1 Samuel 25 — Shan

1လိုၼ်းၼၼ်ႉ သမူၺ်ႇလႃႉ တၢႆလႄႈ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ၸူႉၵၼ်တုမ်ၵၼ်သေလႄႈ ႁဵတ်းတၢင်းဢၼ်ႁႆႈႁွင်ႉပွင်ႉၶၢင်းသေယဝ်ႉ၊ ဢွၼ်ၵၼ်ဢဝ်မၼ်းသၢင်းၵျူဝ်ႇ ၵႃႈတီႈႁိူၼ်းမၼ်းၵႃႈၼႂ်းဝဵင်း ရႃႇမႃႉ ၼၼ်ႉဢေႃႈ။ တႃႇဝိတ်ႈ ၵေႃႈလုၵ်ႉလႄႈ လူင်းၵႂႃႇၵႃႈတီႈထိူၼ်ႇ ပႃႇရၼ်ႇ သေဢေႃႈ။-

2မိူဝ်ႈၼၼ်ႉ မီးၵေႃႉၼိုင်ႈဢၼ်ယူႇၵႃႈတီႈ မေႃးၼႃႉ လႄႈ မီးဢုၵ်ႉၸႃႇၼမ်ၼႃႇလူင်လၢင်ၵႃႈတီႈဝဵင်း ၵရမေႇလႃႉ ၼၼ်ႉဢေႃႈ။ ၵေႃႉၼၼ်ႉ ပဵၼ်ၵူၼ်းယႂ်ႇၵူၼ်းလူင်လႄႈ မီးသူဝ်းသၢမ်ႁဵင်၊ ပႄႉႁဵင်ၼိုင်ႈဢေႃႈ။ မၼ်းၼၼ်ႉၵႅတ်းႁႆးၶူၼ်သူဝ်းမၼ်းယူႇ ၵႃႈတီႈဝဵင်း ၵရမေႇလႃႉ ၼၼ်ႉဢေႃႈ။-

3ၸိုဝ်ႈသဵင်ၵေႃႉၼၼ်ႉၸမ်ႉ၊ ပဵၼ် ၼႃႇပလႃႉ ၊ ၸိုဝ်ႈသဵင်မေးမၼ်းၸမ်ႉ၊ ပဵၼ် ဢၽီႉၵေးလႃႉ ဢေႃႈ။ မႄႈယိင်းၼၼ်ႉၺၢၼ်ႇလီလႄႈ ႁၢင်ႈၽၢင်ၵေႃႈလီဢေႃႈ။ ၵူၼ်းၸၢႆးၼၼ်ႉၸမ်ႉ၊ မီးၸႂ်သၽေႃးဢၼ်ႁၢဝ်ႈၵျၢမ်းလႄႈ ၸၢင်ႈႁဵတ်းလွင်ႈတၢင်းဢၼ်ဢမ်ႇလီဢေႃႈ။ မၼ်းပဵၼ်ပီႈၼွင်ႉၸိူဝ်ႉၶိူဝ်း ၵႃႇလႅပ်ႉ ဢေႃႈ။-

4တႃႇဝိတ်ႈ ယူႇၵႃႈတီႈထိူၼ်ႇလႄႈငိၼ်းလွင်ႈဢၼ် ၼႃႇပလႃႉ ၵႅတ်းႁႆးၶူၼ်သူဝ်းမၼ်းယူႇၼၼ်ႉသေယဝ်ႉ၊-

5တႃႇဝိတ်ႈ ပွႆႇၸႂ်ႉၵူၼ်းဢွၼ်ႇသိပ်းၼိုင်ႈသေလႄႈ တႃႇဝိတ်ႈ သင်ႇလၢတ်ႈတီႈၵူၼ်းဢွၼ်ႇၸိူဝ်းၼၼ်ႉလႄႈဝႃႈ၊ သူၶိုၼ်ႈၵႂႃႇၵႃႈတီႈဝဵင်း ၵရမေႇလႃႉ ၸူးၵႃႈတီႈ ၼႃႇပလႃႉ လႄႈ ဢဝ်ၸိုဝ်ႈၵဝ်သဵင်ၵဝ်တၵ်ႉလၢတ်ႈမၼ်းတႃႉ။-

6ၵႂၢမ်းဢၼ်သူတၵ်းလႆႈလၢတ်ႈတီႈမၼ်းၼၼ်ႉလႄႈဝႃႈၸမ်ႉ၊ ႁႂ်ႈယူႇလီၵိၼ်ဝၢၼ်သေၵမ်းလူၺ်ႈ။ ႁႂ်ႈၸႃႉၸဵမ်ၸဝ်ႈလႄႈႁိူၼ်းၸဝ်ႈ၊ ၵႃႈဢၼ်ၸၢပ်ႈသႅင်ႇၵၼ်တင်းၸဝ်ႈ မီးတၢင်းဢၼ်ၵတ်းယဵၼ်ၶျၢမ်းသႃႇသေၵမ်းလူၺ်ႈ။-

