1 Samuel 26 — Shan

1လႆႈသမ်ႉ ၵူၼ်း ၸီႉၽႃႉ တင်းလၢႆ မႃးတီႈ သေႃးလူႉ ၵႃႈတီႈဝဵင်း ၵီႉပႃႉ ၼၼ်ႉသေလႄႈလဝ်ႊလၢတ်ႈလႄႈဝႃႈ၊ တႃႇဝိတ်ႈ ၼၼ်ႉတဵတ်ႇမႅပ်ႉယူႇၵႃႈတီႈလွႆ ႁၶီႉလႃႉ ဢၼ်မီးၵႃႈတီႈၽၢႆႇၼႃႈ ယေႇသီႉမုၼ်ႇ ၼၼ်ႉဢမ်ႇၸႂ်ႈတီႈၶႃႈႁိုဝ်။ ဝႃႈၼင်ႇၼႆသေယဝ်ႉ၊-

2သေႃးလူႉ လုၵ်ႉလႄႈပႃးဢဝ်ၵူၼ်းမဵဝ်း ဢီႉသရေႇလႃႉ သၢမ်ႁဵင် ဢၼ်လိူၵ်ႈၵဵပ်းဢဝ်ၼၼ်ႉယူႇသေလႄႈ လူင်းၵႂႃႇၵႃႈတီႈထိူၼ်ႇ ၸီႉၽႃႉ ႁႂ်ႈလႆႈႁႃဢဝ် တႃႇဝိတ်ႈ ၵႃႈၼႂ်းထိူၼ်ႇ ၸီႉၽႃႉ ၼၼ်ႉဢေႃႈ။-

3သေႃးလူႉ ၼၼ်ႉၶျႃးတပ်ႉၵႃႈၼိူဝ်လွႆ ႁၶီႉလႃႉ ဢၼ်မီးၵႃႈတီႈၽၢႆႇၼႃႈ ယေႇသီႉမုၼ်ႇ ၼၼ်ႉ ၵႃႈတီႈႁိမ်းသဵၼ်ႈတၢင်းဢေႃႈ။ တႃႇဝိတ်ႈ ယူႇၵႃႈၼႂ်းထိူၼ်ႇလႄႈ မိူဝ်ႈဢၼ်မၼ်းႁူႉႁၼ်လွင်ႈဢၼ် သေႃးလူႉ ၸွမ်းႁႃမၼ်းၵႃႈၼႂ်းထိူၼ်ႇၼၼ်ႉၸိုင်၊-

4တႃႇဝိတ်ႈ ပွႆႇၸႂ်ႉၵူၼ်းၽၢႆႇၼႂ်းလႄႈ လႆႈႁူႉလွင်ႈဢၼ် သေႃးလူႉ ႁွတ်ႈထိုင်တႄႉတႄႉဝႃႈဝႃႈၼၼ်ႉဢေႃႈ။-

5မိူဝ်ႈၼၼ်ႉ တႃႇဝိတ်ႈ လုၵ်ႉလႄႈၵႂႃႇႁွတ်ႈထိုင်ၵႃႈတီႈဢၼ် သေႃးလူႉ ၶျႃးတပ်ႉၼၼ်ႉသေယဝ်ႉ၊ တႃႇဝိတ်ႈ လူတူၺ်းတီႈဢၼ် သေႃးလူႉ ဢိၵ်ႇတင်းၶုၼ်ပူဝ်ႇၶျုၵ်ႈမၼ်း ဢႃႉပၼႃး လုၵ်ႈၸၢႆး ၼေးရႃႉ ၼွၼ်းၼၼ်ႉဢေႃႈ။ သေႃးလူႉ ၼၼ်ႉၼွၼ်းၵႃႈတီႈၼႂ်းတပ်ႉလေႃႉရထႃးယူႇသေလႄႈ ၵူၼ်းတပ်ႉတင်းလၢႆတူၵ်းတီႈယူႇ ၵႃႈတီႈလဵပ်ႈႁွပ်ႈမၼ်းဢေႃႈ။-

6တႃႇဝိတ်ႈ ၵေႃႈ ထၢမ်တီႈ ဢႁီႉမလႅၵ်ႉ ၵူၼ်းမဵဝ်း ႁိတ်ႉတီႉ တင်း ဢၽီႉသေး ၼွင်ႉၸၢႆး ယႂႃႇၽႃႉ လုၵ်ႈၸၢႆး ၸေႇရူႉယႃႇ ၸိူဝ်းၼၼ်ႉလႄႈဝႃႈ၊ ၽူႈလႂ်တၵ်းၸွမ်းလူၺ်ႈၵၼ်တင်းၵဝ် လူင်းၵႂႃႇၸူးတီႈ သေႃးလူႉ ၵႃႈၼႂ်းတပ်ႉၼၼ်ႉ၊ ဝႃႈၼင်ႇၼႆသေယဝ်ႉ၊ ဢၽီႉသေး လဝ်ႊလၢတ်ႈလႄႈဝႃႈ၊ ၶႃႈၸဝ်ႈတၵ်းၸွမ်းၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

7တႃႇဝိတ်ႈ ဢိၵ်ႇတင်း ဢၽီႉသေး ၸိူဝ်းၼၼ်ႉ လူင်းၵႂႃႇၸူးၵႃႈတီႈၵူၼ်းတပ်ႉၸိူဝ်းၼၼ်ႉၶိင်ႇၵၢင်ၶိုၼ်းလႄႈ သေႃးလူႉ ၼၼ်ႉ ၼွၼ်းလပ်းယူႇၵႃႈၼႂ်းတပ်ႉလေႃႉရထႃးတင်းလၢႆယူႇ၊ ႁွၵ်ႇၸဝ်ႈၼၼ်ႉပၵ်းၵႃႈတီႈလိၼ် မီးဝႆႉယူႇၵႃႈတီႈႁိမ်းႁူဝ်ၼွၼ်းၸဝ်ႈယူႇသေလႄႈ ဢႃႉပၼႃး ဢိၵ်ႇတင်းၵူၼ်းတပ်ႉၸိူဝ်းၼၼ်ႉ ဢွၼ်ၵၼ်ၼွၼ်းလပ်းၵႃႈတီႈလဵပ်ႈႁွပ်ႈမၼ်းယူႇဢေႃႈ။-

8ဢၽီႉသေး ၵေႃႈလဝ်ႊလၢတ်ႈတီႈ တႃႇဝိတ်ႈ လႄႈဝႃႈ၊ ၽြႃးပဵၼ်ၸဝ်ႈဢဝ်ရၢၼ်ႇသူႇၸဝ်ႈႁဝ်းဢၢပ်ႈပၼ်ၵႃႈၼႂ်းမိုဝ်းၸဝ်ႈႁဝ်း ဝၼ်းမိူဝ်ႈၼႆႉၶႃႈယဝ်ႉ။ ၵွပ်ႈပိူဝ်ႈၼင်ႇၼၼ်လႄႈ ၶႅၼ်းတေႃႈႁႂ်ႈၶႃႈၸဝ်ႈလႆႈဢဝ်ႁွၵ်ႇတႅင်း ၵမ်းလဵဝ်ၵူၺ်းႁႂ်ႈပွင်ႇထိုင်ႁွတ်ႈလိၼ်သေၵမ်းၶႃႈ။ ၶႃႈၸဝ်ႈတၵ်းဢမ်ႇတႅင်းႁႂ်ႈထူၼ်ႈထိုင်သွင်ၵမ်းၶႃႈၵူၺ်ႉ၊ ဝႃႈၼင်ႇၼႆသေၵေႃႈ၊-

9တႃႇဝိတ်ႈ လၢတ်ႈတီႈ ဢၽီႉသေး လႄႈဝႃႈ၊ ယႃႇပေယႃႉပႅတ်ႈမၼ်း။ ၽူႈလႂ်ယဵတ်ႇမိုဝ်းၸူးၵေႃႉဢၼ်လႆႈၶၢမ်ႇၽိၵ်ႈသိၵ်ႈဢၼ် ထႃႇဝရႃႉၽြႃးပၼ်ၼၼ်ႉလႄႈ တၵ်းၵၢင်းလွတ်ႈတင်းဢပႅတ်ႈ၊ ဝႃႈၼင်ႇၼႆဢေႃႈ။-

10လႆႈသမ်ႉ တႃႇဝိတ်ႈ လၢတ်ႈလႄႈဝႃႈ၊ ၵႃႈၼင်ႇဢၼ်ထႃႇဝရႃႉၽြႃး ဢသၢၵ်ႈလိပ်းယူႇၼၼ်ႉ၊ ထႃႇဝရႃႉၽြႃးတၵ်းပၼ်တၢမ်ႇဢေႃႈ။ ဢမ်ႇၼၼ်ၵေႃႈ ဝၼ်းဢၼ်မၼ်းတၵ်းလႆႈတၢႆၼၼ်ႉတၵ်းႁွတ်ႈထိုင်ဢေႃႈ။ ဢမ်ႇၼၼ်ၵေႃႈ မၼ်းတၵ်းလူင်းတိုၵ်းသိုၵ်းလႄႈ သုမ်းဢသၢၵ်ႈမၼ်းဢေႃႈ။-

11ႁႂ်ႈထႃႇဝရႃႉၽြႃးႁၢမ်ႈတၢပ်ႈႁႄႉၶႅၼ်ႁႂ်ႈၵဝ်ဢမ်ႇလႆႈယဵတ်ႇမိုဝ်းၵဝ်ၸူးၵေႃႉဢၼ်လႆႈၶၢမ်ႇၽိၵ်ႈသိၵ်ႈ ဢၼ်ထႃႇဝရႃႉၽြႃး ပၼ်ၼၼ်ႉသေၵမ်းလူၺ်ႈ။ ၵူၺ်းၵႃႈ ဢဝ်ႁွၵ်ႇၸဝ်ႈဢၼ်မီးၵႃႈတီႈႁူဝ်ၼွၼ်းမၼ်းၸဝ်ႈၼၼ်ႉ ဢိၵ်ႇတင်းၼမ်ႉတဝ်ႈၸဝ်ႈလႄႈၵႂႃႇတႃႉ၊ ဝႃႈၼင်ႇၼႆသေလႄႈ၊-

12တႃႇဝိတ်ႈ ဢဝ်ႁွၵ်ႇၸဝ်ႈ ဢိၵ်ႇတင်းၼမ်ႉတဝ်ႈၸဝ်ႈ သေၵႃႈတီႈႁူဝ်ၼွၼ်း သေႃးလူႉ ၼၼ်ႉလႄႈ ၵႂႃႇဢေႃႈ။ ၽူႈလႂ်ဢမ်ႇႁူႉဢမ်ႇႁၼ်သေၵေႃႉသေၵူၼ်း။ ၽူႈလႂ်ဢမ်ႇတိုၼ်ႇသေၵေႃႉသေၵူၼ်း။ လွင်ႈမၼ်းၸမ်ႉ ၶဝ်တင်းသဵင်ႈတင်းလူင်ၼွၼ်းလပ်းယူႇ ၵွပ်ႈပိူဝ်ႈဢၼ်ထႃႇဝရႃႉၽြႃး ႁႂ်ႈတၢင်းၼွၼ်းဢၼ်ၼူၵ်ႇၼႃႇ တူၵ်းႁွတ်ႈၵႃႈၼိူဝ်ၶဝ်ဢေႃႈ။

13မိူဝ်ႈၼၼ်ႉ တႃႇဝိတ်ႈ ၶၢမ်ႈၵႂႃႇၵႃႈတီႈၽၢႆႇၼိုင်ႈႁူၺ်ႈၼၼ်ႉလႄႈ ၸုၵ်းယူႇၵႃႈတီႈၼိူဝ်လွႆ ဢၼ်ၵႆၼၼ်ႉယူႇသေလႄႈ ၵႃႈတီႈဝူင်ႈၵၢင်ၶဝ်ၼၼ်ႉ ပဵၼ်ဢၼ်ၵႂၢင်ႈၼႃႇဢေႃႈ။-

14တႃႇဝိတ်ႈ ႁွင်ႉသႅၼ်ႇတီႈၵူၼ်းတင်းလၢႆ ဢိၵ်ႇတင်း ဢႃႉပၼႃး လုၵ်ႈၸၢႆး ၼေးရႃႉ ၼၼ်ႉလႄႈထၢမ်လႄႈဝႃႈ၊ ဢႃႉပၼႃး ဢိူၺ်း၊ မႂ်းဢမ်ႇဢိူဝ်ႁိုဝ်။ ဝႃႈၼင်ႇၼႆသေယဝ်ႉ၊ ဢႃႉပၼႃး ၶိုၼ်းထၢမ်လႄႈဝႃႈ၊ မႂ်း ဢၼ်ႁွင်ႉသႅၼ်ႇတီႈၶုၼ်ႁေႃၶမ်းၼႆႉ ပဵၼ်ၽူႈလႂ်၊ မိူဝ်ႈဢၼ်ဝႃႈၼင်ႇၼႆၸိုင်၊-

15တႃႇဝိတ်ႈ ၵေႃႈလၢတ်ႈတီႈ ဢႃႉပၼႃး လႄႈဝႃႈ၊ မႂ်းဢမ်ႇၸႂ်ႈၵူၼ်းၸၢႆးႁိုဝ်။ ၵႃႈၼႂ်းမဵဝ်း ဢီႉသရေႇလႃႉ ၼႆႉ ၽူႈလႂ်တၵ်းမိူၼ်ၵၼ်တင်းမႂ်း။ ပိူဝ်ႈဢၼ်ပဵၼ်ၼင်ႇၼႆလႄႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းယင်းဢမ်ႇပႂ်ႉၸဝ်ႈမႂ်းၶုၼ်ႁေႃၶမ်းၼၼ်ႉလႄႈယူႇၼင်ႇႁိုဝ်။ ၵူၼ်းၵေႃႉၼိုင်ႈ ၶဝ်ႈၵႂႃႇႁႂ်ႈလႆႈဢဝ်ၸဝ်ႈမႂ်းၶုၼ်ႁေႃၶမ်းၼၼ်ႉတၢႆယဝ်ႉယဝ်ႉ။-

16ဢမူႉဢၼ်မႂ်းႁဵတ်းၼႆႉဢမ်ႇထုၵ်ႇဢမ်ႇလီလူင်ပႄႇ။ ၵႃႈၼင်ႇဢၼ် ထႃႇဝရႃႉၽြႃးဢသၢၵ်ႈလိပ်းယူႇၼၼ်ႉ၊ မႂ်းထုၵ်ႇၶၢမ်ႇတၢႆၵွပ်ႈပိူဝ်ႈ ဢၼ်မႂ်းဢမ်ႇပႂ်ႉၸဝ်ႈမႂ်း ဢၼ်ပဵၼ်ၵေႃႉဢၼ်လႆႈၶၢမ်ႇၽိၵ်ႈသိၵ်ႈဢၼ်ထႃႇဝရႃႉၽြႃးပၼ်ၼၼ်ႉယဝ်ႉ။ တေႃႈလဵဝ်ၼႆႉလူတူၺ်းလူး၊ ႁွၵ်ႇၶုၼ်ႁေႃၶမ်း ဢိၵ်ႇတင်းၼမ်ႉတဝ်ႈၸဝ်ႈဢၼ်ဝႆႉၵႃႈတီႈႁိမ်းႁူဝ်ၼွၼ်းမၼ်းၸဝ်ႈၼၼ်ႉ မီးယူႇႁိုဝ်။ ဢမ်ႇမီးႁိုဝ်။ ဝႃႈၼင်ႇၼႆဢေႃႈ။

17သေႃးလူႉ ၼၼ်ႉႁူႉသဵင်ၵႂၢမ်း တႃႇဝိတ်ႈ လႄႈထၢမ်ဝႃႈ၊ လုၵ်ႈၸၢႆးၵဝ် တႃႇဝိတ်ႈ ဢိူၺ်း၊ ဢၼ်ၼႆႉပဵၼ်သဵင်ၵႂၢမ်းမႂ်းႁိုဝ်။ ဝႃႈၼင်ႇၼႆ သေယဝ်ႉ၊ တႃႇဝိတ်ႈ လဝ်ႊလၢတ်ႈလႄႈဝႃႈ၊ ပဵၼ်သဵင်ၵႂၢမ်းၶႃႈၸဝ်ႈတီႈၶႃႈဢေႃႈ။ ၸဝ်ႈပဵၼ်ၸဝ်ႈ၊ ၸဝ်ႈၶုၼ်လူင်တီႈၶႃႈဢိူၺ်း၊ ဝႃႈၼင်ႇၼႆဢေႃႈ။-

18လႆႈသမ်ႉ မၼ်းလဝ်ႊလၢတ်ႈလႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းၸွမ်းႁႃၶႃႈၸဝ်ႈႁဝ်းၼင်ႇႁိုဝ်တီႈၶႃႈ၊ ၶႃႈၸဝ်ႈႁဝ်းၼႆႉ ႁဵတ်းၸိူဝ်ႉၼင်ႇႁိုဝ်ယဝ်ႉတီႈၶႃႈ၊ ၵႃႈတီႈမိုဝ်းၶႃႈၸဝ်ႈႁဝ်းၼႆႉ မီးဢပႅတ်ႈၵႃႈသင်တီႈၶႃႈ၊-

19မိူဝ်ႈလဵဝ်ၼႆႉၸိုင်၊ ၸဝ်ႈပဵၼ်ၸဝ်ႈ၊ ၸဝ်ႈၶုၼ်လူင်တီႈၶႃႈဢိူၺ်း၊ ထွမ်ႇဢဝ်ၵႂၢမ်းၶႃႈၸဝ်ႈႁဝ်းၼႆႉသေၵမ်းတီႈၶႃႈ၊ ပေႃးထႃႇဝရႃႉၽြႃး တိုၵ်းယူင်းၸဝ်ႈႁဝ်း ႁႂ်ႈၸဝ်ႈႁဝ်းယူႇၽၢႆႇၼိုင်ႈတင်းၶႃႈၸဝ်ႈဢမၢၼ်ႇၶၼ်ပဵၼ်ၸိုင်၊ ႁႂ်ႈမၼ်းၸဝ်ႈႁပ်ႉတုင်းဢဝ်တၢင်းဢၼ်ပုၵ်ႈၸေႃႇယိတ်ႈသေၵမ်းလူၺ်ႈ။ ဢမ်ႇၼၼ်ၵေႃႈ ပေႃးၵူၼ်းတင်းလၢႆတိုၵ်းယူင်းၸိုင်၊ ႁႂ်ႈၶဝ်လႆႈၶၢမ်ႇတၢင်းဢၼ်ၵိၼ်ႇဢၼ်ဝႃႈ ၵႃႈတီႈၽၢႆႇၼႃႈထႃႇဝရႃႉၽြႃးသေၵမ်းလူၺ်ႈ။ လွင်ႈမၼ်းၸမ်ႉ ၶဝ်ဢွၼ်ၵၼ်ႁေႃႈၶႃႈၸဝ်ႈဢွၵ်ႇပႅတ်ႈဝၼ်းမိူဝ်ႈၼႆႉ ႁႂ်ႈၶႃႈၸဝ်ႈဢမ်ႇလႆႈယူႇလႆႈသဝ်းၵႃႈတီႈလိၼ်ဢမူၺ်ႇၸဝ်ႈလႄႈဝႃႈ၊ ၵႂႃႇတႃႉ။ ႁဵတ်းဝၢတ်ႈတီႈၽြႃးတၢင်ႇသူႇတၢင်ႇပႃးၸိူဝ်းၼၼ်ႉတႃႉ၊ ဝႃႈၼင်ႇၼႆတီႈၶႃႈယဝ်ႉလူင်ပႄႇ။-

20ပိူဝ်ႈဢၼ်ပဵၼ်ၼင်ႇၼႆလႄႈ မိူဝ်ႈလဵဝ်ၼႆႉ ယႃႇပေႁႂ်ႈလိူတ်ႈၶႃႈၸဝ်ႈတူၵ်းၵႃႈၼိူဝ်လိၼ် တီႈဢၼ်ၵႆၵၼ်တင်းၽၢႆႇၼႃႈထႃႇဝရႃႉၽြႃးၼၼ်ႉသေၵမ်းတီႈၶႃႈ၊ လွင်ႈမၼ်းၸမ်ႉ ၶုၼ်ႁေႃၶမ်း ဢီႉသရေႇလႃႉ ဢွၵ်ႇမႃး ႁႂ်ႈလႆႈႁႃဢဝ်မတ်းမိူၼ်ၸိူဝ်ႉၼင်ႇဢၼ် ၵူၼ်းၸွမ်းႁႃဢဝ်ၼူၵ်ႉၶုမ်ႈၵႃႈၼိူဝ်လွႆတင်းလၢႆၼၼ်ႉယဝ်ႉလူင်ပႄႇ၊ ဝႃႈၼင်ႇၼႆဢေႃႈ။

21သေႃးလူႉ ၵေႃႈလၢတ်ႈလႄႈဝႃႈ၊ ၵဝ်ၽိတ်းပိူင်ႈယဝ်ႉ။ လုၵ်ႈၸၢႆးၵဝ် တႃႇဝိတ်ႈ ဢိူၺ်း၊ ၶိုၼ်းမႃးသေၵမ်း။ ၵမ်းလိုၼ်း ၵဝ်တၵ်းဢမ်ႇၼိၵ်ႈၸၢၵ်ႈငႅၼ်းသႄးမႂ်း ၵွပ်ႈပိူဝ်ႈဢၼ်ဢသၢၵ်ႈၵဝ် ထိူၵ်ႈၵႃႈထိူၵ်ႈၶၼ်သိုဝ်ႈၼႃႈတႂ်ႈတႃမႂ်းဝၼ်းမိူဝ်ႈၼႆႉၼၼ်ႉဢေႃႈ။ တူၺ်းလူး၊ ၵဝ်ပဵၼ်ၵူၼ်းမိူၵ်ႈဢေႃႈ။ ၵဝ်ၽိတ်းပိူင်ႈၼႃႇလူင်လၢင်ယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

22တႃႇဝိတ်ႈ ၵေႃႈၶိုၼ်းလဝ်ႊလၢတ်ႈလႄႈဝႃႈ၊ ၸဝ်ႈၶုၼ်လူင်တီႈၶႃႈဢိူၺ်း၊ တူၺ်းႁွၵ်ႇၸဝ်ႈၼႆႉသေၵမ်းတီႈၶႃႈ၊ ႁႂ်ႈၵူၼ်းဢွၼ်ႇၵေႃႉၼိုင်ႈ မႃးဢဝ်သေၵမ်းတီႈၶႃႈ၊-

23ႁႂ်ႈထႃႇဝရႃႉၽြႃးတွပ်ႇတႅၼ်းပၼ်ဢၵျူဝ်းၸွမ်းၵႃႈၼင်ႇဢၼ်ၵူၼ်းႁင်းၽႂ်ႁင်းမၼ်းမီးတၢင်းဢၼ်သိုဝ်ႈတေႃႇ၊ တၢင်းဢၼ်ပႂ်ႉသဵတ်ႈၸႃႇၼၼ်ႉသေၵမ်းလူၺ်ႈ။ ပိၵ်ႉသမ်ႉထႃႇဝရႃႉၽြႃး ဢဝ်ၸဝ်ႈႁဝ်းဢၢပ်ႈပၼ်ၵႃႈၼႂ်းမိုဝ်းၶႃႈၸဝ်ႈဝၼ်းမိူဝ်ႈၼႆႉသေၵေႃႈ၊ ၶႃႈၸဝ်ႈယင်းဢမ်ႇယဵတ်ႇမိုဝ်းၸူးၵေႃႉဢၼ်လႆႈၶၢမ်ႇၽိၵ်ႈသိၵ်ႈ ဢၼ်ထႃႇဝရႃႉၽြႃးပၼ်ၼၼ်ႉလႄႈ ယူႇတီႈၶႃႈဢေႃႈ။-

24တူၺ်းတီႈၶႃႈလူး၊ မိူၼ်ၸိူဝ်ႉၼင်ႇဢၼ်ၶႃႈၸဝ်ႈႁဝ်းသေလၢႆဢသၢၵ်ႈၸဝ်ႈႁဝ်းဝၼ်းမိူဝ်ႈၼႆႉၼၼ်ႉ၊ ႁႂ်ႈထႃႇဝရႃႉၽြႃး သေလၢႆ ဢသၢၵ်ႈၶႃႈၸဝ်ႈလႄႈ ၵႄႇသႄႇၼုၵ်ႈဢဝ်ၶႃႈၸဝ်ႈဢွၵ်ႇသေၵႃႈၼႂ်းတုၵ်ႉၶႃႉတၢင်းၽၢၼ်ၵူႈၸိူဝ်ႉၵူႈပိူင်သေၵမ်းလူၺ်ႈ၊ ဝႃႈၼင်ႇၼႆသေယဝ်ႉ၊-

25သေႃးလူႉ လၢတ်ႈတီႈ တႃႇဝိတ်ႈ လႄႈဝႃႈ၊ လုၵ်ႈၸၢႆးၵဝ် တႃႇဝိတ်ႈ ဢိူၺ်း၊ ႁႂ်ႈမႂ်းမီးမင်ႇၵလႃႇသေၵမ်းလူၺ်ႈ။ မႂ်းတၵ်းႁဵတ်းလွင်ႈတၢင်းဢၼ်ယႂ်ႇဢၼ်လူင်လႄႈ ပႄႉၼႅင်ႇဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆသေယဝ်ႉ၊ တႃႇဝိတ်ႈ ဢွၵ်ႇၵႂႃႇလႄႈ သေႃးလူႉ ၵေႃႈ ၶိုၼ်းမိူဝ်းၵႂႃႇၵႃႈတီႈဢၼ်မၼ်းယူႇၼၼ်ႉသေဢေႃႈ။