1 Kings 10

Lahu Bible Edited © Thailand Bible Society and Bible Society of Myanmar, 2010, 2020.

← Chapter 9 Jump to: Chapter 11 →

1Sheˍbaˆ mvuhˇmiˬ hta‸ uˉ peunˍ chehˇ ve jawˇmawˇ ma lehˬ, Sawˉla‸monˍ awˬ meh bvuhˬ jaˇ ve awˬ hkawˇ gʼa kaˇ leh, yawˇ hta‸ haˍ jaˇ ve tawˇ teˇ hpaˍ na nyi tuˬ, Yeˍruˆsaˍlehnˍ venˇ lo gaˬ la ve yoˬ.

2Yawˇ lehˬ kaˍlaˍoˆ awˬ moˍ lonˉ gʼa‸ veu laˇ leh, sha hawnˉ, shehnˉ shiˍ leh shi hkʼa biˇ yuˬ veu laˇ ve yoˬ. Yawˇ Sawˉla‸monˍ hta‸ mawˬ htaˇ, yawˇ na nyi gaˇ ve tawˇ teˇ hpaˍ yawˇ hta‸ na nyi piˇ ve yoˬ.

3Sawˉla‸monˍ lehˬ, yawˇ na nyi laˇ ve awˬ ceuˬ hkʼa peu-eˬ hta‸ hkʼa deh‸ kʼaw‸ yaw hkʼaw‸ piˇ ve yoˬ. Yawˇ awˬ pon haˍ jaˇ ve na nyi hkawˇ teˇ maˬ ka‸ maˇ cawˬ.

4Jawˇmawˇ ma oˇ ve lehˬ, Sawˉla‸monˍ yaw hkʼaw‸ piˇ ve tawˇ teˇ hpaˍ hta‸ gʼa kaˇ leh, yawˇ te taˍ ve hawˉ yehˬ hta‸ gʼa mawˬ ve yoˬ.

5Yawˇ hta‸ te caˍ te taw laˇ ve caˇ tuˬ dawˬ tuˬ teˇ hpaˍ, yawˇ ve a ma‸ lonˉ teˇ hpaˍ chehˇ ve yehˬ, yawˇ ve hawˉ yehˬ hkʼaw kanˉ te chehˇ ve a ma‸ teˇ hpaˍ, yawˇ hui veu‸ deh taˍ ve veu‸ kʼaˇ teˇ hpaˍ, leh bon yehˬ hkʼaw tuˉ tanˇ chehˇ ve tuˉ tanˇ tuˬ teˇ hpaˍ hta‸ ka‸ yawˇ gʼa mawˬ leh anˇ jaˇ ve yoˬ.

6Hkʼe te leh, yawˇ jawˇmawˇ Sawˍla‸monˍ hta‸ chi hkʼe kʼoˆ piˇ ve yoˬ. Ngaˬ ve mvuhˇmiˬ hkʼaw nawˬ ve awˬ lawn gʼa kaˇ ve teˇ hpaˍ lehˬ awˬ tehˬ awˬ na cawˇ ve yoˬ.

7Ngaˬ aˉ hkʼaw lo chehˇ taˍ htaˇ, nawˬ chi taw taw cuˇ yiˍ cawˬ ve hta‸ ngaˬ maˇ yonˍ. Ya‸ hkʼaˇ, chi beu‸ ngaˬ mehˆ shiˍ hkʼa tawˍ lehˆ gʼa mawˬ peuˬ. Nawˬ ve cuˇ yiˍ leh nawˬ cawˬ taˍ ve hpu shi mawˇ jeˬ teˇ hpaˍ lehˬ, ponˬ laˬ htaˇ ngaˬ gʼa kaˇ taˍ ve a‸ kehˉ uiˍ jaˇ maˇ jaˇ ve yoˬ.

8Nawˬ miˇ ma teˇ hpaˍ lehˬ, hkʼaˬ ma awˬ bon uiˍ ve le. Nawˬ geh chehˇ taˍ leh nawˬ ve tawˇ hta‸ teˇ nyi le le gʼa kaˇ chehˇ ve awˬ ceˬ teˇ hpaˍ htawˇ hkʼaˬ ma awˬ bon uiˍ jaˇ ve le.

9Nawˬ ve Jawˇmawˇ Gʼuiˬsha hta‸ chiˇ mvuh-o. Yawˇ nawˬ hta‸ hkʼaˬ ma nyi ma cawˇ ve hta‸ hpeu‸ maˍ tuˬ, nawˬ hta‸ Iˉsaˍreˍlaˆ ve jawˇmawˇ te tcuh taˍ laˇ ve yoˬ. Yawˇ Iˉsaˍreˍlaˆ chaw hui hta‸ ha‸ ve teˇ ceuˬ, co co taiˍ taiˍ yeˬ chehˇ ve pa taw, mvuhˇmiˬ chi hkʼaw lo hteˇ ve cawˇ ve awˬ ceuˬ cawˬ la tuˬ, yawˇ nawˬ hta‸ jawˇmawˇ te tcuh taˍ laˇ ve yoˬ, teh‸ yawˇ hta‸ kʼoˆ piˇ ve yoˬ.

10Oˇ hkʼe kʼoˆ peuˬ hkʼaw‸ nawˉ, jawˇmawˇ ma lehˬ yawˇ yuˬ veu laˇ ve mawˇ hta‸ hpeu‸ tawˆ leh, shi 3,100 cawehˬ, sha hawnˉ leh shehnˉ shiˍ teˇ hpaˍ jawˇmawˇ Sawˉla‸monˍ hta‸ piˇ ve yoˬ. Jawˇmawˇ ma piˇ ve sha hawnˉ oˇ ve teˇ hpaˍ lehˬ, shu yawˇ hta‸ tanˇ piˇ jaw ve sha hawnˉ a‸ kehˉ maˇ jaˇ ve yoˬ.

11(Hiˍranˍ lehˬ jawˇmawˇ geh shi ceh tiˉ yuˬ laˬ ve maˇ heˆ, Awˇhpiˍraˆ venˇ hkʼaw cawˬ ve da‸ jaˇ ve suhˆ, leh shehnˉ shiˍ teˇ hpaˍ htawˇ jawˇmawˇ hta‸ piˇ ve yoˬ.

12Sawˉla‸monˍ lehˬ da‸ jaˇ ve suhˆ oˇ ve teˇ hpaˍ hta‸ bon yehˬ leh yawˇ ve hawˉ yehˬ yehˬ hkuiˉ daw te ve yoˬ. Teˇ hpaˍ hpaˍ hta‸ yawˇ yuˬ leh, tinˍ te tcuh ve yoˬ. Suhˆ chi teˇ ceuˬ lehˬ, Iˉsaˍreˍlaˆ mvuhˇmiˬ hkʼaw lo awˬ hkʼaw‸ nawˉ teˇ pawˆ ka‸ maˇ kʼaw‸ gaˬ la ve yoˬ.)

13Jawˇmawˇ Sawˉla‸monˍ lehˬ, jawˇmawˇ ma oˇ ve hta‸ piˇ taˍ peuˬ ve la‸ shawnˍ teˇ hpaˍ awˬ hkʼoˆ, jawˇmawˇ ma hkʼa lawˬ ve awˬ ceuˬ hkʼa peu-eˬ ve hta‸ ka‸ piˇ ve yoˬ. Oˇ ve hkʼaw‸ nawˉ, jawˇmawˇ ma lehˬ Sheˍbaˆ mvuhˇmiˬ lo kʼaw‸ kʼo‸-e ve yoˬ.

14Teˇ hkʼaw‸ awˬ hkʼaw lo, jawˇmawˇ Sawˉla‸monˍ lehˬ shi 15,500 cawehˬ gʼa chehˇ ve yoˬ.

15Chi awˬ hkʼoˆ ka‸, tanˇ kaˬ paˍ teˇ hpaˍ geh gʼa ve awˬ hkawnˍ, Aˍraˆ jawˇmawˇ teˇ hpaˍ tanˇ laˇ ve awˬ hkawnˍ leh awˬ nu ve mvuhˇmiˬ teˇ hpaˍ geh shaw gʼa taˍ ve awˬ hkawnˍ teˇ hpaˍ htawˇ cawˬ sheˍ ve yoˬ.

16Sawˉla‸monˍ lehˬ, htanˬ tuˬ 200 maˬ te taˍ ve yoˬ. Htanˬ tuˬ oˇ ve teˇ maˬ ve shi 6 cawehˬ yuˬ te taˍ ve yoˬ.

17Chi hkʼoˆ ka‸, yawˇ lehˬ htanˬ tuˬ ehˉ 300 maˬ htawˇ kʼaw‸ te taˍ ve yoˬ. Htanˬ tuˬ ehˉ chi ve teˇ maˬ ve shi teˇ cawehˬ ngaˇ hkanˉ hkʼe yuˬ te taˍ ve yoˬ. Yawˇ lehˬ, htanˬ tuˬ chi teˇ hpaˍ hta‸ Leˍbaˍnonˍ hteunˍ lonˉ teh‸ kʼoˆ ve yehˬ lonˉ hkʼaw teh taˍ ve yoˬ.

18Yawˇ lehˬ uiˍ jaˇ ve kʼaw jaw lonˉ teˇ maˬ hta‸ htawˇ te taˍ ve yoˬ. Kʼaw jaw lonˉ oˇ ve teˇ tawn hta‸ haw ciˬ yuˬ te taˍ leh, awˬ nu ve teˇ tawn hta‸ da‸ jaˇ ve shi yuˬ te taˍ ve yoˬ.

19Kʼaw jaw oˇ ve awˬ hkʼoˆ lo taˆ-e tuˬ go hkʼeh‸ 6 maˬ cawˬ ve go teˇ maˬ te tcuhˉ taˍ ve yoˬ. Go hkʼeh‸ oˇ ve teˇ hpaˍ awˬ meuˇ nyiˇ hpawˇ lo laˇ caˬ shiˉ awˬ han teˇ hpawˇ teˇ maˬ htawˆ keu taˍ leh, hkʼa peu-eˬ 12 hkeh hpeh‸ ve yoˬ.

20Kʼaw jaw oˇ ve awˬ hkʼaw‸ nawˉ hpawˇ lo, nuˇ paˍ lonˉ ve oˉ kʼoˍ awˬ han te keu taˍ leh, nuˇ paˍ lonˉ oˇ ve la‸ sha paˉ, la‸ mehˍ paˉ lo laˇ caˬ shiˉ awˬ han te keu taˍ ve yoˬ. Chi hkʼe ve kʼaw jaw awˬ nu ve mvuhˇmiˬ teˇ kaˬ lo ka‸ maˇ cawˬ.

21Sawˉla‸monˍ a pehˉ meuˇ gʼuiˬ keu dawˬ ve kawˆ hkʼa peu-eˬ ve hta‸ shi ceh tiˉ yuˬ te taˍ ve yoˬ. Leˍbaˍnonˍ hteunˍ lonˉ teh‸ kʼoˆ ve bawehˇ lonˉ hkʼaw hkʼa yehˇ ve kawˆ teˇ hpaˍ hta‸ htawˇ, da‸ jaˇ ve shi ceh tiˉ yuˬ te taˍ ve yoˬ. Hpu teˇ ceuˬ hta‸ a ciˉ ka‸ maˇ yehˇ. Awˬ lawn kʼo, Sawˉla‸monˍ awˬ co-e htaˇ, hpu teˇ ceuˬ hta‸ awˬ hpfuhˇ hkʼaˆ ve mawˇ teh‸ maˇ shawˍ ve pa taw yoˬ.

