1 Samuel 29

Shan

← Chapter 28 Jump to: Chapter 30 →

1ၵူၼ်း ၽီႉလိတ်ႉတီႉ ၸိူဝ်းၼၼ်ႉ ႁႂ်ႈပူဝ်ႇပႃႇၶဝ်ၵႃႈမီးၸူႉၵၼ်တုမ်ၵၼ်ၵႃႈတီႈဝဵင်း ဢႃႇၽႅၵ်ႉ ဢေႃႈ။ ၵူၼ်းမဵဝ်း ဢီႉသရေႇလႃႉ တင်းလၢႆၵေႃႈ ၶျႃးတပ်ႉၶဝ်ယူႇၵႃႈတီႈႁိမ်းၼမ်ႉဢွၵ်ႇႁူး ဢၼ်မီးၵႃႈတီႈဝဵင်း ယေႇၸရေႇလႃႉ ၼၼ်ႉဢေႃႈ။-

2ၵူၼ်း ၽီႉလိတ်ႉတီႉ ၸိူဝ်းၼၼ်ႉ ၶီႇၵႂႃႇၵူၼ်းယေႈပၢၵ်ႇ၊ ယေႈႁဵင်ယူႇသေလႄႈ တႃႇဝိတ်ႈ ဢိၵ်ႇတင်းၵူၼ်းမၼ်းၸိူဝ်းၼၼ်ႉ ၸွမ်းလူၺ်ႈၵၼ်တင်းၶုၼ် ဢႃႇၶိတ်ႉ ၼၼ်ႉ ၵႃႈတီႈတပ်ႉလိုၼ်းသုတ်းဢေႃႈ။-

3မိူဝ်ႈၼၼ်ႉ ၶုၼ် ၽီႉလိတ်ႉတီႉ ၸိူဝ်းၼၼ်ႉ ဢွၼ်ၵၼ်ထၢမ်လႄႈဝႃႈ၊ ၵူၼ်း ႁေႇပြႄး ၸိူဝ်းၼႆႉ ႁဵတ်းၵႃႈသင်၊ ဝႃႈၼင်ႇၼႆသေယဝ်ႉ၊ ၶုၼ် ဢႃႇၶိတ်ႉ လၢတ်ႈတီႈၶုၼ် ၽီႉလိတ်ႉတီႉ ၸိူဝ်းၼၼ်ႉလႄႈဝႃႈ၊ မၼ်းပဵၼ် တႃႇဝိတ်ႈ ၶႃႈ သေႃးလူႉ ၶုၼ်ႁေႃၶမ်း ဢီႉသရေႇလႃႉ ၼၼ်ႉလႄႈ ယူႇၵႃႈတီႈၵဝ် ပီႊလိူၼ်ဝၼ်းယၢမ်းႁိုင်ၼႃႇလူင်လၢင်လႄႈ၊ ၸႃႉၸဵမ်မိုဝ်ႉဝၼ်း ဢၼ်ႁွတ်ႈထိုင်ၵႃႈတီႈၵဝ်ၼၼ်ႉ တေႃႇထိုင်ႁွတ်ႈဝၼ်းမိူဝ်ႈၼႆႉ ၵဝ်ဢမ်ႇထူပ်းတီႈတၵ်းတၢင်ႇဢပႅတ်ႈတီႈမၼ်းသေၸိူဝ်ႉသေပိူင်ၼၼ်ႉဢမ်ႇၸႂ်ႈႁိုဝ်။ ဝႃႈၼင်ႇၼႆသေၵေႃႈ၊-

