1 Samuel 28 — Shan

1ၼႂ်းၶိင်ႇမိုဝ်ႉဝၼ်းၼၼ်ႉ ၵူၼ်း ၽီႉလိတ်ႉတီႉ တင်းလၢႆ ႁႂ်ႈပူဝ်ႇပႃႇၶဝ်ၸူႉၵၼ်တုမ်ၵၼ် ႁႂ်ႈလႆႈတိုၵ်းၵၼ်တင်းမဵဝ်း ဢီႉသရေႇလႃႉ ဢေႃႈ။ ၶုၼ် ဢႃႇၶိတ်ႉ ၵေႃႈလၢတ်ႈတီႈ တႃႇဝိတ်ႈ လႄႈဝႃႈ၊ ႁူႉမၢတ်ႈလွင်ႈဢၼ် မႂ်းတၵ်းလႆႈပႃးဢဝ်ၵူၼ်းမႂ်းၸိူဝ်းၼၼ်ႉသေလႄႈ ၸွမ်းၵဝ်ၵႂႃႇတိုၵ်းသိုၵ်းၼၼ်ႉဢမၢၼ်ႇၶၼ်ပဵၼ်တႃႉ၊ ဝႃႈၼင်ႇၼႆသေယဝ်ႉ၊-

2တႃႇဝိတ်ႈ လဝ်ႊလၢတ်ႈတီႈၶုၼ် ဢႃႇၶိတ်ႉ လႄႈဝႃႈ၊ ၵမ်းၼႆႉ ၸဝ်ႈႁဝ်းတၵ်းႁူႉလွင်ႈဢၼ်ၶႃႈၸဝ်ႈႁဝ်းၼႆႉ တၵ်းႁဵတ်းၸိူဝ်ႉၼင်ႇႁိုဝ်ၼၼ်ႉဢမၢၼ်ႇၶၼ်ပဵၼ်ၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ ၶုၼ် ဢႃႇၶိတ်ႉ ၶိုၼ်းလၢတ်ႈတီႈ တႃႇဝိတ်ႈ လႄႈဝႃႈ၊ ပိူဝ်ႈဢၼ်ပဵၼ်ၼင်ႇၼႆလႄႈ ၵဝ်တၵ်းၶၢၼ်းမႂ်းဝႆႉၵႃႈတီႈဢရႃႇပူဝ်ႇၶျုၵ်ႈဢၼ်ပႂ်ႉဢသၢၵ်ႈၵဝ်ယူႇသေႇသေႇဢေႃႈ၊ ဝႃႈၼင်ႇၼႆဢေႃႈ။-

3မိူဝ်ႈၼၼ်ႉ သမူၺ်ႇလႃႉ တၢႆယဝ်ႉယဝ်ႉ။ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ႁဵတ်းတၢင်းဢၼ်ႁႆႈႁွင်ႉပွင်ႉၶၢင်းသေလႄႈ ဢဝ်မၼ်းသၢင်းၵျူဝ်ႇၵႃႈၼႂ်းဝဵင်း ရႃႇမႃႉ တီႈဢၼ်မၼ်းယူႇၵဝ်ႇၵဝ်ႇၼၼ်ႉယဝ်ႉယဝ်ႉ။ သေႃးလူႉ ၼၼ်ႉပႄႇၽဵဝ်ႈၽိူဝ်ႉလႂ် ဢိၵ်ႇတင်းၶဝ်ၸိူဝ်းဢၼ်ၽီၶဝ်ႈလႂ်ပႅတ်ႈသေၵႃႈၼႂ်းမိူင်းတင်းမိူင်းယဝ်ႉယဝ်ႉ။-

