1 Samuel 9

Shan

← Chapter 8 Jump to: Chapter 10 →

1မိူဝ်ႈၼၼ်ႉ မီးၵူၼ်းမဵဝ်း ပိၼ်ႇယႃႇမိၼ်ႇ ဢၼ်လႆႈၸိုဝ်ႈ ၵီႉသႃႉ ဢၼ်ပဵၼ်လုၵ်ႈၸၢႆး ဢပျေႇလႃႉ ၊ ဢၼ်ပဵၼ်လုၵ်ႈၸၢႆး ၸေႇရေႃႇ ၊ ဢၼ်ပဵၼ်လုၵ်ႈၸၢႆး ပေႇၶေႃႇရတ်ႉ ၊ ဢၼ်ပဵၼ်လုၵ်ႈၸၢႆး ဢႃႇၽီႉ ၵူၼ်းမဵဝ်း ပိၼ်ႇယႃႇမိၼ်ႇ ၼၼ်ႉၵေႃႉၼိုင်ႈဢေႃႈ။ မၼ်းၼၼ်ႉပဵၼ်ၵေႃႉဢၼ်မၢၵ်ႈမီးဢုၵ်ႉၸႃႇၼမ်ၼႃႇလူင်လၢင်ဢေႃႈ။-

2မၼ်းၼၼ်ႉမီးလုၵ်ႈၸၢႆးဢၼ်လႆႈၸိုဝ်ႈ သေႃးလူႉ ဢၼ်ပဵၼ်ၵေႃႉဢၼ်ႁၢင်ႈလီလႄႈ လၢၵ်ႇလၢႆးၼၼ်ႉၵေႃႉၼိုင်ႈဢေႃႈ။ ၼႂ်းၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉ၊ ၵေႃႉဢၼ်ႁၢင်ႈလီၼႃႇသေၵေႃႉၼၼ်ႉဢမ်ႇမီးသေၵေႃႉသေၵူၼ်း။ ဢဝ်ၵႃႈတီႈႁူဝ်မႃႇမၼ်းၶိုၼ်ႈၵႃႈၼိူဝ်ၼၼ်ႉၵေႃႉၼၼ်ႉ သုင်ပူၼ်ႉသေၵူၼ်းတင်းသဵင်ႈတင်းလူင်ဢေႃႈ။-

3ၵွပ်ႈပိူဝ်ႈဢၼ်ၽုင်လီႈ ၵီႉသႃႉ ပေႃႈ သေႃးလူႉ ၼၼ်ႉ ႁၢႆၵႂႃႇလႄႈ ၵီႉသႃႉ လၢတ်ႈတီႈလုၵ်ႈၸၢႆးမၼ်း သေႃးလူႉ လႄႈဝႃႈ၊ မႂ်းႁွင်ႉဢဝ်ၵူၼ်းဢွၼ်ႇၵေႃႉၼိုင်ႈသေလႄႈ လုၵ်ႉလႄႈၵႂႃႇၸွမ်းႁႃလီႈၸိူဝ်းၼၼ်ႉတႃႉ၊ ဝႃႈၼင်ႇၼႆလႄႈ၊-

4မၼ်းၼၼ်ႉ လႄႇႁႃၵႃႈၼိူဝ်ႁၢၼ်ႉလွႆ ဢေႇၽရိမ်ႇ ဢိၵ်ႇတင်းၵႃႈတီႈမိူင်း သႃႇလီႉသႃႉ ၵူႈတီႈၵူႈလႅၼ်လႄႈ ဢမ်ႇထူပ်းဢမ်ႇႁၼ်သေယဝ်ႉ၊ ၶဝ်သမ်ႉလႄႇႁႃၵႃႈတီႈမိူင်း သႃႇလိမ်း လႄႈ ဢမ်ႇထူပ်းဢမ်ႇႁၼ်။ လႆႈသမ်ႉ မၼ်းၼၼ်ႉလႄႇႁႃၵႃႈတီႈမိူင်း ပိၼ်ႇယႃႇမိၼ်ႇ ၵူႈတီႈၵူႈလႅၼ်သေၵေႃႈ ဢမ်ႇထူပ်းဢမ်ႇႁၼ်။-

