bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Lahu
/
Lahu Bible Edited © Thailand Bible Society and Bible Society of Myanmar, 2010, 2020.
/
1 Kings 22
1 Kings 22
Lahu Bible Edited © Thailand Bible Society and Bible Society of Myanmar, 2010, 2020.
← Chapter 21
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
1
Iˍsaˍreˍlaˆ chaw leh suˇriˆ chaw hui nyiˇ hkʼaw‸ hkʼa gaˬ ma‸ bawˆ da‸ chehˇ ve yoˬ.
2
Shehˆ hkʼaw‸ teˇ hkʼaw‸ gaˬ htaˇ, Yuˇda‸ jawˇmawˇ Yawˇshaˍhpaˆ, Iˉsaˍreˍlaˆ jawˇmawˇ Aˍhaˆ geh kʼai ve yoˬ.
3
Oˇ htaˇ, Aˍhaˆ yawˇ ve ma‸ poˍ lonˉ teˇ hpaˍ hta‸ kuˬ yuˬ leh, Aˬ hto‸ ma pa taw Suˇriˆ chaw hui bawˆ yuˬ kʼai taˍ ve, Giˇlaˆ mvuhˇmiˬ hkʼaw cawˬ ve Raˍmoˆ venˇ hta‸ ngaˬ hui maˇ kʼaw‸ bawˆ hkʼaw‸ ve le. Venˇ chi lehˬ ngaˬ hui ve venˇ hpeh‸ ve yoˬ, teh‸ yawˇ hui hta‸ kʼoˆ piˇ ve yoˬ.
4
Oˇ hkʼe kʼoˆ peuˬ hkʼaw‸ nawˉ, yawˇ jawˇmawˇ Yawˇshaˍhpaˆ hpawˇ lo hpfuhˆ leh, Ngaˬ hui Raˍmoˆ venˇ hta‸ ca bawˆ yuˬ ve kʼo, nawˬ ka‸ ngaˬ hui geh kʼai tuˬ ve laˇ, teh‸ yawˇ hta‸ kʼoˆ piˇ ve yoˬ. Kʼai hpeh‸ ve yoˬ. Ngaˬ ve ma‸ yaˇ teˇ hpaˍ ka‸ kʼai hpeh‸ ve yoˬ.
5
Ya‸ hkʼaˇ, ngaˬ hui Gʼuiˬsha hta‸ awˉ lawˉ na nyi cawˇ sheˍ ve yoˬ, teh‸ Yawˇshaˍhpaˆ kʼaw‸ yaw hkʼaw‸ piˇ ve yoˬ.
6
Oˇ htaˇ, jawˇmawˇ Aˍhaˆ lehˬ tcuh kaˍ paˍ 400 gʼaˇ hta‸ kuˬ yuˬ leh, Ngaˬ Raˍmoˆ venˇ hta‸ ca bawˆ yuˬ cawˇ laˇ, teh‸ yawˇ hui hta‸ na nyi ve yoˬ. Ca bawˆ-e loˬ. Venˇ oˇ ve Gʼuiˬsha nawˬ hta‸ chiˇ a‸ laˇ tuˬ yoˬ, teh‸ yawˇ hui Aˍhaˆ hta‸ kʼaw‸ yaw hkʼaw‸ piˇ ve yoˬ.
7
Ya‸ hkʼaˇ Yawˇshaˍhpaˆ lehˬ, Ngaˬ hui hta‸ Gʼuiˬsha ve tawˇ hto laˇ hpeh‸ ve awˬ nu ve tcuh kaˍ paˍ teˇ gʼaˇ gʼaˇ cawˬ sheˍ laˇ, teh‸ Aˍhaˆ hta‸ na nyi ve yoˬ.
8
Aˍhaˆ kʼoˆ ve, Yoˬ, Iˉmaˍlaˆ ve yaˇ Miˆhkaˍ teˇ gʼaˇ cawˬ sheˍ ve yoˬ. Ya‸ hkʼaˇ, ngaˬ yawˇ hta‸ nyi bawˬ jaˇ ve yoˬ. Awˬ lawn kʼo, yawˇ ngaˬ hta‸ da‸ ve tawˇ teˇ pawˆ ka‸ maˇ yaw laˇ jaw. Maˇ da‸ ve tawˇ tiˉ yaw laˇ ve yoˬ, teh‸ Yawˇshaˍhpaˆ hta‸ kʼoˆ piˇ ve yoˬ. Nawˬ oˇ hkʼe maˇ kʼoˆ cawˇ, teh‸ Yawˇshaˍhpaˆ yawˇ hta‸ kʼoˆ piˇ ve yoˬ.
