1 Samuel 12

Shan

← Chapter 11 Jump to: Chapter 13 →

1သမူၺ်ႇလႃႉ ၵေႃႈလၢတ်ႈတီႈၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်လႄႈဝႃႈ၊ တူၺ်းလူး၊ ၵဝ်ထွမ်ႇဢဝ်ၵႂၢမ်းဢၼ် သူလၢတ်ႈတီႈၵဝ် ၵႃႈမီးၼၼ်ႉလႄႈ ယုၵ်ႉယွင်ႈၶုၼ်ႁေႃၶမ်းဝႆႉၵႃႈၼိူဝ်သူယဝ်ႉ။-

2မိူဝ်ႈလဵဝ်ၼႆႉ ၶုၼ်ႁေႃၶမ်းၼၼ်ႉဢွၼ်ႁူဝ်သူယူႇဢေႃႈ။ ၵဝ်ၸမ်ႉ ဢသၢၵ်ႈယႂ်ႇလႄႈၶူၼ်ႁူဝ်ႁွၵ်ႇယဝ်ႉ။ လုၵ်ႈၸၢႆးၵဝ်တင်းလၢႆၵေႃႈမီးယူႇၵႃႈတီႈသူဢေႃႈ။ ၵဝ်ၼႆႉ ဢွၼ်ႁူဝ်သူၸႃႉၸဵမ်မိူဝ်ႈဢၼ်ဢသၢၵ်ႈယင်းလဵၵ်ႉလႄႈ တေႃႇထိုင်ႁွတ်ႈဝၼ်းမိူဝ်ႈၼႆႉယဝ်ႉ။-

3ၵဝ်ယင်းမီးယူႇၵႃႈတီႈၼႆႈဢေႃႈ။ ယူႇၽၢႆႇၼိုင်ႈတင်းၵဝ်သေလႄႈ ၶၢမ်ႇသၢၵ်ႈသေႇၵႃႈတီႈၽၢႆႇၼႃႈထႃႇဝရႃႉၽြႃး ဢိၵ်ႇတင်းၵႃႈတီႈၽၢႆႇၼႃႈၵေႃႉဢၼ်လႆႈၶၢမ်ႇၽိၵ်ႈသိၵ်ႈၸဝ်ႈၼႆႉတႃႉ။ ၵဝ်ယၢမ်ႈတွၼ်ႉလႆႈဢဝ်ဝူဝ်းၽူႈလႂ်။ ၵဝ်ယၢမ်ႈတွၼ်ႉလႆႈဢဝ်လီႈၽူႈလႂ်။ ၵဝ်ယၢမ်ႈတွၼ်ႉလႆႈပႅတ်ႉလႆႈလႅၼ်ၽူႈလႂ်။ ၵဝ်ယၢမ်ႈတွၼ်ႉလႆႈၼိၵ်ႈၸၢၵ်ႈငႅၼ်းသႄးၽူႈလႂ်။ ၵဝ်ယၢမ်ႈတွၼ်ႉလႆႈၵိၼ်လၢၵ်ႈသွင်ႇၵႃႈတီႈမိုဝ်းၽူႈလႂ် ႁႂ်ႈမၢၵ်ႇတႃၵဝ်ထၼ်ႈပေႃးမွတ်ႇ။ ပေႃးၵဝ်လႆႈဢဝ်မႅၼ်ႈယဝ်ႉၸိုင် ၵဝ်တၵ်းၶိုၼ်းတႅၼ်းပၼ်ဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

4ၶဝ်ဢွၼ်ၵၼ်လဝ်ႊလၢတ်ႈလႄႈဝႃႈ၊ ၸဝ်ႈႁဝ်းၼႆႉဢမ်ႇပႅတ်ႉဢမ်ႇလႅၼ်ႁဝ်းၶႃႈ။ ဢမ်ႇၼိၵ်ႈၸၢၵ်ႈငႅၼ်းသႄးႁဝ်းၶႃႈ။ ဢမ်ႇဢဝ်ဢုၵ်ႉၸႃႇၵႃႈၼႂ်းမိုဝ်းၽူႈလႂ်သေၵေႃႉသေၵူၼ်း၊ ဝႃႈၼင်ႇၼႆဢေႃႈ။-

