1 Samuel 17 — Shan

1ၽဝ်ႇၼိုင်ႈ ၵူၼ်း ၽီႉလိတ်ႉတီႉ တင်းလၢႆ သေႃႇဢဝ်ပူဝ်ႇပႃႇၶဝ်ႁႂ်ႈလႆႈတိုၵ်းသိုၵ်းလႄႈ ၸူႉၵၼ်တုမ်ၵၼ်ၵႃႈတီႈဝဵင်း သေႃႇၶေႃႇ ၼႂ်းလိၼ် ယူႉတႃႉ သေယဝ်ႉ၊ ၶျႃးတပ်ႉၶဝ်ၵႃႈတီႈ ဢေႇၽႅတ်ႉတမ်ႇမိမ်း ၼႂ်းၵႄႈဝူင်ႈၵၢင်ဝဵင်း သေႃႇၶေႃႇ တင်းဝဵင်း ဢၸေႇၵႃႇ ဢေႃႈ။-

2သေႃးလူႉ ဢိၵ်ႇတင်းၵူၼ်းမဵဝ်း ဢီႉသရေႇလႃႉ တင်းလၢႆ ၸူႉၵၼ်တုမ်ၵၼ်လႄႈ ၶျႃးတပ်ႉၶဝ်ၵႃႈၼႂ်းပၢင်ႇႁူၺ်ႈ ဢေးလႃႇ လႄႈ ဢွၼ်ၵၼ်ယၼ်ႇတပ်ႉၶၢင်းတပ်ႉၶဝ် ႁႂ်ႈလႆႈတိုၵ်းၵၼ်တင်းၵူၼ်း ၽီႉလိတ်ႉတီႉ ၸိူဝ်းၼၼ်ႉဢေႃႈ။-

3ၵူၼ်း ၽီႉလိတ်ႉတီႉ ၸိူဝ်းၼၼ်ႉ ၸုၵ်းယူႇၵႃႈၼိူဝ်လွႆၽၢႆႇၼိုင်ႈ၊ ၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉ ၸုၵ်းယူႇၵႃႈၼိူဝ်လွႆၽၢႆႇၼိုင်ႈလႄႈ ၶူင်ႈႁူၺ်ႈမီးၵႃႈတီႈၵႄႈဝူင်ႈၵၢင်ၶဝ်ဢေႃႈ။-

4ၵူၼ်းသိုၵ်းဢၼ်လႆႈၸိုဝ်ႈ ၵေႃးလျတ်ႈ ၵူၼ်းဝဵင်း ၵႃႇသႃႉ ဢၼ်တၢင်းသုင်မၼ်းမီးႁူၵ်းသွၵ်ႇပၢႆၶိုပ်ႈၼၼ်ႉ ဢွၵ်ႇၵႃႈၼႂ်းတပ်ႉ ၽီႉလိတ်ႉတီႉ မႃးဢေႃႈ။-

5မၼ်းၼၼ်ႉ ၵႃႈၼိူဝ်ႁူဝ်တိုဝ်းမွၵ်ႇႁူဝ်တွင်းလိူင်သေလႄႈ ၼုင်ႈသိူဝ်ႈၶႅပ်းတွင်းလိူင်ဢၼ်ၶၼ်ၸင်ႈမၼ်းမီး ႁႃႈႁဵင်ၵျၢပ်ႈ သၶေးလႃႉ ၼၼ်ႉဢေႃႈ။-

6မၼ်းတိုဝ်းသုပ်းသွၵ်းတိၼ်တွင်းလိူင်ယူႇ၊ ၵႃႈတီႈၵႄႈႁူဝ်မႃႇမၼ်း ပႃးတင်းၶႂၢၵ်ႇလႅမ်တွင်းလိူင်ယူႇဢေႃႈ။-

7ၵၼ်းႁွၵ်ႇမၼ်းၸမ်ႉ၊ ယႂ်ႇပဵင်းတၢၼ်ႇသီႈပၼ်ႉႁမ်းႁုၵ်ႇဢေႃႈ။ မၢၵ်ႇႁွၵ်ႇမၼ်းၸမ်ႉ၊ ၶၼ်ၸင်ႈမၼ်းမီးလဵၵ်းႁူၵ်းပၢၵ်ႇၵျၢပ်ႈ သၶေးလႃႉ ဢေႃႈ။ ၵေႃႉဢၼ်ပႃးဢဝ်ၶိူင်ႈႁႄႉလၢၵ်ႈၼၢၵ်ႈမၼ်းၵေႃႉၼိုင်ႈလႆႈၵႂႃႇၽၢႆႇၼႃႈမၼ်းဢေႃႈ။-

8မၼ်းၼၼ်ႉၸုၵ်းယူႇသေလႄႈ ႁွင်ႉသႅၼ်ႇၸူးတီႈပူဝ်ႇပႃႇၵူၼ်းတပ်ႉ ဢီႉသရေႇလႃႉ တင်းလၢႆလႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူဢွၵ်ႇမႃးယၼ်ႇတပ်ႉၶၢင်းတပ်ႉယူႇၼင်ႇႁိုဝ်။ ၵဝ်ၼႆႉပဵၼ်ၵူၼ်း ၽီႉလိတ်ႉတီႉ ဢမ်ႇၸႂ်ႈႁိုဝ်။ သူၸိုင်ပဵၼ်ၶႃႈ သေႃးလူႉ ဢမ်ႇၸႂ်ႈႁိုဝ်။ လိူၵ်ႈၵဵပ်းဢဝ်ၵူၼ်းၵေႃႉၼိုင်ႈပုၼ်ႈသူလႄႈ ႁႂ်ႈမၼ်းဢွၵ်ႇမႃးၸူးတီႈၵဝ်တႃႉ။-

9ပေႃးမၼ်းတိုၵ်းၵဝ်လႄႈ ဢဝ်တၢႆလႆႈၸိုင်၊ ႁဝ်းတၵ်းလႆႈၶၢမ်ႇႁဵတ်းၶႃႈသူဢေႃႈ။ ပေႃးဢမ်ႇၼၼ် ပေႃးၵဝ်တိုၵ်းၵေႃႉၼၼ်ႉလႄႈ ဢဝ်တၢႆလႆႈၸိုင်၊ သူတၵ်းလႆႈၶၢမ်ႇႁဵတ်းၶႃႈႁဝ်းလႄႈ ၵိုတ်ႉႁၢပ်ႇဢမူႉႁဝ်းဢေႃႈ၊ ဝႃႈၼင်ႇၼႆဢေႃႈ။-

