2 Kings 22

nyankole

← Chapter 21 Jump to: Chapter 23 →

1Yosiya akaza aha ngoma aine emyaka munaana y'obukuru, yaategyekyera emyaka makumi ashatu na gumwe omuri Yerusalemu. Nyina akaba naayetwa Yedida, ari muhara wa Adaaya owa Bozikati.

2Yosiya ogwo akakora ebirikusiimwa Nyakubaho, yaakuratira emitwarize yoona eya Daudi ishenkuru; tiyaateishuka kugira obu atoire ogwa buryo nari ogwa bumosho.

3Omu mwaka gwa ikumi na munaana ogw'omu busingye bwe, nibwo ogwo mugabe Yosiya yaatuma omuhandiiki we Shafani, mwene Azaliya, mwijukuru wa Meshulaamu, kuza omuri Nyaruju ya Nyakubaho naamugira ati:

4Irooko ogyende, ohikye Hilikiya omuhongyerezi omukuru, omugambire abare empiiha zoona ezi abantu bareetsire omuri Nyaruju ya Nyakubaho, ezi abarinzi b'Eirembo babaihireho.

5Bazihe abakozi abarikureeberera Nyaruju ya Nyakubaho, nabo bazihe abarikugihunduuza.

6Ababaizi, abombeki, n'abarikwombekyesa amabaare. Kandi ezindi zibe ez'okugura embaaho n'amabaare gacweregyereire, eby'okuhunduuza Nyaruju.

7Kwonka empiiha zi baabakwatsize, mutababuuza oku baazitwarize, ahabw'okuba nibazikoresa n'obwesigwa.

8Hilikiya omuhongyerezi omukuru akagambira Shafani omuhandiiki ati: Nzoire ekitabo ky'eiteeka omuri Nyaruju ya Nyakubaho. Hilikiya atyo akiha Shafani, n'onu akishoma.

9Bwanyima Shafani omuhandiiki agaruka ow'omugabe amugambira ati: Abairu baawe baihire empiiha zoona ezi bashangire omuri Nyaruju ya Nyakubaho baazikwatsa abakozi abarikugireeberera.

10Reero Shafani omuhandiiki agambira omugabe ati: Hilikiya omuhongyerezi ampaire ekitabo. Shafani atyo akishomera omugabe.

11Omugabe ku yaahuriire ebigambo by'omu kitabo ky'ebiragiro, yaataagura ebi ajwaire.

12Ogwo mugabe yaaragiira Hilikiya omuhongyerezi, na Ahikaamu mutabani wa Shefani, na Akiboora mutabani wa Mikaaya, na Shafani omuhandiiki, na Asaaya omugaragwa w'omugabe, naabagira ati:

13Mugyende muunyehanuurize ahari Nyakubaho kandi muhanuurize n'abantu na Yuda yoona aha by'omuri eki kitabo ekizoirwe. Manya Nyakubaho atwiniire ekiniga, ahabw'okuba baatatenkuriitwe tibaroorobeire ebiri omuri eki kitabo kukora byona ebihandiikirwemu, ebikwatiraine naitwe.

14Hilikiya omuhongyerezi, na Ahikaamu, na Akiboora, na Shafani, na Asaaya, baaza owa Huluda omurangikazi, muka Shalumu, mutabani wa Tikiva, mwene Harahaasi, omurinzi w'eibiikiro ry'ebijwaro, (obwo Huluda atwire Yerusalemu omu kirorero kyayo kya kabiri), baamuteekyerereza ekibareetsire.

15Yaabagambira ati: Mukama Ruhanga wa Isiraeli naagira ati: Mugambire ogwo muntu waabantumaho muti:

16Nyakubaho naagira ati: Reeba, niinyija kugwisiza akagwe ogu mwanya n'abagutwiremu; nk'ebigambo byona eby'omu kitabo ebi omugabe wa Yuda ashomire oku biri.

17Nk'oku baanyimwire, bakooterera baaruhanga abandi obubaani ngu bangwise kubi, ahabw'ebi baakoreise emikono yaabo, naanye nikyo ndikwija kugirira ogu mwanya ekiniga kingi ekitarikwija kwikaikanisibwa.

18Kwonka omugabe wa Yuda owaabatuma kwehanuuza ahari Nyakubaho, mumugambire muti: Mukama Ruhanga wa Isiraeli naagira ati: Ahabw'ebigambo bi ohuriire,

19nk'oku oyeteisize, okeebundika omu maisho ga Nyakubaho obu ohuriire ebi ngambire ahari ogu mwanya n'abagutwiremu, ngu guryaba amatongo, kandi gwetwe ogukyeenirwe; mbwenu iwe okaririra omu maisho gangye; naanye nkuhuriire. Nikwo Mukama arikugira.

20N'ahabw'ekyo niinyija kukushangisa baashwenkuru, oziikwe omu kituuro kyawe n'obusingye, amaisho gaawe garekye kureeba akagwe ku ndigwisiza ogu mwanya. Batyo baagarukayo, baabiteekyerereza omugabe.

← Chapter 21 Jump to: Chapter 23 →