1 Samuel 20 — Shan

1တႃႇဝိတ်ႈ ဢွၵ်ႇပၢႆႈသေၵႃႈတီႈဝၢၼ်ႈ ၼႃႇယုတ်ႉ ၼႂ်းလိၼ်ဝဵင်း ရႃႇမႃႉ ၼၼ်ႉလႄႈ ႁွတ်ႈထိုင်ၵႃႈတီႈ ယေႃးၼသၼ်ႇ သေယဝ်ႉ၊ ထၢမ်လႄႈဝႃႈ၊ ၵဝ်ၶႃႈလႆႈႁဵတ်းၵႃႈသင်ယဝ်ႉ။ ၵဝ်ၶႃႈမီးဢပႅတ်ႈၵႃႈသင်။ ၵဝ်ၶႃႈလႆႈႁဵတ်းတူႉၸရိူၵ်ႈၵႃႈသင် ႁႂ်ႈၸဝ်ႈပေႃႈၸဝ်ႈႁဝ်းလႆႈႁႃဢသၢၵ်ႈၵဝ်ၶႃႈယူႇ၊ မိူဝ်ႈဢၼ်ဝႃႈၼင်ႇၼႆၸိုင်၊-

2မၼ်းၼၼ်ႉၶိုၼ်းလၢတ်ႈတီႈမၼ်းလႄႈဝႃႈ၊ ႁႂ်ႈဢမူႉၼႆႉၵႆၵၼ်တင်းမႂ်းသေၵမ်းလူၺ်ႈ။ မႂ်းဢမ်ႇလႆႈတၢႆၵူၺ်ႉ။ ၸဝ်ႈပေႃႈၵဝ်ၼၼ်ႉ ယင်းဢမ်ႇမွၵ်ႇဢမ်ႇလၢတ်ႈတီႈၵဝ်လႄႈ ဢမ်ႇၸၢင်ႈႁဵတ်းဢမူႉဢၼ်ယႂ်ႇဢၼ်လဵၵ်ႉသေၸိူဝ်ႉသေပိူင်။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မၼ်းတၵ်းသိူင်ႇမႅပ်ႉဢမူႉၼႆႉဝႆႉႁႂ်ႈၵဝ်ဢမ်ႇႁူႉၼင်ႇႁိုဝ်။ ဢမူႉၼႆႉဢမ်ႇၸိုဝ်ႈဢမ်ႇၸႂ်ႈၵူၺ်ႉ၊ ဝႃႈၼင်ႇၼႆဢေႃႈ။-

3တႃႇဝိတ်ႈ ၵေႃႈ ႁဵတ်းတၢင်းဢၼ်ၵိၼ်ႇဢၼ်ဝႃႈလႄႈဝႃႈ၊ ၸဝ်ႈပေႃႈၸဝ်ႈႁဝ်းၼၼ်ႉ ႁူႉလွင်ႈဢၼ်ၵဝ်ၶႃႈထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈႁဝ်းၼၼ်ႉဢမၢၼ်ႇၶၼ်ပဵၼ်လႄႈဝႃႈ၊ ယႃႇပေႁႂ်ႈ ယေႃးၼသၼ်ႇ ႁူႉဢမူႉၼႆႉ။ ၵူဝ်မၼ်းတၵ်းမီးၸႂ်ဢၼ်ဢမ်ႇသႃႇဢေႃႈ၊ ဝႃႈၼင်ႇၼႆဝႆႉယဝ်ႉ။ ၵႃႈၼင်ႇဢၼ် ထႃႇဝရႃႉၽြႃးဢသၢၵ်ႈလိပ်းယူႇၼၼ်ႉ၊ ၵႃႈၼင်ႇဢၼ်ဢသၢၵ်ႈၸဝ်ႈႁဝ်းလိပ်းယူႇၼၼ်ႉ၊ ၵႃႈတီႈၵႄႈဝူင်ႈၵၢင်တၢင်းတၢႆတင်းၵဝ်ၶႃႈၼႆႉၸိုင်၊ မီးၸူဝ်ႈယၢင်ႈတိၼ်ၼိုင်ႈၵူၺ်းဢမၢၼ်ႇၶၼ်ပဵၼ်ယဝ်ႉ၊ ဝႃႈၼင်ႇၼႆဢေႃႈ။-

4ယေႃးၼသၼ်ႇ ၵေႃႈလၢတ်ႈတီႈ တႃႇဝိတ်ႈ လႄႈဝႃႈ၊ ၵဝ်တၵ်းႁဵတ်းၸွမ်းၵႃႈၼင်ႇဢၼ်ႁူဝ်ၸႂ်မႂ်းမီးၼၼ်ႉဢေႃႈ၊ ဝႃႈၼင်ႇၼႆသေယဝ်ႉ၊-

