bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Nyankole
/
nyankole
/
2 Kings 4
2 Kings 4
nyankole
← Chapter 3
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 5 →
1
Mbwenu omufaakazi w'omwe omu b'ekigombe ky'abarangi akatakira Elisha ati: Omuheereza waawe ibanye akafa, kandi noomanya ku omuheereza waawe ogwo yaabaire naatiina Mukama. Mbwenu orikuunyihuza yaija kutwara abaana bangye bombi kuba abahuuku be.
2
Elisha amubuuza ati: Nooyenda nkukorere ki? Ngambira eki otungire omwawe? Onu amugarukamu ati: Nyowe omuzaana waawe tiinyine kindi eki nyine omu ka, kureka engyemeko y'amajuta.
3
N'onu amugira ati: Irooko, ogyende otiize omuri bataahi baawe boona engyemeko zirimu busha nyingi, nk'oku orikubaasa.
4
Bwanyima otaahe omwawe, oyekingirane na batabani baawe, oshukye ago majuta omuri ezo ngyemeko zoona, eraijure, ogite hangahari.
5
Ogwo mukazi ku amurugaho, ayekingirana n'abatabani; baamureetera engyemeko, aguma naazishukamu amajuta,
6
engyemeko ku zaijwire, yaagambira omutabani ati: Ndeetera endiijo ngyemeko. Omutabani yaamugarukamu ati: Tihaakiriyo ndiijo. Amajuta gaarekyera aho kwija.
7
Atyo aija abigambira omushaija wa Ruhanga. N'onu amugira ati: Mbwenu irooko, otunde ago amajuta, oihure amabanja gaawe; bwanyima iwe na batabani baawe mutungwe agaraatsigareho.
8
Eizooba rimwe Elisha akaza Shuneemu, omukazi waayo omutungi yaamweshengyereza kurya omwe ebyokurya. Okwiha obwo, ku yaabaire atoora ogwo muhanda, ahungukayo kurya ak'okurya.
9
Ogwo mukazi agira iba ati: Hati naayetegyereza ku ogu mushaija otuura naaturabaho ari omuntu orikwera wa Ruhanga.
10
Mbwenu ka tumwombekyere akashengye kakye aha mutwe gw'enju, tumuteeremu ekitanda n'emeeza, n'ekitebe n'etabaaza. Ku araagume naaturabaho abe nimwo yaaza.
11
Eizooba rimwe ku yaizireyo, yaaza omuri ako kashangye, yaahuumura.
12
Reero yaagira Gehaazi omuheereza we ati: Nyetera ogwo Mushunaamukazi. Ku yaamwetsire, onu yaayemerera omu maisho ge.
13
Elisha yaagambira omuheereza we ati: Omugire oti: Mbwenu obu otuhendekyeire oti, tukaakukorera ki? Okaayenzire tugire eki twakugambirira omugabe nari omukuru w'amahe? Nawe amugarukamu ati: Ngaaha. Tiinyine ki nkyenire, abu ntwiremu n'abaitu.
14
Elisha agira ati: Mbwenu shi tumukorere ki? Gehaazi amugarukamu ati: Manya tagira mwana, kandi iba yaabaire omugurusi.
15
Elisha agira ati: Mwete. N'onu ku yaamwetsire, ogwo mukazi yaayemerera omu muryango.
16
Elisha yaamugira ati: Omu bunaku nk'obu, omwaka ogurikwija, oryakiikira omwana w'omwojo. Nawe amugarukamu ati: Ngaaha, mukama wangye, iwe muntu wa Ruhanga 'we, reka kumbeiha, nyowe omuzaana waawe.
17
Bwanyima ogwo mukazi yaabaka enda, yaazaara omutabani omu bunaku nk'obwo omu itogyera, nk'oku Elisha yaamugambiire.
18
Ogwo mwana ku yaakuzire, eizooba rimwe yaaza kushanga ishe omu bagyesi.
19
Yaagira ishe ati: Ai bambe! Omutwe gwanyita! Omutwe gwanyita! Ishe nikwo kuragiira omuhuuku we ati: Mutwarire nyina.
20
Onu amuheeka, amutwarira nyina. Ku amumuhitsya, omwana ashutama aha bibero bya nyina okuhitsya omu ihangwe, atyo akaba.
21
Mpaho nyina anyegyera amurambika aha kitanda ky'ogwo muntu wa Ruhanga, amukingiraniramu, ashohora.
22
Bwanyima ayeta iba, amugira ati: Nyoherereza omwe aha bambari baawe n'endogoya emwe, nze ahonaaho ow'omushaija wa Ruhanga, haza ngarukye juba.
23
Iba amubuuza ati: Ekirikukuhuuta owe eri izooba ni ki? Okwezi kutakabonekire, kandi k'etari Sabato! Onu amugarukamu ati: Fa okundeka!
24
Atyo atandiika endogoya, reero agambira omwambari we ati: Irukanzya egi ndogoya, haza oteetwara, ntakugambiire.
25
Atyo agyenda ashanga omuntu wa Ruhanga omu Rushozi rwa Karumeeli. Omushaija wa Ruhanga ku amureeba naija, agira Gehaazi omuheereza we ati: Reeba, oriya n'Omushuneemukazi ori.
26
Iruka ahonaaho omubugane, haza omubuuze oti: Ni buhooro? Baro agumire? N'omwana waawe agumire? Omukazi amugarukamu ati: Ni buhooro.
27
Ku yaahikire omu rushozi, ahu omuntu wa Ruhanga ari, amukwata amaguru. Gehaazi aija kumutsindika. Kwonka omuntu wa Ruhanga amugira ati: Murekye, ahabw'okuba aine enaku nyingi, kandi Nyakubaho akinsherekire tiyaakingambira.
28
Bwanyima omukazi amugira ati: Mukama wangye, niinye naakushabire omwana w'omwojo? Tindakugizire nti: Otambeiha?
29
Elisha agira Gehaazi ati: Yezirikye, otware enkoni yangye, ogyende. Haza ku oraagire ou waabugana, otamuramutsya, kandi ku haraagire owaakuramutsya omwetsize. Reero egi nkoni yangye ogirambikye aha mwana.
30
Nyina w'ogwo mwana agira ati: Nindahira Nyakubaho, kandi kukwambura, tindikwija kukutsiga aha! Elisha aimuka, agyenda nawe amukuratiire.
31
Gehaazi we agyenda abeebembeire, arambika enkoni ahari ogwo mwana; kwonka habura akateezo nari akamanyiso k'ohuriire. Atyo agarukayo kubugana Elisha, amugira ati: Omwana tiyaahimbuuka.
32
Elisha ku yaahikireyo, yaashanga arambiire aha kitanda kye akabire.
33
Atyo ataaha omu nju, ayekingiranamu nawe, ashaba Nyakubaho.
34
Bwanyima aza aha kitanda, ayegororera aha mwana eminwa ye agitaire aha minwa y'ogwo mwana, amaisho ge agataire aha ge, n'engaro ze azitaire aha ze. Reero ku yaamwegororoireho, omubiri gw'omwana gwatagata.
35
Mpaho Elisha aimuka, agyendagyenda omu nju, naakora oku n'oku. Bwanyima agaruka aha kitanda, amwegororeraho. Ogwo mwana ayetsyamura emirundi mushanju, abuuruura amaisho.
36
Elisha ayeta Gehaazi, amugira ati: Yeta ogwo Mushunaamukazi. N'onu amweta. Omukazi ku yaamuhikire, Elisha yaamugira ati: Ihaho omwana waawe.
37
Ogwo mukazi aija, amugwa omu maguru ajuumaire aha nsi. Atyo aihaho omwana we, ashohora.
38
Bwanyima Elisha akagaruka Giligaali omu biro bi enjara yaabaire eteereiremu ensi. Mbwenu ab'ekigombe ky'abarangi ku baabaire bashutami hamwe nawe, yaagira omuheereza we ati: Ta enyungu mpango aha mahega, obateekyere omujurugye.
39
Omwe aharibo nikwo kushohora, akaza omu musiri kushoroma emboga. Akahikira aha kihambo, akakishoromaho emyongo y'emirura, akagiijuza ekikondooro, akaija, akagikyeka, akagita omu nyungu y'okugijurugiramu, atagimanyire.
40
Batyo bagiihurira abantu kugirya. Kwonka ku baabaire nibarya ogwo mujurugye, baaborooga bati: Ai bambe! muntu wa Ruhanga, omu nyungu harimu orufu. Baremwa kugurya.
41
Nawe abagira ati: Nimundeetere ebyo byokurya. Abishuka omu nyungu, agira ati: Mbwenu nimubiihurire abantu babirye. Reero bashanga omu nyungu hatakirimu kirikwita.
42
Kandi obundi, omuntu akaruga Baalishalisha, areeteire ogwo muntu wa Ruhanga emigaati y'omuganuro makumi abiri ya baare n'obushiisha bw'engano omu nshaho ye. Elisha yaagira omuheereza we ati: Bigaburire abantu barye.
43
Kwonka we yaamubuuza ati: Nimbaasa nta kubigaburira abantu igana? Onu yaamugarukamu ati: Bihe abantu, babirye; ahabw'okuba Nyakubaho yaagira ati: Nibaija kurya bibaremereho.
44
Nawe abibaihurira. Barya bibaremeraho, nk'oku Nyakubaho yaakigambire.
← Chapter 3
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 5 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
Recommended Reading
Commentary
2 Kings Commentaries
→
Devotional
2 Kings Devotional Guide
→
Get This Bible
nyankole Study Bible
→