2 Kings 10

nyankole

← Chapter 9 Jump to: Chapter 11 →

1Ahabu akaba aine abatabani makumi mushanju omuri Samariya, Yehu yaahandiika amabaruha, yaagooherezayo aha bategyeki b'orurembo Yezereeli, n'aha bakuru omu ihanga, n'aha barezi ba beene Ahabu, naabatumaho ati:

2Mbwenu ebaruha egi ku eraabahikye eti, nk'oku mwine batabani ba mukama waanyu, n'ebigaari n'embaraasi, n'endembo z'ebigo bigumire,

3mutoorane omuri batabani ba mukama waanyu omuntu murungi munonga kandi ohikire, mumwemekye aha kitebe kya ishe. Haza murwanirire ab'omuryango gwa mukama waanyu.

4Kwonka baatiina munonga, baagira bati: Abagabe babiri ku baraabe batabaasize kumuza omu kaso, itwe nitubaasa tuta kumugungira?

5Mpaho omukuru w'ekikaari ky'omugabe, n'omukuru w'orurembo, n'abakuru omu ihanga, n'abarezi baatuma ahari Yehu nibamugira bati: Itwe turi abairu baawe kandi nitwija kukora byona ebi oraaturagiire. Titurikwija kwemeka mugabe weena, kureka ba niiwe waakora eki orikusiima.

6Nawe abahandiikira ebaruha ya kabiri naabagira ati: Ku muraabe muri ab'aha rubaju rwangye, kandi mweteekateekire kumpurira, mbwenu batabani ba mukama waanyu mubatemeho emitwe. Haza nyencakare nk'aga magingo muginshangise Yezereeli. Obwo batabani b'omugabe, abantu makumi mushanju, bakaba bari hamwe n'abakuru b'orurembo abaabaire nibaboorora.

7Ebaruha ku yaabahikire, baakwata batabani b'omugabe makumi mushanju, baabaita boona. Emitwe yaabo baagita omu bigyega, baagimutwekyera Yezereeli.

8Entumwa ku yaizire, yaamugira eti: Baareeta emitwe ya batabani b'omugabe. Yaagira ati: Mugirunde emituumo ebiri aha irembo ry'orurembo, egumeho okuhitsya omu kasheeshe.

9Ku bwaseesire yaashohora, yaayemerera, yaagambira abantu boona ati: Imwe muri mwere, niinye ncumire enaama y'okurwanisa mukama wangye, nkamwita. Kwonka shi aba boona n'oha obaitsire?

10Mukimanye ku omuri egi nsi ekigambo kya Nyakubaho eki yaagambire aha b'omuryango gwa Ahabu kitaribura kuhikiirira. Manya Nyakubaho akozire eki yaagambiise omuheereza we Eliya.

11Yehu nawe atyo aita ab'omuryango gwa Ahabu abaabaire bakitsigaireho omuri Yezereeli, abashaija be abakuru boona, na banywani be ab'aha mara, n'abahongyerezi be, okuhitsya obu ataramutsigiire n'owa kizira.

12Bwanyima Yehu aimutsya orugyendo, aza Samariya. Ku yaabaire akiri omu muhanda naagyenda, yaahika aha rusiisira rw'abariisa b'entaama,

13yaabugabuganiraho n'abaine obuzaare na Ahaziya omugabe wa Yuda, yaababuuza ati: Muri baahi? Baamugarukamu bati: Twine obuzaare na Ahaziya. Mbwenu nituza Yezereeli kutaayaayira abategyeki na batabani ba Nyina-Omugabe.

14Yehu atyo aragiira abagaragwa be ati: Mubakwate bakihuriire. Batyo babakwata, babaitira aha kiina ky'eikyegyetero ry'ebyoya by'entaama, boona abantu makumi ana na babiri, atasaasiireho n'omwe.

15Yehu ku yaarugire aho, yaabugana Yehonadabu mwene Rekabu aizire kumutangirira. Amuramutsya, amubuuza ati: Buzimazima noonyerera nkaanye oku ndikukwerera? Yehonadabu amugarukamu ati Eego, ninkwerera. Yehu ati: Ku kiraabe nikwo kiri, mpa engaro. N'onu azimuha. Yehu amutembya omu kigaari kye,

16amugira ati: Ija tugyendane oreebe oku nyiniire Nyakubaho eihato. Atyo agyenda nawe omu kigaari kye, baza Samariya.

