1 Samuel 22

Shan

← Chapter 21 Jump to: Chapter 23 →

1ပိူဝ်ႈၼႆလႄႈ တႃႇဝိတ်ႈ ဢွၵ်ႇသေၵႃႈတီႈၼၼ်ႈလႄႈ ၵၢင်းလွတ်ႈတင်းၽေးယူႇသေလႄႈ ႁွတ်ႈထိုင်ၵႃႈတီႈႁူးထမ်ႈ ဢတူႉလမ်ႇ ဢေႃႈ။ ပီႈၸၢႆးမၼ်းတင်းလၢႆ ဢိၵ်ႇတင်းပီႈၼွင်ႉၸိူဝ်ႉၶိူဝ်းမၼ်းတင်းသဵင်ႈတင်းလူင် ငိၼ်းလွင်ႈမၼ်းသေယဝ်ႉ၊ ဢွၼ်ၵၼ်လူင်းၸူးတီႈမၼ်း ၵႃႈတီႈၼၼ်ႈဢေႃႈ။-

2ၵႃႈပဵၼ်ၵေႃႉဢၼ်မီးဢမူႉ၊ ၵေႃႉဢၼ်ထုၵ်ႇၼီႈထုၵ်ႇၶွတ်ႇ၊ ၵေႃႉဢၼ်ၶီၸႂ်ၶူမ်ၸႂ်ၸိူဝ်းၼၼ်ႉ ၵႂႃႇၸူႉၵၼ်တုမ်ၵၼ်ၵႃႈတီႈမၼ်းလႄႈ မၼ်းလႆႈဢုပ်ႉၵႃႈၼိူဝ်ၶဝ်ဢေႃႈ။ ၵူၼ်းဢၼ်မီးတီႈမၼ်းၼၼ်ႉ မီးသေသီႇပၢၵ်ႇၼိုင်ႈဢေႃႈ။-

3တႃႇဝိတ်ႈ လုၵ်ႉသေၵႃႈတီႈၼၼ်ႈၵႂႃႇၵႃႈတီႈဝဵင်း မီႉၸပႃႇ မိူင်း မေႃႇၽႃႉ သေလႄႈ လဝ်ႊလၢတ်ႈတီႈၶုၼ်ႁေႃၶမ်း မေႃႇၽႃႉ လႄႈဝႃႈ၊ ၸူဝ်ႈဢၼ်ၵဝ်ၶႃႈဢမ်ႇပႆႇႁူႉလွင်ႈဢၼ် ၽြႃးပဵၼ်ၸဝ်ႈတၵ်းႁဵတ်းၸိူဝ်ႉၼင်ႇႁိုဝ်တီႈၵဝ်ၶႃႈၼၼ်ႉၸိုင်၊ ၶႅၼ်းတေႃႈပၼ်ဢၶႂၢင်ႉႁႂ်ႈပေႃႈမႄႈၵဝ်ၶႃႈၸိူဝ်းၼၼ်ႉ ဢွၵ်ႇမႃးလႄႈလႆႈယူႇၵႃႈတီႈၸဝ်ႈႁဝ်းသေၵမ်းတီႈၶႃႈ၊ ဝႃႈၼင်ႇၼႆသေယဝ်ႉ၊-

4ဢဝ်ၶဝ်သႂၢင်းၶဝ်ႈၵႃႈတီႈၶုၼ်ႁေႃၶမ်း မေႃႇၽႃႉ လႄႈ ၶဝ်ၼၼ်ႉ လႆႈယူႇၵႃႈတီႈၶုၼ်ၼၼ်ႉၸူဝ်ႈဢၼ် တႃႇဝိတ်ႈ ယင်းယူႇၵႃႈတီႈႁူးထမ်ႈ ဢၼ်မၼ်ႈၶိူင်ႇၼၼ်ႉဢေႃႈ။-

5လႆႈသမ်ႉ ပရေႃးၽႅတ်ႈ ၵၢတ်ႉ လၢတ်ႈတီႈ တႃႇဝိတ်ႈ လႄႈဝႃႈ၊ ယႃႇပေယူႇၵႃႈတီႈႁူးထမ်ႈဢၼ်မၼ်ႈၶိူင်ႇၼၼ်ႉ။ ဢွၵ်ႇလႄႈၵႂႃႇၵႃႈတီႈ မိူင်း ယူႉတႃႉ ပုၼ်ႉတႃႉ၊ ဝႃႈၼင်ႇၼႆလႄႈ၊ တႃႇဝိတ်ႈ ၵႂႃႇလႄႈႁွတ်ႈထိုင်ၵႃႈတီႈထိူၼ်ႇ ႁႃႇရိတ်ႉ ဢေႃႈ။

