1 Samuel 2

Shan

← Chapter 1 Jump to: Chapter 3 →

1လႆႈသမ်ႉ ႁၼ်ႇၼႃႉ သူးတွင်းပထၼႃႇလႄႈဢွၵ်ႇသူပ်းဝႃႈၸမ်ႉ၊ ႁူဝ်ၸႂ်ၶႃႈၸဝ်ႈၼႆႉ မီးတၢင်းဢၼ်သႂၢင်ႇသိူဝ်းယူႇၼႂ်းထႃႇဝရႃႉၽြႃးလႄႈ ၶဝ်လႅမ်ၶႃႈၸဝ်ႈၼႆႉ မီးတၢင်းဢၼ်သုင်ယူႇၼႂ်းထႃႇဝရႃႉၽြႃးတီႈၶႃႈဢေႃႈ။ သူပ်းၶႃႈၸဝ်ႈၼႆႉ လၢတ်ႈၵႂၢမ်းဢၼ်ဢုပ်ႇဝၢဝ်းၵႃႈၼိူဝ်ရၢၼ်ႇသူႇၶႃႈၸဝ်ႈတင်းလၢႆယူႇ ၵွပ်ႈပိူဝ်ႈဢၼ်ၶႃႈၸဝ်ႈၸူမ်းသိူဝ်းမူၼ်ႈပျေႃႇၼႂ်းၵျေးၸူးတၢင်းဢၼ်ၸဝ်ႈႁဝ်း ၵႄႇသႄႇၶျွတ်ႈဢဝ်ၼၼ်ႉတီႈၶႃႈဢေႃႈ။-

2ၽူႈလႂ်ဢမ်ႇမူတ်းၸၢင်ႇမိူၼ်ၸိူဝ်ႉၼင်ႇဢၼ်ထႃႇဝရႃႉၽြႃးမူတ်းၸၢင်ႇၼၼ်ႉတီႈၶႃႈ၊ ၼွၵ်ႈသေၸဝ်ႈႁဝ်းၼႆႉ၊ ၽြႃးတၢင်ႇသူႇတၢင်ႇပႃးဢမ်ႇမီးတီႈၶႃႈ၊ မၢၵ်ႇႁိၼ်မၢၵ်ႇၽႃတီႈဢၼ်သွၼ်ႈပိုင်ႈ ဢၼ်မိူၼ်ၸိူဝ်ႉၼင်ႇၽြႃးပဵၼ်ၸဝ်ႈႁဝ်းၶႃႈ ဢမ်ႇမီးတီႈၶႃႈ၊-

3ယႃႇပေလၢတ်ႈၵႂၢမ်းဢၼ်ဢုပ်ႇဢၢတ်ႇႁဵတ်းတူဝ်လႃးလႃးသေၵမ်း။ ယႃႇပေႁႂ်ႈၵႂၢမ်းဢၼ်ၸွၵ်ႇၵႃးလူလၢႆဢွၵ်ႇၵႃႈၼႂ်းသူပ်းလႃးလႃးသေၵမ်း။ လွင်ႈမၼ်းၸမ်ႉ ထႃႇဝရႃႉၽြႃးပဵၼ် သပိင်ႇၺူႉတႃႉၽြႃးတီႈၶႃႈဢေႃႈ။ မၼ်းၸဝ်ႈၸင်ႈတူၺ်းႁိဝ်ႈတူၺ်းတၢင်းၵမ်တၢင်းၵျၢင်ႉတင်းလၢႆတီႈၶႃႈဢေႃႈ။-

4ပိုၼ်ၵၢင်ႇဢၼ်ႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇယိပ်းၵမ်ၼၼ်ႉ လႆႈၶၢမ်ႇတၢင်းဢၼ်ႁၵ်းပႅတ်ႈလႄႈ ၶဝ်ၸိူဝ်းဢၼ်ၸၢင်ႈလူမ်ႉၼၼ်ႉ မီးတၢင်းဢၼ်ဢဝ်ႁႅင်းတၼ်းၶူဝ်းႁတ်ႉဢႅဝ်ယူႇတီႈၶႃႈဢေႃႈ။-