7မိူဝ်ႈလဵဝ်ၼႆႉ ၵဝ်ၶႃႈငိၼ်းလွင်ႈဢၼ်ၸဝ်ႈမီးၶဝ်ၸိူဝ်းဢၼ်ၵႅတ်းႁႆးၶူၼ်သူဝ်းၼၼ်ႉၶႃႈယဝ်ႉ။ ၵူၼ်းလဵင်ႉထိင်းသူဝ်းၸဝ်ႈၸိူဝ်းၼၼ်ႉ ယူႇလူၺ်ႈၵၼ်တင်းႁဝ်းၶႃႈယဝ်ႉလႄႈ၊ ႁဝ်းၶႃႈဢမ်ႇၽိတ်းဢမ်ႇပိူင်ႈၶဝ်။ ၸူဝ်ႈဢၼ်ၶဝ်ယူႇၵႃႈတီႈဝဵင်း ၵရမေႇလႃႉ ၼၼ်ႉတဵမ်တဵမ် ဢုၵ်ႉၸႃႇၶဝ်ဢမ်ႇႁူင်ႈဢမ်ႇႁၢႆသေၸိူဝ်ႉသေပိူင်ၶႃႈၵူၺ်ႉ။-

8ထၢမ်တူၺ်းတီႈၵူၼ်းဢွၼ်ႇၸဝ်ႈၸိူဝ်းၼၼ်ႉၶႃႈတႃႉ။ ၶဝ်ၼၼ်ႉတၵ်းမွၵ်ႇလၢတ်ႈၶႃႈဢေႃႈ။ ၵွပ်ႈပိူဝ်ႈၼင်ႇၼၼ်လႄႈ ႁႂ်ႈၵူၼ်းဢွၼ်ႇၵဝ်ၶႃႈၸိူဝ်းၼႆႉ ထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈသေၵမ်း။ ႁဝ်းၶႃႈႁွတ်ႈထိုင်ၼႂ်းဝၼ်းမင်ႇၵလႃႇၶႃႈယဝ်ႉ။ ၶႅၼ်းတေႃႈဢဝ်ဢၼ်မီးတီႈမိုဝ်းၸဝ်ႈၼၼ်ႉ ပၼ်တီႈၶႃႈၸဝ်ႈႁဝ်းၸိူဝ်းၼႆႉ ဢိၵ်ႇတင်းတီႈလုၵ်ႈၸၢႆးၸဝ်ႈ တႃႇဝိတ်ႈ ၼႆႉသေၵမ်းၶႃႈ၊ ဝႃႈၼင်ႇၼႆဢေႃႈ။-

9မိူဝ်ႈဢၼ်ၵူၼ်းဢွၼ်ႇ တႃႇဝိတ်ႈ ၸိူဝ်းၼၼ်ႉ ႁွတ်ႈထိုင်ၵႃႈတီႈ ၼႃႇပလႃႉ ၼၼ်ႉၸိုင်၊ ၶဝ်ဢွၼ်ၵၼ်ဢဝ်ၸိုဝ်ႈဢဝ်သဵင် တႃႇဝိတ်ႈ ၶိုၼ်းလၢတ်ႈတီႈ ၼႃႇပလႃႉ ၼၼ်ႉၸွမ်းၼင်ႇၵႂၢမ်းၵႃႈမီးၼၼ်ႉသေယဝ်ႉ၊ ယူႇတဵတ်ႇတဵတ်ႇယဵၼ်ယဵၼ်ယူႇသေဢေႃႈ။

10ၼႃႇပလႃႉ ၵေႃႈၶိုၼ်းလၢတ်ႈတီႈၵူၼ်းဢွၼ်ႇ တႃႇဝိတ်ႈ ၸိူဝ်းၼၼ်ႉလႄႈဝႃႈ၊ တႃႇဝိတ်ႈ ၸမ်ႉ၊ ပဵၼ်ၽူႈလႂ်။ လုၵ်ႈၸၢႆး ယေႇသႄး ၸမ်ႉ၊ ပဵၼ်ၽူႈလႂ်။ ၶိင်ႇၵႃႇလႃႉမိူဝ်ႈလဵဝ်ၼႆႉ ၶႃႈဢၼ်ပုင်ႇၵၢၼ်ႇၸဝ်ႈမီးၼမ်ၼႃႇလူင်ပႄႇ။-

11ၵဝ်တၵ်းလႆႈဢဝ်ၶဝ်ႈမုၼ်းၵဝ်၊ ၼမ်ႉၵဝ်၊ ၼိူဝ်ႉၵဝ် ဢၼ်ၵဝ်ဢဝ်တၢႆ ပုၼ်ႈၶဝ်ၸိူဝ်းဢၼ်ၵႅတ်းႁႆးၶူၼ်သူဝ်းၵဝ်ၸိူဝ်းၼႆႉသေလႄႈ ပၼ်တီႈၶဝ်ၸိူဝ်းဢၼ်ၵဝ်ဢမ်ႇႁူႉလွင်ႈဢၼ်ၶဝ်လုၵ်ႉၵႃႈတီႈလႂ်မႃးၼၼ်ႉႁိုဝ်။ ဝႃႈၼင်ႇၼႆဢေႃႈ။-

12ၵူၼ်းဢွၼ်ႇ တႃႇဝိတ်ႈ ၸိူဝ်းၼၼ်ႉ ဝၢႆႇၶိုၼ်းမိူဝ်းၵႂႃႇလႄႈ ဢဝ်ၵႂၢမ်းတင်းသဵင်ႈတင်းလူင်ၼၼ်ႉ လဝ်ႊလၢတ်ႈတီႈ တႃႇဝိတ်ႈ ဢေႃႈ။-

