Ezekiel 33

Shan

← Chapter 32 Jump to: Chapter 34 →

1လႆႈသမ်ႉ ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃးတီႈၵဝ်လႄႈဝႃႈၸမ်ႉ၊-

2လုၵ်ႈၵူၼ်းဢိူၺ်း၊ မႂ်းႁေႃးလၢတ်ႈတီႈ ၵူၼ်းမဵဝ်းလဵဝ်ၵၼ်တင်းမႂ်း ၸိူဝ်းၼၼ်ႉလႄႈဝႃႈ၊ မိူဝ်ႈဢၼ်ၵဝ်ႁႂ်ႈၽေးလၢပ်ႇၽေးလႅဝ်း ႁွတ်ႈထိုင် ၵႃႈတီႈမိူင်း သေမိူင်းမိူင်းၼၼ်ႉ၊ ပေႃးၵူၼ်းမိူင်းၸိူဝ်းၼၼ်ႉ ဢဝ်ၵူၼ်းမိူင်းၵေႃႉၼိုင်ႈ ၶၢၼ်းဝႆႉႁႂ်ႈပႂ်ႉၵၢင်၊-

3ပေႃးမၼ်းၼၼ်ႉ ႁၼ်လွင်ႈဢၼ် ၽေးလၢပ်ႇၽေးလႅဝ်း တၵ်းႁွတ်ႈထိုင်ၵႃႈတီႈမိူင်းလႄႈ ပဝ်ႇၼႄးၶရႃႇသေလႄႈ ပၼ်သတီႉတီႈ ၵူၼ်းတင်းလၢႆ၊-

4ပေႃးသေၵေႃႉသေၵူၼ်း ငိၼ်းသဵင်ပဝ်ႇၼႄးၶရႃႇ သေယဝ်ႉ၊ ဢမ်ႇႁဵတ်းသတီႉလႄႈ ၽေးလၢပ်ႇၽေးလႅဝ်းႁွတ်ႈထိုင်လႄႈ ဢသၢၵ်ႈမၼ်းသုမ်းၸိုင်၊ လိူတ်ႈမၼ်းၼၼ်ႉ တၵ်းလႆႈႁွတ်ႈၵႃႈၼိူဝ်ႁူဝ်မၼ်းဢေႃႈ။-

5ၵွပ်ႈပိူဝ်ႈဢၼ်မၼ်း ငိၼ်းသဵင်ပဝ်ႇၼႄးၶရႃႇယူႇလႄႈ မၼ်းဢမ်ႇႁဵတ်းသတီႉၼၼ်ႉလႄႈ လိူတ်ႈမၼ်း တၵ်းလႆႈႁွတ်ႈထိုင် ၵႃႈၼိူဝ်မၼ်းဢေႃႈ။ ၵူၺ်းၵႃႈ သင်မၼ်းႁဵတ်းသတီႉၸိုင် တူဝ်မၼ်းလႆႈ ၵႄႇသႄႇၼုၵ်ႈဢဝ် ဢသၢၵ်ႈမၼ်းယဝ်ႉ။-

6ဢမ်ႇၼၼ်ၵေႃႈ ပေႃးၵေႃႉဢၼ်ပႂ်ႉၵၢင်ၼၼ်ႉ ႁၼ်လွင်ႈဢၼ်ၽေးလၢပ်ႇၽေးလႅဝ်းႁွတ်ႈထိုင်ယူႇၼၼ်ႉလႄႈ ဢမ်ႇပဝ်ႇၼႄးၶရႃႇ၊ ဢမ်ႇပၼ်သတီႉတီႈၵူၼ်းမိူင်းတင်းလၢႆလႄႈ ၽေးလၢပ်ႇၽေးလႅဝ်းၼၼ်ႉ ႁွတ်ႈထိုင်လႄႈ သေၵေႃႉသေၵူၼ်း သုမ်းဢသၢၵ်ႈၸိုင်၊ ပိၵ်ႉသမ်ႉ ၵေႃႉၼၼ်ႉ သုမ်းဢသၢၵ်ႈမၼ်းၵွပ်ႈပိူဝ်ႈ ဢပႅတ်ႈမၼ်းသေၵေႃႈ၊ ၵဝ်တၵ်းယွၼ်းဢဝ်လိူတ်ႈမၼ်း တီႈၵေႃႉဢၼ်ပႂ်ႉၵၢင်ၼၼ်ႉဢေႃႈ၊ ဝႃႈၼင်ႇၼႆတႃႉ။-

