1 Samuel 14 — Shan

1ဝၼ်းၼိုင်ႈ ယေႃးၼသၼ်ႇ လုၵ်ႈၸၢႆး သေႃးလူႉ ၼၼ်ႉ ယင်းဢမ်ႇယွၼ်းဢၶႂၢင်ႉတီႈၸဝ်ႈပေႃႈမၼ်းလႄႈ ႁွင်ႉဢဝ်ၵူၼ်းဢွၼ်ႇဢၼ်ပႃးလၢၵ်ႈၼၢၵ်ႈမၼ်းၼၼ်ႉသေလႄႈလၢတ်ႈဝႃႈ၊ မႃးဢိူၺ်း၊ ၶၢမ်ႈၵႂႃႇၸူးၵႃႈတီႈတပ်ႉ ၽီႉလိတ်ႉတီႉ ဢၼ်မီးယူႇၵႃႈတီႈၽၢႆႇပုၼ်ႉၼၼ်ႉတႃႉႁႃး၊ ဝႃႈၼင်ႇၼႆဢေႃႈ။-

2သေႃးလူႉ ယူႇၵႃႈတီႈတီႈသုတ်းလႅၼ်လိၼ်ဝဵင်း ၵီႉပႃႉ ၵႃႈတႂ်ႈတူၼ်ႈမၢၵ်ႇၸင်ႈ ဢၼ်မီးၵႃႈၼႂ်းဝၢၼ်ႈ မီႉၵြုၼ်ႇ ၼၼ်ႉလႄႈ ၶဝ်ၸိူဝ်းဢၼ်မီးလူၺ်ႈၵၼ်တင်းမၼ်းၼၼ်ႉ မီးသေႁူၵ်းပၢၵ်ႇၼိုင်ႈၵူၺ်းဢေႃႈ။-

3ဢႁီႉယႃႉ လုၵ်ႈၸၢႆး ဢႁီႉတုပ်ႉ ဢၼ်ပဵၼ်ပီႈၸၢႆး ဢီႉၶပုတ်ႉ ၊ ဢၼ်ပဵၼ်လုၵ်ႈၸၢႆး ၽီႉၼႁတ်ႉ ဢၼ်ပဵၼ်လုၵ်ႈၸၢႆး ဢေးလီႉ လႄႈ ပဵၼ်ၵေႃႉဢၼ် ၼုင်ႈသိူဝ်ႈသုပ်းသေလႄႈ ပဵၼ်ယိတ်ႈပရေႃးႁဵၵ်ႈထႃႇဝရႃႉၽြႃး ၵႃႈတီႈဝဵင်း သီႉလေႃႇ ၼၼ်ႉၵေႃႈမီးဢေႃႈ။ ၵူၼ်းတင်းလၢႆဢမ်ႇႁူႉလွင်ႈဢၼ် ယေႃးၼသၼ်ႇ ၵႂႃႇၼၼ်ႉ။

4ၵႃႈတီႈဝူင်ႈၵၢင်ၵႄႈလွႆဢၼ် ယေႃးၼသၼ်ႇ ၸမ်ၶၢမ်ႈၵႂႃႇၸူးၵႃႈတီႈတပ်ႉ ၽီႉလိတ်ႉတီႉ ၼၼ်ႉၸိူဝ်းၼၼ်ႉ၊ ၽၢႆႇၼိုင်ႈမီးၸဵင်ႇလႅမ်မၢၵ်ႇၽႃလူင်ဢၼ်ၼိုင်ႈလႄႈ၊ ၽၢႆႇၼိုင်ႈၵေႃႈမီးၸဵင်ႇလႅမ်မၢၵ်ႇၽႃလူင်ဢၼ်ၼိုင်ႈဢေႃႈ။ မၢၵ်ႇၽႃဢၼ်ၼိုင်ႈ လႆႈၸိုဝ်ႈ ပေႃႇၸိၵ်ႉ လႄႈ ဢၼ်ၼိုင်ႈလႆႈၸိုဝ်ႈ သေႇၼေႇ ဢေႃႈ။-

5ဢၼ်ၼိုင်ႈၸမ်ႉ၊ တင်ႈၶိုၼ်းယူႇၽၢႆႇတၢင်းႁွင်ႇ သိုဝ်ႈဝဵင်း မိၵ်ႉမတ်ႉ လႄႈ၊ ဢၼ်ၼိုင်ႈၸမ်ႉ၊ တင်ႈၶိုၼ်ႈယူႇၽၢႆႇတၢင်းၸၢၼ်းသိုဝ်ႈဝဵင်း ၵေႇပႃႉ ဢေႃႈ။-

6ယေႃးၼသၼ်ႇ လၢတ်ႈတီႈၵူၼ်းဢွၼ်ႇဢၼ်ပႃးလၢၵ်ႈၼၢၵ်ႈမၼ်းၼၼ်ႉလႄႈဝႃႈ၊ မႃးဢိူၺ်း၊ ၶၢမ်ႈၵႂႃႇၸူးၵႃႈတီႈတပ်ႉၵူၼ်းဢၼ်ဢမ်ႇၶၢမ်ႇမင်ႇၵလႃႇတၢင်းဢၼ်ထိူဝ်ႁိမ်းၸိူဝ်းၼၼ်ႉတႃႉႁႃး။ ထႃႇဝရႃႉၽြႃးၸၢင်ႈၶႄး တၵ်းပႂ်ႉဢမူႉႁႃးဢေႃႈ။ လွင်ႈမၼ်းၸမ်ႉ ဢမ်ႇမီးလွင်ႈဢၼ်တၵ်းႁႄႉတၵ်းၶႅၼ် တၢင်းဢၼ်ထႃႇဝရႃႉၽြႃးၵႄႇသႄႇၶျွတ်ႈဢဝ်ၵူၼ်းၼမ်ၼမ် ဢမ်ႇၼၼ် ၵူၼ်းၵေႇၵေႇၼၼ်ႉ၊ ဝႃႈၼင်ႇၼႆ သေယဝ်ႉ၊-

