Ezekiel 31

Shan

← Chapter 30 Jump to: Chapter 32 →

1ၼႂ်းပီႊဢၼ်ထူၼ်ႈထိုင် သိပ်းဢဵတ်းပီႊ၊ လိူၼ်တႃႉတီႉယႃႉ ဝၼ်းၼိုင်ႈၼၼ်ႉ၊ ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃးတီႈၵဝ်လႄႈဝႃႈၸမ်ႉ၊-

2လုၵ်ႈၵူၼ်းဢိူၺ်း၊ မႂ်းႁေႃးလၢတ်ႈတီႈ ၽႃႇရေႃး ၶုၼ်ႁေႃၶမ်း ဢေႇၵိပ်ႉတူႉ ဢိၵ်ႇတင်း ၵူၼ်းမၼ်း ဢၼ်ၼမ်ၼႃႇၼၼ်ႉလႄႈဝႃႈ၊ မႂ်းၼႆႉ ၽုင်းတၼ်းၶူဝ်းယႂ်ႇလႄႈ မိူၼ်ၵၼ်တင်းၽူႈလႂ်။-

3ၵူၼ်း ဢႃႇသူႉရီႉ ၼၼ်ႉပဵၼ် တူၼ်ႈ ဢႃႇရိတ်ႉ လေႇပၼုၼ်ႇ ဢၼ်ပျေႉၸုမ်ႇဝႆႉတင်းၵိင်ႇတင်းၶႃႊ ဢၼ်ႁၢင်ႈလီႁၢင်ႈငၢမ်းလႄႈ ၽိူဝ်မၼ်း မႂ်မၼ်းႁူမ်ႇယူႇငမ်းယူႇ၊ ဢရၢပ်ႈမၼ်းသုင်လႄႈ ၸိၵ်းမၼ်းၸွမ်မၼ်းမီးယူႇၵႃႈၼႂ်း ၵိင်ႇမၼ်းၶႃႊမၼ်း ဢၼ်ၼႃတၼ်ၼႃႇၼၼ်ႉဢေႃႈ။

4ၵျေးၸူးၼမ်ႉႁွင်ႈ ႁႂ်ႈမၼ်းယႂ်ႇၼႃႇ ၵႂၢင်ႈၼႃႇလႄႈၵျေးၸူးၼမ်ႉဢၼ်လိုၵ်ႉဢၼ်လမ်ႇၼၼ်ႉ ႁႂ်ႈမၼ်းသုင်လီယၢဝ်းလီဢေႃႈ။ ၼမ်ႉႁွင်ႈ မၼ်းၸိူဝ်းၼၼ်ႉ လႆယူႇၵႃႈတီႈႁိမ်းႁွမ်းတီႈဢၼ်ၽုၵ်ႇသွမ်ႈမၼ်းၼၼ်ႉလႄႈ ႁွင်ႈဢွၼ်ႇမၼ်းၸိူဝ်းၼၼ်ႉ ၸွတ်ႇတူဝ်ႈၵႂႃႇၸူးတီႈတူၼ်ႈထိူၼ်ႇ တူၼ်ႈၶိူဝ်းၵႃႈမီးၼၼ်ႉဢေႃႈ။-

5ၵွပ်ႈပိူဝ်ႈ ၸိူဝ်ႉၼင်ႇၼၼ်လႄႈ တၢင်းဢၼ်တူဝ်သုင်တူဝ်ယၢဝ်းမၼ်းၼၼ်ႉ လိူဝ်တွၼ်းၼႃႇသေ တူၼ်ႈထိူၼ်ႇတူၼ်ႈၶိူဝ်းၵႃႈမီး ၼၼ်ႉဢေႃႈ။ ၵိင်ႇမၼ်းၸိူဝ်းၼၼ်ႉ ၼမ်ၵိုၼ်းၼႃႇလႄႈ၊ ၶႃႊမၼ်းၸိူဝ်းၼၼ်ႉ ဢွၼ်ၵၼ်ယၢဝ်းယဵတ်ႇ ၵွပ်ႈပိူဝ်ႈၼမ်ႉၼမ်ၼႃႇ ၼႂ်းမိူဝ်ႈဢၼ် မၼ်းယႂ်ႇၽႄႈမႃးၼၼ်ႉဢေႃႈ။-

6ၼူၵ်ႉၵၢင်ႁၢဝ် တင်းသဵင်ႈတင်းလူင် ဢွၼ်ၵၼ်ႁဵတ်းႁင်းၵႃႈၼႂ်းၵိင်ႇမၼ်းၶႃႊမၼ်း ၸိူဝ်းၼၼ်ႉဢေႃႈ။ တရိၵ်ႈသၢၼ်ႇ တင်းသဵင်ႈတင်းလူင် ဢွၼ်ၵၼ် ၵိူတ်ႇလဵင်ႉလုၵ်ႈလဵင်ႉလၢင်းၶဝ် မႃးၵႃႈတႂ်ႈၵိင်ႇမၼ်းၶႃႊမၼ်း ၸိူဝ်းၼၼ်ႉဢေႃႈ။ ၵူၼ်းၵူႈၸိူဝ်ႉၵူႈမဵဝ်းဢၼ်ယႂ်ႇၼႃႇ တင်းသဵင်ႈတင်းလူင်ၼၼ်ႉ ဢွၼ်ၵၼ်ယူႇသဝ်းၵႃႈတီႈ တႂ်ႈႁူမ်ႈမၼ်းငဝ်းမၼ်းဢေႃႈ။-

7ၼင်ႇၼၼ်လႄႈ မၼ်းပဵၼ် ဢၼ်ႁၢင်ႈလီႁၢင်ႈငၢမ်း လူၺ်ႈတၢင်းဢၼ်သုင်မၼ်း ဢိၵ်ႇတင်း တၢင်းဢၼ်ၵိင်ႇမၼ်းၶႃႊမၼ်း ယၢဝ်းယဵတ်ႇၵွပ်ႈပိူဝ်ႈဢၼ်ႁၢၵ်ႈမၼ်း ယင်ႇၸပ်းၵႃႈတီႈဢၼ်ၼမ်ႉလိူင်ႇၼမ်ႉၼမ် ၼၼ်ႉဢေႃႈ။-

8တူၼ်ႈ ဢႃႇရိတ်ႉ ၵႃႈၼႂ်းသူၼ်ဢူးယဵၼ်ႇ ၽြႃးပဵၼ်ၸဝ်ႈ ၸိူဝ်းၼၼ်ႉ ဢမ်ႇႁႄႉၵင်ႈႁႄႉလပ်ႉမၼ်းဝႆႉလႆႈ၊ တူၼ်ႈပႅၵ်ႇ ၸိူဝ်းၼၼ်ႉ ဢမ်ႇပျေႉၸုမ်ႇဝႆႉ တင်းၵိင်ႇတင်းၶႃႊၸိူဝ်ႉၼင်ႇမၼ်းၼၼ်ႉ။ တူၼ်ႈ ဢႃႇရမုၼ်ႇ ၸိူဝ်းၼၼ်ႉ ဢမ်ႇမီးၵိင်ႇမီးၶႃႊၸိူဝ်ႉၼင်ႇမၼ်းၼၼ်ႉ တူၼ်ႈမႆႉ ၵႃႈၼႂ်းသူၼ်ဢူးယဵၼ်ႇ ၽြႃးပဵၼ်ၸဝ်ႈ ၼၼ်ႉ ဢမ်ႇႁၢင်ႈလီႁၢင်ႈငၢမ်း မိူၼ်ၸိူဝ်ႉၼင်ႇမၼ်းၼၼ်ႉ သေတူၼ်ႈသေဢၼ်။-

9ၵဝ်ႁႂ်ႈႁၢင်ႈမၼ်းပဵၼ်ဢၼ် ႁၢင်ႈလီႁၢင်ႈငၢမ်းလူၺ်ႈတၢင်းဢၼ်ၵိင်ႇမၼ်းၶႃႊမၼ်း လိူင်ႇၼႃႇၼမ်ၼႃႇၼၼ်ႉ တေႃႇထိုင်ႁွတ်ႈ တူၼ်ႈမႆႉ ၵႃႈဢၼ်မီးၵႃႈၼႂ်း ဢေႇတိၼ်ႇ ၊ ၵႃႈၼႂ်းသူၼ်ဢူးယဵၼ်ႇ ၽြႃးပဵၼ်ၸဝ်ႈ ၼၼ်ႉ ၸိူဝ်းၼၼ်ႉ ထၼ်ႈပေႃးသီႈၵေႉႁေႈတႃမၼ်းဢေႃႈ။-

10လႆႈသမ်ႉ ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၵွပ်ႈပိူဝ်ႈဢၼ်မၼ်း မီးတၢင်းဢၼ် တူဝ်သုင်တူဝ်ယၢဝ်းယူႇ၊ ယုၵ်ႉယွင်ႈပၢႆၸိၵ်းမၼ်း ဢၼ်ပျေႉၸုမ်ႇဝႆႉ တင်းၵိင်ႇတင်းၶႃႊ ဢၼ်ၼႃတၼ်ၼႃႇ ၼၼ်ႉယူႇ၊ ၸႂ်မၼ်းၵေႃႈ မီးတၢင်းဢၼ် ပူၵ်းပႅၼ်ၽႅၼ်သုင်လႄႈ ဢုပ်ႇဢၢတ်ႇယူႇၼၼ်ႉလႄႈ၊-

11ၵဝ်ဢဝ်မၼ်းဢၢပ်ႈပၼ် ၵႃႈၼႂ်းမိုဝ်းၵေႃႉဢၼ်တၼ်းၶူဝ်းယႂ်ႇ ၵႃႈၼႂ်းၵူၼ်းတၢင်ႇၸိူဝ်ႉတၢင်ႇမဵဝ်း တင်းလၢႆလႄႈ မၼ်းၼၼ်ႉ ၸီႇယၢင်ႇမၼ်းၵိတ်ႇၵႅၼ်းၼႃႇလူင်လၢင်ယဝ်ႉ။ ၵဝ်ႁေႃႈမၼ်းဢွၵ်ႇပႅတ်ႈ ၵွပ်ႈပိူဝ်ႈ လွင်ႈတၢင်းဢၼ်ႁၢႆႉယုတ်ႈ ဢၼ်မၼ်းႁဵတ်း ၼၼ်ႉယဝ်ႉ။-

12ၵူၼ်းတၢင်ႇဝၢၼ်ႈတၢင်ႇမိူင်း ဢၼ်လီၵူဝ်လီႁႄၸိူဝ်းၼၼ်ႉ ဢွၼ်ၵၼ်ၽၼ်းမၼ်းလူမ်ႉလႄႈ ပႅတ်ႈမၼ်းဝႆႉယဝ်ႉ။ ၵိင်ႇမၼ်းၸိူဝ်းၼၼ်ႉ လႆႈတူၵ်း ၵႃႈၼိူဝ်လွႆၼိူဝ်ၵုင်း ဢိၵ်ႇတင်း ၵႃႈၼႂ်းၶူင်ႈၼႂ်းႁူၺ်ႈလႄႈ ၶႃႊမၼ်းၸိူဝ်းၼၼ်ႉ လႆႈၶၢမ်ႇတၢင်းဢၼ်ႁၵ်းႁဵၵ်းမီးယူႇ ၵႃႈတီႈႁိမ်းၼမ်ႉႁွင်ႈၼမ်ႉၵႄး ၵႃႈဢၼ်မီးၵႃႈၼႂ်းမိူင်းဢေႃႈ။ ၵူၼ်းလိၼ်မိူင်း တင်းသဵင်ႈတင်းလူင် ဢွၼ်ၵၼ်ဢွၵ်ႇသေၵႃႈတႂ်ႈ ႁူမ်ႈမၼ်း ငဝ်းမၼ်းလႄႈ ၸုၼ်ႉပႅတ်ႈမၼ်းဢေႃႈ။-

13ၼူၵ်ႉၵၢင်ႁၢဝ် တင်းသဵင်ႈတင်းလူင် လႆႈဢွၼ်ၵၼ်ယူႇၵႃႈၼိူဝ်တီႈဢၼ်မၼ်း ၵိူၼ်ႇလူမ်ႉတူၵ်းၼၼ်ႉလႄႈ တရိၵ်ႈသၢၼ်ႇထိူၼ်ႇ တင်းသဵင်ႈတင်းလူင် လႆႈဢွၼ်ၵၼ်ယူႇ ၵႃႈၼိူဝ်ၵိင်ႇမၼ်းၶႃႊမၼ်းၸိူဝ်းၼၼ်ႉဢေႃႈ။-

14လွင်ႈမၼ်းၸမ်ႉ လွင်ႈၼင်ႇႁိုဝ်ၼႂ်းတူၼ်ႈမႆႉ ဢၼ်မီးၵႃႈတီႈႁိမ်းၼမ်ႉႁွင်ႈၵႃႈမီးၼၼ်ႉ သေတူၼ်ႈသေဢၼ် တၵ်းဢမ်ႇဢုပ်ႇဢၢတ်ႇ ၵွပ်ႈပိူဝ်ႈတၢင်းဢၼ် တူဝ်သုင်တူဝ်ယၢဝ်းမၼ်း ဢိၵ်ႇတင်း လွင်ႈၼင်ႇႁိုဝ် တၵ်းဢမ်ႇယုၵ်ႉယွင်ႈပၢႆၸိၵ်းမၼ်း ၵႃႈၼႂ်းၵိင်ႇမၼ်းၶႃႊမၼ်း ဢၼ်ၼႃတၼ်ၼႃႇ ၸိူဝ်းၼၼ်ႉ တင်းလွင်ႈၼင်ႇႁိုဝ်တူၼ်ႈၵႃႈဢၼ်ၵိၼ်ၼမ်ႉ သေတူၼ်ႈသေဢၼ် တၵ်းဢမ်ႇႁဵတ်းတၢင်းဢၼ် ၶေႉၶဵင်ႇၵၼ်ႁႂ်ႈတူဝ်သုင်တူဝ်ယၢဝ်း မိူၼ်ၸိူဝ်ႉၼင်ႇ ၶဝ်ၼၼ်ႉၸိုင်ၸင်ႇပဵၼ်ဢေႃႈ။ ၶဝ်တင်းသဵင်ႈတင်းလူင်ၼၼ်ႉ လႆႈၶၢမ်ႇတၢင်းဢၼ် ဢဝ်ဢၢပ်ႈပၼ် တီႈတၢင်းတၢႆ ၵႃႈတီႈတႂ်ႈလိၼ် ၵႃႈၼႂ်းၵူၼ်းဢၼ် ၸၢင်ႈလူင်းၵႂႃႇၵႃႈၼႂ်းႁူးလိၼ်ၶုမ်လိၼ် ၼၼ်ႉယဝ်ႉ။-

15ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၼႂ်းမိုဝ်ႉဝၼ်းဢၼ် မၼ်းလူင်းၵႂႃႇ ၵႃႈၼႂ်းမိူင်းမရၼႃႉၼၼ်ႉ၊ ၵဝ်ႁႂ်ႈမီးတၢင်းဢၼ် ၶၢင်းၶီၶၢင်းၽၢၼ်လႄႈ ႁူမ်ႇသုမ်ႇတီႈဢၼ် ဢၼ်လိုၵ်ႉဢၼ်လမ်ႇ ဝႆႉပုၼ်ႈမၼ်းဢေႃႈ။ ၵဝ်ႁၢမ်ႈတၢပ်ႈႁႄႉၶႅၼ်ၼမ်ႉႁွင်ႈ တင်းလၢႆ ဝႆႉလႄႈ ၼမ်ႉဢၼ်ယႂ်ႇၼႃႇလူင်လၢင် လႆႈၶၢမ်ႇတၢင်းဢၼ်ၶျုၵ်ႈဝႆႉဢေႃႈ။ ၵဝ်ႁႂ်ႈလွႆ လေႇပၼုၼ်ႇ ၶၢင်းၶီၶၢင်းၽၢၼ်ပုၼ်ႈမၼ်းလႄႈ တူၼ်ႈမႆႉထိူၼ်ႇ တင်းသဵင်ႈတင်းလူင် ဢွၼ်ၵၼ်ၸႂ်လူႉ ၵွပ်ႈပိူဝ်ႈမၼ်းဢေႃႈ။-

16ၵူၼ်းၵူႈၸိူဝ်ႉၵူႈမဵဝ်းသၼ်ႇၶွၼ်းဝႆ ၵွပ်ႈပိူဝ်ႈ သဵင်ဢၼ်မၼ်းတူၵ်းၼႂ်းမိုဝ်းဢၼ်ၵဝ် ဢဝ်မၼ်းၶျႃးတူၵ်း ၵႃႈၼႂ်းမိူင်းမရၼႃႉ မိူၼ်ၸိူဝ်ႉၼင်ႇ ၶဝ်ၸိူဝ်းဢၼ်လူင်းၵႂႃႇ ၵႃႈၼႂ်းႁူးလိၼ်ၶုမ်လိၼ်ၼၼ်ႉဢေႃႈ။ တူၼ်ႈမႆႉ ဢေႇတိၼ်ႇ ၵႃႈမီး ဢိၵ်ႇတင်း တူၼ်ႈမႆႉ လေႇပၼုၼ်ႇ ဢၼ်မျၢတ်ႈလီၼႃႇသေပိူၼ်ႈ ၸိူဝ်းၼၼ်ႉ ဢၼ်ဝႃႈ ၵႃႈပဵၼ်တူၼ်ႈမႆႉ ဢၼ်ၵိၼ်ၼမ်ႉၼၼ်ႉ ၸိူဝ်းၼၼ်ႉ ဢွၼ်ၵၼ် ႁွတ်ႈတၢင်းဢၼ်သၢၵ်ႈသႃႇ ၵႃႈတီႈတႂ်ႈလိၼ်ၼၼ်ႉဢေႃႈ။-

17ၶဝ်ဢွၼ်ၵၼ် ၸွမ်းမၼ်းလူင်းၵႂႃႇ ၵႃႈတီႈမိူင်းမရၼႃႉ တီႈဢၼ်ၶဝ်ၸိူဝ်းဢၼ် လႆႈၶၢမ်ႇတၢႆလူၺ်ႈလၢပ်ႇလူၺ်ႈလႅဝ်း ဢိၵ်ႇလူၺ်ႈၵၼ်တင်းၶဝ်ၸိူဝ်းဢၼ် ပဵၼ်ၶႅၼ်မိုဝ်းမၼ်းလႄႈ သွၼ်ႈပိုင်ႈႁူမ်ႈမၼ်း ၵႃႈၼႂ်းမဵဝ်းၵူၼ်း တင်းလၢႆ ၼၼ်ႉ ယူႇၼၼ်ႉဢေႃႈ။-

18မႂ်းၼႆႉ မီးမုၼ်ၽုင်းတၼ်းၶူဝ်းဢႃႇၼူႉၽေႃႇလႄႈ မိူၼ်ၵၼ်တင်းတူၼ်ႈမႆႉ ဢေႇတိၼ်ႇ ဢၼ်လႂ်။ မႂ်းတၵ်းလႆႈၶၢမ်ႇတၢင်းဢၼ် ၶျႃးတူၵ်းတီႈတႅမ်ႇ ၵႃႈၼႂ်းတီႈတႂ်ႈလိၼ် လူၺ်ႈၵၼ်တင်းတူၼ်ႈမႆႉ ဢေႇတိၼ်ႇ ၸိူဝ်းၼၼ်ႉဢေႃႈ။ မႂ်းတၵ်းလႆႈၼွၼ်းယူႇလူၺ်ႈၵၼ် တင်းၶဝ်ၸိူဝ်းဢၼ် ဢမ်ႇၶၢမ်ႇတၢင်းဢၼ်ထိူဝ်ႁိမ်း ဢိၵ်ႇတင်း ၶဝ်ၸိူဝ်းဢၼ် လႆႈၶၢမ်ႇတၢင်းဢၼ် ဢဝ်တၢႆလူၺ်ႈလၢပ်ႇလူၺ်ႈလႅဝ်း ၼၼ်ႉဢေႃႈ။ ၼင်ႇၼၼ်လႄႈ ၶုၼ် ၽႃႇရေႃး ဢိၵ်ႇတင်း ၵူၼ်းဝၢၼ်ႈၵူၼ်းမိူင်းမၼ်း ဢၼ်ၼမ်ၼႃႇၵႃႈမီးၼၼ်ႉ တၵ်းလႆႈပဵၼ်ဢေႃႈ၊ ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉဢေႃႈ။

← Chapter 30 Jump to: Chapter 32 →