Ezekiel 16 — Shan

1လႆႈသမ်ႉ ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃးတီႈၵဝ်လႄႈဝႃႈၸမ်ႉ၊-

2လုၵ်ႈၵူၼ်းဢိူၺ်း၊ ႁဵတ်းႁႂ်ႈ ဝဵင်း ယေႇရူႉသလႅမ်ႇ ႁူႉလွင်ႈတၢင်းဢၼ်လီႁင်ႈဢဵတ်ႇသဵတ်ႇ မၼ်းၸိူဝ်းၼၼ်ႉလႄႈ၊-

3လၢတ်ႈတီႈမၼ်းလႄႈဝႃႈ၊ ၸဝ်ႈထႃႇဝရႃႉၽြႃး မီးဢမိင်ႉတီႈဝဵင်း ယေႇရူႉသလႅမ်ႇ လႄႈဝႃႈၸမ်ႉ၊ မူႇလႃႉငဝ်ႈရၢင်းမႂ်း ထႃႇၼႃႉတီႈဢၼ်မႂ်း ၵိူတ်ႇလဵင်ႉမႃးၼၼ်ႉ မီးၵႃႈတီႈမိူင်းၵူၼ်း ၶႃႇၼၼီႉ ဢေႃႈ။ ပေႃႈမႂ်းပဵၼ်ၵူၼ်း ဢႃႇမေႃးရီႉ လႄႈ မႄႈမႂ်းပဵၼ်မဵဝ်း ႁိတ်ႉတီႉ ဢေႃႈ။-

4လွင်ႈဢၼ်မႂ်း ၵိူတ်ႇလဵင်ႉမႃးၼၼ်ႉၸမ်ႉ၊ ၼႂ်းဝၼ်းဢၼ်မႂ်းၵိူတ်ႇလဵင်ႉမႃးၼၼ်ႉ သၢႆႁႄႇမႂ်း ဢမ်ႇလႆႈၶၢမ်ႇ တၢင်းဢၼ်ထိူဝ်ဢၼ်တႅပ်း။ မႂ်းဢမ်ႇလႆႈၶၢမ်ႇတၢင်းဢၼ် ဢၢပ်ႇၼမ်ႉႁႂ်ႈမူတ်းႁႂ်ႈသႂ်။ မႂ်းဢမ်ႇလႆႈၶၢမ်ႇ တၢင်းဢၼ်ဢဝ်ၵိူဝ်တႃး၊ တၢင်းဢၼ် ဢဝ်ၶူဝ်းၼုင်ႈၶဵၼ်းႁေႃႇ။-

5တႃၽူႈလႂ် သေၵေႃႉသေၵူၼ်း ဢမ်ႇမီးၵရူႉၼႃႇ ႁႂ်ႈလႆႈလုမ်းလႃး ၸိူဝ်ႉၼင်ႇၼၼ်တီႈမႂ်းလႄႈ ဢဵတ်းလူမႂ်း။ ၼႂ်းဝၼ်းဢၼ် မႂ်းၵိူတ်ႇလဵင်ႉမႃးၼၼ်ႉ မႂ်းလႆႈၶၢမ်ႇတၢင်းဢၼ်ပႅတ်ႈဝႆႉ ၵႃႈတီႈၼွၵ်ႈတီႈပၢင်ႇ ၵွပ်ႈပိူဝ်ႈဢၼ် လီႁင်ႈဢဵတ်ႇသဵတ်ႇ ဢသၢၵ်ႈမႂ်းၼၼ်ႉဢေႃႈ။-

6မိူဝ်ႈဢၼ်ၵဝ်တႆႇတၢင်း ပႆတၢင်းၵၢႆၵႂႃႇႁိမ်းမႂ်းလႄႈ ႁၼ်မႂ်းၵူဝ်ႈလိူတ်ႈယူႇၼၼ်ႉၸိုင်၊ ၵဝ်လၢတ်ႈတီႈမႂ်း ၼႂ်းမိူဝ်ႈဢၼ် မႂ်းယင်းတိုၵ်ႉ မီးယူႇၵႃႈၼႂ်းလိူတ်ႈမႂ်းၼၼ်ႉလႄႈဝႃႈ၊ ဢသၢၵ်ႈလိပ်းယူႇတႃႉ၊ ဝႃႈၼင်ႇၼႆဢေႃႈ။ ၸႂ်ႈတႄႉတႄႉယဝ်ႉ။ ၵဝ်လၢတ်ႈတီႈမႂ်း ၼႂ်းမိူဝ်ႈဢၼ် မႂ်းယင်းတိုၵ်ႉ မီးယူႇၵႃႈၼႂ်းလိူတ်ႈမႂ်းၼၼ်ႉလႄႈဝႃႈ၊ ဢသၢၵ်ႈလိပ်းယူႇတႃႉ၊ ဝႃႈၼင်ႇၼႆဢေႃႈ။-

7ၵဝ်ႁႂ်ႈမႂ်းၼမ်ၵိုၼ်းမႃး မိူၼ်ၸိူဝ်ႉၼင်ႇ တူၼ်ႈယိူဝ်ႈၼၼ်ႉလႄႈ၊ မႂ်းယႂ်ႇမႃးသုင်မႃးလႄႈ တူဝ်းတွၼ်းမႃးသေလႄႈ ပျေႉၸုမ်ႇဝႆႉ တင်းႁၢင်ႈၽၢင် ဢၼ်ႁၢင်ႈလီႁၢင်ႈငၢမ်းဢေႃႈ။ တဝ်ႈၼူမ်းမႂ်း ယုၵ်ႉၶိုၼ်ႈၵွင်ၶိုၼ်ႈလႄႈ ၶူၼ်ဢွၵ်ႇမႃးတီႈတူဝ်တီႈၶိင်းမႂ်းဢေႃႈ။ ၵူၺ်းၵႃႈ မႂ်းဢမ်ႇမီးၶူဝ်းၼုင်ႈ ၶူဝ်းမႆလႄႈ လႆႈယူႇတူဝ်ပူၺ်ယူႇဢေႃႈ။-

8လႆႈသမ်ႉ မိူဝ်ႈဢၼ် ၵဝ်တႆႇတၢင်းပႆတၢင်းၵၢႆၵႂႃႇႁိမ်းမႂ်းလႄႈ ႁၼ်မႂ်းၼၼ်ႉ ၵွပ်ႈပိူဝ်ႈဢၼ် မႂ်းႁွတ်ႈထိုင်ၶိင်ႇဢရွႆႇ ဢၼ်လီႁၵ်ႉလီပႅင်း ၼၼ်ႉလႄႈ ၵဝ်ၽႄႇၵီႈၶူဝ်းၼုင်ႈၵဝ်လႄႈ ႁူမ်ႇသုမ်ႇတၢင်းဢၼ် မႂ်းယူႇတူဝ်ပူၺ်ၼၼ်ႉဢေႃႈ။ ၵဝ်ႁဵတ်းတၢင်းဢၼ်တိူင်ႇဝႃႈ ၵိၼ်ႇဝႃႈ တီႈမႂ်းလႄႈ ႁဵတ်းပတီႉၺိၺ်ႇ လူၺ်ႈၵၼ်တင်းမႂ်းသေယဝ်ႉ၊ မႂ်းပဵၼ်မေးၵဝ်ဢေႃႈ၊ ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉဢေႃႈ။-