7ၵူၼ်းဢွၼ်ႇဢၼ်ပႃးလၢၵ်ႈၼၢၵ်ႈမၼ်းၼၼ်ႉၶိုၼ်းလဝ်ႊလၢတ်ႈလႄႈဝႃႈ၊ ႁဵတ်းၸွမ်းၵႃႈၼင်ႇဢၼ်ၸႂ်ၸဝ်ႈႁဝ်းမီးၼၼ်ႉသေၵမ်း။ ဝၢႆႇၵႂႃႇၸူးသေၵမ်း။ တူၺ်းၶႃႈလူး၊ ၵဝ်ၶႃႈတၵ်းၸွမ်းၵႃႈၼင်ႇဢၼ်ဢလူဝ်ႇၸဝ်ႈႁဝ်းမီးၼၼ်ႉဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

8ယေႃးၼသၼ်ႇ လၢတ်ႈလႄႈဝႃႈ၊ ႁႃးတၵ်းၶၢမ်ႈၵႂႃႇၸူးၵႃႈတီႈၶဝ်ၼၼ်ႉလႄႈ ၼႄပျႃးတူဝ်ႁႃးတီႈၶဝ်ၼၼ်ႉဢေႃႈ။-

9ပေႃးၶဝ်လၢတ်ႈတီႈႁႃးလႄႈဝႃႈ၊ ၵိုတ်းသဝ်းယူႇတေႃႇထိုင်ႁွတ်ႈႁဝ်းမႃးၸူးတီႈသူၼၼ်ႉတႃႉ၊ ဝႃႈၼင်ႇၼႆၸိုင်၊ ႁႃးယင်းဢမ်ႇၶိုၼ်ႈၸူးၵႃႈတီႈၶဝ်လႄႈ တၵ်းလႆႈၸုၵ်းၶၢမ်ႇယူႇတီႈဢၼ်ႁႃးယူႇၼၼ်ႉဢေႃႈ။-

10ဢမ်ႇၼၼ်ၵေႃႈ ပေႃးၶဝ်လၢတ်ႈလႄႈဝႃႈ၊ ၶိုၼ်ႈမႃးၸူးၵႃႈတီႈႁဝ်းတႃႉ၊ ဝႃႈၼင်ႇၼႆၸိုင်၊ ႁႃးတၵ်းလႆႈၶိုၼ်ႈၸူးဢေႃႈ။ ထႃႇဝရႃႉၽြႃးဢဝ်ၶဝ်ၼၼ်ႉ ဢၢပ်ႈပၼ်ၵႃႈၼႂ်းမိုဝ်းႁႃးယဝ်ႉ။ ဢၼ်ၼႆႉတၵ်းလႆႈပဵၼ်ပုၵ်ႉပႃႉၼီႉမိၵ်ႈတီႈႁႃးဢေႃႈ၊ ဝႃႈၼင်ႇၼႆသေယဝ်ႉ၊-

11သွင်ၶႃၼႄပျႃးတူဝ်သွင်ၶႃတီႈတပ်ႉၵူၼ်း ၽီႉလိတ်ႉတီႉ ၸိူဝ်းၼၼ်ႉလႄႈ ၵူၼ်း ၽီႉလိတ်ႉတီႉ ၸိူဝ်းၼၼ်ႉလၢတ်ႈလႄႈဝႃႈ၊ တူၺ်းလူး၊ ၵူၼ်း ႁေႇပြႄး ၸိူဝ်းၼၼ်ႉ ဢွၵ်ႇသေၵႃႈတီႈၼႂ်းၶုမ်ၼႂ်းႁူးဢၼ်ၶဝ်တဵတ်ႇမႅပ်ႉယူႇၼၼ်ႉမႃးလူင်ပႄႇ၊ ဝႃႈၼင်ႇၼႆသေလႄႈ၊-

12ၵူၼ်းတပ်ႉၸိူဝ်းၼၼ်ႉလၢတ်ႈတီႈ ယေႃးၼသၼ်ႇ ဢိၵ်ႇတင်းၵူၼ်းဢွၼ်ႇဢၼ်ပႃးလၢၵ်ႈၼၢၵ်ႈမၼ်းၼၼ်ႉလႄႈဝႃႈ၊ ၶိုၼ်ႈမႃးၸူးၵႃႈတီႈႁဝ်းတႃႉ၊ ႁဝ်းတၵ်းၼႄပျႃးသေၸိူဝ်ႉသေပိူင်ဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ ယေႃးၼသၼ်ႇ လၢတ်ႈတီႈၵူၼ်းဢွၼ်ႇ ဢၼ်ပႃးလၢၵ်ႈၼၢၵ်ႈမၼ်းၼၼ်ႉလႄႈဝႃႈ၊ ၸွမ်းလင်ၵဝ်ၶိုၼ်ႈတႃႉ။ ထႃႇဝရႃႉၽြႃး ဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းမဵဝ်း ဢီႉသရေႇလႃႉ ယဝ်ႉ၊ ဝႃႈၼင်ႇၼႆသေယဝ်ႉ၊-

13ယေႃးၼသၼ်ႇ ၵၢၼ်းသီႇတိၼ်ၶိုၼ်ႈလႄႈၵူၼ်းဢွၼ်ႇဢၼ်ပႃးလၢၵ်ႈၼၢၵ်ႈမၼ်းၼၼ်ႉၵေႃႈၸွမ်းဢေႃႈ။ ၶဝ်ၼၼ်ႉ လူမ်ႉတူၵ်းၵႃႈတီႈၽၢႆႇၼႃႈ ယေႃးၼသၼ်ႇ လႄႈ ၵူၼ်းဢွၼ်ႇဢၼ်ပႃးလၢၵ်ႈၼၢၵ်ႈမၼ်းၼၼ်ႉ ၸွမ်းဢဝ်တၢႆပႅတ်ႈၵႃႈတီႈၽၢႆႇလင်ၸဝ်ႈမၼ်းဢေႃႈ။-

