1 Samuel 24

Shan

← Chapter 23 Jump to: Chapter 25 →

1သေႃးလူႉ ၼၼ်ႉ လုၵ်ႉသေၵႃႈတီႈဢၼ်တိုၵ်းၵၼ်တင်းၵူၼ်း ၽီႉလိတ်ႉတီႉ ၸိူဝ်းၼၼ်ႉ ၶိုၼ်းမႃးသေယဝ်ႉ၊ ပိူၼ်ႈလဝ်ႊလၢတ်ႈလႄႈဝႃႈ၊ တူၺ်းတီႈၶႃႈလူး၊ တႃႇဝိတ်ႈ မီးယူႇၵႃႈၼႂ်းထိူၼ်ႇ ဢႅၼ်ႇၵေးတီႉ တီႈၶႃႈဢေႃႈ၊ ဝႃႈၼင်ႇၼႆလႄႈ၊-

2သေႃးလူႉ ႁွင်ႉဢဝ်ၵူၼ်းသၢမ်ႁဵင် ဢၼ်လိူၵ်ႈၵဵပ်းဢဝ်ၵႃႈၼႂ်းၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ၼၼ်ႉလႄႈ ၵႂႃႇႁႂ်ႈလႆႈႁႃ တႃႇဝိတ်ႈ ဢိၵ်ႇတင်းၵူၼ်းမၼ်းၸိူဝ်းၼၼ်ႉ ၵႃႈၼိူဝ်လွႆႁိၼ်လွႆၽႃတီႈဢၼ် ပႄႉထိူၼ်ႇယူႇၼၼ်ႉဢေႃႈ။-

3ႁွတ်ႈထိုင်ၵႃႈတီႈၶွၵ်ႈသူဝ်းဢၼ်မီးၵႃႈတီႈႁိမ်းသဵၼ်ႈတၢင်းတီႈဢၼ်မီးႁူးထမ်ႈၼၼ်ႉသေယဝ်ႉ၊ သေႃးလူႉ ၶဝ်ႈၵႂႃႇႁႂ်ႈလႆႈႁူမ်ႇသုမ်ႇတိၼ်ၸဝ်ႈလႄႈ၊ တႃႇဝိတ်ႈ ဢိၵ်ႇတင်းၵူၼ်းမၼ်းၸိူဝ်းၼၼ်ႉ မီးယူႇၵႃႈတီႈၽၢႆႇပဵမ်ႉၼႂ်းႁူးထမ်ႈၼၼ်ႉဢေႃႈ။-

4ၵူၼ်း တႃႇဝိတ်ႈ ၸိူဝ်းၼၼ်ႉလၢတ်ႈတီႈမၼ်းလႄႈဝႃႈ၊ တူၺ်းၶႃႈလူး၊ ဝၼ်းဢၼ်ထႃႇဝရႃႉၽြႃးမီးဢမိင်ႉလႄႈဝႃႈ၊ တူၺ်းလူး၊ ၵဝ်တၵ်းဢဝ်ရၢၼ်ႇသူႇမႂ်း ဢၢပ်ႈပၼ်ၵႃႈၼႂ်းမိုဝ်းမႂ်းလႄႈ၊ မႂ်းမီးဢၶႂၢင်ႉဢၼ်လႆႈႁဵတ်းတီႈမၼ်း ၸွမ်းၵႃႈၼင်ႇဢၼ်မႂ်းၶႂ်ႈႁဵတ်းဢေႃႈ၊ ဝႃႈၼင်ႇၼႆတီႈၸဝ်ႈႁဝ်းၼၼ်ႉ ႁွတ်ႈထိုင်ၶႃႈယဝ်ႉ၊ ဝႃႈၼင်ႇၼႆသေယဝ်ႉ၊ တႃႇဝိတ်ႈ လုၵ်ႉလႄႈတဵတ်ႇတဵတ်ႇထိူဝ်တႅပ်းဢဝ်သိူဝ်ႈယၢဝ်း သေႃးလူႉ ၼၼ်ႉပွတ်းၼိုင်ႈဢေႃႈ။-

5လိုၼ်းၼၼ်ႉ တႃႇဝိတ်ႈ ၼႅင်ၸႂ် ၵွပ်ႈပိူဝ်ႈဢၼ်ထိူဝ်တႅပ်းဢဝ်သိူဝ်ႈ သေႃးလူႉ ၸိူဝ်ႉၼင်ႇၼၼ်ၼၼ်ႉလႄႈ၊-