9မိူဝ်ႈၼၼ်ႉ ၵဝ်ဢဝ်မႂ်းဢၢပ်ႇၼမ်ႉလႄႈ သုၵ်ႈပွတ်ႇလိူတ်ႈၵႃႈမီး ဢၼ်ၵူဝ်ႈၵိူၵ်ႇမႂ်းယူႇၼၼ်ႉ ပႅတ်ႈလႄႈ ဢဝ်ၼမ်ႉမၼ်းတႃးမႂ်းဢေႃႈ။-

10ၵဝ်ဢဝ်ၶူဝ်းၼုင်ႈ ဢၼ်တမ်ႇၵၢမ်း ႁၢင်ႈၶိူင်ႈၼၼ်ႉ ၼုင်ႈပၼ်မႂ်းလႄႈ ဢဝ်သွၵ်းတိၼ်ၼင် တႁႃႇသႃႉ တိုဝ်းပၼ်မႂ်းဢေႃႈ။ ၵဝ်ဢဝ်ပိၵ်ႈၶျေႃး ၶဵၼ်းႁေႃႇပၼ်မႂ်းလႄႈ ဢဝ်ၶူဝ်းလၢႆႈၶူဝ်းၽေး သုမ်ႇမႆပၼ်မႂ်းဢေႃႈ။-

11ၵဝ်ဢဝ်ၶိူင်ႈၶူဝ်း ႁၢင်ႈၶိူင်ႈပၼ်မႂ်းလႄႈ ဢဝ်ဝႅၼ်မိုဝ်းတိုဝ်းပၼ်ၵႃႈတီႈမိုဝ်းမႂ်း သေလႄႈ ဢဝ်ႁွႆႈၶေႃးႁွႆႈပၼ် တီႈၶေႃးမႂ်းဢေႃႈ။-

12ၵဝ်ဢဝ်ႁွႆႈၶူႈလင် သႂ်ႇပၼ်တီႈၶူႈလင်မႂ်း၊ ဢဝ်ပေႇႁူ သႂ်ႇပၼ်တီႈႁူမႂ်းလႄႈ ဢဝ်ပၢၼ်းၵုမ်း ဢၼ်ႁၢင်ႈလီႁၢင်ႈငၢမ်းတိုဝ်းပၼ်မႂ်းဢေႃႈ။-

13ၼင်ႇၼၼ်လႄႈ မႂ်းလႆႈႁၢင်ႈၶိူင်ႈ ငိုၼ်းၶမ်းလႄႈ ၶူဝ်းၼုင်ႈတၢင်းမႆမႂ်း ပဵၼ်ပိၵ်ႈၶျေႃး၊ ပဵၼ်လၢႆႈပဵၼ်ၽေး၊ ပဵၼ်ၶူဝ်းဢၼ်တမ်ႇၵၢမ်း ႁၢင်ႈၶိူင်ႈၼၼ်ႉယူႇ၊ လႆႈၵိၼ်ၽွင်ၶဝ်ႈမုၼ်း၊ ၼမ်ႉၽိုင်ႈ၊ ၼမ်ႉမၼ်းယူႇသေလႄႈ ပျေႉၸုမ်ႇတင်း ႁၢင်ႈၽၢင် ဢၼ်ႁၢင်ႈလီႁၢင်ႈငၢမ်းလႄႈ လႆႈပဵၼ် သိုင်ႇၸိုင်ႈဝၢၼ်ႈမိူင်းၸဝ်ႈဢေႃႈ။-

14ၸိုဝ်ႈသဵင်မႂ်း ႁူင်ႁၢင်းသႃႈၸွတ်ႇၵႂႃႇ ၵႃႈၼႂ်း ၵူႈသိုင်ႇၵူႈမိူင်း ၵွပ်ႈပိူဝ်ႈဢၼ်မႂ်းႁၢင်ႈလီႁၢင်ႈငၢမ်းၼၼ်ႉဢေႃႈ။ လွင်ႈမၼ်းၸမ်ႉ ပဵၼ်ဢၼ်ၸေးၸုမ်ႇ ၵွပ်ႈပိူဝ်ႈသရေႇၵဝ် ဢၼ်ၵဝ်ဢဝ်ဢၢပ်ႈပၼ် တီႈမႂ်းၼၼ်ႉဢေႃႈ။-

15ၼႂ်းဝႃႈၼၼ်သေၵေႃႈ မႂ်းဢိင်တၢင်းဢၼ် ႁၢင်ႈလီႁၢင်ႈငၢမ်းမႂ်းၼၼ်ႉလႄႈ ႁဵတ်းမႄႈမွၵ်ႇယႃႈ ၵွပ်ႈပိူဝ်ႈၵုင်ႇသရေႇမႂ်း ဢၼ်ႁူင်ႁၢင်းၼၼ်ႉလႄႈ ႁဵတ်းမေႇထုင်ႇဢၼ်ဢမ်ႇတြႃး လူၺ်ႈၵၼ်တင်း ၵူၼ်းတႆႇတၢင်းပႆတၢင်းၵၢႆၵႂႃႇႁိမ်းမႂ်း ၵႃႈမီးၼၼ်ႉသေလႄႈ ၵူၼ်းၸၢႆး ၵူႈၵေႃႉၵူႈၵူၼ်း လႆႈဢၶႂၢင်ႉဢေႃႈ။-

16မႂ်းဢဝ်ၶူဝ်းၼုင်ႈမႂ်းလႄႈ ပွင်ႁဵတ်းပွင်မႄး ထႃႇၼႃႉတီႈသုင်တင်းလၢႆ ဢၼ်ဢဝ်ဢရွင်ႇႁၢင်ႈၽၢင် ဢၼ်လၢၵ်ႇပိူင်ႈၵၼ် လၢႆၸိူဝ်ႉ လၢႆပိူင်ၼၼ်ႉ ႁၢင်ႈၶိူင်ႈသႂ်ႇၼၼ်ႉပုၼ်ႈမႂ်းလႄႈ ႁဵတ်းမေႇထုင်ႇဢၼ်ဢမ်ႇတြႃး ၵႃႈၼိူဝ်ၸိူဝ်းၼၼ်ႉဢေႃႈ။ ဢမူႉၼၼ်ႉ ဢမ်ႇတွၼ်ႉပဵၼ်သေပွၵ်ႈ။ ၵမ်းလိုၼ်းၵေႃႈ တၵ်းဢမ်ႇပဵၼ်ၸိူဝ်ႉၼင်ႇၼၼ်ထႅင်ႈ။-