5တႃႇဝိတ်ႈ လၢတ်ႈတီႈ ယေႃးၼသၼ်ႇ လႄႈဝႃႈ၊ ဝၼ်းမိူဝ်ႈၽုၵ်ႈၼၼ်ႉ ပဵၼ်ဝၼ်းလိူၼ်မႂ်ႇလႄႈ ၵဝ်ၶႃႈယင်းဢမ်ႇၼင်ႈယူႇၵႃႈတီႈၶူင်ႇတီႈၵိၼ်လူၺ်ႈၵၼ်တင်းၶုၼ်ႁေႃၶမ်းလႄႈ ဢမ်ႇထုၵ်ႇလီယူႇ။ ၼႂ်းဝႃႈၼၼ်သေၵေႃႈ ႁႂ်ႈၵဝ်ၶႃႈလႆႈၵႂႃႇလႄႈတဵတ်ႇမႅပ်ႉယူႇ ၵႃႈၼႂ်းထိူၼ်ႇတေႃႇထိုင်ႁွတ်ႈႁူဝ်ၶမ်ႈဝၼ်းတႃႉတီႉယႃႉၼၼ်ႉသေၵမ်း။-

6ပေႃးၸဝ်ႈပေႃႈၸဝ်ႈႁဝ်း ၶုၵ်းၸႂ်လႆႈၶႆႈၸႂ်ထူပ်းလွင်ႈဢၼ်ၵဝ်ၶႃႈဢမ်ႇမီးၼၼ်ႉၸိုင်၊ ၶႅၼ်းတေႃႈလဝ်ႊလၢတ်ႈလႄႈဝႃႈ၊ တႃႇဝိတ်ႈ ယွၼ်းဢၶႂၢင်ႉၼႃႇလူင်လၢင် ႁႂ်ႈလႆႈၵႂႃႇၸူးၵႃႈတီႈဝဵင်း ပႅတ်ႉလႁႅမ်ႇ တီႈယူႇမၼ်းပုၼ်ႉ ၵွပ်ႈပိူဝ်ႈဢၼ်ပီႈၼွင်ႉၸိူဝ်ႉၶိူဝ်းမၼ်းၸိူဝ်းၼၼ်ႉ မီးၶိင်ႇဢၼ်ၶၢမ်ႇပွႆးဢၸႅၼ်ႇၵူႈပီႊၼၼ်ႉတီႈၶႃႈဢေႃႈ၊ ဝႃႈၼင်ႇၼႆသေၵမ်း။-

7ပေႃးမၼ်းၸဝ်ႈလၢတ်ႈလႄႈဝႃႈ၊ လီယဝ်ႉ၊ ဝႃႈၼင်ႇၼႆၸိုင်၊ ၶႃႈၸဝ်ႈႁဝ်းၼႆႉလႆႈၵတ်းယဵၼ်ၶျၢမ်းသႃႇယဝ်ႉ။ ပေႃးဢမ်ႇၼၼ် ပေႃးမၼ်းၸဝ်ႈၸႂ်မႆႈၶႆႈၸႃႉၼႃႇလူင်လၢင်ၸိုင်၊ တူၵ်းၵၢင်ၸႂ်လွင်ႈဢၼ်မၼ်းၸဝ်ႈမီးတၢင်းၵျၢမ်ႇတၢင်းပွင် ဢၼ်တၵ်းႁဵတ်းၽေးၼၼ်ႉသေၵမ်း။-

8ႁဵတ်းၵျေးၸူးတီႈၶႃႈၸဝ်ႈႁဝ်းသေၵမ်း။ ၸဝ်ႈႁဝ်းႁဵတ်းပတီႉၺိၺ်ႇထႃႇဝရႃႉၽြႃး လူၺ်ႈၵၼ်တင်းၶႃႈၸဝ်ႈႁဝ်းၼႆႉယဝ်ႉ။ ၼႂ်းဝႃႈၼၼ်သေၵေႃႈ ပေႃးဢပႅတ်ႈမီးတီႈၶႃႈၸဝ်ႈႁဝ်းၼႆႉၸိုင်၊ တူဝ်ၸဝ်ႈႁဝ်းဢဝ်ၵဝ်ၶႃႈတၢႆသေၵမ်း။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ တၵ်းလႆႈဢဝ်ၵဝ်ၶႃႈၵႂႃႇၸူးၵႃႈတီႈ ၸဝ်ႈပေႃႈၸဝ်ႈႁဝ်းၼၼ်ႉၼင်ႇႁိုဝ်ၶႃႈ၊ ဝႃႈၼင်ႇၼႆဢေႃႈ။-

9ယေႃးၼသၼ်ႇ လၢတ်ႈလႄႈဝႃႈ၊ ႁႂ်ႈဢမူႉၸိူဝ်ႉၼင်ႇၼၼ် ၵႆၵၼ်တင်းမႂ်းသေၵမ်းလူၺ်ႈ။ ပေႃးၵဝ်ႁူႉလွင်ႈဢၼ်ၸဝ်ႈပေႃႈၵဝ် တၵ်းႁဵတ်းၽေးတီႈမႂ်းဢမၢၼ်ႇၶၼ်ပဵၼ်ၸိုင်၊ ၵဝ်ယင်းဢမ်ႇမွၵ်ႇဢမ်ႇလၢတ်ႈမႂ်းလႄႈတၵ်းယူႇႁိုဝ်။ ဝႃႈၼင်ႇၼႆဢေႃႈ။-

