1 Samuel 15

Shan

← Chapter 14 Jump to: Chapter 16 →

1လႆႈသမ်ႉ သမူၺ်ႇလႃႉ လၢတ်ႈတီႈ သေႃးလူႉ လႄႈဝႃႈ၊ ထႃႇဝရႃႉၽြႃး ပွႆႇၸႂ်ႉၵဝ်ႁႂ်ႈၵဝ်လႆႈပၼ်ၽိၵ်ႈသိၵ်ႈတီႈမႂ်း၊ ႁႂ်ႈမႂ်းလႆႈဢုပ်ႉပိူင်ႇၵူၼ်းမၼ်းၸဝ်ႈမဵဝ်း ဢီႉသရေႇလႃႉ မႃးယဝ်ႉ။ ပိူဝ်ႈၼႆလႄႈ မိူဝ်ႈလဵဝ်ၼႆႉထွမ်ႇငိၼ်းၵႂၢမ်းထႃႇဝရႃႉၽြႃးတႃႉ။-

2ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးမီးဢမိင်ႉလႄႈဝႃႈၸမ်ႉ၊ ၵဝ်မၢတ်ႈတွင်းလွင်ႈတၢင်းဢၼ်ၵူၼ်းမဵဝ်း ဢႃႇမလႅၵ်ႉ ႁဵတ်းတီႈမဵဝ်း ဢီႉသရေႇလႃႉ ဢၼ်ဝႃႈ လွင်ႈတၢင်းဢၼ်ႁၢမ်ႈတၢပ်ႈႁႄႉၶႅၼ်ၵႃႈတီႈသဵၼ်ႈတၢင်း ၼႂ်းမိူဝ်ႈဢၼ်ၶဝ်ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးၼၼ်ႉဝႆႉယဝ်ႉ။-

3မိူဝ်ႈလဵဝ်ၼႆႉ ၵႂႃႇလႄႈတိုၵ်းတေႃးယႃႉပႅတ်ႈမဵဝ်း ဢႃႇမလႅၵ်ႉ ၼၼ်ႉတႃႉ။ ယင်းဢမ်ႇမီးတၢင်းဢၼ်သေလၢႆလႄႈ ယႃႉၽဵဝ်ႈၵႃႈဢၼ်ၶဝ်မီးၼၼ်ႉပႅတ်ႈမူတ်းမူတ်းသဵင်ႈသဵင်ႈတႃႉ။ ဢဝ်တၢႆၵူၼ်းၸၢႆး၊ ၵူၼ်းယိင်း၊ လုၵ်ႈဢွၼ်ႇ၊ ၵေႃႉဢၼ်ယင်းၵိၼ်ၼူမ်းယူႇ၊ သူဝ်း၊ ဝူဝ်း၊ ၵလႃးဢုၵ်ႉ၊ လီႈတင်းလၢႆတႃႉ၊ ဝႃႈၼင်ႇၼႆလႄႈ၊-

4သေႃးလူႉ ႁႂ်ႈၵူၼ်းတင်းလၢႆၸူႉၵၼ်တုမ်ၵၼ်သေယဝ်ႉ၊ ဢဝ်ၸရၢင်းၶဝ်ၵႃႈတီႈဝဵင်း တေႇလိမ်ႇ လႄႈ ႁူဝ်ႁၢၼ်ၵူၼ်းသိုၵ်း ပႆတိၼ်မီးသွင်သႅၼ်၊ ႁူဝ်ႁၢၼ်ၵူၼ်းသိုၵ်း ယူႉတႃႉ မီးမိုၼ်ႇၼိုင်ႈဢေႃႈ။-

5သေႃးလူႉ ၵေႃႈ ၶီႇသိုၵ်းၸူးၵႃႈတီႈဝဵင်း ဢႃႇမလႅၵ်ႉ လႄႈ သိူင်ႇမူၵ်းယူႇၵႃႈတီႈၶူင်ႈႁူၺ်ႈသေယဝ်ႉ၊-