5မိူဝ်ႈဢၼ်ၶဝ်ႁွတ်ႈထိုင်ၵႃႈတီႈမိူင်း ၸူႉၽႃႉ ၼၼ်ႉၸိုင်၊ သေႃးလူႉ လၢတ်ႈတီႈၵူၼ်းဢွၼ်ႇမၼ်းလႄႈဝႃႈ၊ ၶိုၼ်းမိူဝ်းတႃႉႁဝ်း။ ပေႃးဢမ်ႇၼၼ် ပေႃႈႁဝ်းၼၼ်ႉဢမ်ႇမႆႈၸႂ်ၵွပ်ႈပိူဝ်ႈလီႈၸိူဝ်းၼၼ်ႉလႄႈ၊ တၵ်းမႆႈၸႂ်ၵွပ်ႈပိူဝ်ႈႁဝ်းဢေႃႈ၊ ဝႃႈၼင်ႇၼႆသေယဝ်ႉ၊-

6ၵူၼ်းဢွၼ်ႇမၼ်းလၢတ်ႈလႄႈဝႃႈ၊ တူၺ်းၶႃႈလူး၊ ၵႃႈတီႈဝဵင်းၼႆႉ မီးၵူၼ်းၽြႃးပဵၼ်ၸဝ်ႈ ဢၼ်မီးသရေႇၼႃႈတႃႁူင်ႁၢင်းၵေႃႉၼိုင်ႈဢေႃႈ၊ ၵႂၢမ်းၵႃႈဢၼ်မၼ်းၼၼ်ႉလၢတ်ႈၼၼ်ႉ ၸၢင်ႈပျေႉၸုမ်ႇဢမၢၼ်ႇၶၼ်ပဵၼ်ဢေႃႈ။ ၵႂႃႇၵႃႈတီႈမၼ်းတႃႉႁဝ်း။ မၼ်းၸၢင်ႈၶႄးတၵ်းၼႄပၼ်သဵၼ်ႈတၢင်းဢၼ်ႁဝ်းတၵ်းလႆႈၵႂႃႇၼၼ်ႉဢေႃႈ၊ ဝႃႈၼင်ႇၼႆဢေႃႈ။-

7သေႃးလူႉ ၵေႃႈထၢမ်တီႈၵူၼ်းဢွၼ်ႇမၼ်းလႄႈဝႃႈ၊ ပေႃးႁဝ်းၵႂႃႇၸိုင် တၵ်းလႆႈဢဝ်ၵႃႈသင်လူႇတၢၼ်း။ ၶဝ်ႈမုၼ်းဢၼ်ပႃးမႃးၵႃႈၼႂ်းၶွင်ႁဝ်းၼၼ်ႉသဵင်ႈၵႂႃႇယဝ်ႉ။ တၢင်းလူႇတၢင်းတၢၼ်းဢၼ်တၵ်းလႆႈလူႇတၢၼ်းတီႈ ၵူၼ်းၽြႃးပဵၼ်ၸဝ်ႈၼၼ်ႉဢမ်ႇမီးသေၸိူဝ်ႉသေပိူင်။ တီႈႁဝ်းယင်းမီးၵႃႈသင် မိူဝ်ႈဢၼ်ဝႃႈၼင်ႇၼႆၸိုင်၊-

8ၵူၼ်းဢွၼ်ႇၼၼ်ႉၵေႃႈ ၶိုၼ်းလၢတ်ႈတီႈ သေႃးလူႉ လႄႈဝႃႈ၊ တူၺ်းၶႃႈလူး၊ ၼႂ်းမိုဝ်းၵဝ်ၶႃႈၼႆႉ ယင်းမီးငိုၼ်းမၢတ်ႈၼိုင်ႈၶႃႈဢေႃႈ။ တၵ်းဢဝ်ဢၼ်ၼၼ်ႉပၼ်တီႈၵူၼ်းၽြႃးပဵၼ်ၸဝ်ႈ ပုၼ်ႈဢၼ်မၼ်းၼႄပၼ်သဵၼ်ႈတၢင်းတီႈႁဝ်းၶႃႈၼၼ်ႉဢေႃႈ၊ ဝႃႈၼင်ႇၼႆဢေႃႈ။-

