2 Kings 25

nyankole

← Chapter 24 Jump to:

1Omu mwaka gwa mwenda ogw'omu busingye bwa Nebukadenezaari omugabe wa Babulooni, omu kwezi kwa ikumi aha kiro kya ikumi ky'okwo kwezi, Nebukadenezaari ogwo omugabe wa Babulooni akahurura n'eihe rye ryona, yaateera Yerusalemu, yaagigota, baagyombekaho eby'okugigotesa okugyehinguririza.

2Baagota orwo rurembo okuhitsya omu mwaka gwa ikumi na gumwe ogw'omu busingye bw'omugabe Zedekiya.

3Aha kiro kya mwenda eky'okwezi kwa kana, enjara yaaba nyingi omuri orwo rurembo, abantu baabura ekyokurya.

4Haabaho abaafumura orugo rw'orurembo. Omugabe Zedekiya n'engabo ze baacwa ekyo kiro, baaraba omu irembo eriri haihi n'omusiri gw'omugabe, ahagati y'engo zombi. Baatoora ogurikuza Araba; Abakaludaaya nobu baraabe baabaire beehinguririize orwo rurembo.

5Kwonka eihe ry'Abakaludaaya ryagyenda ribingire ogwo mugabe, ryamuhambiza omu mpita za Yeriko, engabo ze zoona zaamuhungaho, zaataataana.

6Ekyarugiremu baakwata ogwo mugabe, baamutwarira omugabe wa Babulooni omu rurembo Ribuna, yaamucwera orubanja rw'okuba omugomi.

7Baita batabani ba Zedekiya ogwo naabareeba. Bwanyima nawe baamwihamu amaisho, baamubohesa emihama, baamutwara Babulooni.

8Omu kwezi kwa kataano, aha kiro kya mushanju ky'okwo kwezi, omu mwaka gwa ikumi na mwenda ogw'omu busingye bwa Nebukadenezaari omugabe wa Babulooni, Nebuzaradaani omukuru w'abaserukare abarinzi kandi omuhi w'obwengye w'omugabe wa Babulooni, akaija Yerusalemu.

9Yaayotsya Nyaruju ya Nyakubaho, n'ekikaari ky'omugabe, n'amaju goona ag'omuri Yerusalemu, na ibara nju mpango yaagyotsya.

10Eihe ry'Abakaludaaya ryona eryahurwire n'omukuru w'Abaserukare abarinzi ryasheenya ebigo ebyehinguririize Yerusalemu.

11Reero abandi bantu abu baabaire batsigire omu rurembo, n'abaacwire bakeehongyera omugabe wa Babulooni, hamwe n'abandi boona, Nebuzaradaani omukuru w'abaserukare abarinzi yaabatwara Babulooni bari enkwatwa.

12Kwonka ogwo mukuru w'abaserukare abarinzi, egyo nsi yaagitsigamu abantu abooro munonga, kuguma nibasharira emisiri y'emizaabibu, n'okuhingisa ente.

13Ekindi, Abakaludaaya bakasheenyagura enyomyo z'emiringa n'ebitebe by'ebinaabiro, n'ekitanka ky'omuringa, eby'omuri Nyaruju ya Nyakubaho, n'emiringa yaabyo baagitwara Babulooni.

14Kandi baatwara enyungu, n'ebitiiho, na zaamakansi, n'entaatika z'okwotereraho obubaani, n'ebintu byona eby'omuringa ebirikukoresibwa omuri Nyaruju;

15otaireho n'eby'okuguhisa omuriro n'enyabya, ebyabaire bikozirwe omu zaabu, n'ebyabaire bikozirwe omu feeza, omukuru w'abaserukare abarinzi nabyo yaabitwara, nk'oku biri.

16Enyomyo zombi, n'ekitanka, n'ebitebe by'ebinaabiro, ebi Solomooni yaakoreire Nyaruju ya Nyakubaho, n'emiringa yaabyo byona bikaba birengyesereize oburemeezi.