9
Hkʼe te leh, Aˍhaˆ yawˇ ve ma‸ poˍ teˇ gʼaˇ hta‸ kuˬ yuˬ leh, Miˆhkaˍ hta‸ ca kuˬ tcuh ve yoˬ.
10
Aˍhaˆ leh Yawˇshaˍhpaˆ lehˬ, jawˇmawˇ ve veu‸ kʼaˇ veu‸ deh leh Saˍmaˍriˆ venˇ taˍ meu‸ hpe‸ lo mui chehˇ taˍ ve yoˬ. Tcuh kaˍ paˍ hkʼa peu-eˬ, yawˇ huiˉ maˬ gʼuˇ suhˍ lo chehˇ taˍ ve yoˬ.
11
Oˇ htaˇ, Hkeˍnaˍnaˆ ve yaˇ tcuh kaˍ paˍ Zaˍdaˍkiˆ lehˬ, sho yuˬ te taˍ ve awˬ hkaw teˇ hpaˍ yuˬ laˬ leh, Gʼuiˬsha chi hkʼe kʼoˆ ve yoˬ. Awˬ hkaw chi teˇ hpaˍ hta‸ nawˬ yuˬ leh ma‸ ca bawˆ ve kʼo, nawˬ gʼaˇ tuˬ yoˬ, teh‸ Aˍhaˆ hta‸ kʼoˆ piˇ ve yoˬ.
12
Awˬ nu ve tcuh kaˍ paˍ hkʼa peu-eˬ htawˇ, yawˇ kʼoˆ ve hkʼe kʼoˆ ve yoˬ. Raˍmoˆ venˇ hta‸ ca bawˆ-e loˬ. Nawˬ gʼaˇ tuˬ yoˬ, teh‸ yawˇ hta‸ kʼoˆ piˇ ve yoˬ.
13
Miˆhkaˍ hta‸ ca kuˬ kʼai ve ma‸ poˍ oˇ ve Miˆhkaˍ hta‸ mawˬ htaˇ, Tcuh kaˍ paˍ hkʼa peu-eˬ jawˇmawˇ ma‸ bawˆ gʼaˇ tuˬ ve awˬ lawn kʼoˆ chehˇ taˍ ve yoˬ. Nawˬ ka‸ jawˇmawˇ hta‸ oˇ hkʼe kʼoˆ piˇ-oˆ, teh‸ yawˇ hta‸ kʼoˆ piˇ ve yoˬ.
14
Oˇ htaˇ Miˆhkaˍ lehˬ, Gʼuiˬsha ngaˬ hta‸ kʼoˆ tcuh laˇ ve hkʼe ceh ngaˬ kʼoˆ tuˬ yoˬ, teh‸ yawˇ hta‸ kʼaw‸ kʼoˆ piˇ ve yoˬ.
15
Yawˇ jawˇmawˇ geh gaˬ la ve teˇ yanˇ, Miˆhkaˍ-oˬ, jawˇmawˇ Yawˇshaˍhpaˆ ngaˬ huiˉ maˬ Raˍmoˆ venˇ hta‸ ca bawˆ cawˇ laˇ, teh‸ Aˍhaˆ yawˇ hta‸ na nyi ve yoˬ. Ca bawˆ-e loˬ. Gʼuiˬsha nawˬ hta‸ gʼaˇ tcuh laˇ tuˬ yoˬ hehˉ, teh‸ Miˆhkaˍ yawˇ hta‸ kʼaw‸ yaw hkʼaw‸ piˇ ve yoˬ.
16
Oˇ htaˇ jawˇmawˇ Aˍhaˆ lehˬ, Nawˬ ngaˬ hta‸ tawˇ yaw laˇ ve kʼo, cawˇ ve tawˇ hta‸ ceh yaw laˇ-oˆ, teh‸ ngaˬ nawˬ hta‸ hkʼaˬ nyiˇ pawˆ gʼa kʼoˆ piˇ tuˬ sheˍ ve le, teh‸ Miˆhkaˍ hta‸ kʼoˆ piˇ ve yoˬ.
