society of Myanmar, 2010, 2020.

← Chapter 16 Jump to: Chapter 18 →

1Giˇlaˆ mvuhˇmiˬ, Tiˉshaˍbiˆ venˇ hkʼaw chehˇ ve tcuh kaˍ paˍ Eˇliˇya‸ jawˇmawˇ Aˍhaˆ geh kʼai leh, Te‸ chehˇ ve Iˉsaˍreˍlaˆ Gʼuiˬsha ve awˬ meh hkʼaw ngaˬ nawˬ hta‸ chi hkʼe kʼoˆ laˇ ve yoˬ. Ngaˬ tawˇ piˇ ve maˇ heˆ kʼo, laˬ tuˬ ve awˬ yanˇ nyiˇ, shehˆ hkʼaw awˬ hkʼaw lo, ciˍ gʼuiˬ leh mvuhˇ yeˬ laˬ tuˬ ve maˇ heˆ, teh‸ yawˇ hta‸ kʼoˆ piˇ ve yoˬ.

2Oˇ ve hkʼaw‸ nawˉ, Gʼuiˬsha Eˇliˇya‸ hta‸ chi hkʼe kʼaw‸ kʼoˆ piˇ ve yoˬ.

3Choˬ kaˬ lo tawˆ kʼai leh, Yawˇdanˍ iˉ kaˆ lawˬ mvuhˇ nyi tawˆ hpawˇ lo cawˬ ve Hkeˍriˆ iˉ kaˆ lawˬ paˇ lo ca va‸ chehˇ taˍ-o‸.

4Iˉ kaˆ oˇ ve hta‸ dawˬ chehˇ-oˆ. Nawˬ awˬ pon caˇ tuˬ yuˬ veu laˇ tuˬ, aˉ naˆ kʼaˍ teˇ hpaˍ hta‸ ngaˬ tawˇ piˇ taˍ peuˬ, teh‸ Eˇliˇya‸ hta‸ kʼoˆ piˇ ve yoˬ.

5Eˇliˇya‸ lehˬ, Gʼuiˬsha ve tawˇ hta‸ na yuˬ leh Hkeˍriˆ iˉ kaˆ lawˬ paˇ lo ca va‸ taˍ ve yoˬ.

6Yawˇ lehˬ iˉ kaˆ oˇ ve hta‸ dawˬ leh, teˇ shawˉ teˇ haˉ le aˉ naˆ kʼaˍ teˇ hpaˍ yawˇ hta‸ hkaoˍmonˇ leh shaˍ teˇ hpaˍ ca yuˬ kʼoˬ la ve yoˬ.

7Mvuhˇ yeˬ maˇ laˬ ve pa taw, maˇ maw maw iˉ kaˆ lawˬ oˇ ve htawˇ fiˍ kʼai ve yoˬ.

8Oˇ ve hkʼaw‸ nawˉ, Gʼuiˬsha Eˇliˇya‸ hta‸ chi hkʼe kʼaw‸ kʼoˆ piˇ ve yoˬ.

9Chi beu‸ tu leh Siˉdonˍ venˇ paˇ lo cawˬ ve Zaˍraˍtaˆ venˇ lo kʼai-o. Nawˬ hta‸ te caˍ te taw laˇ tuˬ, oˇ kaˬ lo chehˇ ve mehˇchawˇma teˇ gʼaˇ hta‸ ngaˬ tawˇ piˇ taˍ peuˬ, teh‸ yawˇ hta‸ kʼoˆ piˇ ve yoˬ.

10Hkʼe te leh, Eˇliˇya‸ Zaˍraˍtaˆ venˇ lo kʼai ve yoˬ. Yawˇ venˇ taˍ meu‸ hpeh‸ lo gaˬ htaˇ, mehˇchawˇma teˇ gʼaˇ suhˆ gʼawˆ toˇ chehˇ ve hta‸ gʼa mawˬ leh, Ngaˬ hta‸ iˉ kaˆ a ciˉ taw laˇ-oˆ, teh‸ yawˇ hta‸ kʼoˆ piˇ ve yoˬ.

11Yaˇ miˇ oˇ ve iˉ kaˆ ca nyiˉ tuˬ tawˆ kʼai chehˇ ve teˇ yanˇ, Ngaˬ awˬ pon hkaoˍmonˇ ka‸ a ciˉ yuˬ veu laˇ-oˆ, teh‸ kʼaw‸ kʼoˆ piˇ ve yoˬ.

12Yaˇ miˇ oˇ ve kʼaw‸ kʼoˆ ve, Te‸ chehˇ ve nawˬ ve Gʼuiˬsha hta‸ cuˇ leh ngaˬ hkanˍve yoˬ. Ngaˬ geh hkaoˍmonˇ teˇ shiˍ ka‸ maˇ cawˬ. Hkehˇ hkʼaw junˍ meu-e a ciˉ leh, kaw hkʼaw shaˍlonˍ chu a ciˉ ceh tiˉ cawˬ ve yoˬ. Ngaˬ yaˇ paˍ ngaˬ huiˉ maˬ hkaoˍmonˇ oˇ ve hta‸ te caˇ tuˬ chi beu‸ suhˆ ca gʼawˆ la ve yoˬ. Hkaoˍmonˇ oˇ ve lehˬ, ngaˬ huiˉ maˬ awˬ pon awˬ leh meuˇ ve caˇ tuˬ hpeh‸ ve yoˬ. Oˇ ve hta‸ caˇ peuˬ kʼo, ngaˬ huiˉ maˬ gʼa meu‸ suh-e tuˬ ve yoˬ, teh‸ yawˇ hta‸ kʼaw‸ yaw hkʼaw‸ piˇ ve yoˬ.