9မိူဝ်ႈၵွၼ်ႇဢွၼ်ၼႆႉၼၼ်ႉ၊ ၼႂ်းၵူၼ်းမဵဝ်း ဢီႉသရေႇလႃႉ တင်းလၢႆ ပေႃးသေၵေႃႉသေၵူၼ်းတၵ်းၵႂႃႇ ႁႂ်ႈလႆႈထၢမ်တီႈၽြႃးပဵၼ်ၸဝ်ႈၸိုင်၊ မၼ်းၸၢင်ႈဝႃႈ၊ ၵႂႃႇၵႃႈတီႈၵူၼ်းဢၼ်ႁၼ်ၼၼ်ႉတႃႉႁဝ်း၊ ဝႃႈၼင်ႇၼႆဢေႃႈ။ ၵေႃႉဢၼ်လႆႈၶၢမ်ႇတၢင်းဢၼ်ႁွင်ႉႁဵၵ်ႈၸိုဝ်ႈ ပရေႃးၽႅတ်ႈတေႃႈလဵဝ်ၼႆႉၼၼ်ႉ လႆႈၶၢမ်ႇတၢင်းဢၼ်ႁွင်ႉႁဵၵ်ႈၸိုဝ်ႈ ၵူၼ်းဢၼ်ႁၼ်မိူဝ်ႈၵွၼ်ႇဢွၼ်ၼႆႉၼၼ်ႉဢေႃႈ။-

10သေႃးလူႉ ၵေႃႈလၢတ်ႈတီႈၵူၼ်းဢွၼ်ႇမၼ်းလႄႈဝႃႈ၊ လီယဝ်ႉ၊ ၵႂႃႇတႃႉႁဝ်း၊ ဝႃႈၼင်ႇၼႆသေလႄႈ ဢွၼ်ၵၼ်ၵႂႃႇၸူးၵႃႈတီႈဝဵင်း တီႈဢၼ်ၵူၼ်းၽြႃးပဵၼ်ၸဝ်ႈမီးၼၼ်ႉဢေႃႈ။-

11ၼႂ်းမိူဝ်ႈဢၼ်သွင်ၶႃယင်းတိုၵ်ႉၶိုၼ်ႈၵႂႃႇၵႃႈၼိူဝ်ၵုင်းၼွၵ်ႈဝဵင်းယူႇၼၼ်ႉၸိုင်၊ ၶဝ်ထူပ်းႁၼ်မႄႈယိင်းသၢဝ်တင်းလၢႆဢွၵ်ႇမႃး ႁႂ်ႈလႆႈတဵၵ်းၼမ်ႉလႄႈ ထၢမ်တီႈၶဝ်ၼၼ်ႉလႄႈဝႃႈ၊ ၵႃႈတီႈၼႆႈမီးၵူၼ်းဢၼ်ႁၼ်ႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

12ၶဝ်ဢွၼ်ၵၼ်ၶိုၼ်းလၢတ်ႈလႄႈဝႃႈ၊ မီးၶႃႈဢေႃႈ။ မၼ်းမႃးမီးယူႇဢွၼ်တၢင်းသူၸဝ်ႈၶႃႈဢေႃႈ။ ၵႂႃႇၶၼ်ၶၼ်ၽႂ်းၽႂ်းတႃႉ။ မၼ်းႁွတ်ႈမႃးၵႃႈတီႈဝဵင်းၼႆႉဝၼ်းမိူဝ်ႈၼႆႉယဝ်ႉ။ ၵူၼ်းတင်းလၢႆဢဝ်ပွႆးယိတ်ႈၶိုၼ်ႈၵႃႈၼိူဝ်ထႃႇၼႃႉတီႈသုင်ဝၼ်းမိူဝ်ႈၼႆႉၶႃႈဢေႃႈ။-

