Ezekiel 6

Shan

← Chapter 5 Jump to: Chapter 7 →

1လႆႈသမ်ႉ ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃးတီႈၵဝ် လႄႈဝႃႈၸမ်ႉ၊-

2လုၵ်ႈၵူၼ်းဢိူၺ်း၊ မႂ်းဝၢႆႇၼႃႈတေႃႇလွႆ ဢီႉသရေႇလႃႉ တင်းလၢႆ သေလႄႈ ႁဵတ်းပရေႃးၽႅတ်ႈယူႇၽၢႆႇၼိုင်ႈ တင်းၶဝ်လႄႈဝႃႈ၊-

3လွႆ ဢီႉသရေႇလႃႉ တင်းလၢႆၶဝ်ဢိူၺ်း၊ ဢွၼ်ၵၼ်ထွမ်ႇငိၼ်းၵႂၢမ်း ၸဝ်ႈထႃႇဝရႃႉၽြႃးတႃႉ။ ၸဝ်ႈထႃႇဝရႃႉၽြႃး မီးဢမိင်ႉတီႈလွႆလူင် လွႆဢွၼ်ႇ၊ ၼမ်ႉႁွင်ႈၼမ်ႉၵႄး ပၢင်ႇႁူၺ်ႈၶူင်ႈႁူၺ်ႈ လႄႈဝႃႈၸမ်ႉ၊ တူၺ်းလူး။ ၵဝ်ဢၼ်ဝႃႈၵဝ်ၼႆႉ တၵ်းႁႂ်ႈလၢပ်ႇလႅဝ်း ႁွတ်ႈထိုင်ၵႃႈၼိူဝ်သူလႄႈ ၵိူၼ်ႇယႃႉထႃႇၼႃႉတီႈသုင်သူပႅတ်ႈဢေႃႈ။-

4ယိတ်ႈပလၢင်ႇသူၸိူဝ်းၼၼ်ႉ တၵ်းလႆႈပဵၼ်ဢၼ်ပဝ်ႇဢၼ်လၢပ်ႈလႄႈ ရုၵ်ႈထူႉၵၢင်ဝၼ်းသူ ၸိူဝ်းၼၼ်ႉ တၵ်းလႆႈၶၢမ်ႇတၢင်းဢၼ် ႁၵ်းႁဵၵ်းပႅတ်ႈဢေႃႈ။ ၵဝ်တၵ်း ဢဝ်ႁူဝ်ႁၢၼ်ၵူၼ်းသိုၵ်းသူ လူမ်ႉတူၵ်းပႅတ်ႈ ၵႃႈတီႈၽၢႆႇၼႃႈ ရုၵ်ႈထူႉသၢင်းထူႉသူၸိူဝ်းၼၼ်ႉဢေႃႈ။-

5ၵဝ်တၵ်းဢဝ်တူဝ်တၢႆ ၵူၼ်းမဵဝ်း ဢီႉသရေႇလႃႉ တင်းလၢႆၶျႃးဝႆႉ ၵႃႈတီႈၽၢႆႇၼႃႈရုၵ်ႈထူႉသၢင်းထူႉၶဝ်ၸိူဝ်းၼၼ်ႉလႄႈ ဢဝ်လုပ်ႇသူ တင်းလၢႆ ၸၢတ်ႇပိုၼ်ၵႃႈတီႈ ႁိမ်းႁွမ်းလဵပ်ႈႁွပ်ႈ ယိတ်ႈပလၢင်ႇသူ ၸိူဝ်းၼၼ်ႉဢေႃႈ။-

6ၵႃႈၼႂ်းတီႈဢၼ် သူယူႇသူသဝ်း ၵူႈတီႈၵူႈလႅၼ်ၼၼ်ႉ ဝဵင်းသူတင်းလၢႆ တၵ်းလႆႈ မီးတၢင်းဢၼ်လူႉလႅဝ်ယူႇ၊ ထႃႇၼႃႉတီႈသုင်သူ ၸိူဝ်းၼၼ်ႉ တၵ်းပဵၼ်ဢၼ်ပဝ်ႇဢၼ်လၢပ်ႈယူႇ ႁႂ်ႈယိတ်ႈပလၢင်ႇသူတင်းလၢႆ လႆႈပဵၼ်တီႈဢၼ်ပဝ်ႇဢၼ်လၢပ်ႈ၊ တီႈဢၼ်သဵတ်ႇ ဢၼ်ယဵၼ်၊ ရုၵ်ႈထူႉသၢင်းထူႉသူ လႆႈၶၢမ်ႇတၢင်းဢၼ်ႁၵ်းႁဵၵ်းပႅတ်ႈလႄႈ ႁၢႆလၢႆၵႂႃႇ၊ ရုၵ်ႈထူႉၵၢင်ဝၼ်းသူ လႆႈၶၢမ်ႇတၢင်းဢၼ် ၽၼ်းလူမ်ႉပႅတ်ႈ ဢိၵ်ႇတင်း ၶိူင်ႈပိူင်ဢၼ် သူႁဵတ်းၸိူဝ်းၼၼ်ႉ လႆႈၶၢမ်ႇတၢင်းဢၼ် သုမ်းၸွမ်းလပ်ႉႁၢႆၵႂႃႇဢေႃႈ။-

7ႁူဝ်ႁၢၼ်ၵူၼ်းသိုၵ်း တင်းလၢႆ တၵ်းဢွၼ်ၵၼ်လူမ်ႉတၢႆ ၵႃႈၼႂ်းသူလႄႈ သူတၵ်းဢွၼ်ၵၼ် လႆႈႁူႉလွင်ႈဢၼ်ၵဝ်ပဵၼ် ထႃႇဝရႃႉၽြႃးဢေႃႈ။-

8ၼႂ်းဝႃႈၼၼ်သေၵေႃႈ ၼႂ်းမိူဝ်ႈဢၼ်သူလႆႈၶၢမ်ႇတၢင်းဢၼ် ၸၢတ်ႇပိုၼ်ပႅတ်ႈ ၵႃႈၼႂ်းၵူၼ်းၵူႈၸိူဝ်ႉၵူႈမဵဝ်း ၼၼ်ႉၸိုင်၊ ၵဝ်တၵ်းဝႆႉ ၵူၼ်းဢၼ်ပဵၼ် ဢၼ်ၵိုတ်းဢၼ်ၵျၢၼ်ႇ ႁႂ်ႈသူလႆႈမီးၵမ်ႈၽွင်ႈ ဢၼ်ၵၢင်းလွတ်ႈတင်း ၽေးလၢပ်ႇၽေးလႅဝ်းၵူၼ်း ၵူႈၸိူဝ်ႉၵူႈမဵဝ်းၼၼ်ႉဢေႃႈ။-

9ၶဝ်ၸိူဝ်းဢၼ်ပဵၼ် ဢၼ်ၵၢင်းလွတ်ႈ ၵႃႈၼႂ်းသူၼႆႉၼၼ်ႉ တၵ်းဢွၼ်ၵၼ် ၶုၵ်းၸႂ်လႆႈၶႆႈၸႂ်ထူပ်းၵဝ် ၵႃႈၼႂ်းၵူၼ်း ၵူႈၸိူဝ်ႉၵူႈမဵဝ်း တီႈဢၼ်ၶဝ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉ ၵွပ်ႈပိူဝ်ႈဢၼ်ၵဝ် ၽၢတ်ႇယၢၼ်ၵၼ် တင်းႁူဝ်ၸႂ်ၶဝ် ဢၼ်ၸၢင်ႈ ၸုၼ်ႉပႅတ်ႈၵဝ်လႄႈ ၽိတ်းပိူင်ႈ ဢိၵ်ႇတင်း မၢၵ်ႇတႃၶဝ်ဢၼ်မီး ဢလူဝ်ႇၶႂ်ႈၽိတ်းပိူင်ႈလူၺ်ႈ ရုၵ်ႈထူႉသၢင်းထူႉၶဝ် ၼၼ်ႉဢေႃႈ။ ၶဝ်တၵ်းဢွၼ်ၵၼ် လီႁင်ႈဢဵတ်ႇသဵတ်ႇတူဝ်ၸဝ်ႈၵဝ်ႇ ၵွပ်ႈပိူဝ်ႈ လွင်ႈတၢင်းဢၼ် လီႁင်ႈဢဵတ်ႇသဵတ်ႇ ၵႃႈဢၼ်ၶဝ်လႆႈႁဵတ်းလႂ် ၼၼ်ႉဢေႃႈ။-

10ၶဝ်တၵ်း ဢွၼ်ၵၼ်လႆႈႁူႉလွင်ႈဢၼ် ၵဝ်ပဵၼ် ထႃႇဝရႃႉၽြႃး ဢိၵ်ႇတင်းလွင်ႈဢၼ် ဢမိင်ႉၵဝ်ဢၼ်ဝႃႈ ၵဝ်တၵ်းပၼ်တၢမ်ႇဢပႅတ်ႈ ၸိူဝ်ႉၼင်ႇၼၼ်ဢေႃႈ၊ ဝႃႈၼင်ႇၼႆၼၼ်ႉ ဢမ်ႇပဵၼ်ဢၼ် လၢႆလၢႆလွၵ်ႇလွၵ်ႇ ၼၼ်ႉဢေႃႈ။-

11ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ဢဝ်မိုဝ်းမႂ်းတူပ်းလႄႈ ဢဝ်တိၼ်မႂ်းတိုပ်ႈသေလႄႈ လၢတ်ႈလႄႈဝႃႈ၊ မီးဢႃႉမင်ႇၵလႃႇ ၵွပ်ႈပိူဝ်ႈ လွင်ႈတၢင်းဢၼ်ႁၢႆႉယုတ်ႈ ဢၼ်လီႁင်ႈဢဵတ်ႇသဵတ်ႇ ၵႃႈဢၼ်မဵဝ်း ဢီႉသရေႇလႃႉ လႆႈႁဵတ်းၼၼ်ႉ လူင်ပႄႇ၊ ဝႃႈၼင်ႇၼႆတႃႉ။ လွင်ႈမၼ်းၸမ်ႉ ၶဝ်တၵ်း ဢွၼ်ၵၼ်လူမ်ႉတူၵ်းလူၺ်ႈၽေးလၢပ်ႇ၊ ၽေးတၢင်းဢၼ်ဢိုပ်းဢၼ်ယၢၵ်ႈ၊ ၽေးၵႃႇလႃႉႁႃႈလႅင်မိူင်းဢေႃႈ။-

12ၵေႃႉဢၼ်ၵႆၼၼ်ႉ တၵ်းတၢႆလူၺ်ႈ ၽေးၵႃႇလႃႉႁႃႈလႅင်မိူင်း၊ ၵေႃႉဢၼ်ၸမ်ၼၼ်ႉ တၵ်းလူမ်ႉတူၵ်းလူၺ်ႈၽေးလၢပ်ႇ ၽေးလႅဝ်း၊ ၵေႃႉဢၼ်ၵိုတ်းဢၼ်ၵျၢၼ်ႇလႄႈ လႆႈၶၢမ်ႇတၢင်းဢၼ်လွမ်ႉလဵပ်ႈႁွပ်ႈဝႆႉၼၼ်ႉ တၵ်းတၢႆလူၺ်ႈ ၽေးတၢင်းဢၼ်ဢိုပ်းဢၼ်ယၢၵ်ႈလႄႈ ဢၢႆႁႅင်းတေႃးသႃႉ တၢင်းၸႂ်မႆႈၵဝ် တၵ်းပျေႉၸုမ်ႇတီႈၶဝ် ၸိူဝ်ႉၼင်ႇၼၼ်ဢေႃႈ။-

13သူတၵ်းဢွၼ်ၵၼ် လႆႈႁူႉလွင်ႈဢၼ် ၵဝ်ပဵၼ် ထႃႇဝရႃႉၽြႃး ၼႂ်းမိူဝ်ႈဢၼ် ႁူဝ်ႁၢၼ်ၵူၼ်းသိုၵ်းၶဝ်တင်းလၢႆ ဢွၼ်ၵၼ် လူမ်ႉတၢႆၵႃႈၼႂ်းၵၢင်ရုၵ်ႈထူႉသၢင်းထူႉၶဝ် ၵႃႈတီႈႁိမ်းႁွမ်းလဵပ်ႈႁွပ်ႈ ယိတ်ႈပလၢင်ႇၶဝ်၊ ၵႃႈၼိူဝ်ၵုင်းဢၼ်သုင်ၵႃႈမီး၊ ၵႃႈၼိူဝ်ပၢႆၸိၵ်းလွႆၵႃႈမီး၊ ၵႃႈတႂ်ႈတူၼ်ႈမႆႉဢၼ်ၶဵဝ်ၵႃႈမီး၊ ၵႃႈတႂ်ႈတူၼ်ႈမႆႉၼိမ် ဢၼ်ႁူမ်ႈလီၵႃႈမီး တီႈဢၼ်ၶဝ်ပုၵ်ႈၸေႃႇၼၢမ်ႇသႃႇ တီႈရုၵ်ႈထူႉသၢင်းထူႉၶဝ်ၵႃႈမီးတင်းသဵင်ႈတင်းလူင်ၼၼ်ႉဢေႃႈ။-

14ၵဝ်တၵ်း ယဵတ်ႇမိုဝ်းယိုၼ်ႈမိုဝ်းၵဝ် ၵႃႈၼိူဝ်ၶဝ်လႄႈ ႁႂ်ႈမိူင်းပဵၼ်တီႈဢၼ်ပဝ်ႇဢၼ်လၢပ်ႈ ဢၼ်သဵတ်ႇဢၼ်ယဵၼ် ဢဝ်ၵႃႈတီႈထိူၼ်ႇ ဢၼ်မီးသိုဝ်ႈဝဵင်း တီႉပလတ်ႉ ၸွတ်ႇတူဝ်ႈ ၵႃႈၼႂ်းတီႈယူႇတီႈသဝ်းၶဝ် ၵူႈတီႈၵူႈလႅၼ်ၼၼ်ႉလႄႈ ၶဝ်တၵ်းဢွၼ်ၵၼ် လႆႈႁူႉလွင်ႈဢၼ် ၵဝ်ပဵၼ် ထႃႇဝရႃႉၽြႃး ၼၼ်ႉဢေႃႈ၊ ဝႃႈၼင်ႇၼႆဢေႃႈ။

← Chapter 5 Jump to: Chapter 7 →