4မိူဝ်ႈၼၼ်ႉ ၵူၼ်း ၽီႉလိတ်ႉတီႉ တင်းလၢႆၸူႉၵၼ်တုမ်ၵၼ်လႄႈ မႃးၶျႃးတပ်ႉၶဝ်ၵႃႈတီႈဝဵင်း သူႉၼိမ်ႇ ဢေႃႈ။ သေႃးလူႉ ၵေႃႈ ႁႂ်ႈၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ၸူႉၵၼ်တုမ်ၵၼ်သေလႄႈ ၶဝ်ဢွၼ်ၵၼ်ၶျႃးတပ်ႉၶဝ်ယူႇၵႃႈၼိူဝ်လွႆ ၵီႉလပေႃႇ ဢေႃႈ။-

5သေႃးလူႉ ႁၼ်မုၵ်ႉၸိူဝ်းၵူၼ်း ၽီႉလိတ်ႉတီႉ ၸိူဝ်းၼၼ်ႉသေယဝ်ႉ၊ ၵူဝ်ႁႄလႄႈမီးႁူဝ်ၸႂ်ဢၼ်သၼ်ႇဝႆဢေႃႈ။-

6မိူဝ်ႈဢၼ် သေႃးလူႉ ၼၼ်ႉလဝ်ႊထၢမ်တီႈထႃႇဝရႃႉၽြႃးၼၼ်ႉၸိုင်၊ ထႃႇဝရႃႉၽြႃးဢမ်ႇဢိူဝ်။ မၼ်းၸဝ်ႈဢမ်ႇဢဝ်တၢင်းဢၼ်ၼွၼ်းၽၼ်၊ ဢူႉရိမ်း ၊ ပရေႃးၽႅတ်ႈတင်းလၢႆသေလႄႈဢိူဝ်။

7မိူဝ်ႈၼၼ်ႉ သေႃးလူႉ လၢတ်ႈတီႈၶႃႈမၼ်းၵူၼ်းမၼ်းလႄႈဝႃႈ၊ ႁႃမႄႈယိင်းဢၼ်ၽီၶဝ်ႈၼၼ်ႉပုၼ်ႈၵဝ်တႃႉ။ ၵဝ်တၵ်းၵႂႃႇလႄႈ တွင်ႈထၢမ်တီႈမၼ်းဢေႃႈ၊ ဝႃႈၼင်ႇၼႆသေယဝ်ႉ၊ ၶႃႈမၼ်းၵူၼ်းမၼ်းလဝ်ႊလၢတ်ႈလႄႈဝႃႈ၊ တူၺ်းတီႈၶႃႈလူး၊ ၵႃႈတီႈဝဵင်း ဢိၼ်ႇတေႃးရႃႉ ၼၼ်ႉ မီးမႄႈယိင်းဢၼ်ၽီၶဝ်ႈတီႈၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

8သေႃးလူႉ ႁဵတ်းႁၢင်ႈဢၼ်လၢၵ်ႇပိူင်ႈယူႇသေလႄႈ ပုတ်ႈလၢႆႈၶူဝ်းၼုင်ႈၸဝ်ႈယဝ်ႉၸင်ႇ ပႃးဢဝ်ၵူၼ်းသွင်ၵေႃႉၵႂႃႇလႄႈ ႁွတ်ႈထိုင်ၵႃႈတီႈမႄႈယိင်းၼၼ်ႉ ၶိင်ႇၵၢင်ၶိုၼ်းသေယဝ်ႉ၊ တွင်းပၢၼ်ႇလႄႈဝႃႈ၊ ဢိင်ပိုင်ႈၽီဢၼ်မႂ်းႁူမ်ႈပွင်းယူႇလူၺ်ႈၼၼ်ႉသေလႄႈ ႁႂ်ႈၵေႃႉဢၼ်ၵဝ်တၵ်းလၢတ်ႈတီႈမႂ်းၼၼ်ႉ ပေႃႇမႃးတႃႉ၊ ဝႃႈၼင်ႇၼႆဢေႃႈ။-

