2 Kings 16

nyankole

← Chapter 15 Jump to: Chapter 17 →

1Omu mwaka gwa ikumi na mushanju ogw'omu busingye bwa Peeka mwene Remaliya, nibwo Ahazi mwene Yotamu omugabe wa Yuda yaaza aha ngoma.

2Ahazi ogwo akatandika kuza aha ngoma aine emyaka makumi abiri y'obukuru; yaategyekyera emyaka ikumi na mukaaga omuri Yerusalemu. Kwonka tiyaakora birikusiimwa Mukama Ruhanga we, nka Daudi ishenkuru oku yaatwarize,

3kureka akakuratira emitwarize y'abagabe ba Isiraeli; nangwa yaataho n'okutambira emandwa omutabani kuba ekitambo kicwekize, obwo naatooreza emicwe erikunugwa ey'abanyamahanga abu Mukama yaabingire kuhigiza Abaisiraeli.

4Kandi akatambirira ebitambo aha butungutungu, yaayoterera n'obubaani aha bibungo, n'ahansi y'emirinzi.

5Mbwenu Rezini omugabe wa Siriya, na Peeka mwene Remaliya omugabe wa Isiraeli bakahurura kuteera Yerusalemu, baagota Ahazi; kwonka tibaabaasa kumusingura.

6Ago magingo nibwo omugabe wa Edomu yaagarurira Abanyaedomu orurembo Elati, akarucwamu Abaayuda; Abanyaedomu bakarwijamu, bakarutuuramu n'okuhitsya eri izooba.

7Ahazi nikwo kutuma entumwa ahari Tigulati-pileseeri omugabe wa Asiriya, naamugira ati: Nyowe ndi omwiru waawe, kandi omwana waawe. Mbwenu ija ompe emikono onjune omugabe wa Siriya n'owa Isiraeli abarikuntaahirira.

8Kandi Ahazi ogwo aihayo efeeza n'ezaabu ebi yaashangire omuri Nyaruju ya Nyakubaho, n'omu mabiikiro g'omu kikaari ky'omugabe, abitwekyera omugabe wa Asiriya nk'ekiconco.

9Omugabe wa Asiriya nikwo kumwikiriza, akahurura, akateera Damasiko, akagikwata; abaamwo akabatwara Kiiri, akaita Rezini.

10Omugabe Ahazi ku yaagiire Damasiko kubugana Tigulati-pileseeri omugabe wa Asiriya, yaareebayo eitambiro. Mpaho yaatwekyera Uriya omuhongyerezi eky'okurireeberaho ekikozirwe nkaryo; buzimazima ekirikushushanira kimwe naryo.

11Ogwo muhongyerezi yaayombeka eitambiro, naakuratira ebi omugabe Ahazi amutwekyeire ari Damasiko. Haza yaaba nikwo yaarikora, onu atakarugireyo.

12Omugabe Ahazi ku yaarugire Damasiko, yaareeba eryo itambiro, yaarihika, yaaritemba.

13Yaaryokyezaho ekitambo kye ky'okucwetsya n'eky'esaano; yaarishukaho n'eky'ebyokunywa; kandi yaarishukaho eshagama y'ekitambo kye ky'okwekundira.

14Reero eitambiro ery'omuringa, ery'omu maisho ga Mukama, yaariiha omu maisho ga Nyaruju, omu mwanya oguri ahagati y'eitambiro rye na Nyaruju ya Nyakubaho, yaarita embari ya bumosho ey'eitambiro rye.

15Omugabe Ahazi yaaragiira Uriya omuhongyerezi ati: Aha itambiro erihango obe niho waaguma nootambira ebitambo by'okucwetsya eby'omu kasheeshe, n'eby'esaano eby'omu mwabazyo, n'ekitambo ky'omugabe ekicwekize n'eky'esaano, hamwe n'ebitambo by'okucwetsya eby'abantu boona ab'eihanga, n'ebyabo eby'ebyokunywa. Kandi obe niryo waaguma nooshukaho eshagama y'ebitambo byona ebicwekize. Kwonka eitambiro ery'omuringa ribe eryangye ry'okwehanuurizaho.

16Uriya omuhongyerezi nawe yaakora ebyo byona, nk'oku omugabe Ahazi yaamuragiire.

17Ekindi, Omugabe Ahazi akakomoorora amaguru g'ebitebe by'ahari nyamuziga, yaabibambuuraho ebiremu, yaabiihaho ebinaabiro byabyo. Kandi yaiha ekitanka aha nimi z'omuringa, ezaabaire zikihigikiire, yaakita aha mwariro gw'amabaare.

18Reero omuhanda oguriho ekisanga ogw'okurabamu ahari Sabato, ogu baabaire bataire omunda y'ekikaari, n'omuryango ogu omugabe yaabaire ataahiramu omuri Nyaruju ya Nyakubaho, yaabiigaza, ngu abone kugwisa gye omugabe wa Asiriya.

19Mbwenu ebindi bikoro ebi Ahazi yaakozire, bihandiikirwe omu Kitabo ky'eby'omu Busingye bw'abagabe ba Yuda.

20Bwanyima Ahazi akafa, yaashanga baishenkuru, yaaziikwa nabo omu rurembo rwa Daudi; omutabani Hezekiya yaayema omu mwanya gwe.

← Chapter 15 Jump to: Chapter 17 →