6မိူဝ်ႈၼၼ်ႉ ၼႂ်းမိူဝ်ႈဢၼ် သေႃးလူႉ ယင်းတိုၵ်ႉယိပ်းၵမ်ႁွၵ်ႇယူႇသေလႄႈ ၼင်ႈယူႇၵႃႈတီႈဝဵင်း ၵီႉပႃႉ ၵႃႈတႂ်ႈတူၼ်ႈမႆႉဢၼ်မီးၵႃႈၼိူဝ်ၵုင်းလႄႈ ၶႃႈမၼ်းၵူၼ်းမၼ်းတင်းသဵင်ႈတင်းလူင် ၸုၵ်းလွမ်ႉႁွပ်ႈမၼ်းယူႇၼၼ်ႉၸိုင်၊ သေႃးလူႉ ၼၼ်ႉ ငိၼ်းလွင်ႈဢၼ်ထူပ်းႁၼ် တႃႇဝိတ်ႈ ဢိၵ်ႇတင်း ၶဝ်ၸိူဝ်းဢၼ် မီးလူၺ်ႈၵၼ်တင်းမၼ်းၼၼ်ႉလႄႈ၊-

7သေႃးလူႉ လၢတ်ႈတီႈၶႃႈမၼ်းၵူၼ်းမၼ်း ဢၼ်ၸုၵ်းလွမ်ႉႁွပ်ႈမၼ်းယူႇၸိူဝ်းၼၼ်ႉလႄႈဝႃႈ၊ ၵူၼ်းမဵဝ်း ပိၼ်ႇယႃႇမိၼ်ႇ ၶဝ်ဢိူၺ်း၊ ဢွၼ်ၵၼ်ထွမ်ႇငိၼ်းတႃႉ။ လုၵ်ႈၸၢႆး ယေႇသႄး ၼၼ်ႉ တၵ်းဢဝ်တူင်ႈႁႆႊတူင်ႈၼႃး ဢိၵ်ႇတင်းသူၼ်ဢူးယဵၼ်ႇၸပိတ်ႈတင်းလၢႆ ၽႄမႅင်ႇပၼ်တီႈသူၵႃႈမီးႁိုဝ်။ တၵ်းဢဝ်သူၵႃႈမီးၼႆႉ ၶၢၼ်းဝႆႉၼႂ်းဢရႃႇၵေႃႉဢၼ်ဢုပ်ႉၵႃႈၼိူဝ်ယေႈႁဵင်၊ ၵေႃႉဢၼ်ဢုပ်ႉၵႃႈၼိူဝ်ယေႈပၢၵ်ႇႁိုဝ်။-

8ၵွပ်ႈပိူဝ်ႈဢၼ်မၼ်းႁဵတ်းၸိူဝ်ႉၼင်ႇၼၼ်လႄႈ သူၵႃႈမီးဢွၼ်ၵၼ်ႁဵတ်းမုၵ်ႉႁဵတ်းၸိူဝ်းယူႇၽၢႆႇၼိုင်ႈတင်းၵဝ်ႁိုဝ်။ ၼႂ်းသူၼႆႉၽူႈလႂ်သေၵေႃႉသေၵူၼ်း ဢမ်ႇလဝ်ႊလၢတ်ႈလွင်ႈဢၼ်လုၵ်ႈၸၢႆးၵဝ် ႁဵတ်းမိၵ်ႉသႃႇႁႃယႃႉလူၺ်ႈၵၼ်တင်းလုၵ်ႈၸၢႆး ယေႇသႄး ၼၼ်ႉ။ ၽူႈလႂ်သေၵေႃႉသေၵူၼ်း ဢမ်ႇမႆႈၸႂ်ၶီၸႂ်လူၺ်ႈၵဝ်။ ၽူႈလႂ်ယင်းဢမ်ႇမွၵ်ႇဢမ်ႇလၢတ်ႈလွင်ႈဢၼ်လုၵ်ႈၸၢႆးၵဝ် တိုၵ်းယူင်းၶႃႈၵဝ်ႁႂ်ႈမၼ်းလႆႈပႂ်ႉလွမ်ပႂ်ႉတူၺ်းၵဝ် မိူၼ်ၸိူဝ်ႉၼင်ႇဢၼ်ႁဵတ်းယူႇဝၼ်းမိူဝ်ႈၼႆႉၼၼ်ႉလႄႈယူႇလူင်ပႄႇ၊ မိူဝ်ႈဢၼ်ဝႃႈၼင်ႇၼႆၸိုင်၊-