14တၢင်းဢၼ်ၶႃႈၽၼ်းဢဝ်တၢႆ ဢၼ် ယေႃးၼသၼ်ႇ ဢိၵ်ႇတင်းၵူၼ်းဢွၼ်ႇဢၼ်ပႃးလၢၵ်ႈၼၢၵ်ႈမၼ်းႁဵတ်းၵမ်း ပထမႃႉၼၼ်ႉၸမ်ႉ၊ ၵႃႈၼႂ်းတီႈဢၼ်ပဵင်းထၢၼ်ႇတူင်ႈၼႃး ဢၼ်ဝူဝ်းၵူႈၼိုင်ႈထိူၼ်ႇထႆလႆႈၼၼ်ႉ၊ ၵူၼ်းတၢႆသေ သၢဝ်းၼိုင်ႈဢေႃႈ။-

15ၵႃႈၼႂ်းတပ်ႉဢၼ်မီးၵႃႈတီႈပၢင်ႇတီႈပဵင်း ဢိၵ်ႇတင်းၵႃႈၼႂ်းၵူၼ်းတင်းသဵင်ႈတင်းလူင်ၼၼ်ႉ မီးတၢင်းဢၼ်သၼ်ႇဝႆလႄႈ ၵူၼ်းတပ်ႉၸိူဝ်းၼၼ်ႉ ဢိၵ်ႇတင်းၵူၼ်းဢၼ်ႁိမ်ဢဝ်ႁူင်ႇဢဝ်ၸိူဝ်းၼၼ်ႉၵေႃႈသၼ်ႇဝႆလႄႈ လိၼ်မိူင်းၵေႃႈတူင်ႉၼိုင်ထၼ်ႈပေႃးမီးတၢင်းဢၼ်သၼ်ႇဝႆဢၼ်ယႂ်ႇၼႃႇလူင်လၢင်ဢေႃႈ။

16ၵူၼ်းပႂ်ႉၵၢင်ၵႃႈတီႈဝဵင်း ၵီႉပႃႉ ၼႂ်းလိၼ် ပိၼ်ႇယႃႇမိၼ်ႇ ၸိူဝ်းၼၼ်ႉလူတူၺ်းလႄႈ ႁၼ်မုၵ်ႉၵူၼ်းၸိူဝ်းၵူၼ်းၸိူဝ်းၼၼ်ႉ သုတ်ႈၵႂႃႇယွမ်းၵႂႃႇလႄႈ ၵေႃႉၼိုင်ႈလႄႈၵေႃႉၼိုင်ႈ တမ်ၵၼ်ယႅၼ်းၵၼ်ယူႇသေလႄႈၵႂႃႇဢေႃႈ။-

17မိူဝ်ႈၼၼ်ႉ သေႃးလူႉ ၸီႇယၢင်ႇတီႈၶဝ်ၸိူဝ်းဢၼ်မီးတီႈမၼ်းၼၼ်ႉလႄႈဝႃႈ၊ ၼပ်ႉဢၢၼ်ႇၵူၼ်းတင်းလၢႆ ႁႂ်ႈလႆႈႁူႉလွင်ႈဢၼ်ၽူႈလႂ်ၵေႃႉလႂ်ဢွၵ်ႇသေၵႃႈတီႈႁဝ်းၵႂႃႇၼၼ်ႉတႃႉ၊ ဝႃႈၼင်ႇၼႆလႄႈ ၶဝ်ဢွၼ်ၵၼ်ၼပ်ႉဢၢၼ်ႇလႄႈ ယေႃးၼသၼ်ႇ ဢိၵ်ႇတင်းၵူၼ်းဢွၼ်ႇ ဢၼ်ပႃးလၢၵ်ႈၼၢၵ်ႈမၼ်းၼၼ်ႉဢမ်ႇမီး။-

18သေႃးလူႉ လၢတ်ႈတီႈ ဢႁီႉယႃႉ လႄႈဝႃႈ၊ ဢဝ်တိူၵ်ႈတႃႇၽြႃးပဵၼ်ၸဝ်ႈမႃးၵႃႈတီႈၼႆႈသေၵမ်း။ လွင်ႈမၼ်းၸမ်ႉ ၼႂ်းၶိင်ႇမိူဝ်ႈၼၼ်ႉ တိူၵ်ႈတႃႇၽြႃးပဵၼ်ၸဝ်ႈမီးယူႇတီႈၵူၼ်းမဵဝ်း ဢီႉသရေႇလႃႉ ဢေႃႈ၊ ဝႃႈၼင်ႇၼႆဢေႃႈ။-

19ၼႂ်းမိူဝ်ႈဢၼ် သေႃးလူႉ ယင်းတိုၵ်ႉလၢတ်ႈၵႂၢမ်းတေႃႇၵၼ်တင်းယိတ်ႈပရေႃးႁဵၵ်ႈယူႇၼၼ်ႉၸိုင်၊ သဵင်ဢၼ်ႁုၼ်ႉဢၼ်မေႃး ၵႃႈတီႈတပ်ႉ ၽီႉလိတ်ႉတီႉ ၼၼ်ႉယႂ်ႇမႃးယူႇလႄႈ သေႃးလူႉ လၢတ်ႈတီႈယိတ်ႈပရေႃးႁဵၵ်ႈလႄႈဝႃႈ၊ ယိုတ်းဢဝ်မိုဝ်းၶိုၼ်းလူးၵွၼ်ႇတႃႉ၊ ဝႃႈၼင်ႇၼႆသေယဝ်ႉ၊-

20သေႃးလူႉ ဢိၵ်ႇတင်းၵူၼ်းၵႃႈဢၼ်မီးတီႈမၼ်းၸိူဝ်းၼၼ်ႉ ၸူႉၵၼ်တုမ်ၵၼ်သေလႄႈ ၶီႇသိုၵ်းၸူးလႄႈထူပ်းႁၼ် ၵေႃႉၼိုင်ႈလႄႈၵေႃႉၼိုင်ႈ ဢဝ်လၢပ်ႇဢဝ်လႅဝ်းၽၼ်းၵၼ်ယူႇသေလႄႈ မီးတၢင်းဢၼ်တပ်ႉလူႉတပ်ႉတႅၵ်ႇ ဢၼ်ယႂ်ႇၼႃႇလူင်လၢင်ဢေႃႈ။-