6သေႃးလူႉ ပွႆႇၸႂ်ႉၸူးၵႃႈတီႈၵူၼ်း ၵေႇၼီႉ တင်းလၢႆသေလႄႈ သင်ႇလၢတ်ႈလႄႈဝႃႈ၊ ဢွၼ်ၵၼ်ဢွၵ်ႇလႄႈလူင်းၵႂႃႇသေၵႃႈၼႂ်း ၵူၼ်း ဢႃႇမလႅၵ်ႉ တင်းလၢႆတႃႉ။ ၵူဝ်ၵဝ်တၵ်းယႃႉသူပႅတ်ႈပႃးလူၺ်ႈၵၼ်တင်းၶဝ်ၼၼ်ႉဢေႃႈ။ လွင်ႈမၼ်းၸမ်ႉ သူလႆႈႁဵတ်းၵျေးၸူးဝႆႉတီႈ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ၼႂ်းမိူဝ်ႈဢၼ်ၶဝ်ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးၼၼ်ႉယဝ်ႉ၊ ဝႃႈၼင်ႇၼႆလႄႈ၊ ၵူၼ်း ၵေႇၼီႉ ၸိူဝ်းၼၼ်ႉ ဢွၼ်ၵၼ်ဢွၵ်ႇၵႂႃႇသေၵႃႈၼႂ်းၵူၼ်း ဢႃႇမလႅၵ်ႉ ၸိူဝ်းၼၼ်ႉဢေႃႈ။-

7သေႃးလူႉ တိုၵ်းတေႃးယႃႉပႅတ်ႈၵူၼ်း ဢႃႇမလႅၵ်ႉ ၸိူဝ်းၼၼ်ႉ ဢဝ်တီႈဝဵင်း ႁႃႇဝီႉလႃႉ ၸူးသဵၼ်ႈတၢင်းဢၼ်ၵႂႃႇၸူးဝဵင်း သူႉရႃႉ ဢၼ်သိုဝ်ႈမိူင်း ဢေႇၵိပ်ႉတူႉ ၼၼ်ႉဢေႃႈ။-

8မၼ်းတီႉလႆႈတူဝ်လိပ်း ဢႃႇၵတ်ႉ ၶုၼ်ႁေႃၶမ်း ဢႃႇမလႅၵ်ႉ ၼၼ်ႉလႄႈ ယႃႉၽဵဝ်ႈၵူၼ်းတင်းသဵင်ႈတင်းလူင်ပႅတ်ႈမူတ်းမူတ်းသဵင်ႈသဵင်ႈ လူၺ်ႈၶူမ်းလၢပ်ႇၶူမ်းလႅဝ်းဢေႃႈ။-

9ၵူၺ်းၵႃႈ သေႃးလူႉ ဢိၵ်ႇတင်းၵူၼ်းတင်းလၢႆ သေလၢႆၶုၼ် ဢႃႇၵတ်ႉ ဢိၵ်ႇတင်းသူဝ်းဝူဝ်းဢၼ်မျၢတ်ႈပၢၼ်ၵၢင်၊ သူဝ်းဢၼ်ပီးလီမၼ်းလီ၊ သူဝ်းဢွၼ်ႇတင်းလၢႆ ၵႃႈဢၼ်ပဵၼ်ဢၼ်လီဢၼ်ငၢမ်းၼၼ်ႉလႄႈ ဢမ်ႇယႃႉၽဵဝ်ႈပႅတ်ႈမူတ်းမူတ်းသဵင်ႈသဵင်ႈ။ ၵူၺ်းၵႃႈ ယႃႉဢၼ်ဢမ်ႇၶဝ်ႈဢသုင်းဢသွင်ႇ ဢၼ်ယုတ်ႈဢၼ်ယွၵ်းၼၼ်ႉပႅတ်ႈမူတ်းမူတ်းသဵင်ႈသဵင်ႈဢေႃႈ။