4ၶုၼ် ၽီႉလိတ်ႉတီႉ ၸိူဝ်းၼၼ်ႉ ၸႂ်မႆႈၶႆႈၸႃႉတီႈမၼ်းလႄႈဝႃႈ၊ ႁႂ်ႈၵေႃႉၼႆႉၶိုၼ်းမိူဝ်းလႄႈ ႁႂ်ႈမၼ်းၶိုၼ်းၵႂႃႇယူႇၵႃႈတီႈဢၼ်မႂ်းၶျႃးတီႈယူႇပၼ်မၼ်းၼၼ်ႉသေ။ ယႃႇပေႁႂ်ႈမၼ်းလူင်းၵႂႃႇလူၺ်ႈၵၼ်တင်းႁဝ်းႁႂ်ႈလႆႈတိုၵ်းသိုၵ်း။ ၵူဝ်မၼ်းတၵ်းယူႇၽၢႆႇရၢၼ်ႇသူႇႁဝ်း ၼႂ်းမိူဝ်ႈဢၼ်ႁဝ်းယင်းတိုၵ်ႉ တိုၵ်းသိုၵ်းယူႇၼၼ်ႉဢေႃႈ။ ၵေႃႉၼႆႉတၵ်းႁဵတ်းၸိူဝ်ႉၼင်ႇႁိုဝ်လႄႈ ႁႂ်ႈၸႂ်ၸဝ်ႈမၼ်းၼၼ်ႉပေႇၼၼ်ႉလႆႈ။ တၵ်းဢဝ်ၵွၵ်းႁူဝ်ၵူၼ်းႁဝ်းၸိူဝ်းၼႆႉ ဢၢပ်ႈပၼ်လႄႈႁဵတ်းလႆႈဢမ်ႇၸႂ်ႈႁိုဝ်။-

5ၵေႃႉၼႆႉပဵၼ် တႃႇဝိတ်ႈ ဢၼ်ၶဝ်ဢွၼ်ၵၼ်ၵႃႈဝႅၼ်ယူႇသေလႄႈ ဢဝ်လွင်ႈမၼ်းႁဵတ်းၵႂၢမ်းပဵၼ်လႄႉပဵၼ်ၵမ်းလႄႈဝႃႈ၊ သေႃးလူႉ ဢဝ်တၢႆပဵၼ်ႁဵင်ပဵၼ်ႁဵင်လႄႈ တႃႇဝိတ်ႈ ဢဝ်တၢႆပဵၼ်မိုၼ်ႇပဵၼ်မိုၼ်ႇယဝ်ႉ၊ ဝႃႈၼင်ႇၼႆၼၼ်ႉဢမ်ႇၸႂ်ႈႁိုဝ်။ ဝႃႈၼင်ႇၼႆသေယဝ်ႉ၊-

6ၶုၼ် ဢႃႇၶိတ်ႉ ႁွင်ႉဢဝ် တႃႇဝိတ်ႈ လႄႈလၢတ်ႈတီႈမၼ်းလႄႈဝႃႈ၊ ၵႃႈၼင်ႇဢၼ်ထႃႇဝရႃႉၽြႃးဢသၢၵ်ႈလိပ်းယူႇၼၼ်ႉ၊ မႂ်းႁဵတ်းသိုဝ်ႈသိုဝ်ႈတေႃႇတေႃႇ ဢမၢၼ်ႇၶၼ်ပဵၼ်လႄႈ တၢင်းဢၼ်မႂ်းၵႂႃႇမႃးသၢင်ႈႁဵတ်းၵႃႈၼႂ်းတပ်ႉလူၺ်ႈၵၼ်တင်းၵဝ်ၼၼ်ႉ ထုၵ်ႇၸႂ်မႅၼ်ႈၸႂ်ၵဝ်ယဝ်ႉ။ ၸႃႉၸဵမ်မိုဝ်ႉဝၼ်းဢၼ် မႂ်းႁွတ်ႈထိုင်ၵႃႈတီႈၵဝ်ၼၼ်ႉ တေႃႇထိုင်ႁွတ်ႈဝၼ်းမိူဝ်ႈၼႆႉလႄႈ ၵဝ်ဢမ်ႇထူပ်းဢပႅတ်ႈတီႈမႂ်း၊ ၼႂ်းဝႃႈၼၼ်သေၵေႃႈ မႂ်းဢမ်ႇထုၵ်ႇဢမ်ႇမႅၼ်ႈတႃၶုၼ်ၸိူဝ်းၼႆႉ။-

7ပိူဝ်ႈဢၼ်ပဵၼ်ၼင်ႇၼႆလႄႈ မိူဝ်ႈလဵဝ်ၼႆႉၶိုၼ်းမိူဝ်းလႄႈ ၵႂႃႇၼိမ်ၼိမ်လီလီတႃႉ။ ယႃႇပေႁဵတ်းႁႂ်ႈၶုၼ် ၽီႉလိတ်ႉတီႉ ၸိူဝ်းၼႆႉ ၸႂ်မႆႈၶႆႈၸႃႉသေၵမ်း၊ မိူဝ်ႈဢၼ်ဝႃႈၼင်ႇၼႆၸိုင်၊-

