2 Kings 23

nyankole

← Chapter 22 Jump to: Chapter 24 →

1Bwanyima omugabe Yosiya akeeta abakuru b'omuri Buyuda boona, n'ab'omuri Yerusalemu, baateeranira ahu ari.

2Reero omugabe yainamuka, yaaza omuri Nyaruju ya Nyakubaho, hamwe n'abantu boona ab'omuri Yuda, n'abatuuzi ba Yerusalemu boona, n'abahongyerezi, n'abarangi: abantu boona abakuru n'abato. Yaabashomera byona ebiri omu kitabo ky'endagaano, ekyazoirwe omuri Nyaruju ya Nyakubaho, bamutegire okutu.

3Bwanyima omugabe yaayemerera aha rubaju rw'enyomyo, yaaragaanira endagaano omu maisho ga Nyakubaho: kworobera Mukama n'okukuratira ebiragiro bye, n'ebi yaahamize, n'ebi yaataireho n'omutima gwe gwona, n'amagara ge goona; n'okuhitsya ebiri omuri egyo ndagaano, ebihandiikirwe omuri ekyo kitabo. N'abantu boona baakwatanisa nawe omuri egyo ndagaano.

4Omugabe Yosiya akaragiira Hilikiya omuhongyerezi omukuru, n'abahongyerezi boona abarikukurataho, n'abarinzi b'eirembo, kwiha omuri Nyaruju ya Nyajkubaho ebintu byona ebyakoreirwe Baali, na ruhangakazi Ashera, n'ebirikwakira omu iguru byona. Yaabyokyeza aheeru ya Yerusalemu, omu ruhanga rwa Kidirooni, eiju ryabyo yaaritwara Beteli.

5Kandi yaihiraho kimwe abahongyerezi b'ebishushani ebirikuramibwa, abu abagabe ba Yuda baabaire bataireho kwoterera obubaani omu butungutungu bw'omu ndembo za Yuda, n'obwehinguririize Yerusalemu, yaabinga n'abarikwoterera obubaani Baali, n'eizooba, n'okwezi, n'enyonyoozi, n'ebindi byona ebirikwakira omu iguru.

6Yaahigura omuri Nyaruju ya Nyakubaho enyomyo eyaabaire ehongyeirwe Ashera, yaagiiha omuri Yerusalemu, yaagitwara aha kagyera Kidirooni yaagyokyezayo, yaagihondahonda yaagicwa obusaasingo, yaabumaamagiza omu mwanya gu baziikamu abantu.

7Reero yaasheenya amaju g'omugyenzo gw'ediini ag'omuri Nyaruju ya Nyakubaho agu abashaija baabaire bashambaniramu, ahu abakazi baabaire barukiramu enyegamo y'okukingira Ashera.

8Abo bahongyerezi boona yaabacwa omu ndembo za Yuda. Yaashiisha obutungutungu obu abahongyerezi baabaire bootereraho obubaani, okwiha Geeba okuta Beerisheba. Kandi yaasheenyagura obutungutungu bw'aha marembo, aharikutaahirwa owa Yeshua omukuru w'orurembo, obwabaire buri aha rubaju rwa bumosho rw'eirembo, omuntu yaaba naataaha omu rurembo.

9Abahongyerezi b'omu butungutungu tibaikirizibwa kuza aha itambiro rya Nyakubaho omuri Yerusalemu; kureka baaguma nibarya n'abahongyerezi bagyenzi baabo Emigaati Etatumbisiibwe.

10Kandi yaashiishagura Tofeti ey'omu ruhanga rw'Abahinomu ngu hatakaagira owaatambiririrayo Moleki omwana we w'omwojo nari omwishiki kuba ekitambo kicwekize.