17မႂ်းဢဝ်ၶိူင်ႈပိူင်မႂ်း ဢၼ်လီဢၼ်မျၢတ်ႈ ဢၼ်ပဵၼ်ၶမ်းၵဝ် ငိုၼ်းၵဝ်လႄႈ ၵဝ်ပၼ်တီႈမႂ်းၼၼ်ႉၸိူဝ်းၼၼ်ႉ ႁဵတ်းရုၵ်ႈထူႉ ၵူၼ်းၸၢႆးသေလႄႈ ၽိတ်းပိူင်ႈလူၺ်ႈၵၼ် တင်းၶဝ်ၼၼ်ႉယဝ်ႉလူင်ပႄႇ။-

18မႂ်းဢဝ်ၶူဝ်းၼုင်ႈမႂ်း ဢၼ်တမ်ႇၵၢမ်း ႁၢင်ႈၶိူင်ႈၸိူဝ်းၼၼ်ႉ သုမ်ႇမႆပၼ်ၶဝ်ၼၼ်ႉသေလႄႈ ဢဝ်ၼမ်ႉမၼ်းၵဝ် ဢိၵ်ႇတင်းၼၢမ်ႇသႃႇၵဝ် တၢင်ႇတမ်းဝႆႉ ၵႃႈတီႈၽၢႆႇၼႃႈၶဝ်ၼၼ်ႉယဝ်ႉလူင်ပႄႇ။-

19ၽေႃးၸဵၼ်ႇ ဢၼ်ၵဝ်ပၼ်၊ ၽွင်ၶဝ်ႈမုၼ်း၊ ၼမ်ႉမၼ်း၊ ၼမ်ႉၽိုင်ႈ ဢၼ်ၵဝ်လဵင်ႉမႂ်းၼၼ်ႉၵေႃႈ၊ မႂ်းဢဝ်လႄႈ တၢင်ႇတမ်းဝႆႉၵႃႈတီႈၽၢႆႇၼႃႈၶဝ် ပုၼ်ႈဢၼ်တၵ်းပဵၼ်ဢၢႆဢၼ်ႁွမ်ဢၼ်ႁူၺ်းယဝ်ႉလူင်ပႄႇ။ ပဵၼ်ၸိူဝ်ႉၼင်ႇၼၼ်ယဝ်ႉ၊ ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉဢေႃႈ။-

20ၼွၵ်ႈသေၼၼ်ႉ မႂ်းဢဝ်လုၵ်ႈၸၢႆးမႂ်း လုၵ်ႈယိင်းမႂ်း ဢၼ်မႂ်းၵိူတ်ႇလဵင်ႉမႃး တီႈၵဝ်ၸိူဝ်းၼၼ်ႉလႄႈ ႁဵတ်းယိတ်ႈပုၵ်ႈၸေႃႇ တီႈၶဝ်ၼၼ်ႉ ႁႂ်ႈလႆႈလဵင်ႉလူၶဝ်ၼၼ်ႉယဝ်ႉလူင်ပႄႇ။-

21တၢင်းဢၼ် မႂ်းႁဵတ်းမေႇထုင်ႇဢၼ်ဢမ်ႇတြႃး ၸိူဝ်းၼၼ်ႉ ပဵၼ်ဢမူႉဢၼ်လဵၵ်ႉဢၼ်ၼွႆႉလႄႈ မႂ်းဢဝ်လုၵ်ႈၵဝ်လၢင်းၵဝ်တၢႆ လႄႈ ဢဝ်ၽႆးပုၵ်ႈၸေႃႇတီႈၶဝ်ၼၼ်ႉႁိုဝ်။-

22ၼႂ်းမိူဝ်ႈဢၼ် မႂ်းယင်းတိုၵ်ႉႁဵတ်းလွင်ႈတၢင်းဢၼ် လီႁင်ႈဢဵတ်ႇသဵတ်ႇ ဢိၵ်ႇတင်း ဢမူႉမေႇထုင်ႇဢၼ်ဢမ်ႇတြႃး ဢၼ်မႂ်းႁဵတ်း ၵႃႈမီးၼၼ်ႉ ယူႇၼၼ်ႉၸိုင်၊ မႂ်းဢမ်ႇၶုၵ်းၸႂ်လႆႈၶႆႈၸႂ်ထူပ်း မိုဝ်ႉဝၼ်းဢၼ် ဢသၢၵ်ႈဢရွႆႇမႂ်း ယင်းလဵၵ်ႉလႄႈမႂ်းဢမ်ႇမီး ၶူဝ်းၼုင်ႈၶူဝ်းမႆ ယူႇတူဝ်ပူၺ်ယူႇ၊ ၵူဝ်ႈၵိူၵ်ႇၵႃႈၼႂ်းလိူတ်ႈမႂ်းယူႇၼၼ်ႉ လူင်ပႄႇ။

23မႂ်းၼႆႉမီးဢႃႉမင်ႇၵလႃႇဢေႃႈ၊ မီးဢႃႉမင်ႇၵလႃႇဢေႃႈ၊ ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉဢေႃႈ။ မႂ်းႁဵတ်း တူႉၸရိူၵ်ႈ တင်းသဵင်ႈတင်းလူင်ၼၼ်ႉ သေယဝ်ႉ၊-

24မႂ်းတႄႇႁဵတ်းႁိူၼ်း မႄႈမွၵ်ႇယႃႈပုၼ်ႈမႂ်းလႄႈ ႁဵတ်းတီႈဢၼ်သုင် ၵႃႈၼႂ်းသဵၼ်ႈတၢင်း ၵူႈသဵၼ်ႈဢေႃႈ။-

25မႂ်းၼႆႉတႄႇႁဵတ်း တီႈဢၼ်သုင်မႂ်း ၵႃႈတီႈႁူဝ်တၢင်းသူပ်းတၢင်း ၵူႈတီႈလႄႈ ႁႂ်ႈတၢင်းဢၼ်ႁၢင်ႈလီႁၢင်ႈငၢမ်းမႂ်းၼၼ်ႉ ပဵၼ်တီႈဢၼ် လီႁင်ႈဢဵတ်ႇသဵတ်ႇသေလႄႈ ဢႃႈၶႃမႂ်း တီႈၶဝ်ၸိူဝ်းဢၼ် တႆႇတၢင်းပႆတၢင်း ၵၢႆၵႂႃႇႁိမ်းမႂ်းၵႃႈမီးလႄႈ ႁႂ်ႈဢမူႉမေႇထုင်ႇဢၼ်ဢမ်ႇတြႃးမႂ်း ၼမ်ၼႃႇ ဢေႃႈ။-

26မႂ်းၽိတ်းပိူင်ႈႁူမ်ႈလူၺ်ႈၵၼ်တင်း ၵူၼ်း ဢေႇၵိပ်ႉတူႉ ဢၼ်ႁိူၼ်းၸမ်ၵၼ်တင်းမႂ်း၊ ဢၼ်ပီးလီပုၵ်းလီၸိူဝ်းၼၼ်ႉလႄႈ ႁႂ်ႈဢမူႉမေႇထုင်ႇဢၼ်ဢမ်ႇတြႃးမႂ်း ၼမ်ၼႃႇ ႁႂ်ႈလႆႈတိုၵ်းယူင်း တၢင်းၸႂ်မႆႈၶႆႈၸႃႉၵဝ်ဢေႃႈ။-