5ၶဝ်ၸိူဝ်းဢၼ်ၵိၼ်ဢိမ်ႇၵိၼ်တဵမ်ၼၼ်ႉ လႆႈႁဵတ်းၵူၼ်းၵိၼ်ၸၢင်ႈၵိၼ်ငႃႁႂ်ႈလႆႈတၢင်းၵိၼ်လႄႈ ၶဝ်ၸိူဝ်းဢၼ်ဢိုပ်းယၢၵ်ႈၼၼ်ႉ ဢွၼ်ၵၼ်ဢိမ်ႇတဵမ်တီႈၶႃႈယဝ်ႉ။ ၵေႃႉဢၼ်မၼ်းဢမ်ႇမီးလုၵ်ႈၼၼ်ႉ လႆႈၵိူတ်ႇလဵင်ႉမႃးၸဵတ်းၵေႃႉလႄႈ၊ ၵေႃႉဢၼ်လုၵ်ႈလၢင်းၼမ်ၼႃႇၼၼ်ႉ လႆႈႁႅင်းဢူၼ်ႈႁႅင်းယွမ်းတီႈၶႃႈယဝ်ႉ။-

6ထႃႇဝရႃႉၽြႃးပိူင်ႇဢမူႉ ဢၼ်ႁႂ်ႈတၢႆ၊ ဢမူႉဢၼ်ႁႂ်ႈဢသၢၵ်ႈလိပ်းလႄႈ မၼ်းၸဝ်ႈပိူင်ႇဢမူႉဢၼ်ၶျႃးတူၵ်းၵႃႈတီႈမိူင်းမရၼႃႉ၊ ဢမူႉဢၼ်ႁႂ်ႈလုၵ်ႉၶိုၼ်းတီႈၶႃႈဢေႃႈ။-

7ထႃႇဝရႃႉၽြႃးႁဵတ်းႁႂ်ႈယၢၵ်ႈၽၢၼ် ဢိၵ်ႇတင်းႁႂ်ႈမၢၵ်ႈမီးလႄႈ မၼ်းၸဝ်ႈပိူင်ႇဢမူႉဢၼ်ၶျႃးတူၵ်းတီႈတႅမ်ႇ၊ ဢမူႉဢၼ်ယုၵ်ႉယွင်ႈတီႈၶႃႈဢေႃႈ။-

8မၼ်းၸဝ်ႈယုၵ်ႉယွင်ႈၵေႃႉဢၼ်ယၢၵ်ႈဢၼ်ၽၢၼ်သေၵႃႈၼႂ်းမုၼ်ႈလိၼ် ဢိၵ်ႇတင်းၵေႃႉဢၼ်ဢိုပ်းဢၼ်ယၢၵ်ႈသေၵႃႈၼႂ်းၵွင်ၶီႈဝူဝ်းလႄႈ မၼ်းၸဝ်ႈပၼ်ဢၶႂၢင်ႉဢၼ်လႆႈၼင်ႈလူၺ်ႈၵၼ်တင်းလုၵ်ႈၶုၼ်တင်းလၢႆ ဢၶႂၢင်ႉဢၼ်လႆႈၶၢမ်ႇဢမူၺ်ႇ ပလၢင်ႇဢၼ်မုၼ်ၽုင်းယႂ်ႇတီႈၶႃႈဢေႃႈ။ လွင်ႈမၼ်းၸမ်ႉ ထႃႇဝရႃႉၽြႃးပိူင်ႇသဝ်လိၼ်မိူင်းတင်းလၢႆလႄႈ မၼ်းၸဝ်ႈတႄႇႁဵတ်းလေႃးၵထၢတ်ႈ ၵႃႈၼိူဝ်သဝ်ၸိူဝ်းၼၼ်ႉတီႈၶႃႈယဝ်ႉ။-

9မၼ်းၸဝ်ႈတၵ်းပႂ်ႉၸွႆႈထႅမ်မႃႉၸႃႉတိၼ်ၶဝ်ၸိူဝ်းဢၼ်မူတ်းၸၢင်ႇမၼ်းၸဝ်ႈၼၼ်ႉလႄႈ၊ ၶဝ်ၸိူဝ်းဢၼ်ဢမ်ႇတြႃးၼၼ်ႉ တၵ်းလႆႈယူႇတဵတ်ႇတဵတ်ႇယဵၼ်ယဵၼ်ယူႇၵႃႈတီႈၼႂ်းလပ်းသိင်ႇတီႈၶႃႈဢေႃႈ။ ၽူႈလႂ်ဢမ်ႇပႄႉၼႅင်ႇလႆႈ ၵွပ်ႈပိူဝ်ႈတၢင်းၵတ်ႉတၢင်းၶၼ်တူဝ်ၸဝ်ႈၵဝ်ႇၼၼ်ႉတီႈၶႃႈ၊-

