Ezekiel 43

Shan

← Chapter 42 Jump to: Chapter 44 →

1လိုၼ်းၼၼ်ႉ မၼ်းႁွင်ႉဢဝ်ၵဝ်ၵႂႃႇ ၵႃႈတီႈႁူးၽၵ်းတူ ဢၼ်ဝႃႈၽၵ်းတူ ဢၼ်ဝၢႆႇၼႃႈၵႂႃႇၵႃႈတီႈၽၢႆႇဝၼ်းဢွၵ်ႇ ၼၼ်ႉလႄႈ၊-

2မုၼ်ၽုင်း ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ ၼၼ်ႉ လုၵ်ႉသေၵႃႈတီႈၽၢႆႇတၢင်းဢွၵ်ႇမႃးလႄႈ သဵင်မၼ်းပဵၼ်ၸိူဝ်ႉၼင်ႇ သဵင်ၼမ်ႉသမ်ႇမုၵ်ႉတြႃႇ ၼၼ်ႉဢေႃႈ။ ၵွပ်ႈပိူဝ်ႈ သၢႆဢရွင်ႇမၼ်းၸဝ်ႈ ၼၼ်ႉလႄႈ ၼႃႈလိၼ်ႁိူဝ်ႈလႅင်းၵႂႃႇတင်းၼႃႈဢေႃႈ။-

3ရူႇပႃႇရူင်ႇၼၼ်ႉ မိူၼ်ၵၼ်တင်းရူႇပႃႇရူင်ႇ ဢၼ်ၵဝ်ႁၼ်ဢၼ်ဝႃႈ ရူႇပႃႇရူင်ႇဢၼ်ၵဝ် ႁၼ်မိူဝ်ႈဢၼ်ၵဝ်မႃး ႁႂ်ႈလႆႈယႃႉၽဵဝ်ႈ ဝဵင်းၸဝ်ႈပႅတ်ႈၼၼ်ႉဢေႃႈ။ ရူႇပႃႇရူင်ႇ ၸိူဝ်းၼၼ်ႉ ပဵၼ်ၸိူဝ်ႉၼင်ႇ ရူႇပႃႇရူင်ႇ ဢၼ်ၵဝ်ႁၼ်ၵႃႈတီႈႁိမ်း ၼမ်ႉႁွင်ႈ ၶေႇပႃႇ ၼၼ်ႉလႄႈ ၵဝ်ၶုပ်ႉမူပ်ႇယူႇဢေႃႈ။-

4မုၼ်ၽုင်း ထႃႇဝရႃႉၽြႃး ၼၼ်ႉ ၸွမ်းသဵၼ်ႈတၢင်းၽၵ်းတူ ဢၼ်ဝၢႆႇၼႃႈတေႃႇၽၢႆႇဝၼ်းဢွၵ်ႇၼၼ်ႉ သေလႄႈ ၶဝ်ႈၵႃႈၼႂ်းႁိူၼ်းၸဝ်ႈ ဢေႃႈ။-

5မိူဝ်ႈၼၼ်ႉ ဝီႉၺိၺ်ႇၸဝ်ႈ ဢုမ်ႈႁွပ်ႇဢဝ်ၵဝ်သေလႄႈ ဢဝ်ၵဝ်ၵႂႃႇၵႃႈၼႂ်းတမ်ႇတိူင်း ဢၼ်ၵႃႈၼႂ်းလႄႈ မုၼ်ၽုင်း ထႃႇဝရႃႉၽြႃးၼၼ်ႉ တဵမ်ဝႆႉၵႃႈၼႂ်းႁိူၼ်းၸဝ်ႈ ၼၼ်ႉဢေႃႈ။-

6ၵဝ်ငိၼ်းသဵင်ဢၼ်ယူႇ ၵႃႈၼႂ်းႁိူၼ်းၸဝ်ႈ မီးဢမိင်ႉတီႈၵဝ်လႄႈ ၵူၼ်းၵေႃႉၼိုင်ႈ ၸုၵ်းယူႇၵႃႈတီႈႁိမ်းၵဝ်ဢေႃႈ။-