13Eˇliˇya‸ yawˇ hta‸ kʼaw‸ kʼoˆ piˇ ve, Taˇ dawˇ haˍ. Caˇ tuˬ oˇ ve hta‸ ca kʼaw‸ gu-o. Ya‸ hkʼaˇ, ngaˬ awˬ pon ka‸ hkaoˍmonˇ teˇ diˬ ehˉ a ciˉ te veu laˇ-oˆ. Oˇ hkʼe te peuˬ hkʼaw‸ nawˉ, nawˬ yaˇ paˍ nawˬ huiˉ maˬ cawˬ taˍ sheˍ ve hkaoˍmonˇ hta‸ caˇ-oˆ.

14Awˬ lawn kʼo, Iˉsaˍreˍlaˆ ve Gʼuiˬsha chi hkʼe kʼoˆ ve yoˬ. Ngaˬ mvuhˇ yeˬ kʼaw‸ laˬ piˇ htaˇ hkʼa gaˬ, junˍ meu-e leh shaˍlonˍ chu peuˬ kʼai tuˬ ve maˇ heˆ, teh‸ Gʼuiˬsha kʼoˆ ve yoˬ, teh‸ yaˇ miˇ oˇ ve hta‸ kʼoˆ piˇ ve yoˬ.

15Mehˇchawˇma oˇ ve lehˬ, Eˇliˇya‸ kʼoˆ ve hkʼe te ve yoˬ. Hkʼe te leh, awˬ yanˇ maw chaweh yawˇ hui awˬ pon caˇ tuˬ hkʼa law‸ cawˬ taˍ ve yoˬ.

16Gʼuiˬsha Eˇliˇya‸ hta‸ cuˇ leh ka ti‸ te taˍ ve hkʼe, junˍ meu-e leh shaˍlonˍ chu maˇ peuˬ kʼai.

17Maˇ maw maw mehˇchawˇma ve yaˇ paˍ oˇ ve chehˇ haˍ la ve yoˬ. Yawˇ naˬ ve oˇ ve shaˬ te shaˬ jaˇ la leh, awˬ leh meuˇ suh sheˬ ve yoˬ.

18Hkʼe te leh, yawˇ Eˇliˇya‸ geh laˬ leh, Gʼuiˬsha ve chaw-oˬ, aˬ hto‸ ma pa taw nawˬ ngaˬ hta‸ chi hkʼe te laˇ ve le. Nawˬ choˬ kaˬ laˬ ve lehˬ, ngaˬ ve venˇbaˆ Gʼuiˬsha hta‸ hpeu‸ maˍ piˇ leh, ngaˬ ve yaˇ paˍ hta‸ suh-e piˇ lawˬ tuˬ awˬ pon laˬ ve laˇ, teh‸ yawˇ hta‸ kʼoˆ piˇ ve yoˬ.

19Yaˇ paˍ oˇ ve ngaˬ hta‸ pe‸ laˇ-oˆ, teh‸ Eˇliˇya‸ yawˇ hta‸ kʼoˆ piˇ ve yoˬ. Oˇ ve hkʼaw‸ nawˉ, yaˇ paˍ oˇ ve hta‸ yawˇ zuh‸ kuiˬ awˬ na teˇ bawehˇ lo yuˬ kʼai leh, yawˇ ve ku-iˍ hkʼoˆ lo teh taˍ ve yoˬ.

20Yawˇ awˬ hkawˇ bvuhˬ chaweh bon lawˬ leh kʼoˆ ve, Ngaˬ ve Gʼuiˬsha-oˬ, aˬ hto‸ ma pa taw mehˇchawˇma chi ve hta‸ nawˬ chi hkʼe te piˇ ve le. Yawˇ ngaˬ hta‸ hkʼa deh‸ ha‸ shaˉ laˇ chehˇ ve ka‸, aˬ hto‸ ma pa taw yawˇ ve yaˇ paˍ hta‸ nawˬ tiˇ pehˍ piˇ ve le, teh‸ kʼoˆ ve yoˬ.

21Yawˇ oˇ hkʼe kʼoˆ peuˬ hkʼaw‸ nawˉ, yaˇ paˍ oˇ ve hkʼoˆ yawˇ shehˆ pawˆ hkʼa gaˬ boˆ zuh‸ sheˬ leh, Ngaˬ ve Gʼuiˬsha-oˬ, yaˇ paˍ chi ve hta‸ kʼaw‸ te‸ la piˇ-oˆ, teh‸ kʼoˆ ve yoˬ.

22Gʼuiˬsha lehˬ, Eˇliˇya‸ ve bon lawˬ hkawˇ hta‸ na yuˬ piˇ ve yoˬ. Yaˇ paˍ oˇ ve shaˉ kʼaw‸ gʼawˬ gʼa la leh, kʼaw‸ te‸ la ve yoˬ.

23Oˇ htaˇ, Eˇliˇya‸ lehˬ yaˇ paˍ oˇ ve hta‸ yawˇ ve awˬ e geh kʼaw‸ shiˍ ya‸ la leh, Nyi loˬ, nawˬ yaˇ paˍ kʼaw‸ te‸ la peuˬ, teh‸ yawˇ hta‸ kʼoˆ piˇ ve yoˬ.

24Yaˇ miˇ oˇ ve kʼaw‸ yaw hkʼaw‸ leh, Nawˬ lehˬ Gʼuiˬsha ve chaw hpeh‸ ve hta‸ maˇ kʼoˆ, Gʼuiˬsha nawˬ hta‸ awˬ tehˬ awˬ na tawˇ yaw piˇ chehˇ ve hta‸ maˇ kʼoˆ, chi beu‸ ngaˬ gʼa shiˍ peuˬ, teh‸ yawˇ hta‸ kʼoˆ piˇ ve yoˬ.

← Chapter 16 Jump to: Chapter 18 →