9တေႃႉၵႃႉ ၵူၼ်းမဵဝ်း ဢေႇတုမ်ႇ ဢၼ်ဢုပ်ႉၵႃႈၼိူဝ်ၶႃႈၵူၼ်း သေႃးလူႉ ၼၼ်ႉ လဝ်ႊလၢတ်ႈလႄႈဝႃႈ၊ ၶႃႈၸဝ်ႈႁဝ်းႁၼ်လုၵ်ႈၸၢႆး ယေႇသႄး ၼၼ်ႉ ႁွတ်ႈထိုင်ၵႃႈတီႈဝဵင်း ၼေႃႇပႃႉ ၸူးၵႃႈတီႈ ဢႁီႉမလႅၵ်ႉ လုၵ်ႈၸၢႆး ဢႁီႉတုပ်ႉ ၼၼ်ႉတီႈၶႃႈဢေႃႈ။-

10မၼ်းၼၼ်ႉတွင်ႈထၢမ်တီႈထႃႇဝရႃႉၽြႃးပုၼ်ႈမၼ်းလႄႈ ဢဝ်ၸရိပ်ႈတၢင်းၵိၼ် ဢိၵ်ႇတင်းလၢပ်ႇ ၵေႃးလျတ်ႈ ၵူၼ်း ၽီႉလိတ်ႉတီႉ ၼၼ်ႉ ပၼ်တီႈမၼ်းတီႈၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

11ၶုၼ်ႁေႃၶမ်းပွႆႇၸႂ်ႉႁွင်ႉဢဝ်ယိတ်ႈပရေႃးႁဵၵ်ႈ ဢႁီႉမလႅၵ်ႉ လုၵ်ႈၸၢႆး ဢႁီႉတုပ်ႉ ဢိၵ်ႇတင်းၵႃႈပဵၼ်ပီႈၼွင်ႉၸိူဝ်ႉၶိူဝ်းပေႃႈမၼ်း ဢၼ်ဝႃႈယိတ်ႈပရေႃးႁဵၵ်ႈဢၼ်ယူႇၵႃႈတီႈဝဵင်း ၼေႃႇပႃႉ ၸိူဝ်းၼၼ်ႉလႄႈ ၶဝ်ၵႃႈမီးၼၼ်ႉ ဢွၼ်ၵၼ်ႁွတ်ႈမႃးတီႈၶုၼ်ႁေႃၶမ်းဢေႃႈ။-

12သေႃးလူႉ ၵေႃႈလၢတ်ႈလႄႈဝႃႈ၊ လုၵ်ႈၸၢႆး ဢႁီႉတုပ်ႉ ဢိူၺ်း၊ ထွမ်ႇငိၼ်းတႃႉ၊ ဝႃႈၼင်ႇၼႆသေယဝ်ႉ၊ မၼ်းၵေႃႈၶိုၼ်းလဝ်ႊလၢတ်ႈလႄႈဝႃႈ၊ ၵဝ်ၶႃႈမီးယူႇၶႃႈဢေႃႈၸဝ်ႈ၊ ဝႃႈၼင်ႇၼႆဢေႃႈ။-

13သေႃးလူႉ ၵေႃႈလၢတ်ႈတီႈမၼ်းလႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းဢိၵ်ႇတင်းလုၵ်ႈၸၢႆး ယေႇသႄး ၼၼ်ႉ ႁဵတ်းမုၵ်ႉႁဵတ်းၸိူဝ်းယူႇၽၢႆႇၼိုင်ႈတင်းၵဝ် ၼႂ်းလွင်ႈဢၼ်မႂ်းဢဝ်ၶဝ်ႈမုၼ်းတင်းလၢပ်ႇပၼ်တီႈမၼ်းလႄႈ တွင်ႈထၢမ်တီႈၽြႃးပဵၼ်ၸဝ်ႈပုၼ်ႈမၼ်း ႁႂ်ႈမၼ်းလႆႈလုၵ်ႉယူႇၽၢႆႇၼိုင်ႈတင်းၵဝ်သေလႄႈ လွမ်ၵျၢမ်ႇၵဝ်ယူႇၵႃႈၼင်ႇဢၼ်မၼ်းႁဵတ်းယူႇဝၼ်းမိူဝ်ႈၼႆႉၼၼ်ႉၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