7မိူၼ်ၼင်ႇၼၼ် လုၵ်ႈၵူၼ်းဢိူၺ်း၊ ၵွပ်ႈပိူဝ်ႈဢၼ်ၵဝ်ၶၢၼ်းမႂ်းဝႆႉ ႁႂ်ႈမႂ်းလႆႈ ပႂ်ႉၵၢင်တီႈမဵဝ်း ဢီႉသရေႇလႃႉ လႄႈ မႂ်းထွမ်ႇဢဝ်ၵႂၢမ်းဢၼ် ဢွၵ်ႇသူပ်းၵဝ်သေလႄႈ ပၼ်သတီႉတီႈၶဝ်တႃႉ။-

8မိူဝ်ႈဢၼ်ၵဝ် လၢတ်ႈတီႈၵူၼ်းႁၢႆႉၵူၼ်းမိူၵ်ႈလႄႈဝႃႈ၊ ၵူၼ်းႁၢႆႉၵူၼ်းမိူၵ်ႈဢိူၺ်း၊ မႂ်းတၵ်းလႆႈၶၢမ်ႇတၢႆ ဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆၼၼ်ႉ၊ ပေႃးမႂ်းဢမ်ႇပၼ်သတီႉ တီႈၵေႃႉဢၼ်ႁၢႆႉမိူၵ်ႈၼၼ်ႉလႄႈ ၵေႃႉဢၼ်ႁၢႆႉမိူၵ်ႈၼၼ်ႉ ဢမ်ႇဝႄႈပိူင်ႈသေ သဵၼ်ႈတၢင်းဢၼ်မၼ်းၸွမ်းၼၼ်ႉလႄႈယူႇၸိုင်၊ ၵေႃႉဢၼ်ႁၢႆႉမိူၵ်ႈၼၼ်ႉ တၵ်းလႆႈ တၢႆၵွပ်ႈပိူဝ်ႈဢပႅတ်ႈမၼ်းဢေႃႈ။ ၵူၺ်းၵႃႈ ၵဝ်တၵ်းယွၼ်းဢဝ်လိူတ်ႈမၼ်းၼၼ်ႉ တီႈမိုဝ်းမႂ်းဢေႃႈ။-

9ဢမ်ႇၼၼ်ၵေႃႈ ပေႃးမႂ်းပၼ်သတီႉ တီႈၵေႃႉဢၼ်ႁၢႆႉမိူၵ်ႈၼၼ်ႉ ႁႂ်ႈမၼ်းဝႄႈပိူင်ႈသေ သဵၼ်ႈတၢင်းဢၼ်မၼ်းၸွမ်းယူႇၼၼ်ႉလႄႈ မၼ်းဢမ်ႇဝႄႈဢမ်ႇပိူင်ႈလႄႈယူႇၸိုင်၊ မၼ်းတၵ်းလႆႈ တၢႆၵွပ်ႈပိူဝ်ႈဢပႅတ်ႈမၼ်းဢေႃႈ။ မႂ်းၸမ်ႉ၊ ၵႄႇသႄႇၼုၵ်ႈဢဝ်ဢသၢၵ်ႈမႂ်းယဝ်ႉ။

10ပိူဝ်ႈၼႆလႄႈ လုၵ်ႈၵူၼ်းဢိူၺ်း၊ မႂ်းႁေႃးလၢတ်ႈတီႈ မဵဝ်း ဢီႉသရေႇလႃႉ လႄႈဝႃႈ၊ ပေႃးသူဢွၼ်ၵၼ်လၢတ်ႈလႄႈဝႃႈ၊ တူႉၸရိူၵ်ႈ ဢပႅတ်ႈ တၢင်းဢၼ်ႁဝ်းပူၼ်ႉလိူဝ် ၸိူဝ်းၼၼ်ႉ ႁွတ်ႈထိုင်ၵႃႈၼိူဝ်ႁဝ်းယဝ်ႉ။ ႁဝ်းမီးတၢင်းဢၼ်ႁႅင်းဢူၼ်ႈႁႅင်းယွမ်းၵႂႃႇ လႄႈ ႁဝ်းတၵ်းဢသၢၵ်ႈလိပ်းလႆႈၸိူဝ်ႉၼင်ႇႁိုဝ်။ ဝႃႈၼင်ႇၼႆၸိုင်၊-

11မႂ်းလၢတ်ႈတီႈၶဝ်လႄႈဝႃႈ၊ ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၵႃႈၼင်ႇဢၼ်ၵဝ်ဢသၢၵ်ႈလိပ်းယူႇၼၼ်ႉ၊ ၵဝ်ဢမ်ႇထုၵ်ႇၸႂ်ၵျိူၵ်ႈၸႂ် တၢင်းဢၼ်ၵူၼ်းႁၢႆႉၵူၼ်းမိူၵ်ႈ လႆႈၶၢမ်ႇတၢႆၼၼ်ႉ။ ၵဝ်ထုၵ်ႇၸႂ်ၵျိူၵ်ႈၸႂ် တၢင်းဢၼ်ၵူၼ်းႁၢႆႉၵူၼ်းမိူၵ်ႈ ဝႄႈပိူင်ႈသေ သဵၼ်ႈတၢင်းဢၼ်မၼ်းၸွမ်းၼၼ်ႉလႄႈ ဢသၢၵ်ႈလိပ်းယူႇၼၼ်ႉဢေႃႈ။ ၵူၼ်းမဵဝ်း ဢီႉသရေႇလႃႉ တင်းလၢႆ ၶဝ်ဢိူၺ်း၊ ဢွၼ်ၵၼ် ဝႄႈပိူင်ႈသေ သဵၼ်ႈတၢင်းဢၼ်ႁၢႆႉဢၼ်မိူၵ်ႈ ဢၼ်သူၸွမ်းၼၼ်ႉတႃႉ။ ဢွၼ်ၵၼ်ဝႄႈပိူင်ႈတႃႉ။ ၵွပ်ႈပိူဝ်ႈ ၸိူဝ်ႉၼင်ႇႁိုဝ်သူဢွၼ်ၵၼ် မီးဢလူဝ်ႇၶႂ်ႈၶၢမ်ႇတၢႆၼင်ႇႁိုဝ်။ ဝႃႈၼင်ႇၼႆတႃႉ။-

12ပိူဝ်ႈၼႆလႄႈ လုၵ်ႈၵူၼ်းဢိူၺ်း၊ မႂ်းႁေႃးလၢတ်ႈတီႈ ၵူၼ်းမဵဝ်းလဵဝ်ၵၼ် တင်းမႂ်းၸိူဝ်းၼၼ်ႉ လႄႈဝႃႈ၊ တၢင်းဢၼ်သိုဝ်ႈတေႃႇ ၵေႃႉဢၼ်သိုဝ်ႈတေႃႇၼၼ်ႉ တၵ်းဢမ်ႇၵႄႇသႄႇၼုၵ်ႈဢဝ်မၼ်း ၼႂ်းမိုဝ်ႉဝၼ်းဢၼ် မၼ်းၽွၵ်ႈပျၢၼ်ႇၶိုၼ်းၼၼ်ႉ။ တၢင်းဢၼ်ႁၢႆႉမိူၵ်ႈ ၵေႃႉဢၼ်ႁၢႆႉမိူၵ်ႈၼၼ်ႉၵေႃႈ၊ ၵေႃႉၼၼ်ႉ တၵ်းဢမ်ႇလႆႈလူမ်ႉတူၵ်း ၵွပ်ႈပိူဝ်ႈမၼ်း ၼႂ်းမိုဝ်ႉဝၼ်းဢၼ်မၼ်းဝႄႈပိူင်ႈသေ တၢင်းဢၼ်ႁၢႆႉမိူၵ်ႈ မၼ်းၼၼ်ႉ။ ၵေႃႉဢၼ်သိုဝ်ႈတေႃႇၼၼ်ႉ ဢမ်ႇလႆႈမီးဢၶႂၢင်ႉဢၼ်ဢသၢၵ်ႈလိပ်း ၵွပ်ႈပိူဝ်ႈတၢင်းဢၼ်ႁၢႆႉမိူၵ်ႈၼၼ်ႉ ၼႂ်းမိုဝ်ႉဝၼ်းဢၼ် ၽိတ်းပိူင်ႈၼၼ်ႉ။-