10မိူဝ်ႈၼၼ်ႉၼုၵ်ႈၵပၢတ်ႈထႃႇဝရႃႉၽြႃး ႁွတ်ႈမႃးတီႈ သမူၺ်ႇလႃႉ လႄႈဝႃႈၸမ်ႉ၊-

11ၵဝ်ၶုၵ်းၸႂ်လႆႈလႄႈ မႆႈၸႂ်လူၺ်ႈလွင်ႈဢၼ်ၵဝ်ဢဝ် သေႃးလူႉ ၶၢၼ်းဝႆႉၼႂ်းဢရႃႇၶုၼ်ႁေႃၶမ်းၼၼ်ႉဢေႃႈ။ မၼ်းဝၢႆႇၶိုၼ်းသေလႄႈဢမ်ႇၸွမ်းလင်ၵဝ်၊ ဢမ်ႇပႂ်ႉၵမ်ပႂ်ႉၸွမ်းပိင်းၺၢပ်ႈၵဝ်၊ ဝႃႈၼင်ႇၼႆဢေႃႈ။ သမူၺ်ႇလႃႉ မႆႈၸႂ်ၶီၸႂ်ၼႃႇလူင်လၢင်လႄႈ ႁွင်ႉသႅၼ်ႇတီႈထႃႇဝရႃႉၽြႃးတင်းၶိုၼ်းသေယဝ်ႉ၊-

12မိူဝ်ႈဢၼ်မၼ်းလုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈ ၵႂႃႇႁႂ်ႈလႆႈႁပ်ႉႁူဝ်တၢင်း သေႃးလူႉ ၼၼ်ႉၸိုင်၊ ပိူၼ်ႈလၢတ်ႈလွင်ႈဢၼ် သေႃးလူႉ ႁွတ်ႈထိုင်ၵႃႈတီႈဝဵင်း ၵရမေႇလႃႉ လႄႈ ပူၵ်းသဝ်ပႄႉၼႅင်ႇသေယဝ်ႉ၊ ဝၢႆႇၶိုၼ်းလႄႈပူၼ်ႉၵႂႃႇသေလႄႈ လူင်းၸူးၵႃႈတီႈဝဵင်း ၵီႉလႃႉၵႃႇလႃႉ ၼၼ်ႉတီႈ သမူၺ်ႇလႃႉ ဢေႃႈ။-

13သမူၺ်ႇလႃႉ ၵႂႃႇၸူးၵႃႈတီႈ သေႃးလူႉ လႄႈ သေႃးလူႉ တၵ်ႉလၢတ်ႈလႄႈဝႃႈ၊ ႁႂ်ႈထႃႇဝရႃႉၽြႃးပၼ်တၢင်းလီတီႈၸဝ်ႈသေၵမ်းလူၺ်ႈ။ ၵဝ်ၶႃႈႁဵတ်းၸွမ်းၵႃႈၼင်ႇဢၼ် ဢမိင်ႉထႃႇဝရႃႉၽြႃးမီးၼၼ်ႉယဝ်ႉၶႃႈယဝ်ႉ၊ ဝႃႈၼင်ႇၼႆဢေႃႈ။-

14သမူၺ်ႇလႃႉ ၵေႃႈထၢမ်လႄႈဝႃႈ၊ ပေႃးပဵၼ်ၸိူဝ်ႉၼင်ႇၼၼ်ၸိုင်၊ သဵင်ဢၼ်သူဝ်းႁွင်ႉၶဝ်ႈၵႃႈၼႂ်းႁူၵဝ်၊ သဵင်ဢၼ်ဝူဝ်းႁွင်ႉဢၼ်ၵဝ်လႆႈငိၼ်းၼႆႉၼၼ်ႉၸမ်ႉ၊ ပဵၼ်ၸိူဝ်ႉၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

