1 Kings 16

Lahu Bible Edited © Thailand Bible Society and Bible Society of Myanmar, 2010, 2020.

← Chapter 15 Jump to: Chapter 17 →

1Gʼuiˬsha lehˬ, Haˍnaˍniˆ ve yaˇ tcuh kaˍ paˍ Yeˍhuˆ hta‸ tawˇ yaw piˇ leh, Baˍshaˍ hta‸ chi hkʼe ca kʼoˆ piˇ tcuh ve yoˬ.

2Nawˬ lehˬ te‸ chiˉ tcuhˉ kuiˬ maˇ cawˬ ve chaw hpeh‸ ve htawˇ, ngaˬ nawˬ hta‸ Iˉsaˍreˍlaˆ ve jawˇmawˇ te tcuh taˍ ve yoˬ. Ya‸ hkʼaˇ, nawˬ lehˬYeˍyawˇbaoˍ hkʼa shuˍ venˇbaˆ te leh, ngaˬ ve chaw teˇ hpaˍ hta‸ ya‸ kʼaw sheh ya‸ piˇ chehˇ ve yoˬ.

3Nawˬ chi hkʼe te ve pa taw, ngaˬ nyi ma zuhˆ jaˇ leh, ngaˬ Yeˍyawˇbaoˍ hta‸ te piˇ ve hkʼa shuˍ, nawˬ leh nawˬ ve yehˬ yaˇ kʼa yaˇ teˇ hpaˍ hta‸ htawˇ oˇ hkʼe te laˇ tuˬ yoˬ.

4Venˇ hkʼaw lo suh-e ve nawˬ ve awˬ ceuˬ awˬ hkʼaˇ teˇ hpaˍ lehˬ, hpuiˇ che‸ caˇ ve hta‸ gʼa hkanˍ leh, heh puiˉ hkʼaw lo suh-e ve chaw teˇ hpaˍ lehˬ, naˬ beuˬ ngaˆ htawˆ caˇ ve hta‸ gʼa hkanˍ tuˬ yoˬ, teh‸ Gʼuiˬsha kʼoˆ ve yoˬ.

5Baˍshaˍ hkʼa te ve kanˉ hkʼa peu-eˬ, Iˉsaˍreˍlaˆ jawˇmawˇ teˇ hpaˍ ve li‸ daw hkʼaw bvuh‸ keu taˍ ve yoˬ.

6Baˍshaˍ suh-e leh, shu yawˇ hta‸ Tiˇraˍzaˆ venˇ hkʼaw tuˍ piˇ ve yoˬ.

7Baˍshaˍ Gʼuiˬsha hta‸ te ya‸ jaˇ ve pa taw, tcuh kaˍ paˍ Yeˍhuˆ Gʼuiˬsha ve tawˇ oˇ ve teˇ hpaˍ Baˍshaˍ leh yawˇ ve yehˬ yaˇ kʼa yaˇ teˇ hpaˍ hta‸ kʼoˆ piˇ ve yoˬ. Baˍshaˍ lehˬ, Yeˍyawˇbaoˍ hkʼa shuˍ venˇbaˆ te ve ceh tiˉ maˇ heˆ. Yawˇ lehˬ Yeˍyawˇbaoˍ ve awˬ ceuˬ awˬ hkʼaˇ teˇ hpaˍ hta‸ ka‸ gʼa‸ ca leh tiˇ pehˍ piˇ ve pa taw, Gʼuiˬsha yawˇ hta‸ nyi ma zuhˆ jaˇ ve yoˬ.

8Yuˇda‸ mvuhˇmiˬ hta‸ jawˇmawˇ Aˍsaˍ uˉ peunˍ chehˇ ve 26 hkʼaw‸ teˇ hkʼaw‸ htaˇ, Baˍshaˍ ve yaˇ Eˇlaˍ Iˉsaˍreˍlaˆ mvuhˇmiˬ hta‸ uˉ peunˍ ve yoˬ. Yawˇ lehˬ, Tiˉraˍzaˍ venˇ hta‸ nyiˇ hkʼaw‸ uˉ peunˍ ve yoˬ.