10တႃႇဝိတ်ႈ ၵေႃႈထၢမ်တီႈ ယေႃးၼသၼ်ႇ လႄႈဝႃႈ၊ ပေႃးၸဝ်ႈပေႃႈၸဝ်ႈႁဝ်းၼၼ်ႉၶိုၼ်းလၢတ်ႈတီႈၸဝ်ႈႁဝ်း ၵျၢမ်းႁၢဝ်ႈၼႃႇလူင်လၢင်ၸိုင်၊ ၽူႈလႂ်တၵ်းၶိုၼ်းမွၵ်ႇလၢတ်ႈပၼ်တီႈၵဝ်ၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

11ယေႃးၼသၼ်ႇ လၢတ်ႈတီႈ တႃႇဝိတ်ႈ လႄႈဝႃႈ၊ မႃးတႃႉ။ ၵႂႃႇၸူးၵႃႈတီႈထိူၼ်ႇတႃႉႁႃး၊ ဝႃႈၼင်ႇၼႆသေလႄႈ သွင်ၶႃဢွၵ်ႇၵႂႃႇၸူးၵႃႈတီႈထိူၼ်ႇဢေႃႈ။-

12ယေႃးၼသၼ်ႇ ၵေႃႈသမ်ႉလၢတ်ႈတီႈ တႃႇဝိတ်ႈ လႄႈဝႃႈ၊ ၵႃႈၼင်ႇဢၼ်ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ ဢသၢၵ်ႈလိပ်းယူႇၼၼ်ႉ၊ မိူဝ်ႈဢၼ်ၵဝ်ၸၢမ်းတူၺ်းတီႈၸဝ်ႈပေႃႈၵဝ် ၼႂ်းဝၼ်းမိူဝ်ႈၽုၵ်ႈ၊ ဝၼ်းမိူဝ်ႈႁိုဝ်း၊ မိူဝ်ႈၶိင်ႇၼႆႉၸမ်ၸမ်ၼၼ်ႉယဝ်ႉၼၼ်ႉ၊ ပေႃးမၼ်းၸဝ်ႈမီးတၢင်းၵျၢမ်ႇတၢင်းပွင်ဢၼ်လီတီႈ တႃႇဝိတ်ႈ ၸိုင် ၵဝ်ယင်းဢမ်ႇပွႆႇၸႂ်ႉလႄႈမွၵ်ႇလၢတ်ႈမႂ်းလႄႈတၵ်းယူႇႁိုဝ်။-

13ပေႃးဢမ်ႇႁဵတ်းၸိူဝ်ႉၼင်ႇၼၼ်ၸိုင်၊ ယင်းဢမ်ႇၵႃးဢၼ်ၼၼ်ႉလႄႈ ႁႂ်ႈထႃႇဝရႃႉၽြႃး ႁဵတ်းလိူဝ်တွၼ်းၼႃႇသေၼၼ်ႉ တီႈ ယေႃးၼသၼ်ႇ သေၵမ်းလူၺ်ႈ။ ပေႃးၸဝ်ႈပေႃႈၵဝ်ၼၼ်ႉ မီးဢလူဝ်ႇၶႂ်ႈႁဵတ်းၽေးသႂ်ႇမႂ်းၸိုင်၊ ၵဝ်တၵ်းမွၵ်ႇလၢတ်ႈတီႈမႂ်းလႄႈ တၵ်းပွႆႇမႂ်းႁႂ်ႈမႂ်းလႆႈၵႂႃႇၼိမ်ၼိမ်လီလီဢေႃႈ။ ႁႂ်ႈထႃႇဝရႃႉၽြႃး မီးယူႇလူၺ်ႈၵၼ်တင်းမႂ်း မိူၼ်ၸိူဝ်ႉၼင်ႇဢၼ်မၼ်းၸဝ်ႈမီးယူႇလူၺ်ႈၵၼ်တင်းၸဝ်ႈပေႃႈၵဝ်မႃးယဝ်ႉၼၼ်ႉသေၵမ်းလူၺ်ႈ။-

14ၼႂ်းမိူဝ်ႈဢၼ်ၵဝ်ယင်းတိုၵ်ႉဢသၢၵ်ႈလိပ်းယူႇၼႆႉ မႂ်းတၵ်းလႆႈႁဵတ်းၵျေးၸူးထႃႇဝရႃႉၽြႃးၼၼ်ႉတီႈၵဝ် ႁႂ်ႈၵဝ်ဢမ်ႇလႆႈတၢႆၵူၺ်းဢမ်ႇၵႃး၊-