17Oburaingwa bw'enyomyo emwe bukaba buri mikono ikumi na munaana, kandi etungikirweho ekintu ky'omuringa obwemi bwakyo mikono eshatu. Omutwe gwakyo gwehinguririziibwe akatimba k'amashobane n'ebiri nk'ebijuma by'amakomamahanga, byona biri eby'omuringa.

18Bwanyima omukuru w'abaserukare abarinzi akatwara Seraaya omuhongyerezi omukuru, na Zefaniya omuhongyerezi orikukurataho, n'abakumiirizi b'aha irembo rya Nyaruju bonshatu.

19Kandi omu rurembo yaihamu omukungu, owaabaire naategyeka engabo, n'abashaija bataano abaha omugabe obwengye abaashangirwe omu rurembo, n'omuhandiiki w'omukuru w'eihe owaabaire ahuruza engabo z'omuri egyo nsi, n'abashaija makumi mukaaga baamwo abu yaashangire omuri orwo rurembo.

20Nebuzaradaani omukuru w'abaserukare abarinzi, yaabakukumba yaabatwarira omugabe wa Babulooni omu rurembo Ribula.

21Ogwo mugabe yaabacoocoora, yaabaitira Ribula omu nsi y'Abahamati. Abaayuda okwo nikwo baihirwe omu ihanga ryabo, bakazaahibwa.

22Omugabe Nebukadenezaari owa Babulooni akataho Gedaliya, mwene Ahikaamu, mwijukuru wa Shefani, kuba omutegyeki mukuru w'abantu abu yaatsigire omuri Buyuda.

23Mbwenu abakuru b'amahe ab'Abaayuda, hamwe n'engabo zaabo, ku baahuriire omugabe wa Babulooni ngu ataireho Gedaliya kuba omutegyeki mukuru; baija n'abashaija baabo, baashanga Gedaliya Mizipa. Abaizire ni Ishimaeli mwene Netaniya, Yohanani mwene Karea, Seraaya mwene Tanihumeti Omunetofa, na Yazaniya Omumaakati.

24Gedaliya yaabarahira n'engabo zaabo, naabagumya ati: Mutatiina abakungu b'Abakaludaaya. Mugume omuri egi nsi, nimuheereza omugabe wa Babuloni. Haza nimwija kuba gye.

25Kwonka omu kwezi kwa mushanju, Ishimaeli mwene Netaniya, mwijukuru wa Elishaama, ow'omu baana b'engoma, yaija n'abashaija ikumi baataahirira Gedaliya, baamwita hamwe n'Abayudaaya n'Abakaludaaya bu yaabaire aine Mizipa.

26Ekyo kyareetera abantu boona, abakuru n'abato, n'abakuru b'amahe kwimuka, bakahungira Misiri, ahabw'okutiina Abakaludaaya.

27Yehoyakini omugabe wa Yuda ku yaabaire amazire emyaka makumi ashatu na mushanju azaahiibwe, omu kwezi kwa ikumi n'ebiri aha kiro kya makumi abiri na mushanju ky'okwo kwezi, Evilimerodaaki omugabe wa Babulooni omuri ogwo mwaka gu yaagiiriireho aha ngoma, ahabw'embabazi ze yaiha Yehoyakini omugabe wa Yuda omu kihome.

28Yaagamba nawe naamutwaza gye, yaamushutamya omu mwanya gurikukira ogw'abandi bagabe bu yaabaire aine Babulooni.

29Yehoyakini atyo yaajuura ebijwaro by'ekihome, yaamara ebiro by'amagara ge buri izooba naariira aha meeza y'omugabe atarikwosha.

30Kandi omugabe buri izooba yaaguma naamuha omugabo gw'eby'okumutunga ebiro by'amagara ge byona.

← Chapter 24 Jump to: