1 Samuel 23

Shan

← Chapter 22 Jump to: Chapter 24 →

1လႆႈသမ်ႉ ပိူၼ်ႈလၢတ်ႈတီႈ တႃႇဝိတ်ႈ လႄႈဝႃႈ၊ တူၺ်းလူး၊ ၵူၼ်း ၽီႉလိတ်ႉတီႉ တိုၵ်းတေႃးဝဵင်း ၵီႉလႃႉ လႄႈ ႁိမ်ႁူင်ႇဢဝ်တလၢင်းယဵပ်ႇၶဝ်ႈတင်းလၢႆယူႇၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

2တႃႇဝိတ်ႈ လဝ်ႊထၢမ်တီႈထႃႇဝရႃႉၽြႃးလႄႈဝႃႈ၊ ၶႃႈၸဝ်ႈတၵ်းလႆႈၵႂႃႇလႄႈ တိုၵ်းတေႃးယႃႉပႅတ်ႈၵူၼ်း ၽီႉလိတ်ႉတီႉ ၸိူဝ်းၼၼ်ႉတီႈၶႃႈႁိုဝ်။ ဝႃႈၼင်ႇၼႆလႄႈ၊ ထႃႇဝရႃႉၽြႃးမီးဢမိင်ႉတီႈ တႃႇဝိတ်ႈ လႄႈဝႃႈ၊ ၵႂႃႇလႄႈတိုၵ်းတေႃးယႃႉပႅတ်ႈ ၵူၼ်း ၽီႉလိတ်ႉတီႉ ၸိူဝ်းၼၼ်ႉသေလႄႈ ၵႄႇသႄႇၶျွတ်ႈဢဝ်ဝဵင်း ၵီႉလႃႉ တႃႉ၊ ဝႃႈၼင်ႇၼႆဢေႃႈ။-

3ၵူၼ်း တႃႇဝိတ်ႈ ၸိူဝ်းၼၼ်ႉၵေႃႈ လၢတ်ႈတီႈမၼ်းလႄႈဝႃႈ၊ ႁဝ်းၼႆႉတေႃႈၵႃႈၵႃႈတီႈမိူင်း ယူႉတႃႉ ၼႆႉယင်းၵူဝ်ႁႄယူႇဢေႃႈ။ လိူဝ်သေၼၼ်ႉဢမ်ႇၵႃး၊ မိူဝ်ႈဢၼ်ႁွတ်ႈထိုင်ၵႃႈတီႈဝဵင်း ၵီႉလႃႉ လႄႈ ၶဵင်ႇတိုၵ်းၵၼ်တင်းပူဝ်ႇပႃႇၵူၼ်း ၽီႉလိတ်ႉတီႉ ၸိူဝ်းၼၼ်ႉယူႇၼၼ်ႉၸိုင်၊ ယဵင်ႈၶႅၼ်းတၵ်းမီးတီႈဢၼ်လီၵူဝ်လီႁႄၼႃႇဢေႃႈ၊ ဝႃႈၼင်ႇၼႆဢေႃႈ။-

4လႆႈသမ်ႉ တႃႇဝိတ်ႈ လဝ်ႊထၢမ်တီႈထႃႇဝရႃႉၽြႃးထႅင်ႈလႄႈ၊ ထႃႇဝရႃႉၽြႃးၶိုၼ်းလၢတ်ႈလႄႈဝႃႈ၊ လုၵ်ႉလႄႈလူင်းၵႂႃႇၵႃႈတီႈဝဵင်း ၵီႉလႃႉ တႃႉ။ ၵဝ်တၵ်းဢဝ်ၵူၼ်း ၽီႉလိတ်ႉတီႉ ၸိူဝ်းၼၼ်ႉ ဢၢပ်ႈပၼ်ၵႃႈၼႂ်းမိုဝ်းမႂ်းဢေႃႈ၊ ဝႃႈၼင်ႇၼႆလႄႈ၊-

