1 Kings 14

Lahu Bible Edited © Thailand Bible Society and Bible Society of Myanmar, 2010, 2020.

← Chapter 13 Jump to: Chapter 15 →

1Awˬ yanˇ oˇ ve hkʼaw, jawˇmawˇ Yeˍyawˇbaoˍ ve yaˇ Aˍhiˇyaˆ naˬ jaˇ ve yoˬ.

2Hkʼe te leh, Yeˍyawˇbaoˍ yawˇ miˇ ma hta‸ chi hkʼe kʼoˆ piˇ ve yoˬ. Chaw teˇ gʼaˇ ka‸ nawˬ hta‸ maˇ tawnˇ gʼa tuˬ, nawˬ ve veu‸ kʼaˇ pa leh ngaˬ hta‸ Iˉsaˍ reˍ laˆ jawˇmawˇ hpeh‸ la tuˬ yoˬ, teh‸ kʼoˆ laˇ ve tcuh kaˍ paˍ Aˍhiˇyaˆ geh Shiˉ lonˍ venˇ lo kʼai-o.

3Yawˇ awˬ pon hkaoˍmonˇ 10 shiˍ leh, pehˇ gʼuiˬ teˇ kaw yuˬ kʼai piˇ-oˆ. Ngaˬ hui ve yaˇ paˍ hkʼaˬ hkʼe hpeh‸ la tuˬ, yawˇ hta‸ na nyi-o. Yawˇ kʼaw‸ yaw hkʼaw‸ laˇ tuˬ yoˬ, teh‸ yawˇ hta‸ kʼoˆ piˇ ve yoˬ.

4Hkʼe te leh, jawˇmawˇ ma lehˬ, Shiˉlonˍ venˇ lo chehˇ ve Aˍhiˇyaˆ ve yehˬ lo kʼai ve yoˬ. Aˍhiˇyaˆ lehˬ mawˇ jaˇ peuˬ ve pa taw, mehˆ maˇmawˬ-o.

5Yeˍyaˇbaoˍ ve awˬ miˇ ma lehˬ, naˬ chehˇ ve yawˇ ve yaˇ paˍ awˬ lawn ca na nyi la tuˬ laˬ chehˇ ve awˬ lawn Gʼuiˬsha yawˇ hta‸ kʼoˆ piˇ leh, yawˇ hta‸ hkʼaˬ hkʼe gʼa kʼoˆ piˇ tuˬ ve awˬ lawn yawˇ hta‸ kʼoˆ piˇ taˍ ve yoˬ. Yeˍyawˇbaoˍ miˇ ma lehˬ veu‸ kʼaˇ pa leh, Aˍhiˇyaˆ ve yehˬ hkʼaw lo‸ la ve yoˬ.

6Yawˇ lo‸ la ve awˬ hkawˇ hta‸ Aˍhiˇyaˆ gʼa kaˇ htaˇ, yawˇ hta‸ chi hkʼe kʼoˆ piˇ ve yoˬ. Lo‸ la-o. Nawˬ lehˬ Yeˍyawˇbaoˍ miˇ ma hpeh‸ ve hta‸ ngaˬ shiˍ taˍ ve yoˬ. Aˬ hto‸ ma pa taw nawˬ chi hkʼe te laˬ ve le. Nawˬ awˬ pon maˇ da‸ ve awˬ lawn sha tanˇ cawˬ taˍ ve yoˬ.

7Gʼuiˬsha kʼoˆ laˇ chehˇ ve tawˇ chi teˇ hpaˍ Yeˍyawˇbaoˍ hta‸ ca kʼoˆ piˇ-oˆ. Ngaˬ nawˬ hta‸ leuˆ yuˬ leh, ngaˬ ve Iˉsaˍreˍlaˆ chaw hui hta‸ uˉ peunˍ tcuh taˍ ve yoˬ.