15သေႃးလူႉ လၢတ်ႈလႄႈဝႃႈ၊ ၶဝ်ဢွၼ်ၵၼ်ဢဝ်ၸိူဝ်းၼၼ်ႉ ၵႃႈတီႈၵူၼ်းမဵဝ်း ဢႃႇမလႅၵ်ႉ တင်းလၢႆပုၼ်ႉၼၼ်ႉမႃးၶႃႈယဝ်ႉ။ ၵူၼ်းတင်းလၢႆသေလၢႆသူဝ်းဝူဝ်းဢၼ်လီၼႃႇသေပိူၼ်ႈၼၼ်ႉ ႁႂ်ႈလႆႈဢဝ်ပုၵ်ႈၸေႃႇယိတ်ႈတီႈထႃႇဝရႃႉၽြႃး ၽြႃးပဵၼ်ၸဝ်ႈ ၸဝ်ႈႁဝ်းၼၼ်ႉလႄႈ ယႃႉဢၼ်ၵိုတ်းဢၼ်ၵျၢၼ်ႇၵႃႈမီးၼၼ်ႉပႅတ်ႈမူတ်းမူတ်းသဵင်ႈသဵင်ႈယဝ်ႉၶႃႈယဝ်ႉ၊ ဝႃႈၼင်ႇၼႆဢေႃႈ။-

16သမူၺ်ႇလႃႉ ၵေႃႈလၢတ်ႈတီႈ သေႃးလူႉ လႄႈဝႃႈ၊ သဝ်းလူးၵွၼ်ႇ ၵဝ်တၵ်းၶိုၼ်းမွၵ်ႇလၢတ်ႈၵႂၢမ်းဢၼ်ထႃႇဝရႃႉၽြႃး မီးဢမိင်ႉတီႈၵဝ်မိူဝ်ႈၶမ်ႈဝႃးၼၼ်ႉလူးၵွၼ်ႇဢေႃႈ၊ ဝႃႈၼင်ႇၼႆသေယဝ်ႉ၊ မၼ်းလၢတ်ႈလႄႈဝႃႈ၊ လၢတ်ႈၶႃႈတႃႉ၊ ဝႃႈၼင်ႇၼႆဢေႃႈ။-

17သမူၺ်ႇလႃႉ ၵေႃႈလၢတ်ႈလႄႈဝႃႈ၊ မိူဝ်ႈဢၼ်မႂ်းထၢင်ႇတူဝ်မႂ်းပဵၼ်ၵေႃႉဢၼ်လဵၵ်ႉဢၼ်ၼွႆႉယူႇၼၼ်ႉၸိုင်၊ မႂ်းႁွတ်ႈထိုင်ၵႃႈတီႈၸိၵ်းၸွမ်မဵဝ်း ဢီႉသရေႇလႃႉ တင်းလၢႆယဝ်ႉဢမ်ႇၸႂ်ႈႁိုဝ်။ ထႃႇဝရႃႉၽြႃးပၼ်ၽိၵ်ႈသိၵ်ႈတီႈမႂ်း ႁႂ်ႈမႂ်းပဵၼ်ၶုၼ်ႁေႃၶမ်း ဢီႉသရေႇလႃႉ ဢေႃႈ။-

18ထႃႇဝရႃႉၽြႃးပွႆႇၸႂ်ႉမႂ်းၵႂႃႇၵႃႈတီႈဢၼ်ၵႆလႄႈ မီးဢမိင်ႉလႄႈဝႃႈ၊ ၵႂႃႇလႄႈယႃႉၽဵဝ်ႈၵူၼ်းမဵဝ်း ဢႃႇမလႅၵ်ႉ ဢၼ်ဢပႅတ်ႈၼမ်ၼႃႇၸိူဝ်းၼၼ်ႉပႅတ်ႈတႃႉ။ တိုၵ်းတေႃးယႃႉပႅတ်ႈၶဝ်တေႃႇထိုင်ႁွတ်ႈၶဝ်ထၼ်ႈပေႃးလူႉလႅဝ်ႁၢႆလၢႆၵႂႃႇတႃႉ၊ ဝႃႈၼင်ႇၼႆဢေႃႈ။-