13ပိၵ်ႉသမ်ႉ ၵဝ်လၢတ်ႈလႄႈဝႃႈ၊ ၵေႃႉဢၼ်သိုဝ်ႈတေႃႇၼၼ်ႉ တၵ်းလႆႈဢသၢၵ်ႈလိပ်းဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆ သေၵေႃႈ၊ ပေႃးမၼ်းၸႂ်လီလူၺ်ႈ တၢင်းသိုဝ်ႈတေႃႇမၼ်းသေလႄႈ ႁဵတ်းတူႉၸရိူၵ်ႈၸိုင် တၢင်းဢၼ်သိုဝ်ႈတေႃႇ ဢၼ်မၼ်းႁဵတ်းမႃးၼၼ်ႉသေၸိူဝ်ႉသေပိူင် တၵ်းဢမ်ႇပဵၼ်တီႈဢၼ် ၶုၵ်းၸႂ်လႆႈၶႆႈၸႂ်ထူပ်း တီႈမၼ်းလႃးလႃး။ မၼ်းတၵ်းလႆႈၶၢမ်ႇတၢႆၵွပ်ႈပိူဝ်ႈတူႉၸရိူၵ်ႈ ဢၼ်မၼ်းႁဵတ်းၼၼ်ႉဢေႃႈ။-

14လႆႈသမ်ႉ ပိၵ်ႉသမ်ႉၵဝ် လၢတ်ႈတီႈ ၵေႃႉဢၼ်ႁၢႆႉဢၼ်မိူၵ်ႈလႄႈဝႃႈ၊ မႂ်းၼႆႉတၵ်းလႆႈၶၢမ်ႇတၢႆဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆ သေၵေႃႈ၊ ပေႃးမၼ်းၼၼ်ႉဝႄႈပိူင်ႈသေ တူႉၸရိူၵ်ႈမၼ်းလႄႈ ႁဵတ်းလွင်ႈတၢင်းဢၼ်တြႃး၊ လွင်ႈတၢင်းဢၼ်သိုဝ်ႈတေႃႇယူႇ၊-

15ၶိုၼ်းပၼ်ဢုၵ်ႉၸႃႇဢၼ်ပွင်ႇဝႆႉၵမ်ႉဝႆႉ၊ ၶိုၼ်းပၼ်ဢုၵ်ႉၸႃႇ ဢၼ်ႁိမ်ဢဝ်ႁူင်ႇဢဝ်ၼၼ်ႉလႄႈ ယင်းဢမ်ႇႁဵတ်းလွင်ႈတၢင်းဢၼ်ႁၢႆႉဢၼ်ယုတ်ႈလႄႈ ၸွမ်းသဵၼ်ႈတၢင်းပိင်းၺၢပ်ႈတြႃး တီႈဢၼ်ဢသၢၵ်ႈလိပ်းယူႇၸိူဝ်းၼၼ်ႉယူႇၸိုင်၊ မၼ်းယင်းဢမ်ႇလႆႈၶၢမ်ႇတၢႆ လႄႈ တၵ်းလႆႈဢသၢၵ်ႈလိပ်းယူႇ ဢမၢၼ်ႇၶၼ်ပဵၼ်ဢေႃႈ။-