6လၢတ်ႈတီႈၵူၼ်းမၼ်းၸိူဝ်းၼၼ်ႉလႄႈဝႃႈ၊ ႁႂ်ႈထႃႇဝရႃႉၽြႃးႁၢမ်ႈတၢပ်ႈႁႄႉၶႅၼ်ဢမူႉလွင်ႈတၢင်းဢၼ် ႁဵတ်းဢမူႉၸိူဝ်ႉၼင်ႇၼႆတီႈၸဝ်ႈၵဝ် ဢၼ်ပဵၼ်ၵေႃႉဢၼ်လႆႈၶၢမ်ႇၽိၵ်ႈသိၵ်ႈ ဢၼ်ထႃႇဝရႃႉၽြႃးပၼ်ၼၼ်ႉ ဢၼ်ဝႃႈလွင်ႈတၢင်းဢၼ်ယဵတ်ႇမိုဝ်းၵဝ်သေလႄႈ တိူဝ်ႉထုၵ်ႇၸဝ်ႈၼၼ်ႉ ဢၼ်ပဵၼ်ၵေႃႉဢၼ်လႆႈၶၢမ်ႇၽိၵ်ႈသိၵ်ႈ ဢၼ်ထႃႇဝရႃႉၽြႃးပၼ်ၼၼ်ႉသေၵမ်းလူၺ်ႈ၊ ဝႃႈၼင်ႇၼႆဢေႃႈ။-

7ၼင်ႇၼၼ်လႄႈ တႃႇဝိတ်ႈ ဢဝ်ၵႂၢမ်းၸိူဝ်းၼႆႉ ႁႄႉၶႅၼ်ၵူၼ်းမၼ်းၸိူဝ်းၼၼ်ႉလႄႈ ဢမ်ႇပၼ်ဢၶႂၢင်ႉဢၼ်ၶဝ်လႆႈတိူဝ်ႉထုၵ်ႇ သေႃးလူႉ ၼၼ်ႉသေယဝ်ႉ၊ သေႃးလူႉ ၼၼ်ႉလႆႈလုၵ်ႉလႄႈဢွၵ်ႇသေၵႃႈၼႂ်းႁူးထမ်ႈၼၼ်ႉၵႂႃႇဢေႃႈ။

8လိုၼ်းၼၼ်ႉ တႃႇဝိတ်ႈ ၵေႃႈလုၵ်ႉလႄႈဢွၵ်ႇၵႃႈၼႂ်းႁူးထမ်ႈၼၼ်ႉသေလႄႈ ႁွင်ႉသႅၼ်ႇၸွမ်းလင် သေႃးလူႉ လႄႈဝႃႈ၊ ၸဝ်ႈၶုၼ်လူင်ပဵၼ်ၸဝ်ႈတီႈၶႃႈ၊ ဝႃႈၼင်ႇၼႆသေယဝ်ႉ၊ မိူဝ်ႈဢၼ် သေႃးလူႉ ဝၢႆႇတူၺ်းၶိုၼ်းတၢင်းလင်ၼၼ်ႉၸိုင်၊ တႃႇဝိတ်ႈ ၵူမ်ႈႁူဝ်ၵႃႈတီႈလိၼ်လႄႈ ၶုပ်ႉမူပ်ႇယူႇသေလႄႈ၊ တႃႇဝိတ်ႈ လဝ်ႊလၢတ်ႈတီႈ သေႃးလူႉ လႄႈဝႃႈ၊-

9ႁဵတ်းသင်လႄႈထွမ်ႇဢဝ်ၵႂၢမ်းဢၼ်ၵူၼ်းၵမ်ႈၽွင်ႈလဝ်ႊလၢတ်ႈလႄႈဝႃႈ၊ တႃႇဝိတ်ႈ ၵျၢမ်ႇႁႃႁႂ်ႈလႆႈယႃႉဢၵျူဝ်းၸဝ်ႈႁဝ်းတီႈၶႃႈဢေႃႈ၊ ဝႃႈၼင်ႇၼႆၼၼ်ႉၼင်ႇႁိုဝ်တီႈၶႃႈ၊-