13ပေႃးသူၸဝ်ႈၶဝ်ႈၵႃႈၼႂ်းဝဵင်းၸိုင်၊ သူၸဝ်ႈတၵ်းထူပ်းႁၼ်မၼ်းၵမ်းလဵဝ် ၸူဝ်ႈဢၼ်မၼ်းဢမ်ႇပႆႇၶိုၼ်ႈၵႃႈၼိူဝ်ထႃႇၼႃႉတီႈသုင် ႁႂ်ႈလႆႈၵိၼ်ၼၼ်ႉဢေႃႈ။ ၸူဝ်ႈဢၼ်မၼ်းဢမ်ႇပႆႇႁွတ်ႈထိုင်ၼၼ်ႉၸိုင်၊ ၵူၼ်းတင်းလၢႆဢမ်ႇၸၢင်ႈၵိၼ် ၵွပ်ႈပိူဝ်ႈဢၼ်မၼ်းၸၢင်ႈပၼ်တၢင်းလီ ၼႂ်းပွႆးယိတ်ႈၼၼ်ႉဢေႃႈ။ လိုၼ်းၼၼ်ႉ ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ႁွင်ႉပၢင်းၼၼ်ႉၸင်ႇၵိၼ်ဢေႃႈ။ ပိူဝ်ႈၼႆလႄႈ တေႃႈလဵဝ်ၼႆႉ သူၸဝ်ႈၵႂႃႇၸူးတႃႉ။ သူၸဝ်ႈတၵ်းထူပ်းႁၼ်မၼ်းၵမ်းလဵဝ်ဢေႃႈ၊ ဝႃႈၼင်ႇၼႆသေယဝ်ႉ၊-

14သွင်ၶႃၼၼ်ႉ ၶိုၼ်ႈၸူးၵႃႈတီႈဝဵင်းလႄႈ ၶဝ်ႈၵႃႈၼႂ်းဝဵင်းသေယဝ်ႉ၊ သမူၺ်ႇလႃႉ ၼၼ်ႉဢွၵ်ႇမႃးႁပ်ႉဢဝ်သွင်ၶႃ ႁႂ်ႈလႆႈၶိုၼ်ႈၵႃႈၼိူဝ်ထႃႇၼႃႉတီႈသုင်ၼၼ်ႉဢေႃႈ။

15ဝၼ်းမိူဝ်ႈဝႃးၼၼ်ႉ ၸူဝ်ႈဢၼ် သေႃးလူႉ ဢမ်ႇပႆႇႁွတ်ႈထိုင်ၼၼ်ႉၸိုင်၊ ထႃႇဝရႃႉၽြႃးမီးဢမိင်ႉထိုင်ႁူ သမူၺ်ႇလႃႉ ဝႆႉလႄႈဝႃႈ၊-

16ဝၼ်းမိူဝ်ႈၽုၵ်ႈၶိင်ႇၼႆႉ ၵဝ်တၵ်းပွႆႇၸႂ်ႉၵူၼ်းၵေႃႉၼိုင်ႈ လုၵ်ႉသေၵႃႈတီႈမိူင်း ပိၼ်ႇယႃႇမိၼ်ႇ မႃးၸူးၵႃႈတီႈမႂ်းဢေႃႈ။ မႂ်းတၵ်းလႆႈပၼ်ၽိၵ်ႈသိၵ်ႈတၢင်းဢၼ်ႁူတ်းၼမ်ႉမၼ်းတီႈမၼ်းၼၼ်ႉလႄႈ ၶၢၼ်းမၼ်းဝႆႉၼႂ်းဢရႃႇၶုၼ်ၵူၼ်းၵဝ်မဵဝ်း ဢီႉသရေႇလႃႉ ဢေႃႈ။ မၼ်းၼၼ်ႉ တၵ်းလႆႈၵႄႇသႄႇၼုၵ်ႈဢဝ်ၵူၼ်းၵဝ်တင်းလၢႆ လွတ်ႈသေၵႃႈၼႂ်းမိုဝ်းၵူၼ်း ၽီႉလိတ်ႉတီႉ ၸိူဝ်းၼၼ်ႉဢေႃႈ။ လွင်ႈမၼ်းၸမ်ႉ ၵဝ်လူတူၺ်းၵူၼ်းၵဝ်တင်းလၢႆ ၵွပ်ႈပိူဝ်ႈဢၼ်သဵင်ဢၼ် ၶဝ်ႁွင်ႉသႅၼ်ႇၼၼ်ႉ ႁွတ်ႈထိုင်ၵႃႈတီႈၵဝ်ၼၼ်ႉယဝ်ႉ၊ ဝႃႈၼင်ႇၼႆဢေႃႈ။-