14ဢႁီႉမလႅၵ်ႉ ၶိုၼ်းလဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ ၼႂ်းၶႃႈၼႂ်းၵူၼ်းၸဝ်ႈႁဝ်းၵႃႈမီးၽူႈလႂ်တၵ်းမီးသဵတ်ႈၸႃႇ မိူၼ်ၸိူဝ်ႉၼင်ႇ တႃႇဝိတ်ႈ ဢၼ်ပဵၼ်လုၵ်ႈၶူၺ်ၸဝ်ႈ ဢၼ်ပဵၼ်ၵေႃႉဢၼ်လႆႈၶဝ်ႈလႆႈဢွၵ်ႇတီႈၸဝ်ႈၵမ်ႈၸႂ်လႄႈ မီးသရေႇၵႃႈတီႈႁေႃၸဝ်ႈၼၼ်ႉတီႈၶႃႈ၊-

15ၵဝ်ၶႃႈၸႃႉႁဵတ်းတၢင်းဢၼ်တွင်ႈထၢမ်တီႈၽြႃးပဵၼ်ၸဝ်ႈပုၼ်ႈမၼ်း ၼႂ်းဝၼ်းၼၼ်ႉတီႈၶႃႈႁိုဝ်။ ႁႂ်ႈဢမူႉၼၼ်ႉ ၵႆၵၼ်တင်းၵဝ်ၶႃႈသေၵမ်းလူၺ်ႈ။ ယႃႇပေႁႂ်ႈၶုၼ်ႁေႃၶမ်းတၢင်ႇဢပႅတ်ႈတီႈၶႃႈၸဝ်ႈၼႆႉ ဢိၵ်ႇတင်းပီႈၼွင်ႉၸိူဝ်ႉၶိူဝ်းပေႃႈၶႃႈၸဝ်ႈသေၵမ်းတီႈၶႃႈ၊ ၶႃႈၸဝ်ႈဢမ်ႇႁူႉဢၼ်လဵၵ်ႉဢၼ်ယႂ်ႇလူၺ်ႈလွင်ႈဢမူႉၼႆႉလႃးလႃးတီႈၶႃႈ၊ ဝႃႈၼင်ႇၼႆဢေႃႈ။-

16ၶုၼ်ႁေႃၶမ်းလၢတ်ႈလႄႈဝႃႈ၊ ဢႁီႉမလႅၵ်ႉ ဢိူၺ်း၊ မႂ်းဢိၵ်ႇတင်းပီႈၼွင်ႉၸိူဝ်ႉၶိူဝ်းပေႃႈမႂ်းၵႃႈမီး တၵ်းလႆႈၶၢမ်ႇတၢႆဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆသေလႄႈ၊-

17မီးဢမိင်ႉတီႈၵူၼ်းသိုၵ်းပႆတိၼ်ဢၼ်လွမ်ႉလဵပ်ႈႁွပ်ႈယူႇၸိူဝ်းၼၼ်ႉလႄႈဝႃႈ၊ ဢွၼ်ၵၼ်ဝၢႆႇၶိုၼ်းလႄႈဢဝ်ယိတ်ႈပရေႃးႁဵၵ်ႈထႃႇဝရႃႉၽြႃးၸိူဝ်းၼႆႉတၢႆ ၵွပ်ႈပိူဝ်ႈဢၼ်ၶဝ်ယူႇၽၢႆႇ တႃႇဝိတ်ႈ လႄႈ ပိၵ်ႉသမ်ႉႁူႉလွင်ႈဢၼ်မၼ်းဢွၵ်ႇပၢႆႈၼၼ်ႉယူႇသေၵေႃႈ ဢမ်ႇမွၵ်ႇဢမ်ႇလၢတ်ႈတီႈၵဝ်ၼၼ်ႉတႃႉ၊ ဝႃႈၼင်ႇၼႆသေၵေႃႈ၊ ၶႃႈၵူၼ်းၶုၼ်ႁေႃၶမ်းၸိူဝ်းၼၼ်ႉ ယင်းဢမ်ႇၶႂ်ႈယိုၼ်ႈမိုဝ်းၶဝ်သေလႄႈ ယႃႉပႅတ်ႈ ယိတ်ႈပရေႃးႁဵၵ်ႈထႃႇဝရႃႉၽြႃးၸိူဝ်းၼၼ်ႉလႄႈယူႇဢေႃႈ။-