17
Miˆhkaˍ kʼaw‸ yaw hkʼaw‸ leh kʼoˆ ve, Iˉsaˍreˍlaˆ chaw hui lehˬ, yawˬ hawˉ paˍ maˇ cawˬ ve yawˬ ehˉ hkʼe, hkʼaw hkʼoˆ lo gʼuiˇ hpaw toˇ chehˇ ve hta‸ ngaˬ gʼa mawˬ ve yoˬ. Gʼuiˬsha kʼoˆ ve, Chaw chi teˇ hpaˍ lehˬ, awˬ hoˉ awˬ naˬ maˇ cawˬ. Chi hta‸ pa taw, yawˇ hui hta‸ a shu yawˇ ve yehˬ lo kʼaw‸ kʼo‸-e tcuh-o, teh‸ kʼoˆ ve yoˬ, teh‸ Aˍhaˆ hta‸ kʼoˆ piˇ ve yoˬ.
18
Oˇ htaˇ Aˍhaˆ lehˬ, Chaw chi hpaˇ ngaˬ hta‸ da‸ ve tawˇ teˇ pawˆ ka‸ maˇ yaw laˇ jaw, teh‸ ngaˬ nawˬ hta‸ kʼoˆ piˇ taˍ peuˬ ve maˇ heˆ laˇ, teh‸ Yawˇshaˍhpaˆ hta‸ kʼoˆ piˇ ve yoˬ.
19
Miˆhkaˍ kʼaw‸ caˉ leh kʼoˆ ve, Gʼuiˬsha kʼoˆ ve tawˇ hta‸ na sheˍ. Gʼuiˬsha kʼaw jaw hkʼoˆ mui taˍ leh, yawˇ ve mvuhˇ naw tcuh yaˇ teˇ hpaˍ yawˇ paˇ lo hpoˆ chehˇ taˍ ve hta‸ ngaˬ gʼa mawˬ ve yoˬ.
20
Oˇ htaˇ Gʼuiˬsha lehˬ, Aˍhaˆ Raˍmoˆ venˇ hta‸ ca bawˆ leh oˇ kaˬ lo suh-e piˇ tuˬ, a shu teˇ gʼaˇ yawˇ ve nyi ma hta‸ ca gu piˇ tuˬ le, teh‸ yawˇ ve mvuhˇ naw tcuh yaˇ teˇ hpaˍ hta‸ na nyi ve yoˬ. Mvuhˇ naw tcuh yaˇ oˇ ve teˇ hpaˍ teˇ gʼaˇ teˇ ceuˬ kʼoˆ ve yoˬ.
21
Oˇ htaˇ, awˬ ha teˇ maˬ Gʼuiˬsha paˇ lo jiˆ kʼai leh, Ngaˬ ca te piˇ tuˬ yoˬ, teh‸ Gʼuiˬsha hta‸ kʼoˆ piˇ ve yoˬ.
22
Nawˬ hkʼaˬ hkʼe ca te piˇ tuˬ le, teh‸ Gʼuiˬsha kʼaw‸ na nyi ve teˇ yanˇ, Aˍhaˆ ve tcuh kaˍ paˍ teˇ hpaˍ hta‸ ngaˬ heˍ ve tawˇ yaw tcuh tuˬ yoˬ, teh‸ Gʼuiˬsha hta‸ kʼaw‸ yaw hkʼaw‸ piˇ ve yoˬ. Oˇ htaˇ Gʼuiˬsha lehˬ, Kʼai leh yawˇ ve nyi ma hta‸ ca gu piˇ-oˆ, teh‸ yawˇ hta‸ kʼoˆ piˇ ve yoˬ.
23
Awˬ tehˬ awˬ na chi hkʼe hpeh‸ la taˍ peuˬ ve yoˬ. Tcuh kaˍ paˍ chi teˇ hpaˍ nawˬ hta‸ heˍ laˇ chehˇ ve yoˬ. Ya‸ hkʼaˇ, nawˬ ma‸ ca bawˆ ve kʼo gʼa luˬ gʼa sheˆ tuˬ Gʼuiˬsha kʼoˆ taˍ peuˬ, teh‸ Aˍhaˆ hta‸ kʼoˆ piˇ ve yoˬ.