5တႃႇဝိတ်ႈ ဢိၵ်ႇတင်းၵူၼ်းမၼ်းတင်းလၢႆ လူင်းၵႂႃႇၵႃႈတီႈဝဵင်း ၵီႉလႃႉ လႄႈ တိုၵ်းၵၼ်တင်းၵူၼ်း ၽီႉလိတ်ႉတီႉ ၸိူဝ်းၼၼ်ႉသေယဝ်ႉ၊ သိမ်းဢဝ်တရိၵ်ႈသၢၼ်ႇၶဝ်လႄႈ ႁဵတ်းတၢင်းဢၼ်ၶႃႈၽၼ်းဢဝ်ၶဝ်တၢႆ ဢၼ်ယႂ်ႇၼႃႇလူင်လၢင်ဢဝ်ၶဝ်တၢႆဢေႃႈ။ ၼင်ႇၼၼ်လႄႈ တႃႇဝိတ်ႈ ၵႄႇသႄႇၶျွတ်ႈဢဝ်ဝဵင်း ၵီႉလႃႉ ၼၼ်ႉဢေႃႈ။-

6မိူဝ်ႈဢၼ် ဢႃႇပျႃႇထႃႇ လုၵ်ႈၸၢႆး ဢႁီႉမလႅၵ်ႉ ၼၼ်ႉ ဢွၵ်ႇပၢႆႈမႃးၸူးၵႃႈတီႈ တႃႇဝိတ်ႈ ၵႃႈတီႈဝဵင်း ၵီႉလႃႉ ၼၼ်ႉၸိုင်၊ မၼ်းပႃးဢဝ်သိူဝ်ႈသုပ်းၸဝ်ႈသေလႄႈလူင်းမႃးဢေႃႈ။-

7ပိူၼ်ႈလဝ်ႊလၢတ်ႈလွင်ႈဢၼ် တႃႇဝိတ်ႈ ႁွတ်ႈမႃးၵႃႈတီႈဝဵင်း ၵီႉလႃႉ ၼၼ်ႉ တီႈ သေႃးလူႉ သေယဝ်ႉ သေႃးလူႉ လၢတ်ႈလႄႈဝႃႈ၊ ၽြႃးပဵၼ်ၸဝ်ႈဢဝ်မၼ်းဢၢပ်ႈပၼ်ၵႃႈၼႂ်းမိုဝ်းၵဝ်ယဝ်ႉ။ မၼ်းၶဝ်ႈၵႃႈၼႂ်းဝဵင်းဢၼ်မီးၽၵ်းတူ ဢိၵ်ႇတင်းၵိူၼ်ႇၽၵ်းတူၼၼ်ႉသေလႄႈ ၶၢမ်ႇတၢင်းဢၼ်ၶျုၵ်ႈဝႆႉယဝ်ႉ၊ ဝႃႈၼင်ႇၼႆသေလႄႈ၊-

8သေႃးလူႉ ႁွင်ႉဢဝ်ၵူၼ်းမၼ်းတင်းသဵင်ႈတင်းလူင် ၸူႉၵၼ်တုမ်ၵၼ်ႁႂ်ႈလႆႈၶီႇသိုၵ်းလူင်းၸူးၵႃႈတီႈဝဵင်း ၵီႉလႃႉ လႄႈ လွမ်ႉႁွပ်ႈ တႃႇဝိတ်ႈ ဢိၵ်ႇတင်းၵူၼ်းမၼ်းတင်းလၢႆဢေႃႈ။-

9တႃႇဝိတ်ႈ ႁူႉႁၼ်လွင်ႈဢၼ် သေႃးလူႉ ၵျူဝ်းၸႃးႁဵတ်းတၢင်းၵျၢမ်ႇတၢင်းပွင် ဢၼ်ဢမ်ႇလီတီႈမၼ်းၼၼ်ႉလႄႈ လၢတ်ႈတီႈယိတ်ႈပရေႃးႁဵၵ်ႈ ဢႃႇပျႃႇထႃႇ လႄႈဝႃႈ၊ ဢဝ်သိူဝ်ႈသုပ်းၸဝ်ႈမႃးၵႃႈတီႈၼႆႈသေၵမ်း၊ ဝႃႈၼင်ႇၼႆဢေႃႈ။-

10မိူဝ်ႈၼၼ်ႉ တႃႇဝိတ်ႈ လဝ်ႊထၢမ်လႄႈဝႃႈ၊ ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ တီႈၶႃႈ၊ ၶႃႈၸဝ်ႈႁဝ်းလႆႈငိၼ်းလွင်ႈဢၼ် သေႃးလူႉ မီးတၢင်းၵျၢမ်ႇတၢင်းပွင်တၵ်းမႃးၵႃႈတီႈဝဵင်း ၵီႉလႃႉ ၼႆႉလႄႈ ယႃႉပႅတ်ႈဝဵင်းၵွပ်ႈပိူဝ်ႈၶႃႈၸဝ်ႈႁဝ်းၼၼ်ႉ ဢမၢၼ်ႇၶၼ်ပဵၼ်တီႈၶႃႈဢေႃႈ။-