27ပိူဝ်ႈၼႆလႄႈ ၵဝ်လႆႈဢဝ်မိုဝ်းၵဝ်ယဵတ်ႇ ၵႃႈၼိူဝ်မႂ်းသေလႄႈ ႁႂ်ႈတၢင်းၵိၼ်တၢင်းၶူပ်းမႂ်း လဵၵ်ႉၵေႇဢေႇမၢင်ၵႂႃႇလႄႈ ဢဝ်မႂ်း ဢၢပ်ႈပၼ်ၵႃႈၼႂ်းမိုဝ်းၶဝ်ၸိူဝ်းဢၼ်ၸင်းမႂ်း ဢၼ်လုၵ်ႈယိင်းမဵဝ်း ၽီႉလိတ်ႉတီႉ ဢၼ်ၸၢင်ႈဢူၵ်းဢၢႆ ၵွပ်ႈပိူဝ်ႈဢပႅတ်ႈ ဢၼ်ႁၢႆႉယုတ်ႈမႂ်းၼၼ်ႉဢေႃႈ။-

28ၵွပ်ႈပိူဝ်ႈ ဢၼ်ၸႂ်ၵီႉလေႇသႃႇမႂ်း ဢမ်ႇပေႇလႆႈလႄႈ၊ မႂ်းၽိတ်းပိူင်ႈႁူမ်ႈလူၺ်ႈၵၼ်တင်း ၵူၼ်း ဢႃႇသူႉရီႉ တင်းလၢႆဢေႃႈ။ ၸႂ်တႄႉတႄႉယဝ်ႉ။ ပိၵ်ႉသမ်ႉ မႂ်းၽိတ်းပိူင်ႈႁူမ်ႈလူၺ်ႈၵၼ် တင်းၶဝ်ၸိူဝ်ႉၼင်ႇၼၼ်သေၵေႃႈ၊ မႂ်းဢမ်ႇပေႇၸႂ်လႆႈ။-

29လိူဝ်သေၼၼ်ႉ၊ ပိၵ်ႉသမ်ႉမႂ်းႁႂ်ႈဢမူႉ မေႇထုင်ႇဢၼ်ဢမ်ႇတြႃးမႂ်းၼၼ်ႉ ၼမ်ၵိုၼ်းၼႃႇ ဢဝ်ၵႃႈတီႈမိူင်း ၶႃႇၼၢၼ်ႇ တေႃႇထိုင်ႁွတ်ႈ မိူင်း ၶႃႇလတေး သေၵေႃႈ မႂ်းဢမ်ႇပေႇၸႂ်လႆႈ။-

30မႂ်းႁဵတ်းဢမူႉၵႃႈမီးၼႆႉဢၼ်ဝႃႈ ဢမူႉဢၼ်မႄႈယိင်း ဢၼ်ႁဵတ်းဢုပ်ႉႁဵတ်းပိူင်ႇသေလႄႈ သိၼ်လူႉၼၼ်ႉၸၢင်ႈႁဵတ်းၼၼ်ႉ ယူႇသေလႄႈ ႁူဝ်ၸႂ်မႂ်းမိူၵ်ႈၼႃႇလူင်လၢင်လူင်ပႄႇ။-

31မႂ်းတႄႇႁဵတ်းႁိူၼ်းမႄႈမွၵ်ႇယႃႈမႂ်း ၵႃႈတီႈႁူဝ်တၢင်းသူပ်းတၢင်းၵူႈတီႈလႄႈ ႁဵတ်းတီႈဢၼ်သုင်မႂ်း ၵႃႈၼႂ်းသဵၼ်ႈတၢင်း ၵူႈသဵၼ်ႈ သေလႄႈ မႂ်းဢမ်ႇမိူၼ်ၵၼ်တင်းမႄႈမွၵ်ႇယႃႈ ၵွပ်ႈပိူဝ်ႈဢၼ်မႂ်းထဵင်ပႅတ်ႈ ၵႃႈၶၼ်မၼ်းၼၼ်ႉဢေႃႈ။-

32မႂ်းမိူၼ်ၵၼ်တင်းမႄႈယိင်း ဢၼ်လဵၼ်ႈၸူႉလႄႈ ႁပ်ႉတုင်းဢဝ်ၵူၼ်းၸၢႆး ဢၼ်ဢမ်ႇၸၢပ်ႈသႅင်ႇၵၼ်တင်းမၼ်းၼၼ်ႉ တၢင်တူဝ်ၽူဝ်မၼ်းၼၼ်ႉဢေႃႈ။-

33ပိူၼ်ႈၸၢင်ႈဢွၼ်ၵၼ်ပၼ်လၢၵ်ႈသွင်ႇ တီႈမႄႈမွၵ်ႇယႃႈၵႃႈမီးဢေႃႈ။ မႂ်းၸမ်ႉ၊ ၸၢင်ႈပၼ်လၢၵ်ႈသွင်ႇတီႈၸူႉမႂ်းၵႃႈမီးလႄႈ ၸၢင်ႈငႃဢဝ်ၶဝ်ၼၼ်ႉ ႁႂ်ႈၶဝ်လုၵ်ႉသေ ၵႃႈတီႈ ၵူႈၽၢႆႇၵူႈပႃႈမႃးလႄႈ ႁဵတ်းမေႇထုင်ႇ ဢၼ်ဢမ်ႇတြႃးလူၺ်ႈၵၼ်တင်းမႂ်းဢေႃႈ။-

34ပိူဝ်ႈဢၼ် ပဵၼ်ၼင်ႇၼႆလႄႈ မႂ်းၸၢင်ႈႁဵတ်းပိူင်ႈၵၼ် တင်းမႄႈမွၵ်ႇယႃႈတၢင်ႇၵေႃႉတၢင်ႇၵူၼ်း ၼႂ်းတၢင်းဢၼ် ႁဵတ်းမေႇထုင်ႇဢၼ်ဢမ်ႇတြႃး ၸိူဝ်းၼၼ်ႉ ၼႂ်းလွင်ႈဢၼ်ၽူႈလႂ်သေၵေႃႉသေၵူၼ်း ဢမ်ႇၸွမ်းလင်မႂ်း ႁႂ်ႈလႆႈႁဵတ်းမေႇထုင်ႇဢၼ်ဢမ်ႇတြႃး လူၺ်ႈၵၼ်တင်းမႂ်းသေၵေႃႈ၊ မႂ်းယင်းဢမ်ႇၶၢမ်ႇဢမ်ႇဢဝ် ၵႃႈမၼ်းၶၼ်မၼ်းလႄႈ ပၼ်ၵႃႈမၼ်းၶၼ်မၼ်းတီႈပိူၼ်ႈသေလႄႈ ႁဵတ်းပိူင်ႈၵၼ်တင်းပိူၼ်ႈ ၸိူဝ်ႉၼင်ႇၼၼ် ၼၼ်ႉဢေႃႈ။