9မႄႈယိင်းၼၼ်ႉၵေႃႈၶိုၼ်းလၢတ်ႈလႄႈဝႃႈ၊ မႂ်းႁူႉလွင်ႈတၢင်းဢၼ် သေႃးလူႉ ႁဵတ်းဢၼ်ဝႃႈ လွင်ႈတၢင်းဢၼ်မၼ်းပႄႇၽဵဝ်ႈၽိူဝ်ႉလႂ် တင်းၶဝ်ၸိူဝ်းဢၼ်ၽီၶဝ်ႈလႂ် ပႅတ်ႈသေၵႃႈၼႂ်းမိူင်းတင်းမိူင်းၼၼ်ႉယူႇလႄႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸမ်ႉ ၵၢင်တီႉဢဝ်ဢသၢၵ်ႈၵဝ်ႁႂ်ႈၵဝ်လႆႈတၢႆၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

10သေႃးလူႉ တိူင်ႇထႃႇဝရႃႉၽြႃးသေလႄႈ ၵိၼ်ႇဝႃႈတီႈမၼ်းလႄႈဝႃႈ၊ ၵႃႈၼင်ႇဢၼ်ထႃႇဝရႃႉၽြႃးဢသၢၵ်ႈလိပ်းယူႇၼၼ်ႉ မႂ်းဢမ်ႇလႆႈႁွတ်ႈဢပႅတ်ႈၵွပ်ႈပိူဝ်ႈဢမူႉၼႆႉလႃးလႃး၊ ဝႃႈၼင်ႇၼႆဢေႃႈ။-

11မႄႈယိင်းၼၼ်ႉၵေႃႈထၢမ်လႄႈဝႃႈ၊ ၵဝ်တၵ်းလႆႈႁႂ်ႈၽူႈလႂ်ပေႃႇမႃးတီႈမႂ်း၊ ဝႃႈၼင်ႇၼႆသေယဝ်ႉ၊ မၼ်းလၢတ်ႈလႄႈဝႃႈ၊ ႁႂ်ႈ သမူၺ်ႇလႃႉ ပေႃႇမႃးသေၵမ်း၊ ဝႃႈၼင်ႇၼႆဢေႃႈ။-

12မႄႈယိင်းၼၼ်ႉႁၼ် သမူၺ်ႇလႃႉ သေယဝ်ႉ၊ ႁဵတ်းတင်းသဵင်ဢၼ်ယႂ်ႇၼႃႇႁွင်ႉသႅၼ်ႇတီႈ သေႃးလူႉ လႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းပႅတ်ႉလႅၼ်ၶႃႈၸဝ်ႈၼင်ႇႁိုဝ်တီႈၶႃႈ၊ ၸဝ်ႈႁဝ်းၼႆႉပဵၼ် သေႃးလူႉ တီႈၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

13ၶုၼ်ႁေႃၶမ်းလၢတ်ႈတီႈမၼ်းလႄႈဝႃႈ၊ ယႃႇပေမႆႈၸႂ်။ ႁၼ်ၵႃႈသင်၊ ဝႃႈၼင်ႇၼႆသေယဝ်ႉ၊ မႄႈယိင်းၼၼ်ႉလဝ်ႊလၢတ်ႈတီႈ သေႃးလူႉ လႄႈဝႃႈ၊ ၶႃႈၸဝ်ႈႁၼ်ၸဝ်ႈၽြႃးလုၵ်ႉသေၵႃႈၼႂ်းလိၼ်ၶိုၼ်ႈမႃးယူႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