10တူၺ်းတီႈၶႃႈလူး၊ မၢၵ်ႇတႃၸဝ်ႈႁဝ်းလႆႈႁၼ်လွင်ႈဢၼ်ထႃႇဝရႃႉၽြႃး ဢဝ်ၸဝ်ႈႁဝ်းဢၢပ်ႈပၼ်ၵႃႈၼႂ်းမိုဝ်းၶႃႈၸဝ်ႈ ၵႃႈၼႂ်းႁူးထမ်ႈၼႆႉ ၼႂ်းဝၼ်းမိူဝ်ႈၼႆႉၼၼ်ႉယဝ်ႉတီႈၶႃႈဢေႃႈ။ ပိၵ်ႉသမ်ႉၵမ်ႈၽွင်ႈတိုၵ်းယူင်းႁႂ်ႈၶႃႈၸဝ်ႈ ဢဝ်ဢသၢၵ်ႈၸဝ်ႈႁဝ်းတၢႆသေၵေႃႈ၊ ၶႃႈၸဝ်ႈမီးၸႂ်ဢၼ်သေလၢႆလႄႈဝႃႈ၊ ၵဝ်တၵ်းဢမ်ႇယဵတ်ႇမိုဝ်းၵဝ်ႁႂ်ႈလႆႈတိူဝ်ႉထုၵ်ႇၸဝ်ႈၵဝ် ၵွပ်ႈပိူဝ်ႈဢၼ်ၸဝ်ႈၵဝ်ပဵၼ်ၵေႃႉဢၼ် ထႃႇဝရႃႉၽြႃးပၼ်ၽိၵ်ႈသိၵ်ႈၼၼ်ႉၵူၺ်း၊ ဝႃႈၼင်ႇၼႆတီႈၶႃႈဢေႃႈ။-

11လိူဝ်သေၼၼ်ႉ၊ ၸဝ်ႈပေႃႈတီႈၶႃႈဢိူၺ်း၊ လူတူၺ်းသေၵမ်းတီႈၶႃႈ၊ လူတူၺ်းသိူဝ်ႈယၢဝ်းၸဝ်ႈႁဝ်းပွတ်းၼိုင်ႈ ၵႃႈၼႂ်းမိုဝ်းၶႃႈၸဝ်ႈၼႆႉသေၵမ်းတီႈၶႃႈ၊ ၵွပ်ႈပိူဝ်ႈဢၼ်ၶႃႈၸဝ်ႈယင်းဢမ်ႇဢဝ်ဢသၢၵ်ႈၸဝ်ႈႁဝ်းတၢႆလႄႈ ႁဵတ်းတၢင်းဢၼ်ထိူဝ်တႅပ်းသိူဝ်ႈယၢဝ်းပွတ်းၼိုင်ႈၼႆႉၵူၺ်းလႄႈ ၶႅၼ်းတေႃႈႁူႉႁၼ်လွင်ႈဢၼ်ဢမ်ႇမီးဢပႅတ်ႈတူႉၸရိူၵ်ႈ၊ ဢမ်ႇမီးဢပႅတ်ႈတၢင်းဢၼ်ပူၼ်ႉလိူဝ် ႁဵတ်းမႅၼ်ႈၵႃႈၼႂ်းမိုဝ်းၶႃႈၸဝ်ႈၼႆၼၼ်ႉသေၵမ်းတီႈၶႃႈ၊ ၶႃႈၸဝ်ႈဢမ်ႇၽိတ်းပိူင်ႈၸဝ်ႈႁဝ်းတီႈၶႃႈ၊ ၼႂ်းဝႃႈၼၼ်သေၵေႃႈ ၸဝ်ႈႁဝ်းၸွမ်းလႄႈ ႁႃႁႂ်ႈလႆႈဢဝ်ဢသၢၵ်ႈၶႃႈၸဝ်ႈတၢႆတီႈၶႃႈလူင်ပႄႇ။-

12ႁႂ်ႈထႃႇဝရႃႉၽြႃးၸီႇယၢင်ႇဝူင်ႈၵၢင်ၶႃႈၸဝ်ႈ တင်းၸဝ်ႈႁဝ်းသေၵမ်းလူၺ်ႈ။ ႁႂ်ႈထႃႇဝရႃႉၽြႃး တွပ်ႇတႅၼ်းပၼ်ဢပႅတ်ႈဢၼ်ၽိတ်းပိူင်ႈတီႈၶႃႈၸဝ်ႈၼၼ်ႉသေၵမ်းလူၺ်ႈ။ ၼႂ်းဝႃႈၼၼ်သေၵေႃႈ မိုဝ်းၶႃႈၸဝ်ႈၼႆႉ တၵ်းဢမ်ႇလႆႈႁွတ်ႈထိုင်ၵႃႈၼိူဝ်ၸဝ်ႈႁဝ်းတီႈၶႃႈ၊-