22Yawˇ lehˬ, Hiˍranˍ ve haw lo‸ kʼoˍ teˇ hpaˍ geh te toˇ tuˬ ve yawˇ ve haw lo‸ kʼoˍ teˇ hpaˍ hta‸ htawˇ te taˍ ve yoˬ. Shehˆ hkʼaw‸ teˇ pawˆ yawˇ ve haw lo‸ kʼoˍ teˇ hpaˍ kʼaw‸ la leh, yawˇ geh shi, hpu, haw ciˬ, maw‸ leh maw‸ lonˉ teˇ hpaˍ yuˬ veu laˇ chehˇ ve yoˬ.

23Jawˇmawˇ Sawˉla‸monˍ lehˬ, awˬ nu ve jawˇmawˇ teˇ hpaˍ a‸ kehˉ cuˇ yiˍ cawˬ leh paw sha jaˇ ve yoˬ.

24Miˬguiˬ chaw yaˇ teˇ hpaˍ yawˇ geh laˬ leh, Gʼuiˬsha yawˇ hta‸ piˇ taˍ ve cuˇ yiˍ tawˇ hkawˇ ca na la gaˇ jaˇ ve yoˬ.

25Yawˇ geh hkʼa laˬ ve chaw hkʼa peu-eˬ, yawˇ hta‸ hpu leh shi yuˬ te taˍ ve mawˇ, veu‸ kʼaˇ, la‸ caˉ, sha hawnˉ, iˉ mvuhˇ, piˉ laˬ, chi hkʼe ve la‸ shawnˍ teˇ gʼaˇ teˇ ceuˬ yuˬ veu laˇ piˇ ve yoˬ. Teˇ hkʼaw‸ peuˬ teˇ hkʼaw‸ chaw yaˇ teˇ hpaˍ yawˇ geh laˬ chehˇ taˍ ve yoˬ.

26Sawˉla‸monˍ lehˬ, iˉ mvuhˇ lawˬ 1,400 maˬ cawˬ leh, iˉ mvuhˇ ciˇ ve ma‸ yaˇ teˇ meunˍ nyiˇ hinˉ gʼaˇ cawˬ ve yoˬ. Ma‸ yaˇ chi teˇ hpaˍ hpaˍ hta‸ Yeˍruˆsaˍlehnˍ venˇ hkʼaw teh taˍ leh, teˇ hpaˍ hpaˍ hta‸ awˬ nu ve venˇ teˇ hpaˍ hkʼaw teh taˍ ve yoˬ.

27Yawˇ uˉ peunˍ chehˇ ve awˬ yanˇ hkʼaw, hpu teˇ ceuˬ lehˬ Yeˍruˆsaˍlehnˍ venˇ hkʼaw haˉ pui shiˍ hkʼa shuˍ awˬ hpfuhˇ maˇ cawˬ leh, keˍdaˍ suhˆ teˇ ceuˬ htawˇ awˬ nu ve suhˆ teˇ hpaˍ hkʼa shuˍ maˇ jaˇ ve yoˬ.

28Sawˉla‸monˍ ve iˉ mvuhˇ teˇ hpaˍ hta‸ Eˇjiˇtu‸ leh Tuˍraˍkiˍ mvuhˇmiˬ hkʼaw ca vuiˬ yuˬ taˍ ve yoˬ.

29Eˇjiˇtu‸ mvuhˇmiˬ hkʼaw laˬ ve iˉ mvuhˇ lawˬ teˇ maˬ ve 600 hteh‸ gʼa piˇ leh, iˉ mvuhˇ teˇ hkeh ve 150 hteh‸ gʼa piˇ ve yoˬ. Awˬ hkʼaw‸ nawˇ, iˉ mvuhˇ lawˬ leh iˉ mvuhˇ chi teˇ hpaˍ, Hiˇtiˆ jawˇmawˇ leh Suˇriˆ jawˇmawˇ teˇ hpaˍ hta‸ kʼaw‸ hawˇ piˇ ve yoˬ.

← Chapter 9 Jump to: Chapter 11 →