11Akaihaho embaraasi ezi abagabe ba Yuda baahongyeire eizooba, aharikutaahirwa omuri Nyaruju ya Nyakubaho, haihi n'ekishengye kya Natanimeleki omurinzi w'ekikaari ekihereraine nayo, ezaabaire nizirindirwa omu kibuga kyayo. Yaayotsya n'ebigaari by'eizooba;

12n'amatambiro g'aha mutwe gwa kaanyinaabiri ya Ahazi agu abagabe ba Yuda baakozire; n'agu Manaase yaakozire omu bibuga bya Nyaruju ya Nyakubaho byombi; yaagahigura, yaagatuura aha nsi, yaagasheenyagura, yaagacwa obusaasingo, eiju ryago yaarinaga omu kagyera Kidirooni.

13Kandi ogwo mugabe akashiishagura emyanya etunguukire ey'okuramizamu ey'aha burugwa-izooba bwa Yerusalemu, okuhika aha bukiizi-bwa-buryo bw'orushozi rw'eicwekyererezo, obu Solomooni omugabe wa Isiraeli yaayombekyeire Ashitareeti ekihagaro ky'Abanyasidoni, na Kemoshi ekihagaro ky'Abaamoabu, na Milikomu ekihagaro ky'Abaamoni.

14Yasheenyagura enyomyo z'amabaare, yaatemagura enyomyo za Ashera; ahi zaabaire ziri yaahaijuza amagufa g'abantu.

15Omugabe Yosiya kandi akasheenyagura eitambiro rya Beteli, omwanya gw'akatungutungu, ogwatairweho Yeroboamu mwene Nebati owaareteire Isiraeli kucumura. Yaasheenyagura eryo itambiro hamwe n'akatungutungu kaaryo. Amabaare gaaryo yaagaatagura, yaagacwa obusaasingo; yaayotsya n'enyomyo ya Ashera.

16Reero Yosiya ku yaamagamagire, yaareeba ebituuro aha rushozi. Yaayohereza abantu, baiha amagufa omuri ebyo bituuro, yaagookyeza ahari eryo itambiro, yaarihagaza, nk'oku ekigambo kya Nyakubaho eki omuntu wa Ruhanga yaarangire naaragura eby'ekyo kintu kyabaire kiri.

17Bwanyima yaabuuza ati: Ekyo kiijutsyo ki ndikureeba obuseeri n'eky'oha? Abantu b'omuri orwo rurembo baamugarukamu bati: N'ekituuro ky'omuntu wa Ruhanga, owaarugire Buyuda, akaranga ebi bintu bi waakora eitambiro rya Beteli.

18Nawe agira ati: Mumurekye agumeyo, hatagira owaakora aha magufa ge. Nabo amagufa ge bareka kugakoraho, hamwe n'ag'omurangi ori owaarugire Samariya.

19Kandi Yosiya, endaaro z'aha myanya etunguukire ezaabaire ziri omu ndembo za Samariya, ezi abagabe ba Isiraeli baayombekire kugwisa kubi Nyakubaho, aziihaho. Azigira nk'oku yaagizire ey'omuri Beteli.

20Ataho n'okwitira aha matambiro abahongyerezi boona ab'omuri obwo butungutungu, kandi yaagookyezaho amagufa g'abantu. Ebyo ku byahwaire, yaagaruka Yerusalemu.

21Omugabe Yosiya akaragiira abantu boona ati: Mugume mukorere Mukama Ruhanga waanyu omugyenzo gw'obugyenyi bw'Okuhingurwaho, nk'oku kihandiikirwe omu kitabo ky'Endagaano.

22Manya tihakabahoga bugyenyi bw'Okuhingurwaho nk'obwo, okwiha omu biro by'abaramuzi abaategyekire Isiraeli, nobu bwakuba omu busingye bw'abagabe ba Isiraeli bwona, nari omu bw'aba Yuda.

23Kureka omu mwaka gwa ikumi na munaana ogw'omu busingye bwa Yosiya omugabe, bakakorera Nyakubaho omuri Yerusalemu omugyenzo gw'obugyenyi bw'Okuhingurwaho.