7မၼ်းၸဝ်ႈ မီးဢမိင်ႉတီႈၵဝ်လႄႈဝႃႈၸမ်ႉ၊ လုၵ်ႈၵူၼ်းဢိူၺ်း၊ ၵႃႈတီႈၼႆႈ ပဵၼ်တီႈဢၼ်ပလၢင်ႇၵဝ်တႄႇယူႇ၊ တီႈဢၼ်ၽႃႇတိၼ်ၵဝ် ယဵပ်ႇတမ်းယူႇ၊ တီႈဢၼ်ၵဝ်ယူႇၵႃႈၼႂ်းၵူၼ်း မဵဝ်း ဢီႉသရေႇလႃႉ တင်းလၢႆ ယူႇတႃႇသေႇဢေႃႈ။ ၵူၼ်းမဵဝ်း ဢီႉသရေႇလႃႉ တင်းလၢႆ ဢိၵ်ႇတင်း ၶုၼ်ႁေႃၶမ်း ၶဝ်ၸိူဝ်းၼၼ်ႉ ၵမ်းလိုၼ်း ဢမ်ႇလႆႈၶျႃးၼႃႇမႃႉၸိုဝ်ႈသဵင်မျၢတ်ႈၵဝ် တူၵ်းတီႈတႅမ်ႇလူၺ်ႈ တၢင်းဢၼ် ၶဝ်ၽိတ်းပိူင်ႈ ၸိူဝ်းၼၼ်ႉ ဢိၵ်ႇတင်း လူၺ်ႈတူဝ်တၢႆၶုၼ်ႁေႃၶမ်း ၸိူဝ်းၼၼ်ႉ ၵႃႈၼိူဝ်တီႈဢၼ်သုင်ၶဝ် တင်းလၢႆၼၼ်ႉ။-

8ၼႂ်းလွင်ႈဢၼ် ၶဝ်တႄႇႁဵတ်း ၶူင်ႇၽၵ်းတူၶဝ် ၵႃႈတီႈႁိမ်းၶူင်ႇၽၵ်းတူၵဝ်၊ တႄႇႁဵတ်းသဝ်ၽၵ်းတူၶဝ် ၵႃႈတီႈႁိမ်းသဝ် ၽၵ်းတူၵဝ် မီးၽႃဢၼ်လဵဝ်ၵူၺ်းၵႃႈတီႈဝူင်ႈၵၢင်ၵဝ်တင်းၶဝ်ၼၼ်ႉ ၶဝ်ဢဝ်လွင်ႈတၢင်းဢၼ်လီႁင်ႈဢဵတ်ႇသဵတ်ႇ ဢၼ်ၶဝ်ႁဵတ်း ၸိူဝ်းၼၼ်ႉ ၶျႃးၼႃႇမႃႉၸိုဝ်ႈသဵင်မျၢတ်ႈၵဝ် တူၵ်းတီႈတႅမ်ႇလႄႈ ၵဝ်ပႃးတၢင်းၸႂ်မႆႈၶႆႈၸႃႉၵဝ် သေလႄႈ ယႃႉၶဝ်ပႅတ်ႈယဝ်ႉ။-

9မိူဝ်ႈလဵဝ်ၼႆႉၸမ်ႉ၊ ႁႂ်ႈၶဝ်ဢွၼ်ၵၼ်ပႄႇပႅတ်ႈ လွင်ႈတၢင်းဢၼ် ၶဝ်ၽိတ်းပိူင်ႈ ၸိူဝ်းၼၼ်ႉ ဢိၵ်ႇတင်း တူဝ်တၢႆၶုၼ်ႁေႃၶမ်း ၶဝ်ၸိူဝ်းၼၼ်ႉ သေၵႃႈတီႈၵဝ်ၵႆၵႆသေတႃႉ။ ၵဝ်တၵ်းယူႇ ၵႃႈၼႂ်းၵၢင်ၶဝ်ယူႇတႃႇသေႇဢေႃႈ။-

10လုၵ်ႈၵူၼ်းဢိူၺ်း၊ ၼႄပျႃးႁိူၼ်းၸဝ်ႈ တီႈၵူၼ်းမဵဝ်း ဢီႉသရေႇလႃႉ တင်းလၢႆ ႁႂ်ႈၶဝ်လႆႈဢူၵ်းဢၢႆ ၵွပ်ႈပိူဝ်ႈတူႉၸရိူၵ်ႈ ဢပႅတ်ႈၶဝ်တႃႉ။ ႁႂ်ႈၶဝ်ဢွၼ်ၵၼ် တႅၵ်ႈတူၺ်းပုင်ႇမၼ်းတႃႉ။-