13တႃႇဝိတ်ႈ ၵေႃႈ လၢတ်ႈတီႈၵူၼ်းမၼ်းတင်းလၢႆလႄႈဝႃႈ၊ သူဢွၼ်ၵၼ်ဢဝ်လၢပ်ႇသူမတ်ႉၵွပ်ႈတီႈဢႅဝ်သူၵူႈၵေႃႉၵူႈၵူၼ်းတႃႉ၊ ဝႃႈၼင်ႇၼႆသေလႄႈ ၶဝ်ဢွၼ်ၵၼ်ဢဝ်လၢပ်ႇၶဝ်မတ်ႉၵွပ်ႈၵူႈၵေႃႉၵူႈၵူၼ်းလႄႈ တႃႇဝိတ်ႈ ၵေႃႈဢဝ်လၢပ်ႇမၼ်းမတ်ႉၵွပ်ႈဢႅဝ်မၼ်းဢေႃႈ။ ၵူၼ်းသီႇပၢၵ်ႇၸွမ်းလင် တႃႇဝိတ်ႈ ၶိုၼ်ႈၵႂႃႇလႄႈ သွင်ပၢၵ်ႇပႂ်ႉဢုၵ်ႉၸႃႇၶူဝ်းလဵင်းၶဝ်ယူႇဢေႃႈ။-

14ၵူၼ်းဢွၼ်ႇၵေႃႉၼိုင်ႈ မွၵ်ႇလၢတ်ႈတီႈ ဢၽီႉၵေးလႃႉ မေး ၼႃႇပလႃႉ ၼၼ်ႉလႄႈဝႃႈ၊ တူၺ်းလူး၊ တႃႇဝိတ်ႈ ပွႆႇၸႂ်ႉၵူၼ်း လုၵ်ႉသေၵႃႈတီႈထိူၼ်ႇမႃး ႁႂ်ႈလႆႈတၵ်ႉလၢတ်ႈၸဝ်ႈႁဝ်းၶႃႈၼၼ်ႉလႄႈ ၸဝ်ႈႁဝ်းၶႃႈၼၼ်ႉလႃႇလင်ၶဝ်ပႅတ်ႈၶႃႈဢေႃႈ။-

15ၶဝ်ၼၼ်ႉႁဵတ်းၵျေးၸူးတီႈႁဝ်းၶႃႈၼႃႇလူင်လၢင်ၶႃႈယဝ်ႉ။ ၸူဝ်ႈဢၼ်ႁဝ်းၶႃႈယူႇၵႃႈတီႈထိူၼ်ႇသေလႄႈ ႁဵတ်းၵေႃႉႁဵတ်းသေႈ ယူႇလူၺ်ႈၵၼ်တင်းၶဝ်ၼၼ်ႉတဵမ်တဵမ်၊ ႁဝ်းၶႃႈဢမ်ႇလႆႈၶၢမ်ႇတၢင်းသုမ်းၶႃႈ။ ဢုၵ်ႉၸႃႇဢမ်ႇႁူင်ႈဢမ်ႇႁၢႆသေၸိူဝ်ႉသေပိူင်ၶႃႈၵူၺ်ႉ။-

16ၸူဝ်ႈဢၼ်ႁဝ်းၶႃႈလဵင်ႉထိင်းသူဝ်းလႄႈ ႁဵတ်းၵေႃႉႁဵတ်းသေႈယူႇလူၺ်ႈၵၼ်တင်းၶဝ်ၼၼ်ႉတဵမ်တဵမ်၊ ၶဝ်ပဵၼ်ဢၼ်ႁႄႉဢၼ်ၵင်ႈ ႁဝ်းၶႃႈယူႇၵူႈဝၼ်းၵူႈၶိုၼ်းတႃႇသေႇဢမ်ႇထၢတ်ႇၶႃႈဢေႃႈ။-

17ပိူဝ်ႈဢၼ်ပဵၼ်ၼင်ႇၼႆလႄႈ ၸဝ်ႈၼၢင်းႁဝ်းလူတူၺ်းၶႆႈၸႂ်လူၺ်ႈလွင်ႈဢၼ်ထုၵ်ႇလီႁဵတ်းၸိူဝ်ႉၼင်ႇႁိုဝ်ၼၼ်ႉၶႃႈတႃႉ။ မီးတၢင်းဢၼ်ၸီႇယၢင်ႇတၵ်းႁဵတ်းၽေးသႂ်ႇတီႈၸဝ်ႈႁဝ်းၶႃႈၼၼ်ႉ ဢိၵ်ႇတင်းၵူၼ်းႁိူၼ်းၵူၼ်းယေး မၼ်းတင်းသဵင်ႈတင်းလူင်ယဝ်ႉၶႃႈယဝ်ႉ။ ၵွပ်ႈပိူဝ်ႈဢၼ်ၸဝ်ႈႁဝ်းၶႃႈၼၼ်ႉပဵၼ်ၵူၼ်းဢႃႉထမ်ႇမႃႉလႄႈ ၽူႈလႂ်ဢမ်ႇလၢတ်ႈတီႈမၼ်းလႆႈလႃးလႃး၊ မိူဝ်ႈဢၼ်ဝႃႈၼင်ႇၼႆၸိုင်၊-

18ဢၽီႉၵေးလႃႉ ၼၼ်ႉဢဝ်ၶဝ်ႈမုၼ်းသွင်ပၢၵ်ႇလုၵ်ႈ၊ တဝ်ႈၼမ်ႉၸပိတ်ႈသွင်လုၵ်ႈ၊ သူဝ်းဢၼ်ႁုင်ယဝ်ႉႁႃႈတူဝ်၊ ၶဝ်ႈတႅၵ်ႇ ႁႃႈ ဢေးၽႃႇ ၊ မၢၵ်ႇၸပိတ်ႈဢၼ်ႁႅင်ႈပၢၵ်ႇပုၵ်ႉ၊ ၶႅပ်းမၢၵ်ႇလိူဝ်ႇသၢင်းၽေႃးသွင်ပၢၵ်ႇ ၶၼ်ၶၼ်ၽႂ်းၽႂ်းသေလႄႈတၢင်ႇသႂ်ႇၵႃႈၼိူဝ်လီႈသေယဝ်ႉ၊-

19လၢတ်ႈတီႈၵူၼ်းဢွၼ်ႇမၼ်းတင်းလၢႆလႄႈဝႃႈ၊ သူဢွၼ်ႁူဝ်ၵဝ်ၵႂႃႇတႃႉ။ ၵဝ်တၵ်းၸွမ်းဢေႃႈ၊ ဝႃႈၼင်ႇၼႆဢေႃႈ။ မၼ်းဢမ်ႇမွၵ်ႇဢမ်ႇလၢတ်ႈၽူဝ်မၼ်း ၼႃႇပလႃႉ ၼၼ်ႉလႃးလႃး။-

20ၼႂ်းမိူဝ်ႈဢၼ်မၼ်းယင်းတိုၵ်ႉၶီႇလီႈမၼ်းၵႂႃႇလႄႈ လူင်းၸွမ်းသဵၼ်ႈတၢင်းတီႈဢၼ်ယင်းလပ်ႉယူႇၵႃႈတီႈလွႆၼၼ်ႉယူႇၼၼ်ႉၸိုင်၊ တႃႇဝိတ်ႈ ဢိၵ်ႇတင်းၵူၼ်းမၼ်းၸိူဝ်းၼၼ်ႉ လူင်းၵႃႈတီႈလွႆၽၢႆႇၼိုင်ႈမႃးလႄႈ မၼ်းႁူပ်ႉထူပ်းၶဝ်ၼၼ်ႉဢေႃႈ။-

21ၸူဝ်ႈဢၼ်ဢမ်ႇပႆႇႁူပ်ႉထူပ်းၸိူဝ်ႉၼင်ႇၼၼ်ၼၼ်ႉၸိုင်၊ တႃႇဝိတ်ႈ ဝႃႈ၊ ၵဝ်လႆႈပႂ်ႉလႆႈထိင်းၵႃႈဢၼ်ၵေႃႉၼႆႉပိူင်ႇၼၼ်ႉ ၵႃႈတီႈထိူၼ်ႇၼႆႉ ႁႂ်ႈထၼ်ႈပေႃးဢုၵ်ႉၸႃႇမၼ်းဢမ်ႇလႆႈႁူင်ႈလႆႈႁၢႆသေၸိူဝ်ႉသေပိူင်ၼၼ်ႉ လၢႆလၢႆလွၵ်ႇလွၵ်ႇမႃးယဝ်ႉ။ မၼ်းတွပ်ႇတႅၼ်းပၼ်လွင်ႈတၢင်းဢၼ်ဢမ်ႇလီပုၼ်ႈလွင်ႈတၢင်းဢၼ်လီၼၼ်ႉတီႈၵဝ်ယဝ်ႉလူင်ပႄႇ။-

22ဝၼ်းမိူဝ်ႈၽုၵ်ႈၶိင်ႇၵၢင်ၼႂ် မိူဝ်ႈဢၼ်မိူင်းလႅင်းၼၼ်ႉ၊ ပေႃးၵဝ်ယင်းဝႆႉၵိုတ်းဝႆႉၵျၢၼ်ႇၵူၼ်းၸၢႆးၼႂ်းၶဝ်ၸိူဝ်းဢၼ်ၸၢပ်ႈသႅင်ႇၵၼ်တင်းမၼ်းၼၼ်ႉသေၵေႃႉသေၵူၼ်းၸိုင်၊ ယင်းဢမ်ႇၵႃးဢၼ်ၼၼ်ႉလႄႈ ႁႂ်ႈထႃႇဝရႃႉၽြႃး ႁဵတ်းလိူဝ်တွၼ်းၼႃႇသေၼၼ်ႉတီႈရၢၼ်ႇသူႇ တႃႇဝိတ်ႈ ၸိူဝ်းၼၼ်ႉသေၵမ်းလူၺ်ႈ၊ ဝႃႈၼင်ႇၼႆဝႆႉယဝ်ႉ။-

23ဢၽီႉၵေးလႃႉ ၼၼ်ႉႁၼ် တႃႇဝိတ်ႈ သေယဝ်ႉ၊ လူင်းသေၵႃႈၼိူဝ်လီႈမၼ်းၶၼ်ၶၼ်ၽႂ်းၽႂ်းလႄႈ ၵူမ်ႈႁူဝ်ၵွမ်းႁူဝ်ၵႃႈတီႈၽၢႆႇၼႃႈ တႃႇဝိတ်ႈ လႄႈ ၶုပ်ႉမူပ်ႇၵႃႈၼိူဝ်လိၼ်သေယဝ်ႉ၊-

24မူပ်ႇတဵတ်ႇယူႇၵႃႈတီႈတိၼ်မၼ်းယူႇသေလႄႈလၢတ်ႈဝႃႈ၊ ၸဝ်ႈၵဝ်ၶႃႈဢိူၺ်း၊ ႁႂ်ႈဢပႅတ်ႈမီးၵႃႈၼိူဝ်ၵဝ်ၶႃႈ၊ ႁႂ်ႈမီးၵႃႈၼိူဝ်ၵဝ်ၶႃႈၼႆႉသေၵမ်းၶႃႈ။ ပၼ်ဢၶႂၢင်ႉဢၼ်ၶႃႈမႄႈယိင်းၸဝ်ႈႁဝ်းၼႆႉ လႆႈလဝ်ႊလၢတ်ႈထိုင်ႁူၸဝ်ႈႁဝ်းသေၵမ်းၶႃႈ။ ထွမ်ႇဢဝ်ၵႂၢမ်းၶႃႈမႄႈယိင်းၸဝ်ႈႁဝ်းၼႆႉသေၵမ်းၶႃႈ။-

25ၶႅၼ်းတေႃႈယႃႇပေၶႆႈၸႂ်လူၺ်ႈလွင်ႈ ၼႃႇပလႃႉ ၵူၼ်းဢႃႉထမ်ႇမႃႉၼၼ်ႉသေၵမ်းၶႃႈ။ ၸိုဝ်ႈသဵင်မၼ်းၼၼ်ႉ ၵိုင်ႇၵၼ်မႅၼ်ႈၵၼ်တင်းၸႂ်သၽေႃးမၼ်းၶႃႈဢေႃႈ။ ၸိုဝ်ႈသဵင်မၼ်းၸမ်ႉ၊ ပဵၼ် ၼႃႇပလႃႉ ၊ သၽေႃးမၼ်းၸမ်ႉ၊ ပဵၼ်တၢင်းဢၼ်ယုတ်ႈဢၼ်မိူၵ်ႈၶႃႈဢေႃႈ။ ၵဝ်ၶႃႈဢၼ်ပဵၼ်ၶႃႈမႄႈယိင်းၸဝ်ႈႁဝ်းၼႆႉ ဢမ်ႇႁၼ်ၵူၼ်းဢွၼ်ႇဢၼ်ၸဝ်ႈႁဝ်းပွႆႇၸႂ်ႉမႃးၸိူဝ်းၼၼ်ႉၶႃႈ။-

26မိူဝ်ႈလဵဝ်ၸိုင်၊ ၸဝ်ႈၵဝ်ၶႃႈဢိူၺ်း၊ ၵႃႈၼင်ႇဢၼ်ဢသၢၵ်ႈထႃႇဝရႃႉၽြႃးလိပ်းယူႇၼၼ်ႉ၊ ၵႃႈၼင်ႇဢၼ်ဢသၢၵ်ႈၸဝ်ႈႁဝ်းလိပ်းယူႇၼၼ်ႉ ၵွပ်ႈပိူဝ်ႈဢၼ်ထႃႇဝရႃႉၽြႃး ႁႄႉၶႅၼ်ၸဝ်ႈႁဝ်းဝႆႉ၊ ႁႂ်ႈၸဝ်ႈႁဝ်းဢမ်ႇလႆႈႁွတ်ႈထိုင် တၢင်းဢၼ်ထုၵ်ႇဢပႅတ်ႈလူၺ်ႈလိူတ်ႈ ဢိၵ်ႇတင်းတၢင်းဢၼ်ဢဝ်မိုဝ်းၸဝ်ႈႁဝ်းပႂ်ႉဢမူႉၸဝ်ႈႁဝ်းသေလႄႈ ပၼ်တၢမ်ႇဢပႅတ်ႈၼၼ်ႉလႄႈ ႁႂ်ႈရၢၼ်ႇသူႇၸဝ်ႈႁဝ်း ဢိၵ်ႇတင်းၶဝ်ၸိူဝ်းဢၼ်မီးဢလူဝ်ႇၶႂ်ႈယႃႉဢၵျူဝ်းၸဝ်ႈႁဝ်းၼၼ်ႉ ပဵၼ်ၸိူဝ်ႉၼင်ႇ ၼႃႇပလႃႉ ၼၼ်ႉသေၵမ်းလူၺ်ႈ။-

27မိူဝ်ႈလဵဝ်ၼႆႉၸိုင် ၶႅၼ်းတေႃႈႁႂ်ႈလႆႈဢဝ်လၢၵ်ႈသွင်ႇဢၼ်ၶႃႈၸဝ်ႈႁဝ်းဢဝ်မႃးတီႈၸဝ်ႈၵဝ်ၶႃႈၼႆႉ ပၼ်တီႈၵူၼ်းဢွၼ်ႇဢၼ်ၸွမ်းလင်ၸဝ်ႈၵဝ်ၶႃႈၸိူဝ်းၼၼ်ႉသေၵမ်းၶႃႈ။-

28ယိူၼ်ႉၶၢမ်ႇဢပႅတ်ႈၶႃႈၸဝ်ႈႁဝ်းၼႆႉသေၵမ်းၶႃႈ။ ၵွပ်ႈပိူဝ်ႈဢၼ်ၸဝ်ႈၵဝ်ၶႃႈ တိုၵ်းသိုၵ်းယူႇၽၢႆႇထႃႇဝရႃႉၽြႃး ဢိၵ်ႇတင်းၵွပ်ႈပိူဝ်ႈဢၼ်ဢမ်ႇထူပ်းဢမ်ႇႁၼ်တီႈဢၼ်လီတၢင်ႇဢပႅတ်ႈ တီႈၸဝ်ႈႁဝ်းၸူဝ်ႈဢသၢၵ်ႈၼၼ်ႉလႄႈ ထႃႇဝရႃႉၽြႃးတၵ်းပွင်တႄႇပွင်ႁဵတ်းႁိူၼ်းဢၼ်မၼ်ႈၶိူင်ႇၼႅၼ်ႈၼႃဝႆႉ ပုၼ်ႈၸဝ်ႈၵဝ်ၶႃႈၶႃႈဢေႃႈ။-