21ၵူၼ်း ႁေႇပြႄး ဢၼ်ၶဝ်ႈယူႇၽၢႆႇၵူၼ်း ၽီႉလိတ်ႉတီႉ ၊ မိူဝ်ႈဢွၼ်တၢင်းၼၼ်ႉလႄႈ လုၵ်ႉသေၵႃႈတီႈၵူႈတီႈၵူႈလႅၼ် ၸွမ်းလူၺ်ႈၵၼ်တင်းၶဝ်ၼၼ်ႉသေလႄႈ ၶိုၼ်ႈၸူးၵႃႈတီႈတပ်ႉၼၼ်ႉၸိူဝ်းၼၼ်ႉၵေႃႈ ဢွၼ်ၵၼ်ၶၢႆႉပုတ်ႈမႃးယူႇၽၢႆႇၵူၼ်းမဵဝ်း ဢီႉသရေႇလႃႉ တင်းလၢႆ ဢၼ်ပႃးတီႈ သေႃးလူႉ တင်း ယေႃးၼသၼ်ႇ ၼၼ်ႉသေဢေႃႈ။-

22ၵူၼ်းမဵဝ်း ဢီႉသရေႇလႃႉ ၵႃႈဢၼ်တဵတ်ႇမႅပ်ႉလႄႈယူႇၵႃႈၼိူဝ်ႁၢၼ်ႉလွႆ ဢေႇၽရိမ်ႇ ၸိူဝ်းၼၼ်ႉၵေႃႈ မိူဝ်ႈဢၼ်ၶဝ်ငိၼ်းလွင်ႈဢၼ် ၵူၼ်း ၽီႉလိတ်ႉတီႉ ဢွၵ်ႇပၢႆႈၼၼ်ႉၸိုင် ၶီႇသိုၵ်းလႄႈလိုပ်ႈၸွမ်းလမ်းၸွမ်းၼႃႇလူင်လၢင်ဢေႃႈ။-

23ၼင်ႇၼၼ်လႄႈ ထႃႇဝရႃႉၽြႃးၵႄႇသႄႇၶျွတ်ႈဢဝ်မဵဝ်း ဢီႉသရေႇလႃႉ ၼႂ်းဝၼ်းၼၼ်ႉလႄႈ၊ ဢမူႉသိုၵ်းၼၼ်ႉ ပူၼ်ႉသေၵႃႈတီႈဝဵင်း ပႅတ်ႉဢႃႇဝႅၼ်ႇ ၵႂႃႇဢေႃႈ။

24ၼႂ်းဝၼ်းၼၼ်ႉ ၵူၼ်းမဵဝ်း ဢီႉသရေႇလႃႉ တင်းလၢႆ လႆႈၶၢမ်ႇတုၵ်ႉၶႃႉတၢင်းဢၼ်ၶၢၼ်ၸႂ်ဢေႃႈ။ လွင်ႈမၼ်းၸမ်ႉ သေႃးလူႉ ပၼ်တၢင်းဢၼ်ၵိၼ်ႇဢၼ်ဝႃႈတီႈၵူၼ်းတင်းလၢႆလႄႈဝႃႈ၊ ႁႂ်ႈၵေႃႉဢၼ်ၵိၼ်တၢင်းၵိၼ်တၢင်းၶူပ်း ၸူဝ်ႈဢၼ်ဢမ်ႇပႆႇႁွတ်ႈထိုင်ၶိင်ႇႁူဝ်ၶမ်ႈလႄႈ ၵဝ်ဢမ်ႇပႆႇပေႇၸႂ်ၵဝ်တီႈရၢၼ်ႇသူႇၵဝ်ၸိူဝ်းၼၼ်ႉၼၼ်ႉ၊ ထုၵ်ႇတၢင်းဢၼ်ၵိၼ်ႇဢၼ်ဝႃႈသေၵမ်းလူၺ်ႈ၊ ဝႃႈၼင်ႇၼႆဢေႃႈ။ ၼင်ႇၼၼ်လႄႈ ၽူႈလႂ်သေၵေႃႉသေၵူၼ်း ဢမ်ႇၵိၼ်တၢင်းၵိၼ်တၢင်းၶူပ်း၊-

25ၵူၼ်းၵႃႈမီးၼၼ်ႉ ႁွတ်ႈထိုင်ၵႃႈၼႂ်းပႃႇမႆႉပႃႇတွၵ်ႇလႄႈ ၼမ်ႉၽိုင်ႈမီးယူႇၵႃႈၼိူဝ်လိၼ်ဢေႃႈ။-

26မိူဝ်ႈဢၼ်ၵူၼ်းတင်းလၢႆၶဝ်ႈၵႃႈၼႂ်းပႃႇမႆႉပႃႇတွၵ်ႇၼၼ်ႉၸိုင်၊ ပိၵ်ႉသမ်ႉၼမ်ႉၽိုင်ႈယွတ်ႇတူၵ်းယူႇၸိၵ်းၸိၵ်းသေၵေႃႈ၊ ၵွပ်ႈပိူဝ်ႈဢၼ် ၵူၼ်းတင်းလၢႆၵူဝ်ႁႄတၢင်းဢၼ်ၵိၼ်ႇဢၼ်ဝႃႈၼၼ်ႉလႄႈ ၽူႈလႂ်ဢမ်ႇဢဝ်မိုဝ်းမၼ်း ဢဝ်သႂ်ႇၵႃႈတီႈသူပ်းမၼ်း သေၵေႃႉသေၵူၼ်း။-

27ၵူၺ်းၵႃႈ ယေႃးၼသၼ်ႇ ၸမ်ႉ၊ ၵွပ်ႈပိူဝ်ႈဢၼ်ဢမ်ႇငိၼ်းလွင်ႈဢၼ် ၸဝ်ႈပေႃႈမၼ်းပၼ်တၢင်းဢၼ်ၵိၼ်ႇဢၼ်ဝႃႈတီႈၵူၼ်းတင်းလၢႆၼၼ်ႉလႄႈ ဢဝ်ပၢႆၵၼ်းႁွၵ်ႇဢၼ်မၼ်းယိပ်းၵမ်ၼၼ်ႉ ၸွမ်ႇၸုမ်ႇၵႃႈၼႂ်းႁူဝ်ၼမ်ႉႁူင်းၽိုင်ႈလႄႈ ဢဝ်မိုဝ်းမၼ်းဢဝ်သႂ်ႇသူပ်းသေယဝ်ႉ မၢၵ်ႇတႃၸိုၼ်ႈလီလႅင်းလီမႃးဢေႃႈ။-