17Ku baahikireyo, yaita aba Ahabu boona abaabaire batsigaireyo okuhitsya obu yaabamazireho, nk'oku Mukama yaakigambiise Eliya.

18Ebyo ku byahwaire, Yehu yaateeranira hamwe abantu boona, yaabagira ati: Ahabu akaheereza Baali kukye, kwonka nyowe niinyija kumuheereza munonga.

19N'ahabw'ekyo muunyetere abarangi ba Baali boona, na boona abamuramya, n'abahongyerezi be boona. Hatagira owaaburaho, ahabw'okuba niinyenda kutambira Baali ekitambo kikuru. Oraabureho weena tarikutsigaza magara.

20Yehu kandi aragiira ati: Nimurangirire ekiro ky'okuramizaho Baali. Nabo baakirangirira.

21Yehu nawe atuma omuri Isiraeli yoona, boona abarikuramya Baali baija, tihagira muntu n'omwe owaatsigarayo ataizire. Bataaha omu ndaaro ya Baali, eijura n'aha bunwa.

22Reero agambira orikureeberera ahi babiika ebijwaro ati: Reetera abaramya Baali boona ebijwaro. Nawe abibaihirayo.

23Bwanyima Yehu ataaha omu ndaaro ya Baali hamwe na Yehonadabu mwene Rekabu, agambira abaramya Baali ati: Mweshwijume mureebe omuriimwe ku haraabe hatarimu orikuramya Nyakubaho, kureka abarikuramya Baali bonka.

24Bwanyima atyo ataahamu kutamba ebitambo hamwe n'ebicwekize. Obwo Yehu akaba ataire abashaija makumi munaana aheeru kandi abagizire ati: Oraarekye omwe ahari aba bantu bu naabakwatsa, yaatoroka, naamuzira.

25Ku aheza ati kutamba ekitambo kicwekize, aragiira abarinzi n'abakuru b'engabo ati: Nimutaahemu mubaite; hatagira owaahonokaho. Nabo ku baaherize kubaita, emitumbi yaabo baaginaga aheeru. Baataaha omu kishengye ky'endugu eky'endaaro ya Baali,

26baihamu enyomyo y'omurinzi eyaabaire erimu, baagyotsya.

27Batyo baashenyagura eitambiro rya Baali n'endaaro ye, baagihindura ekihoroonyo n'okuhitsya eri izooba.

28Yehu nikwo yaamazireho atyo Baali omuri Isiraeli.

29Kwonka Yehu tararekire kukora bibi bya Yeroboamu mwene Nebati, ebyareeteire Isiraeli kucumura. Eby'okuramya enyana z'ezaabu ez'omuri Beteli na Daani.

30Reero Nyakubaho yaagira Yehu ati: Ahabw'okukora gye, okahitsya ebi ndikusiima, okakora ab'omuryango gwa Ahabu ekyabaire kindi aha mutima; n'ahabw'ekyo batabani baawe, okuhitsya aha b'oruzaaro rwa kana, baryashutama aha kitebe ky'obugabe bwa Isiraeli.

31Kwonka shi Yehu tareetaire ha kukuratira mateeka ga Mukama Ruhanga wa Isiraeli n'omutima gwe gwona; tiyaareka kukora ebibi bya Yeroboamu, ebyareeteire Isiraeli kucumura.

32Omu biro ebyo Nyakubaho akatandika kutuubya Isiraeli naagicwaho ebyanga. Hazaeli yaabasingurira aha myatano y'ensi yaabo yoona.

33Okwiha Yorudaani noogarura oburugwa-izooba, ebyanga byona ebya Gileadi, n'eby'Abaagaadi n'eby'Abaamanaase, okuruga Aroeri ehereraine n'oruhanga rwa Arunooni niyo Gileadi na Bashani.

34Endiijo mirimo ya Yehu, n'ebi yaakozire byona, n'eby'amaani ge byona, bihandiikirwe omu Kitabo ky'eby'omu Busingye bw'abagabe ba isiraeli.

35Bwanyima Yehu akafa, yaashanga baishenkuru, yaaziikwa omuri Samariya. Yehoahazi omutabani yaayema omu mwanya gwe.

36Emyaka i Yehu yaategyekyeiremu Isiraeli omuri Samariya ekahika makumi abiri na munaana.

← Chapter 9 Jump to: Chapter 11 →