14ၶုၼ်လူင်ၶိုၼ်းထၢမ်လႄႈဝႃႈ၊ ႁၢင်ႈၽၢင်မၼ်းပဵၼ်ၸိူဝ်ႉၼင်ႇႁိုဝ်ဝႆႉ၊ ဝႃႈၼင်ႇၼႆသေယဝ်ႉ၊ မႄႈယိင်းၵေႃႈလဝ်ႊလၢတ်ႈလႄႈဝႃႈ၊ ပဵၼ်ၵူၼ်းထဝ်ႈၶိုၼ်ႈမႃးယူႇတီႈၶႃႈဢေႃႈ။ မၼ်းမီးတၢင်းဢၼ်မႆၽႃႈမႆႁူမ်ႇသုမ်ႇယူႇတီႈၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ သေႃးလူႉ ႁူႉသၢႆငၢႆလွင်ႈဢၼ်ပဵၼ် သမူၺ်ႇလႃႉ ၼၼ်ႉလႄႈ ၶုပ်ႉမူပ်ႇၵႃႈတီႈလိၼ်သေလႄႈ ဝႆႈယူႇဢေႃႈ။

15သမူၺ်ႇလႃႉ ၵေႃႈ ထၢမ်တီႈ သေႃးလူႉ လႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်မႂ်းယႃႉယူၵ်ႉၵဝ်လႄႈ ႁႂ်ႈၵဝ်ပေႃႇမႃးၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ သေႃးလူႉ ၵေႃႈၶိုၼ်းလၢတ်ႈလႄႈဝႃႈ၊ ၵဝ်ၶႃႈၼႆႉႁွတ်ႈထိုင်တၢင်းဢၼ်ယၢပ်ႇၸႂ်ၶၢၼ်ၸႂ်ၼႃႇလူင်လၢင်ၶႃႈယဝ်ႉ။ ၵူၼ်း ၽီႉလိတ်ႉတီႉ တင်းလၢႆတိုၵ်းတေႃးၵဝ်ၶႃႈၶႃႈဢေႃႈ။ ၽြႃးပဵၼ်ၸဝ်ႈၸုၼ်ႉပႅတ်ႈၵဝ်ၶႃႈၶႃႈယဝ်ႉ။ မၼ်းၸဝ်ႈဢမ်ႇဢဝ်တင်းပရေႃးၽႅတ်ႈလႂ် ဢိၵ်ႇတင်းတၢင်းဢၼ်ၼွၼ်းၽၼ်ႁၼ်လႂ်လႄႈဢိူဝ်ၶႃႈ။ ပိူဝ်ႈၼႆလႄႈ ၵဝ်ၶႃႈႁွင်ႉပၢင်းဢဝ်ၸဝ်ႈႁဝ်းၶႃႈ ႁႂ်ႈၸဝ်ႈႁဝ်းလႆႈၼႄပၼ် လွင်ႈတၢင်းဢၼ်ၵဝ်ၶႃႈတၵ်းလႆႈႁဵတ်းၸိူဝ်ႉၼင်ႇႁိုဝ်ၼၼ်ႉၶႃႈယဝ်ႉ၊ ဝႃႈၼင်ႇၼႆဢေႃႈ။-

16သမူၺ်ႇလႃႉ ၵေႃႈလၢတ်ႈလႄႈဝႃႈ၊ ပေႃးထႃႇဝရႃႉၽြႃး ၸုၼ်ႉပႅတ်ႈမႂ်းလႄႈ ပဵၼ်ရၢၼ်ႇသူႇယူႇၽၢႆႇၼိုင်ႈတင်းမႂ်းယဝ်ႉၸိုင်၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းယင်းတွင်ႈထၢမ်တီႈၵဝ်ယူႇၼင်ႇႁိုဝ်။-

17ထႃႇဝရႃႉၽြႃးႁဵတ်းတီႈမႂ်းၸွမ်းၵႃႈၼင်ႇဢၼ် မၼ်းၸဝ်ႈမီးဢမိင်ႉဝႆႉတီႈၵဝ်ၼၼ်ႉယဝ်ႉ။ ထႃႇဝရႃႉၽြႃးၼုၵ်ႈဢဝ်သိုင်ႇၸိုင်ႈဝၢၼ်ႈမိူင်းသေၵႃႈၼႂ်းမိုဝ်းမႂ်းလႄႈ ပၼ်တီႈၵူၼ်းႁိူၼ်းၸမ်ၵၼ်တင်းမႂ်း ဢၼ်ဝႃႈ တႃႇဝိတ်ႈ ၼၼ်ႉယဝ်ႉ။-