35ပိူဝ်ႈၼႆလႄႈ မႄႈမွၵ်ႇယႃႈဢိူၺ်း၊ ထွမ်ႇငိၼ်းဢမိင်ႉ ထႃႇဝရႃႉၽြႃးတႃႉ။-

36ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၵွပ်ႈပိူဝ်ႈ ဢၼ်ငိုၼ်းတွင်းမႂ်းသဵင်ႈႁၢႆလၢႆလႄႈ တၢင်းဢၼ်မႂ်းယူႇတူဝ်ပူၺ် ဢမ်ႇမီးၶူဝ်းၼုင်ႈၼၼ်ႉ လႆႈမီးတၢင်းဢၼ်ပေႃႇဢွၵ်ႇထၢင်ႇသႃးယူႇ ၵွပ်ႈပိူဝ်ႈတၢင်းဢၼ်မႂ်းၽိတ်းပိူင်ႈ ႁူမ်ႇလူၺ်ႈၵၼ်တင်းၸူႉမႂ်းတင်းလၢႆ ဢိၵ်ႇတင်း ၵွပ်ႈပိူဝ်ႈရုၵ်ႈထူႉ ဢၼ်လီႁင်ႈဢဵတ်ႇသဵတ်ႇမႂ်းၵႃႈမီး တင်းၵွပ်ႈပိူဝ်ႈ လိူတ်ႈလုၵ်ႈမႂ်းလၢင်းမႂ်း ဢၼ်မႂ်းပၼ်တီႈၶဝ်ၼၼ်ႉလႄႈ၊-

37ၵဝ်တၵ်း ႁႂ်ႈၸူႉမႂ်းဢၼ်မႂ်းမူၼ်ႈပျေႃႇ လူၺ်ႈၵၼ်တင်းၶဝ်ၵႃႈမီး ဢိၵ်ႇတင်း ၶဝ်ၸိူဝ်းဢၼ်မႂ်းႁၵ်ႉမႂ်းပႅင်းၵႃႈမီး တင်းၶဝ်ၸိူဝ်းဢၼ်မႂ်းၸင်းၵႃႈမီးၼၼ်ႉ ၸူႉၵၼ်တုမ်ၵၼ်ဢေႃႈ။ ၵဝ်တၵ်းႁႂ်ႈၸူႉၵၼ်တုမ်ၵၼ်ယူႇၽၢႆႇၼိုင်ႈ တင်းမႂ်းၵူႈၽၢႆႇၵူႈပႃႈသေလႄႈ ၼႄပျႃး တၢင်းဢၼ်မႂ်းယူႇတူဝ်ပူၺ် ဢမ်ႇမီးၶူဝ်းၼုင်ႈၼၼ်ႉ တီႈၶဝ်ထၼ်ႈပေႃး ႁႂ်ႈၶဝ်တင်းသဵင်ႈတင်းလူင်ၼၼ်ႉ လႆႈႁၼ်ၵႃႈဢၼ်မႂ်းယူႇ တူဝ်ပူၺ် ဢမ်ႇမီးၶူဝ်းၼုင်ႈၼၼ်ႉဢေႃႈ။-

38ၵဝ်တၵ်းၸီႇယၢင်ႇမႂ်း မိူၼ်ၸိူဝ်ႉၼင်ႇ ဢၼ်ၸီႇယၢင်ႇမႄႈယိင်း ဢၼ်လဵၼ်ႈၽူဝ်ဢွၼ်ႇလႄႈ ထွၵ်ႇလိူတ်ႈၵူၼ်းပႅတ်ႈၼၼ်ႉလႄႈ ဢဝ်လိူတ်ႈတေႃးသႃႉ တၢင်းၸႂ်မႆႈဢၼ်ႁႅင်းယႂ်ႇၼႃႇ ဢိၵ်ႇတင်း တၢင်းဢၼ်ၸႂ်ၶႆႈၸႃႉဢမ်ႇပေႇလႆႈၼၼ်ႉ တိုၵ်းပၼ်တီႈမႂ်းဢေႃႈ။-

39ၵဝ်တၵ်းဢဝ်မႂ်းပၼ် ၵႃႈၼႂ်းမိုဝ်းၶဝ်ၼၼ်ႉလႄႈ ၶဝ်ၼၼ်ႉ တၵ်းဢွၼ်ၵၼ် ယႃႉႁိူၼ်းမႄႈမွၵ်ႇယႃႈမႂ်းပႅတ်ႈလႄႈ ၵိူၼ်ႇတီႈဢၼ်သုင်မႂ်းတူၵ်းပႅတ်ႈဢေႃႈ။ ၶဝ်တၵ်းထွတ်ႇၶူဝ်းၼုင်ႈမႂ်းပႅတ်ႈလႄႈ ႁိမ်ႁူင်ႇဢဝ်ၶိူင်ႈပိူင် ဢၼ်ႁၢင်ႈလီႁၢင်ႈငၢမ်း တီႈမႂ်းသေလႄႈ ႁႂ်ႈမႂ်းယင်းဢမ်ႇမီးၶူဝ်းၼုင်ႈၶူဝ်းမႆ ယူႇတူဝ်ပူၺ်သေလႄႈ ၵိုတ်းၵျၢၼ်ႇဝႆႉဢေႃႈ။-

40ၶဝ်ၼၼ်ႉတၵ်းႁႂ်ႈ မူႇၵူၼ်းၽုင်ၵူၼ်းၸူႉၵၼ် တုမ်ၵၼ်ယူႇၽၢႆႇၼိုင်ႈ တင်းမႂ်းသေလႄႈ ဢွၼ်ၵၼ်ဢဝ် မၢၵ်ႇႁိၼ်ထိမ်ႈမႂ်းလႄႈ ဢဝ်လၢပ်ႇဢဝ်လႅဝ်းတႅင်းမႂ်းပွင်ႇပႅတ်ႈဢေႃႈ။-

41ၶဝ်တၵ်းဢွၼ်ၵၼ် ဢဝ်ၽႆးတုတ်ႇႁိူၼ်းမႂ်းတင်းလၢႆပႅတ်ႈလႄႈ ပၼ်တၢမ်ႇဢပႅတ်ႈတီႈမႂ်း ၵႃႈတီႈၽၢႆႇၼႃႈမႄႈယိင်းၼမ်ၼႃႇဢေႃႈ။ ၵဝ်တၵ်း ႁဵတ်းႁႂ်ႈမႂ်းၵိုတ်းပေႃးသေ တၢင်းဢၼ် မႂ်းႁဵတ်းမႄႈမွၵ်ႇယႃႈၼၼ်ႉလႄႈ ၵမ်းလိုၼ်းမႂ်းဢမ်ႇလႆႈၵႃၶၼ် ဢၼ်ၸၢင်ႈငႃဢဝ်ပိူၼ်ႈ ၼၼ်ႉ။-

42ၼင်ႇၼၼ်လႄႈ ၵဝ်တၵ်းႁႂ်ႈတေႃးသႃႉ တၢင်းၸႂ်မႆႈၵဝ်ပေႇတီႈမႂ်းလႄႈ တၵ်းႁႂ်ႈတၢင်းၶႆႈၸႃႉၵဝ် ဢၼ်ဢမ်ႇပေႇလႆႈၼၼ်ႉ ထၢတ်ႇၵႂႃႇ ယဵၼ်ၵႂႃႇသေၵႃႈတီႈမႂ်းလႄႈ ၵဝ်တၵ်းယူႇၼိမ်ၼိမ်လီလီလႄႈ ဢမ်ႇၸႂ်မႆႈၶႆႈၸႃႉတီႈမႂ်းထႅင်ႈ။-

43ၵွပ်ႈပိူဝ်ႈဢၼ်မႂ်း ဢမ်ႇၶုၵ်းၸႂ်လႆႈၶႆႈၸႂ်ထူပ်း မိုဝ်ႉဝၼ်းဢၼ် ဢသၢၵ်ႈမႂ်းယင်းလဵၵ်ႉယင်းဢွၼ်ႇၼၼ်ႉ၊ ယႃႉယူၵ်ႉၸႂ်ၵဝ် ၼႂ်းလွင်ႈတၢင်းၵႃႈမီး ၸိူဝ်းၼႆႉၼၼ်ႉလႄႈ ၵဝ်တၵ်းႁႂ်ႈဢပႅတ်ႈ တၢင်းၵမ်တၢင်းၵျၢင်ႉမႂ်း တူၵ်းႁွတ်ႈၵႃႈၼိူဝ်ႁူဝ်မႂ်းဢေႃႈ။ မႂ်းတၵ်းဢမ်ႇလႆႈဢဝ် တၢင်းၵျၢမ်ႇတၢင်းပွင်ဢၼ်ႁၢႆႉယုတ်ႈ ထၢပ်ႈထႅင်ႈၵႃႈၼိူဝ် ဢမူႉဢၼ်လီႁင်ႈဢဵတ်ႇသဵတ်ႇၵႃႈမီး ၸိူဝ်းၼၼ်ႉ သေလႄႈၵမ်ၵျၢင်ႉ။

44ၶဝ်ၸိူဝ်းဢၼ် ၸၢင်ႈဢဝ်ၵႂၢမ်းထုင်း သုင်းသွင်ႇၵႃႈမီးၼၼ်ႉ တၵ်းဢွၼ်ၵၼ် ဢဝ်လွင်ႈမႂ်းလႄႈ လၢတ်ႈၵႂၢမ်းထုင်းလႄႈဝႃႈ၊ လုၵ်ႈယိင်းပဵၼ်ၸိူဝ်ႉၼင်ႇမႄႈဢေႃႈ၊ ဝႃႈၼင်ႇၼႆဢေႃႈ။-

45မႂ်းပဵၼ်လုၵ်ႈယိင်းမႄႈမႂ်း ဢၼ်လီႁင်ႈဢဵတ်ႇသဵတ်ႇ ၽူဝ်မၼ်း ဢိၵ်ႇတင်း လုၵ်ႈမၼ်းလၢင်းမၼ်းၼၼ်ႉလႄႈ ပဵၼ်ၼွင်ႉယိင်းပီႈၼၢင်းမႂ်း ၼွင်ႉယိင်းမႂ်း ဢၼ်လီႁင်ႈဢဵတ်ႇသဵတ်ႇ ၽူဝ်ၶဝ် ဢိၵ်ႇတင်း လုၵ်ႈၶဝ်လၢင်းၶဝ်ၸိူဝ်းၼၼ်ႉဢေႃႈ။ မႄႈမႂ်းပဵၼ်မဵဝ်း ႁိတ်ႉတီႉ လႄႈ ပေႃႈမႂ်းပဵၼ်ၵူၼ်း ဢႃႇမေႃးရီႉ ဢေႃႈ။-

46ပီႈၼၢင်းမႂ်းၼၼ်ႉ ပဵၼ်ဝဵင်း သမႃႇရီႉ ဢၼ်ယူႇၵႃႈတီႈၽၢႆႇသၢႆႉမႂ်း ဢိၵ်ႇလူၺ်ႈၵၼ်တင်း လုၵ်ႈယိင်းမၼ်းတင်းလၢႆလႄႈ ၼွင်ႉယိင်းမႂ်းၼၼ်ႉ ပဵၼ်ဝဵင်း သေႃးတုမ်ႇ ဢၼ်ယူႇၵႃႈတီႈၽၢႆႇၶႂႃမႂ်း ဢိၵ်ႇလူၺ်ႈၵၼ်တင်း လုၵ်ႈယိင်းမၼ်း တင်းလၢႆၼၼ်ႉဢေႃႈ။-

47ၵူၺ်းၵႃႈ မႂ်းဢမ်ႇၸွမ်းသဵၼ်ႈတၢင်းၶဝ်လႄႈ ဢမ်ႇႁဵတ်းၸွမ်းလွင်ႈတၢင်း ဢၼ်လီႁင်ႈဢဵတ်ႇသဵတ်ႇ ၶဝ်ၸိူဝ်းၼၼ်ႉ။ ၵူၺ်းၵႃႈမႂ်းမၢတ်ႈ လွင်ႈတၢင်းၼၼ်ႉ ပဵၼ်ဢၼ်လဵၵ်ႉ ဢၼ်ဢွၼ်ႇလႄႈ မႂ်းယဵင်ႈၶႅၼ်း ႁၢႆႉယုတ်ႈလိူဝ်တွၼ်းၼႃႇသေၶဝ်ၼၼ်ႉ ၼႂ်းလွင်ႈတၢင်းဢၼ် မႂ်းႁဵတ်းၵူႈၸိူဝ်ႉၵူႈပိူင်ၼၼ်ႉဢေႃႈ။-

48ၵႃႈၼင်ႇဢၼ်ၵဝ် ဢသၢၵ်ႈလိပ်းယူႇၼၼ်ႉ၊ ၸိူဝ်ႉၼင်ႇဢၼ်မႂ်းဢိၵ်ႇလူၺ်ႈၵၼ်တင်းလုၵ်ႈယိင်းမႂ်း တင်းလၢႆ ႁဵတ်းၸိူဝ်းၼၼ်ႉၼၼ်ႉ၊ ၼွင်ႉယိင်းမႂ်း သေႃးတုမ်ႇ ဢိၵ်ႇလူၺ်ႈၵၼ်တင်းလုၵ်ႈယိင်းမၼ်း တင်းလၢႆၼၼ်ႉ ဢမ်ႇဢွၼ်ၵၼ်ႁဵတ်း။-

49တူၺ်းလူး။ ဢပႅတ်ႈၼွင်ႉယိင်းမႂ်း သေႃးတုမ်ႇ ၼၼ်ႉၸမ်ႉ၊ မၼ်းဢိၵ်ႇလူၺ်ႈၵၼ်တင်း လုၵ်ႈယိင်းမၼ်း ၸိူဝ်းၼၼ်ႉ ဢွၼ်ၵၼ် မီးတၢင်းဢၼ်မႃႇၼႃႉယႂ်ႇ၊ တၢင်းဢၼ်ၵိၼ်ဢိမ်ႇၵိၼ်တဵမ်၊ တၢင်းဢၼ်လႆႈလီလႆႈပဵၼ် ၼိမ်ၼိမ်လီလီၼႃႇလူင်လၢင်လႄႈ ယင်းဢမ်ႇၵမ်ႉထွၵ်ႈၶဝ်ၸိူဝ်းဢၼ်ယၢၵ်ႈဢၼ်ၽၢၼ်၊ ဢိၵ်ႇတင်းၶဝ်ၸိူဝ်းဢၼ် ၸုတ်ႈဢၼ်လုတ်ႈၼၼ်ႉလႄႈ ယူႇဢေႃႈ။-

50ၶဝ်ၼၼ်ႉ ဢွၼ်ၵၼ်မႃႇၼႃႉပူၵ်းပႅၼ်လႄႈ ႁဵတ်းလွင်ႈတၢင်းဢၼ် လီႁင်ႈဢဵတ်ႇသဵတ်ႇ ၵႃႈတီႈၽၢႆႇၼႃႈၵဝ်ဢေႃႈ။ ပိူဝ်ႈၼႆလႄႈ ၵဝ်ပႄႇၽဵဝ်ႈၶဝ်ပႅတ်ႈ ၸွမ်းၵႃႈၼင်ႇဢၼ်ၵဝ်လႆႈႁၼ်ၼၼ်ႉယဝ်ႉ။-

51သမႃႇရီႉ ၵေႃႈ ဢမ်ႇႁဵတ်းတူႉၸရိူၵ်ႈသေၶိုင်ႈၼိုင်ႈ တူႉၸရိူၵ်ႈဢၼ်မႂ်းႁဵတ်းၸိူဝ်းၼၼ်ႉ။ မႂ်းၸမ်ႉ၊ ႁဵတ်းလွင်ႈတၢင်းဢၼ် လီႁင်ႈဢဵတ်ႇသဵတ်ႇ ၼမ်ၼႃႇလူင်လၢင် လိူဝ်တွၼ်းၼႃႇသေ ၶဝ်ၼၼ်ႉလႄႈ ႁႂ်ႈပီႈၼၢင်းၼွင်ႉယိင်းမႂ်းၸိူဝ်းၼၼ်ႉ ပဵၼ်ဢၼ်သိုဝ်ႈဢၼ်တေႃႇ ၵွပ်ႈပိူဝ်ႈလွင်ႈတၢင်းဢၼ် လီႁင်ႈဢဵတ်ႇသဵတ်ႇ ၵႃႈဢၼ်မႂ်းလႆႈႁဵတ်းယဝ်ႉၼၼ်ႉလူင်ပႄႇ။-

52မႂ်းဢၼ်ႁဵတ်းတၢင်းဢၼ်ၸီႇယၢင်ႇ ႁႂ်ႈပီႈၼၢင်းၼွင်ႉယိင်းမႂ်းၸိူဝ်းၼၼ်ႉ လႆႈၵၢင်းလွတ်ႈဢပႅတ်ႈၵႂႃႇၼၼ်ႉၼႆႉ ၶၢမ်ႇတၢင်းဢၼ်သရေႇ မႂ်းလူႉတႃႉ။ ၵွပ်ႈပိူဝ်ႈဢပႅတ်ႈမႂ်း ဢၼ်မႂ်းႁဵတ်း ဢၼ်ယဵင်ႈၶႅၼ်း လီႁင်ႈဢဵတ်ႇသဵတ်ႇလိူဝ်တွၼ်းၼႃႇသေ ဢၼ်ၶဝ်ႁဵတ်းၼၼ်ႉလႄႈၶဝ်ၼၼ်ႉ ယဵင်ႈၶႅၼ်းပဵၼ်ဢၼ်သိုဝ်ႈတေႃႇ ၼႃႇသေမႂ်းဢေႃႈ။ ၵွပ်ႈပိူဝ်ႈဢၼ်မႂ်း ႁႂ်ႈပီႈၼၢင်း ၼွင်ႉယိင်းမႂ်းၸိူဝ်းၼၼ်ႉ ပဵၼ်ဢၼ် သိုဝ်ႈဢၼ်တေႃႇၵႂႃႇၼၼ်ႉလႄႈ မႂ်းၵႂင်ၸႂ်ယုင်ႈၸႂ်လႄႈ ၶၢမ်ႇတၢင်းဢၼ် သရေႇမႂ်းလူႉတႃႉ။

53ၵဝ်တၵ်းသမ်ႉဢဝ် သေႃးတုမ်ႇ ဢိၵ်ႇတင်း လုၵ်ႈယိင်းမၼ်း တင်းလၢႆ ဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇ၊ သမႃႇရီႉ ဢိၵ်ႇတင်း လုၵ်ႈယိင်းမၼ်းတင်းလၢႆ ဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇ၊ ၵူၼ်းမႂ်းတင်းလၢႆ ဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇ လူၺ်ႈၵၼ်တင်း ၶဝ်ၼၼ်ႉ ၶိုၼ်းမႃး၊-

54ႁႂ်ႈမႂ်းလႆႈၶၢမ်ႇတၢင်းဢၼ်သရေႇလူႉ၊ တၢင်းဢၼ်ဢူၵ်းဢၢႆ ၵွပ်ႈပိူဝ်ႈၵႃႈဢၼ်မႂ်းႁဵတ်းလႄႈ ႁႂ်ႈမႂ်းပဵၼ် တီႈဢၼ်ၼိမ်ၸႂ် လီၸႂ် တီႈၶဝ်ၼၼ်ႉဢေႃႈ။-

55ၼွင်ႉယိင်းမႂ်း သေႃးတုမ်ႇ ဢိၵ်ႇတင်း လုၵ်ႈယိင်းမၼ်းၸိူဝ်းၼၼ်ႉ တၵ်းလႆႈၶိုၼ်းႁွတ်ႈၶိုၼ်းထိုင် ၵႃႈတီႈဢၼ်ၶဝ်ယူႇၵဝ်ႇၵဝ်ႇ ၼၼ်ႉဢေႃႈ။ ပီႈၼၢင်းမႂ်း သမႃႇရီႉ ဢိၵ်ႇတင်း လုၵ်ႈယိင်းမၼ်းၸိူဝ်းၼၼ်ႉၵေႃႈ တၵ်းလႆႈၶိုၼ်းႁွတ်ႈၶိုၼ်းထိုင် ၵႃႈတီႈဢၼ် ၶဝ်ယူႇ ၵဝ်ႇၵဝ်ႇ ၼၼ်ႉဢေႃႈ။ မႂ်းဢိၵ်ႇတင်း လုၵ်ႈယိင်းမႂ်း ၸိူဝ်းၼၼ်ႉၵေႃႈ တၵ်းလႆႈၶိုၼ်းႁွတ်ႈၶိုၼ်းထိုင် ၵႃႈတီႈဢၼ် သူယူႇၵဝ်ႇၵဝ်ႇ ၼၼ်ႉဢေႃႈ။-