5မၼ်းၼၼ်ႉၵေႃႈလၢတ်ႈလႄႈဝႃႈ၊ ထႃႇဝရႃႉၽြႃး ပဵၼ်သၢၵ်ႈသေႇယူႇၽၢႆႇၼိုင်ႈတင်းသူ၊ ၵေႃႉဢၼ်လႆႈၶၢမ်ႇၽိၵ်ႈသိၵ်ႈၸဝ်ႈၼႆႉၵေႃႈ ပဵၼ်သၢၵ်ႈသေႇယူႇၽၢႆႇၼိုင်ႈတင်းသူ လွင်ႈဢၼ်သူဢမ်ႇထူပ်းဢမ်ႇႁၼ်ဢုၵ်ႉၸႃႇပိူၼ်ႈ ၵႃႈၼႂ်းမိုဝ်းၵဝ်ၼၼ်ႉဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ၼၼ်ႉဢွၼ်ၵၼ်ၶိုၼ်းလၢတ်ႈလႄႈဝႃႈ၊ မၼ်းၸဝ်ႈပဵၼ်သၢၵ်ႈသေႇၶႃႈဢေႃႈ၊ ဝႃႈၼင်ႇၼႆဢေႃႈ။

6လႆႈသမ်ႉ သမူၺ်ႇလႃႉ လၢတ်ႈတီႈၵူၼ်းတင်းလၢႆလႄႈဝႃႈ၊ မၼ်းၸဝ်ႈၼၼ်ႉပဵၼ်ထႃႇဝရႃႉၽြႃးဢၼ်ယုၵ်ႉယွင်ႈ မူဝ်းသေႇ ဢိၵ်ႇတင်း ဢႃႇရုၼ်ႇ လႄႈ ဢဝ်ပူႇမွၼ်ႇသူဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးၼၼ်ႉဢေႃႈ။-

7မိူဝ်ႈလဵဝ်ၼႆႉ သူဢွၼ်ၵၼ်ယူႇတဵတ်ႇတဵတ်ႇယဵၼ်ယဵၼ်တႃႉ။ ၵဝ်တၵ်းတိူင်ႇပၢင်ႇလၢတ်ႈၸႃၵၼ်တင်းသူ ၵႃႈတီႈၽၢႆႇၼႃႈထႃႇဝရႃႉၽြႃး လူၺ်ႈလွင်ႈတၢင်းဢၼ်ထႃႇဝရႃႉၽြႃး ၸွမ်းၼင်ႇတြႃးသေလႄႈ ႁဵတ်းတီႈသူဢိၵ်ႇတင်းပူႇမွၼ်ႇသူၸိူဝ်းၼၼ်ႉၼၼ်ႉဢေႃႈ။-

8မိူဝ်ႈဢၼ် ယႃႇၵုပ်ႈ ႁွတ်ႈထိုင်ၵႃႈတီႈမိူင်း ဢေႇၵိပ်ႉတူႉ လႄႈ ပူႇမွၼ်ႇသူၸိူဝ်းၼၼ်ႉႁွင်ႉသႅၼ်ႇတီႈထႃႇဝရႃႉၽြႃးၼၼ်ႉၸိုင်၊ ထႃႇဝရႃႉၽြႃးပွႆႇၸႂ်ႉ မူဝ်းသေႇ ဢိၵ်ႇတင်း ဢႃႇရုၼ်ႇ သေလႄႈ ၼုၵ်ႈဢဝ်ပူႇမွၼ်ႇသူၸိူဝ်းၼၼ်ႉ ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးလႄႈ ၶျႃးတီႈယူႇၶဝ်ပၼ်ၵႃႈတီႈၼႆႈဢေႃႈ။-