10ၶဝ်ၸိူဝ်းဢၼ်ၶတ်းၶႅင်ႁႅင်းတႃႉ ထႃႇဝရႃႉၽြႃးၼၼ်ႉ တၵ်းလႆႈၶၢမ်ႇတၢင်းဢၼ်ႁၵ်းႁဵၵ်းပႅတ်ႈလႄႈ မၼ်းၸဝ်ႈတၵ်းႁႂ်ႈၽႃႉလင်သေ ၵႃႈၼိူဝ်ၽႃႉၵၢင်ႁၢဝ်တေႃႇၶဝ်တီႈၶႃႈဢေႃႈ။ ထႃႇဝရႃႉၽြႃးၼႆႉ တၵ်းၸီႇယၢင်ႇတြႃးတေႃႇထိုင်ႁွတ်ႈတီႈသုတ်းလိၼ်မိူင်းတီႈၶႃႈဢေႃႈ။ မၼ်းၸဝ်ႈတၵ်းႁႂ်ႈၶုၼ်ႁေႃၶမ်းဢၼ်မၼ်းၸဝ်ႈၶၢၼ်းဝႆႉၼၼ်ႉ ပျေႉၸုမ်ႇတင်းဢဵၼ်ႁႅင်းလႄႈ ယုၵ်ႉယွင်ႈၶဝ်လႅမ်ၵေႃႉဢၼ်ၶၢမ်ႇၽိၵ်ႈသိၵ်ႈ ဢၼ်မၼ်းၸဝ်ႈပၼ်ၼၼ်ႉတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

11လိုၼ်းၼၼ်ႉ ဢေးလႃႉၵႃႇၼႃႉ ၼၼ်ႉ ၵႂႃႇၸူးၵႃႈတီႈႁိူၼ်းမၼ်းဢၼ်မီးၵႃႈတီႈဝဵင်း ရႃႇမႃႉ ၼၼ်ႉသေလႄႈ လုၵ်ႈဢွၼ်ႇၼၼ်ႉ လႆႈႁဵတ်းဝၢတ်ႈပွင်ဢမူႉထႃႇဝရႃႉၽြႃး၊ ၵႃႈတီႈၽၢႆႇၼႃႈယိတ်ႈပရေႃးႁဵၵ်ႈ ဢေးလီႉ ၼၼ်ႉယူႇဢေႃႈ။

12လုၵ်ႈၸၢႆး ဢေးလီႉ ၸိူဝ်းၼၼ်ႉ ပဵၼ်ၵူၼ်းဢႃႉထမ်ႇမႃႉလႄႈ ဢမ်ႇႁူႉထႃႇဝရႃႉၽြႃး။-

13ထုင်းၸၢမ်ႇဢၼ်ယိတ်ႈပရေႃးႁဵၵ်ႈလႆႈႁဵတ်းၼႂ်းၵူၼ်းတင်းလၢႆၸမ်ႉ၊ ယၢမ်းမိူဝ်ႈဢၼ်သေၵေႃႉသေၵူၼ်းပုၵ်ႈၸေႃႇယိတ်ႈလႄႈ ယင်းတိုၵ်ႉတူမ်ႈၼိူဝ်ႉယူႇၼၼ်ႉၸိုင်၊ ၵူၼ်းၸႂ်ႉၵူၼ်းသွႆယိတ်ႈပရေႃးႁဵၵ်ႈၵေႃႉၼိုင်ႈယိပ်းၵမ်ဢဝ်ၶေႃၵွင်ႉၼိူဝ်ႉ ဢၼ်မီးသၢမ်ငႅမ်ႈၼၼ်ႉယူႇသေလႄႈမႃးလႄႈ၊-

14သႄႇတမ်သႂ်ႇၵႃႈၼႂ်းမေႃႈၶၢင်၊ မေႃႈမႅၼ်ႈ၊ မေႃႈလူင်၊ မေႃႈဢွၼ်ႇလႄႈ ၵႃႈဢၼ်ၸပ်းပႃးတီႈၶေႃၵွင်ႉၼိူဝ်ႉၼၼ်ႉမႃးၼၼ်ႉၸိုင်၊ ယိတ်ႈပရေႃးႁဵၵ်ႈၸင်ႇသိမ်းဢဝ်ဢေႃႈ။ ၼင်ႇၼၼ်လႄႈ ၶဝ်ဢွၼ်ၵၼ်ႁဵတ်းၵႃႈၼႂ်းဝဵင်း သီႉလေႃႇ တီႈၵူၼ်းမဵဝ်း ဢီႉသရေႇလႃႉ ၵႃႈဢၼ် ႁွတ်ႈမႃးၵႃႈတီႈၼၼ်ႈဢေႃႈ။-

15လိူဝ်သေၼၼ်ႉ ၸူဝ်ႈဢၼ်ဢမ်ႇပႆႇဢဝ်ၵွၼ်ႈၶႆၵွၼ်ႈမၼ်းတုတ်ႇၽႆးၼၼ်ႉၸိုင်၊ ၵူၼ်းၸႂ်ႉၵူၼ်းသွႆယိတ်ႈပရေႃးႁဵၵ်ႈၸင်ႇမႃးလႄႈ လၢတ်ႈတီႈၵေႃႉဢၼ်ပုၵ်ႈၸေႃႇယိတ်ႈၼၼ်ႉလႄႈဝႃႈ၊ ပၼ်ၼိူဝ်ႉပုၼ်ႈဢၼ်တၵ်းပိင်ႈပုၼ်ႈယိတ်ႈပရေႃးႁဵၵ်ႈသေၵမ်း။ မၼ်းဢမ်ႇဢဝ်ၼိူဝ်ႉဢၼ်တူမ်ႈယဝ်ႉၼၼ်ႉတီႈမႂ်းၵူၺ်ႉ။ တၵ်းဢဝ်ၼိူဝ်ႉဢၼ်လိပ်းၵူၺ်းၵူၺ်းဢေႃႈ၊ ဝႃႈၼင်ႇၼႆဢေႃႈ။-

16ပေႃးၵေႃႉၼၼ်ႉလၢတ်ႈလႄႈဝႃႈ၊ ႁႂ်ႈလႆႈဢဝ်ၵွၼ်ႈၶႆၵွၼ်ႈမၼ်းတုတ်ႇၽႆးဢွၼ်တၢင်းလူးၵွၼ်ႇသေၵမ်း။ လိုၼ်းၼၼ်ႉၸင်ႇၵွႆႈဢဝ်ၵႃႈဢၼ်ၸႂ်မီးၼၼ်ႉသေၵမ်း၊ ဝႃႈၼင်ႇၼႆၸိုင်၊ မၼ်းၼၼ်ႉၸင်ႇၶိုၼ်းလၢတ်ႈလႄႈဝႃႈ၊ ဢမ်ႇၸႂ်ႈၵူၺ်ႉ၊ တၵ်းလႆႈပၼ်တီႈၵဝ်မိူဝ်ႈလဵဝ်ၼႆႉဢေႃႈ။ ပေႃးဢမ်ႇၼၼ် ၵဝ်တၵ်းႁဵတ်းဢႃႉထမ်ႇမႃႉႁိမ်ဢဝ်ဢေႃႈ၊ ဝႃႈၼင်ႇၼႆဢေႃႈ။-

17ဢပႅတ်ႈၵူၼ်းၼုမ်ႇၵူၼ်းၵမ်ၸိူဝ်းၼၼ်ႉ ယႂ်ႇၼႃႇလူင်လၢင်ၵႃႈတီႈၽၢႆႇၼႃႈထႃႇဝရႃႉၽြႃး ၵွပ်ႈပိူဝ်ႈဢၼ်ၶဝ်ႁဵတ်းႁႂ်ႈၵူၼ်းတင်းလၢႆ လီႁင်ႈဢဵတ်ႇသဵတ်ႇတၢင်းဢၼ်ႁဵတ်းဝၢတ်ႈပုၵ်ႈၸေႃႇတီႈထႃႇဝရႃႉၽြႃးၼၼ်ႉဢေႃႈ။

18လုၵ်ႈဢွၼ်ႇဢၼ်ဝႃႈ သမူၺ်ႇလႃႉ ၼၼ်ႉ ၼုင်ႈႁတ်ႉသိူဝ်ႈသုပ်းပိၵ်ႈသေလႄႈ ပွင်ႁဵတ်းဢမူႉၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။-