19ပိူဝ်ႈဢၼ်ပဵၼ်ၼင်ႇၼႆလႄႈ ၵွပ်ႈပိူဝ်ႈၸိူဝ်ႉၼင်ႇႁိုဝ် မႂ်းယင်းဢမ်ႇထွမ်ႇဢမ်ႇဢဝ်ဢမိင်ႉၽြႃးပဵၼ်ၸဝ်ႈလႄႈ ႁိမ်ဢဝ်ႁူင်ႇဢဝ်ဢုၵ်ႉၸႃႇရၢၼ်ႇသူႇၸိူဝ်းၼၼ်ႉသေလႄႈ ႁဵတ်းတူႉၸရိူၵ်ႈၵႃႈတီႈသိုဝ်ႈၼႃႈတႂ်ႈတႃထႃႇဝရႃႉၽြႃးၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

20သေႃးလူႉ လၢတ်ႈတီႈ သမူၺ်ႇလႃႉ လႄႈဝႃႈ၊ ၵဝ်ၶႃႈထွမ်ႇဢဝ်ဢမိင်ႉထႃႇဝရႃႉၽြႃးဢမၢၼ်ႇၶၼ်ပဵၼ်ယဝ်ႉလႄႈ ၸွမ်းသဵၼ်ႈတၢင်းဢၼ်ထႃႇဝရႃႉၽြႃးပွႆႇၸႂ်ႉၵဝ်ၶႃႈၵႂႃႇၼၼ်ႉယဝ်ႉ။ ၵဝ်ၶႃႈဢဝ် ဢႃႇၵတ်ႉ ၶုၼ်ႁေႃၶမ်း ဢႃႇမလႅၵ်ႉ မႃးလႄႈ ယႃႉၽဵဝ်ႈၵူၼ်းမဵဝ်း ဢႃႇမလႅၵ်ႉ တင်းလၢႆပႅတ်ႈမူတ်းမူတ်းသဵင်ႈသဵင်ႈယဝ်ႉ။-

21ၵူၺ်းၵႃႈ ၵူၼ်းတင်းလၢႆဢွၼ်ၵၼ်သိမ်းဢဝ်သူဝ်း၊ ဝူဝ်း ဢၼ်ဝႃႈလွင်ႈတၢင်းဢၼ်လီၼႃႇသေပိူၼ်ႈ ၵႃႈၼႂ်းလွင်ႈတၢင်းဢၼ်ထုၵ်ႇလီယႃႉပႅတ်ႈၼၼ်ႉ ဢွၵ်ႇသေၵႃႈၼႂ်းလွင်ႈတၢင်းဢၼ်ႁိမ်ဢဝ်ႁူင်ႇဢဝ်တင်းလၢႆၼၼ်ႉ ႁႂ်ႈလႆႈဢဝ်ပုၵ်ႈၸေႃႇယိတ်ႈတီႈထႃႇဝရႃႉၽြႃး ၽြႃးပဵၼ်ၸဝ်ႈ ၸဝ်ႈႁဝ်းၵႃႈၼႂ်းဝဵင်း ၵီႉလႃႉၵႃႇလႃႉ ၼၼ်ႉၶႃႈယဝ်ႉ၊ ဝႃႈၼင်ႇၼႆဢေႃႈ။-

22သမူၺ်ႇလႃႉ ၵေႃႈလၢတ်ႈလႄႈဝႃႈ၊ ထႃႇဝရႃႉၽြႃးထုၵ်ႇၸႂ်ၵျိူၵ်ႈၸႂ်တၢင်းဢၼ်ပုၵ်ႈၸေႃႇယိတ်ႈၼၼ်ႉ မိူၼ်ၸိူဝ်ႉၼင်ႇဢၼ်မၼ်းၸဝ်ႈထုၵ်ႇၸႂ်ၵျိူၵ်ႈၸႂ် တၢင်းဢၼ်ထွမ်ႇဢဝ်ဢမိင်ႉၸဝ်ႈၼၼ်ႉႁိုဝ်။ တူၺ်းလူး၊ တၢင်းဢၼ်ၸွမ်းဢလူဝ်ႇၸဝ်ႈၼၼ်ႉ ယဵင်ႈၶႅၼ်းလီသေမဵဝ်းယိတ်ႈဢေႃႈ။ တၢင်းဢၼ်ထွမ်ႇဢဝ်ၼၼ်ႉ ယဵင်ႈၶႅၼ်းလီသေၵွၼ်ႈၶႆၵွၼ်ႈမၼ်းသူဝ်းပေႃႈဢေႃႈ။-

23သၽေႃးဢၼ်တွပ်ႇဢၼ်ထဵင်ၼၼ်ႉ ပဵၼ်ၸိူဝ်ႉၼင်ႇဢၼ်ႁဵတ်းၵေႃႉႁူမ်ႈပွင်းလူၺ်ႈၵၼ်တင်းၽီႁၢႆႉဢေႃႈ။ သၽေႃးဢၼ်ၵႅၼ်ႇၶႅင်ၼၼ်ႉပဵၼ်ၸိူဝ်ႉၼင်ႇတၢင်းဢၼ်ဢမ်ႇႁူႉၽြႃးတြႃးလႄႈ ၵူဝ်းၵႂၢႆႇရုၵ်ႈထူႉၼၼ်ႉဢေႃႈ။ ၵွပ်ႈပိူဝ်ႈဢၼ်မႂ်းပႄႇပႅတ်ႈၵႂၢမ်းထႃႇဝရႃႉၽြႃးၼၼ်ႉလႄႈ မၼ်းၸဝ်ႈပႄႇမႂ်းပႅတ်ႈသေၵႃႈၼႂ်းဢရႃႇၶုၼ်ႁေႃၶမ်းယဝ်ႉ၊ ဝႃႈၼင်ႇၼႆဢေႃႈ။-

24သေႃးလူႉ ၵေႃႈ တွင်းပၢၼ်ႇတီႈ သမူၺ်ႇလႃႉ လႄႈဝႃႈ၊ ၵဝ်ၶႃႈၽိတ်းပိူင်ႈၶႃႈယဝ်ႉ။ ၵဝ်ၶႃႈပူၼ်ႉလိူဝ်ဢမိင်ႉထႃႇဝရႃႉၽြႃး ဢိၵ်ႇတင်းၵႂၢမ်းဢၼ်ၸဝ်ႈလၢတ်ႈၼၼ်ႉ ၵွပ်ႈပိူဝ်ႈဢၼ်ၵဝ်ၶႃႈၵူဝ်ၵူၼ်းတင်းလၢႆလႄႈ ထွမ်ႇဢဝ်ၵႂၢမ်းၶဝ်ၼၼ်ႉၶႃႈယဝ်ႉ။-

25မိူဝ်ႈလဵဝ်ၼႆႉၸိုင် ယိူၼ်ႉၶၢမ်ႇၵဝ်ၶႃႈသေၵမ်း။ ၶႅၼ်းတေႃႈၶိုၼ်းမႃးလူၺ်ႈၵၼ်တင်းၵဝ်ၶႃႈ ႁႂ်ႈၵဝ်ၶႃႈလႆႈၵူဝ်းၵႂၢႆႇထႃႇဝရႃႉၽြႃးသေၵမ်း၊ ဝႃႈၼင်ႇၼႆသေၵေႃႈ၊-

26သမူၺ်ႇလႃႉ လၢတ်ႈတီႈ သေႃးလူႉ လႄႈဝႃႈ၊ ၵဝ်တၵ်းဢမ်ႇၶိုၼ်းမႃးလူၺ်ႈၵၼ်တင်းမႂ်း။ ၵွပ်ႈပိူဝ်ႈဢၼ်မႂ်းပႄႇပႅတ်ႈဢမိင်ႉထႃႇဝရႃႉၽြႃးလႄႈ ထႃႇဝရႃႉၽြႃးပႄႇပႅတ်ႈမႂ်းသေၵႃႈၼႂ်းဢရႃႇၶုၼ်ႁေႃၶမ်းၼၼ်ႉယဝ်ႉ၊ ဝႃႈၼင်ႇၼႆသေယဝ်ႉ၊-

27မိူဝ်ႈဢၼ် သမူၺ်ႇလႃႉ ဝၢႆႇၶိုၼ်းႁႂ်ႈလႆႈၵႂႃႇၼၼ်ႉၸိုင်၊ မၼ်းယိပ်းၸၼ်ဢဝ်ႁိမ်းၸဵင်ႇသိူဝ်ႈယၢဝ်း သမူၺ်ႇလႃႉ လႄႈ သိူဝ်ႈယၢဝ်းၼၼ်ႉသိၵ်ႇၶၢတ်ႇၵႂႃႇဢေႃႈ။-

28သမူၺ်ႇလႃႉ ၵေႃႈလၢတ်ႈတီႈမၼ်းလႄႈဝႃႈ၊ ဝၼ်းမိူဝ်ႈၼႆႉ ထႃႇဝရႃႉၽြႃးသိၵ်ႇဢဝ်သိုင်ႇၸိုင်ႈဝၢၼ်ႈမိူင်း ဢီႉသရေႇလႃႉ ဢွၵ်ႇသေတီႈမႂ်းလႄႈ ပၼ်တီႈၵူၼ်းႁိူၼ်းၸမ်ၵၼ်တင်းမႂ်းဢၼ်လီသေမႂ်းၼၼ်ႉယဝ်ႉ။-

29လိူဝ်သေၼႆႉ၊ ၽြႃးဢၼ်ပဵၼ်တၢင်းၵတ်ႉတၢင်းၶၼ်မဵဝ်း ဢီႉသရေႇလႃႉ ၼၼ်ႉဢမ်ႇၸၢင်ႈသုင်းမူႉသႃႇ၊ ဢမ်ႇၸၢင်ႈၶုၵ်းၸႂ်လႆႈမႆႈၸႂ်ၵွပ်ႈ။ လွင်ႈၼင်ႇႁိုဝ်တၵ်းလႆႈၶုၵ်းၸႂ်လႆႈမႆႈၸႂ်ၵွပ်ႈၸိုင် မၼ်းၸဝ်ႈပဵၼ်ၵူၼ်းဢမ်ႇၸႂ်ႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

30မၼ်းတွင်းပၢၼ်ႇလႄႈဝႃႈ၊ ၵဝ်ၶႃႈၽိတ်းပိူင်ႈၶႃႈယဝ်ႉ။ ၼႂ်းဝႃႈၼၼ်သေၵေႃႈ မိူဝ်ႈလဵဝ်ၼႆႉၶႅၼ်းတေႃႈႁဵတ်းႁႂ်ႈ မုၼ်ၵုင်ႇသရေႇၵဝ်ၶႃႈမီးၵႃႈတီႈၽၢႆႇၼႃႈၵူၼ်း ဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်းၵဝ်ၶႃႈတင်းလၢႆ ဢိၵ်ႇတင်းၵႃႈတီႈၽၢႆႇၼႃႈမဵဝ်း ဢီႉသရေႇလႃႉ လႄႈ ၶိုၼ်းမႃးလူၺ်ႈၵၼ်တင်းၵဝ်ၶႃႈ ႁႂ်ႈၵဝ်ၶႃႈလႆႈၵူဝ်းၵႂၢႆႇထႃႇဝရႃႉၽြႃး ၽြႃးပဵၼ်ၸဝ်ႈ ၸဝ်ႈႁဝ်းၼၼ်ႉသေၵမ်း၊ ဝႃႈၼင်ႇၼႆလႄႈ၊-

31သမူၺ်ႇလႃႉ ဝၢႆႇၶိုၼ်းၸွမ်းလင် သေႃးလူႉ မႃးလႄႈ သေႃးလူႉ ၼၼ်ႉ ၵူဝ်းၵႂၢႆႇထႃႇဝရႃႉၽြႃးဢေႃႈ။