15တၵ်းလႆႈႁႂ်ႈၵျေးၸူးမႂ်း ဢမ်ႇလႆႈထၢတ်ႇလႆႈၶၢတ်ႇတီႈပီႈၼွင်ႉၸိူဝ်ႉၶိူဝ်းၵဝ်ယူႇတႃႇသေႇဢေႃႈ။ ၸႂ်ႈတႄႉတႄႉဢေႃႈ။ တၵ်းလႆႈႁႂ်ႈဢမ်ႇထၢတ်ႇဢမ်ႇၶၢတ်ႇ လိူဝ်သေထႃႇဝရႃႉၽြႃး ၽဵဝ်ႈရၢၼ်ႇသူႇ တႃႇဝိတ်ႈ ပႅတ်ႈသေၵႃႈၼိူဝ်လိၼ်မိူင်း မူတ်းမူတ်းသဵင်ႈသဵင်ႈၼၼ်ႉဢေႃႈ၊ ဝႃႈၼင်ႇၼႆဢေႃႈ။-

16ၼင်ႇၼၼ်လႄႈ ယေႃးၼသၼ်ႇ သမ်ႉႁဵတ်းပတီႉၺိၺ်ႇဝႆႉလူၺ်ႈၵၼ်တင်းပီႈၼွင်ႉၸိူဝ်ႉၶိူဝ်း တႃႇဝိတ်ႈ ဢေႃႈ။ လိုၼ်းၼၼ်ႉ ထႃႇဝရႃႉၽြႃးႁႃဢဝ်လွင်ႈမၼ်းၵႃႈတီႈရၢၼ်ႇသူႇ တႃႇဝိတ်ႈ တင်းလၢႆဢေႃႈ။-

17ယေႃးၼသၼ်ႇ ၼၼ်ႉသမ်ႉႁႂ်ႈ တႃႇဝိတ်ႈ ၵိၼ်ႇဝႃႈထႅင်ႈ လူၺ်ႈတၢင်းဢၼ်မၼ်းႁၵ်ႉမၼ်းၼၼ်ႉ ၵွပ်ႈပိူဝ်ႈဢၼ်မၼ်းႁၵ်ႉမၼ်းၼၼ်ႉ မိူၼ်ၸိူဝ်ႉၼင်ႇဢၼ်ႁၵ်ႉဝီႉၺိၺ်ႇတူဝ်ၸဝ်ႈၵဝ်ႇၼၼ်ႉဢေႃႈ။-

18လႆႈသမ်ႉ ယေႃးၼသၼ်ႇ လၢတ်ႈတီႈမၼ်းလႄႈဝႃႈ၊ ဝၼ်းမိူဝ်ႈၽုၵ်ႈၼၼ်ႉ ပဵၼ်ဝၼ်းလိူၼ်မႂ်ႇလႄႈ တၵ်းဢွၼ်ၵၼ်ၶုၵ်းၸႂ်လႆႈၶႆႈၸႂ်ထူပ်း လွင်ႈဢၼ်မႂ်းဢမ်ႇမီးၼၼ်ႉၵွပ်ႈပိူဝ်ႈဢၼ် တီႈၼင်ႈမႂ်းပဝ်ႇဝႆႉၼၼ်ႉဢေႃႈ။-

19မႂ်းယူႇသၢမ်ဝၼ်းသေယဝ်ႉ၊ တၵ်းလႆႈလူင်းမႃးၶၼ်ၶၼ်ၽႂ်းၽႂ်းလႄႈ ႁွတ်ႈထိုင်ၵႃႈတီႈဢၼ်မႂ်းတဵတ်ႇမႅပ်ႉယူႇ ၼႂ်းမိူဝ်ႈဢၼ်မႂ်းမီးဢမူႉၵမ်းဢွၼ်တၢင်းၼၼ်ႉသေလႄႈ ယူႇၵႃႈတီႈႁိမ်းမၢၵ်ႇႁိၼ် ဢေႇၸေႇလႃႉ ၼၼ်ႉဢေႃႈ။-

20ၵဝ်ၵေႃႈတၵ်းႁဵတ်းၸိူဝ်ႉၼင်ႇႁၢင်ႈယိုဝ်းၸၢၵ်ႈလႄႈ တၵ်းယိုဝ်းပိုၼ်ၵႂႃႇၵႃႈတီႈမၢၵ်ႇႁိၼ်ၼၼ်ႉ သၢမ်လႅမ်ႈဢေႃႈ။-