11ပေႃးၶဝ်ၼၼ်ႉ ဢူၵ်းဢၢႆၵွပ်ႈပိူဝ်ႈ လွင်ႈတၢင်းဢၼ် ၶဝ်ႁဵတ်းၵႃႈမီးၼၼ်ႉ ဢမၢၼ်ႇၶၼ်ပဵၼ်ၸိုင်၊ ၼႄပျႃးပုင်ႇႁိူၼ်းဢိၵ်ႇတင်း ႁၢင်ႈၽၢင်မၼ်း၊ ႁူးၽၵ်းတူတီႈဢၼ်ဢွၵ်ႇမၼ်း တီႈဢၼ်ၶဝ်ႈမၼ်း တင်းလၢႆ၊ ထုင်းၸၢမ်ႇမၼ်းၵႃႈမီး ဢိၵ်ႇတင်း ထုင်းၽိင်ႈတြႃးမၼ်း ၵႃႈမီး ထုင်းၸၢမ်ႇမၼ်းၵႃႈမီး ဢိၵ်ႇတင်း တြႃးမၼ်း ဢၼ်ၸီႇယၢင်ႇႁဵတ်းဝႆႉ ၵႃႈမီးၼၼ်ႉလႄႈ တႅမ်ႈဝႆႉ သိုဝ်ႈၼႃႈတႂ်ႈတႃၶဝ် ႁႂ်ႈၶဝ်လႆႈပႂ်ႉၵမ်ပႂ်ႉၵျၢင်ႉ ထုင်းၸၢမ်ႇမၼ်းၵႃႈမီး ဢိၵ်ႇတင်း လွင်ႈတၢင်းဢၼ် ၸီႇယၢင်ႇႁဵတ်းထုင်းဝႆႉ ၵႃႈမီးၼၼ်ႉ သေလႄႈ ႁဵတ်းၸွမ်းတႃႉ။-

12တြႃးႁိူၼ်းၸဝ်ႈၸမ်ႉ၊ ၵႃႈၼိူဝ်ပၢႆၸိၵ်းလွႆၼၼ်ႉ၊ လႅၼ်လိၼ်တူင်ႈတင်းႁိူၼ်းၸဝ်ႈ ၵႃႈမီးၼၼ်ႉ တၵ်းလႆႈပဵၼ် ဢၼ်မူတ်းၸၢင်ႇၼႃႇလူင်လၢင်ဢေႃႈ။ ဢၼ်ၼႆႉၸမ်ႉ၊ ပဵၼ်တြႃးႁိူၼ်းၸဝ်ႈဢေႃႈ။

13ဢၼ်ၶပ်ႉ ဢၼ်တႅၵ်ႈ ယိတ်ႈပလၢင်ႇၸမ်ႉ၊ ပေႃးဢဝ်သွၵ်ႇပၢႆၶိုပ်ႈ ႁႂ်ႈပဵၼ်သွၵ်ႇ ဢၼ်တႅၵ်ႈၸိုင်၊ ၶူင်ႇႁၢၼ်ႉတိၼ်မၼ်း မီးသွၵ်ႇၼိုင်ႈ၊ ဢၼ်ၵႂၢင်ႈမၼ်းမီးသွၵ်ႇၼိုင်ႈ၊ ဢၼ်ၵႂၢင်ႈၶွပ်ႇႁိမ်းမၼ်းမီးၶိုပ်ႈၼိုင်ႈဢေႃႈ။ ဢၼ်ၼႆႉ ပဵၼ်ၽၢႆႇၼွၵ်ႈယိတ်ႈပလၢင်ႇဢေႃႈ။-

14ဢဝ်ၵႃႈတီႈၶူင်ႇႁၢၼ်ႉတိၼ်ၵႃႈလိၼ် တေႃႇထိုင်ႁွတ်ႈ ၵႃႈတီႈႁၢၵ်ႈႁၢၼ်ႉၵၢင် တၵ်းလႆႈ မီးသွင်သွၵ်ႇလႄႈ ဢၼ်ၵႂၢင်ႈမၼ်း သွၵ်ႇၼိုင်ႈ ဢေႃႈ။ ဢဝ်ၵႃႈတီႈႁၢၵ်ႈဢွၼ်ႇတေႃႇထိုင်ႁွတ်ႈႁၢၵ်ႈလူင် တၵ်းလႆႈမီးသီႇသွၵ်ႇလႄႈ ဢၼ်ၵႂၢင်ႈမၼ်းသွၵ်ႇၼိုင်ႈဢေႃႈ။-

15တၢင်းဢၼ်သုင်ယိတ်ႈပလၢင်ႇ တၵ်းလႆႈ မီးသီႇသွၵ်ႇလႄႈ ၶဝ်လႅမ်သီႇလႅမ်ႈၵေႃႈ တၵ်းလႆႈဢွၵ်ႇၵႃႈတီႈၼႃႈၼိူဝ်ယိတ်ႈပလၢင်ႇ ၶိုၼ်ႈဢေႃႈ။-

16ၼႃႈၼိူဝ်ယိတ်ႈပလၢင်ႇၼၼ်ႉ ၼႃႈယၢဝ်းမၼ်း တၵ်းလႆႈမီး သိပ်းသွင်သွၵ်ႇ၊ ၼႃႈပွတ်းမၼ်း သိပ်းသွင်သွၵ်ႇလႄႈ ပဵၼ်သီႇၸဵင်ႇၶိုင်ႈဝႆႉဢေႃႈ။-

