2 Kings 7

nyankole

← Chapter 6 Jump to: Chapter 8 →

1Kwonka Elisha yaagira ati: Nimuhurire eki Nyakubaho arikugamba naagira ati: Nyencakare nk'aga magingo, encuro emwe y'esaano y'obunono neija kugura empiiha emwe y'efeeza, n'encuro ibiri za baare, zigure empiiha emwe y'efeeza aha irembo rya Samariya.

2Reero omukuru w'engabo, ou omugabe yaabaire ayegamira, yaagarukamu omuntu wa Ruhanga ati: Nobu Nyakubaho yaakugwisa enjura, hoona ekyo kintu kikaabakwo? Onu amugira ati: N'oija kukyereebera; kwonka ebyo torikwija kubiryaho.

3Obwo aha irembo hakaba hariho abashaija bana ababembe; baagambirana bati: Ekirikutushutamya aha, okuhitsya obu turaafe, niki?

4Ku turaagire tuti, ka tutaahe omu rurembo, orwo rurembo rurimu enjara, neija kutwitiramu. Kandi nobu turaagume tushutami aha, nabwo nitufa. Mbwenu nimwije tuze seeri aha rusiisira rw'Abasiriya. Ku baraabe batatwitsire, nituguma tuhuriire, reero ku baraatwite, tufe.

5Batyo baimuka omu rwita waabo kuza aha rusiisira rw'Abasiriya. Kwonka ku baahikire ahu orusiisira rw'Abasiriya rurikutandikira, baashanga hataine muntu weena oriyo;

6ahabw'okuba Nyakubaho akareetera eihe ry'Abasiriya kuhurira endigito y'ebigaari n'ey'embaraasi n'ey'eihe rihango, baagambirana bati: Reeba omugabe wa Isiraeli aguririire abagabe b'Abahiiti n'aba Misiri kututeera.

7Batyo baahunga omu rwitawaabo, baatsigaho amahema gaabo n'embaraasi zaabo n'endogoya zaabo. Baatsigaho n'orusiisira rwabo, nk'oku ruri: baahunga kukiza amagara.

8Abo babembe ku baahikire ahu orusiisira rurikutandikira, baataaha omu ihema baarya, baanywa; kandi baatwara efeeza n'ezaabu n'eby'okujwara, baagyenda baabishereka. Bwanyima baagaruka, baataaha omu rindi ihema, baihamu ebyabaire birimu, baabitwara, baabishereka.

9Ebyo ku byahwaire, abo babembe baagambirana bati: Eki turikukora tikihikire. Eri izooba n'ery'amakuru marungi. Ku turaayetsize, twategyereza okuhitsya obu buraataagurukane, nitwija kufubirwa. Mbwenu nimwije tugyende, tubigambire omukuru w'enju y'omugabe.

10Batyo bagyenda, beeta abakumiirizi b'aha irembo ry'orurembo, babagira bati: Twahika aha rusiisira rw'Abasiriya, kwonka titwashangayo muntu n'omwe ou twareeba nari ou twahurira; kureka eki twashangayo n'embaraasi n'endogoya zitsibikire n'amahema gaabo gari nk'oku gabaire gari.

11Abakumiirizi nabo beeta, babigambira omukuru w'omu nju y'omugabe.

12Omugabe aimuka ekyo kiro, agambira abakungu be ati: Ka mbagambire obwengye bu Abasiriya batucwereire kuturwanisa. Nibamanya ku twine enjara. Mbwenu baaruga omu rusiisira kweshereka omu ishwa, nibagira ngu ku turaarugye omu rurembo, batukwate tuhuriire, barutaahemu.

13Omwe aha bakungu be yaamugira ati: K'abantu batware embaraasi itaano aha zitsigaireho. Manya itwe abakitsigaireho ebituriho ni nk'ebyabaire aha migogo yoona ey'Abaisiraeli abaafiire. Mbwenu ka tubatumeyo, tureebe.

14Mpaho batoorana ab'ebigaari bibiri, omugabe aboohereza kukurata eihe ry'Abasiriya. Abagira ati: Nimwirooko mureebe.

15Nabo babakurata okuhitsya obu baahikire ahari Yorudaani. Haza ogwo muhanda baashanga gwijwire ebijwaro n'ebindi bintu ebi Abasiriya baanagire nibahunga. Entumwa zaagarukayo zaabigambira omugabe.

16Bwanyima abantu baashohora nibairuka, baayaya eby'omu rusiisira rw'Abasiriya. Mpaho encuro emwe y'esaano y'obunono yaagura empiiha emwe y'efeeza, n'encuro ibiri za baare zaagura empiiha emwe, nk'oku Nyakubaho yaakigambire.

17Mbwenu obwo omugabe akaba ahaire omukuru w'engabo ou yaabaire ayegamira omurimo gw'okurinda eirembo. Haza abantu baamutemberaniraho omu irembo, yaafa, nk'oku omuntu wa Ruhanga yaakigambire, obu omugabe yaamwijaho.

18Manya obu omuntu wa Ruhanga yaagira omugabe ati: Encuro ibiri za baare niziija kugura empiiha emwe y'efeeza n'encuro emwe y'esaano y'obunono egure empiiha emwe y'efeeza; nyencakare nk'aga magingo, aha irembo rya Samariya,

19ogwo mukuru w'engabo akahakanisa omuntu wa Ruhanga ati: Nobu Nyakubaho wenka yaakugwisa enjura, ebyo ekyo kintu kikaabakwo? Onu nikwo kumugarukamu ati: Noija kukyereebera, kwonka ebyo torikwija kubiryaho.

20Haza nikwo kyamubaireho, ahabw'okuba abantu bakamutemberaniraho omu irembo, yaafa.

← Chapter 6 Jump to: Chapter 8 →

Recommended Reading

Commentary 2 Kings Commentaries → Devotional 2 Kings Devotional Guide → Get This Bible nyankole Study Bible →