24
Oˇ htaˇ tcuh kaˍ paˍ Zeˍdaˍkiˆ Miˆhkaˍ ve mehˆ hpfuhˇ hta‸ hta hpehˇ sheˬ leh, Gʼuiˬsha ve awˬ ha ngaˬ geh tawˆ kʼai leh, nawˬ hta‸ hkʼaˬ htaˆ tawˇ ca yaw la ve le, teh‸ yawˇ hta‸ kʼoˆ piˇ ve yoˬ.
25
Nawˬ na nyi laˇ ve tawˇ chi hta‸, nawˬ bawehˇ teˇ maˬ hkʼaw ca va‸ toˇ chehˇ htaˇ shiˍ la tuˬ yoˬ, teh‸ Miˆhkaˍ kʼaw‸ yaw hkʼaw‸ piˇ ve yoˬ.
26
Oˇ ve hkʼaw‸ nawˉ jawˇmawˇ Aˍhaˆ kʼoˆ ve, Miˆhkaˍ hta‸ hpeh yuˬ leh, venˇ chi hta‸ uˉ peunˍ chehˇ ve Aˍmonˍ leh ngaˬ yaˇ paˍ Yawˇshaˆ geh shiˍ kʼai piˇ-oˆ.
27
Yawˇ hta‸ htawnˍ hkʼaw haw taˍ leh, ngaˬ ma‸ ca bawˆ kʼaw‸ la htaˇ hkʼa gaˬ hkaoˍmonˇ leh iˉ kaˆ taw piˇ tuˬ, yawˇ huiˉ maˬ hta‸ kʼoˆ piˇ-oˆ, teh‸ yawˇ ve ma‸ poˍ teˇ hpaˍ hta‸ kʼoˆ piˇ ve yoˬ.
28
Oˇ htaˇ Miˆhkaˍ lehˬ, Nawˬ gʼa kʼaw‸ la sheˍ ve kʼo, Gʼuiˬsha ngaˬ hta‸ tawˇ yaw laˇ taˍ ve maˇ heˆ. Nawˬ hui hkʼa peu-eˬ ngaˬ kʼoˆ ve tawˇ hta‸ hkʼa deh‸ na yuˬ-o‸, teh‸ Aˍhaˆ hta‸ kʼoˆ piˇ ve yoˬ.
29
Oˇ ve hkʼaw‸ nawˉ, Iˉsaˍreˍlaˆ jawˇmawˇ Aˍhaˆ leh Yuˇda‸ jawˇmawˇ Yawˇshaˍhpaˆ lehˬ, Giˇlaˆ mvuhˇmiˬ hkʼaw cawˬ ve Raˍmoˆ venˇ hta‸ ca bawˆ kʼai ve yoˬ.
30
Oˇ htaˇ Aˍhaˆ lehˬ, Ngaˬ hui ma‸ bawˆ kʼai htaˇ, ngaˬ lehˬ jawˇmawˇ ve veu‸ kʼaˇ hta‸ kʼehˆ baˬ taˉ leh kʼai tuˬ yoˬ. Nawˬ-awˍ hkʼe jawˇmawˇ ve veu‸ kʼaˇ hta‸ veu‸ deh taˍ-o‸, teh‸ Yawˇshaˍhpaˆ hta‸ kʼoˆ piˇ ve yoˬ. Hkʼe te leh, Aˍhaˆ veu‸ kʼaˇ pa leh ma‸ bawˆ kuiˬ lo kʼai ve yoˬ.
31
Suˇriˆ jawˇmawˇ lehˬ Iˉsaˍreˍlaˆ jawˇmawˇ hta‸ maˇ heˆ kʼo, awˬ nu ve chaw teˇ gʼaˇ hta‸ ka‸ taˇ bawˆ, teh‸ yawˇ ve iˉ mvuhˇ lawˬ awˬ hoˉ 32 gʼaˇ hta‸ tawˇ piˇ taˍ ve yoˬ.
32
Hkʼe te leh, yawˇ hui jawˇmawˇ Yawˇshaˍhpaˆ hta‸ mawˬ ve teˇ yanˇ, yawˇ lehˬ Iˉsaˍreˍ laˆ jawˇmawˇ yoˬ, teh‸ dawˇ leh yawˇ hta‸ gʼa‸ bawˆ ve yoˬ. Ya‸ hkʼaˇ, yawˇ kuˬ hkʼaw‸ piˇ ve teˇ yanˇ,
33
yawˇ lehˬ Iˉsaˍreˍlaˆ jawˇmawˇ maˇ heˆ ve hta‸ yawˇ hui shiˍ la ve yoˬ. Hkʼe te leh, yawˇ hui yawˇ hta‸ maˇ kʼaw‸ gʼa‸ bawˆ ve yoˬ.