10လႆႈသမ်ႉ ၵူၼ်း ၽီႉလိတ်ႉတီႉ ၼၼ်ႉဝႃႈ၊ ဝၼ်းမိူဝ်ႈၼႆႉ ၵဝ်ယွၼ်းၶဵင်ႇယွၼ်းတႃႉသူဢေႃႈ။ ပၼ်ၵူၼ်းၵေႃႉၼိုင်ႈ တီႈၵဝ်ႁႂ်ႈႁႃးလႆႈတိုၵ်းၵၼ်တႃႉ၊ ဝႃႈၼင်ႇၼႆဢေႃႈ။-

11သေႃးလူႉ ဢိၵ်ႇတင်းၵူၼ်း ဢီႉသရေႇလႃႉ တင်းသဵင်ႈတင်းလူင် လႆႈငိၼ်းၵႂၢမ်းၵူၼ်း ၽီႉလိတ်ႉတီႉ ၼၼ်ႉသေယဝ်ႉ၊ ၸႂ်လူႉလႄႈၵူဝ်ႁႄၼႃႇလူင်လၢင်ဢေႃႈ။

12တႃႇဝိတ်ႈ ပဵၼ်လုၵ်ႈၸၢႆးၵူၼ်း ဢေႇၽရတ်ႉ ဝဵင်း ပႅတ်ႉလႁႅမ်ႇ မိူင်း ယူႉတႃႉ ဢၼ်လႆႈၸိုဝ်ႈ ယေႇသႄး ၼၼ်ႉဢေႃႈ။ ၵေႃႉၼၼ်ႉ မီးလုၵ်ႈၸၢႆးပႅတ်ႇၵေႃႉဢေႃႈ။ ၼႂ်းၸူဝ်ႈပၢၼ် သေႃးလူႉ ၼၼ်ႉ မၼ်းၼၼ်ႉပဵၼ်ၵေႃႉဢၼ်ဢသၢၵ်ႈယႂ်ႇထဝ်ႈၵႄႇၼႃႇလူင်လၢင်ဢေႃႈ။-

13ၼႂ်းလုၵ်ႈၸၢႆး ယေႇသႄး ၼၼ်ႉ ၶဝ်ၸိူဝ်းဢၼ်ဢသၢၵ်ႈယႂ်ႇသၢမ်ၵေႃႉ ၵိုတ်ႉႁၢပ်ႇဢမူႉသိုၵ်းလႄႈ ၸွမ်းလင် သေႃးလူႉ ယူႇဢေႃႈ။ ၸိုဝ်ႈသဵင်လုၵ်ႈၸၢႆးမၼ်းသၢမ်ၵေႃႉဢၼ်ၵႂႃႇၵိုတ်ႉႁၢပ်ႇယူႇၼၼ်ႉၸမ်ႉ၊ လုၵ်ႈၸၢႆးတူၼ်ႈပဵၼ် ဢေးလျႃႇၽႃႉ ၊ လုၵ်ႈၸၢႆးတူႉတီႉယႃႉပဵၼ် ဢၽီႉၼတပ်ႉ ၊ လုၵ်ႈၸၢႆးတႃႉတီႉယႃႉ ပဵၼ် သီႉမႃႇ ဢေႃႈ။-

14တႃႇဝိတ်ႈ ၼၼ်ႉ ပဵၼ်လုၵ်ႈၸၢႆးဢၼ်လဵၵ်ႉသေပိူၼ်ႈဢေႃႈ။ လုၵ်ႈၸၢႆးလူင်သၢမ်ၵေႃႉၼၼ်ႉၸွမ်းလင် သေႃးလူႉ ယူႇသေၵေႃႈ၊-

15တႃႇဝိတ်ႈ ၸမ်ႉ၊ လွင်ႈၼင်ႇႁိုဝ်တၵ်းလႆႈလဵင်ႉထိင်းသူဝ်းပေႃႈမၼ်း ၵႃႈတီႈဝဵင်း ပႅတ်ႉလႁႅမ်ႇ ၼၼ်ႉၸိုင်၊ ၵႂႃႇၵႂႃႇၶိုၼ်းၶိုၼ်းၵႃႈတီႈ သေႃးလူႉ ၼၼ်ႉယူႇဢေႃႈ။-

16ၵူၼ်း ၽီႉလိတ်ႉတီႉ ၵေႃႉၼၼ်ႉ ၶိင်ႇၵၢင်ၼႂ်ပွၵ်ႈၼိုင်ႈ၊ ၶိင်ႇႁူဝ်ၶမ်ႈပွၵ်ႈၼိုင်ႈ သုတ်ႉၸပ်းသုတ်ႉၸူးလႄႈ ၼႄပျႃးတူဝ်မၼ်းယူႇသီႇသိပ်းဝၼ်းတဵမ်တဵမ်ဢေႃႈ။-

17မိူဝ်ႈၼၼ်ႉ ယေႇသႄး သင်ႇလၢတ်ႈတီႈလုၵ်ႈၸၢႆးမၼ်း တႃႇဝိတ်ႈ လႄႈဝႃႈ၊ ဢဝ်ၶဝ်ႈတႅၵ်ႇ ဢေးၽႃႇ ၼိုင်ႈ ဢိၵ်ႇတင်းၶဝ်ႈမုၼ်းသိပ်းႁူၺ်ႇၸိူဝ်းၼႆႉပုၼ်ႈပီႈဢၢႆႈမႂ်းၸိူဝ်းၼၼ်ႉသေလႄႈ ဢဝ်ၵႂႃႇၶၼ်ၶၼ်ၽႂ်းၽႂ်းၸူးၵႃႈတီႈတပ်ႉတီႈဢၼ် ပီႈဢၢႆႈမႂ်းၸိူဝ်းၼၼ်ႉမီးၼၼ်ႉတႃႉ။-

18ၼမ်ႉၼူမ်းၵၢမ်ႈသိပ်းၵွၼ်ႈၼႆႉၵေႃႈ ဢဝ်လႄႈသၢၵ်ႈပၼ်တီႈၶုၼ်ဢၼ်ဢုပ်ႉၵႃႈၼိူဝ်ၵူၼ်းႁဵင်ၼိုင်ႈၶဝ်ၼၼ်ႉတႃႉ။ လူတူၺ်းလွင်ႈဢၼ်ပီႈဢၢႆႈမႂ်းၸိူဝ်းၼၼ်ႉ မီးတၢင်းဢၼ်ယူႇလီၵိၼ်ဝၢၼ်ယူႇႁိုဝ်။ ဢမ်ႇမီးႁိုဝ်ၼၼ်ႉသေယဝ်ႉ၊ ၶၢမ်ႇဢဝ်သၢၵ်ႈသေႇတီႈၶဝ်သေၸိူဝ်ႉသေပိူင်မႃးတႃႉ၊ ဝႃႈၼင်ႇၼႆဢေႃႈ။-

19မိူဝ်ႈၼၼ်ႉ ၸႃႉၸဵမ် သေႃးလူႉ လႄႈၶဝ်ၼၼ်ႉ ဢိၵ်ႇတင်းၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် တိုၵ်းတေႃးၵၼ်တင်းၵူၼ်း ၽီႉလိတ်ႉတီႉ ၸိူဝ်းၼၼ်ႉယူႇသေလႄႈ မီးယူႇၵႃႈတီႈပၢင်ႇႁူၺ်ႈ ဢေးလႃႇ ၼၼ်ႉဢေႃႈ။-

20တႃႇဝိတ်ႈ လုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈ ဢဝ်သူဝ်းတင်းလၢႆဢၢပ်ႈပၼ်တီႈၵူၼ်းဢၼ်လဵင်ႉသူဝ်းထိင်းသူဝ်းသေယဝ်ႉ၊ ဢဝ်ၸိူဝ်းၼၼ်ႉၵႂႃႇၸွမ်းၵႃႈၼင်ႇဢၼ်ပေႃႈမၼ်း ယေႇသႄး သင်ႇလၢတ်ႈဝႆႉတီႈမၼ်းၼၼ်ႉလႄႈ ႁွတ်ႈထိုင်ၵႃႈတီႈဝႅင်းလေႃႉၶဝ် ၼႂ်းမိူဝ်ႈဢၼ် ပူဝ်ႇပႃႇၵူၼ်းသိုၵ်းဢၼ်ၶီႇၵႂႃႇ ၵႃႈတီႈပၢင်သိုၵ်းယူႇၸိူဝ်းၼၼ်ႉ ဢွၼ်ၵၼ်ႁဵတ်းသဵင်ဢၼ်တိုၵ်းသိုၵ်းႁွင်ႉသႅၼ်ႇယူႇၼၼ်ႉဢေႃႈ။-

21လွင်ႈမၼ်းၸမ်ႉ ၵူၼ်းတပ်ႉ ဢီႉသရေႇလႃႉ ဢိၵ်ႇတင်းၵူၼ်းတပ်ႉ ၽီႉလိတ်ႉတီႉ ၸိူဝ်းၼၼ်ႉ လႆႈယၼ်ႇတပ်ႉၶၢင်းတပ်ႉတေႃႇၵၼ်ယူႇဢေႃႈ။-

22တႃႇဝိတ်ႈ ၼၼ်ႉ ဢဝ်ဢၼ်ပႃးမႃးတီႈမၼ်းၸိူဝ်းၼၼ်ႉဢၢပ်ႈဝႆႉၵႃႈၼႂ်းမိုဝ်းၵေႃႉဢၼ်ပႂ်ႉၶူဝ်းပႂ်ႉလဵင်းၼၼ်ႉသေယဝ်ႉ၊ ၶုၼ်ႇလႅၼ်ႈၵႂႃႇၵႃႈၼႂ်းမုၵ်ႉၸိူဝ်းၵူၼ်းသိုၵ်းၸိူဝ်းၼၼ်ႉလႄႈ တၵ်ႉလၢတ်ႈပီႈဢၢႆႈမၼ်းၸိူဝ်းၼၼ်ႉဢေႃႈ။-

23ၼႂ်းမိူဝ်ႈဢၼ်မၼ်းယင်းတိုၵ်ႉလၢတ်ႈၵႂၢမ်းတေႃႇၶဝ်ယူႇၼၼ်ႉၸိုင်၊ ၵူၼ်းသိုၵ်းဢၼ်လႆႈၸိုဝ်ႈ ၵေႃးလျတ်ႈ ၵူၼ်းဝဵင်း ၵႃႇသႃႉ ၊ ၵူၼ်း ၽီႉလိတ်ႉတီႉ ၼၼ်ႉ ဢွၵ်ႇသေၵႃႈၼႂ်းတပ်ႉ ၽီႉလိတ်ႉတီႉ မႃးလႄႈလၢတ်ႈဝႃႈ မိူၼ်ၸိူဝ်ႉၼင်ႇဝၼ်းဢွၼ်တၢင်းၼၼ်ႉလႄႈ တႃႇဝိတ်ႈ လႆႈငိၼ်းၵႂၢမ်းၼၼ်ႉဢေႃႈ။-

24ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ႁၼ်ၵေႃႉၼၼ်ႉသေယဝ်ႉ၊ ဢွၼ်ၵၼ်ဢွၵ်ႇပၢႆႈသေၵႃႈတီႈၽၢႆႇၼႃႈမၼ်းလႄႈ ၵူဝ်ႁႄၼႃႇလူင်လၢင်ဢေႃႈ။-

25ၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉ လၢတ်ႈၵၼ်လႄႈဝႃႈ၊ သူလႆႈႁၼ်ၵေႃႉဢၼ်ဢွၵ်ႇမႃးၼၼ်ႉယဝ်ႉႁိုဝ်။ မၼ်းယွၼ်းၶဵင်ႇယွၼ်းတႃႉ မဵဝ်း ဢီႉသရေႇလႃႉ ယူႇသေလႄႈဢွၵ်ႇမႃးလူင်ပႄႇ။ တီႈၵေႃႉဢၼ်ဢဝ်မၼ်းတၢႆၼၼ်ႉၸိုင်၊ ၶုၼ်ႁေႃၶမ်းတၵ်းပၼ်ၸေးၸိမ်ႇဢၼ်ယႂ်ႇၼႃႇလႄႈ ဢဝ်လုၵ်ႈယိင်းၸဝ်ႈပၼ်ဢေႃႈ။ တၵ်းႁႂ်ႈပီႈၼွင်ႉၸိူဝ်ႉၶိူဝ်းပေႃႈမၼ်းလွတ်ႈဢမူႉၶုၼ်ၵႃႈၼႂ်းမိူင်း ဢီႉသရေႇလႃႉ ၼႆႉဢေႃႈ၊ ဝႃႈၼင်ႇၼႆဢေႃႈ။-

26တႃႇဝိတ်ႈ ၵေႃႈထၢမ်တီႈၶဝ်ၸိူဝ်းဢၼ်ၸုၵ်းယူႇၵႃႈတီႈႁိမ်းမၼ်းၼၼ်ႉလႄႈဝႃႈ၊ ၵေႃႉဢၼ်ဢဝ်ၵူၼ်း ၽီႉလိတ်ႉတီႉ ၼၼ်ႉတၢႆလႄႈ ပႄႇၽဵဝ်ႈတၢင်းဢၼ်ဢူၵ်းဢၼ်ဢၢႆဢၼ်မဵဝ်း ဢီႉသရေႇလႃႉ လႆႈၶၢမ်ႇၼၼ်ႉ ပႅတ်ႈမူတ်းမူတ်းသဵင်ႈသဵင်ႈၼၼ်ႉ တၵ်းလႆႈဢၵျူဝ်းၸိူဝ်ႉၼင်ႇႁိုဝ်။ ၵူၼ်း ၽီႉလိတ်ႉတီႉ ဢၼ်ဢမ်ႇၶၢမ်ႇမင်ႇၵလႃႇတၢင်းဢၼ်ထိူဝ်ႁိမ်းၼၼ်ႉ ပဵၼ်ၵူၼ်းၸိူဝ်ႉၼင်ႇႁိုဝ်လႄႈ လႆႈသႄႉသွမ်းပူဝ်ႇပႃႈၽြႃးပဵၼ်ၸဝ်ႈ ဢၼ်ဢသၢၵ်ႈလိပ်းယူႇၼၼ်ႉယူႇ၊ ဝႃႈၼင်ႇၼႆသေယဝ်ႉ၊-

27ၵူၼ်းတင်းလၢႆၶိုၼ်းလၢတ်ႈၸိူဝ်ႉၼင်ႇၵမ်းဢွၼ်တၢင်းၼၼ်ႉလႄႈဝႃႈ၊ ၵေႃႉဢၼ်ဢဝ်ၵူၼ်းၼၼ်ႉတၢႆၼၼ်ႉ တၵ်းလႆႈဢၵျူဝ်းဢၼ်ၸိူဝ်ႉၼင်ႇၼႆဢေႃႈ၊ ဝႃႈၼင်ႇၼႆဢေႃႈ။-

28ဢေးလျႃႇၽႃႉ ဢၼ်ပဵၼ်ပီႈဢၢႆႈမၼ်းၵေႃႉယႂ်ႇၼၼ်ႉ ငိၼ်းမၼ်းလၢတ်ႈတေႃႇၵၼ်တင်းမၼ်းၼၼ်ႉသေယဝ်ႉ၊ တၢင်းၸႂ်မႆႈၶႆႈၸႃႉဢွၵ်ႇတီႈ တႃႇဝိတ်ႈ လႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းလူင်းမႃးၵႃႈတီႈၼႆႈၼင်ႇႁိုဝ်။ မႂ်းဢဝ်သူဝ်းဢၼ်မီးၵေႇၼႃႇၸိူဝ်းၼၼ်ႉ ဢၢပ်ႈဝႆႉၵႃႈၼႂ်းမိုဝ်းၽူႈလႂ်ၵႃႈတီႈထိူၼ်ႇၼၼ်ႉ။ ၵဝ်ႁူႉတၢင်းဢၼ်မႂ်းမႃႇၼႃႉယႂ်ႇ၊ တၢင်းဢၼ်ႁူဝ်ၸႂ်မႂ်းႁၢႆႉယုတ်ႈၼၼ်ႉယူႇဢေႃႈ။ မႂ်းလူင်းမႃးႁႂ်ႈလႆႈလူတူၺ်းပွႆးသိုၵ်းယဝ်ႉလူင်ပႄႇ၊ ဝႃႈၼင်ႇၼႆဢေႃႈ။-

29တႃႇဝိတ်ႈ ၵေႃႈလၢတ်ႈလႄႈဝႃႈ၊ ၵဝ်ၶႃႈႁဵတ်းၵႃႈသင်။ မိူဝ်ႈလဵဝ်ၼႆႉဢမ်ႇမီးလွင်ႈဢၼ်တၵ်းလီလၢတ်ႈႁိုဝ်။ ဝႃႈၼင်ႇၼႆသေယဝ်ႉ၊-

30သမ်ႉဝၢႆႇၵႂႃႇၸူးၵႃႈတီႈပိူၼ်ႈတၢင်ႇၵေႃႉသေလႄႈထၢမ်မိူၼ်ၸိူဝ်ႉၼင်ႇမိူဝ်ႈဢွၼ်တၢင်းၼၼ်ႉလႄႈ ၵူၼ်းတင်းလၢႆၶိုၼ်းလၢတ်ႈမိူၼ်ၸိူဝ်ႉၼင်ႇဢွၼ်တၢင်းၼၼ်ႉဢေႃႈ။

31မိူဝ်ႈဢၼ်ပိူၼ်ႈငိၼ်းၵႂၢမ်းဢၼ် တႃႇဝိတ်ႈ လၢတ်ႈၸိူဝ်ႉၼင်ႇၼၼ်ၼၼ်ႉၸိုင်၊ ၶဝ်ဢဝ်လဝ်ႊလၢတ်ႈတီႈ သေႃးလူႉ လႄႈ သေႃးလူႉ ႁွင်ႉဢဝ် တႃႇဝိတ်ႈ ဢေႃႈ။-

32တႃႇဝိတ်ႈ ၵေႃႈလဝ်ႊလၢတ်ႈတီႈ သေႃးလူႉ လႄႈဝႃႈ၊ ယႃႇပေႁႂ်ႈၽူႈလႂ်သေၵေႃႉသေၵူၼ်း လႆႈၸႂ်လူႉၵွပ်ႈပိူဝ်ႈၵူၼ်းၼၼ်ႉသေၵမ်းတီႈၶႃႈ၊ ၶႃႈၸဝ်ႈႁဝ်းတၵ်းၵႂႃႇလႄႈတိုၵ်းတေႃးၵူၼ်း ၽီႉလိတ်ႉတီႉ ၼၼ်ႉတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

33သေႃးလူႉ လၢတ်ႈတီႈ တႃႇဝိတ်ႈ လႄႈဝႃႈ၊ မႂ်းဢမ်ႇၵႂႃႇတိုၵ်းတေႃးၵူၼ်း ၽီႉလိတ်ႉတီႉ ၼၼ်ႉလႆႈၵူၺ်ႉ။ မႂ်းပဵၼ်ၵေႃႉဢၼ်ယင်းလဵၵ်ႉယင်းၼုမ်ႇယူႇဢေႃႈ။ ၵေႃႉၼၼ်ႉ ပဵၼ်ႁူဝ်ႁၢၼ်ၵူၼ်းသိုၵ်းမႃးၸဵမ်မိူဝ်ႈဢၼ်မၼ်းယင်းၼုမ်ႇၼၼ်ႉယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

34တႃႇဝိတ်ႈ ၵေႃႈလဝ်ႊလၢတ်ႈတီႈ သေႃးလူႉ လႄႈဝႃႈ၊ မိူဝ်ႈဢၼ်ၶႃႈၸဝ်ႈႁဝ်းၼႆႉယင်းတိုၵ်ႉလဵင်ႉထိင်းသူဝ်းပေႃႈၶႃႈၸဝ်ႈယူႇၼၼ်ႉၸိုင်၊ သၢင်ႇသီႈတင်းမီမႃးၶူပ်းၵၢပ်ႈဢဝ်သူဝ်းဢွၼ်ႇၵႃႈၼႂ်းၽုင်သူဝ်းၵႂႃႇတီႈၶႃႈဢေႃႈ။-

35ၶႃႈၸဝ်ႈလိုပ်ႈလမ်းၸွမ်းၵႂႃႇဢဝ်တၢႆပႅတ်ႈသေလႄႈ ၼုၵ်ႈဢဝ်သူဝ်းဢွၼ်ႇၵႃႈၼႂ်းသူပ်းမၼ်းၼၼ်ႉမႃးတီႈၶႃႈဢေႃႈ။ မိူဝ်ႈဢၼ်မီလုၵ်ႉၸုၵ်းပူဝ်ႉသႂ်ႇၶႃႈၸဝ်ႈၼၼ်ႉၸိုင်၊ ၶႃႈၸဝ်ႈၵမ်တိုတ်ႉၼူတ်ႇမၼ်းလႄႈ ပေႃႉယႅၼ်ႉဢဝ်တၢႆပႅတ်ႈတီႈၶႃႈဢေႃႈ။-

36ၶႃႈၸဝ်ႈႁဝ်းၼႆႉ ဢဝ်သၢင်ႇသီႈ ဢိၵ်ႇတင်းမီတၢႆသွင်တူဝ်ယဝ်ႉတီႈၶႃႈဢေႃႈ။ ၵူၼ်း ၽီႉလိတ်ႉတီႉ ဢၼ်ဢမ်ႇၶၢမ်ႇမင်ႇၵလႃႇတၢင်းဢၼ်ထိူဝ်ႁိမ်းၼႆႉ တၵ်းပဵၼ်မိူၼ်ၸိူဝ်ႉၼင်ႇတူဝ်ၼၼ်ႉတူဝ်ၼိုင်ႈ ၵွပ်ႈပိူဝ်ႈဢၼ်မၼ်းသႄႉသွမ်းပူဝ်ႇပႃႇၽြႃးပဵၼ်ၸဝ်ႈ ဢၼ်ဢသၢၵ်ႈလိပ်းယူႇၼၼ်ႉတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

37တႃႇဝိတ်ႈ သမ်ႉ လဝ်ႊလၢတ်ႈလႄႈဝႃႈ၊ ထႃႇဝရႃႉၽြႃး ဢၼ်ၵႄႇသႄႇၼုၵ်ႈဢဝ်ၶႃႈၸဝ်ႈၵႃႈၼႂ်းမိုဝ်းသၢင်ႇသီႈ ဢိၵ်ႇတင်းၵႃႈၼႂ်းမိုဝ်းမီၼၼ်ႉ တၵ်းၵႄႇသႄႇၼုၵ်ႈဢဝ်ၶႃႈၸဝ်ႈၵႃႈၼႂ်းမိုဝ်းၵူၼ်း ၽီႉလိတ်ႉတီႉ ၼႆႉတီႈၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ သေႃးလူႉ လၢတ်ႈတီႈ တႃႇဝိတ်ႈ လႄႈဝႃႈ၊ ၵႂႃႇတႃႉ။ ႁႂ်ႈထႃႇဝရႃႉၽြႃး မီးယူႇလူၺ်ႈၵၼ်တင်းမႂ်းသေၵမ်းလူၺ်ႈ၊ ဝႃႈၼင်ႇၼႆဢေႃႈ။-

38သေႃးလူႉ ၵေႃႈဢဝ်ၶူဝ်းၼုင်ႈၸဝ်ႈၼုင်ႈပၼ် တႃႇဝိတ်ႈ သေယဝ်ႉ၊ ဢဝ်မွၵ်ႇႁူဝ်တွင်းလိူင်တိုဝ်းပၼ်ၵႃႈၼိူဝ်ႁူဝ်မၼ်းလႄႈ ဢဝ်သိူဝ်ႈၶႅပ်းလဵၵ်းၼုင်ႈပၼ်ဢေႃႈ။-

39တႃႇဝိတ်ႈ ဢဝ်လၢပ်ႇၸဝ်ႈ မတ်ႉသႂ်ႇၵႃႈၼိူဝ်ၶူဝ်းၼုင်ႈမၼ်းသေလႄႈ ၵျူဝ်းၸႃးငႃတၵ်းၵႂႃႇ ၵွပ်ႈပိူဝ်ႈဢၼ် မၼ်းဢမ်ႇပႆႇတွၼ်ႉယၢမ်ႈလႆႈၸၢမ်းတူၺ်းလၢၵ်ႈၼၢၵ်ႈၼၼ်ႉဢေႃႈ။ ပိူဝ်ႈဢၼ်ပဵၼ်ၼင်ႇၼႆလႄႈ တႃႇဝိတ်ႈ လဝ်ႊလၢတ်ႈတီႈ သေႃးလူႉ လႄႈဝႃႈ၊ ၶႃႈၸဝ်ႈဢမ်ႇပႃးဢဝ်ၸိူဝ်းၼႆႉသေလႄႈ ၵႂႃႇလႆႈတီႈၶႃႈ၊ ၶႃႈၸဝ်ႈဢမ်ႇပႆႇတွၼ်ႉယၢမ်ႈလႆႈၸၢမ်းတူၺ်းတီႈၶႃႈ၊ ဝႃႈၼင်ႇၼႆသေယဝ်ႉ၊ တႃႇဝိတ်ႈ ၶိုၼ်းၵႄႈထွတ်ႇသေဢေႃႈ။-

40လႆႈသမ်ႉ မၼ်းယိပ်းၵမ်ဢဝ်ၶွၼ်ႉတဝ်ႉမၼ်းသေလႄႈ လိူၵ်ႈၵဵပ်းဢဝ်မၢၵ်ႇႁိၼ်ဢၼ်ၶျေႃးလီ ၵႃႈၼႂ်းၼမ်ႉႁွင်ႈႁႃႈလုၵ်ႈလႄႈ ဢဝ်သႂ်ႇၵႃႈၼႂ်းၶိူင်ႈပိူင်ၵူၼ်းလဵင်ႉသူဝ်းဢၼ်ဝႃႈထူင်မၼ်းၼၼ်ႉသေယဝ်ႉ၊ ၵူင်ၵွၼ်ၵေႃႈယိပ်းၵမ်ဢဝ်သေလႄႈ သုတ်ႉၸပ်းသုတ်ႉၸူးၵႃႈတီႈၵူၼ်း ၽီႉလိတ်ႉတီႉ ၼၼ်ႉဢေႃႈ။

41ၵူၼ်း ၽီႉလိတ်ႉတီႉ ၼၼ်ႉၵေႃႈ မႃးယူႇသေလႄႈသုတ်ႉၸပ်းသုတ်ႉၸူးၵႃႈတီႈ တႃႇဝိတ်ႈ ၼၼ်ႉလႄႈ ၵေႃႉဢၼ်ပႃးၶိူင်ႈႁႄႉလၢၵ်ႈၼၢၵ်ႈမၼ်းၼၼ်ႉၵေႃႈ ၵႂႃႇၽၢႆႇၼႃႈမၼ်းဢေႃႈ။-

42ၵူၼ်း ၽီႉလိတ်ႉတီႉ ၼၼ်ႉ၊ မိူဝ်ႈဢၼ်တူၺ်းလႄႈႁၼ် တႃႇဝိတ်ႈ ၼၼ်ႉၸိုင်၊ ႁဵတ်းဢမ်ႇပေႃးၼင်ႇႁိုဝ်တီႈမၼ်းဢေႃႈ။ လွင်ႈမၼ်းၸမ်ႉ မၼ်းပဵၼ်ၵေႃႉဢၼ်ယင်းၼုမ်ႇ၊ ၵေႃႉဢၼ်ၶူၼ်ႁူဝ်ယင်းလႅင်လႄႈ ၼႃႈႁၢင်ႈလီယူႇဢေႃႈ။-

43ၵူၼ်း ၽီႉလိတ်ႉတီႉ ၼၼ်ႉၵေႃႈ ထၢမ်တီႈ တႃႇဝိတ်ႈ လႄႈဝႃႈ၊ ၵဝ်ၼႆႉပဵၼ်မႃလႄႈ မႂ်းဢဝ်ၶွၼ်ႉတဝ်ႉမႃးၸူးၵႃႈတီႈၵဝ်ႁိုဝ်။ ဝႃႈၼင်ႇၼႆယူႇသေလႄႈ ၵူၼ်း ၽီႉလိတ်ႉတီႉ ၼၼ်ႉ ဢဝ်ၽြႃးမၼ်းတင်းလၢႆတိူင်ႇလႄႈၵိၼ်ႇလႃႇ တႃႇဝိတ်ႈ ဢေႃႈ။-

44လႆႈသမ်ႉ ၵူၼ်း ၽီႉလိတ်ႉတီႉ ၼၼ်ႉ လၢတ်ႈတီႈ တႃႇဝိတ်ႈ လႄႈဝႃႈ၊ မႃးၸူးတီႈၵဝ်ၼႆႉတႃႉ။ ၵဝ်တၵ်းဢဝ်ၼိူဝ်ႉမႂ်းပၼ်တီႈၼူၵ်ႉၵၢင်ႁၢဝ် ဢိၵ်ႇတင်းတူဝ်ထိူၼ်ႇႁၢႆႉတင်းလၢႆဢေႃႈ၊ ဝႃႈၼင်ႇၼႆဢေႃႈ။-

45တႃႇဝိတ်ႈ ၵေႃႈလၢတ်ႈတီႈၵူၼ်း ၽီႉလိတ်ႉတီႉ ၼၼ်ႉလႄႈဝႃႈ၊ မႂ်းပႃးဢဝ်တင်းႁွၵ်ႇ၊ တင်းလၢပ်ႇ၊ တင်းၶႂၢၵ်ႇလႅမ်သေလႄႈ မႃးၸူးၵႃႈတီႈၵဝ်ဢေႃႈ။ ၵဝ်ၸိုင် ပႃးဢဝ်ၼႃႇမႃႉၸိုဝ်ႈသဵင်ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး ၽြႃးပူဝ်ႇပႃႇ ဢီႉသရေႇလႃႉ ဢၼ်မႂ်းသႄႉသွမ်းၼၼ်ႉသေလႄႈ မႃးၸူးၵႃႈတီႈမႂ်းဢေႃႈ။-

46ထႃႇဝရႃႉၽြႃးၼၼ်ႉ တၵ်းဢဝ်မႂ်းဢၢပ်ႈပၼ်ၵႃႈၼႂ်းမိုဝ်းၵဝ်ဝၼ်းမိူဝ်ႈၼႆႉလႄႈ ၵဝ်တၵ်းဢဝ်မႂ်းတၢႆလႄႈ တႅပ်းႁူဝ်မႂ်းဢေႃႈ။ ၵဝ်တၵ်းဢဝ်တူဝ်တၢႆၵူၼ်း ၽီႉလိတ်ႉတီႉ ၸိူဝ်းၼႆႉ ပၼ်တီႈၼူၵ်ႉၵၢင်ႁၢဝ်ဢိၵ်ႇတင်းတူဝ်ထိူၼ်ႇႁၢႆႉတင်းလၢႆ ၼႂ်းဝၼ်းမိူဝ်ႈၼႆႉဢေႃႈ။ ၵူၼ်းလိၼ်မိူင်းတင်းသဵင်ႈတင်းလူင်တၵ်းလႆႈႁူႉလွင်ႈဢၼ် ၽြႃးပဵၼ်ၸဝ်ႈမီးယူႇၵႃႈတီႈမဵဝ်း ဢီႉသရေႇလႃႉ ၼၼ်ႉဢေႃႈ။-

47ပရဵၵ်ႈသၢတ်ႈၼႆႉတင်းသဵင်ႈတင်းလူင် တၵ်းလႆႈႁူႉလွင်ႈဢၼ်ထႃႇဝရႃႉၽြႃး ဢမ်ႇဢဝ်တင်းႁွၵ်ႇတင်းလၢပ်ႇၵႄႇသႄႇၶျွတ်ႈဢဝ်ၼၼ်ႉဢေႃႈ။ လွင်ႈမၼ်းၸမ်ႉ ထႃႇဝရႃႉၽြႃးပိူင်ႇဢမူႉသိုၵ်းလႄႈ မၼ်းၸဝ်ႈတၵ်းဢဝ်ဢၢပ်ႈပၼ်ၵႃႈၼႂ်းမိုဝ်းႁဝ်းဢေႃႈ၊ ဝႃႈၼင်ႇၼႆဢေႃႈ။-

48မိူဝ်ႈဢၼ်ၵူၼ်း ၽီႉလိတ်ႉတီႉ ၼၼ်ႉလုၵ်ႉလႄႈမႃးယူႇသေလႄႈသုတ်ႉၸပ်းသုတ်ႉၸူး ႁႂ်ႈလႆႈထူပ်းၵၼ်တင်း တႃႇဝိတ်ႈ ၼၼ်ႉၸိုင်၊ တႃႇဝိတ်ႈ ၵေႃႈႁိပ်ႈၼႅတ်ႈလႄႈ၊ ၶုၼ်ႇလႅၼ်ႈၸူးပူဝ်ႇပႃႇၶဝ်ၼၼ်ႉ ႁႂ်ႈလႆႈႁူပ်ႉထူပ်းၵၼ်တင်း ၵူၼ်း ၽီႉလိတ်ႉတီႉ ၼၼ်ႉၶၼ်ၶၼ်ၽႂ်းၽႂ်းသေယဝ်ႉ၊-

49တႃႇဝိတ်ႈ ၸူၵ်းဢဝ်မၢၵ်ႇႁိၼ်ၵႃႈၼႂ်းထူင်ပႃးမၼ်းလုၵ်ႈၼိုင်ႈသေလႄႈ ထိမ်ႈသိုင်းသႂ်ႇလႄႈၸပ်းသႂ်ႇၼႃႈၽၢၵ်ႇၵူၼ်း ၽီႉလိတ်ႉတီႉ ၼၼ်ႉလႄႈ မၢၵ်ႇႁိၼ်ၼၼ်ႉ လူင်းပွင်ႇၶဝ်ႈၵႃႈၼႂ်းၼႃႈၽၢၵ်ႇမၼ်းသေယဝ်ႉ၊ မၼ်းၼၼ်ႉလူမ်ႉမူပ်ႇတူၵ်းၵႃႈၼိူဝ်လိၼ်ဢေႃႈ။-

50ၼင်ႇၼၼ်လႄႈ တႃႇဝိတ်ႈ ၼၼ်ႉဢဝ်ၵူင်ၵွၼ်တင်းမၢၵ်ႇႁိၼ်လုၵ်ႈၼိုင်ႈ ပႄႉၼႅင်ႇၵူၼ်း ၽီႉလိတ်ႉတီႉ ၼၼ်ႉလႄႈ မႅၼ်ႈၸပ်းသႂ်ႇၵူၼ်း ၽီႉလိတ်ႉတီႉ ၼၼ်ႉသေလႄႈ ဢဝ်မၼ်းတၢႆဢေႃႈ။ ၼႂ်းမိုဝ်း တႃႇဝိတ်ႈ ၼၼ်ႉယင်းဢမ်ႇမီးလၢပ်ႇမီးလႅဝ်းသေမၢၵ်ႈ။-

51မိူဝ်ႈၼၼ်ႉ တႃႇဝိတ်ႈ ၶုၼ်ႇလႅၼ်ႈၵႂႃႇလႄႈ တဵၵ်းယဵပ်ႇၵူၼ်း ၽီႉလိတ်ႉတီႉ ၼၼ်ႉယူႇသေလႄႈ ထွတ်ႇဢဝ်လၢပ်ႇမၼ်း ၵႃႈၼႂ်းၵပ်းသေယဝ်ႉ၊ ဢဝ်မၼ်းတၢႆလႄႈ တႅပ်းဢဝ်ႁူဝ်မၼ်းဢေႃႈ။ ၵူၼ်း ၽီႉလိတ်ႉတီႉ ၸိူဝ်းၼၼ်ႉ ႁၼ်လွင်ႈဢၼ်ၵူၼ်းသိုၵ်းၼၼ်ႉ တၢႆၼၼ်ႉသေယဝ်ႉ၊ ဢွၼ်ၵၼ်ဢွၵ်ႇပၢႆႈဢေႃႈ။-

52မိူဝ်ႈၼၼ်ႉ ၵူၼ်းမဵဝ်း ဢီႉသရေႇလႃႉ ဢိၵ်ႇတင်းၵူၼ်းမဵဝ်း ယူႉတႃႉ တင်းလၢႆ လုၵ်ႉလႄႈႁုၼ်ႉႁိူဝ်ႇယူႇသေလႄႈ ဢွၼ်ၵၼ်လိုပ်ႈၸွမ်းလမ်းၸွမ်းၵူၼ်း ၽီႉလိတ်ႉတီႉ တင်းလၢႆ တေႃႇထိုင်ႁွတ်ႈဝဵင်း ၵႃႇသႃႉ ဢိၵ်ႇတင်းတေႃႇထိုင်ႁွတ်ႈၽၵ်းတူဝဵင်း ဢေႇၵြုၼ်ႇ ၼၼ်ႉဢေႃႈ။ ၵူၼ်း ၽီႉလိတ်ႉတီႉ ဢၼ်တိူဝ်ႉမၢတ်ႇၸိူဝ်းၼၼ်ႉ ဢွၼ်ၵၼ်လူမ်ႉတူၵ်းဢဝ်ၵႃႈတီႈၸႃႉၸဵမ်သဵၼ်ႈတၢင်းဝဵင်း သႃႇရိမ်း တေႃႇထိုင်ႁွတ်ႈဝဵင်း ၵႃႇသႃႉ တင်းဝဵင်း ဢေႇၵြုၼ်ႇ ၼၼ်ႉဢေႃႈ။-

53ၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉလုၵ်ႉသေၵႃႈတီႈဢၼ်လိုပ်ႈၸွမ်းလမ်းၸွမ်းၵူၼ်း ၽီႉလိတ်ႉတီႉ ၸိူဝ်းၼၼ်ႉၶိုၼ်းမႃးလႄႈ ႁိမ်လႆႈႁူင်ႇလႆႈတပ်ႉၶဝ်ၼၼ်ႉဢေႃႈ။-

54တႃႇဝိတ်ႈ ဢဝ်ၵွၵ်းႁူဝ်ၵူၼ်း ၽီႉလိတ်ႉတီႉ ၼၼ်ႉလႄႈ ပႃးဢဝ်ၵႂႃႇၵႃႈတီႈဝဵင်း ယေႇရူႉသလႅမ်ႇ ဢေႃႈ။ ဢဝ်လၢၵ်ႈၼၢၵ်ႈၸုမ်ႇမၼ်းၼၼ်ႉဝႆႉၵႃႈၼႂ်းမူဝ်းၵႃႇမၼ်းဢေႃႈ။

55သေႃးလူႉ ၼၼ်ႉမိူဝ်ႈဢၼ်ႁၼ် တႃႇဝိတ်ႈ ဢွၵ်ႇၵႂႃႇ ႁႂ်ႈလႆႈတိုၵ်းတေႃးၵူၼ်း ၽီႉလိတ်ႉတီႉ ၼၼ်ႉၸိုင်၊ ထၢမ်တီႈၶုၼ်ပူဝ်ႇၶျုၵ်ႈမၼ်း ဢႃႉပၼႃး လႄႈဝႃႈ၊ ဢႃႉပၼႃး ဢိူၺ်း၊ ၵူၼ်းဢွၼ်ႇၼႆႉၸိုင် ပဵၼ်လုၵ်ႈၸၢႆးၽူႈလႂ်၊ ဝႃႈၼင်ႇၼႆဢေႃႈ။ ဢႃႉပၼႃး ၵေႃႈလဝ်ႊလၢတ်ႈလႄႈဝႃႈ၊ ၸဝ်ႈၶုၼ်လူင်တီႈၶႃႈ၊ ၵႃႈၼင်ႇဢၼ်ၸဝ်ႈႁဝ်းဢသၢၵ်ႈလိပ်းယူႇၼၼ်ႉ၊ ၶႃႈၸဝ်ႈႁဝ်းဢမ်ႇႁူႉတီႈၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

56ၶုၼ်ႁေႃၶမ်းၵေႃႈ မီးဢမိင်ႉလႄႈဝႃႈ၊ ၸႅတ်ႈတူၺ်းထၢမ်တူၺ်းလွင်ႈဢၼ်ၵူၼ်းဢွၼ်ႇၼႆႉပဵၼ်လုၵ်ႈၸၢႆးၽူႈလႂ်ၼၼ်ႉတႃႉ၊ ဝႃႈၼင်ႇၼႆဢေႃႈ။-

57မိူဝ်ႈဢၼ် တႃႇဝိတ်ႈ လုၵ်ႉသေၵႃႈတီႈဢၼ်ဢဝ်ၵူၼ်း ၽီႉလိတ်ႉတီႉ ၼၼ်ႉတၢႆၼၼ်ႉၶိုၼ်းမႃးၼၼ်ႉၸိုင်၊ ဢႃႉပၼႃး ႁွင်ႉဢဝ်လႄႈ ဢဝ်မၼ်းဢၼ်ဢဝ်မိုဝ်းယိပ်းၵမ်ဢဝ်ၵွၵ်းႁူဝ်ၵူၼ်း ၽီႉလိတ်ႉတီႉ ၼၼ်ႉယူႇၼၼ်ႉ ၵႂႃႇၸူးၵႃႈတီႈ သေႃးလူႉ သေယဝ်ႉ၊-

58သေႃးလူႉ ထၢမ်တီႈမၼ်းလႄႈဝႃႈ၊ ၵူၼ်းဢွၼ်ႇဢိူၺ်း၊ မႂ်းပဵၼ်လုၵ်ႈၸၢႆးၽူႈလႂ်၊ ဝႃႈၼင်ႇၼႆဢေႃႈ။ တႃႇဝိတ်ႈ ၵေႃႈ ၶိုၼ်းလဝ်ႊလၢတ်ႈလႄႈဝႃႈ၊ ၶႃႈၸဝ်ႈပဵၼ်လုၵ်ႈၸၢႆးၶႃႈၸဝ်ႈႁဝ်း ယေႇသႄး ၵူၼ်းဝဵင်း ပႅတ်ႉလႁႅမ်ႇ ၼၼ်ႉတီႈၶႃႈဢေႃႈ၊ ဝႃႈၼင်ႇၼႆဢေႃႈ။