11ၵူၼ်းဝဵင်း ၵီႉလႃႉ ၸိူဝ်းၼႆႉ တၵ်းဢဝ်ၶႃႈၸဝ်ႈဢၢပ်ႈပၼ်ၵႃႈၼႂ်းမိုဝ်းမၼ်းတီႈၶႃႈႁိုဝ်။ သေႃးလူႉ တၵ်းမႃးမႅၼ်ႈၸွမ်းၵႃႈၼင်ႇဢၼ်ၶႃႈၸဝ်ႈႁဝ်းငိၼ်းၼၼ်ႉတီႈၶႃႈႁိုဝ်။ ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ တီႈၶႃႈ ၶႃႈၸဝ်ႈႁဝ်းတွင်းပၢၼ်ႇႁႂ်ႈၸဝ်ႈႁဝ်းမီးဢမိင်ႉတီႈၶႃႈၸဝ်ႈႁဝ်းတီႈၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ ထႃႇဝရႃႉၽြႃးမီးဢမိင်ႉလႄႈဝႃႈ၊ သေႃးလူႉ တၵ်းလူင်းမႃးဢေႃႈ၊ ဝႃႈၼင်ႇၼႆဢေႃႈ။-

12လႆႈသမ်ႉ တႃႇဝိတ်ႈ လဝ်ႊထၢမ်လႄႈဝႃႈ၊ ၵူၼ်းဝဵင်း ၵီႉလႃႉ ၸိူဝ်းၼႆႉ တၵ်းဢဝ်ၶႃႈၸဝ်ႈႁဝ်း ဢိၵ်ႇတင်းၵူၼ်းၶႃႈၸဝ်ႈႁဝ်းၸိူဝ်းၼႆႉ ဢၢပ်ႈပၼ်ၵႃႈၼႂ်းမိုဝ်း သေႃးလူႉ ၶႃႈႁိုဝ်။ ဝႃႈၼင်ႇၼႆသေယဝ်ႉ၊ ထႃႇဝရႃႉၽြႃးမီးဢမိင်ႉလႄႈဝႃႈ၊ ၶဝ်ၼၼ်ႉတၵ်းဢဝ်မႂ်းဢၢပ်ႈပၼ်ဢေႃႈ၊ ဝႃႈၼင်ႇၼႆဢေႃႈ။-

13မိူဝ်ႈၼၼ်ႉ တႃႇဝိတ်ႈ လုၵ်ႉဢိၵ်ႇလူၺ်ႈၵၼ်တင်းၵူၼ်းမၼ်းဢၼ်မီးသေႁူၵ်းပၢၵ်ႇၼိုင်ႈၸိူဝ်းၼၼ်ႉလႄႈ ဢွၵ်ႇသေၵႃႈၼႂ်းဝဵင်း ၵီႉလႃႉ သေယဝ်ႉ၊ ၵႂႃႇၵႃႈတီႈဢၼ်ၶဝ်ၵႂႃႇလႆႈ ၵူႈတီႈၵူႈလႅၼ်ၼၼ်ႉဢေႃႈ။ ပိူၼ်ႈလဝ်ႊလၢတ်ႈလွင်ႈဢၼ် တႃႇဝိတ်ႈ ဢွၵ်ႇသေၵႃႈၼႂ်းဝဵင်း ၵီႉလႃႉ လႄႈ လွတ်ႈၵႂႃႇၼၼ်ႉ တီႈ သေႃးလူႉ လႄႈ၊ မၼ်းၼၼ်ႉယင်းဢမ်ႇၵႂႃႇလႄႈယူႇဢေႃႈ။

14တႃႇဝိတ်ႈ ၼၼ်ႉယူႇၵႃႈၼႂ်းထိူၼ်ႇၵႃႈတီႈဢၼ်မၼ်ႈဢၼ်ၶိူင်ႇၸိူဝ်းၼၼ်ႉလႄႈ ၵိုတ်းသဝ်းယူႇၵႃႈတီႈၵႄႈႁူၺ်ႈၵႃႈၼိူဝ်လွႆ ၵႃႈၼႂ်းထိူၼ်ႇ ၸီႉၽႃႉ လႄႈ ပိၵ်ႉသမ်ႉ သေႃးလူႉ ႁႃမၼ်းယူႇၵူႈဝၼ်းသေၵေႃႈ ၽြႃးပဵၼ်ၸဝ်ႈဢမ်ႇဢဝ်မၼ်းဢၢပ်ႈပၼ်ၵႃႈၼႂ်းမိုဝ်းမၼ်းၼၼ်ႉ။-