21ၵဝ်တၵ်းပွႆႇၸႂ်ႉၵူၼ်းဢွၼ်ႇၵႂႃႇလႄႈဝႃႈ၊ ၵႂႃႇႁႃပိုၼ်ၸိူဝ်းၼၼ်ႉမႃးတႃႉ၊ ဝႃႈၼင်ႇၼႆလႄႈ၊ ပေႃးၵဝ်လၢတ်ႈတီႈၵူၼ်းဢွၼ်ႇၼၼ်ႉလႄႈဝႃႈ၊ တူၺ်းလူး၊ ပိုၼ်ၸိူဝ်းၼၼ်ႉမီးၵႃႈတီႈၽၢႆႇၼႆႉမႂ်းဢေႃႈ၊ ဝႃႈၼင်ႇၼႆၸိုင်၊ မႂ်းဢဝ်ၸိူဝ်းၼၼ်ႉလႄႈမႃးသေၵမ်း။ ၵႃႈၼင်ႇဢၼ် ထႃႇဝရႃႉၽြႃးဢသၢၵ်ႈလိပ်းယူႇၼၼ်ႉ မႂ်းလႆႈၵတ်းယဵၼ်ၶျၢမ်းသႃႇလႄႈ၊ ဢမ်ႇမီးၽေးယဝ်ႉ။-

22ဢမ်ႇၼၼ် ပေႃးၵဝ်လၢတ်ႈတီႈၵူၼ်းဢွၼ်ႇလႄႈဝႃႈ၊ ပိုၼ်ၸိူဝ်းၼၼ်ႉပူၼ်ႉမႂ်းၵႂႃႇယဝ်ႉ၊ ဝႃႈၼင်ႇၼႆၸိုင်၊ ၵႂႃႇတႃႉ။ ထႃႇဝရႃႉၽြႃး ပွႆႇၸႂ်ႉမႂ်းၵႂႃႇဢေႃႈ။-

23ၼႂ်းလွင်ႈဢၼ်ႁႃးသွင်ၵေႃႉလၢတ်ႈၵၼ်ၼႆႉၸမ်ႉ၊ ႁႂ်ႈထႃႇဝရႃႉၽြႃး မီးယူႇၵႃႈတီႈဝူင်ႈၵၢင်မႂ်းတင်းၵဝ်ယူႇတႃႇသေႇသေၵမ်းလူၺ်ႈ၊ ဝႃႈၼင်ႇၼႆဢေႃႈ။-

24ၼင်ႇၼၼ်လႄႈ တႃႇဝိတ်ႈ တဵတ်ႇမႅပ်ႉယူႇၵႃႈတီႈထိူၼ်ႇဢေႃႈ။ မိူဝ်ႈဢၼ်ႁွတ်ႈထိုင်ဝၼ်းလိူၼ်မႂ်ႇၼၼ်ႉၸိုင်၊ ၶုၼ်ႁေႃၶမ်း ၼင်ႈႁႂ်ႈလႆႈၵိၼ်တၢင်းၵိၼ်တၢင်းၶူပ်းဢေႃႈ။-

25ၵႃႈၼင်ႇဢၼ်ထုင်းၸၢမ်ႇၸဝ်ႈမီးၼၼ်ႉ၊ ၶုၼ်ႁေႃၶမ်းၼင်ႈၵႃႈၼိူဝ်တီႈၼင်ႈမၼ်း ဢၼ်ဝႃႈတီႈၼင်ႈဢၼ်မီးၵႃႈတီႈႁိမ်းၽႃသေယဝ်ႉ၊ ယေႃးၼသၼ်ႇ လုၵ်ႉလႄႈ ဢႃႉပၼႃး ၼင်ႈၵႃႈတီႈႁိမ်း သေႃးလူႉ ဢေႃႈ။ တီႈၼင်ႈ တႃႇဝိတ်ႈ ၼၼ်ႉ ပဝ်ႇလၢပ်ႈဝႆႉဢေႃႈ။-

26ၵူၺ်းၵႃႈ ၼႂ်းဝၼ်းၼၼ်ႉ သေႃးလူႉ ဢမ်ႇလၢတ်ႈၵႃႈသင်လူၺ်ႈလွင်ႈမၼ်းလႄႈထၢင်ႇဝႃႈ၊ လွင်ႈတၢင်းသေၸိူဝ်ႉသေပိူင်ႁွတ်ႈထိုင်ၵႃႈၼိူဝ်မၼ်းဢေႃႈ။ မၼ်းဢမ်ႇမူတ်းသႂ်၊ မၼ်းဢမ်ႇမူတ်းသႂ်ဢမၢၼ်ႇၶၼ်ပဵၼ်ယဝ်ႉ၊ ဝႃႈၼင်ႇၼႆဢေႃႈ။-