28မိူဝ်ႈၼၼ်ႉ ၵူၼ်းၵေႃႉၼိုင်ႈလဝ်ႊလၢတ်ႈလႄႈဝႃႈ၊ ၸဝ်ႈပေႃႈၸဝ်ႈႁဝ်းပၼ်တၢင်းဢၼ်ၵိၼ်ႇဢၼ်ဝႃႈၼႃႇလူင်လၢင် တီႈၵူၼ်းတင်းလၢႆလႄႈဝႃႈ၊ ႁႂ်ႈၵေႃႉဢၼ်ၵိၼ်တၢင်းၵိၼ်ဝၼ်းမိူဝ်ႈၼႆႉၼၼ်ႉထုၵ်ႇတၢင်းဢၼ်ၵိၼ်ႇဢၼ်ဝႃႈသေၵမ်းလူၺ်ႈ၊ ဝႃႈၼင်ႇၼႆၶႃႈဢေႃႈ၊ ဝႃႈၼင်ႇၼႆဢေႃႈ။ ၵူၼ်းတင်းလၢႆၵေႃႈ ႁိူဝ်ႉၼူၼ်းႁႅင်းဢူၼ်ႈသေလႄႈယူႇဢေႃႈ။-

29ယေႃးၼသၼ်ႇ ၵေႃႈလၢတ်ႈလႄႈဝႃႈ၊ ၸဝ်ႈပေႃႈၵဝ်ၼၼ်ႉ ယႃႉယူၵ်ႉၵူၼ်းဝၢၼ်ႈၵူၼ်းမိူင်းယဝ်ႉ။ တူၺ်းလွင်ႈဢၼ်မၢၵ်ႇတႃၵဝ်ၸိုၼ်ႈလီလႅင်းလီၵွပ်ႈပိူဝ်ႈဢၼ်ၵဝ်ၵိၼ်ၼမ်ႉၽိုင်ႈၼႆႉဢိတ်းဢွၼ်ႇၼိုင်ႈၵူၺ်းၼၼ်ႉသေၵမ်းတႃႉ။-

30သင်ၵူၼ်းတင်းလၢႆ လႆႈၵိၼ်ဢုၵ်ႉၸႃႇရၢၼ်ႇသူႇဢၼ်ၶဝ်ထူပ်းႁၼ်ၼၼ်ႉ ၸွမ်းၵႃႈၼင်ႇဢၼ်ၶဝ်ၶႂ်ႈၵိၼ်ၼၼ်ႉ ၼႂ်းဝၼ်းမိူဝ်ႈၼႆႉၸိုင်၊ ဢၵျူဝ်းတၵ်းယႂ်ႇၼႃႇလူင်လၢင်ထၢၼ်ႇလႂ်ၼၼ်ႉလူင်ပႄႇ။ လႆႈမီးတၢင်းဢၼ်ၶႃႈၽၼ်းဢဝ်တၢႆၵူၼ်း ၽီႉလိတ်ႉတီႉ တင်းလၢႆ ဢၼ်ယဵင်ႈၶႅၼ်းယႂ်ႇၼႃႇၼၼ်ႉယဝ်ႉလူင်ပႄႇ၊ ဝႃႈၼင်ႇၼႆဢေႃႈ။-

31ၼႂ်းဝၼ်းၼၼ်ႉ ၶဝ်တိုၵ်းတေႃးယႃႉပႅတ်ႈၵူၼ်း ၽီႉလိတ်ႉတီႉ ၸိူဝ်းၼၼ်ႉ ဢဝ်ၵႃႈတီႈဝဵင်း မိၵ်ႉမတ်ႉ တေႃႇထိုင်ႁွတ်ႈ ဝဵင်း ဢႃႇၸလုၼ်ႇ ဢေႃႈ။ ၵူၼ်းတင်းလၢႆႁိူဝ်ႉၼူၼ်းႁႅင်းဢူၼ်ႈၼႃႇလူင်လၢင်လႄႈ၊-

32ၵူၼ်းတင်းလၢႆဢွၼ်ၵၼ်ႁိမ်ဢဝ်ႁူင်ႇဢဝ်ဢုၵ်ႉၸႃႇရၢၼ်ႇသူႇဢၼ်ဝႃႈသူဝ်း၊ ဝူဝ်း၊ ဝူဝ်းဢွၼ်ႇ၊ ၵူၼ်းတင်းလၢႆသေယဝ်ႉ၊ ဢဝ်တၢႆၵႃႈၼိူဝ်လိၼ်လႄႈ ၵူၼ်းတင်းလၢႆၵိၼ်ဢိၵ်ႇလူၺ်ႈၵၼ်တင်းလိူတ်ႈမၼ်းဢေႃႈ။

33ပိူၼ်ႈဢွၼ်ၵၼ်လဝ်ႊလၢတ်ႈတီႈ သေႃးလူႉ လႄႈဝႃႈ၊ ၵူၼ်းတင်းလၢႆဢွၼ်ၵၼ်ၵိၼ်ဢိၵ်ႇလူၺ်ႈၵၼ်တင်းလိူတ်ႈမၼ်းၸိူဝ်ႉၼင်ႇၼၼ်လႄႈ ၽိတ်းပိူင်ႈထႃႇဝရႃႉၽြႃးၶႃႈယဝ်ႉ၊ ဝႃႈၼင်ႇၼႆသေယဝ်ႉ၊ မၼ်းၵေႃႈလၢတ်ႈလႄႈဝႃႈ၊ သူၼႆႉသဵတ်ႈၸႃႇလူႉယဝ်ႉ။ ဢွၼ်ၵၼ်ၵိင်ႈဢဝ်မၢၵ်ႇႁိၼ်ဢၼ်ယႂ်ႇၼႃႇမႃးတီႈၵဝ်ဝၼ်းမိူဝ်ႈၼႆႉတႃႉ၊ ဝႃႈၼင်ႇၼႆလႄႈ၊-