13ၵႃႈၼင်ႇဢၼ်ၵႂၢမ်းဢပုမ်ႇမိူဝ်ႈၵွၼ်ႇမီးမႃးၼၼ်ႉ၊ လွင်ႈတၢင်းဢၼ်ႁၢႆႉမိူၵ်ႈၸိုင် ဢွၵ်ႇၵႃႈၼႂ်းၵေႃႉဢၼ်ႁၢႆႉမိူၵ်ႈၼၼ်ႉမႃးဢေႃႈ၊ ဝႃႈၼင်ႇၼႆတီႈၶႃႈဢေႃႈ။ ၼႂ်းဝႃႈၼၼ်သေၵေႃႈ မိုဝ်းၶႃႈၸဝ်ႈၼႆႉတၵ်းဢမ်ႇလႆႈႁွတ်ႈထိုင်ၵႃႈၼိူဝ်ၸဝ်ႈႁဝ်းတီႈၶႃႈ၊-

14ၶုၼ်ႁေႃၶမ်း ဢီႉသရေႇလႃႉ ဢွၵ်ႇမႃးၸွမ်းႁႃၽူႈလႂ်တီႈၶႃႈ၊ ၸဝ်ႈႁဝ်းၸွမ်းႁႃတူဝ်တၢႆမႃတီႈၶႃႈႁိုဝ်။ ၸဝ်ႈႁဝ်းၸွမ်းႁႃမတ်းတီႈၶႃႈႁိုဝ်။-

15ပိူဝ်ႈဢၼ်ပဵၼ်ၼင်ႇၼႆလႄႈ ႁႂ်ႈထႃႇဝရႃႉၽြႃးႁဵတ်းၵေႃႉဢၼ်ၸီႇယၢင်ႇတြႃးသေၵမ်းလူၺ်ႈ။ ႁႂ်ႈမၼ်းၸဝ်ႈၸီႇယၢင်ႇတႅပ်းတတ်းဝူင်ႈၵၢင်ၶႃႈၸဝ်ႈ တင်းၸဝ်ႈႁဝ်းသေၵမ်းလူၺ်ႈ။ ႁႂ်ႈမၼ်းၸဝ်ႈလူတူၺ်းလႄႈ ပႂ်ႉဢမူႉၶႃႈၸဝ်ႈယူႇသေလႄႈ ၵႄႇသႄႇဢဝ်ၶႃႈၸဝ်ႈ လွတ်ႈသေၵႃႈၼႂ်းမိုဝ်းၸဝ်ႈႁဝ်းသေၵမ်းလူၺ်ႈတီႈၶႃႈ၊ ဝႃႈၼင်ႇၼႆဢေႃႈ။-

16တႃႇဝိတ်ႈ လဝ်ႊလၢတ်ႈတီႈ သေႃးလူႉ ၸိူဝ်ႉၼင်ႇၼၼ်ယဝ်ႉတူဝ်ႈယဝ်ႉလႄႈ၊ သေႃးလူႉ ထၢမ်လႄႈဝႃႈ၊ လုၵ်ႈၸၢႆးၵဝ် တႃႇဝိတ်ႈ ဢိူၺ်း၊ ဢၼ်ၼႆႉပဵၼ်သဵင်ၵႂၢမ်းမႂ်းႁိုဝ်။ ဝႃႈၼင်ႇၼႆသေလႄႈ သေႃးလူႉ ၵိဝ်သဵင်လႄႈႁွင်ႉႁႆႈဢေႃႈ။-

17လႆႈသမ်ႉ မၼ်းလၢတ်ႈတီႈ တႃႇဝိတ်ႈ လႄႈဝႃႈ၊ မႂ်းယဵင်ႈၶႅၼ်းပႂ်ႉၸွမ်းတြႃးၼႃႇသေၵဝ်ဢေႃႈ။ ပိၵ်ႉသမ်ႉ ၵဝ်ယႃႉဢၵျူဝ်းမႂ်းသေၵေႃႈ၊ မႂ်းၸိုင်ပွင်ႁဵတ်းဢၵျူဝ်းတီႈၵဝ်ယဝ်ႉ။-

18မႂ်းၼႄပျႃးလွင်ႈဢၼ်မႂ်း ႁဵတ်းၵျေးၸူးတီႈၵဝ်ၸိူဝ်ႉၼင်ႇႁိုဝ်ၼၼ်ႉဝၼ်းမိူဝ်ႈၼႆႉယဝ်ႉ။ လွင်ႈမၼ်းၸမ်ႉ ပိၵ်ႉသမ်ႉထႃႇဝရႃႉၽြႃး ဢဝ်ၵဝ်ဢၢပ်ႈပၼ်ၵႃႈၼႂ်းမိုဝ်းမႂ်းသေၵေႃႈ၊ မႂ်းယင်းဢမ်ႇဢဝ်ၵဝ်တၢႆလႄႈယူႇလူင်ပႄႇ။-

19ပေႃးၵူၼ်းထူပ်းႁၼ်ရၢၼ်ႇသူႇတူဝ်ၸဝ်ႈၵဝ်ႇၸိုင် တၵ်းပွႆႇမၼ်းလွတ်ႈႁိုဝ်။ ပိူဝ်ႈဢၼ်ပဵၼ်ၼင်ႇၼႆလႄႈ ႁႂ်ႈထႃႇဝရႃႉၽြႃး တွပ်ႇတႅၼ်းပၼ်ၵျေးၸူးဢၼ်မႂ်းႁဵတ်းတီႈၵဝ်ဝၼ်းမိူဝ်ႈၼႆႉၼၼ်ႉသေၵမ်းလူၺ်ႈ။-

20မိူဝ်ႈလဵဝ်ၼႆႉၵဝ်ႁူႉလွင်ႈဢၼ် မႂ်းတၵ်းပဵၼ်ၶုၼ်ႁေႃၶမ်း ဢမၢၼ်ႇၶၼ်ပဵၼ် ဢိၵ်ႇတင်းလွင်ႈဢၼ်သိုင်ႇၸိုင်ႈဝၢၼ်ႈမိူင်း ဢီႉသရေႇလႃႉ တၵ်းတႄႇယူႇၵႃႈၼႂ်းမိုဝ်းမႂ်းၼၼ်ႉယူႇဢေႃႈ။-

21ပိူဝ်ႈဢၼ်ပဵၼ်ၼင်ႇၼႆလႄႈ တိူင်ႇထႃႇဝရႃႉၽြႃးသေလႄႈ ႁဵတ်းတၢင်းဢၼ်ၵိၼ်ႇဝႃႈဝႆႉတီႈၵဝ် လူၺ်ႈလွင်ႈဢၼ်မႂ်းတၵ်းဢမ်ႇပႄႇၽဵဝ်ႈၸူဝ်ႈလုၵ်ႈပၢၼ်လၢၼ်ၵဝ်ပႅတ်ႈ လိုၼ်းၵဝ်ဢိၵ်ႇတင်းလွင်ႈဢၼ်တၵ်းဢမ်ႇယႃႉၽဵဝ်ႈၼႃႇမႃႉၸိုဝ်ႈသဵင်ၵဝ်မူတ်းမူတ်း ပႅတ်ႈသေၵႃႈၼႂ်းပီႈၼွင်ႉၸိူဝ်ႉၶိူဝ်းပေႃႈၵဝ်ၼၼ်ႉတႃႉ၊ ဝႃႈၼင်ႇၼႆသေယဝ်ႉ၊-

22တႃႇဝိတ်ႈ ႁဵတ်းတၢင်းဢၼ်ၵိၼ်ႇဢၼ်ဝႃႈတီႈ သေႃးလူႉ လႄႈ သေႃးလူႉ ၶိုၼ်းမိူဝ်းၵႂႃႇ ၵႃႈတီႈႁေႃတီႈယူႇမၼ်းသေဢေႃႈ။ တႃႇဝိတ်ႈ ဢိၵ်ႇတင်းၵူၼ်းမၼ်းၸိူဝ်းၼၼ်ႉၵေႃႈ ဢွၼ်ၵၼ်ၶိုၼ်ႈၸူးၵႃႈတီႈဢၼ်မၼ်ႈၶိူင်ႇၼၼ်ႉဢေႃႈ။

← Chapter 23 Jump to: Chapter 25 →