1 Kings 18

Lahu Bible Edited © Thailand Bible Society and Bible Society of Myanmar, 2010, 2020.

1Oˇ ve hkʼaw‸ nawˉ maˇ maw maw, mvuhˇ goˇ ve awˬ yanˇ shehˆ hkʼaw‸ hkʼe gaˬ la leh, Nawˬ chi beu‸ jawˇmawˇ Aˍhaˆ geh kʼai-o. Ngaˬ mvuhˇ yeˬ kʼaw‸ laˬ piˇ tuˬ yoˬ, teh‸ yawˇ hta‸ kʼoˆpiˇ ve yoˬ.

2Hkʼe te leh Eˇliˇya‸ tawˆ kʼai ve yoˬ. Saˍmaˍriˆ venˇ hkʼaw lehˬ, meu‸ jaˇ kaˆ jaˇ chehˇ sheˍ ve yoˬ.

3Oˇ htaˇ Aˍhaˆ lehˬ yawˇ ve hawˉ yehˬ ha‸ shaˉ shehˍ hpaˇ Awˇbaˍdiˆ hta‸ kuˬ ve yoˬ. (Awˇbaˍdiˆ lehˬ, Gʼuiˬsha hta‸ ceh tiˉ oˉ kʼoˍ pui ve chaw hpeh‸ ve yoˬ.

4Yeˍsaˍbeˍlaˆ Gʼuiˬsha ve tcuh kaˍ paˍ teˇ hpaˍ hta‸ tiˇ pehˍ piˇ chehˇ ve teˇ yanˇ, yawˇ lehˬ tcuh kaˍ paˍ 100 gʼaˇ hta‸ nyiˇ moˍ te leh haˉ kʼoˍ teˇ maˬ hkʼaw yuˬ faˉ taˍ leh, caˇ tuˬ dawˬ tuˬ caˍ piˇ chehˇ ve yoˬ.)

5Aˍhaˆ Awˇbaˍdiˆ hta‸ chi hkʼe kʼoˆ piˇ ve yoˬ. Ngaˬ hui ve iˉ mvuhˇ leh piˉ laˬ teˇ hpaˍ awˬ pon iˉ kaˆ lawˬ cawˬ kuiˬ lo kʼai leh, caˇ tuˬ ca nyi piˇ-a veuˬ, teh‸ yawˇ hta‸ kʼoˆ piˇ ve yoˬ.

6Hkʼe te leh, yawˇ huiˉ maˬ teˇ gʼaˇ teˇ hpawˇ lo zuhˇ mvuh‸ ca kʼai ve yoˬ.

7Awˇbaˍdiˆ tawˆ kʼai chehˇ ve teˇ yanˇ, yawˇ Eˇliˇya‸ hta‸ hpuˇ da‸ ve yoˬ. Yawˇ Eˇliˇya‸ hta‸ shiˍ chehˇ ve pa taw, yawˇ mehˆ gʼuˇ suhˍ lo boˆ taˍ leh, Nawˬ awˬ tehˬ awˬ na Eˇliˇya‸ hpeh‸ ve yoˬ laˇ, teh‸ yawˇ hta‸ na nyi ve yoˬ.

8Yoˬ, ngaˬ Eˇliˇya‸ hpeh‸ ve yoˬ. Ngaˬ choˬ kaˬ chehˇ taˍ ve awˬ lawn nawˬ ve jawˇmawˇ hta‸ ca hto piˇ-oˆ, teh‸ yawˇ hta‸ kʼoˆ piˇ ve yoˬ.

9Awˇbaˍdiˆ kʼaw‸ kʼoˆ ve, Ngaˬ jawˇmawˇ Aˍhaˆ ve la‸ sheh hkʼaw lo gʼa suh tuˬ, ngaˬ aˬ hto‸ ma te ya‸ kuiˬ cawˬ le.

10Te‸ chehˇ ve nawˬ ve Gʼuiˬsha awˬ meh hkʼaw ngaˬ hkanˍ ve yoˬ. Mvuhˇmiˬ teˇ kaˬ le le lo, yawˇ nawˬ hta‸ gʼa‸ ca chehˇ ve yoˬ. Mvuhˇmiˬ oˇ ve teˇ hpaˍ hta‸ uˉ peunˍ chehˇ ve jawˇmawˇ teˇ hpaˍ lehˬ, nawˬ hta‸ maˇ mawˬ teh‸ kʼoˆ ve kʼo, awˬ tehˬ awˬ na maˇ mawˬ ve awˬ lawn hkanˍ tcuh ve yoˬ.