34သေႃးလူႉ သမ်ႉလၢတ်ႈလႄႈဝႃႈ၊ ဢွၼ်ၵၼ်ၵႂႃႇၵႃႈၼႂ်းၵူၼ်းတင်းလၢႆၵေႃႉႁူးၵေႃႉတၢင်းလႄႈမွၵ်ႇလၢတ်ႈလႄႈဝႃႈ၊ ႁႂ်ႈၵူၼ်းႁင်းၽႂ်ႁင်းမၼ်း ဢဝ်သူဝ်းဝူဝ်းမၼ်းမႃးၵႃႈတီႈၼႆႈသေလႄႈ ဢဝ်တၢႆလႄႈၵိၼ်ၵႃႈတီႈၼႆႈသေ။ ယႃႇပေၵိၼ်ဢိၵ်ႇလူၺ်ႈၵၼ်တင်းလိူတ်ႈမၼ်းလႄႈၽိတ်းပိူင်ႈထႃႇဝရႃႉၽြႃး၊ ဝႃႈၼင်ႇၼႆတႃႉ၊ ဝႃႈၼင်ႇၼႆသေယဝ်ႉ၊ ၵူၼ်းတင်းသဵင်ႈတင်းလူင် ဢဝ်သူဝ်းဝူဝ်းၶဝ်မႃး မိူဝ်ႈၶမ်ႈၼၼ်ႉႁင်းၽႂ်ႁင်းမၼ်းလႄႈ ဢဝ်တၢႆၵႃႈတီႈၼၼ်ႈဢေႃႈ။-

35သေႃးလူႉ ၵေႃႈ တႄႇႁဵတ်းယိတ်ႈပလၢင်ႇပုၼ်ႈထႃႇဝရႃႉၽြႃးဢေႃႈ။ ဢၼ်ၼၼ်ႉၸမ်ႉ၊ ပဵၼ်ယိတ်ႈပလၢင်ႇ ပထမႃႉဢၼ်မၼ်းတႄႇႁဵတ်းပုၼ်ႈထႃႇဝရႃႉၽြႃးဢေႃႈ။-

36လႆႈသမ်ႉ သေႃးလူႉ လၢတ်ႈလႄႈဝႃႈ၊ ႁဝ်းဢွၼ်ၵၼ်လူင်းလႄႈလိုပ်ႈၸွမ်းၵူၼ်း ၽီႉလိတ်ႉတီႉ တင်းလၢႆ ၶိင်ႇၵၢင်ၶိုၼ်းလႄႈ ယင်းဢမ်ႇႁႂ်ႈလႆႈၵိုတ်းလႆႈၵျၢၼ်ႇဝႆႉသေၵေႃႉသေၵူၼ်းလႄႈ ယႃႉၽဵဝ်ႈၶဝ်ပႅတ်ႈတေႃႇထိုင်ႁွတ်ႈမိူင်းလႅင်းတႃႉႁဝ်း၊ ဝႃႈၼင်ႇၼႆသေယဝ်ႉ၊ ၶဝ်ၵေႃႈႁပ်ႉတုင်းဢဝ်လႄႈဝႃႈ၊ ႁဵတ်းၸွမ်းၵႃႈၼင်ႇဢၼ်ၸႂ်ၸဝ်ႈႁဝ်းမီးၼၼ်ႉသေၵမ်းၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ ယိတ်ႈပရေႃးႁဵၵ်ႈလၢတ်ႈလႄႈဝႃႈ သုတ်ႉၸပ်းသုတ်ႉၸူးၵႃႈတီႈၽြႃးပဵၼ်ၸဝ်ႈၵႃႈတီႈၼႆႈတႃႉႁဝ်း၊ ဝႃႈၼင်ႇၼႆဢေႃႈ။-

37သေႃးလူႉ ၵေႃႈ တွင်းပၢၼ်ႇယွၼ်းဢၶႂၢင်ႉတီႈၽြႃးပဵၼ်ၸဝ်ႈလႄႈဝႃႈ၊ ၶႃႈၸဝ်ႈတၵ်းလႆႈလူင်းလႄႈလိုပ်ႈၸွမ်းၵူၼ်း ၽီႉလိတ်ႉတီႉ တင်းလၢႆတီႈၶႃႈႁိုဝ်။ ၸဝ်ႈႁဝ်းတၵ်းဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းမဵဝ်း ဢီႉသရေႇလႃႉ တီႈၶႃႈႁိုဝ်၊ ဝႃႈၼင်ႇၼႆသေၵေႃႈ၊ မၼ်းၸဝ်ႈဢမ်ႇၶိုၼ်းပျၢၼ်ႇၶိုၼ်းလၢတ်ႈၼႂ်းဝၼ်းၼၼ်ႉ။-

38သေႃးလူႉ ၵေႃႈလၢတ်ႈလႄႈဝႃႈ၊ ၵူၼ်းဢၼ်မီးဢရႃႇၵႃႈၼႂ်းၵူၼ်းတင်းလၢႆၶဝ်ဢိူၺ်း၊ ဢွၼ်ၵၼ်သုတ်ႉၸပ်းသုတ်ႉၸူးၵႃႈတီႈၼႆႈ ႁႂ်ႈလႆႈႁူႉႁၼ်လွင်ႈဢၼ်ၽိတ်းပိူင်ႈၼႂ်းဝၼ်းမိူဝ်ႈၼႆႉၼၼ်ႉ ပဵၼ်လွင်ႈတၢင်းဢၼ်လႂ်ၼၼ်ႉတႃႉ။-