27ဝၼ်းမိူဝ်ႈၽုၵ်ႈ၊ ဝၼ်းဢၼ်ပဵၼ်လိုၼ်းသေ ဝၼ်းလိူၼ်မႂ်ႇၶမ်ႈၼိုင်ႈလႄႈ ပဵၼ်ဝၼ်းတူႉတီႉယႃႉၼၼ်ႉ၊ ၵွပ်ႈပိူဝ်ႈဢၼ်တီႈၼင်ႈ တႃႇဝိတ်ႈ ပဝ်ႇလၢပ်ႈဝႆႉၼၼ်ႉလႄႈ သေႃးလူႉ ထၢမ်တီႈလုၵ်ႈၸၢႆးမၼ်း ယေႃးၼသၼ်ႇ လႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ လုၵ်ႈၸၢႆး ယေႇသႄး ၼၼ်ႉ ယင်းဢမ်ႇမႃးၵႃႈတီႈပွႆးၵိၼ်ၸဝ်ႈဝၼ်းမိူဝ်ႈဝႃး ဢိၵ်ႇတင်းဝၼ်းမိူဝ်ႈၼႆႉလႄႈယူႇၼင်ႇႁိုဝ်။ ဝႃႈၼင်ႇၼႆသေယဝ်ႉ၊-

28ယေႃးၼသၼ်ႇ ၶိုၼ်းလဝ်ႊလၢတ်ႈတီႈ သေႃးလူႉ လႄႈဝႃႈ၊ တႃႇဝိတ်ႈ ယွၼ်းဢၶႂၢင်ႉတီႈၶႃႈၸဝ်ႈၼႃႇလူင်လၢင် ႁႂ်ႈလႆႈၵႂႃႇၵႃႈတီႈဝဵင်း ပႅတ်ႉလႁႅမ်ႇ ပုၼ်ႉလႄႈ တွင်းပၢၼ်ႇလႄႈဝႃႈ၊-

29ပၼ်ဢၶႂၢင်ႉ ႁႂ်ႈၵဝ်ၶႃႈလႆႈၵႂႃႇသေၵမ်း။ ပီႈၼွင်ႉၸိူဝ်ႉၶိူဝ်းႁဝ်းၶႃႈၸိူဝ်းၼၼ်ႉ၊ ႁဵတ်းပွႆးယိတ်ႈၵႃႈတီႈဝဵင်းၼၼ်ႉၶႃႈဢေႃႈ။ ပီႈၸၢႆးၵဝ်ၶႃႈၵေႃႈ သင်ႇလၢတ်ႈမႃးတီႈၵဝ်ၶႃႈၶႃႈယဝ်ႉ။ ပေႃးၵဝ်ၶႃႈထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈႁဝ်းဢမၢၼ်ႇၶၼ်ပဵၼ်ၸိုင်၊ ၶႅၼ်းတေႃႈပၼ်ဢၶႂၢင်ႉ ႁႂ်ႈၵဝ်ၶႃႈလႆႈၵႂႃႇႁၼ်ပီႈၸၢႆးၵဝ်ၶႃႈၸိူဝ်းၼၼ်ႉသေၵမ်းၶႃႈ၊ ဝႃႈၼင်ႇၼႆတီႈၶႃႈဢေႃႈ။ ၵွပ်ႈပိူဝ်ႈၼင်ႇၼၼ်လႄႈ မၼ်းဢမ်ႇမႃးၵႃႈတီႈပွႆးၵိၼ်ၸဝ်ႈၼႆႉတီႈၶႃႈ၊ ဝႃႈၼင်ႇၼႆဢေႃႈ။-

30မိူဝ်ႈၼၼ်ႉ သေႃးလူႉ ၸႂ်မႆႈၶႆႈၸႃႉတီႈ ယေႃးၼသၼ်ႇ လႄႈ လၢတ်ႈတီႈမၼ်းလႄႈဝႃႈ၊ လုၵ်ႈၸၢႆးမႄႈယိင်းဢၼ်ႁၢႆႉမိူၵ်ႈလႄႈ လဵၼ်ႈၽူဝ်ဢွၼ်ႇၼႆႉဢိူၺ်း၊ ၵဝ်ဢမ်ႇႁူႉလွင်ႈဢၼ်မႂ်းယူႇၽၢႆႇလုၵ်ႈၸၢႆး ယေႇသႄး ၼၼ်ႉ တေႃႇထိုင်ႁွတ်ႈမႂ်းထၼ်ႈပေႃးတၵ်းလႆႈဢူၵ်းလႆႈဢၢႆ ဢိၵ်ႇတင်းတေႃႇထိုင်ႁွတ်ႈသိၼ်ႈမႄႈမႂ်းထၼ်ႈပေႃးတၵ်းလွၼ်ႈလႄႈ ဢူၵ်းဢၢႆၼၼ်ႉႁိုဝ်။-

31ၸူဝ်ႈဢၼ်လုၵ်ႈၸၢႆး ယေႇသႄး ၼၼ်ႉ ယင်းလိပ်းယူႇၵႃႈၼိူဝ်လိၼ်မိူင်းၼႆႉၸိုင်၊ မႂ်းဢိၵ်ႇတင်းသိုင်ႇၸိုင်ႈဝၢၼ်ႈမိူင်းမႂ်းဢမ်ႇလႆႈတႄႇ။ ပိူဝ်ႈၼႆလႄႈ ပွႆႇၸႂ်ႉၵႂႃႇမိူဝ်ႈလဵဝ်ၼႆႉလႄႈ ႁွင်ႉဢဝ်မၼ်းမႃးတႃႉ။ မၼ်းတၵ်းလႆႈၶၢမ်ႇတၢႆဢေႃႈ၊ ဝႃႈၼင်ႇၼႆသေယဝ်ႉ၊-

32ယေႃးၼသၼ်ႇ ၶိုၼ်းလဝ်ႊထၢမ်တီႈၸဝ်ႈပေႃႈမၼ်း သေႃးလူႉ လႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ တႃႇဝိတ်ႈ ၼၼ်ႉ တၵ်းလႆႈတၢႆၼင်ႇႁိုဝ်တီႈၶႃႈ၊ မၼ်းႁဵတ်းၵႃႈသင်ယဝ်ႉတီႈၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

33သေႃးလူႉ ဢဝ်ႁွၵ်ႇပုင်ႈသႂ်ႇႁႂ်ႈမႅၼ်ႈမၼ်းဢေႃႈ။ ပိူဝ်ႈဢၼ်ပဵၼ်ၼင်ႇၼၼ်လႄႈ ယေႃးၼသၼ်ႇ ႁူႉလွင်ႈဢၼ်ၸဝ်ႈပေႃႈမၼ်း မီးတၢင်းၵျၢမ်ႇတၢင်းပွင် တၵ်းဢဝ် တႃႇဝိတ်ႈ တၢႆၼၼ်ႉသေယဝ်ႉ၊-

34ယေႃးၼသၼ်ႇ ၸႂ်မႆႈၶႆႈၸႃႉၼႃႇလူင်လၢင်သေလႄႈ လုၵ်ႉၵႂႃႇသေၵႃႈတီႈၶူင်ႇတီႈၵိၼ်ၼၼ်ႉလႄႈ၊ ယင်းဢမ်ႇၵိၼ်တၢင်းၵိၼ်တၢင်းၶူပ်း ၼႂ်းဝၼ်းလိူၼ်မႂ်ႇသွင်ၶမ်ႈၼၼ်ႉလႄႈယူႇဢေႃႈ။ လွင်ႈမၼ်းၸမ်ႉ မၼ်းမီးၸႂ်ဢၼ်ႁဵဝ်ႇၸွပ်ႈပုၼ်ႈ တႃႇဝိတ်ႈ ၵွပ်ႈပိူဝ်ႈဢၼ် ၸဝ်ႈပေႃႈမၼ်းယႃႉသရေႇ တႃႇဝိတ်ႈ ၼၼ်ႉဢေႃႈ။

35မိူဝ်ႈဢၼ်ႁွတ်ႈထိုင်ၶိင်ႇၵၢင်ၼႂ်ၼၼ်ႉၸိုင်၊ ယေႃးၼသၼ်ႇ သမ်ႉပႃးဢဝ်ၵူၼ်းဢွၼ်ႇမၼ်းသေလႄႈ ၵႂႃႇၵႃႈတီႈထိူၼ်ႇ ၶိင်ႇဢၼ်ၶိၼ်းၵၼ်ဝႆႉတင်း တႃႇဝိတ်ႈ ၼၼ်ႉဢေႃႈ။-

36မၼ်းလၢတ်ႈတီႈၵူၼ်းဢွၼ်ႇၼၼ်ႉလႄႈဝႃႈ၊ ၶုၼ်ႇလႅၼ်ႈၵႂႃႇလႄႈ ႁႃဢဝ်ပိုၼ်ဢၼ်ၵဝ်တၵ်းယိုဝ်းၸိူဝ်းၼၼ်ႉတႃႉ၊ ဝႃႈၼင်ႇၼႆသေလႄႈ၊ ၼႂ်းမိူဝ်ႈဢၼ်ၵူၼ်းဢွၼ်ႇယင်းတိုၵ်ႉၶုၼ်ႇလႅၼ်ႈၵႂႃႇယူႇၼၼ်ႉၸိုင်၊ ယိုဝ်းပိုၼ်လႅမ်ႈၼိုင်ႈ ႁႂ်ႈပူၼ်ႉမၼ်းၼၼ်ႉၵႂႃႇဢေႃႈ။-

37မိူဝ်ႈဢၼ်ၵူၼ်းဢွၼ်ႇၼၼ်ႉႁွတ်ႈထိုင်ၵႃႈတီႈဢၼ်ပိုၼ် ဢၼ် ယေႃးၼသၼ်ႇ ယိုဝ်းၼၼ်ႉတူၵ်းၼၼ်ႉၸိုင်၊ ယေႃးၼသၼ်ႇ ႁွင်ႉၸွမ်းလင်ၵူၼ်းဢွၼ်ႇၼၼ်ႉလႄႈဝႃႈ၊ ပိုၼ်လႅမ်ႈၼိုင်ႈပူၼ်ႉမႂ်းၵႂႃႇယဝ်ႉဢမ်ႇၸႂ်ႈႁိုဝ်။ ဝႃႈၼင်ႇၼႆလႄႈ၊-

38ယေႃးၼသၼ်ႇ သမ်ႉႁွင်ႉၸွမ်းလင်ၵူၼ်းဢွၼ်ႇၼၼ်ႉလႄႈဝႃႈ၊ ႁိပ်ႈၼႅတ်ႈလႄႈၶုၼ်ႇလႅၼ်ႈၵႂႃႇၶၼ်ၶၼ်ၽႂ်းၽႂ်းတႃႉ။ ယႃႇပေယူႇ၊ ဝႃႈၼင်ႇၼႆဢေႃႈ။ ၵူၼ်းဢွၼ်ႇ ယေႃးၼသၼ်ႇ ၵေႃႈ ၵဵပ်းဢဝ်ပိုၼ်ၸိူဝ်းၼၼ်ႉသေလႄႈမႃးၸူးၵႃႈတီႈၸဝ်ႈမၼ်းဢေႃႈ။-

39ၵူၺ်းၵႃႈ ၵူၼ်းဢွၼ်ႇၼၼ်ႉ ဢမ်ႇႁူႉလွင်ႈၼၼ်ႉ။ ယေႃးၼသၼ်ႇ ဢိၵ်ႇတင်း တႃႇဝိတ်ႈ ၵူၺ်းႁူႉလွင်ႈၼၼ်ႉဢေႃႈ။-

40ယေႃးၼသၼ်ႇ ဢဝ်လၢၵ်ႈၼၢၵ်ႈမၼ်း ဢၢပ်ႈပၼ်တီႈၵူၼ်းဢွၼ်ႇမၼ်းသေလႄႈသင်ႇလၢတ်ႈဝႃႈ၊ မႂ်းၵႂႃႇလႄႈဢဝ်ၸိူဝ်းၼႆႉ ၵႂႃႇၵႃႈတီႈဝဵင်းတႃႉ၊ ဝႃႈၼင်ႇၼႆဢေႃႈ။-

41လိုၼ်းသေၵူၼ်းဢွၼ်ႇၼၼ်ႉၵႂႃႇယဝ်ႉၼၼ်ႉ၊ တႃႇဝိတ်ႈ လုၵ်ႉဢွၵ်ႇသေၵႃႈတီႈၽၢႆႇတၢင်းၸၢၼ်းမႃးလႄႈ၊ ၶုပ်ႉမူပ်ႇၵႃႈတီႈၼိူဝ်လိၼ်သေလႄႈ ၵူမ်ႈႁူဝ်တေႃႇထိုင်ႁွတ်ႈသၢမ်ပွၵ်ႈသေယဝ်ႉ၊ သွင်ၶႃၼၼ်ႉၵေႃႉၼိုင်ႈလႄႈၵေႃႉၼိုင်ႈ ၼူမ်ၵၼ်ယူႇ၊ ၼမ်ႉတႃတူၵ်းၼင်ႇၵၼ်ယူႇ တေႃႇထိုင်ႁွတ်ႈ တႃႇဝိတ်ႈ ယဵင်ႈၶႅၼ်းႁဵတ်းလိူဝ်တွၼ်းၼႃႇလူင်လၢင်ဢေႃႈ။-

42ယေႃးၼသၼ်ႇ ၵေႃႈလၢတ်ႈတီႈ တႃႇဝိတ်ႈ လႄႈဝႃႈ၊ ထွၵ်ႈလူၺ်ႈလွင်ႈဢၼ်ႁႃးသွင်ၵေႃႉဢဝ်ၼႃႇမႃႉၸိုဝ်ႈသဵင်ထႃႇဝရႃႉၽြႃးလႄႈ ၵိၼ်ႇဝႃႈတီႈၵၼ်လႄႈဝႃႈ၊ ႁႂ်ႈထႃႇဝရႃႉၽြႃး မီးယူႇၵႃႈတီႈဝူင်ႈၵၢင်မႂ်းတင်းၵဝ်၊ ၵႃႈတီႈဝူင်ႈၵၢင်ပီႈၼွင်ႉၸိူဝ်ႉၶိူဝ်းမႂ်းတင်းပီႈၼွင်ႉၸိူဝ်ႉၶိူဝ်းၵဝ်တႃႇသေႇသေၵမ်းလူၺ်ႈ၊ ဝႃႈၼင်ႇၼႆဝႆႉယဝ်ႉၼၼ်ႉလႄႈ၊ ၵႂႃႇၼိမ်ၼိမ်လီလီတႃႉ၊ ဝႃႈၼင်ႇၼႆသေယဝ်ႉ၊ တႃႇဝိတ်ႈ လုၵ်ႉၵႂႃႇလႄႈ ယေႃးၼသၼ်ႇ ၵေႃႈ ၶဝ်ႈၵႂႃႇၵႃႈၼႂ်းဝဵင်းသေဢေႃႈ။