34
Ya‸ hkʼaˇ, Suˇriˆ ma‸ yaˇ teˇ gʼaˇ bawˆ peu ve hkaˆ ce lehˬ, Aˍhaˆ veu‸ deh taˍ ve sho veu‸ kʼaˇ caˉ da‸ taˍ ve nyiˇ maˬ awˬ kaˍ lo lo‸-e ve yoˬ. Ngaˬ hta‸ hkaˆ ce heuˆ peuˬ. Choˬ kaˬ lo tawˆ kʼai-o, teh‸ yawˇ ve iˉ mvuhˇ lawˬ gʼa‸ paˍ hta‸ kʼoˆ piˇ ve yoˬ.
35
Ma‸ gʼaˇ hte‸ bawˆ da‸ chehˇ ve teˇ yanˇ, Aˍhaˆ lehˬ iˉ mvuhˇ lawˬ hkʼaw mui taˍ leh, Suˇriˆ chaw hui hpawˇ lo nyi peu chehˇ ve yoˬ. Yawˇ ve awˬ suhˍ iˉ mvuhˇ lawˬ hkʼaw hkʼa biˇ sheˆ taˍ leh, mvuhˇ hpeu‸ hpawˇ gaˬ htaˇ yawˇ suh-e ve yoˬ.
36
Mvuhˇ nyi kʼehˬ la htaˇ, Iˉsaˍreˍlaˆ chaw teˇ hpaˍ a shu yawˇ ve yehˬ lo kʼo‸-e loˬ, teh‸ tawˇ piˇ ve yoˬ.
37
Hkʼe te leh, jawˇmawˇ Aˍhaˆ suh-e ve yoˬ. Yawˇ ve awˬ to hta‸ Saˍmaˍriˆ venˇ lo yuˬ kʼaw‸ la leh, oˇ kaˬ lo tuˍ piˇ ve yoˬ.
38
Yawˇ ciˇ toˇ ve iˉ mvuhˇ lawˬ hta‸ meh maˬ lanˉ hui iˉ kaˆ hehˉ kuiˬ iˉ kaˆ gʼuiˬ po hkʼaw tsuhˇ baˬ leh, Gʼuiˬsha kʼoˆ taˍ ve hkʼe, yawˇ ve awˬ suhˍ hta‸ hpuiˇ teˇ hpaˍ leh‸ ve yoˬ.
39
Jawˇmawˇ Aˍhaˆ hkʼa te ve kanˉ hkʼa peu-eˬ Iˉsaˍreˍlaˆ jawˇmawˇ teˇ hpaˍ ve li‸ daw hkʼaw bvuh‸ keu taˍ ve yoˬ.
40
Hkʼe te leh, yawˇ awˬ tan yawˇ ve yaˇ paˍ Aˍhaˍziˆ jawˇmawˇ kʼaw‸ te ve yoˬ.
41
Iˉsaˍreˍlaˆ mvuhˇmiˬ hta‸ jawˇmawˇ Aˍhaˆ uˉ peunˍ ve 4 hkʼaw‸ teˇ hkʼaw‸ gaˬ htaˇ, Yuˇda‸ mvuhˇmiˬ hta‸ Aˍsaˍ ve yaˇ Yawˇshaˍhpaˆ jawˇmawˇ kʼaw‸ te ve yoˬ.
42
Yawˇ jawˇmawˇ tanˬ te htaˇ, yawˇ ve a sha‸ 35 hkʼaw‸ gaˬ peuˬ leh, Yeˍruˆsaˍlehnˍ venˇ hta‸ 25 hkʼaw‸ uˉ peunˍ ve yoˬ. Yawˇ ve awˬ e lehˬ, Shiˉlaˍhiˆ ve yaˇ miˇ Aˍzuˇbaˆ hpeh‸ ve yoˬ.
43
Yawˇ ve awˬ pa hkʼa shuˍ Yawˇshaˍhpaˆ lehˬ, Gʼuiˬsha nyi ma cawˇ ve kanˉ hta‸ tiˉ te ve yoˬ. Ya‸ hkʼaˇ, yawˇ lehˬ awˬ kaˍ awˬ nu ve gʼuiˬsha teˇ hpaˍ ve tuˉ tanˇ kuiˬ hta‸ maˇ te luˬ piˇ. Hkʼe te leh, chaw yaˇ teˇ hpaˍ gʼuiˬsha oˇ ve teˇ hpaˍ hta‸ tuˉ tanˇ piˇ chehˇ ve yoˬ.