18လွင်ႈမၼ်းၸမ်ႉ ၵွပ်ႈပိူဝ်ႈဢၼ်မႂ်းဢမ်ႇထွမ်ႇဢဝ်ၵႂၢမ်းထႃႇဝရႃႉၽြႃးလႄႈ ဢမ်ႇၸီႇယၢင်ႇတၢင်းၸႂ်မႆႈၶႆႈၸႃႉမၼ်းၸဝ်ႈ ဢၼ်ႁႅင်းယႂ်ႇၼႃႇၼၼ်ႉတီႈမဵဝ်း ဢႃႇမလႅၵ်ႉ ၼၼ်ႉလႄႈ ထႃႇဝရႃႉၽြႃးႁႂ်ႈဢမူႉၼႆႉႁွတ်ႈထိုင်ၵႃႈတီႈမႂ်းဝၼ်းမိူဝ်ႈၼႆႉယဝ်ႉ။-

19လိူဝ်သေၼႆႉ ထႃႇဝရႃႉၽြႃးတၵ်းဢဝ်မႂ်း ဢိၵ်ႇတင်းမဵဝ်း ဢီႉသရေႇလႃႉ ဢၢပ်ႈပၼ်ၵႃႈၼႂ်းမိုဝ်းၵူၼ်း ၽီႉလိတ်ႉတီႉ တင်းလၢႆဢေႃႈ။ ဝၼ်းမိူဝ်ႈၽုၵ်ႈ မႂ်းဢိၵ်ႇတင်းလုၵ်ႈၸၢႆးမႂ်းတင်းလၢႆ တၵ်းမီးယူႇလူၺ်ႈၵၼ်တင်းၵဝ်ဢေႃႈ။ ထႃႇဝရႃႉၽြႃး တၵ်းဢဝ်မုၵ်ႉၸိူဝ်းမဵဝ်း ဢီႉသရေႇလႃႉ ဢၢပ်ႈပၼ်ၵႃႈၼႂ်းမိုဝ်းၵူၼ်း ၽီႉလိတ်ႉတီႉ တင်းလၢႆဢေႃႈ၊ ဝႃႈၼင်ႇၼႆဢေႃႈ။-

20မိူဝ်ႈၼၼ်ႉ သေႃးလူႉ လူမ်ႉယဵတ်ႇတိတ်းၸပ်းၵႃႈၼိူဝ်လိၼ်သေလႄႈ ၵူဝ်ႁႄၵွပ်ႈပိူဝ်ႈၵႂၢမ်း သမူၺ်ႇလႃႉ ၼၼ်ႉၼႃႇလူင်လၢင်ဢေႃႈ။ ၵွပ်ႈပိူဝ်ႈဢၼ်မၼ်းဢမ်ႇၵိၼ်တၢင်းၵိၼ်တၢင်းၶူပ်းၵႃႈသင်လႃးလႃး ဝၼ်းၼိုင်ႈလႄႈၶိုၼ်းၼိုင်ႈၼၼ်ႉလႄႈ ႁႅင်းမၼ်းသဵင်ႈၵႂႃႇဢေႃႈ။-

21မႄႈယိင်းၼၼ်ႉမႃးၸူးတီႈ သေႃးလူႉ လႄႈ ႁၼ်လွင်ႈဢၼ်မၼ်းမႆႈၸႂ်ယၢပ်ႇၸႂ်ၼႃႇလူင်လၢင်ယူႇၼၼ်ႉသေယဝ်ႉ၊ လဝ်ႊလၢတ်ႈလႄႈဝႃႈ၊ တူၺ်းတီႈၶႃႈလူး၊ ၶႃႈၸဝ်ႈႁဝ်းၼႆႉ ထွမ်ႇဢဝ်ၵႂၢမ်းၸဝ်ႈႁဝ်းတီႈၶႃႈယဝ်ႉ။ ယင်းဢမ်ႇသေလၢႆဢသၢၵ်ႈတူဝ်ၸဝ်ႈၵဝ်ႇလႄႈ ထွမ်ႇဢဝ်ၵႂၢမ်းဢၼ်ၸဝ်ႈႁဝ်းမီးဢမိင်ႉၼၼ်ႉတီႈၶႃႈယဝ်ႉ။-

