1 Samuel 4

Shan

← Chapter 3 Jump to: Chapter 5 →

1လႆႈသမ်ႉ ၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉ ဢွၼ်ၵၼ်ၶီႇသိုၵ်းၵႂႃႇႁႂ်ႈလႆႈတိုၵ်းၵူၼ်း ၽီႉလိတ်ႉတီႉ တင်းလၢႆလႄႈ ၶျႃးတပ်ႉၵႃႈတီႈႁိမ်းဝဵင်း ဢေႇပႃႇၼေႇၸႃႇ သေလႄႈ ၵူၼ်း ၽီႉလိတ်ႉတီႉ ၸိူဝ်းၼၼ်ႉ ၶျႃးတပ်ႉၵႃႈတီႈဝဵင်း ဢႃႇၽႅၵ်ႉ ဢေႃႈ။-

2ၵူၼ်း ၽီႉလိတ်ႉတီႉ ၸိူဝ်းၼၼ်ႉၶၢင်းတပ်ႉသေလႄႈ တိုၵ်းၵၼ်တင်းမဵဝ်း ဢီႉသရေႇလႃႉ လႄႈ မဵဝ်း ဢီႉသရေႇလႃႉ တူၵ်းသုမ်းၵႃႈတီႈၽၢႆႇၼႃႈၵူၼ်း ၽီႉလိတ်ႉတီႉ ၸိူဝ်းၼၼ်ႉလႄႈ ၶဝ်ဢဝ်ႁူဝ်ႁၢၼ်ၵူၼ်းသိုၵ်း ဢၼ်မီးၵႃႈၼႂ်းပၢင်ႇပဵင်းၼၼ်ႉတၢႆသေ သီႇႁဵင်ၼိုင်ႈဢေႃႈ။-

3မိူဝ်ႈဢၼ်ၵူၼ်းတင်းလၢႆၼၼ်ႉ ႁွတ်ႈထိုင်ၵႃႈၼႂ်းတပ်ႉၼၼ်ႉၸိုင်၊ ၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းမဵဝ်း ဢီႉသရေႇလႃႉ ၸိူဝ်းၼၼ်ႉ လၢတ်ႈၵၼ်လႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ထႃႇဝရႃႉၽြႃးႁႂ်ႈႁဝ်းတူၵ်းသုမ်း ၵႃႈတီႈၽၢႆႇၼႃႈၵူၼ်း ၽီႉလိတ်ႉတီႉ ၸိူဝ်းၼၼ်ႉဝၼ်းမိူဝ်ႈၼႆႉၼင်ႇႁိုဝ်။ ဢွၼ်ၵၼ်ၵႂႃႇဢဝ်တိူၵ်ႈတႃႇပတီႉၺိၺ်ႇထႃႇဝရႃႉၽြႃး ဢွၵ်ႇသေၵႃႈတီႈဝဵင်း သီႉလေႃႇ မႃးတီႈႁဝ်း ႁႂ်ႈလႆႈႁွတ်ႈထိုင်ၵႃႈၼႂ်းႁဝ်းလႄႈ ၵႄႇသႄႇၶျွတ်ႈဢဝ်ႁဝ်းသေၵႃႈၼႂ်းမိုဝ်းရၢၼ်ႇသူႇႁဝ်းတႃႉႁဝ်း၊ ဝႃႈၼင်ႇၼႆလႄႈ၊-

4ၵူၼ်းတင်းလၢႆၼၼ်ႉ ပွႆႇၸႂ်ႉၵူၼ်းၸူးၵႃႈတီႈဝဵင်း သီႉလေႃႇ လႄႈ ၶဝ်ဢွၼ်ၵၼ်ဢဝ်တိူၵ်ႈတႃႇပတီႉၺိၺ်ႇၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး ဢၼ်ယူႇၵႃႈၼႂ်းၵႄႈဝူင်ႈၵၢင် ၶေႇရူႉၽဵမ်ႇ ၼၼ်ႉမႃးလႄႈ၊ ႁေႃႇၽၼီႉ တင်း ၽီႉၼႁတ်ႉ လုၵ်ႈၸၢႆး ဢေးလီႉ သွင်ၵေႃႉၼၼ်ႉ ပႃးလူၺ်ႈၵၼ်တင်းတိူၵ်ႈတႃႇပတီႉၺိၺ်ႇၸဝ်ႈမႃးဢေႃႈ။-