29ပိၵ်ႉသမ်ႉၵူၼ်းၵမ်ႈၽွင်ႈလုၵ်ႉလႄႈ ႁႃႁႂ်ႈလႆႈဢဝ်ဢသၢၵ်ႈၸဝ်ႈႁဝ်းတၢႆသေၵေႃႈ ဢသၢၵ်ႈၸဝ်ႈႁဝ်း တၵ်းမီးတၢင်းဢၼ်မတ်ႉၶၢတ်ႈၶဵၼ်းၶွတ်ႇဝႆႉၵႃႈၼႂ်းပူၵ်ႉၼႂ်းႁေႃႇဢသၢၵ်ႈၼၼ်ႉ လူၺ်ႈၵၼ်တင်းထႃႇဝရႃႉၽြႃး ၽြႃးပဵၼ်ၸဝ်ႈၸဝ်ႈႁဝ်းၼၼ်ႉၶႃႈဢေႃႈ။ ဢသၢၵ်ႈရၢၼ်ႇသူႇၸဝ်ႈႁဝ်းၸိူဝ်းၼၼ်ႉၸမ်ႉ၊ မၼ်းၸဝ်ႈတၵ်းဢဝ်ပိုတ်းပႅတ်ႈ မိူၼ်ၸိူဝ်ႉၼင်ႇဢၼ်ပိုတ်းပႅတ်ႈသေၵႃႈၼႂ်း ၵူင်ၵွၼ်ၼၼ်ႉဢေႃႈ။-

30မိူဝ်ႈဢၼ်ထႃႇဝရႃႉၽြႃး ႁဵတ်းၵျေးၸူးတီႈၸဝ်ႈႁဝ်း ၸွမ်းၵႃႈၼင်ႇဢၼ်မၼ်းၸဝ်ႈမီးဢမိင်ႉဝႆႉလူၺ်ႈလွင်ႈၸဝ်ႈႁဝ်းၼၼ်ႉလႄႈ ၶၢၼ်းၸဝ်ႈႁဝ်းဝႆႉႁႂ်ႈပဵၼ်ၵူၼ်းဢၼ် ဢုပ်ႉပိူင်ႇမဵဝ်း ဢီႉသရေႇလႃႉ ၼၼ်ႉၸိုင်၊-

31လွင်ႈတၢင်းဢၼ်လွင်ႈမၼ်း ယင်းဢမ်ႇမီးလႄႈ ၸဝ်ႈႁဝ်းဢမ်ႇထွၵ်ႇပႅတ်ႈလိူတ်ႈပိူၼ်ႈ ဢိၵ်ႇတင်းလွင်ႈတၢင်းဢၼ်ၸဝ်ႈၵဝ်ၶႃႈ ဢမ်ႇပႂ်ႉဢမူႉတူဝ်ၸဝ်ႈၵဝ်ႇႁႂ်ႈလႆႈပၼ်တၢမ်ႇဢပႅတ်ႈၼၼ်ႉၸိူဝ်းၼၼ်ႉ တၵ်းဢမ်ႇပဵၼ်တၢင်းဢၼ်ႁႂ်ႈၸႂ်လဵၵ်ႉၸႂ်ဢူၼ်ႈ ဢိၵ်ႇတင်းတၢင်းဢၼ်ႁႂ်ႈၸဝ်ႈၵဝ်ၶႃႈ တၢင်ႇဢပႅတ်ႈတီႈႁူဝ်ၸႂ် တူဝ်ၸဝ်ႈၵဝ်ႇၼၼ်ႉၶႃႈဢေႃႈ။ မိူဝ်ႈဢၼ်ထႃႇဝရႃႉၽြႃး ႁဵတ်းၵျေးၸူးတီႈ ၸဝ်ႈၵဝ်ၶႃႈယဝ်ႉၼၼ်ႉၸိုင်၊ ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းၶႃႈၸဝ်ႈႁဝ်းၼႆႉသေၵမ်းၶႃႈ၊ ဝႃႈၼင်ႇၼႆဢေႃႈ။

32တႃႇဝိတ်ႈ ၵေႃႈလၢတ်ႈတီႈ ဢၽီႉၵေးလႃႉ လႄႈဝႃႈ၊ ႁႂ်ႈထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ ဢၼ်ပွႆႇၸႂ်ႉမႂ်းမႃးႁႂ်ႈလႆႈထူပ်းႁၼ်ၵဝ်ဝၼ်းမိူဝ်ႈၼႆႉၼၼ်ႉ မီးမင်ႇၵလႃႇသေၵမ်းလူၺ်ႈ။-