17မိူဝ်ႈဢၼ် သမူၺ်ႇလႃႉ ႁၼ် သေႃးလူႉ ၼၼ်ႉၸိုင်၊ ထႃႇဝရႃႉၽြႃး မီးဢမိင်ႉတီႈမၼ်းလႄႈဝႃႈ၊ တူၺ်းၵေႃႉဢၼ်ၵဝ်လၢတ်ႈဝႆႉတီႈမႂ်းၼၼ်ႉတႃႉ။ ၵေႃႉၼႆႉတၵ်းလႆႈဢုပ်ႉပိူင်ႇၵူၼ်းၵဝ်တင်းလၢႆဢေႃႈ၊ ဝႃႈၼင်ႇၼႆဢေႃႈ။-

18မိူဝ်ႈၼၼ်ႉ သေႃးလူႉ သုတ်ႉၸပ်းသုတ်ႉၸူးၵႃႈတီႈ သမူၺ်ႇလႃႉ ၵႃႈၼႂ်းႁူးၽၵ်းတူၼၼ်ႉသေလႄႈတွင်ႈထၢမ်လႄႈဝႃႈ၊ ၶႅၼ်းတေႃႈၼႄပၼ်ႁိူၼ်း ၵေႃႉဢၼ်ႁၼ်ၼၼ်ႉသေၵမ်း၊ မိူဝ်ႈဢၼ်ဝႃႈၼင်ႇၼႆၸိုင်၊-

19သမူၺ်ႇလႃႉ ၶိုၼ်းလၢတ်ႈတီႈ သေႃးလူႉ လႄႈဝႃႈ၊ ၵဝ်ၼႆႉပဵၼ်ၵေႃႉဢၼ်ႁၼ်ဢေႃႈ။ ၶိုၼ်ႈၵႂႃႇထႃႈၵဝ်ၵႃႈၼိူဝ်ထႃႇၼႃႉတီႈသုင်ၼၼ်ႉ ဢွၼ်တၢင်းၵဝ်တႃႉ။ ဝၼ်းမိူဝ်ႈၼႆႉ မႂ်းတၵ်းလႆႈၵိၼ်လူၺ်ႈၵၼ်တင်းၵဝ်ဢေႃႈ။ ၼႂ်ၽုၵ်ႈ ၵဝ်ၸင်ႇတၵ်းပွႆႇမႂ်းၵႂႃႇလႄႈၽုၺ်ႇဢွၵ်ႇၼႄပျႃး ၵႃႈဢၼ်မီးၵႃႈၼႂ်းႁူဝ်ၸႂ်မႂ်းၼၼ်ႉဢေႃႈ။-

20လီႈမႂ်းဢၼ်ႁၢႆၵႂႃႇဝၼ်းမိူဝ်ႈသိုၼ်းၸိူဝ်းၼၼ်ႉၵေႃႈ ယႃႇပေၶုၵ်းၸႂ်လႆႈမႆႈၸႂ်ၵွပ်ႈထူပ်းႁၼ်ယဝ်ႉ။ လွင်ႈတၢင်းဢၼ်ထုၵ်ႇလီၶႂ်ႈလႆႈၵႃႈၼႂ်းမဵဝ်း ဢီႉသရေႇလႃႉ ၼႆႉ ၵႃႈမီးၼၼ်ႉ ပဵၼ်ပုၼ်ႈၽူႈလႂ်။ ပဵၼ်ပုၼ်ႈမႂ်းဢိၵ်ႇတင်းပီႈၼွင်ႉၸိူဝ်ႉၶိူဝ်းပေႃႈမႂ်းၵႃႈမီးၼၼ်ႉဢမ်ႇၸႂ်ႈႁိုဝ်။ ဝႃႈၼင်ႇၼႆဢေႃႈ။-