8Ngaˬ lehˬ mvuhˇmiˬ chi hta‸ Daˍviˆ ve awˬ ceuˬ awˬ hkʼaˇ teˇ hpaˍ ve la‸ sheh hkʼaw yuˬ hkʼaw‸ leh, nawˬ hta‸ piˇ laˇ taˍ ve yoˬ. Ya‸ hkʼaˇ, nawˬ lehˬ ngaˬ ve tawˇ hta‸ na yuˬ puiˉ jaˇ ve ngaˬ ve awˬ ceˬ paˍ Daˍviˆ hkʼe maˇ heˆ.

9Nawˬ gʼuˇ suhˍ lo jawˇmawˇ hkʼa te peuˬ ve chaw teˇ hpaˍ a‸ kehˉ, nawˬ lehˬ venˇbaˆ uiˍ jaˇ ve yoˬ. Nawˬ ngaˬ hta‸ chiˇ baˬ leh, ngaˬ nyi ma zuhˆ tuˬ shaˉ ho‸ teˇ hpaˍ te teh taˍ ve yoˬ.

10Nawˬ chi hkʼe te ve pa taw, nawˬ ve awˬ ceuˬ awˬ hkʼaˇ hawˉ hkʼaˆ paˍ hkʼa peu-eˬ ve hta‸ ngaˬ tiˇ pehˍ tuˬ yoˬ. Nawˬ ve yehˬ yaˇ kʼa yaˇ hkʼa peu-eˬ hta‸ ngaˬ chiˇ baˬ leh, yawˇ hui lehˬ hkʼehˇ hkʼa shuˍ, shu toˆ baˬ ve hta‸ gʼa hkanˍ tuˬ yoˬ.

11Venˇ hkʼaw lo hkʼa suh-e ve nawˬ ve awˬ ceuˬ awˬ hkʼaˇ teˇ hpaˍ lehˬ, hpuiˇ che‸ caˇ ve hta‸ gʼa hkanˍ leh, heh puiˉ hkʼaw lo suh-e ve chaw teˇ hpaˍ lehˬ, naˬ beu‸ ngaˆ htawˆ caˇ ve hta‸ gʼa hkanˍ tuˬ yoˬ, teh‸ Gʼuiˬsha kʼoˆ ve yoˬ.

12Chi beu‸ aˉ hkʼaw lo kʼo‸-e loˬ. Nawˬ venˇ hkʼaw lo kʼaw‸ gaˬ ve teˇ hkui, nawˬ ve yaˇ paˍ suh-e tuˬ yoˬ.

13Iˉsaˍreˍlaˆ chaw hkʼa peu-eˬ paˆ hawˬ leh, yawˇ hta‸ tuˍ piˇ tuˬ yoˬ. Yeˍyawˇbaoˍ ve yaˇ teˇ hpaˍ awˬ hkʼaw lo, shu hkʼa deh‸ tuˍ piˇ ve hta‸ gʼa hkanˍ ve chaw yawˇ teˇ gʼaˇ ceh tiˉ cawˬ ve yoˬ. Awˬ lawn kʼo, Gʼuiˬsha nyi ma cawˇ ve chaw yawˇ teˇ gʼaˇ ceh tiˉ cawˬ ve yoˬ.

14Yeˍyawˇbaoˍ ve awˬ ceuˬ awˬ hkʼaˇ teˇ hpaˍ hta‸ te luˬ piˇ tuˬ ve chaw teˇ gʼaˇ hta‸ Gʼuiˬsha leuˆ yuˬ leh, Iˉsaˍreˍlaˆ mvuhˇmiˬ hta‸ uˉ peunˍ tcuh tuˬ yoˬ.