32မိူဝ်ႈၼၼ်ႉ သမူၺ်ႇလႃႉ လၢတ်ႈလႄႈဝႃႈ၊ ႁွင်ႉဢဝ် ဢႃႇၵတ်ႉ ၶုၼ်ႁေႃၶမ်း ဢႃႇမလႅၵ်ႉ ၼၼ်ႉမႃးတီႈၵဝ်တႃႉ၊ ဝႃႈၼင်ႇၼႆလႄႈ ဢႃႇၵတ်ႉ ၼၼ်ႉ ၸူမ်းၸူမ်းသိူဝ်းသိူဝ်းသေလႄႈမႃးဢေႃႈ။ လွင်ႈမၼ်းၸမ်ႉ ဢႃႇၵတ်ႉ ဝႃႈ၊ ၽေးတၢင်းတၢႆၸိုင် ပူၼ်ႉၵႂႃႇဢမၢၼ်ႇၶၼ်ပဵၼ်ယဝ်ႉ၊ ဝႃႈၼင်ႇၼႆဢေႃႈ။-

33သမူၺ်ႇလႃႉ လၢတ်ႈလႄႈဝႃႈ၊ ၸိူဝ်ႉၼင်ႇဢၼ်လၢပ်ႇမႂ်းလႅဝ်းမႂ်းႁဵတ်းႁႂ်ႈမႄႈယိင်းတင်းလၢႆသုမ်းလုၵ်ႈသုမ်းလၢင်းၼၼ်ႉ၊ မႄႈမႂ်းတၵ်းလႆႈပဵၼ် မႄႈယိင်းဢၼ် သုမ်းလုၵ်ႈသုမ်းလၢင်းၼႃႇသေမႄႈယိင်းတင်းလၢႆဢေႃႈ ဝႃႈၼင်ႇၼႆသေလႄႈ သမူၺ်ႇလႃႉ တႅပ်း ဢႃႇၵတ်ႉ ၼၼ်ႉ ပဵၼ်ပွတ်းပဵၼ်တွၼ်ႈ ၵႃႈတီႈၽၢႆႇၼႃႈထႃႇဝရႃႉၽြႃး ၵႃႈၼႂ်းဝဵင်း ၵီႉလႃႉၵႃႇလႃႉ ၼၼ်ႉဢေႃႈ။-

34မိူဝ်ႈၼၼ်ႉ သမူၺ်ႇလႃႉ ၵႂႃႇၵႃႈတီႈဝဵင်း ရႃႇမႃႉ လႄႈ သေႃးလူႉ ၶိုၼ်းမိူဝ်းၵႂႃႇၵႃႈတီႈႁေႃၸဝ်ႈ ဝဵင်း ၵီႉပႃႉ တီႈယူႇမၼ်းၼၼ်ႉသေဢေႃႈ။-

35လိုၼ်းၼၼ်ႉ သမူၺ်ႇလႃႉ ၼၼ်ႉဢမ်ႇမႃးသူႇမႃးၸႂ်း သေႃးလူႉ တေႃႇထိုင်ႁွတ်ႈဝၼ်းဢၼ်မၼ်းႁွတ်ႈဢၼိၵ်ႈၸႃႉၼၼ်ႉ။ ၵူၺ်းၵႃႈ သမူၺ်ႇလႃႉ ၼၼ်ႉ ၸႂ်ဢမ်ႇသႃႇၶၢင်းၶီၶၢင်းၽၢၼ်လူၺ်ႈလွင်ႈ သေႃးလူႉ သေလႄႈယူႇဢေႃႈ။ ထႃႇဝရႃႉၽြႃးမႆႈၸႂ် ၵွပ်ႈပိူဝ်ႈဢၼ်လႆႈၶၢၼ်း သေႃးလူႉ ဝႆႉ ၵႃႈၼႂ်းဢရႃႇၶုၼ်ႁေႃၶမ်းၼၼ်ႉဢေႃႈ။

← Chapter 14 Jump to: Chapter 16 →