15မိူဝ်ႈၼၼ်ႉ တႃႇဝိတ်ႈ ႁူႉႁၼ်လွင်ႈဢၼ် သေႃးလူႉ ဢွၵ်ႇမႃးႁႂ်ႈလႆႈႁႃဢဝ်ဢသၢၵ်ႈမၼ်းတၢႆၼၼ်ႉလႄႈ၊ ၼႂ်းမိူဝ်ႈဢၼ် တႃႇဝိတ်ႈ ယင်းတိုၵ်ႉမီးယူႇၵႃႈတီႈထိူၼ်ႇ ၸီႉၽႃႉ ၵႃႈၼႂ်းပႃႇမႆႉပႃႇတွၵ်ႇၼၼ်ႉၸိုင်၊-

16ယေႃးၼသၼ်ႇ လုၵ်ႈၸၢႆး သေႃးလူႉ ၼၼ်ႉ လုၵ်ႉလႄႈၵႂႃႇၸူးၵႃႈတီႈ တႃႇဝိတ်ႈ ၵႃႈၼႂ်းပႃႇမႆႉပႃႇတွၵ်ႇၼၼ်ႉသေလႄႈ၊ ၵမ်ႉထွၵ်ႈႁႂ်ႈမၼ်းသွၼ်ႈပိုင်ႈၽြႃးပဵၼ်ၸဝ်ႈၼႃႇၼႃႇလႄႈ၊-

17လၢတ်ႈတီႈမၼ်းလႄႈဝႃႈ၊ ယႃႇပေမႆႈၸႂ်။ မႂ်းတၵ်းၵၢင်းလွတ်ႈသေၵႃႈၼႂ်းမိုဝ်းၸဝ်ႈပေႃႈၵဝ်ၶႃႈ သေႃးလူႉ လႄႈ ပဵၼ်ၶုၼ်ႁေႃၶမ်း ဢီႉသရေႇလႃႉ ဢေႃႈ။ တႂ်ႈမႂ်းတၵ်းမီးၵဝ်ၶႃႈၵူၺ်းဢၼ်ဢရႃႇယႂ်ႇၼႃႇဢေႃႈ။ လွင်ႈဢၼ်တၵ်းပဵၼ်ၸိူဝ်ႉၼင်ႇၼၼ်ၼၼ်ႉၵေႃႈ ၸဝ်ႈပေႃႈၵဝ်ၶႃႈ သေႃးလူႉ ၼၼ်ႉႁူႉယဝ်ႉ၊ ဝႃႈၼင်ႇၼႆသေလႄႈ၊-

18သွင်ၶႃႁဵတ်းပတီႉၺိၺ်ႇၵႃႈတီႈၽၢႆႇၼႃႈထႃႇဝရႃႉၽြႃးသေယဝ်ႉ၊ တႃႇဝိတ်ႈ ယူႇၵႃႈၼႂ်းပႃႇမႆႉပႃႇတွၵ်ႇလႄႈ ယေႃးၼသၼ်ႇ ၶိုၼ်းမိူဝ်းၵႂႃႇ ၵႃႈတီႈႁိူၼ်းမၼ်းသေဢေႃႈ။-

19လႆႈသမ်ႉ ၵူၼ်း ၸီႉၽႃႉ တင်းလၢႆ ဢွၼ်ၵၼ်ၶိုၼ်ႈၸူးၵႃႈတီႈ သေႃးလူႉ ၵႃႈတီႈဝဵင်း ၵီႉပႃႉ ၼၼ်ႉသေလႄႈ လဝ်ႊလၢတ်ႈလႄႈဝႃႈ၊ တႃႇဝိတ်ႈ ၼၼ်ႉ တဵတ်ႇမႅပ်ႉယူႇၵႃႈၼႂ်းၶႃႈၸဝ်ႈႁဝ်းၶဝ် ၵႃႈၼႂ်းတီႈဢၼ်မၼ်ႈဢၼ်ၶိူင်ႇၵႃႈတီႈပႃႇမႆႉပႃႇတွၵ်ႇ ၵႃႈၼိူဝ်လွႆ ႁၶီႉလႃႉ ဢၼ်မီးၵႃႈတီႈၽၢႆႇတၢင်းၸၢၼ်း ယေႇသီႉမုၼ်ႇ ၼၼ်ႉဢမ်ႇၸႂ်ႈတီႈၶႃႈႁိုဝ်။-