16တူႉၸရိူၵ်ႈ ဢပႅတ်ႈ ဢၼ်မၼ်းႁဵတ်း ၸိူဝ်းၼၼ်ႉ တၵ်းဢမ်ႇပဵၼ်တီႈဢၼ်ၶုၵ်းၸႂ်လႆႈ ၶႆႈၸႂ်ထူပ်းတီႈမၼ်းလႃးလႃး။ ၵွပ်ႈပိူဝ်ႈ ဢၼ်မၼ်းႁဵတ်း လွင်ႈတၢင်းဢၼ်တြႃး၊ လွင်ႈတၢင်းဢၼ်သိုဝ်ႈတေႃႇၼၼ်ႉလႄႈ မၼ်းတၵ်းလႆႈဢသၢၵ်ႈလိပ်းယူႇ ဢမၢၼ်ႇၶၼ်ပဵၼ်ဢေႃႈ။-

17ၵူၺ်းၵႃႈ ၵူၼ်းမဵဝ်းလဵဝ်ၵၼ် တင်းမႂ်းၸိူဝ်းၼၼ်ႉ လၢတ်ႈလႄႈဝႃႈ၊ တၢင်းဢၼ် ထႃႇဝရႃႉၽြႃး ၸီႇယၢင်ႇၼၼ်ႉ ဢမ်ႇသိုဝ်ႈ၊ ဝႃႈၼင်ႇၼႆ လႄႈ တၢင်းဢၼ်ၶဝ်ၸီႇယၢင်ႇၼၼ်ႉ ဢမ်ႇသိုဝ်ႈလူင်ပႄႇ။-

18ပေႃးၵေႃႉဢၼ်သိုဝ်ႈတေႃႇၼၼ်ႉ ၸုၼ်ႉပႅတ်ႈ တၢင်းဢၼ်သိုဝ်ႈတေႃႇမၼ်း သေလႄႈ ႁဵတ်းတူႉၸရိူၵ်ႈၸိုင်၊ မၼ်းတၵ်းလႆႈၶၢမ်ႇတၢႆ ၵွပ်ႈပိူဝ်ႈဢၼ်ၼၼ်ႉဢေႃႈ။-

19ပေႃးၵေႃႉဢၼ်ႁၢႆႉဢၼ်မိူၵ်ႈၼၼ်ႉ ဝႄႈပိူင်ႈတူႉၸရိူၵ်ႈမၼ်းသေလႄႈ ႁဵတ်းလွင်ႈတၢင်းဢၼ်တြႃး၊ လွင်ႈတၢင်းဢၼ် သိုဝ်ႈတေႃႇၸိုင်၊ မၼ်းတၵ်းလႆႈဢသၢၵ်ႈလိပ်း ၵွပ်ႈပိူဝ်ႈ ဢၼ်ၼၼ်ႉဢေႃႈ။-

20ၵူၺ်းၵႃႈ သူဢွၼ်ၵၼ်လၢတ်ႈလႄႈဝႃႈ၊ တၢင်းဢၼ် ထႃႇဝရႃႉၽြႃး ၸီႇယၢင်ႇၼၼ်ႉဢမ်ႇသိုဝ်ႈ၊ ဝႃႈၼင်ႇၼႆလူင်ပႄႇ။ ၵူၼ်းမဵဝ်း ဢီႉသရေႇလႃႉ တင်းလၢႆ ၶဝ်ဢိူၺ်း၊ ၵဝ်တၵ်း ၸီႇယၢင်ႇသူၸွမ်းၵႃႈၼင်ႇဢၼ် သူႁဵတ်းႁင်းၽႂ်ႁင်းမၼ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။

21ၼႂ်းပီႊဢၼ်လႆႈၶၢမ်ႇတၢင်းဢၼ် သိမ်းဢဝ်ၵႂႃႇလႄႈ ထူၼ်ႈထိုင်သိပ်းပၢႆသွင်ပီႊ လိူၼ်တႃႉသမႃႉ ႁႃႈဝၼ်းၼၼ်ႉ ၵေႃႉဢၼ် ဢွၵ်ႇပၢႆႈသေၵႃႈၼႂ်း ဝဵင်း ယေႇရူႉသလႅမ်ႇ လႄႈ လွတ်ႈၼၼ်ႉ ၵေႃႉၼိုင်ႈႁွတ်ႈမႃးတီႈၵဝ်လႄႈ မွၵ်ႇလၢတ်ႈတီႈၵဝ်လႄႈဝႃႈ၊ ဝဵင်းလႆႈၶၢမ်ႇတၢင်းဢၼ်ယႃႉပႅတ်ႈယဝ်ႉ၊ ဝႃႈၼင်ႇၼႆဢေႃႈ။-

22မိုဝ်းထႃႇဝရႃႉၽြႃး တၢင်ႇသႂ်ႇၵႃႈၼိူဝ်ၵဝ် ၶိင်ႇႁူဝ်ၶမ်ႈၸူဝ်ႈဢၼ် ၵေႃႉဢၼ် ဢွၵ်ႇပၢႆႈလွတ်ႈၼၼ်ႉ ဢမ်ႇပႆႇႁွတ်ႈမႃးၼၼ်ႉလႄႈ မၼ်းၸဝ်ႈၽုၺ်ႇသူပ်းၵဝ်ဝႆႉ တေႃႇထိုင်ႁွတ်ႈမၼ်းၼၼ်ႉ ထၼ်ႈပေႃးႁွတ်ႈမႃး တီႈၵဝ်ၶိင်ႇၵၢင်ၼႂ်ၼၼ်ႉဢေႃႈ။ သူပ်းၵဝ်ၵေႃႈ လႆႈမီး တၢင်းဢၼ်ၽုၺ်ႇပိုတ်ႇဝႆႉလႄႈ ပူၼ်ႉၶိင်ႇဢၼ်ဢမ်ႇလၢတ်ႈၵႂၢမ်းၼၼ်ႉဢေႃႈ။

23ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃးတီႈၵဝ်လႄႈဝႃႈၸမ်ႉ၊-

24လုၵ်ႈၵူၼ်းဢိူၺ်း၊ ၶဝ်ၸိူဝ်းဢၼ်ယူႇ ၵႃႈၼႂ်းတီႈဢၼ်လူႉဢၼ်လႅဝ် ၵႃႈၼႂ်းမိူင်း ဢီႉသရေႇလႃႉ ၼၼ်ႉ ၸိူဝ်းၼၼ်ႉ ဢွၼ်ၵၼ်လၢတ်ႈလႄႈဝႃႈ၊ ဢႃႇပြႃႇႁၢမ်ႇ ၼၼ်ႉ ပဵၼ်ၵူၼ်းၵေႃႉလဵဝ်ၵူၺ်းလႄႈ လႆႈၶၢမ်ႇဢဝ်ဢမူၺ်ႇမိူင်းၼႆႉဢေႃႈ။ ႁဝ်းၸမ်ႉ၊ ပဵၼ်ဢၼ်ၼမ်ၼႃႇလႄႈ၊ မၼ်းၸဝ်ႈပၼ်လိၵ်ႈၼႆႉ ပုၼ်ႈဢၼ်ႁဝ်းတၵ်းၶၢမ်ႇဢမူၺ်ႇယဝ်ႉ၊ ဝႃႈၼင်ႇၼႆဢေႃႈ။-

25ပိူဝ်ႈၼႆလႄႈ မႂ်းလၢတ်ႈတီႈၶဝ်လႄႈဝႃႈ၊ ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ သူၵိၼ်ၶူပ်းလူၺ်ႈၵၼ်တင်းလိူတ်ႈယူႇ၊ ဢဝ်တႃသူႁႅၼ်လူႁႅၼ်တူၺ်းရုၵ်ႈထူႉတင်းလၢႆယူႇ၊ ထွၵ်ႇလိူတ်ႈၵူၼ်းပႅတ်ႈယူႇလႄႈ သူတၵ်းလႆႈၶၢမ်ႇဢဝ် ဢမူၺ်ႇမိူင်းၼႆႉႁိုဝ်။-