18လႆႈသမ်ႉ ၶုၼ်ႁေႃၶမ်းမီးဢမိင်ႉတီႈ တေႃႉၵႃႉ လႄႈဝႃႈ၊ မႂ်းဝၢႆႇၶိုၼ်းလႄႈယႃႉပႅတ်ႈယိတ်ႈပရေႃးႁဵၵ်ႈၸိူဝ်းၼႆႉတႃႉ၊ ဝႃႈၼင်ႇၼႆလႄႈ၊ တေႃႉၵႃႉ ၵူၼ်းမဵဝ်း ဢေႇတုမ်ႇ ၼၼ်ႉ ဝၢႆႇၶိုၼ်းလႄႈယႃႉပႅတ်ႈယိတ်ႈပရေႃးႁဵၵ်ႈၸိူဝ်းၼၼ်ႉလႄႈ ဢဝ်ပႅတ်ႈသိပ်းပၢႆႁႃႈပႃး ဢၼ်ၼုင်ႈသိူဝ်ႈသုပ်းပိၵ်ႈၼၼ်ႉတၢႆၼႂ်းဝၼ်းၼၼ်ႉဢေႃႈ။-

19ဝဵင်း ၼေႃႇပႃႉ ဢၼ်ယိတ်ႈပရေႃးႁဵၵ်ႈပိူင်ႇၼၼ်ႉၵေႃႈ မၼ်းတိုၵ်းတေႃးယႃႉၽဵဝ်ႈ ၸႃႉၸဵမ်ၵူၼ်းၸၢႆး၊ ၵူၼ်းယိင်း၊ လုၵ်ႈဢွၼ်ႇႁၢႆး၊ လုၵ်ႈဢွၼ်ႇဢၼ်ၵိၼ်ၼူမ်းလႄႈ ဝူဝ်း၊ လီႈ၊ သူဝ်းတင်းလၢႆပႅတ်ႈလူၺ်ႈၶူမ်းလၢပ်ႇၶူမ်းလႅဝ်းဢေႃႈ။-

20ၼႂ်းလုၵ်ႈၸၢႆး ဢႁီႉမလႅၵ်ႉ ဢၼ်ပဵၼ်လုၵ်ႈၸၢႆး ဢႁီႉတုပ်ႉ ၼၼ်ႉၸိူဝ်းၼၼ်ႉၵေႃႉၼိုင်ႈ ဢၼ်လႆႈၸိုဝ်ႈ ဢႃႇပျႃႇထႃႇ ၼၼ်ႉ လွတ်ႈလႄႈပၢႆႈၵႂႃႇၸူး ၵႃႈတီႈဢၼ် တႃႇဝိတ်ႈ မီးၼၼ်ႉဢေႃႈ။-

21ဢႃႇပျႃႇထႃႇ ၼၼ်ႉမွၵ်ႇလၢတ်ႈလွင်ႈဢၼ် သေႃးလူႉ ဢဝ်ယိတ်ႈပရေႃးႁဵၵ်ႈထႃႇဝရႃႉၽြႃးၸိူဝ်းၼၼ်ႉတၢႆၼၼ်ႉတီႈ တႃႇဝိတ်ႈ သေယဝ်ႉ၊-

22တႃႇဝိတ်ႈ လၢတ်ႈတီႈ ဢႃႇပျႃႇထႃႇ ၼၼ်ႉလႄႈဝႃႈ၊ ၵဝ်ႁူႉသၢႆငၢႆလွင်ႈဢၼ် တေႃႉၵႃႉ ၵူၼ်းမဵဝ်း ဢေႇတုမ်ႇ ၼၼ်ႉ တၵ်းမွၵ်ႇလၢတ်ႈတီႈ သေႃးလူႉ ၼၼ်ႉယူႇ ၼႂ်းမိုဝ်ႉဝၼ်းဢၼ်ၵဝ်ထူပ်းႁၼ်မၼ်း ၵႃႈတီႈၼၼ်ႈၵမ်းလဵဝ်ဢေႃႈ။ ၵဝ်လႆႈပဵၼ်လွင်ႈဢၼ်ႁႂ်ႈပီႈၼွင်ႉၸိူဝ်ႉၶိူဝ်းပေႃႈမႂ်းၵႃႈမီးၼၼ်ႉ လႆႈတၢႆယဝ်ႉလူင်ပႄႇ။-

23ယူႇလူၺ်ႈၵၼ်တင်းၵဝ်တႃႉ။ ယႃႇပေမႆႈၸႂ်။ ၵေႃႉဢၼ်ႁႃဢသၢၵ်ႈၵဝ်ၼၼ်ႉႁႃဢသၢၵ်ႈမႂ်းဢေႃႈ။ ပေႃးယူႇလူၺ်ႈၵၼ်တင်းၵဝ်ၸိုင်၊ တၵ်းၵၢင်းလွတ်ႈတင်းၽေးဢေႃႈ၊ ဝႃႈၼင်ႇၼႆဢေႃႈ။

← Chapter 21 Jump to: Chapter 23 →