21သေႃးလူႉ ၵေႃႈၶိုၼ်းလဝ်ႊလၢတ်ႈလႄႈဝႃႈ၊ ၵဝ်ၶႃႈၼႆႉပဵၼ်မဵဝ်း ပိၼ်ႇယႃႇမိၼ်ႇ ၊ မဵဝ်းဢၼ်လဵၵ်ႉဢၼ်ၼွႆႉသေပိူၼ်ႈ ၵႃႈၼႂ်းမဵဝ်း ဢီႉသရေႇလႃႉ တင်းလၢႆဢမ်ႇၸႂ်ႈၶႃႈႁိုဝ်။ ပီႈၼွင်ႉၸိူဝ်ႉၶိူဝ်းၵဝ်ၶႃႈၼႆႉ ပဵၼ်ဢၼ်လဵၵ်ႉဢၼ်ၼွႆႉသေပိူၼ်ႈၵႃႈၼႂ်းပီႈၼွင်ႉၸိူဝ်ႉၶိူဝ်းၵႃႈဢၼ်ပဵၼ်ၵႃႈၼႂ်းမဵဝ်း ပိၼ်ႇယႃႇမိၼ်ႇ ၼၼ်ႉဢမ်ႇၸႂ်ႈၶႃႈႁိုဝ်။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းလၢတ်ႈတီႈၵဝ်ၶႃႈ ၸိူဝ်ႉၼင်ႇၼႆၼင်ႇႁိုဝ်ၶႃႈ၊ ဝႃႈၼင်ႇၼႆဢေႃႈ။-

22မိူဝ်ႈၼၼ်ႉ သမူၺ်ႇလႃႉ ႁွင်ႉဢဝ် သေႃးလူႉ ဢိၵ်ႇတင်းၵူၼ်းဢွၼ်ႇမၼ်းလႄႈ သႂၢင်းၶဝ်ႈၵႃႈၼႂ်းလုၵ်းၶႅၵ်ႇသေယဝ်ႉ၊ ႁႂ်ႈသွင်ၶႃၼင်ႈၵႃႈတီႈဢၼ်မျၢတ်ႈၼႃႇသေပိူၼ်ႈ ၵႃႈၼႂ်းၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ႁွင်ႉပၢင်းမႃး သၢမ်သိပ်းၵေႃႉၼၼ်ႉဢေႃႈ။-

23သမူၺ်ႇလႃႉ ႁွင်ႉဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ်ပွႆးၼၼ်ႉလႄႈဝႃႈ၊ ဢဝ်ပုၼ်ႈဢၼ်ၵဝ်ဢၢပ်ႈပၼ်ဝႆႉတီႈမႂ်းလႄႈ သင်ႇလၢတ်ႈဝႆႉတီႈမႂ်းလႄႈဝႃႈ၊ မႂ်းဢဝ်ဝႆႉၶေႃၶေႃတႃႉ၊ ဝႃႈၼင်ႇၼႆၼၼ်ႉမႃးတႃႉ၊ ဝႃႈၼင်ႇၼႆလႄႈ၊-