9Jawˇmawˇ ve iˉ mvuhˇ lawˬ teˇ hkoˇ ve hta‸ ha‸ shaˉ shehˍ hpaˇ ma‸ poˍ lonˉ Ziˇmaˍriˆ yawˇ hta‸ kʼaw‸ hpfuhˆ ve yoˬ. Teˇ nyi htaˇ, jawˇmawˇ Eˇlaˍ lehˬ yawˇ ve hawˉ yehˬ hta‸ ha‸ shaˉ shehˍ hpaˇ Aˍzaˆ ve yehˬ hkʼaw lo, tzuhˬ dawˬ bvuhˆ chehˇ ve yoˬ.

10Oˇ htaˇ, Ziˇmaˍriˆ yehˬ hkʼaw lo‸-e leh, yawˇ hta‸ tiˇ pehˍ piˇ ve yoˬ. Peuˬ hkʼaw‸ nawˉ, yawˇ awˬ tan jawˇmawˇ kʼaw‸ te ve yoˬ. Chi hkʼe hpeh‸ la ve lehˬ, Yuˇda‸ mvuhˇmiˬ hta‸ Aˍsaˍ uˉ peunˍ chehˇ ve 27 hkʼaw‸ teˇ hkʼaw‸ htaˇ hpeh‸ ve yoˬ.

11Ziˇmaˍriˆ jawˇmawˇ hpeh‸ la ve teˇ yanˇ, yawˇ lehˬ Baˍshaˍ ve awˬ ceuˬ awˬ hkʼaˇ hawˉ hkʼaˆ paˍ hkʼa peu-eˬ ve hta‸ tiˇ pehˍ piˇ ve yoˬ.

12Gʼuiˬsha lehˬ tcuh kaˍ paˍ Yeˍhuˆ hta‸ cuˇ leh kʼoˆ taˍ peuˬ ve hkʼe, Ziˇmaˍriˆ lehˬ Baˍshaˍ ve awˬ ceuˬ awˬ hkʼaˇ hkʼa peu-eˬ ve hta‸ tiˇ pehˍ piˇ ve yoˬ.

13Baˍshaˍ leh yawˇ ve yaˇ paˍ Eˇlaˍ venˇbaˆ te leh, Iˉsaˍreˍlaˆ chaw hui hta‸ ya‸ kʼaw sheh ya‸ piˇ ve pa taw, Gʼuiˬsha yawˇ hui hta‸ nyi ma zuhˆ jaˇ ve yoˬ.

14Eˇlaˍ hkʼa te ve kanˉ hkʼa peu-eˬ, Iˉsaˍreˍlaˆ jawˇmawˇ teˇ hpaˍ ve li‸ daw hkʼaw bvuh‸ keu taˍ ve yoˬ.

15Yuˇda‸ mvuhˇmiˬ hta‸ jawˇmawˇ Aˍsaˍ uˉ peunˍ ve 27 hkʼaw‸ teˇ hkʼaw‸ htaˇ, Ziˉmaˍriˆ Tiˇraˍzaˆ venˇ hkʼaw chehˇ leh, Iˉsaˍreˍlaˆ chaw hui hta‸ 7 nyi uˉ peunˍ ve yoˬ. Awˬ yanˇ oˇ ve hkʼaw, Iˉsaˍreˍlaˆ chaw hui lehˬ, Hpiˇliˇtiˆ mvuhˇmiˬ hkʼaw cawˬ ve Giˇbaˍtonˍ venˇ hta‸ ca bawˆ chehˇ taˍ ve yoˬ.

16Ziˇmaˍriˆ jawˇmawˇ hta‸ tiˇ pehˍ piˇ peuˬ ve awˬ hkawˇ hta‸ yawˇ hui gʼa kaˇ ve teˇ yanˇ, yawˇ hui hkʼa peu-eˬ ma‸ poˍ lonˉ Awˇmaˍriˆ hta‸ Iˉsaˍreˍlaˆ jawˇmawˇ te tcuh ve yoˬ.

17Oˇ htaˇ, Awˇmaˍriˆ leh yawˇ ve ma‸ yaˇ hkʼa peu-eˬ, Tiˇraˍzaˆ venˇ lo kʼaw‸ la leh, venˇ oˇ ve hta‸ bawˆ yuˬ ve yoˬ.

