2 Kings 18

nyankole

← Chapter 17 Jump to: Chapter 19 →

1Omu mwaka gwa kashatu ogw'omu busingye bwa Hoshea mwene Eela omugabe wa Isiraeli, nibwo Hezekiya mwene Ahazi omugabe wa Yuda yaaza aha ngoma.

2Akaza aha ngoma aine emyaka makumi abiri n'etaano y'obukuru, yaategyekyera emyaka makumi abiri na mwenda omuri Yerusalemu. Nyina akaba naayetwa Abi, muhara wa Zekariya.

3Akakora ebirikusiimwa Nyakubaho nk'ebi Daudi ishenkuru yaakozire.

4Yaihaho emyanya y'obutungutungu, yaasheenya enyomyo z'amabaare, yaatema enyomyo za Ashera. Yaacwagacwagura enjoka y'omuringa ei Musa yaaheesire; ahabw'okuba okuhitsya omu biro ebyo, Abaisiraeli bakaba nibakigyoterera obubaani; nibagyeeta Nehushitaani.

5Akeesiga Mukama Ruhanga wa Isiraeli; tihaagira n'omwe ori nkawe omu bagabe ba Yuda boona abaamukuratiire, nobu baakuba abaamubandiize.

6Ahabw'okuba akahamira ahari Nyakubaho, tiyaagira bu amurugireho, yaaguma naakuratira ebiragiro ebi Mukama yaaragiire Musa.

7Nyakubaho yaaguma nawe. Ebi yaabaire akora byona biba gye. Akagomera omugabe wa Asiriya, yaayanga ku amutegyeka.

8Akasingura Abafilisiti, yaabahitsya Gaaza n'aha myatano yaayo, okwiha aha munaara gw'abarinzi okuhitsya aha ndembo z'ebigo bigumire.

9Omu mwaka gwa kana ogw'omu busingye bw'omugabe Hezekiya, nigwo mwaka gwa mushanju ogw'omu busingye bwa Hoshea mwene Eela omugabe wa Isiraeli, Shalumaneseeri omugabe wa Siriya akahurura, yaateera Samariya, yaagigota.

10Aha muheru gw'omwaka gwa kashatu agigotsire, yaagikwata. Samariya egyo akagikwata omu mwaka gwa mukaaga ogw'omu busingye bwa Hezekiya, nigwo gwa mwenda ogw'omu busingye bwa Hoshea omugabe wa Isiraeli.

11Omugabe wa Asiriya yaatwara Abaisiraeli Asiriya bari enkwatwa, yaabata Haala n'omu myegyeego y'omugyera Hazori ogw'omuri Gozani, n'omu ndembo z'Abameedi.

12Ekyo kikababaho ahabw'okuba tibaroorobeire ebi Mukama Ruhanga waabo yaabaragiire, baita endagaano ye. Baataho n'okuteeta ha bi Musa omugaragwa wa Nyakubaho yaabaragiire, nobu kwakuba okubyorobera.

13Reero omu mwaka gwa ikumi n'eshatu ogw'omu busingye bw'omugabe Hezekiya, Senakeribu omugabe wa Asiriya akahurura, yaateera ebigo bya Buyuda byona ebigumire, yaabikwata.

14Hezekiya omugabe wa Yuda yaatuma aha mugabe wa Asiriya ari Lakishi, naamugira ati: Nshobize! Mbwenu ndeka. Kyona eki orancwere ninkyeemera. Omugabe wa Asiriya nikwo kucwera Hezekiya omugabe wa Yuda empiiha z'efeeza akakaikuru kamwe n'obusiriira munaana, n'ez'ezaabu akasiriira kamwe n'obukumi munaana.

15Hezekiya yaamuha efeeza zoona ezaashangirwe omuri Nyaruju ya Nyakubaho n'omu mabiikiro g'ekikaari ky'omugabe.

16Kandi Hezekiya omugabe wa Yuda, ezaabu ei yaabaire ahundiise enyigi za Nyaruju ya Nyakubaho, n'enti z'emiryango, yaagibambuuraho, yaagiha omugabe wa Asiriya.

17Omugabe wa Asiriya akeema Lakishi, yaatuma omukuru w'amahe, n'omukuru w'abashaahu n'omukungu omukuru n'eihe rihango kuteera omugabe Hezekiya omuri Yerusalemu. Baahurura, baija Yerusalemu. Ku baahikireyo, baayemerera aha mukura gw'ekiyanja kya ruguru eky'aha muhanda rugyendwa ogurikuza aha ryogyezo ry'emyenda.

18Ku baatumire aha mugabe, haija Eliyakimu mwene Hilukiya, owaabaire ari omukuru w'ekikaari, Shebuna omuhandiiki, na Yoa mwene Asafu omurangi w'amakuru.