9ၵူၺ်းၵႃႈ ၶဝ်လူင်လိုမ်းထႃႇဝရႃႉၽြႃး ၽြႃးပဵၼ်ၸဝ်ႈၶဝ်လႄႈ၊ မၼ်းၸဝ်ႈဢဝ်ၶဝ်ၶၢႆပၼ်ၵႃႈၼႂ်းမိုဝ်း သီႉသရႃႉ ၶုၼ်ပူဝ်ႇၶျုၵ်ႈ ႁႃႇၸေႃႇ ဢိၵ်ႇတင်းၵႃႈၼႂ်းမိုဝ်းၵူၼ်း ၽီႉလိတ်ႉတီႉ တင်းလၢႆ ဢိၵ်ႇတင်းၵႃႈၼႂ်းမိုဝ်းၶုၼ်ႁေႃၶမ်း မေႃႇၽႃႉ ၼၼ်ႉသေယဝ်ႉ၊ ၶဝ်ၼၼ်ႉ ဢွၼ်ၵၼ်တိုၵ်းတေႃးၶဝ်ဢေႃႈ။-

10လႆႈသမ်ႉ ၶဝ်ႁွင်ႉသႅၼ်ႇတီႈထႃႇဝရႃႉၽြႃးသေလႄႈလဝ်ႊလၢတ်ႈလႄႈဝႃႈ၊ ၶႃႈၸဝ်ႈႁဝ်းၶဝ်ၽိတ်းပိူင်ႈၵွပ်ႈပိူဝ်ႈဢၼ်လႆႈၸုၼ်ႉပႅတ်ႈၸဝ်ႈႁဝ်းလႄႈ ႁဵတ်းဝၢတ်ႈတီႈၽြႃး ပႃႇလႃႉ ဢိၵ်ႇတင်းၽြႃး ဢႃႇသတရိၵ်ႉ ၼၼ်ႉယဝ်ႉတီႈၶႃႈယဝ်ႉ၊ ၼႂ်းဝႃႈၼၼ်သေၵေႃႈ ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈႁဝ်းၶဝ် ၵႃႈၼႂ်းမိုဝ်းရၢၼ်ႇသူႇသေၵမ်းတီႈၶႃႈ၊ တၵ်းႁဵတ်းဝၢတ်ႈတီႈၸဝ်ႈႁဝ်းတီႈၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

11ထႃႇဝရႃႉၽြႃးပွႆႇၸႂ်ႉ ယေႇရုပ်ႉပႃႉပေႇလႃႉ၊ ပေႇတၼ်ႇ၊ ယေႇၽသႃႉ၊ သမူၺ်ႇလႃႉ ၸိူဝ်းၼၼ်ႉသေလႄႈ ၼုၵ်ႈဢဝ်သူဢွၵ်ႇသေၵႃႈၼႂ်းမိုဝ်းရၢၼ်ႇသူႇ ဢၼ်လဵပ်ႈႁွပ်ႈသူဝႆႉၼၼ်ႉသေယဝ်ႉ၊ သူလႆႈယူႇလူင်ႉလီလွတ်ႈလီဢေႃႈ။-

12လိုၼ်းၼၼ်ႉ မိူဝ်ႈဢၼ်သူႁၼ် ၼႃႇႁတ်ႉ ၊ ၶုၼ်ႁေႃၶမ်းၵူၼ်းမဵဝ်း ဢမ်ႇမုၼ်ႇ ၶီႇသိုၵ်းမႃးၼၼ်ႉၸိုင် ပိၵ်ႉသမ်ႉထႃႇဝရႃႉၽြႃး ၽြႃးပဵၼ်ၸဝ်ႈသူ ႁဵတ်းၶုၼ်ႁေႃၶမ်းသူယူႇသေၵေႃႈ သူလဝ်ႊလၢတ်ႈတီႈၵဝ်လႄႈဝႃႈ၊ ဢမ်ႇၸႂ်ႈၵူၺ်ႉ။ ၶုၼ်ႁေႃၶမ်းတၵ်းလႆႈဢုပ်ႉပိူင်ႇၵႃႈၼိူဝ်ႁဝ်းၶႃႈ ၶႃႈဢေႃႈ၊ ဝႃႈၼင်ႇၼႆဢေႃႈ။-

13မိူဝ်ႈလဵဝ်ၼႆႉၸိုင်၊ သူဢွၼ်ၵၼ်လူတူၺ်းၶုၼ်ႁေႃၶမ်း ဢၼ်သူလိူၵ်ႈၵဵပ်းဢဝ်လႄႈယွၼ်းဢဝ်ၼၼ်ႉတႃႉ။ တူၺ်းလူး၊ ထႃႇဝရႃႉၽြႃးယုၵ်ႉယွင်ႈၵေႃႉၼိုင်ႈ ဝႆႉႁႂ်ႈပဵၼ်ၶုၼ်ႁေႃၶမ်းၵႃႈၼိူဝ်သူယဝ်ႉ။-

14ပေႃးသူၵူဝ်ႁႄထႃႇဝရႃႉၽြႃးလႄႈ ႁဵတ်းဝၢတ်ႈယူႇ၊ ယင်းဢမ်ႇပူၼ်ႉလိူဝ်ပိင်းၺၢပ်ႈမၼ်းၸဝ်ႈလႄႈ ထွမ်ႇဢဝ်ၵႂၢမ်းမၼ်းၸဝ်ႈယူႇၸိုင်၊ သူဢိၵ်ႇတင်းၶုၼ်ႁေႃၶမ်းဢၼ်ဢုပ်ႉပိူင်ႇသူၼၼ်ႉ တၵ်းပဵၼ်ၵေႃႉဢၼ်ၸွမ်းလင်ထႃႇဝရႃႉၽြႃး ၽြႃးပဵၼ်ၸဝ်ႈသူယူႇ မၼ်ႈမၼ်ႈၶိူင်ႇၶိူင်ႇဢေႃႈ။-

15ပေႃးဢမ်ႇၼၼ် ပေႃးသူဢမ်ႇထွမ်ႇဢဝ်ၵႂၢမ်းထႃႇဝရႃႉၽြႃးလႄႈ ပူၼ်ႉလိူဝ်ပိင်းၺၢပ်ႈထႃႇဝရႃႉၽြႃးၸိုင်၊ မိုဝ်းထႃႇဝရႃႉၽြႃးၼၼ်ႉ တၵ်းယူႇၽၢႆႇၼိုင်ႈတင်းသူ မိူၼ်ၸိူဝ်ႉၼင်ႇဢၼ်ယူႇၽၢႆႇၼိုင်ႈတင်းပူႇမွၼ်ႇသူၸိူဝ်းၼၼ်ႉဢေႃႈ။-

16မိူဝ်ႈလဵဝ်ၼႆႉ ယူႇၼိမ်ၼိမ်လီလီသေလႄႈ လူတူၺ်းဢမူႉလူင်ဢၼ်ထႃႇဝရႃႉၽြႃး တၵ်းႁဵတ်းသိုဝ်ႈၼႃႈတႂ်ႈတႃသူၼၼ်ႉတႃႉ။-