18Venˇ oˇ ve shu la‸ sheh hkʼaw gaˬ peuˬ ve hta‸ Ziˇmaˍriˆ gʼa shiˍ ve teˇ yanˇ, yawˇ hawˉ yehˬ hkʼaw gʼuiˇ lo‸-e leh, hawˉ yehˬ hta‸ aˬ miˍ tuˉ keu ve yoˬ. Hkʼe te leh, yawˇ oˇ kaˬ lo suh-e ve yoˬ.

19Chi hkʼe hpeh‸ la ve lehˬ, yawˇ Gʼuiˬsha hta‸ te ya‸ jaˇ peuˬ ve pa taw yoˬ. Yeˍyawˇbaoˍ hkʼa shuˍ, yawˇ htawˇ Gʼuiˬsha hta‸ te ya‸ jaˇ leh, Iˉsaˍreˍlaˆ chaw hui hta‸ ya‸ kʼaw sheh ya‸ piˇ ve yoˬ.

20Ziˇmaˍriˆ hkʼa te ve kanˉ hkʼa peu-eˬ, Iˉsaˍreˍlaˆ jawˇmawˇ teˇ hpaˍ ve li‸ daw hkʼaw bvuh‸ keu taˍ ve yoˬ.

21Iˉsaˍreˍlaˆ chaw nyiˇ moˍ hpeh‸ la ve yoˬ. Teˇ hpaˍ hpaˍ Giˇhaˆ ve yaˇ Tiˇbaˍniˆ hta‸ jawˇmawˇ te tcuh gaˇ leh, teˇ hpaˍ hpaˍ Awˇmaˍriˆ hta‸ nyi ma cawˇ ve yoˬ.

22Awˬ leh meuˇ gaˬ htaˇ, Awˇmaˍriˆ hta‸ nyi ma cawˇ ve chaw hpawˇ gʼaˇ ve yoˬ. Tiˇbaˍniˆ suh-e leh, Awˇmaˍriˆ jawˇmawˇ hpeh‸ la ve yoˬ.

23Chi hta‸ pa taw, Yuˇda‸ mvuhˇmiˬ hta‸ jawˇmawˇ Aˍsaˍ uˉ peunˍ chehˇ ve 31 hkʼaw‸ htaˇ, Awˇmaˍriˆ Iˉsaˍreˍlaˆ mvuhˇmiˬ hta‸ uˉ peunˍ ve yoˬ. Yawˇ Iˉsaˍreˍlaˆ mvuhˇmiˬ hta‸ 12 hkʼaw‸ uˉ peunˍ ve yoˬ.

24Yawˇ lehˬ, Tiˇraˍzaˆ venˇ hkʼaw 6 hkʼaw‸ uˉ peunˍ taˉ peuˬ hkʼaw‸ nawˉ, Sheˍmaˍraˆ teh‸ kʼoˆ ve chaw teˇ gʼaˇ geh Saˍmaˍriˆ hkʼaw pui hta‸ hpu 6,000 hteh‸ piˇ leh vuiˬ yuˬ ve yoˬ. Awˇmaˍriˆ lehˬ, hkʼaw oˇ ve hta‸ hkʼa deh‸ caw ko leh ta‸ yehˬ teˇ maˬ te taˍ ve yoˬ. Hkʼaw pui oˇ ve hawˇ laˇ shehˍ hpaˇ ve awˬ meh hta‸ yuˬ leh, chehˇ kuiˬ oˇ ve hta‸ Saˍmaˍriˆ teh‸ meh piˇ ve yoˬ.

25Awˇmaˍriˆ lehˬ, awˬ nu ve Iˉsaˍreˍlaˆ jawˇmawˇ teˇ hpaˍ a‸ kehˉ, Gʼuiˬsha hta‸ te ya‸ jaˇ ve yoˬ.