19မႄႈမၼ်းၸၢင်ႈယဵပ်ႉသိူဝ်ႈယၢဝ်းဢွၼ်ႇပုၼ်ႈမၼ်းသေလႄႈ ဢဝ်မႃးတီႈမၼ်းၵူႈပီႊၵူႈပီႊ ၼႂ်းမိူဝ်ႈဢၼ်ပေႃႈမႄႈမၼ်း ၶိုၼ်ႈၸူးႁႂ်ႈလႆႈပုၵ်ႈၸေႃႇယိတ်ႈဢၼ်ယၢမ်ႈလႆႈႁဵတ်းယူႇၵူႈပီႊၼၼ်ႉဢေႃႈ။

20ၽဝ်ႇၼိုင်ႈ ဢေးလီႉ ပၼ်တၢင်းလီတီႈ ဢေးလႃႉၵႃႇၼႃႉ သွင်ၶႃၽူဝ်မေးလႄႈဝႃႈ၊ ႁႂ်ႈထႃႇဝရႃႉၽြႃးပၼ်မဵဝ်းၸိူဝ်ႉၶိူဝ်းတီႈမႂ်း ၼႂ်းမႄႈယိင်းၼႆႉ တၢင်တူဝ်လုၵ်ႈၸၢႆးဢၼ်လႆႈယွၼ်းဢဝ် ဢၼ်သူယွၼ်းဢဝ်တီႈထႃႇဝရႃႉၽြႃးၼၼ်ႉသေၵမ်းလူၺ်ႈ၊ ဝႃႈၼင်ႇၼႆဢေႃႈ။ သွင်ၶႃၼၼ်ႉ ၶိုၼ်းမိူဝ်းၵႂႃႇၸူးၵႃႈတီႈႁိူၼ်းတီႈယူႇသွင်ၶႃၼၼ်ႉလႄႈ၊-

21ထႃႇဝရႃႉၽြႃးမႃးလူမႃးတူၺ်း ႁၼ်ႇၼႃႉ သေယဝ်ႉ၊ မၼ်းပႃးပတိၵ်ႉသၼ်ႇထေႇလႄႈ ၵိူတ်ႇလဵင်ႉလုၵ်ႈၸၢႆးသၢမ်ၵေႃႉ လုၵ်ႈယိင်းသွင်ၵေႃႉဢေႃႈ။ လုၵ်ႈဢွၼ်ႇဢၼ်ဝႃႈ သမူၺ်ႇလႃႉ ၼၼ်ႉ ယႂ်ႇသုင်မႃးယူႇၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။

22ဢေးလီႉ ထဝ်ႈၵႄႇၼႃႇသေယဝ်ႉ၊ ႁူႉငိၼ်းလွင်ႈၵႃႈဢၼ်လုၵ်ႈၸၢႆးမၼ်းတင်းလၢႆႁဵတ်းတီႈၵူၼ်း ဢီႉသရေႇလႃႉ တင်းသဵင်ႈတင်းလူင် ဢိၵ်ႇတင်းလွင်ႈဢၼ်ၶဝ်ၽိတ်းပိူင်ႈမႄႈယိင်း ဢၼ်ၸူႉတုမ်ၵႃႈတီႈႁိမ်းၽၵ်းတူမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈၼၼ်ႉသေလႄႈ၊-

23သင်ႇသွၼ်သုင်းမႃႉၶဝ်လႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူႁဵတ်းၸိူဝ်ႉၼင်ႇၼႆၼင်ႇႁိုဝ်။ တူႉၸရိူၵ်ႈဢၼ်သူႁဵတ်းတင်းလၢႆၼၼ်ႉၸိုင် ၵူၼ်းတင်းသဵင်ႈတင်းလူင်ၸိူဝ်းၼႆႉလၢတ်ႈလႄႈၵဝ်လႆႈငိၼ်းဢေႃႈ။-

24ဢမ်ႇလီၵူၺ်ႉ။ လုၵ်ႈၸၢႆးၵဝ်ၶဝ်ဢိူၺ်း၊ သတၢင်းသဵင်ၶၢဝ်ႇဢၼ်ၵဝ်ငိၼ်းၼၼ်ႉ ပဵၼ်သတၢင်းဢၼ်လီဢမ်ႇၸႂ်ႈ။ သူဢွၼ်ၵၼ်ႁဵတ်းႁႂ်ႈၵူၼ်းထႃႇဝရႃႉၽြႃးတင်းလၢႆၽိတ်းပိူင်ႈလူင်ပႄႇ။-

25ပေႃးၵူၼ်းၼင်ႇၵၼ်ၵၼ် ၵေႃႉၼိုင်ႈလႄႈၵေႃႉၼိုင်ႈ ၽိတ်းပိူင်ႈၵၼ်ၸိုင်၊ ၽြႃးပဵၼ်ၸဝ်ႈတၵ်းၸႅတ်ႈထၢမ်ၸီႇယၢင်ႇဢေႃႈ။ ပေႃးၵူၼ်းၽိတ်းပိူင်ႈထႃႇဝရႃႉၽြႃးၸိုင် ၽူႈလႂ်တၵ်းတွင်းပၢၼ်ႇပုၼ်ႈမၼ်း၊ ဝႃႈၼင်ႇၼႆသေၵေႃႈ၊ ၶဝ်ၼၼ်ႉဢမ်ႇထွမ်ႇဢဝ်ၵႂၢမ်းပေႃႈၶဝ်။ လွင်ႈမၼ်းၸမ်ႉ ထႃႇဝရႃႉၽြႃးမီးဢလူဝ်ႇႁႂ်ႈလႆႈဢဝ်ၶဝ်တၢႆဢေႃႈ။-

26လုၵ်ႈဢွၼ်ႇဢၼ်ဝႃႈ သမူၺ်ႇလႃႉ ၼၼ်ႉယႂ်ႇသုင်မႃးယူႇသေလႄႈ လႆႈၼႃႈလႆႈတႃၵႃႈတီႈၽၢႆႇၼႃႈထႃႇဝရႃႉၽြႃး ဢိၵ်ႇတင်းၵႃႈတီႈၽၢႆႇၼႃႈၵူၼ်းတင်းလၢႆဢေႃႈ။

27ၵူၼ်းၽြႃးပဵၼ်ၸဝ်ႈၵေႃႉၼိုင်ႈ မႃးၵႃႈတီႈ ဢေးလီႉ လႄႈ လၢတ်ႈလႄႈဝႃႈ၊ ထႃႇဝရႃႉၽြႃးမီးဢမိင်ႉလႄႈဝႃႈၸမ်ႉ၊ ၵဝ်ပေႃႇမႃးတီႈမဵဝ်းပေႃႈမႂ်း ဢၼ်လႆႈယူႇၼႂ်းမိူင်း ဢေႇၵိပ်ႉတူႉ တီႈၶုၼ်ႁေႃၶမ်း ၽႃႇရေႃး ၼၼ်ႉဢမ်ႇၸႂ်ႈႁိုဝ်။-

28ၵဝ်လိူၵ်ႈၵဵပ်းဢဝ်မၼ်းၵႃႈၼႂ်းမဵဝ်း ဢီႉသရေႇလႃႉ တင်းလၢႆ ႁႂ်ႈမၼ်းလႆႈပဵၼ်ယိတ်ႈပရေႃးႁဵၵ်ႈၵဝ် ဢၼ်လႆႈပႂ်ႉဢမူႉတၢင်းဢၼ်ပုၵ်ႈၸေႃႇၵႃႈၼိူဝ်ယိတ်ႈပလၢင်ႇၵဝ်၊ တၢင်းဢၼ်တုတ်ႇၽႆးၼၢမ်ႇသႃႇ၊ တၢင်းဢၼ်ၼုင်ႈသိူဝ်ႈသုပ်းၵႃႈတီႈၽၢႆႇၼႃႈၵဝ်ဢမ်ႇၸႂ်ႈႁိုဝ်။ ၵဝ်ဢဝ်ၶိူင်ႈပုၵ်ႈၸေႃႇဢၼ်ၵူၼ်းမဵဝ်း ဢီႉသရေႇလႃႉ တင်းလၢႆ ဢဝ်တင်းၽႆးႁဵတ်းၵႃႈမီးၼၼ်ႉ ပၼ်တီႈမဵဝ်းပေႃႈမႂ်းဢမ်ႇၸႂ်ႈႁိုဝ်။-

29ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူဢဝ်တိၼ်ထိပ်ႇယိတ်ႈၵဝ် ဢိၵ်ႇတင်းၶိူင်ႈပုၵ်ႈၸေႃႇၵဝ် ဢၼ်ၵဝ်ၸီႇယၢင်ႇဝႆႉၵႃႈတီႈႁိူၼ်းတီႈယူႇၵဝ်ၼၼ်ႉၼင်ႇႁိုဝ်။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းယုၵ်ႉယွင်ႈလုၵ်ႈၸၢႆးမႂ်းတင်းလၢႆဝႆႉၵႃႈၼိူဝ်ၵဝ် ႁႂ်ႈသူပီးလီမၼ်းလီလူၺ်ႈၶိူင်ႈပိူင်ဢၼ်မျၢတ်ႈၼႃႇသေပိူၼ်ႈ ၼႂ်းၶိူင်ႈပုၵ်ႈၸေႃႇဢၼ်ၵူၼ်းၵဝ်ၵူၼ်းမဵဝ်း ဢီႉသရေႇလႃႉ တင်းလၢႆ လူႇတၢၼ်းၵႃႈမီးၼၼ်ႉၼင်ႇႁိုဝ်။ ဝႃႈၼင်ႇၼႆဢေႃႈ။-

30ၵွပ်ႈပိူဝ်ႈဢၼ်ႁဵတ်းၸိူဝ်ႉၼင်ႇၼၼ်လႄႈ ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ မီးဢမိင်ႉလႄႈဝႃႈၸမ်ႉ၊ ပိၵ်ႉသမ်ႉၵဝ်လႆႈဝႃႈ၊ မဵဝ်းၸိူဝ်ႉၶိူဝ်းမႂ်း၊ မဵဝ်းၸိူဝ်ႉၶိူဝ်းပေႃႈမႂ်းၼၼ်ႉ တၵ်းလႆႈၵႂႃႇမႃးယူႇၵႃႈတီႈၽၢႆႇၼႃႈၵဝ်ယူႇတႃႇသေႇဢေႃႈ၊ ဝႃႈၼင်ႇၼႆသေၵေႃႈ၊ လႆႈသမ်ႉ ထႃႇဝရႃႉၽြႃးမီးဢမိင်ႉလႄႈဝႃႈၸမ်ႉ၊ ႁႂ်ႈၵတီႉၼၼ်ႉၵႆၵၼ်တင်းၵဝ်သေ။ ၵဝ်တၵ်းယုၵ်ႉယွင်ႈၶဝ်ၸိူဝ်းဢၼ်ယုၵ်ႉယွင်ႈၵဝ်ၼၼ်ႉဢေႃႈ။ ၶဝ်ၸိူဝ်းဢၼ်ႁဵတ်းဢမ်ႇပေႃးၼင်ႇႁိုဝ်တီႈၵဝ်ၼၼ်ႉ တၵ်းလႆႈၶၢမ်ႇတၢင်းဢၼ်မုၼ်ၵုင်ႇသရေႇလူႉဢေႃႈ။-

31တူၺ်းလူး၊ ၶိင်ႇမိုဝ်ႉဝၼ်းဢၼ် ၵဝ်တၵ်းတႅပ်းႁႅင်းမိုဝ်းမႂ်း ဢိၵ်ႇတင်းႁႅင်းမိုဝ်းမဵဝ်းၸိူဝ်ႉၶိူဝ်းပေႃႈမႂ်း ႁႂ်ႈၵေႃႉဢၼ်ထဝ်ႈ ထၼ်ႈပေႃးဢမ်ႇလႆႈမီးၵႃႈၼႂ်းမဵဝ်းၸိူဝ်ႉၶိူဝ်းမႂ်းသေၵေႃႉသေၵူၼ်းၼၼ်ႉ တၵ်းႁွတ်ႈထိုင်ဢေႃႈ။-

32မႂ်းတၵ်းလႆႈႁၼ်ၽေးဢူႉပၢတ်ႈ ႁွတ်ႈထိုင်ၵႃႈၼိူဝ်ႁိူၼ်းၵဝ် ၼႂ်းၵႃႈဢၼ်ၵဝ်ပၼ်တီႈမဵဝ်း ဢီႉသရေႇလႃႉ ၼၼ်ႉဢေႃႈ။ ၼႂ်းမဵဝ်းၸိူဝ်ႉၶိူဝ်းမႂ်းၼႆႉ ဢမ်ႇလႆႈမီးၵေႃႉဢၼ်ထဝ်ႈဢၼ်ၵႄႇသေၵေႃႉသေၵူၼ်းတႃႇသေႇ။-