19Omukuru w'Abakungu yaabagira ati: Mugambire Hezekiya muti: Rubambansi omugabe wa Asiriya naakugira ati: Mbwenu nooyesiga ki?

20Noogira ngu ebigambo kusha nibyo biha omuntu oburyo n'amaani g'okurwana orugamba? Mbwenu nooyesiga oha, waaza kungomera?

21Reeba, hati nooyesiga Misiri, orubango rw'ekibingo kihendekire ekicumita ekiganja ky'omuntu okyehimbagiriza. Na Faraaho omugabe wa Misiri nikwo aba aha bamwesiga.

22Kandi ku murangire muti: Nitwesiga Mukama Ruhanga waitu; mbwenu shi tiwe ogwo, ou Hezekiya yaihireho obutungutungu bwe, n'amaramizo ge, naagira Abaayuda n'ab'omuri Yerusalemu ati: Mugume muramize omu maisho g'eitambiro eri ery'omuri Yerusalemu?

23Mbwenu nimuhayane na mukama wangye omugabe wa Asiriya. Nyowe mbahe embaraasi enkumi ibiri; haza ndeebe ku muraabe nimubaasa kutunga ab'okuzitemba.

24Noobaasa ota kubinga omwe aha bakuru b'engabo orikuhereerukayo omu bagaragwa ba mukama wangye, waaba nooyesiga Misiri ahabw'ebigaari byabo n'abatembi baabyo b'embaarasi?

25Ekindi, noogira ngu mpurwire kuteera ogu mwanya n'okugucwekyereza, ntaragiirwe Nyakubaho? Manya Nyakubaho niwe angizire ati: Hurura, oteere egyo nsi, ogicwekyereze.

26Omukuru w'abakungu ku yaaherize kugamba ebyo, Eliyakimu mwene Hilikiya, na Shebuna, na Yoa baamugira bati: Nitukweshengyereza, itwe abairu baawe, otugambire omu Ruramaika; ahabw'okuba niturumanya. Otatugambira omu Ruyudaaya aba bantu b'aha mutwe gw'ekigo babihuriire.

27Kwonka omukuru w'abakungu abagarukamu ati: Nimugira ngu mukama wangye antumire kugambira mukama waanyu naimwe ebyo bigambo, batari aba bantu abashutami aha mutwe gw'ekigo, ab'okurya amazi gaabo bakanywa enkari yaabo nkaimwe?

28Bwanyima ogwo mukuru w'abakungu ayemerera, ayamuza omu Ruyudaaya ati: nimuhurire eki Rubambansi omugabe wa Asiriya arikugamba!

29Ogwo mugabe naagira ati: Mutaikiriza Hezekiya kubabeiha; ahabw'okuba tarikwija kubaasa kubajuna.

30Mutaikiriza Hezekiya kubeesigisa Mukama, naabagira ati: Buzimazima Nyakubaho niwe araatujune; kandi ngu oru rurembo tirurikwija kurekurirwa omugabe wa Asiriya.

31Mutahurira ebya Hezekiya. Ahabw'okuba omugabe wa Asiriya naabagira ati: Mugarukane naanye, muunyehongyere, nibwo buri omwe omuriimwe araarye ebijuma by'emizaabibu ye, n'eby'emitiini ye, akanywa n'amaizi g'omu iziba rye,

32okuhitsya obu ndiija, nkabatwara omu nsi erikushushana n'eyaanyu, ensi y'engano na viino, ensi y'emigaati n'emisiri y'emizaabibu, ensi y'emioliva n'obwoki, mubone kugumaho mutafiire. N'ahabw'ekyo mutaikiriza Hezekiya kubahabisa, naabagira ati: Nyakubaho niwe araatujune.

33Hariho ruhanga w'abanyamahanga, orajunire ensi ye omugabe wa Asiriya?

34Mbwenu baaruhanga b'Abahamati n'ab'Abaarupaadi barahi? Baaruhanga b'Abasefariva n'ab'Abaheena n'ab'Abaiva barahi? Baraihire Samariya omu mikono yangye?

35Omuri baaruhanga boona ab'omuri ezo nsi, nibaahi abaraihire ensi zaabo omu mikono yangye; haza ngu Nyakubaho abone kwiha Yerusalemu omu mikono yangye?

36Kwonka abo bantu baamwetsiza, tibaagira ki baamugarukamu; ahabw'okuba omugabe akaba abaragiire ati: Mutagira eki mwamugarukamu.

37Bwanyima Eliyakimu mwene Helikiya omukuru w'ekikaari, na Shebuna omuhandiiki w'ebirikubaho, na Yoa mwene Asafu baija, baayegaranjurira Hezekiya bataagwire ebi bajwaire, baamuteekyerereza ebi omukuru w'abakungu yaagamba.

← Chapter 17 Jump to: Chapter 19 →