24ၵူၼ်းဢၼ်ပဵၼ်ၵႄႇပဵၼ်ႁူဝ်ပွႆးၼၼ်ႉ ဢဝ်ႁူဝ်မႃႇဢိၵ်ႇတင်းၸိူဝ်းဢၼ်သႂ်ႇဝႆႉၵႃႈၼိူဝ်မၼ်းၼၼ်ႉမႃးသေလႄႈ တမ်းပၼ်ၵႃႈတီႈၽၢႆႇၼႃႈ သေႃးလူႉ ဢေႃႈ။ သမူၺ်ႇလႃႉ ၵေႃႈ လၢတ်ႈလႄႈဝႃႈ၊ တူၺ်းၸိူဝ်းဢၼ်ဢဝ်ဝႆႉၵိုတ်းဝႆႉၵျၢၼ်ႇၼႆႉသေလႄႈ ဢဝ်ဝႆႉၵႃႈတီႈၽၢႆႇၼႃႈမႂ်းလႄႈၵိၼ်တႃႉ။ ဢဝ်သိမ်းဝႆႉယူႇပုၼ်ႈမႂ်း တေႃႇထိုင်ႁွတ်ႈမိူဝ်ႈလဵဝ်ၼႆႉၸွမ်းၵႃႈၼင်ႇဢၼ်ၵဝ်လၢတ်ႈလႄႈဝႃႈ၊ ၵဝ်ႁွင်ႉပၢင်းၵူၼ်းတင်းလၢႆဢေႃႈ၊ ဝႃႈၼင်ႇၼႆၼၼ်ႉယဝ်ႉ၊ ဝႃႈၼင်ႇၼႆသေလႄႈ ၼႂ်းဝၼ်းၼၼ်ႉ သေႃးလူႉ ၵိၼ်လူၺ်ႈၵၼ်တင်း သမူၺ်ႇလႃႉ ဢေႃႈ။-

25သွင်ၶႃဢွၼ်ၵၼ်လူင်းသေၵႃႈၼိူဝ်ထႃႇၼႃႉတီႈသုင်ၼၼ်ႉလႄႈ ၶဝ်ႈၵႃႈၼႂ်းဝဵင်းသေယဝ်ႉ၊ သမူၺ်ႇလႃႉ တင်း သေႃးလူႉ ၼၼ်ႉ လၢတ်ႈၵၼ်ၸႃၵၼ်ယူႇၵႃႈၼိူဝ်မုင်းႁိူၼ်းဢေႃႈ။

26သွင်ၶႃၼၼ်ႉ လုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈ မိူဝ်ႈဢၼ်မိူင်းလႅင်းၼၼ်ႉ၊ သမူၺ်ႇလႃႉ ႁွင်ႉၸူးတီႈ သေႃးလူႉ ၵႃႈၼိူဝ်မုင်းႁိူၼ်းသေလႄႈလၢတ်ႈလႄႈဝႃႈ၊ လုၵ်ႉတႃႉ။ ၵဝ်တၵ်းပွႆႇမႂ်းၵႂႃႇဢေႃႈ၊ ဝႃႈၼင်ႇၼႆသေယဝ်ႉ၊ သေႃးလူႉ လုၵ်ႉလႄႈ၊ သွင်ၶႃဢၼ်ဝႃႈမၼ်း ဢိၵ်ႇတင်း သမူၺ်ႇလႃႉ ၼၼ်ႉ ဢွၵ်ႇၵႂႃႇၵႃႈၼွၵ်ႈဢေႃႈ။-

27ၼႂ်းမိူဝ်ႈဢၼ်ၶဝ်ယင်းတိုၵ်ႉလူင်းၵႂႃႇ ၵႃႈတီႈႁိမ်းတီႈသုတ်းဝဵင်းယူႇၼၼ်ႉၸိုင် သမူၺ်ႇလႃႉ လၢတ်ႈတီႈ သေႃးလူႉ လႄႈဝႃႈ၊ လၢတ်ႈႁႂ်ႈၵူၼ်းဢွၼ်ႇမႂ်းၵႂႃႇဢွၼ်တၢင်းတႃႉ၊ ဝႃႈၼင်ႇၼႆလႄႈ ၵူၼ်းဢွၼ်ႇၼၼ်ႉၵႂႃႇဢွၼ်တၢင်းသေယဝ်ႉ၊ မၼ်းသမ်ႉလၢတ်ႈလႄႈဝႃႈ၊ ၸုၵ်းၵိုတ်းယူႇၵမ်းဢွၼ်ႇၼိုင်ႈ ႁႂ်ႈၵဝ်လႆႈမွၵ်ႇလၢတ်ႈဢမိင်ႉၽြႃးပဵၼ်ၸဝ်ႈတီႈမႂ်းတႃႉ၊ ဝႃႈၼင်ႇၼႆယူႇသေလႄႈ။

← Chapter 8 Jump to: Chapter 10 →