2 Kings 24

nyankole

← Chapter 23 Jump to: Chapter 25 →

1Omu busingye bwa Yehoyakimu, Nebukadenezaari omugabe wa Babulooni akahurura, yaateera Buyuda. Yehoyakimu yaaba omwiru we okumara emyaka eshatu. Bwanyima yaamuhindukana, yaamugomera.

2Haza Nyakubaho yaayoherereza Yehoyakimu emigogo y'Abakaludaaya n'ey'Abasiriya, n'ey'Abamoabu n'ey'Abaamoni, kuteera Buyuda kugicwekyereza, nk'oku Mukama yaakigambiise abaheereza be abarangi.

3Buzimazima ekyo kikaba aha Baayuda, Nyakubaho akiragiire, ngu abone kubabinga omu maisho ge, naabatura ebibi bya Manaase byona ebi yaakozire,

4n'eshagama y'abari mwere, ei yaaseesire. Ahabw'okuba akaijuza Yerusalemu eshagama y'abataine rubanja, Nyakubaho tiyaamusaasira.

5Mbwenu endiijo mirimo ya Yehoyakimu, n'ebi yaakozire byona, bihandiikirwe omu Kitabo ky'eby'omu Busingye bw'abagabe ba Yuda.

6Bwanyima Yehoyakimu akafa, yaashanga baishenkuru; omutabani Yehoyakini yaamuhungurira.

7Kandi omugabe wa Misiri taragizire bu ahurura kuruga omu nsi ye, ahabw'okuba omugabe wa Babulooni akaba yaakubwire ebyanga byona eby'omugabe wa Misiri, okwiha aha Kagyera ka Misiri okuta aha Mugyera Eufuraati.

8Yehoyakini akaza aha ngoma aine emyaka ikumi na munaana, yaategyekyera ameezi ashatu omuri Yerusalemu. Nyina akaba naayetwa Nehushita, muhara wa Elunatani, owa Yerusalemu.

9Yehoyakini nawe akakora ebitarikusiimwa Mukama, nka baishenkuru boona oku baakozire.

10Omu biro ebyo engabo za Nebukadenezari omugabe wa Babulooni zikahurura, zaateera Yerusalemu zaagigota.

11Bwanyima Nebukadenezaari omugabe wa Babulooni yaija omuri orwo rurembo, engabo ze zirugotsire.

12Omugabe Yehoyakini owa Yuda yaayeha omugabe wa Babulooni, we na nyina, n'abagaragwa be, n'abategyeki, n'abakungu b'omu kikaari kye. Omugabe wa Babulooni yaamutwara ari enkwatwa omu mwaka gwa munaana ogw'omu busingye bwe.

13Yaanyaga eby'omu mabiikiro goona ag'omuri Nyaruju ya Nyakubaho, n'eby'omu kikaari ky'omugabe. Yaatematema ebintu byona eby'ezaabu eby'omuri Nyaruju ya Nyakubaho ebi Solomooni omugabe wa Isiraeli yaakozire, nk'oku Nyakubaho yaakigambire bwabiso.

14Akatwara ab'omuri Yerusalemu boona, n'abategyeki boona, n'amamanzi goona. Boona hamwe, enkwatwa baahika kakumi. Yaatwara n'abanyamyoga boona n'abaheesi. Tihaagira waatsigarayo, kureka abooro rukunu ab'omuri egyo nsi.

15Mpaho atwara Yehoyakini Babulooni na nyina n'abakazi be, n'abakungu be n'abantu bakuru b'omuri egyo nsi. Abaiha Yerusalemu abatwara Babulooni bari enkwatwa.

16Atyo omugabe wa Babulooni ahitsya ezo nkwatwa Babulooni, abashaija boona amamanzi enkumi mushanju, abanyamyoga n'abaheesi rukumi. Boona bari ab'amaani kandi abarwani bahikire.

17Reero ogwo mugabe wa Babulooni yaayemeka Mataniya ishento Yehoyakini kuba omugabe omu mwanya gwa Yehoyakini. Kandi yaahindura eiziina rye, yaamweta Zedekiya.

18Zedekiya akaza aha ngoma aine emyaka makumi abiri na gumwe y'obukuru, yaategyekyera emyaka ikumi na gumwe omuri Yerusalemu. Nyina akaba naayetwa Hamutaali, muhara ha Yeremiya owa Libuna.

19Zedekiya ogwo nawe akakora ebitarikusiimwa Nyakubaho, nk'ebi Yehoyakimu yaakozire.

20Nikyo Nyakubaho yaagiriire ekiniga kingi ab'omuri Yerusalemu n'ab'omuri Buyuda, akarugaho akababinga omu maisho ge; na Zedekiya akagomera omugabe wa Babulooni.

← Chapter 23 Jump to: Chapter 25 →