17ဝၼ်းမိူဝ်ႈၼႆႉ ပဵၼ်ၶိင်ႇဢၼ်ပၢတ်ႇၶဝ်ႈၵျုင်ႇဢမ်ႇၸႂ်ႈႁိုဝ်။ ၵူၺ်းၵႃႈ ၵဝ်တၵ်းသူးတွင်းတီႈထႃႇဝရႃႉၽြႃးလႄႈ မၼ်းၸဝ်ႈတၵ်းႁႂ်ႈၽူၼ်တူၵ်း ဢိၵ်ႇလူၺ်ႈၵၼ်တင်းၽႃႉလင်ဢေႃႈ။ ပိူဝ်ႈဢၼ်ပဵၼ်ၼင်ႇၼႆလႄႈ၊ သူတၵ်းႁၼ်လႄႈႁူႉသၢႆငၢႆလွင်ႈဢၼ်ဢပႅတ်ႈ ဢၼ်သူၽိတ်းပိူင်ႈမႅၼ်ႈၵႃႈတီႈၽၢႆႇၼႃႈထႃႇဝရႃႉၽြႃး ၵွပ်ႈပိူဝ်ႈဢၼ်သူယွၼ်းဢဝ်ၶုၼ်ႁေႃၶမ်းၼၼ်ႉ ယႂ်ႇၼႃႇၼၼ်ႉဢေႃႈ၊ ဝႃႈၼင်ႇၼႆသေယဝ်ႉ၊-

18သမူၺ်ႇလႃႉ သူးတွင်းတီႈထႃႇဝရႃႉၽြႃးလႄႈ ၼႂ်းဝၼ်းၼၼ်ႉ ထႃႇဝရႃႉၽြႃးႁႂ်ႈၽူၼ်တူၵ်းဢိၵ်ႇလူၺ်ႈၵၼ်တင်းၽႃႉလင်လႄႈ ၵူၼ်းတင်းသဵင်ႈတင်းလူင်ၼၼ်ႉ ဢွၼ်ၵၼ်ၵူဝ်ႁႄထႃႇဝရႃႉၽြႃး ဢိၵ်ႇတင်း သမူၺ်ႇလႃႉ ၼႃႇလူင်လၢင်ဢေႃႈ။-

19ၵူၼ်းတင်းသဵင်ႈတင်းလူင်ၵေႃႈ ဢွၼ်ၵၼ်တွင်းပၢၼ်ႇတီႈ သမူၺ်ႇလႃႉ လႄႈဝႃႈ၊ လွင်ႈၼင်ႇႁိုဝ်ႁဝ်းၶႃႈတၵ်းဢမ်ႇလႆႈတၢႆၸိုင်၊ ၶႅၼ်းတေႃႈသူးတွင်းပုၼ်ႈႁဝ်းၶႃႈတီႈထႃႇဝရႃႉၽြႃး ၽြႃးပဵၼ်ၸဝ်ႈၸဝ်ႈႁဝ်းသေၵမ်း။ ႁဝ်းၶႃႈၼႆႉဢဝ်တူႉၸရိူၵ်ႈတၢင်းဢၼ်ယွၼ်းဢဝ်ၶုၼ်ႁေႃၶမ်းၼႆႉ ထၢပ်ႈသႂ်ႇတီႈဢပႅတ်ႈႁဝ်းၶႃႈၵႃႈမီးၼၼ်ႉထႅင်ႈယဝ်ႉၶႃႈယဝ်ႉ၊ ဝႃႈၼင်ႇၼႆဢေႃႈ။-

20သမူၺ်ႇလႃႉ ၵေႃႈ လၢတ်ႈတီႈၵူၼ်းတင်းလၢႆလႄႈဝႃႈ၊ ယႃႇပေမႆႈၸႂ်။ သူႁဵတ်းတူႉၸရိူၵ်ႈၵႃႈမီးၼႆႉမႅၼ်ႈသေၵေႃႈ ယႃႇပေဝႄႈပိူင်ႈသဵၼ်ႈတၢင်းဢၼ်ၸွမ်းလင်ထႃႇဝရႃႉၽြႃးယူႇၼၼ်ႉ။ ပႃးတင်းႁူဝ်ၸႂ်သဵင်ႈသဵင်ႈမူတ်းမူတ်းသေလႄႈ ႁဵတ်းဝၢတ်ႈတီႈထႃႇဝရႃႉၽြႃးတႃႉ။-