56မႂ်းဢမ်ႇဢဝ်ၼႃႇမႃႉၸိုဝ်ႈသဵင် ၼွင်ႉယိင်းမႂ်း သေႃးတုမ်ႇ ၼၼ်ႉ ဝႃႈဢွၵ်ႇသူပ်းမႂ်း ၼႂ်းမိုဝ်ႉဝၼ်း ဢၼ်မႃႇၼႃႉမႂ်း ယင်းတိုၵ်ႉပူၵ်းပႅၼ်ယူႇ၊-

57ၸူဝ်ႈဢၼ် တူႉၸရိူၵ်ႈဢပႅတ်ႈ ဢၼ်မႂ်းႁဵတ်းၼၼ်ႉ ဢမ်ႇပႆႇထၢင်ႇသႃးမိူၼ်ၸိူဝ်ႉၼင်ႇဢၼ်ပဵၼ်ၼႂ်းၶိင်ႇမိူဝ်ႈဢၼ် လုၵ်ႈယိင်း သူႉရီႉ တင်းလၢႆ တင်းၶဝ်ၸိူဝ်းဢၼ်ယူႇၵႃႈတီႈ ႁိမ်းႁွမ်းလဵပ်ႈႁွပ်ႈၶဝ်ၵႃႈမီး ဢိၵ်ႇတင်း လုၵ်ႈယိင်းမဵဝ်း ၽီႉလိတ်ႉတီႉ ဢၼ်ယူႇ ၵႃႈတီႈႁိမ်းႁွမ်းလဵပ်ႈႁွပ်ႈမႂ်းလႄႈ ႁဵတ်းဢမ်ႇပေႃးၼင်ႇႁိုဝ်တီႈမႂ်း ၸိူဝ်းၼၼ်ႉ ဢွၼ်ၵၼ်သႄႉသွမ်းမႂ်းၼၼ်ႉ။-

58မိူဝ်ႈလဵဝ်ၼႆႉၸမ်ႉ၊ မႂ်းတၵ်းလႆႈၶၢမ်ႇဢပႅတ်ႈ လွင်ႈတၢင်းဢၼ်ႁၢႆႉယုတ်ႈမႂ်း ဢိၵ်ႇတင်း လွင်ႈတၢင်းဢၼ်လီႁင်ႈ ဢဵတ်ႇသဵတ်ႇမႂ်းၸိူဝ်းၼၼ်ႉဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။

59ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၵဝ်တၵ်းႁဵတ်းတီႈမႂ်း ၸွမ်းၵႃႈၼင်ႇဢၼ် မႂ်းဢၼ်ႁဵတ်းဢမ်ႇရူဝ်ႇသေႇၵူဝ်ယမ် ၵတီႉသဵတ်ႈၸႃႇလႄႈ ယႃႉပႅတ်ႈပတီႉၺိၺ်ႇ တၢင်းဢၼ်ႁပ်ႉတုင်းဢဝ်ၼၼ်ႉ ႁဵတ်းၼၼ်ႉဢေႃႈ။-

60ၼႂ်းဝႃႈၼၼ်သေၵေႃႈ ၵဝ်တၵ်းၶုၵ်းၸႂ်လႆႈၶႆႈၸႂ်ထူပ်း ပတီႉၺိၺ်ႇ ဢၼ်ႁဵတ်းလူၺ်ႈၵၼ်တင်းမႂ်း ၼႂ်းမိူဝ်ႈဢၼ် ဢသၢၵ်ႈ မႂ်းယင်းလဵၵ်ႉယင်းဢွၼ်ႇၼၼ်ႉလႄႈ သမ်ႉႁဵတ်းပတီႉၺိၺ်ႇထႃႇဝရႃႉ လူၺ်ႈၵၼ်တင်းမႂ်းဢေႃႈ။-

61မိူဝ်ႈၼၼ်ႉ မႂ်းတၵ်းၶုၵ်းၸႂ်လႆႈၶႆႈၸႂ်ထူပ်း သဵၼ်ႈတၢင်းဢၼ်မႂ်းၸွမ်းၸိူဝ်းၼၼ်ႉလႄႈ ဢူၵ်းဢၢႆၼႂ်းမိူဝ်ႈဢၼ်မႂ်း ႁပ်ႉတုင်းဢဝ် ပီႈၼၢင်းမႂ်းတင်းလၢႆ ဢိၵ်ႇတင်း ၼွင်ႉယိင်းမႂ်းၼၼ်ႉလႄႈ ၵဝ်ဢဝ်ၶဝ်ၼၼ်ႉဢၢပ်ႈပၼ်တီႈမႂ်း ႁႂ်ႈပဵၼ်လုၵ်ႈယိင်းမႂ်းၼၼ်ႉဢေႃႈ။ ၵူၺ်းၵႃႈ တၵ်းဢၢပ်ႈပၼ် ၵွပ်ႈပိူဝ်ႈပတီႉၺိၺ်ႇဢမ်ႇၸႂ်ႈ။-

62မိူဝ်ႈၼၼ်ႉ ၵဝ်တၵ်းႁဵတ်း ပတီႉၺိၺ်ႇ လူၺ်ႈၵၼ်တင်းမႂ်းလႄႈ မႂ်းတၵ်းလႆႈႁူႉ လွင်ႈဢၼ်ၵဝ်ပဵၼ် ထႃႇဝရႃႉၽြႃးၼၼ်ႉ၊-

63ထၼ်ႈပေႃး ႁႂ်ႈမႂ်းၶုၵ်းၸႂ်လႆႈၶႆႈၸႂ်ထူပ်း သေလႄႈ ၵႂင်ၸႂ်ယုင်ႈၸႂ်ယူႇလႄႈ ဢမ်ႇၽုၺ်ႇသူပ်း ပိုတ်ႇသူပ်းမႂ်းထႅင်ႈ ၵွပ်ႈပိူဝ်ႈ တၢင်းဢၼ်ဢူၵ်းဢၼ်ဢၢႆမႂ်းၼၼ်ႉ ၼႂ်းမိူဝ်ႈဢၼ် ၵဝ်ပွႆႇလွတ်ႈ လွင်ႈတၢင်းၵႃႈဢၼ်မႂ်းႁဵတ်းမႃးယဝ်ႉ ၼၼ်ႉဢေႃႈ၊ ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉဢေႃႈ။