2 Kings 19

nyankole

← Chapter 18 Jump to: Chapter 20 →

1Omugabe Hezekiya ku yaabihuriire, yaataagura ebi ajwaire, yaajwara ekiguniya; yaaza omuri Nyaruju ya Nyakubaho.

2Yaatuma aha murangi Isaaya mwene Amozi, Eliyakimu omukuru w'ekikaari, na Shebuna omuhandiiki, n'abahongyerezi abakuru, bajwaire ebiguniya.

3Baamugira bati: Hezekiya yaakutumaho ati: Eri izooba n'ery'obusaasi n'okufubirwa, n'okuhemurwa. Abaana baahitsya obunaku bw'okuzaarwa, kwonka amaani g'okubazaara tigariho.

4Ningira ngu Mukama Ruhanga waawe ahuriire byona ebigambirwe omukuru w'abakungu, ou mukama we omugabe wa Asiriya atumire kujuma Ruhanga ohuriire. Shana Mukama Ruhanga waawe akaamuhana ahabw'ebi ahuriire. N'ahabw'ekyo yeshengyereze Ruhanga nooshabira abahonokire abakiriho.

5Abagaragwa b'omugabe Hezekiya ku baahikire Isaaya,

6yaabagira ati: Mugambire mukama waanyu muti: Nyakubaho naagira ati: Otatiina ebigambo bi ohuriire, ebi abagaragwa b'omugabe wa Asiriya banjumire.

7Reeba, naaza kumutamu ogundi mutima, ahurire orukuru, agarukyeyo omu nsi ye, haza mmwitireyo.

8Bwanyima omukuru w'abakungu agarukayo, ashanga omugabe wa Asiriya naarwanisa ab'omu rurembo Libuna, ahabw'okuba akaba ahuriire ku arugire Lakishi.

9Omugabe Senakeribu ku yaahuriire abarikugira ngu: Reeba, Tiruhaaka omugabe wa Etiopiya ahurwire kukuteera, yaagaruka yaatuma entumwa ahari Hezekiya ati:

10Nimwirooko mugire Hezekiya omugabe wa Yuda, muti: Otaikiriza Ruhanga waawe ou orikwesiga kukubeiha naakuraganisa ati: Yerusalemu terikwija kurekurirwa omugabe wa Asiriya kugisingura.

11Manya okahurira oku abagabe ba Asiriya baagizire ensi zoona, bakazicwekyerereza kimwe. Noogira ngu niiwe oraakire?

12Mbwenu baaruhanga barajunire amahanga gu baatatenkuru baacwekyereize? Amahanga Gozani, Harani, Rezefi, n'Abanyaedeni, abaabaire batwire Telasa;

13omugabe wa Hamati, n'owa Arupaadi, n'omugabe w'orurembo rw'Abasefaava, n'owa Hena, nari owa Iiva, barahi?

14Hezekiya ku yaatungire ebaruha ei entumwa zaamureeteire, yaagishoma. Atyo yaaza omuri Nyaruju ya Nyakubaho, yaagishashaanurira omu maisho ga Mukama.

15Yaashabira omu maisho ge ati: Ai Mukama Ruhanga wa Isiraeli; Iwe otuura osingami ahari baakerubi! Niiwe Ruhanga wenka otegyeka obugabe bwona obw'omu nsi. Niiwe waahangire eiguru n'ensi.

16Mbwenu, ai Nyakubaho, tega okutu ohurire. Obuuruure amaisho, oreebe. Haza ohurire ebigambo bya Senakeribu ebi atumire naakujuma, iwe Ruhanga ohuriire!

17Omu mazima, ai Nyakubaho, abagabe ba Asiriya bakacwekyereza amahanga n'ensi zaago,

18baanaga baaruhanga baago omu muriro, ahabw'okuba bakaba batari baaruhanga; kureka bari ebintu ebikozirwe engaro z'abantu omu biti n'omu mabaare. Nikyo baacwekyerereziibwe.

19Mbwenu, ai Mukama Ruhanga waitu, naakweshengyereza, otujune ogwo muntu w'amaani; abagabe boona ab'omu nsi babone kumanya, ai Nyakubaho, ku niiwe oba Ruhanga wenka.