22ပိူဝ်ႈဢၼ်ပဵၼ်ၼင်ႇၼႆလႄႈ မိူဝ်ႈလဵဝ်ၼႆႉ ၶႅၼ်းတေႃႈထွမ်ႇဢဝ်ၵႂၢမ်းၶႃႈၸဝ်ႈသေၵမ်းတီႈၶႃႈ၊ ႁႂ်ႈၶႃႈၸဝ်ႈလႆႈဢဝ်တၢင်းၵိၼ်သေဢိတ်းဢွၼ်ႇၼိုင်ႈ တမ်းပၼ်ၵႃႈတီႈၽၢႆႇၼႃႈၸဝ်ႈႁဝ်းသေၵမ်းတီႈၶႃႈ၊ ၶႅၼ်းတေႃႈၵိၼ်ႁႂ်ႈၸဝ်ႈႁဝ်းမီးႁႅင်း မိူဝ်ႈဢၼ်ၸဝ်ႈႁဝ်းလုၵ်ႉလႄႈၵႂႃႇၼၼ်ႉသေၵမ်းတီႈၶႃႈ၊ ဝႃႈၼင်ႇၼႆသေၵေႃႈ၊-

23မၼ်းထဵင်ပႅတ်ႈသေလႄႈဝႃႈ၊ ၵဝ်ဢမ်ႇၵိၼ်ၵူၺ်ႉ၊ ဝႃႈၼင်ႇၼႆဢေႃႈ။ ၵူၺ်းၵႃႈ ၶႃႈမၼ်းၵူၼ်းမၼ်းၸိူဝ်းၼၼ်ႉ ၽွမ်ႉၵၼ်တင်းမႄႈယိင်းၼၼ်ႉလႄႈ ႁဵတ်းပႄႉႁဵတ်းၼႅင်ႇသေယဝ်ႉ၊ မၼ်းထွမ်ႇဢဝ်ၵႂၢမ်းၶဝ်ၼၼ်ႉလႄႈ လုၵ်ႉသေၵႃႈတီႈၼိူဝ်လိၼ်သေလႄႈ ၼင်ႈၵႃႈၼိူဝ်ၵူႇဢေႃႈ။-

24မႄႈယိင်းၼၼ်ႉ မီးဝူဝ်းဢွၼ်ႇဢၼ်မၼ်းလဵင်ႉဝႆႉ ႁႂ်ႈပီးလီမၼ်းလီၼၼ်ႉၵႃႈတီႈႁိူၼ်းမၼ်းလႄႈ မၼ်းဢဝ်တၢႆၶၼ်ၶၼ်ၽႂ်းၽႂ်းဢေႃႈ။ ၽွင်ၶဝ်ႈမုၼ်းၵေႃႈမၼ်းဢဝ်လႄႈၼူတ်ႈသေယဝ်ႉ၊ ၽဝ်ႁဵတ်းၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈသေလႄႈ၊-

25တမ်းပၼ်ၵႃႈတီႈၽၢႆႇၼႃႈ သေႃးလူႉ ဢိၵ်ႇတင်းၶႃႈမၼ်းၵူၼ်းမၼ်းၸိူဝ်းၼၼ်ႉလႄႈ ၶဝ်ၵိၼ်ဢေႃႈ။ ၶဝ်လုၵ်ႉလႄႈၵႂႃႇၼႂ်းၶိုၼ်းၼၼ်ႉသေဢေႃႈ။