26Yeˍyawˇbaoˍ hkʼa shuˍ, yawˇ htawˇ venˇbaˆ te leh Iˉsaˍreˍlaˆ chaw hui hta‸ ya‸ kʼaw sheh ya‸ piˇ ve yoˬ. Hkʼe te leh, Gʼuiˬsha yawˇ hta‸ nyi ma zuhˆ jaˇ ve yoˬ.

27Awˇmaˍriˆ hkʼa te ve kanˉ hkʼa peu-eˬ Iˉsaˍreˍlaˆ jawˇmawˇ teˇ hpaˍ ve li‸ daw hkʼaw bvuh‸ keu taˍ ve yoˬ.

28Awˇmaˍriˆ suh-e leh, shu yawˇ hta‸ Saˍmaˍriˆ venˇ hkʼaw tuˍ piˇ ve yoˬ. Hkʼe te leh, yawˇ ve yaˇ paˍ Aˍhaˆ yawˇ awˬ tan jawˇmawˇ kʼaw‸ te ve yoˬ.

29Yuˇda‸ mvuhˇmiˬ hta‸ jawˇmawˇ Aˍsaˍ uˉ peunˍ chehˇ ve 38 hkʼaw‸ teˇ hkʼaw‸ htaˇ, Iˉsaˍreˍ laˆ mvuhˇmiˬ hta‸ Awˇmaˍriˆ ve yaˇ Aˍhaˆ uˉ peunˍ ve yoˬ. Yawˇ lehˬ, Saˍmaˍriˆ venˇ hta‸ 22 hkʼaw‸ uˉ peunˍ ve yoˬ.

30Yawˇ lehˬ, awˬ nu ve Iˉsaˍreˍlaˆ jawˇmawˇ teˇ hpaˍ a‸ kehˉ Gʼuiˬsha hta‸ te ya‸ jaˇ ve yoˬ.

31Yawˇ lehˬ, jawˇmawˇ Yeˍyawˇbaoˍ hkʼe ceh tiˉ haiˬ ve maˇ heˆ. Yawˇ lehˬ Siˉdonˍ jawˇmawˇ Eˉtaˍbaˍlaˆ ve yaˇ miˇ Yeˍsaˍbeˍlaˆ hta‸ heuˆ leh, Baˍlaˆ gʼuiˬsha hta‸ oˉ kʼoˍ pui ve yoˬ.

32Yawˇ lehˬ Baˍlaˆ gʼuiˬsha awˬ pon Saˍmaˍriˆ venˇ hkʼaw bon yehˬ teˇ maˬ leh tuˉ tanˇ kuiˬ teˇ maˬ te teh piˇ taˍ ve yoˬ.

33Chi hkʼoˆ kaˬ, yawˇ lehˬ Aˍsheˍraˆ gʼuiˬsha ma ve shaˉ ho‸ teˇ maˬ hta‸ htawˇ te teh taˍ ve yoˬ. Yawˇ lehˬ, awˬ nu ve Iˉsaˍreˍlaˆ jawˇmawˇ teˇ hpaˍ a‸ kehˉ haiˬ leh, Gʼuiˬsha hta‸ nyi ma zuhˆ piˇ lawˬ ve yoˬ.

34Yawˇ uˉ peunˍ chehˇ ve awˬ yanˇ hkʼaw, Beˍteˍlaˆ venˇ hkʼaw chehˇ ve Hiˇleˍlaˆ lehˬ, Yeˍriˆ hkoˇ venˇ hta‸ kʼaw‸ gu te ve yoˬ. Gʼuiˬsha lehˬ, Nunˍ ve yaˇ paˍ Yawˇsuˆ hta‸ kʼoˆ piˇ taˍ ve hkʼe, Yeˍriˆhkoˇ venˇ hta‸ kʼaw‸ gu te ve Hiˇleˍlaˆ ve yaˇ paˍ uiˍ Aˍbiˆranˍ hta‸ suh-e piˇ lawˬ leh, venˇ taˍ meu‸ hpe‸ teˇ hpaˍ hta‸ kʼaw‸ gu te htaˇ, yawˇ ve yaˇ paˍ leh Saˍgoˆ hta‸ kʼaw‸ suh-e piˇ lawˬ ve yoˬ.

← Chapter 15 Jump to: Chapter 17 →