20Bwanyima Isaaya mwene Amozi akatuma ahari Hezekiya ati: Mukama Ruhanga wa Isiraeli yaagira ati: Mpuriire ebi onshabire, ebikwatiraine na Senakeribu omugabe wa Asiriya.

21Ebi nibyo Nyakubaho amugambireho ati: Siyooni neekugaya, kandi neekushekyeerera. Na Yerusalemu neekuha mutinzi.

22N'oha ou okuneeteire, okajuma? N'oha ou okabukiire, okateera ekitsyori? Ti Nyowe Orikwera owa Isiraeli?

23Oyohereize entumwa zaawe kuunyeraatira, Nyowe Nyakubaho, noogira ngu iwe n'ebigaari byawe oinamukire, waasingura enshozi ndaingwa munonga, waahika n'aha mutwe gwa Lebanooni. Waatema zaakaarwenda zaayo n'emisisa yaayo emirungi munonga. Waahika omu bweshereko bwayo obw'ahare munonga, omu kibira kyayo ekikwataniire kimwe. Waayeraata oti:

24Nkafukura amaziba, naanywa amaizi g'omu mahanga. Naaribatiirira emigyera ya Misiri yoona, naagyomya.

25Torahuriire ku naamaririire ira kukikora? Omu biro bya ira nkacuma enaama y'okukora ebi hati ndikuhikiiriza, ngu obone kucwekyereza endembo zigumire, ozihindure amatongo.

26Obwo abazitwiremu bataine maani bahahaire omutima, kandi bashobangiriirwe: bari nk'ebimezire omu ishwa, nari obunyaatsi bw'omuroba: bari nk'ebinyaatsi ebimezire aha mutwe gw'enju ebyoma bitakakuzire.

27Kwonka nimmanya emishutamire yaawe, n'emihururire yaawe n'emitabaarukire yaawe, n'oku onkabukiire.

28Mbwenu okwiha obu onkabukiire, nkahurira amaryo gaawe; niinyija kukushoka eirobo omu nyindo, nkute ekyoma omu kanwa, nkugarure omuhanda gukureetsire.

29Mbwenu, iwe Hezekiya, eki nikyo oraamanyireho: Omu mwaka ogu nimwija kurya ebyemerize. Omu gwa kabiri murye eby'emiragarikira yaabyo. Reero omu gwa kashatu mubibe, mugyeshe, mubyare emizaabibu, kandi murye ebijuma.

30Haza ab'omuryango gwa Yuda, abariba batsigaireho, baganagane nk'emiti etsimbire emizi okuzimu, ekaana ebijuma eruguru.

31Ahabw'okuba ekicweka ky'abaritsigaraho kiryaruga omuri Yerusalemu, n'omutwe gw'abarihonokaho gurugye omu Rushozi Siyooni. Haza ekyo Nyakubaho akikorese eihato.

32N'ahabw'ekyo Nyakubaho naagamba aha bikwatiraine n'omugabe wa Asiriya ati: Tarikwija kutaaha omuri oru rurembo; nobu kwakuba okurashamu omwambi; nari okuruza omu kaso akwaitse engabo; nainga okurugotesa omutuumo gw'eitaka.

33Omuhanda gwamureetsire nigwo gurimugarurayo. Tarigira bu ataahire omuri oru rurembo. Nikwo Nyakubaho arikugira.

34Ahabw'okuba nyowe ahabwangye n'ahabw'omwiru wangye Daudi, ndyarwana ahari oru rurembo, ndujune.

35Haza ekyo kiro maraika wa Nyakubaho akatimbirayo, yaita abantu akasiriira kamwe n'obukumi munaana n'enkumi itaano omu b'omu rusiisira rw'Abasiriya. Mbwenu abantu ku baimukire kare omu kasheeshe, baashanga abo bantu boona bari emitumbi.

36Senakeribu omugabe wa Asiriya atyo arugayo, agaruka owe, aguma Nineeve.

37Eizooba rimwe ku yaabaire naaramiza Nisirooki ruhanga we omu ndaaro, abatabani Adurameleki na Sharezeeri baamwita, baahungira omu nsi ya Araraati. Omutabani Esarihadoni yaamuhungurira.

← Chapter 18 Jump to: Chapter 20 →