39ၵႃႈၼင်ႇဢၼ်ထႃႇဝရႃႉၽြႃး ဢၼ်ၵႄႇသႄႇၶျွတ်ႈဢဝ်မဵဝ်း ဢီႉသရေႇလႃႉ ၼၼ်ႉ ဢသၢၵ်ႈလိပ်းယူႇၼၼ်ႉ၊ ပဵၼ်လုၵ်ႈၸၢႆးၵဝ် ယေႃးၼသၼ်ႇ သေၵေႃႈ တၵ်းလႆႈတၢႆဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆသေယဝ်ႉ၊ ၼႂ်းၵူၼ်းတင်းလၢႆၼၼ်ႉ ၽူႈလႂ်ဢမ်ႇၶိုၼ်းလဝ်ႊၶိုၼ်းလၢတ်ႈသေၵေႃႉသေၵူၼ်း။-

40မၼ်းၵေႃႈလၢတ်ႈတီႈၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်လႄႈဝႃႈ၊ သူဢွၼ်ၵၼ်ယူႇၽၢႆႇၼိုင်ႈတႃႉ။ ၵဝ်ဢိၵ်ႇတင်းလုၵ်ႈၸၢႆးၵဝ် ယေႃးၼသၼ်ႇ တၵ်းယူႇၽၢႆႇၼိုင်ႈဢေႃႈ၊ ဝႃႈၼင်ႇၼႆသေယဝ်ႉ၊ ၵူၼ်းတင်းလၢႆလဝ်ႊလၢတ်ႈတီႈ သေႃးလူႉ လႄႈဝႃႈ၊ ႁဵတ်းၵႃႈၼင်ႇဢၼ်ၸႂ်ၸဝ်ႈႁဝ်းမီးၼၼ်ႉသေၵမ်းၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

41သေႃးလူႉ သူးတွင်းတီႈထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ လႄႈဝႃႈ၊ ၶႅၼ်းတေႃႈၸီႇယၢင်ႇသိုဝ်ႈသိုဝ်ႈတေႃႇတေႃႇသေၵမ်းတီႈၶႃႈ၊ ဝႃႈၼင်ႇၼႆသေယဝ်ႉ၊ မၼ်းၸဝ်ႈမၢတ်ႈမၢႆ သေႃးလူႉ တင်း ယေႃးၼသၼ်ႇ လႄႈ ၵူၼ်းတင်းလၢႆလွတ်ႈဢေႃႈ။-

42သေႃးလူႉ ၵေႃႈ လၢတ်ႈလႄႈဝႃႈ၊ တူၵ်းၸႃႇၵွၵ်ႈပုၼ်ႈၵဝ် ဢိၵ်ႇတင်းလုၵ်ႈၸၢႆးၵဝ် ယေႃးၼသၼ်ႇ တႃႉ၊ ဝႃႈၼင်ႇၼႆသေယဝ်ႉ၊ မၼ်းၸဝ်ႈမၢတ်ႈမၢႆ ယေႃးၼသၼ်ႇ ဢေႃႈ။-

43သေႃးလူႉ ၵေႃႈ လၢတ်ႈတီႈ ယေႃးၼသၼ်ႇ လႄႈဝႃႈ၊ မွၵ်ႇလၢတ်ႈလွင်ႈတၢင်းဢၼ်မႂ်းႁဵတ်းၼၼ်ႉတႃႉ၊ မိူဝ်ႈဢၼ်ဝႃႈၼင်ႇၼႆၸိုင်၊ ယေႃးၼသၼ်ႇ မွၵ်ႇလၢတ်ႈတီႈမၼ်းလႄႈဝႃႈ၊ ၵဝ်ၶႃႈလႆႈဢဝ်တင်းပၢႆၵၼ်းႁွၵ်ႇ ဢၼ်ၵဝ်ၶႃႈယိပ်းၵမ်ၼၼ်ႉ ဢဝ်ၼမ်ႉၽိုင်ႈဢိတ်းဢွၼ်ႇၼိုင်ႈလႄႈ ၸိမ်းတူၺ်းမႅၼ်ႈၶႃႈယဝ်ႉ။ ဢလူဝ်း၊ ၵဝ်ၶႃႈတၵ်းလႆႈတၢႆလူင်ပႄႇ၊ ဝႃႈၼင်ႇၼႆဢေႃႈ။-

44သေႃးလူႉ ၵေႃႈၶိုၼ်းလၢတ်ႈလႄႈဝႃႈ၊ ယေႃးၼသၼ်ႇ ဢိူၺ်း၊ ပေႃးမႂ်းၼႆႉဢမ်ႇတၢႆဢမၢၼ်ႇၶၼ်ပဵၼ်ၸိုင်၊ ယင်းဢမ်ႇၵႃးဢၼ်ၼၼ်ႉလႄႈ ႁႂ်ႈၽြႃးပဵၼ်ၸဝ်ႈႁဵတ်းလိူဝ်တွၼ်းသေၼၼ်ႉတီႈၵဝ်သေၵမ်းလူၺ်ႈ၊ ဝႃႈၼင်ႇၼႆသေၵေႃႈ။-

45ၵူၼ်းတင်းလၢႆဢွၼ်ၵၼ်လဝ်ႊလၢတ်ႈတီႈ သေႃးလူႉ လႄႈဝႃႈ၊ ယေႃးၼသၼ်ႇ ဢၼ်ႁဵတ်းၵျေးၸူးတၢင်းဢၼ်ၵႄႇသႄႇၶျွတ်ႈဢဝ်မဵဝ်း ဢီႉသရေႇလႃႉ ၼႆႉယဝ်ႉၼႆႉ တၵ်းလႆႈတၢႆၶႃႈႁိုဝ်။ ယႃႇႁႂ်ႈပဵၼ်ၸိူဝ်ႉၼင်ႇၼၼ်သေၵမ်းၶႃႈ။ ၵႃႈၼင်ႇဢၼ်ထႃႇဝရႃႉၽြႃးဢသၢၵ်ႈလိပ်းယူႇၼၼ်ႉ၊ ၶူၼ်ႁူဝ်မၼ်းဢမ်ႇလႆႈတူၵ်းၵႃႈၼိူဝ်လိၼ်သေသဵၼ်ႈၶႃႈ။ မၼ်းၼႆႉၽွမ်ႉလူၺ်ႈၵၼ်တင်းၽြႃးပဵၼ်ၸဝ်ႈဝၼ်းမိူဝ်ႈၼႆႉသေလႄႈ ႁဵတ်းယဝ်ႉၶႃႈယဝ်ႉ၊ ဝႃႈၼင်ႇၼႆသေယဝ်ႉ ၵူၼ်းတင်းလၢႆၵႄႇသႄႇၼုၵ်ႈဢဝ် ယေႃးၼသၼ်ႇ ႁႂ်ႈဢသၢၵ်ႈမၼ်းလႆႈၵတ်းယဵၼ်ၶျၢမ်းသႃႇဢေႃႈ။-