33ၵဝ်တၵ်းဢမ်ႇတႅပ်းပႅတ်ႈပႄႇပႅတ်ႈၵူၼ်းမဵဝ်းၸိူဝ်ႉၶိူဝ်းမႂ်း ၵူႈၵေႃႉၵူႈၵူၼ်းသေၵႃႈတီႈယိတ်ႈပလၢင်ႇၵဝ် ႁႂ်ႈမၢၵ်ႇတႃမႂ်းလႆႈလူႉလႄႈ ႁူဝ်ၸႂ်မႂ်းလႆႈႁဵဝ်ႇလႆႈၸွပ်ႈ။ ၸူဝ်ႈလုၵ်ႈမႂ်းလၢၼ်မႂ်းၸိူဝ်းၼၼ်ႉတၵ်းလႆႈတၢႆ ၸူဝ်ႈဢၼ်ဢသၢၵ်ႈဢရွႆႇၶဝ် ဢမ်ႇပႆႇၵႄႇပႆႇထဝ်ႈၼၼ်ႉဢေႃႈ။-

34ၼီႉမိၵ်ႈဢၼ်တၵ်းပၼ်တီႈမႂ်းလႄႈ ႁွတ်ႈထိုင်ၵႃႈတီႈလုၵ်ႈၸၢႆးမႂ်း ႁေႃႇၽၼီႉ တင်း ၽီႉၼႁတ်ႉ သွင်ၵေႃႉၼၼ်ႉၸမ်ႉ၊ သွင်ၶႃၼၼ်ႉ တၵ်းတၢႆၼႂ်းဝၼ်းလဵဝ်ၵၼ်ဢေႃႈ။-

35လႆႈသမ်ႉ ၵဝ်တၵ်းႁႂ်ႈယိတ်ႈပရေႃးႁဵၵ်ႈဢၼ်ပႂ်ႉသဵတ်ႈၸႃႇလႄႈ ၸွမ်းၵႃႈၼင်ႇဢၼ်မီးၵႃႈၼႂ်းႁူဝ်ၸႂ်ၵဝ်ၼၼ်ႉပေႃႇဢွၵ်ႇပဵၼ်မႃးဢေႃႈ။ ၵဝ်တၵ်းႁဵတ်းပၼ် ႁိူၼ်းဢၼ်မၼ်ႈၶိူင်ႇပုၼ်ႈမၼ်းလႄႈဝႃႈ၊ မၼ်းတၵ်းလႆႈၵႂႃႇမႃးယူႇ ၵႃႈတီႈၽၢႆႇၼႃႈၵေႃႉဢၼ်လႆႈၶၢမ်ႇၽိၵ်ႈသိၵ်ႈ ဢၼ်ၵဝ်ပၼ်ၼၼ်ႉတႃႇသေႇဢေႃႈ။-

36ၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇၵႃႈတီႈမဵဝ်းၸိူဝ်ႉၶိူဝ်းမႂ်းၼႆႉၵူႈၵေႃႉၵူႈၵူၼ်းၼၼ်ႉ တၵ်းဢွၼ်ၵၼ်မႃးၵႃႈတီႈမၼ်းလႄႈ ဝႆႈသႃႁႂ်ႈလႆႈငိုၼ်းဢွၼ်ႇသေၶႅပ်းၶဝ်ႈမုၼ်းဢွၼ်ႇသေႁူၺ်ႇသေလႄႈတွင်းပၢၼ်ႇဝႃႈ၊ ၸႂ်ႉသွႆၵဝ်ၶႃႈၼႂ်းဢမူႉဢရႃႇယိတ်ႈပရေႃးႁဵၵ်ႈသေၸိူဝ်ႉသေပိူင်ႁႂ်ႈၵဝ်ၶႃႈလႆႈၵိၼ်ၶဝ်ႈမုၼ်းသေၵွၼ်ႈသေၵမ်းတႃႉ၊ ဝႃႈၼင်ႇၼႆယဝ်ႉ၊ ဝႃႈၼင်ႇၼႆဢေႃႈ။

← Chapter 1 Jump to: Chapter 3 →