21ယႃႇပေဝႄႈပိူင်ႈသဵၼ်ႈတၢင်းလႄႈ ၸွမ်းလင်လွင်ႈတၢင်းဢၼ်ပဵၼ်ဢၼ်လၢႆလၢႆဢမ်ႇပွင်လွင်ႈ၊ ဢၼ်ဢမ်ႇႁဵတ်းၵျေးၸူး၊ ဢၼ်ဢမ်ႇၵႄႇသႄႇၶျွတ်ႈဢဝ်ၸိူဝ်းၼၼ်ႉ။ လွင်ႈတၢင်းၸိူဝ်းၼၼ်ႉပဵၼ်ဢၼ်လၢႆလၢႆ ဢမ်ႇပွင်လွင်ႈၵႃႈသင်ဢေႃႈ။-

22ထႃႇဝရႃႉၽြႃးတၵ်းထွၵ်ႈလူၺ်ႈၼႃႇမႃႉၸိုဝ်ႈသဵင်မၼ်းၸဝ်ႈသေလႄႈ ဢမ်ႇၸုၼ်ႉပႅတ်ႈၵူၼ်းမၼ်းၸဝ်ႈ။ ပဵၼ်ဢၼ်ထုၵ်ႇၸႂ်မႅၼ်ႈၸႂ်ထႃႇဝရႃႉၽြႃးၼၼ်ႉ ႁႂ်ႈလႆႈၶၢၼ်းသူဝႆႉ ၼႂ်းဢရႃႇၵူၼ်းမၼ်းၸဝ်ႈဢေႃႈ။-

23ၵဝ်ၸမ်ႉ၊ ႁႂ်ႈဢမူႉတၢင်းဢၼ်ၽိတ်းပိူင်ႈထႃႇဝရႃႉၽြႃး ဢၼ်ယင်းဢမ်ႇသူးတွင်းပုၼ်ႈသူလႄႈယူႇၼၼ်ႉ ၵႆၵၼ်တင်းၵဝ်သေၵမ်းလူၺ်ႈ။ သဵၼ်ႈတၢင်းဢၼ်လီငၢမ်းသိုဝ်ႈတေႃႇၼၼ်ႉၵေႃႈ ၵဝ်တၵ်းၼႄပျႃးတီႈသူလူးၵွၼ်ႇဢေႃႈ။-

24ၵူၺ်းၵွမ်ႉ ဢွၼ်ၵၼ်ၵူဝ်ႁႄထႃႇဝရႃႉၽြႃးလႄႈ ပႃးတင်းႁူဝ်ၸႂ်သဵင်ႈသဵင်ႈမူတ်းမူတ်း ဢိၵ်ႇတင်းသဵတ်ႈၸႃႇသေလႄႈ ႁဵတ်းဝၢတ်ႈတီႈမၼ်းၸဝ်ႈတႃႉ။ ဢွၼ်ၵၼ်ၶုၵ်းၸႂ်လႆႈၶႆႈၸႂ်ထူပ်း လွင်ႈဢၼ်မၼ်းၸဝ်ႈႁဵတ်းပုၼ်ႈသူထၢၼ်ႇလႂ်ယဝ်ႉၼၼ်ႉတႃႉ။-

25ပေႃးဢမ်ႇၼၼ် ပေႃးသူယင်းထၢပ်ႈထႅင်ႈလႄႈႁဵတ်းတူႉၸရိူၵ်ႈယူႇၸိုင်၊ သူဢိၵ်ႇလူၺ်ႈၵၼ်တင်းၶုၼ်ႁေႃၶမ်းသူ တၵ်းလႆႈႁွတ်ႈထိုင်တၢင်းလူႉတၢင်းလႅဝ်ဢေႃႈ၊ ဝႃႈၼင်ႇၼႆဢေႃႈ။

← Chapter 11 Jump to: Chapter 13 →