46လိုၼ်းၼၼ်ႉ သေႃးလူႉ လုၵ်ႉသေၵႃႈတီႈဢၼ်လိုပ်ႈၸွမ်းၵူၼ်း ၽီႉလိတ်ႉတီႉ ၸိူဝ်းၼၼ်ႉၼၼ်ႉ ၶိုၼ်းၶိုၼ်ႈမိူဝ်းၵႂႃႇသေဢေႃႈ။ ၵူၼ်း ၽီႉလိတ်ႉတီႉ ၸိူဝ်းၼၼ်ႉၵေႃႈ ၶိုၼ်းမိူဝ်းၵႂႃႇၸူးၵႃႈတီႈဢၼ်ၶဝ်ယူႇၶဝ်သဝ်းၼၼ်ႉသေဢေႃႈ။

47ၼင်ႇၼၼ်လႄႈ သေႃးလူႉ လႆႈမီးဢႃႇၼႃႇဢၼ်ဢုပ်ႉပိူင်ႇၵႃႈၼိူဝ်မဵဝ်း ဢီႉသရေႇလႃႉ သေယဝ်ႉ၊ တိုၵ်းတေႃးရၢၼ်ႇသူႇမၼ်း ၵႃႈဢၼ်လဵပ်ႈႁွပ်ႈမၼ်းယူႇၵူႈၽၢႆႇၵူႈပႃႈဢၼ်ဝႃႈ ၵူၼ်းမိူင်း မေႃႇၽႃႉ ၊ ၵူၼ်းမဵဝ်း ဢမ်ႇမုၼ်ႇ ၊ ၵူၼ်းမိူင်း ဢေႇတုမ်ႇ ၊ ၶုၼ် ၸေႃႇၽႃႉ ၼမ်ၼႃႇ၊ ၵူၼ်း ၽီႉလိတ်ႉတီႉ တင်းလၢႆၸိူဝ်းၼၼ်ႉလႄႈ၊ ၵႃႈတီႈၵႃႈဢၼ်မၼ်းၶီႇသိုၵ်းၵႂႃႇၼၼ်ႉ မၼ်းပႄႉၼႅင်ႇၶဝ်ဢေႃႈ။-

48မၼ်းႁဵတ်းႁတ်းႁတ်းႁၢၼ်ႁၢၼ်ၼႃႇလူင်လၢင်လႄႈ တိုၵ်းတေႃးယႃႉပႅတ်ႈၵူၼ်းမဵဝ်း ဢႃႇမလႅၵ်ႉ တင်းလၢႆသေလႄႈ၊ ၵႄႇသႄႇဢဝ်မဵဝ်း ဢီႉသရေႇလႃႉ လွတ်ႈသေၵႃႈၼႂ်းမိုဝ်းၶဝ်ၸိူဝ်းဢၼ် ႁိမ်ဢဝ်ႁူင်ႇဢဝ်ၶဝ်ၼၼ်ႉၼၼ်ႉဢေႃႈ။-

49လုၵ်ႈၸၢႆး သေႃးလူႉ ၸမ်ႉ၊ ပဵၼ် ယေႃးၼသၼ်ႇ၊ ဢီႉထဝီႉ၊ မေႇလၶီႉသႂႃႇ ဢေႃႈ။ ၸိုဝ်ႈသဵင်လုၵ်ႈယိင်းမၼ်းသွင်ၵေႃႉၸမ်ႉ၊ ၸိုဝ်ႈသဵင်ၵေႃႉယႂ်ႇၼၼ်ႉပဵၼ် မေးရပ်ႉ ၊ ၸိုဝ်ႈသဵင်ၵေႃႉလဵၵ်ႉၼၼ်ႉပဵၼ် မီႉၶႃႇလႃႉ ဢေႃႈ။-

50ၸိုဝ်ႈသဵင်မေး သေႃးလူႉ ၸမ်ႉ၊ ပဵၼ် ဢႁီႉၼွင်ႇ လုၵ်ႈယိင်း ဢႁီႉမတ်ႉ ဢေႃႈ။ ၸိုဝ်ႈသဵင်ၶုၼ်ပူဝ်ႇၶျုၵ်ႈမၼ်းၸမ်ႉ၊ ပဵၼ် ဢႃႉပၼႃး လုၵ်ႈၸၢႆး ၼေးရႃႉ ပေႃႈၼႃႉ သေႃးလူႉ ဢေႃႈ။-

51ၵီႉသႃႉ ဢၼ်ပဵၼ်ပေႃႈ သေႃးလူႉ ဢိၵ်ႇတင်း ၼေးရႃႉ ဢၼ်ပဵၼ်ပေႃႈ ဢႃႉပၼႃး ၼၼ်ႉ ပဵၼ်လုၵ်ႈၸၢႆး ဢပျေႇလႃႉ ဢေႃႈ။-

52ၸူဝ်ႈပၢၼ် သေႃးလူႉ ၼၼ်ႉ၊ လႆႈတိုၵ်းသိုၵ်းၵူၼ်း ၽီႉလိတ်ႉတီႉ တင်းလၢႆ ၼႃႇလူင်လၢင်ဢေႃႈ။ မိူဝ်ႈဢၼ် သေႃးလူႉ ထူပ်းႁၼ်ၵေႃႉဢၼ်ႁႅင်းယႂ်ႇ၊ ၵေႃႉဢၼ်ႁတ်းႁၢၼ်ၼၼ်ႉၸိုင် မၼ်းမီးထုင်းၸၢမ်ႇဢၼ်ႁွင်ႉဝႆႉသိမ်းဝႆႉဢေႃႈ။