24Kandi Yosiya akaihaho abarikugambisa emizimu, n'abarogi, na baaruhanga b'omu maka, n'ebishushani ebirikuramibwa, n'ebirikuzira byona ebyabaire biri omu nsi ya Yuda, n'omuri Yerusalemu, ngu abone kuhikiiriza eby'omu biragiro ebyahandiikirwe omu kitabo eki Hilikiya omuhongyerezi yaazoire omuri Nyaruju ya Nyakubaho.

25Yosiya ogwo, omu bagabe boona abaamubandiize tihariho n'omwe owaashushaine nawe kuheereza Nyakubaho n'omutima gwe gwona, n'amagara ge goona, n'amaani ge goona, naakuratira ebiri omu biragiro bya Musa byona. Kandi n'omu baamukuratiire, tihariho n'omwe owaashushaine nawe.

26Kwonka shi Mukama tararekire kugirira Abaayuda ekiniga kingi, naabatura ebi Manaase yaakozire akamugwisa kubi.

27Ekyarugiremu Nyakubaho yaagira ati: Ndyabinga Abaayuda omu maisho gangye, nk'oku naabingire Abaisiraeli, ncwe oru rurembo Yerusalemu, oru naatooraine, na Nyaruju ei naagizire nti: Nimwo bariguma nibandamiza.

28Mbwenu endiijo mirimo ya Yosiya n'ebi yaakozire byona bihandiikirwe omu Kitabo ky'eby'omu Busingye bw'abagabe ba Yuda.

29Omu busingye bwa Yosiya nibwo Faraaho Neeko omugabe wa Misiri yaahurura kuza aha Mugyera Eufuraati kuha emikono omugabe wa Asiriya. Yosiya omugabe akazayo kumugungira; omugabe Neeko akamwitira Megido aha rugamba;

30abagaragwa be bakaiha omutumbi gwe Megido, bakaguta omu kigaari, bakagutwara Yerusalemu; bakamuziika omu kituuro kye; abantu b'egyo nsi bakaihayo Yehoahazi mutabani wa Yosiya, bakamusiiga amajuta, bakamwemeka; akaba omugabe omu mwanya gwa ishe.

31Yehoahazi akaza aha ngoma aine emyaka abiri n'eshatu y'obukuru, yaategyekyera ameezi ashatu omuri Yerusalemu. Nyina akaba naayetwa Hamutaali, muhara wa Yeremiya owa Libuna.

32Nawe akakora ebitarikusiimwa Nyakubaho, nk'oku baishenkuru boona baakozire.

33Faraaho Neeko akamubohera Ribula omu nsi ya Hamuti, ngu atakaaguma Yerusalemu aha ngoma. Abantu b'omuri egyo nsi yaabacwera omutoijo gw'empiiha z'efeeza akakaikuru kamwe n'obusiriira munaana, n'ez'ezaabu enkumi mukaaga.

34Faraaho Neeko yaatoorana Eliyakimu mwene Yosiya kuba omugabe omu mwanya gwa Yosiya ishe; kandi yaahindura eiziina rye, yaamweta Yehoyakimu. Bwanyima yaatwara Yehoahazi Misiri, yaagwayo.

35Yehoyakimu yaatoijera Faraaho efeeza n'ezaabu, kandi yaacwera ab'ensi egyo empiiha, ngu bashore, nk'oku Faraaho yaaragiire. Yaashorooza efeeza n'ezaabu aha bantu b'omuri egyo nsi, nka buri muntu oku yaacwereirwe, kuziha Faraaho Neeko.

36Yehoyakimu akaza aha ngoma aine emyaka makumi abiri n'etaano y'obukuru, yaategyekyera emyaka ikumi na gumwe omuri Yerusalemu. Nyina akaba naayetwa Zebiida muhara wa Pedaaya owa Ruma.

37Nawe akakora ebitarikusiimwa Mukama, nk'oku baishenkuru boona baakozire.

← Chapter 22 Jump to: Chapter 24 →