20ပိူဝ်ႈၼႆလႄႈ ၸဝ်ႈၶုၼ်လူင်တီႈၶႃႈ၊ ၶႅၼ်းတေႃႈလူင်းၵႂႃႇ ၵႃႈၼင်ႇဢၼ်ၸဝ်ႈႁဝ်းၶႂ်ႈလူင်းၵႂႃႇၼၼ်ႉသေၵမ်းတီႈၶႃႈ၊ လွင်ႈတၢင်းဢၼ်ဢဝ်ၵေႃႉၼၼ်ႉ ဢၢပ်ႈပၼ်ၵႃႈၼႂ်းမိုဝ်းၸဝ်ႈႁဝ်းၼၼ်ႉ ပဵၼ်ပုၼ်ႈပဵၼ်တႃႇၶႃႈၸဝ်ႈႁဝ်းၶဝ်တီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

21သေႃးလူႉ လၢတ်ႈလႄႈဝႃႈ၊ ႁႂ်ႈသူၼႆႉပဵၼ်ၵေႃႉဢၼ်လႆႈၶၢမ်ႇတၢင်းလီမင်ႇၵလႃႇတီႈထႃႇဝရႃႉၽြႃးသေၵမ်းလူၺ်ႈ။ သူၼႆႉဢဵတ်းလူၵဝ်ယဝ်ႉ။-

22မိူဝ်ႈလဵဝ်ၼႆႉ သူၵႂႃႇလႄႈႁဵတ်းႁႂ်ႈယဵင်ႈၶႅၼ်းသေႇၶျႃႇလီငၢမ်းလႄႈ ႁူႉႁၼ်တီႈဢၼ်မၼ်းတဵတ်ႇမႅပ်ႉယူႇၼၼ်ႉ ဢိၵ်ႇတင်းလွင်ႈဢၼ်ၽူႈလႂ်ႁၼ်မၼ်းယဝ်ႉၼၼ်ႉဝႆႉထႃႈတႃႉ။ ပိူၼ်ႈလဝ်ႊလၢတ်ႈလွင်ႈဢၼ်မၼ်းႁဵတ်းလၵ်းႁဵတ်းလႅမ်ၼႃႇလူင်လၢင်ၼၼ်ႉတီႈၵဝ်ယဝ်ႉ။-

23ပိူဝ်ႈဢၼ်ပဵၼ်ၼင်ႇၼၼ်လႄႈ လူတူၺ်းမၢတ်ႈတွင်းတီႈဢၼ်မၼ်းတဵတ်ႇမႅပ်ႉသွၼ်ႈပိုင်ႈယူႇ ၵူႈတီႈၵူႈလႅၼ်ၼၼ်ႉသေယဝ်ႉ၊ ဢဝ်တၢင်းဢၼ်သေႇၶျႃႇလီငၢမ်းၼၼ်ႉ ၶိုၼ်းမႃးၸူးၵႃႈတီႈၵဝ်တႃႉ။ ၵဝ်တၵ်းၸွမ်းလူၺ်ႈၵၼ်တင်းသူၵႂႃႇဢေႃႈ။ ပေႃးမၼ်းမီးၵႃႈတီႈမိူင်းၼၼ်ႉၸိုင်၊ ၵဝ်တၵ်းႁႃဢဝ်မၼ်းဢွၵ်ႇၵႃႈၼႂ်းၵူၼ်း ယူႉတႃႉ ပဵၼ်ႁဵင်ပဵၼ်မိုၼ်ႇဢေႃႈ၊ ဝႃႈၼင်ႇၼႆလႄႈ၊-

24ၶဝ်ၼၼ်ႉလုၵ်ႉလႄႈၵႂႃႇၵႃႈတီႈထိူၼ်ႇ ၸီႉၽႃႉ ဢွၼ်တၢင်း သေႃးလူႉ ဢေႃႈ။ တႃႇဝိတ်ႈ ဢိၵ်ႇတင်းၵူၼ်းမၼ်းတင်းလၢႆၼၼ်ႉ မီးယူႇၵႃႈၼႂ်းထိူၼ်ႇ မေႃးၼႃႉ ၵႃႈတီႈပၢင်ႇပဵင်း ဢႃႇရၽႃႉ ၽၢႆႇတၢင်းၸၢၼ်း ယေႇသီႉမုၼ်ႇ ၼၼ်ႉဢေႃႈ။-

25မိူဝ်ႈၼၼ်ႉ သေႃးလူႉ ဢိၵ်ႇတင်းၵူၼ်းမၼ်းတင်းလၢႆၵႂႃႇ ႁႂ်ႈလႆႈႁႃ တႃႇဝိတ်ႈ လႄႈ ပိူၼ်ႈလၢတ်ႈလွင်ႈၼၼ်ႉတီႈမၼ်းဢေႃႈ။ ပိူဝ်ႈၼႆလႄႈ မၼ်းလုၵ်ႉသေၵႃႈၼိူဝ်လွႆႁိၼ်လွႆၽႃ လူင်းမႃးလႄႈယူႇၵႃႈၼႂ်းထိူၼ်ႇ မေႃးၼႃႉ သေဢေႃႈ။ သေႃးလူႉ ငိၼ်းလွင်ႈတၢင်းၼၼ်ႉသေယဝ်ႉ၊ ၸွမ်းႁႃ တႃႇဝိတ်ႈ ၵႃႈၼႂ်းထိူၼ်ႇ မေႃးၼႃႉ ဢေႃႈ။-

26သေႃးလူႉ ၵႂႃႇၽၢႆႇၼိုင်ႈလွႆလႄႈ တႃႇဝိတ်ႈ ဢိၵ်ႇတင်းၵူၼ်းမၼ်းၸိူဝ်းၼၼ်ႉ ၵႂႃႇၽၢႆႇၼိုင်ႈလွႆလႄႈ တႃႇဝိတ်ႈ ၵျူဝ်းၸႃးႁႂ်ႈလွတ်ႈၵႂႃႇ ၵွပ်ႈပိူဝ်ႈဢၼ်ၵူဝ်ႁႄ သေႃးလူႉ ၼၼ်ႉဢေႃႈ။ လွင်ႈမၼ်းၸမ်ႉ သေႃးလူႉ ဢိၵ်ႇတင်းၵူၼ်းမၼ်းၸိူဝ်းၼၼ်ႉ လွမ်ႉႁွပ်ႈ တႃႇဝိတ်ႈ ဢိၵ်ႇတင်းၵူၼ်းမၼ်းတင်းလၢႆဝႆႉလႄႈ ၸမ်တၵ်းတီႉလႆႈၶဝ်ယဝ်ႉ။-

27မိူဝ်ႈၼၼ်ႉ တမၢၼ်ႇၵေႃႉၼိုင်ႈ ႁွတ်ႈမႃးတီႈ သေႃးလူႉ လႄႈ လဝ်ႊလၢတ်ႈလႄႈဝႃႈ၊ မႃးၶၼ်ၶၼ်ၽႂ်းၽႂ်းသေၵမ်းတီႈၶႃႈ၊ ၵူၼ်း ၽီႉလိတ်ႉတီႉ မႃးတိုၵ်းမိူင်းၸဝ်ႈတီႈၶႃႈယဝ်ႉ၊ ဝႃႈၼင်ႇၼႆလႄႈ၊-

28သေႃးလူႉ ၼၼ်ႉလုၵ်ႉသေၵႃႈတီႈဢၼ်ၸွမ်းႁႃ တႃႇဝိတ်ႈ ၼၼ်ႉ ၶိုၼ်းမိူဝ်းလႄႈ ၶီႇသိုၵ်းၸူးၵႃႈတီႈၵူၼ်း ၽီႉလိတ်ႉတီႉ ၸိူဝ်းၼၼ်ႉဢေႃႈ။ ပိူဝ်ႈဢၼ်ပဵၼ်ၼင်ႇၼႆလႄႈ ၶဝ်ႁွင်ႉႁဵၵ်ႈၸိုဝ်ႈတီႈၼၼ်ႈ သေးလႃႇႁမ်ႇမလေႇၵုတ်ႉ ဢေႃႈ။-

29တႃႇဝိတ်ႈ လုၵ်ႉသေၵႃႈတီႈၼၼ်ႈၵႂႃႇလႄႈ ယူႇၵႃႈၼႂ်းတီႈဢၼ်မၼ်ႈၶိူင်ႇတင်းလၢႆၼႂ်းလိၼ် ဢႅၼ်ႇၵေးတီႉ ဢေႃႈ။

← Chapter 22 Jump to: Chapter 24 →