8တႃႇဝိတ်ႈ လဝ်ႊထၢမ်တီႈၶုၼ် ဢႃႇၶိတ်ႉ လႄႈဝႃႈ၊ ၶႃႈၸဝ်ႈႁဵတ်းၵႃႈသင်ယဝ်ႉတီႈၶႃႈ၊ ၸူဝ်ႈဢၼ်ၶႃႈၸဝ်ႈယူႇၵႃႈတီႈၸဝ်ႈႁဝ်းၼႆႉၼၼ်ႉ တေႃႇထိုင်ႁွတ်ႈဝၼ်းမိူဝ်ႈၼႆႉ ၸဝ်ႈႁဝ်းထူပ်းႁၼ်ဢပႅတ်ႈၵႃႈသင်လႄႈ ၶႃႈၸဝ်ႈဢမ်ႇလႆႈၵႂႃႇတိုၵ်းသိုၵ်းရၢၼ်ႇသူႇၸဝ်ႈၶုၼ်ႁေႃၶမ်းႁဝ်းတီႈၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

9ၶုၼ် ဢႃႇၶိတ်ႉ ၶိုၼ်းလၢတ်ႈတီႈ တႃႇဝိတ်ႈ လႄႈဝႃႈ၊ ၵဝ်ႁူႉလွင်ႈဢၼ်မႂ်းထုၵ်ႇတႃမႅၼ်ႈတႃၵဝ်မိူၼ်ၸိူဝ်ႉၼင်ႇတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈၼၼ်ႉယူႇဢေႃႈ။ ၼႂ်းဝႃႈၼၼ်သေၵေႃႈ ၶုၼ် ၽီႉလိတ်ႉတီႉ ၸိူဝ်းၼၼ်ႉ ၸီႇယၢင်ႇလႄႈဝႃႈ၊ မၼ်းဢမ်ႇလႆႈၸွမ်းလူၺ်ႈၵၼ်တင်းႁဝ်းၵႂႃႇတိုၵ်းသိုၵ်း၊ ဝႃႈၼင်ႇၼႆဝႆႉယဝ်ႉ၊-

10ပိူဝ်ႈဢၼ်ပဵၼ်ၼင်ႇၼႆလႄႈ မႂ်းဢိၵ်ႇတင်းၶႃႈၵူၼ်းၸဝ်ႈမႂ်း ဢၼ်ၸွမ်းမႃးလူၺ်ႈၵၼ်တင်းမႂ်းၼၼ်ႉၸိူဝ်းၼၼ်ႉ လုၵ်ႉမိူဝ်ႈၽုၵ်ႈၶိင်ႇၵၢင်ၼႂ်ၸဝ်ႉၸဝ်ႉလႄႈ ဢွၵ်ႇၵႂႃႇမိူဝ်ႈဢၼ် လုၵ်ႉၶိင်ႇၵၢင်ၼႂ်ၸဝ်ႉၸဝ်ႉမိူဝ်ႈဢၼ်မိူင်းလႅင်းၼၼ်ႉတႃႉ၊ ဝႃႈၼင်ႇၼႆသေယဝ်ႉ၊-

11တႃႇဝိတ်ႈ ဢိၵ်ႇတင်းၵူၼ်းမၼ်းၸိူဝ်းၼၼ်ႉ လုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈ ဢွၼ်ၵၼ်ၶိုၼ်းမိူဝ်းၵႂႃႇ ၵႃႈတီႈမိူင်း ၽီႉလိတ်ႉတီႉ ဢေႃႈ။ ၵူၼ်း ၽီႉလိတ်ႉတီႉ ၸိူဝ်းၼၼ်ႉၸမ်ႉ၊ ၶီႇၵႂႃႇၵႃႈတီႈဝဵင်း ယေႇၸရေႇလႃႉ ဢေႃႈ။

← Chapter 28 Jump to: Chapter 30 →