11Nawˬ choˬ kaˬ lo chehˇ taˍ ve yoˬ, teh‸ nawˬ ngaˬ hta‸ jawˇmawˇ hta‸ ca kʼoˆ piˇ tcuh gaˇ ve laˇ.

12Ngaˬ choˬ kaˬ lo tawˆ kʼai ve teˇ hkui, Gʼuiˬsha ve Awˬ ha hpu nawˬ hta‸ teˇ kaˬ kaˬ lo shiˍ kʼai ve kʼo hkʼaˬ hkʼe te tuˬ le. Jawˇmawˇ choˬ kaˬ laˬ leh nawˬ hta‸ maˇ mawˬ ve kʼo, yawˇ ngaˬ hta‸ tiˇ pehˍ laˇ tuˬ yoˬ. Ngaˬ lehˬ yaˇ nehˬ hpeh‸ chehˇ sheˍ htaˇ ka‸ Gʼuiˬsha hta‸ tiˉ oˉ kʼoˍ pui ve chaw hpeh‸ ve hta‸ a ciˉ dawˇ nawˇ taˍ-oˬ.

13Yeˍsaˍbeˍlaˆ Gʼuiˬsha ve tcuh kaˍ paˍ teˇ hpaˍ hta‸ tiˇ pehˍ piˇ chehˇ ve teˇ yanˇ, ngaˬ lehˬ tcuh kaˍ paˍ 100 gʼaˇ ve hta‸ nyiˇ moˍ te ha‸ shaˉ piˇ leh caˍ piˇ taw piˇ chehˇ ve awˬ hkawˇ hta‸ nawˬ maˇ gʼa kaˇ laˇ.

14Chi hta‸ pa taw, nawˬ choˬ kaˬ chehˇ taˍ ve awˬ lawn jawˇmawˇ hta‸ ngaˬ hkʼaˬ hkʼe te ca kʼoˆ piˇ hpeh‸ tuˬ ve le. Yawˇ ngaˬ hta‸ tiˇ pehˍ laˇ tuˬ yoˬ, teh‸ Eˇliˇya‸ hta‸ kʼoˆ piˇ ve yoˬ.

15Oˇ htaˇ Eˇliˇya‸ lehˬ, Ngaˬ oˉ kʼoˍ pui chehˇ ve Gʼuiˬsha hta‸ cuˇ leh ka ti‸ te ve yoˬ. Ya‸ nyi ngaˬ ve awˬ to jawˇmawˇ hta‸ maw piˇ tuˬ yoˬ, teh‸ Awˇbaˍdiˆ hta‸ kʼoˆ piˇ ve yoˬ.

16Hkʼe te leh, Awˇbaˍdiˆ jawˇmawˇ hta‸ ca kʼoˆ piˇ ve yoˬ. Oˇ htaˇ, jawˇmawˇ Aˍhaˆ Eˇliˇya‸ hta‸ ca hpuˇ da‸ la ve yoˬ.

17Yawˇ Eˇliˇya‸ hta‸ mawˬ htaˇ, Iˉsaˍreˍlaˆ mvuhˇmiˬ hkʼaw sho‸ sha‸ tuˬ te shehˍ hpaˇ choˬ kaˬ lo chehˇ taˍ ve law leˇ, teh‸ yawˇ hta‸ kʼoˆ piˇ ve yoˬ.

18Eˇliˇya‸ kʼaw‸ yaw hkʼaw‸ leh kʼoˆ ve, Ngaˬ lehˬ sho‸ sha‸ tuˬ te shehˍ hpaˇ maˇ heˆ. Sho‸ sha‸ tuˬ te shehˍ hpaˇ lehˬ, nawˬ leh nawˬ ve yehˬ yaˇ kʼa yaˇ teˇ hpaˍ yoˬ. Nawˬ hui lehˬ, Gʼuiˬsha ve tawˇ hta‸ ponˬ leuˉ leh Baˍlaˆ gʼuiˬsha hta‸ oˉ kʼoˍ pui chehˇ ve yoˬ.

