2 Kings 20

nyankole

← Chapter 19 Jump to: Chapter 21 →

1Omu biro ebyo, Hezekiya akarwara; ku yaabaire abuzire kakye kufa, omurangi Isaaya mwene Amozi yaija kumureeba, yaamugira ati: Nyakubaho naagira ati: Tebeekanisa eby'eka yaawe, ahabw'okuba noija kufa, torikukira.

2Hezekiya nikwo kuhinduka akagarura amaisho ow'ekisiika, akashaba Nyakubaho ati:

3Ai Nyakubaho, mbwenu ninkweshengyereza, ijuka oku ntuura ndi omwesigwa omu maisho gaawe, ninkworobera n'omutima gwangye gwona, kandi ninkora ebi osiima. Hezekiya atyo arira munonga.

4Kwonka Isaaya ku yaabaire atakarugire omu rurembo, Nyakubaho yaamugira ati:

5Garukayo ogambire Hezekiya omukuru w'abantu bangye oti: Mukama Ruhanga wa Daudi sho yaagira ati: Naahurira okushaba kwawe, naareeba amarira gaawe. Mbwenu niinyija kukukiza; aha kiro kya kashatu oze omuri Nyaruju ya Nyakubaho.

6Kandi nkwongyereho endiijo myaka ikumi n'etaano. Niinyija kukujuna n'orurembo oru, mbaihe omu mikono y'omugabe wa Asiriya. Ndwanirire oru rurembo, ahabwangye, n'ahabw'omwiru wangye Daudi.

7Bwanyima Isaaya agira ati: Nimureete embumburi y'ebijuma by'omutiini. Haza bagitware, bagibatikye ahari ekyo kizimba, akire.

8Hezekiya abuuza Isaaya ati: Nimmanyira hi ku Nyakubaho arikwija kunkiza, nkaza omuri Nyaruju ya Nyakubaho, aha izooba rya kashatu?

9Isaaya amugarukamu ati: Eki nikyo Nyakubaho araakumanyisizeho, ku arikwija kukora eki yaakuraganisa. Mbwenu nooyenda ekicuucu kigyende omu maisho entambwe ikumi, nari kigarukye enyima entambwe ikumi?

10Hezekiya amugarukamu ati: Nikirahukira ekicuucu okugyenda omu maisho entambwe ikumi; haakiri okireka, kigaruka enyima entambwe ikumi.

11Isaaya atyo atakira Nyakubaho. Nawe agarura enyima ekicuucu entambwe ikumi ezi kyabaire kitentebukire aha kintu kya Ahazi ekirikugyera eshaaha.

12Omu biro ebyo Merodaki-baladaani, mwene Baladaani, omugabe wa Babulooni, akatuma entumwa, yaazikwatsa ebaruha n'ekiconco kubitwarira Hezekiya; ahabw'okuba akahurira ku arwaire.

13Hezekiya yaazaakiira ashemereirwe, yaazooreka byona ebiri omu nju ye ey'eibiikiro: efeeza, ezaabu, emigaju, amajuta g'obuguzi bwingi n'ahu abiika eby'okurwanisa, n'ebindi byona ebi baashangire omu mabiikiro ge. Tiyaagira kintu na kimwe eki ataraboorekire mu nju ye, nari omu bugabe bwe bwona.

14Bwanyima omurangi Isaaya akaija aha mugabe Hezekiya, yaamubuuza ati: Abo bantu bagambire ki? Kandi bakuzindukiire nibaruga hi? Hezekiya amugarukamu ati: Barugire omu nsi ya hare Babulooni.

15Onu ati: Bareebire ki omu nju yaawe? Hezekiya amugarukamu ati: Bareebire eby'omu nju yangye byona. Tihariho kintu na kimwe eky'omu ibiikiro ryangye eki ntaboorekire.

16Atyo Isaaya agira Hezekiya ati: Hurira eki Nyakubaho arikugamba.

17Reeba, obunaku nibwija kuhika, obu byona ebiri omu nju yaawe, n'ebi baashwenkuru baabiikire okuhitsya eri izooba, biritwarwa Babulooni hataine kitsigaireho. Nikwo Nyakubaho arikugira.

18Kandi bamwe omuri batabani baawe abu oyezaariire, abarikukomookaho, baryatwarwa bari enkwatwa, babe abashaahu b'omu kikaari ky'omugabe wa Babulooni.

19Na Hezekiya agira Isaaya ati: Ekigambo kya Nyakubaho eki waagamba ni kirungi. Ahabw'okuba akateekateeka ati: Niho harikwija kubaho obusingye n'obugogyeere omu biro byangye nkiriho.

20Ebindi ebi Hezekiya yaakozire, n'eby'obumanzi bwe, n'oku yaatimbiise ekiyanja, akateeza omukura, akareeta amaizi omu rurembo, bihandiikirwe omu Kitabo ky'eby'omu busingye bw'abagabe ba Yuda.

21Bwanyima Hezekiya akafa, yaashanga baishenkuru; omutabani Manaase yaayema omu mwanya gwe.

← Chapter 19 Jump to: Chapter 21 →