26သူသွၼ်ႈပိုင်ႈ လၢပ်ႇသူ လႅဝ်းသူယူႇ၊ ႁဵတ်းလွင်ႈတၢင်းဢၼ် လီႁင်ႈဢဵတ်ႇသဵတ်ႇယူႇ၊ ၽိတ်းပိူင်ႈ မေးၵူၼ်းႁိူၼ်းၸမ်ၵၼ်တင်းသူ ႁင်းၽႂ်ႁင်းမၼ်းယူႇလႄႈ သူတၵ်းလႆႈ ၶၢမ်ႇဢဝ်ဢမူၺ်ႇမိူင်းၼႆႉႁိုဝ်။ ဝႃႈၼင်ႇၼႆတႃႉ။-

27လႆႈသမ်ႉ မႂ်းလၢတ်ႈတီႈၶဝ်လႄႈဝႃႈ၊ ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၵႃႈၼင်ႇဢၼ် ၵဝ်ဢသၢၵ်ႈလိပ်းယူႇၼၼ်ႉ၊ ၶဝ်ၸိူဝ်းဢၼ် ယူႇၵႃႈၼႂ်းတီႈဢၼ်လူႉဢၼ်လႅဝ် တင်းလၢႆၼၼ်ႉ ၸိူဝ်းၼၼ်ႉ တၵ်းလႆႈ လူမ်ႉတၢႆလူၺ်ႈလၢပ်ႇလူၺ်ႈလႅဝ်းလႄႈ ၵဝ်တၵ်းဢဝ်ၶဝ်ၸိူဝ်းဢၼ် မီးၵႃႈတီႈၼွၵ်ႈတီႈပၢင်ႇပဵင်းတင်းလၢႆၼၼ်ႉ ၸိူဝ်းၼၼ်ႉဢၢပ်ႈပၼ်တီႈတူဝ်ထိူၼ်ႇႁၢႆႉ တင်းလၢႆ ႁႂ်ႈၶူပ်းၵိၼ်ၶဝ်ဢေႃႈ။ ၶဝ်ၸိူဝ်းဢၼ် မီးၵႃႈၼႂ်းတိူၵ်ႈတီႈတိုၵ်းသိုၵ်း တင်းလၢႆ ဢိၵ်ႇတင်း ၵႃႈၼႂ်းႁူးထမ်ႈႁူးလိၼ် ၸိူဝ်းၼၼ်ႉ တၵ်းလႆႈတၢႆလူၺ်ႈ ၵႃႇလႃႉႁႃႈလႅင်မိူင်းဢေႃႈ။-

28ၵဝ်တၵ်းႁႂ်ႈမိူင်းၼႆႉ ပဵၼ်တီႈဢၼ်သဵတ်ႈဢၼ်ယဵၼ် တီႈဢၼ်လီဢၢမ်းလႄႈ တၢင်းၵတ်ႉတၢင်းၶၼ် မုၼ်ၵုင်ႇသရေႇမၼ်း တၵ်းသဵင်ႈၵႂႃႇလႄႈ လွႆ ဢီႉသရေႇလႃႉ ၸိူဝ်းၼၼ်ႉ တၵ်းလႆႈပဵၼ် တီႈဢၼ်သဵတ်ႇဢၼ်ယဵၼ် ထၼ်ႈပေႃးၽူႈလႂ် ဢမ်ႇလႆႈတႆႇလတ်းၵႂႃႇၵႃႈၼႂ်းမၼ်းဢေႃႈ။-

29မိူဝ်ႈဢၼ်ၵဝ် ႁႂ်ႈမိူင်းၼႆႉ ပဵၼ်တီႈဢၼ်သဵတ်ႇဢၼ်ယဵၼ် တီႈဢၼ်လီဢၢမ်း ၵွပ်ႈပိူဝ်ႈ လွင်ႈတၢင်းဢၼ်လီႁင်ႈဢဵတ်ႇသဵတ်ႇ ဢၼ်ၶဝ်ႁဵတ်း ၵူႈၸိူဝ်ႉၵူႈပိူင် ၼၼ်ႉၸိုင် ၶဝ်တၵ်းလႆႈႁူႉလွင်ႈဢၼ် ၵဝ်ပဵၼ်ထႃႇဝရႃႉၽြႃးဢေႃႈ၊ ဝႃႈၼင်ႇၼႆတႃႉ။

30လိူဝ်သေၼၼ်ႉ လုၵ်ႈၵူၼ်းဢိူၺ်း၊ ၵူၼ်းမဵဝ်းလဵဝ်ၵၼ်တင်းမႂ်း ၸိူဝ်းၼၼ်ႉ ၸၢင်ႈဢွၼ်ၵၼ် လၢတ်ႈလူၺ်ႈလွင်ႈမႂ်းလႄႈ ၵေႃႉၼိုင်ႈလႄႈၵေႃႉၼိုင်ႈ ပီႈၼွင်ႉၵၼ်လၢတ်ႈၵၼ်ၵႃႈတီႈႁိမ်းၽႃလႂ်၊ ၵႃႈတီႈႁိမ်းၽၵ်းတူလႂ်လႄႈဝႃႈ၊ ၵႂႃႇတႃႉႁဝ်းဢိူၺ်း၊ ဢွၼ်ၵၼ်ထွမ်ႇငိၼ်းလွင်ႈဢၼ် ထႃႇဝရႃႉၽြႃး ပၼ်ပျႃႇတိၵ်ႈ ၸိူဝ်ႉၼင်ႇႁိုဝ်ၼၼ်ႉတႃႉႁဝ်း၊ ဝႃႈၼင်ႇၼႆဢေႃႈ။-

31ၶဝ်ဢွၼ်ၵၼ်မႃးၸူးတီႈမႂ်း မိူၼ်ၸိူဝ်ႉၼင်ႇ ၵူၼ်းၵဝ်တင်းလၢႆလႄႈ ၼင်ႈယူႇၵႃႈတီႈၽၢႆႇၼႃႈမႂ်း မိူၼ်ၸိူဝ်ႉၼင်ႇၵူၼ်းၵဝ် တင်းလၢႆသေလႄႈ ပိၵ်ႉသမ်ႉငိၼ်းၵႂၢမ်းမႂ်းသေၵေႃႈ ယင်းဢမ်ႇထွမ်ႇဢမ်ႇဢဝ်လႄႈယူႇဢေႃႈ။ ပိၵ်ႉသမ်ႉၶဝ်ဢဝ်သူပ်းၶဝ်ၼႄပျႃးလၢၵ်ႈၶၼႃႇ တၢင်းဢၼ်ႁၵ်ႉဢၼ်ပႅင်းသေၵေႃႈ၊ ႁူဝ်ၸႂ်ၶဝ် မီးတၢင်းဢၼ်ၸပ်းၸွႆး တၢင်းဢၼ်ပဵၼ်တိုၼ်းပဵၼ်ႁွၼ်းယူႇဢေႃႈ။-

32မႂ်းပဵၼ်ၸိူဝ်ႉၼင်ႇသဵင်ဢၼ် ႁဵတ်းၵႂၢမ်းဢၼ်လီ ထုၵ်ႇၸႂ်ၵျိူၵ်ႈၸႂ် ဢၼ်ၵေႃႉဢၼ် ပျေႉၸုမ်ႇဝႆႉတင်းသဵင်ဢၼ်လီထွမ်ႇလီၽင်း ၼၼ်ႉႁဵတ်းလႄႈပဝ်ႇႁႆႇၼၼ်ႉ တီႈၶဝ်လႄႈ ပိၵ်ႉသမ်ႉ ၶဝ်လႆႈငိၼ်းသေၵေႃႈ ၶဝ်ဢမ်ႇထွမ်ႇဢမ်ႇဢဝ်။-

33ၵူၺ်းၵႃႈ ဢမူႉၼႆႉ တၵ်းႁွတ်ႈထိုင်ဢေႃႈ။ မိူဝ်ႈဢၼ်ႁွတ်ႈထိုင်ၼၼ်ႉၸိုင်၊ ၶဝ်တၵ်းလႆႈႁူႉလွင်ႈဢၼ် ပရေႃးၽႅတ်ႈယၢမ်ႈလႆႈမီး တီႈၶဝ်ၼၼ်ႉဢေႃႈ၊ ဝႃႈၼင်ႇၼႆဢေႃႈ။

← Chapter 32 Jump to: Chapter 34 →