19Ya‸ nyi Iˉsaˍreˍlaˆ chaw hkʼa peu-eˬ, Kaˍmeˍlaˆ hkʼaw hkʼoˆ lo ngaˬ hta‸ ca hpuˇ da‸ la tuˬ tawˇ piˇ-oˆ. Jawˇmawˇ ma Yeˍsaˍbeˍlaˆ ve Baˍlaˆ ve paw hkuˇ 450 gʼaˇ leh, Aˍsheˍraˆ gʼuiˬsha ma ve paw hkuˇ 400 gʼaˇ hta‸ htawˇ shiˍ veu laˇ-oˆ, teh‸ Aˍhaˆ hta‸ kʼoˆ piˇ ve yoˬ.

20Hkʼe te leh, Aˍhaˆ lehˬ Iˉsaˍreˍlaˆ chaw leh Baˍlaˆ ve paw hkuˇ teˇ hpaˍ hta‸ Kaˍmeˍlaˆ hkʼaw hkʼoˆ lo kuˬ hpawnˬ ve yoˬ.

21Eˇliˇya‸ hkʼaw hkʼoˆ lo taˆ-e leh, Iˉsaˍreˍlaˆ chaw teˇ hpa hta‸ chi hkʼe kʼoˆ piˇ ve yoˬ. Nawˬ hui hkʼaˬ maw maw nyi ma heh chehˇ tuˬ sheˍ ve le. Ngaˬ hui ve Gʼuiˬsha lehˬ, awˬ tehˬ awˬ na ve Gʼuiˬsha hpeh‸ ve kʼo, yawˇ hta‸ oˉ kʼoˍ pui-o. Baˍlaˆ lehˬ awˬ tehˬ awˬ na ve Gʼuiˬsha hpeh‸ ve kʼo, yawˇ hta‸ oˉ kʼoˍ pui-o, teh‸ yawˇ hui hta‸ kʼoˆ piˇ ve yoˬ. Ya‸ hkʼaˇ, Iˉsaˍreˍlaˆ chaw hui tawˇ teˇ peu-eˍ ka‸ maˇ yaw hkʼaw‸.

22Oˇ htaˇ, Eˇliˇya‸ kʼaw‸ kʼoˆ ve, Gʼuiˬsha ve tcuh kaˍ paˍ ngaˬ ceh tiˉ cawˬ taˉ ve yoˬ. Ya‸ hkʼaˇ, choˬ kaˬ lo Baˍlaˆ ve paw hkuˇ 450 gʼaˇ chehˇ taˍ ve yoˬ.

23Nuˇ paˍ lonˉ nyiˇ hkeh sheh veu laˇ-oˆ. Teˇ hkeh Baˍlaˆ ve paw hkuˇ teˇ hpaˍ hta‸ piˇ leh tuˉ tanˇ tcuh-o. Ya‸ hkʼaˇ, aˬ miˍ taˇ tuˉ tcuh. Awˬ nu ve teˇ hkeh hta‸ ngaˬ oˇ hkʼe te tuˬ yoˬ.

24Oˇ hkʼe te peuˬ kʼo, paw hkuˇ oˇ ve teˇ hpaˍ hta‸ yawˇ hui ve gʼuiˬsha geh bon lawˬ tcuh-o. Ngaˬ htawˇ, ngaˬ ve Gʼuiˬsha geh bon lawˬ tuˬ yoˬ. Tuˉ tanˇ tuˬ hta‸ aˬ miˍ to‸ piˇ gʼa ve Gʼuiˬsha lehˬ awˬ tehˬ awˬ na ve Gʼuiˬsha hpeh‸ ve yoˬ, teh‸ yawˇ hui hta‸ kʼoˆ piˇ ve yoˬ. Chaw hkʼa peu-eˬ oˇ hkʼe te tuˬ nyi ma cawˇ ve yoˬ.

25Oˇ htaˇ, Eˇliˇya‸ Baˍlaˆ ve paw hkuˇ teˇ hpa hta‸ chi hkʼe kʼoˆ piˇ ve yoˬ. Nawˬ hui chaw maˇ jaˇ ve pa taw, nawˬ hui awˉ lawˉ tuˉ tanˇ leh nawˬ hui ve gʼuiˬsha geh bon lawˬ-o‸. Ya‸ hkʼaˇ, tuˉ tanˇ tuˬ hta‸ aˬ miˍ taˇ tuˉ keu, teh‸ yawˇ hui hta‸ kʼoˆ piˇ ve yoˬ.

26Hkʼe te leh, yawˇ hui nuˇ paˍ lonˉ teˇ hkeh tiˇpehˍ leh, mvuhˇ law‸ kʼaw tcuhˆ htaˇ hkʼa gaˬ, Baˍlaˆ gʼuiˬsha geh bon gʼaˇ hte‸ lawˬ ve yoˬ. Baˍlaˆ gʼuiˬsha-oˬ, ngaˬ hui ve bon lawˬ hkawˇ hta‸ a ciˉ na yuˬ laˇ-oˆ, teh‸ kʼoˆ leh tuˉ tanˇ kuiˬ awˬ paˇ lo kʼaˍ hpoˆ hkʼeˆ chehˇ ve yoˬ. Ya‸ hkʼaˇ, te‸ chiˉ maˇ hpeh‸ la.

27Mvuhˇ law‸ kʼaw tcuhˆ htaˇ, Eˇliˇya‸ yawˇ hui hta‸ maˇ shawˍ maˇ caˆ te leh kʼoˆ ve, Awˬ hkawˇ bvuhˬ chaweh kuˬ leh bon lawˬ-o‸. Yawˇ lehˬ gʼuiˬsha hpeh‸ ve yoˬ. Yawˇ gʼaˇ jehˇ chehˇ ve leh hehˉ. Maˇ heˆ kʼo, teˇ kaˬ kaˬ lo kʼai toˇ chehˇ ve leh hehˉ. Maˇ heˆ kʼo, yawˇ zuh‸ muiˉ kʼa chehˇ ve leh naˍ. Nawˇ la tuˬ awˬ hkawˇ bvuhˬ chaweh kuˬ piˇ-oˆ, teh‸ yawˇ hui hta‸ kʼoˆ piˇ ve yoˬ.

28Hkʼe te leh, paw hkuˇ oˇ ve teˇ hpaˍ awˬ gʼuˇ suhˍ htaˇ a‸ kehˉ awˬ hkawˇ bvuhˬ chaweh kʼaw‸ kuˬ leh, te muiˬ te jaw ve hkʼe, a shu yawˇ ve awˬ to hta‸ shawˆ hkʼaw leh, awˬ suhˍ hkʼa biˇ tawˆ la ve yoˬ.

29Mvuhˇ nyi suhˉ la htaˇ hkʼa gaˬ, yawˇ hui oˇ hkʼe te leh bon lawˬ chehˇ ve yoˬ. Ya‸ hkʼaˇ, te‸ chiˉ maˇ hpeh‸ la.

30Oˇ htaˇ Eˇliˇya‸ lehˬ, Ngaˬ paˇ neˇ lo jiˆ laˬ-o‸, teh‸ Iˉsaˍreˍlaˆ chaw hui hta‸ kʼoˆ piˇ ve yoˬ. Hkʼe te leh, yawˇ hui hkʼa peu-eˬ yawˇ paˇ lo jiˆ kʼai ve yoˬ. Yawˇ lehˬ paˆ kʼai taˍ ve Gʼuiˬsha ve tuˉ tanˇ kuiˬ hta‸ kʼaw‸ gu te ve yoˬ.

31Iˉsaˍreˍlaˆ teh‸ Gʼuiˬsha awˬ meh awˬ suhˉ kʼaw‸ meh piˇ taˍ ve Yaˍkoˆ ve yaˇ 12 gʼaˇ cawˬ ve hkʼe, yawˇ haˉ pui shiˍ 12 shiˍ hta‸ gʼawˆ yuˬ ve yoˬ.

32Haˉ pui shiˍ oˇ ve teˇ hpaˍ hta‸ yuˬ leh, yawˇ tuˉ tanˇ kuiˬ teˇ maˬ te ve yoˬ. Tuˉ tanˇ kuiˬ oˇ ve hkʼa caw zuhˇ lo iˉ kaˆ 12 punˇ hkʼe keu daw ve gʼuiˬ hkʼaˇ teˇ maˬ duˇ taˍ ve yoˬ.

33Oˇ hkʼe te peuˬ hkʼaw‸ nawˉ, cawˬ taˍ sheˍ ve nuˇ paˍ lonˉ teˇ hkeh hta‸ tiˇ pehˍ leh, tuˉ tanˇ kuiˬ oˇ ve awˬ hkʼoˆ lo teh taˍ ve yoˬ. Iˉ kaˆ 4 punˇ hkʼo leh, tuˉ tanˇ kuiˬ hkʼoˆ lo ngeuˍ pfuhˍ-o‸, teh‸ yawˇ hui hta‸ kʼoˆ piˇ ve yoˬ. Yawˇ hui lehˬ, yawˇ kʼoˆ ve hkʼe te ve yoˬ.

34Teˇ pawˆ kʼaw‸ hkʼo pfuhˍ sheˍ, teh‸ yawˇ yawˇ hui hta‸ kʼoˆ piˇ ve yoˬ. Yawˇ hui oˇ hkʼe kʼaw‸ te ve yoˬ. Teˇ pawˆ kʼaw‸ hkʼo pfuhˍ sheˍ, teh‸ yawˇ yawˇ hui hta‸ kʼaw‸ kʼoˆ piˇ ve yoˬ. Hkʼe te leh, yawˇ hui teˇ pawˆ kʼaw‸ hkʼo pfuhˍ ve yoˬ.

35Tuˉ tanˇ kuiˬ hkʼa peu-eˬ iˉ kaˆ nehˆ leh duˇ taˍ ve gʼuiˬ hkʼaˇ hkʼaw iˉ kaˆ biˇ sheˬ ve yoˬ.

36Mvuhˇ hpeu‸ hpawˇ Gʼuiˬsha hta‸ tuˉ tanˇ piˇ ve awˬ yanˇ gaˬ htaˇ, tcuh kaˍ paˍ Eˇliˇya‸ tuˉ tanˇ kuiˬ paˇ lo jiˆ kʼai leh bon chi hkʼe lawˬ ve yoˬ. Aˍbraˍhanˍ, Iˉcaˆ, Yaˍkoˆ hui ve Gʼuiˬsha-oˬ, nawˬ lehˬ Iˉsaˍreˍlaˆ ve Gʼuiˬsha hpeh‸ leh, ngaˬ lehˬ nawˬ kʼoˆ laˇ ve hkʼe kanˉ te chehˇ ve hta‸ chaw chi teˇ hpaˍ gʼa shiˍ gʼa mawˬ tuˬ a ciˉ te laˇ-oˆ.

37Nawˬ teˇ gʼaˇ ceh tiˉ Gʼuiˬsha hpeh‸ ve hta‸ chaw chi teˇ hpaˍ gʼa shiˍ gʼa mawˬ leh, nawˬ geh kʼaw‸ hpfuhˆ kʼaw‸ la hpeh‸ tuˬ, ngaˬ ve bon lawˬ hkawˇ hta‸ a ciˉ na yuˬ laˇ-oˆ, teh‸ kʼoˆ ve yoˬ.

38Oˇ htaˇ, Gʼuiˬsha aˬ miˍ ce la piˇ leh, tuˉ tanˇ taˍ ve shaˍ, suhˆ, haˉ pui, miˬguiˬ leh gʼuiˬ hkʼaˇ hkʼaw ve iˉ kaˆ hkʼa peu-eˬ ve hta‸ to‸ baˬ piˇ lawˬ ve yoˬ.

39Chi hkʼe hpeh‸ la ve hta‸ chaw yaˇ teˇ hpaˍ gʼa mawˬ ve teˇ yanˇ, yawˇ hui miˬ chaˇ hkʼoˆ boˆ taˍ leh, Gʼuiˬsha chi lehˬ, awˬ tehˬ awˬ na ve Gʼuiˬsha hpeh‸ ve yoˬ, teh‸ kʼoˆ ve yoˬ.

40Oˇ htaˇ Eˇliˇya‸ lehˬ, Baˍlaˆ ve paw hkuˇ chi teˇ hpaˍ hta‸ hpeh yu‸-o‸. Teˇ gʼaˇ hta‸ ka‸ taˇ ponˬ piˇ, teh‸ kʼoˆ ve yoˬ. Hkʼe te leh, Iˉsaˍreˍlaˆ chaw teˇ hpaˍ, paw hkuˇ oˇ ve hkʼa peu-eˬ hta‸ hpeh yuˬ ve yoˬ. Eˇliˇya‸ lehˬ, paw hkuˇ oˇ ve teˇ hpaˍ hta‸ Kiˇshonˍ iˉ kaˆ lawˬ lo shiˍ kʼai leh oˇ kaˬ lo tiˇ pehˍ piˇ ve yoˬ.

41Oˇ ve hkʼaw‸ nawˉ, Eˇliˇya‸ jawˇmawˇ Aˍhaˆ geh kʼai leh, Chi beu‸ nawˬ awˍ haˆ ca caˇ-e loˬ. Mvuhˇ yeˬ lonˉ laˬ chehˇ ve awˬ hkawˇ hta‸ ngaˬ gʼa kaˇ ve yoˬ, teh‸ yawˇ hta‸ kʼoˆ piˇ ve yoˬ.

42Aˍhaˆ awˍ ca caˇ kʼai peuˬ hkʼaw‸ nawˉ, Eˇliˇya‸ Kaˍmeˍlaˆ hkʼaw hkʼoˆ lo taˆ-e leh, miˬ chaˇ hkʼoˆ lo boˆ taˍ ve yoˬ.

43Laˇ tsuhˇ gʼuiˬ hpawˇ lo nyi peu taˍ-o‸, teh‸ yawˇ ve awˬ ceˬ paˍ hta‸ kʼoˆ piˇ ve yoˬ. Awˬ ceˬ paˍ oˇ ve kʼaw‸ la leh, Ngaˬ te‸ chiˉ maˇ gʼa mawˬ, teh‸ yawˇ hta‸ kʼoˆ piˇ ve yoˬ. Suhˍ pawˆ hkʼa gaˬ, Eˇliˇya‸ yawˇ hta‸ oˇ hkʼe ca nyi tcuh ve yoˬ.

44Suhˍ pawˆ teˆ pawˆ yawˇ ca nyi taˉ leh kʼaw‸ la ve teˇ yanˇ, Chaw yaˇ ve la‸ taw kʼaw hui ka‸ maˇ cawˬ ve moˬ teˇ diˬ, laˇ tsuhˇ gʼuiˬ hkʼaw tawˆ la chehˇ ve hta‸ ngaˬ gʼa mawˬ ve yoˬ, teh‸ Eˇliˇya‸ hta‸ kʼoˆ piˇ ve yoˬ. Oˇ htaˇ Eˇliˇya‸ yawˇ ve awˬ ceˬ paˍ hta‸ kʼoˆ piˇ ve, Mvuhˇ yeˬ maˇ laˬ sheˍ htaˇ ka‸, iˉ mvuhˇ lawˬ ciˇ leh aˉ hkʼaw lo haˆ haˆ kʼaw‸ kʼo‸-e tuˬ, jawˇmawˇ Aˍhaˆ hta‸ ca hto piˇ-oˆ, teh‸ kʼoˆ piˇ ve yoˬ.

45Teˇ hkui tiˉ ve awˬ yanˇ hkʼaw, mvuhˇ naw ma hkʼoˆ lo moˬ biˇ taˆ la ve yoˬ. Mvuhˇ haw htawˇ meuˆ laˬ leh, mvuhˇ yeˬ lonˉ laˬ ve yoˬ. Aˍhaˆ lehˬ, iˉ mvuhˇ lawˬ ciˇ leh Yeˍruˆsaˍlehnˍ venˇ lo kʼo‸-e ve yoˬ.

46Gʼuiˬsha ve kanˇ paˆ Eˇliˇya‸ awˬ hkʼoˆ lo ya‸ la ve yoˬ. Yawˇ ve veu‸ kʼaˇ hta‸ hkʼa deh‸ gʼawˬ tsuh‸ peuˬ hkʼaw‸ nawˉ, Aˍhaˆ gʼuˇ suhˍ Yeˍruˆsaˍlehnˍ venˇ lo gʼuiˇ kʼo‸-e ve yoˬ.

← Chapter 17 Jump to: Chapter 19 →