44
Yawˇshaˍhpaˆ lehˬ, Iˉsaˍreˍlaˆ jawˇmawˇ hta‸ maˇ ya‸ da‸ tuˬ shaˉ caˆ caˇ taˍ ve yoˬ.
45
Yawˇshaˍhpaˆ hkʼa te ve kanˉ hkʼa peu-eˬ, Yuˇda‸ jawˇmawˇ teˇ hpaˍ ve li‸ daw hkʼaw bvuh‸ keu taˍ ve yoˬ.
46
Yawˇ awˬ pa co-e htaˇ ka‸ tuˉ tanˇ kuiˬ lo haˉ chawˇ haˉ paˆ te chehˇ ve chaw oˇ ve hkʼa peu-eˬ hta‸ yawˇ gʼa‸ kʼoˬ piˇ ve yoˬ.
47
Eˇdonˍ mvuhˇmiˬ lehˬ jawˇmawˇ teˇ gʼaˇ ka‸ maˇ cawˬ. Hkʼe te leh, Yuˇda‸ jawˇmawˇ lehˬ chaw teˇ gʼaˇ hta‸ leuˆ yuˬ leh, mvuhˇmiˬ oˇ ve hta‸ uˉ peunˍ tcuh chehˇ ve yoˬ.
48
Jawˇmawˇ Yawˇshaˍhpaˆ lehˬ, Awˇhpiˍraˆ mvuhˇmiˬ lo shi ca taˆ tuˬ haw lo‸ kʼoˍ lonˉ teˇ hpaˍ te taˍ ve yoˬ. Ya‸ hkʼaˇ, haw lo‸ kʼoˍ oˇ ve teˇ hpaˍ Eˇzaˍyonˍgaˍbaˍ venˇ paˇ lo luˬ kʼai peuˬ ve yoˬ.
49
Oˇ htaˇ, Iˉsaˍreˍlaˆ jawˇmawˇ Aˍhaˍziˆ lehˬ, Yawˇshaˍhpaˆ ve chaw hui geh kanˉ te tcuh tuˬ yawˇ ve chaw teˇ hpaˍ piˇ ve yoˬ. Ya‸ hkʼaˇ, Yawˇshaˍhpaˆ maˇ ha‸ yuˬ.
50
Awˬ hkʼaw‸ nawˉ Yawˇshaˍhpaˆ suh-e leh, shu yawˇ hta‸ Daˍviˆ ve venˇ hkʼaw tuˍ piˇ ve yoˬ. Hkʼe te leh, yawˇ ve yaˇ paˍ Yeˍhawˇranˍ yawˇ awˬ tan jawˇmawˇ kʼaw‸ te ve yoˬ.
51
Yuˇda‸ mvuhˇmiˬ hta‸ Yawˇshaˍhpaˆ uˉ peunˍ ve 7 hkʼaw‸ teˇ hkʼaw‸ htaˇ, Iˉsaˍreˍ laˆ mvuhˇmiˬ hta‸ Aˍhaˆ ve yaˇ paˍ Aˍhaˍziˆ kʼaw‸ uˉ peunˍ ve yoˬ. Yawˇ lehˬ Saˍmaˍriˆ venˇ hta‸ 2 hkʼaw‸ uˉ peunˍ ve yoˬ.
52
Yawˇ ve awˬ pa Aˍhaˆ, yawˇ ve awˬ e Yeˍsaˍbeˍlaˆ leh, jawˇmawˇ Yeˍyawˇbaoˍ hkʼa shuˍ, yawˇ htawˇ Gʼuiˬsha hta‸ te ya‸ jaˇ leh, Iˉsaˍreˍlaˆ chaw hui hta‸ ya‸ kʼaw sheh ya‸ piˇ ve yoˬ.
53
Yawˇ awˬ pa hkʼa shuˍ, yawˇ htawˇ Baˍlaˆ gʼuiˬsha hta‸ oˉ kʼoˍ pui leh, Iˉsaˍreˍlaˆ ve Gʼuiˬsha hta‸ nyi ma zuhˆ tuˬ te piˇ ve yoˬ.
← Chapter 21
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22