5မိူဝ်ႈဢၼ်တိူၵ်ႈတႃႇပတီႉၺိၺ်ႇထႃႇဝရႃႉၽြႃး ႁွတ်ႈထိုင်ၵႃႈၼႂ်းတပ်ႉၼၼ်ႉၸိုင်၊ ၵူၼ်းမဵဝ်း ဢီႉသရေႇလႃႉ ၵႃႈမီးၼၼ်ႉ ဢွၼ်ၵၼ်ႁုၼ်ႉတေႃႇထိုင်ႁွတ်ႈထၼ်ႈပေႃးသဵင်လိၼ်မိူင်းလင်မေႃးဢေႃႈ။-

6ၵူၼ်း ၽီႉလိတ်ႉတီႉ ၸိူဝ်းၼၼ်ႉ ငိၼ်းသဵင်ဢၼ်ႁုၼ်ႉၼၼ်ႉသေယဝ်ႉ၊ ထၢမ်ၵၼ်လႄႈဝႃႈ၊ သဵင်ဢၼ်ႁုၼ်ႉလႄႈလင်မေႃးၼႃႇ လူင်လၢင်ၵႃႈတီႈတပ်ႉ ႁေႇပြႄး ၼၼ်ႉၸမ်ႉ၊ ပဵၼ်ၸိူဝ်ႉၼင်ႇႁိုဝ်၊ ဝႃႈၼင်ႇၼႆသေလႄႈ ႁူႉလွင်ႈဢၼ်တိူၵ်ႈတႃႇထႃႇဝရႃႉၽြႃး ႁွတ်ႈထိုင်ၵႃႈၼႂ်းတပ်ႉၼၼ်ႉဢေႃႈ။-

7ၵူၼ်း ၽီႉလိတ်ႉတီႉ ၸိူဝ်းၼၼ်ႉ ၵူဝ်ႁႄလႄႈလၢတ်ႈဝႃႈ၊ ၽြႃးပဵၼ်ၸဝ်ႈႁွတ်ႈထိုင်ၵႃႈၼႂ်းတပ်ႉၶဝ်ၼၼ်ႉယဝ်ႉလူင်ပႄႇ၊ ဝႃႈၼင်ႇၼႆလႄႈ သမ်ႉဝႃႈႁဝ်းၼႆႉမီးဢႃႉမင်ႇၵလႃႇဢေႃႈ။ ဢမ်ႇတွၼ်ႉပဵၼ်ၸိူဝ်ႉၼင်ႇၼႆသေပွၵ်ႈ။-

8ႁဝ်းၼႆႉမီးဢႃႉမင်ႇၵလႃႇဢေႃႈ။ ၽူႈလႂ်တၵ်းၵႄႇသႄႇဢဝ်ႁဝ်းလွတ်ႈသေၵႃႈၼႂ်းမိုဝ်းၽြႃးဢၼ်တၼ်းၶူဝ်းယႂ်ႇၼႃႇၸိူဝ်းၼႆႉ။ ၽြႃးၸိူဝ်းၼႆၸမ်ႉ၊ ပဵၼ်ၽြႃးဢၼ်ဢဝ်တင်းၽေးၵူႈၸိူဝ်ႉၵူႈပိူင်ပၼ်တၢမ်ႇ တီႈၵူၼ်း ဢေႇၵိပ်ႉတူႉ ၸိူဝ်းၼၼ်ႉ ၵႃႈၼႂ်းထိူၼ်ႇၼၼ်ႉဢေႃႈ။-

9ၵူၼ်း ၽီႉလိတ်ႉတီႉ ၶဝ်ဢိူၺ်း၊ ဢွၼ်ၵၼ်ဢဝ်ႁႅင်းလႄႈႁဵတ်းၵူၼ်းၸၢႆးႁႂ်ႈသူဢမ်ႇလႆႈၶၢမ်ႇႁဵတ်းၶႃႈတီႈၵူၼ်း ႁေႇပြႄး ၸိူဝ်းၼၼ်ႉ မိူၼ်ၸိူဝ်ႉၼင်ႇဢၼ် ၶဝ်လႆႈၶၢမ်ႇႁဵတ်းၶႃႈတီႈသူၼၼ်ႉတႃႉ။ ဢွၼ်ၵၼ်ႁဵတ်းၵူၼ်းၸၢႆးလႄႈ တိုၵ်းသိုၵ်းတႃႉ၊ ဝႃႈၼင်ႇၼႆဢေႃႈ။-

10ၵူၼ်း ၽီႉလိတ်ႉတီႉ ၸိူဝ်းၼၼ်ႉ တိုၵ်းသိုၵ်းလႄႈ မဵဝ်း ဢီႉသရေႇလႃႉ သမ်ႉၶိုၼ်း တူၵ်းသုမ်းသေယဝ်ႉ၊ ဢွၵ်ႇပၢႆႈၸူးၵႃႈတီႈမူဝ်းၵႃႇ တီႈယူႇတူဝ်ၸဝ်ႈၵဝ်ႇၵူႈၵေႃႉၵူႈၵူၼ်းသေဢေႃႈ။ ပဵၼ်တၢင်းဢၼ်ၶႃႈၽၼ်းဢဝ်တၢႆဢၼ်ယႂ်ႇၼႃႇလူင်လၢင်လႄႈ ႁူဝ်ႁၢၼ်ၵူၼ်းသိုၵ်းပႆတိၼ်မဵဝ်း ဢီႉသရေႇလႃႉ လူမ်ႉတၢႆ သၢမ်မိုၼ်ႇဢေႃႈ။-

11တိူၵ်ႈတႃႇၽြႃးပဵၼ်ၸဝ်ႈၼၼ်ႉ လႆႈၶၢမ်ႇတၢင်းဢၼ်ပိူၼ်ႈသိမ်းဢဝ်ၵႂႃႇလႄႈ ႁေႃႇၽၼီႉ တင်း ၽီႉၼႁတ်ႉ ဢၼ်ပဵၼ်လုၵ်ႈၸၢႆး ဢေးလီႉ သွင်ၵေႃႉၼၼ်ႉ သုမ်းဢသၢၵ်ႈသေဢေႃႈ။

12ၵူၼ်းမဵဝ်း ပိၼ်ႇယႃႇမိၼ်ႇ ၵေႃႉၼိုင်ႈ လုၵ်ႉသေၵႃႈၼႂ်းတီႈဢၼ်တိုၵ်းသိုၵ်းၼၼ်ႉ လႅၼ်ႈပၢႆႈမႃးလႄႈ သိၵ်ႇၶူဝ်းၼုင်ႈတူဝ်ၸဝ်ႈၵဝ်ႇယူႇ၊ ဢဝ်မုၼ်ႈလိၼ်တၢင်ႇသႂ်ႇၵႃႈၼိူဝ်ႁူဝ်တူဝ်ၸဝ်ႈၵဝ်ႇယူႇသေလႄႈ ႁွတ်ႈထိုင်ၵႃႈတီႈဝဵင်း သီႉလေႃႇ ၼႂ်းဝၼ်းၼၼ်ႉၵမ်းလဵဝ်ဢေႃႈ။-

13မိူဝ်ႈဢၼ်ၵေႃႉၼၼ်ႉႁွတ်ႈထိုင်ၼၼ်ႉၸိုင်၊ ဢေးလီႉ ၼင်ႈယူႇၵႃႈၼိူဝ်ၶူင်ႇၵႃႈတီႈႁိမ်းသဵၼ်ႈတၢင်းလႄႈ ႁူဝ်ၸႂ်မၼ်းသၼ်ႇဝႆယူႇ ၵွပ်ႈပိူဝ်ႈတိူၵ်ႈတႃႇၽြႃးပဵၼ်ၸဝ်ႈၼၼ်ႉလႄႈပႂ်ႉယူႇဢေႃႈ။ ၵေႃႉၼၼ်ႉႁွတ်ႈထိုင်ၵႃႈၼႂ်းဝဵင်းလႄႈမွၵ်ႇလၢတ်ႈလွင်ႈမၼ်းတၢင်းမၼ်းသေယဝ်ႉ၊ ဝဵင်းတင်းဝဵင်းဢွၼ်ၵၼ်သႅၼ်ႇႁွင်ႉဢေႃႈ။-

14ဢေးလီႉ ငိၼ်းသဵင်ဢၼ်သႅၼ်ႇႁွင်ႉၼၼ်ႉလႄႈထၢမ်ဝႃႈ၊ သဵင်ဢၼ်ဢူၼ်ဢဵၼ်မေႃးမႄးၼႆႉၸမ်ႉ၊ ပဵၼ်ၸိူဝ်ႉၼင်ႇႁိုဝ်။ ဝႃႈၼင်ႇၼႆသေယဝ်ႉ၊ ၵေႃႉၼၼ်ႉႁိပ်ႈၼႅတ်ႈမႃးလႄႈ လဝ်ႊလၢတ်ႈတီႈ ဢေးလီႉ ဢေႃႈ။-

15မိူဝ်ႈၼၼ်ႉ ဢေးလီႉ ၼၼ်ႉဢသၢၵ်ႈလႆႈၵဝ်ႈသိပ်းပၢႆပႅတ်ႇပီႊယဝ်ႉလႄႈ သၢႆတႃပွင်ႇၵႂႃႇတေႃႇထိုင်ႁွတ်ႈထၼ်ႈပေႃး တႃဢမ်ႇႁၼ်လႆႈယဝ်ႉ။-

16ၵေႃႉၼၼ်ႉလဝ်ႊလၢတ်ႈတီႈ ဢေးလီႉ လႄႈဝႃႈ၊ ၵဝ်ၶႃႈၼႆႉပဵၼ်ၵေႃႉဢၼ် လုၵ်ႉသေၵႃႈတီႈဢၼ်တိုၵ်းသိုၵ်းၼၼ်ႉ ႁွတ်ႈမႃးၶႃႈဢေႃႈ။ ၵဝ်ၶႃႈပၢႆႈဢွၵ်ႇသေၵႃႈၼႂ်းတီႈဢၼ်တိုၵ်းသိုၵ်းၼၼ်ႉဝၼ်းမိူဝ်ႈၼႆႉလႄႈမႃးၶႃႈဢေႃႈ၊ ဝႃႈၼင်ႇၼႆသေယဝ်ႉ၊ မၼ်းထၢမ်လႄႈဝႃႈ၊ လုၵ်ႈၸၢႆးၵဝ်ဢိူၺ်း၊ ဢမူႉၸမ်ႉ၊ ပဵၼ်ၸိူဝ်ႉၼင်ႇႁိုဝ်၊ မိူဝ်ႈဢၼ်ဝႃႈၼင်ႇၼႆၸိုင်၊-

17ၵေႃႉဢၼ်မႃးမွၵ်ႇလၢတ်ႈသတၢင်းသဵင်ၶၢဝ်ႇၼၼ်ႉၶိုၼ်းလဝ်ႊလၢတ်ႈလႄႈဝႃႈ၊ မဵဝ်း ဢီႉသရေႇလႃႉ ဢွၵ်ႇပၢႆႈၵႃႈတီႈၽၢႆႇၼႃႈၵူၼ်း ၽီႉလိတ်ႉတီႉ ၸိူဝ်းၼၼ်ႉလႄႈ လႆႈၶၢမ်ႇတၢင်းဢၼ်ၶႃႈၽၼ်းဢၼ်ဢဝ်တၢႆ ဢၼ်ယႂ်ႇၼႃႇလူင်လၢင်ၶႃႈယဝ်ႉ။ လုၵ်ႈၸၢႆးၸဝ်ႈႁဝ်း ႁေႃႇၽၼီႉ တင်း ၽီႉၼႁတ်ႉ သွင်ၵေႃႉၼၼ်ႉ တၢႆယဝ်ႉၶႃႈယဝ်ႉ။ တိူၵ်ႈတႃႇၽြႃးပဵၼ်ၸဝ်ႈၵေႃႈ လႆႈၶၢမ်ႇတၢင်းဢၼ်ပိူၼ်ႈသိမ်းဢဝ်ၵႂႃႇယဝ်ႉၶႃႈယဝ်ႉ၊ ဝႃႈၼင်ႇၼႆဢေႃႈ။-

18မိူဝ်ႈဢၼ်ၵေႃႉၼၼ်ႉမွၵ်ႇလၢတ်ႈလွင်ႈတိူၵ်ႈတႃႇၽြႃးပဵၼ်ၸဝ်ႈၼၼ်ႉၸိုင်၊ မၼ်းပိၼ်ႈတူၵ်းၵႃႈၼိူဝ်ၶူင်ႇဢၼ်မၼ်းၼင်ႈယူႇ ၵႃႈႁိမ်းၽၵ်းတူၼၼ်ႉၵႂႃႇတၢင်းလင်သေယဝ်ႉ၊ ၶေႃးမၼ်းႁၵ်းလႄႈတၢႆသေဢေႃႈ။ မၼ်းၼၼ်ႉပဵၼ်ၵေႃႉဢၼ်ဢသၢၵ်ႈယႂ်ႇလႄႈ တူဝ်ၼၵ်းၼႃႇဢေႃႈ။ မၼ်းလႆႈၸီႇယၢင်ႇၵႃႈၼိူဝ်မဵဝ်း ဢီႉသရေႇလႃႉ သီႇသိပ်းပီႊဢေႃႈ။

19လုၵ်ႈပႂ်ႉမၼ်းမေး ၽီႉၼႁတ်ႉ ၼၼ်ႉပႃးပတိၵ်ႉသၼ်ႇထေႇၵႄႇထူၼ်ႈလႄႈ ၸမ်ၶိင်ႇမၼ်းၶႃႇမၼ်းယဝ်ႉလႄႈ မိူဝ်ႈဢၼ်လႆႈငိၼ်းသတၢင်းလွင်ႈဢၼ် တိူၵ်ႈတႃႇၽြႃးပဵၼ်ၸဝ်ႈလႆႈၶၢမ်ႇတၢင်းဢၼ်ပိူၼ်ႈသိမ်းဢဝ် ဢိၵ်ႇတင်းလွင်ႈဢၼ်ပေႃႈၸဝ်ႈမၼ်းတင်းၽူဝ်မၼ်းတၢႆၼၼ်ႉၸိုင်၊ ၵူမ်ႈမူပ်ႇလႄႈ ၵိူတ်ႇလဵင်ႉလုၵ်ႈၵမ်းလဵဝ် ၵွပ်ႈပိူဝ်ႈဢၼ်ဝူၺ်ႇတၼႃႇမၼ်းႁွတ်ႈထိုင်ၼၼ်ႉဢေႃႈ။-

20မိူဝ်ႈဢၼ်မၼ်းၸမ်တၵ်းတၢႆၼၼ်ႉၸိုင်၊ မႄႈယိင်းဢၼ်ၸုၵ်းယူႇၵႃႈတီႈႁိမ်းမၼ်းၸိူဝ်းၼၼ်ႉဢွၼ်ၵၼ်လၢတ်ႈတီႈမၼ်းလႄႈဝႃႈ၊ ယႃႇပေမႆႈၸႂ်။ မႂ်းၵိူတ်ႇလဵင်ႉလုၵ်ႈၸၢႆးမႃးယဝ်ႉ၊ ဝႃႈၼင်ႇၼႆသေၵေႃႈ မၼ်းယင်းဢမ်ႇတၵ်းသဵင်၊ ယင်းဢမ်ႇဝႆႉဢမူႉလႄႈယူႇဢေႃႈ။-

21လႆႈသမ်ႉ မၼ်းႁွင်ႉႁဵၵ်ႈၸိုဝ်ႈလုၵ်ႈဢွၼ်ႇၼၼ်ႉ ဢီႉၶပုတ်ႉ လႄႈဝႃႈ၊ မုၼ်သရေႇမဵဝ်း ဢီႉသရေႇလႃႉ လပ်ႉႁၢႆၵႂႃႇၵွပ်ႈပိူဝ်ႈဢၼ်တိူၵ်ႈတႃႇၽြႃးပဵၼ်ၸဝ်ႈ လႆႈၶၢမ်ႇတၢင်းဢၼ်ပိူၼ်ႈသိမ်းဢဝ်ၵႂႃႇ ဢိၵ်ႇတင်းၵွပ်ႈပိူဝ်ႈဢမူႉပေႃႈၸဝ်ႈတင်းၽူဝ်ၼၼ်ႉဢေႃႈ၊ ဝႃႈၼင်ႇၼႆယဝ်ႉလႄႈ၊-

22သမ်ႉလၢတ်ႈလႄႈဝႃႈ၊ မုၼ်သရေႇမဵဝ်း ဢီႉသရေႇလႃႉ လပ်ႉႁၢႆၵႂႃႇၵွပ်ႈပိူဝ်ႈဢၼ်တိူၵ်ႈတႃႇၽြႃးပဵၼ်ၸဝ်ႈ မဵဝ်း ဢီႉသရေႇလႃႉ လႆႈၶၢမ်ႇတၢင်းဢၼ်ပိူၼ်ႈသိမ်းဢဝ်ၵႂႃႇၼၼ်ႉယဝ်ႉ၊ ဝႃႈၼင်ႇၼႆဢေႃႈ။

← Chapter 3 Jump to: Chapter 5 →