15Gʼuiˬsha lehˬ, Iˉsaˍreˍlaˆ chaw hui hta‸ ciˍ yanˍ piˇ leh, yawˇ hui lehˬ iˉ kaˆ lawˬ hkʼaw gʼuiˬ dawˇ htinˍ leh hiˆ hiˆ naˇ naˇ te chehˇ ve lo cehˬ hkʼa shuˍ hpeh‸ la tuˬ yoˬ. Yawˇ lehˬ, Iˉsaˍ reˍlaˆ chaw hui hta‸ da‸ jaˇ ve mvuhˇmiˬ chi ve hkʼaw gʼa‸ baˬ leh, Uˇhpaˍraˆ iˉ kaˆ lawˬ coˇ paˉ hpawˇ lo gʼa ca chehˇ tuˬ yoˬ. Awˬ lawn kʼo, yawˇ hui lehˬ Aˍsheˍraˆ gʼuiˬsha ma ve shaˉ ho‸ hta‸ te leh, Gʼuiˬsha hta‸ nyi ma zuhˆ tuˬ te piˇ ve pa taw yoˬ.

16Chi hkʼoˆ ka‸, Yeˍyawˇbaoˍ venˇbaˆ te leh, Iˉsaˍreˍlaˆ chaw hui hta‸ ya‸ kʼaw sheh ya‸ peuˬ ve pa taw, Gʼuiˬsha lehˬ Iˉsaˍreˍlaˆ chaw hui hta‸ chiˇ baˬ piˇ tuˬ yoˬ, teh‸ jawˇmawˇ ma hta‸ kʼoˆ piˇ ve yoˬ.

17Yeˍyawˇbaoˍ miˇ ma lehˬ, Tiˇraˍzaˍ venˇ lo kʼo‸-e ve yoˬ. Yawˇ ve yehˬ hkʼaw lo‸-e ve teˇ hkui yaˇ paˍ oˇ ve shaˉ cheˆ sheˬ ve yoˬ.

18Hkʼe te leh, Iˉsaˍreˍlaˆ chaw teˇ hpaˍ kuˬ hawˬ leh, Gʼuiˬsha tcuh kaˍ paˍ Aˍhiˇ yaˆ hta‸ kʼoˆ piˇ taˍ ve hkʼe, yawˇ hta‸ hkʼa deh‸ te tuˍ piˇ ve yoˬ.

19Jawˇmawˇ Yeˍyawˇbaoˍ hkʼa te ve kanˉ hkʼa peu-eˬ, Iˉsaˍreˍlaˆ jawˇmawˇ teˇ hpaˍ ve li‸ daw hkʼaw bvuh‸ keu taˍ ve yoˬ.

20Yeˍyawˇbaoˍ lehˬ, mvuhˇmiˬ hta‸ 20 hkʼaw‸ uˉ peunˍ ve yoˬ. Oˇ ve hkʼaw‸ nawˉ, yawˇ suh-e leh yawˇ ve yaˇ paˍ Naˍdaˆ yawˇ awˬ tan jawˇmawˇ kʼaw‸ te ve yoˬ.

21Sawˉla‸monˍ ve yaˇ paˍ Yawˇbaoˍ lehˬ, Yuˇda‸ mvuhˇmiˬ hta‸ tanˬ uˉ peunˍ htaˇ, yawˇ ve a sha‸ 41 hkʼaw‸ gaˬ peuˬ ve yoˬ. Hkʼe te leh, yawˇ lehˬ Gʼuiˬsha hta‸ oˉ kʼoˍ pui kuiˬ Gʼuiˬsha leuˆ yuˬ taˍ ve Yeˍruˆsaˍlehnˍ venˇ hkʼaw chehˇ leh, Yuˇda‸ mvuhˇmiˬ hta‸ 17 hkʼaw‸ hkʼa gaˬ uˉ peunˍ ve yoˬ. Yawˇ ve awˬ e lehˬ, Aˍmawˇniˆ chaw Neˍmaˆ hpeh‸ ve yoˬ.

22Yuˇda‸ chaw teˇ hpaˍ lehˬ, ponˬ laˬ htaˇ yawˇ hui ve awˬ puˍ awˬ pi teˇ hpaˍ a‸ kehˉ haiˬ jaˇ leh, Gʼuiˬsha nyi ma zuhˆ tuˬ gʼaˇ hte‸ te ve yoˬ.

23Yawˇ hui lehˬ, awˬ nu ve gʼuiˬsha teˇ hpaˍ hta‸ oˉ kʼoˍ pui kuiˬ laiˉ kaˬ te leh, hkʼaw hkʼoˆ lo leh suhˆ cehˬ hawˉ lo Aˍsheˍraˆ gʼuiˬsha ma ve shaˉ ho‸ teˇ hpaˍ te teh taˍ ve yoˬ.

24Chi hkʼo ka‸, oˉ kʼoˍ pui kuiˬ oˇ ve teˇ hpaˍ lo hawˉ hkʼaˆ chawˇ hawˉ hkʼaˆ pehˬ ve tzuhˆ ve hta‸ te leh, meh maˬ lanˉ teˇ hpaˍ htawˇ hkʼa biˇ cawˬ ve yoˬ. Yuˇda‸ chaw teˇ hpaˍ lehˬ, aˬ sho-eˬ Iˉsaˍreˍlaˆ chaw hui Hkaˍnanˍ mvuhˇmiˬ hkʼaw lo‸ la htaˇ, Gʼuiˬsha gʼa‸ kʼoˬ piˇ taˍ ve chaw oˇ ve teˇ hpaˍ te ve awˬ liˇ teˇ hpaˍ hta‸ gʼa‸ te chehˇ ve yoˬ.

25Yawˇbaoˍ mvuhˇmiˬ hta‸ uˉ peunˍ chehˇ ve 5 hkʼaw‸ teˇ hkʼaw‸ htaˇ, Eˇjiˇtu‸ jawˇmawˇ Shiˇshehˆ Yeˍruˆsaˍlehnˍ venˇ hta‸ ca bawˆ la ve yoˬ.

26Yawˇ lehˬ, bon yehˬ leh hawˉ yehˬ hkʼaw cawˬ ve mawˇ teˇ hpaˍ leh, Sawˉla‸ monˍ te taˍ ve shi htanˬ tuˬ teˇ hpaˍ hta‸ yuˬ kʼo‸-e ve yoˬ.

27Oˇ ve teˇ hpaˍ awˬ tan, jawˇmawˇ Yawˇbaoˍ lehˬ kuiˇ htanˬ tuˬ teˇ hpaˍ kʼaw‸ te leh, shaw shehˍ hpaˇ teˇ hpaˍ hta‸ hkʼa deh‸ ha‸ shaˉ tcuh taˍ ve yoˬ.

28Jawˇmawˇ bon yehˬ lo kʼai ve teˇ pawˆ le le, ma‸ yaˇ teˇ hpaˍ lehˬ, htanˬ tuˬ oˇ ve teˇ hpaˍ hta‸ pfuhˇ leh jawˇmawˇ hta‸ gʼa‸ shaw toˇ chehˇ ve yoˬ. Oˇ hkʼe te peuˬ hkʼaw‸ nawˉ, htanˬ tuˬ teˇ hpaˍ hta‸ hkʼa deh‸ kʼaw‸ ha‸ shaˉ taˍ ve yoˬ.

29Jawˇmawˇ Yawˇbaoˍ hkʼa te ve kanˉ hkʼa peu-eˬ hta‸ Yuˇda‸ jawˇmawˇ teˇ hpaˍ ve li‸ daw hkʼaw hkʼa deh‸ bvuh‸ keu taˍ ve yoˬ.

30Awˬ yanˇ oˇ ve hkʼaw, Yawˇbaoˍ leh Yeˍyawˇbaoˍ hkʼaˬ htaˆ ka‸ ya‸ da‸ leh bawˆ da‸ chehˇ ve yoˬ.

31Oˇ ve hkʼaw‸ nawˉ, Yawˇbaoˍ suh-e leh, shu yawˇ hta‸ Daˍviˆ ve venˇ hkʼaw tuˍ piˇ ve yoˬ. Hkʼe te leh, yawˇ ve yaˇ paˍ Aˍbiˇyaˆ yawˇ awˬ tan jawˇmawˇ kʼaw‸ te ve yoˬ.

← Chapter 13 Jump to: Chapter 15 →