33ၺၢၼ်ႇပိင်ႇၺႃႇမႂ်းၼၼ်ႉၵေႃႈ ႁႂ်ႈမီးမင်ႇၵလႃႇသေၵမ်းလူၺ်ႈ။ မႂ်းဢၼ်ႁႄႉၶႅၼ်ၵဝ်ဝႆႉႁႂ်ႈၵဝ်ဢမ်ႇလႆႈႁွတ်ႈထိုင်တၢင်းဢၼ် ထုၵ်ႇဢပႅတ်ႈလူၺ်ႈလိူတ်ႈပိူၼ်ႈ ဢိၵ်ႇတင်းတၢင်းဢၼ်ဢဝ်မိုဝ်းၵဝ်ပႂ်ႉဢမူႉၵဝ်သေလႄႈ ပၼ်တၢမ်ႇဢပႅတ်ႈၼၼ်ႉဝၼ်းမိူဝ်ႈၼႆႉၼႆႉၵေႃႈ ႁႂ်ႈမီးမင်ႇၵလႃႇသေၵမ်းလူၺ်ႈ။-

34ၵႃႈၼင်ႇဢၼ်ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ ၊ ဢၼ်ႁႄႉၶႅၼ်ၵဝ်ႁႂ်ႈၵဝ်ဢမ်ႇလႆႈၼိၵ်ႈၸၢၵ်ႈငႅၼ်းသႄးမႂ်းၼၼ်ႉ ဢသၢၵ်ႈလိပ်းယူႇၼၼ်ႉ၊ သင်မႂ်းဢမ်ႇႁိပ်ႈၼႅတ်ႈလႄႈမႃးၶၼ်ၶၼ်ၽႂ်းၽႂ်းႁႂ်ႈလႆႈႁူပ်ႉထူပ်းၵဝ်ၸိုင်၊ မိူဝ်ႈၽုၵ်ႈၶိင်ႇၵၢင်ၼႂ် မိူဝ်ႈဢၼ်မိူင်းလႅင်းၼၼ်ႉ ၵဝ်တၵ်းဢမ်ႇဝႆႉၵိုတ်းဝႆႉၵျၢၼ်ႇၵူၼ်းၸၢႆးသေၵေႃႉသေၵူၼ်း တီႈ ၼႃႇပလႃႉ ၼၼ်ႉ ဢမၢၼ်ႇၶၼ်ပဵၼ်ယဝ်ႉ၊ ဝႃႈၼင်ႇၼႆသေလႄႈ၊-

35တႃႇဝိတ်ႈ ႁပ်ႉတုင်းဢဝ်လၢၵ်ႈသွင်ႇဢၼ်မၼ်းဢဝ်မႃးၼၼ်ႉလႄႈဝႃႈ၊ မႂ်းၶိုၼ်း ၶိုၼ်ႈမိူဝ်းၵႂႃႇၸူးၵႃႈတီႈႁိူၼ်းမႂ်းၼိမ်ၼိမ်လီလီတႃႉ။ တူၺ်းလူး၊ ၵဝ်ထွမ်ႇဢဝ်ၵႂၢမ်းမႂ်းယဝ်ႉ။ ၵဝ်ထွၵ်ႈလူၺ်ႈၼႃႈမႂ်းလႄႈယူႇယဝ်ႉ၊ ဝႃႈၼင်ႇၼႆဢေႃႈ။

36ဢၽီႉၵေးလႃႉ ၼၼ်ႉၵေႃႈ ၶိုၼ်းမိူဝ်းၵႂႃႇၸူးၵႃႈတီႈ ၼႃႇပလႃႉ လႄႈ မၼ်းၼၼ်ႉၶၢမ်ႇပွႆးမိူၼ်ၸိူဝ်ႉၼင်ႇ ပွႆးၶုၼ်ႁေႃၶမ်းၼၼ်ႉယူႇၵႃႈတီႈႁိူၼ်းမၼ်းလႄႈ ငိၼ်းသႂၢင်ႇငိၼ်းသိူဝ်းယူႇၵႃႈၼႂ်းၸႂ်မၼ်း ၵွပ်ႈပိူဝ်ႈဢၼ်မၼ်းမဝ်းလဝ်ႈၼၼ်ႉဢေႃႈ။ ပိူဝ်ႈၼႆလႄႈ ၸူဝ်ႈဢၼ်မိူင်းဢမ်ႇပႆႇလႅင်းၼၼ်ႉၸိုင် မေးမၼ်းဢမ်ႇမွၵ်ႇဢမ်ႇလၢတ်ႈတီႈမၼ်းလႃးလႃး။-

37မိူဝ်ႈဢၼ်မိူင်းလႅင်းလႄႈ ႁႅင်းၼမ်ႉၸပိတ်ႈသဵင်ႈသေၵႃႈၼႂ်း ၼႃႇပလႃႉ ၼၼ်ႉယဝ်ႉၼၼ်ႉၸိုင်၊ မေးမၼ်းမွၵ်ႇလၢတ်ႈလွင်ႈတၢင်းၸိူဝ်းၼၼ်ႉတီႈမၼ်းလႄႈ၊ ႁူဝ်ၸႂ်မၼ်းမူၺ်ႈလၢင်ႈတၢႆၵႂႃႇလႄႈ မၼ်းပဵၼ်ၸိူဝ်ႉၼင်ႇမၢၵ်ႇႁိၼ်ဝႆႉဢေႃႈ။-

38ပူၼ်ႉသေသိပ်းဝၼ်းၼိုင်ႈၸမ်ၸမ်သေယဝ်ႉ၊ ထႃႇဝရႃႉၽြႃးပၼ်တၢမ်ႇတီႈ ၼႃႇပလႃႉ ၼၼ်ႉလႄႈ မၼ်းၼၼ်ႉတၢႆသေဢေႃႈ။-

39မိူဝ်ႈဢၼ် တႃႇဝိတ်ႈ ငိၼ်းလွင်ႈဢၼ် ၼႃႇပလႃႉ တၢႆယဝ်ႉၼၼ်ႉၸိုင်၊ မၼ်းလၢတ်ႈလႄႈဝႃႈ၊ ႁႂ်ႈထႃႇဝရႃႉၽြႃး ဢၼ်ပႂ်ႉဢမူႉတၢင်းဢၼ်သႄႉဢၼ်သွမ်း ဢၼ်ၵဝ်လႆႈၶၢမ်ႇၼၼ်ႉလႄႈ ၼုၵ်ႈဢဝ်ၵဝ်ဢွၵ်ႇသေၵႃႈၼႂ်းမိုဝ်း ၼႃႇပလႃႉ လႄႈ ႁႄႉၶႅၼ်ၶႃႈမၼ်းၸဝ်ႈ ႁႂ်ႈဢမ်ႇလႆႈႁဵတ်းတူႉၸရိူၵ်ႈၼၼ်ႉမီးမင်ႇၵလႃႇသေၵမ်းလူၺ်ႈ။ ထႃႇဝရႃႉၽြႃးၼၼ်ႉ ႁႂ်ႈတူႉၸရိူၵ်ႈဢၼ် ၼႃႇပလႃႉ ႁဵတ်းၼၼ်ႉ ၶိုၼ်းႁွတ်ႈထိုင်ၵႃႈၼိူဝ်ႁူဝ်မၼ်းယဝ်ႉ၊ ဝႃႈၼင်ႇၼႆဢေႃႈ။ လႆႈသမ်ႉ တႃႇဝိတ်ႈ ပွႆႇၸႂ်ႉၵႂႃႇလႄႈတွင်ႈထၢမ် ဢၽီႉၵေးလႃႉ ႁႂ်ႈလႆႈႁူမ်ႈပွင်းပဵၼ်ၵူပ်ႉပဵၼ်ၵူႈလူၺ်ႈၵၼ်တင်းမၼ်းဢေႃႈ။-

40မိူဝ်ႈဢၼ်ၶႃႈ တႃႇဝိတ်ႈ ၸိူဝ်းၼၼ်ႉ ႁွတ်ႈထိုင်ၵႃႈတီႈ ဢၽီႉၵေးလႃႉ ၵႃႈတီႈဝဵင်း ၵရမေႇလႃႉ ၼၼ်ႉၸိုင်၊ ၶဝ်ၼၼ်ႉလၢတ်ႈတီႈမၼ်းလႄႈဝႃႈ၊ တႃႇဝိတ်ႈ ပွႆႇၸႂ်ႉႁဝ်းၶႃႈမႃး ႁႂ်ႈလႆႈဢဝ်ၸဝ်ႈၼၢင်းႁဝ်း ႁူမ်ႈပွင်းပဵၼ်ၵူပ်ႉပဵၼ်ၵူႈလူၺ်ႈၵၼ်တင်းမၼ်းၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

41မၼ်းၼၼ်ႉလုၵ်ႉလႄႈၶုပ်ႉမူပ်ႇၵႃႈၼိူဝ်လိၼ်ယူႇသေလႄႈဝႃႈ၊ ႁႂ်ႈၶႃႈမႄႈယိင်းၸဝ်ႈၼႆႉ လႆႈပဵၼ်ၶႃႈဢၼ်သုၵ်ႈတိၼ်ၶႃႈၸဝ်ႈၵဝ်ၶႃႈၼၼ်ႉၸိူဝ်းၼၼ်ႉသေၵမ်းလူၺ်ႈ၊ ဝႃႈၼင်ႇၼႆသေလႄႈ၊-

42ဢၽီႉၵေးလႃႉ ၼၼ်ႉ ႁိပ်ႈၼႅတ်ႈလုၵ်ႉလႄႈ ပႃးဢဝ်ၶႃႈမႄႈယိင်းမၼ်းဢၼ်ၸွမ်းလင်မၼ်းၼၼ်ႉ ႁႃႈၵေႃႉသေလႄႈ ၶီႇလီႈ၊ ၸွမ်းလူၺ်ႈၵၼ်တင်းၵူၼ်းၸႂ်ႉၵူၼ်းသွႆ ဢၼ် တႃႇဝိတ်ႈ ပွႆႇၸႂ်ႉၸိူဝ်းၼၼ်ႉၵႂႃႇလႄႈ ပဵၼ်မေး တႃႇဝိတ်ႈ ဢေႃႈ။-

43ဢႁီႉၼွင်ႇ ၵူၼ်းယိင်းဝဵင်း ယေႇၸရေႇလႃႉ ၼၼ်ႉၵေႃႈ တႃႇဝိတ်ႈ သိမ်းဢဝ်လႄႈ သွင်ၶႃၼၼ်ႉပဵၼ်မေးမၼ်းဢေႃႈ။-

44သေႃးလူႉ ၼၼ်ႉ ဢဝ် မီႉၶႃႇလႃႉ မေး တႃႇဝိတ်ႈ ဢၼ်ပဵၼ်လုၵ်ႈယိင်းတူဝ်ၸဝ်ႈၵဝ်ႇၼၼ်ႉ ပၼ်ၵၼ်တင်း ၽႃႇလတီႉ လုၵ်ႈၸၢႆး လေႇသႃႉ ဢၼ်ပဵၼ်ၵူၼ်းဝဵင်း ၵႃႇလိမ်း ၼၼ်ႉယဝ်ႉ။