2 Kings 21

nyankole

← Chapter 20 Jump to: Chapter 22 →

1Manaase obu yaaza aha ngoma, akaba aine emyaka ikumi n'ebiri y'obukuru, yaategyekyera emyaka makumi ataano n'etaano ari Yerusalemu. Nyina akaba naayetwa Hefuziba.

2Manaase ogwo akakora ebitarikusiimwa Nyakubaho. Yaatooreza emitwarize erikunugwa, ey'abanyamahanga bu Nyakubaho yaabingire kuhigiza Abaisiraeli.

3Ahabw'okuba akagaruka yaayombeka obutungutungu bu Hezekiya ishe yaabaire asheenyire. Yaateeraho Baali amatambiro, yaakora ebishushani bya Ashera, nk'oku Ahabu omugabe wa Isiraeli yaakozire. Yaaramya ebirikwakira omu iguru byona, yaabigaragira.

4Kandi yaayombekyera baaruhanga amatambiro omuri Nyaruju ya Nyakubaho, ei Nyakubaho yaagizire ati: Omuri Yerusalemu nimwo abantu bariguma nibandamiza.

5Yaataho n'okwombekyera ebirikwakira omu iguru amatambiro omu bibuga byombi ebya Nyaruju ya Nyakubaho.

6Yaatamba omutabani kuba ekitambo kicwekize. Yaaraguza, yaakora emiguriko, yaaraguza aha barikugambisa emizimu, n'aha bafumu. Akakora bingi ebitarikusiimwa Nyakubaho, yaamugwisa kubi munonga.

7Reero ekishushani kya Ashera ekisharwire, eki yaakozire yaakita omuri Nyaruju ei Nyakubaho yaagambiire Daudi n'omutabani Solomooni ati: Omuri egi nju, n'omuri Yerusalemu ei naatooraine omu nganda za Isiraeli zoona, nimwo bariguma nibandamiza.

8Kandi Abaisiraeli ku baritaho omutima, baakora ebi naabaragiire byona, kandi baakuratira eby'omu biragiro byona ebi omugaragwa wangye Musa yaabaragiire, tindibazengyereza bundi kubaiha omu nsi ei naahaire baishebo.

9Kwonka bo tibarakyetaireho; na Manaase yaababeihabeiha; baakora ebibi ebirikukira ebi amahanga gu Nyakubaho yaacwekyereize kuhigiza Abaisiraeli gaakozire.

10Bwanyima Nyakubaho yaagambisa abaheereza be abarangi ati:

11Ahabw'okuba Manaase omugabe wa Yuda akozire ebi bihagaro, yaakora ebibi ebirikukira ebi Abaamoni abaamubandiize baakozire, yaacumuzisa Abaayuda, baaramya ebishushani bi yaataireho.

12N'ahabw'ekyo Nyakubaho Ruhanga wa Isiraeli naagira ati: Reeba, naaza kugwisiza Yerusalemu na Buyuda akagwe, weena oraakahurire, amatu ge gateere enduuru.

13Ndyagyeresa Yerusalemu akagoye, nk'oku naagyereise Samariya, na kariishoriisho ei naagyereise ab'omuryango gw'Ahabu; ndyamara omuri Yerusalemu abantu nk'oku omuntu aragaza orwabya, akarujuumika.

14Kandi ndyanagaijura abantu bangye abaatsigaireho, mbashunikire abazigu baabo boona, babasingure, babakwate, kandi babanyagye.

15Ahabw'okuba bakozire ebi ntarikusiima, bangwisa kubi munonga, okwiha baishebo baaba kuruga Misiri, n'okuhitsya eri izooba.

16Ekindi, Manaase akaitira busha abantu baingi, eshagama yaabo yaashandaara omuri Yerusalemu oku n'oku; yaataho n'okucumuzisa Abaayuda, baakora ebitarikusiimwa Nyakubaho.

17Mbwenu endiijo mirimo ya Manaase n'ebindi ebi yaakozire byona, n'ebibi bi yaakozire bihandiikirwe omu Kitabo ky'eby'omu Busingye bw'abagabe ba Yuda.

18Bwanyima Manaase akafa, yaashanga baishenkuru. Yaaziikwa omu musiri gw'aha nju ye, ogwa Uuza. Omutabani Amoni yaamuhungurira.

19Amoni akaba aine emyaka makumi abiri n'ebiri y'obukuru obu yaaza aha ngoma; yaategyekyera emyaka ebiri omuri Yerusalemu. Nyina akaba naayetwa Meshulemeti muhara wa Haruzi owa Yotiba.

20Amoni nawe akakora ebitarikusiimwa Nyakubaho, nk'oku Manaase ishe yaakozire.

21Akakuratira emitwarize ya ishe yoona, yaaheereza ebishushani ebirikuramibwa ebi ishe yaaheereize, kandi yaabiramya.

22Akatsigaho Mukama Ruhanga wa baishenkuru, tiyaakuratira mitwarize ye.

23Reero abagaragwa ba Amoni ogwo, baamugirira enaama mbi, baamwitira omu nju ye.

24Kwonka abantu b'omuri egyo nsi baita abantu boona abaagiriire omugabe Amoni enaama mbi, baayemeka omutabani Yosiya, kuba omugabe omu mwanya gwe.

25Mbwenu endiijo mirimo ya Amoni, ei yaakozire, ehandiikirwe omu kitabo ky'eby'omu Busingye bw'abagabe ba Yuda.

26Amoni ogwo akaziikwa omu kituuro kye, omu musiri gwa Uuza; omutabani Yosiya yaayema omu mwanya gwe.

← Chapter 20 Jump to: Chapter 22 →