17ႁၢၵ်ႈဢၼ်ၵႃႈတႂ်ႈၵေႃႈ ၼႃႈယၢဝ်းမၼ်း တၵ်းလႆႈ မီးသိပ်းပၢႆသီႇသွၵ်ႇ၊ ၼႃႈပွတ်းမၼ်း သိပ်းပၢႆသီႇသွၵ်ႇလႄႈ ပဵၼ်သီႇၸဵင်ႇၶိုင်ႈဝႆႉ ဢေႃႈ။ ၶွပ်ႇႁိမ်းမၼ်းၵေႃႈ ဢၼ်ၵႂၢင်ႈတၵ်းလႆႈမီးၶိုပ်ႈၼိုင်ႈဢေႃႈ။ ၶူင်ႇႁၢၼ်ႉတိၼ်မၼ်းၼၼ်ႉ တၵ်းလႆႈပႅၼ်ဢွၵ်ႇၵႃႈတီႈလဵပ်ႈႁွပ်ႈ ယိတ်ႈပလၢင်ႇသွၵ်ႇၼိုင်ႈလႄႈ ၶၼ်ႈလႆတီႈဢၼ် တၵ်းၶိုၼ်ႈၸူးၼၼ်ႉ တၵ်းလႆႈ ဝၢႆႇၼႃႈၵႂႃႇၽၢႆႇတၢင်းဝၼ်းဢွၵ်ႇဢေႃႈ၊ ဝႃႈၼင်ႇၼႆဢေႃႈ။

18လႆႈသမ်ႉ မၼ်းလၢတ်ႈတီႈၵဝ်လႄႈဝႃႈ၊ လုၵ်ႈၵူၼ်းဢိူၺ်း၊ ၸွမ်းၵႃႈၼင်ႇဢၼ် ၸဝ်ႈထႃႇဝရႃႉၽြႃး မီးဢမိင်ႉဝႆႉၼၼ်ႉလႄႈ၊ တြႃးယိတ်ႈပလၢင်ႇ ဢၼ်တၵ်းလႆႈ ပႂ်ႉၵမ်ပႂ်ႉၸွမ်းၼႂ်းမိုဝ်ႉဝၼ်း ဢၼ်တႄႇႁဵတ်းမၼ်း ပုၼ်ႈဢၼ်တၵ်းဢဝ်ယိတ်ႈ ဢၼ်တုတ်ႇၽႆး ပုၵ်ႈၸေႃႇလႄႈ ဢဝ်လိူတ်ႈၽႅတ်း ၼၼ်ႉၸမ်ႉ၊-

19မႂ်းတၵ်းလႆႈဢဝ်ဝူဝ်းပေႃႈၼုမ်ႇပုၼ်ႈ ယိတ်ႈၽေႇဢပႅတ်ႈ တူဝ်ၼိုင်ႈ ဢၢပ်ႈပၼ်တီႈယိတ်ႈပရေႃးႁဵၵ်ႈ လုၵ်ႈလၢၼ် ၸႃႇတုၵ်ႉ ၊ မဵဝ်း လေႇဝီႉ ဢၼ် သုတ်ႉၸပ်းသုတ်ႉၸူး ၵႃႈတီႈၵဝ်ႁႂ်ႈလႆႈ ပွင်ႁဵတ်းဢမူႉၵဝ် ၸိူဝ်းၼၼ်ႉဢေႃႈ။-

20မႂ်းတၵ်းလႆႈဢဝ်လိူတ်ႈမၼ်းၼၼ်ႉ ၵမ်ႈၽွင်ႈတႃးၶဝ်လႅမ် ယိတ်ႈပလၢင်ႇသီႇလႅမ်ႈ၊ သီႇၸဵင်ႇၶူင်ႇႁၢၼ်ႉတိၼ်မၼ်း၊ ၶွပ်ႇႁိမ်းမၼ်းၸိူဝ်းၼၼ်ႉဢေႃႈ။ ၼင်ႇၼၼ်လႄႈ မႂ်းတၵ်းလႆႈ ႁႂ်ႈမၼ်းမူတ်းသႂ်လႄႈ ၶၢဝ်ၸၢင်ႇဢေႃႈ။-

21မႂ်းတၵ်းလႆႈဢဝ်ဝူဝ်းပုၼ်ႈယိတ်ႈဢၼ်ၽေႇဢပႅတ်ႈၼၼ်ႉလႄႈ ဢဝ်တုတ်ႇၽႆး ၵႃႈၼႂ်းတီႈဢၼ်ၶၢၼ်းဝႆႉ ၵႃႈၼႂ်းႁိူၼ်းၸဝ်ႈ ၵႃႈၼွၵ်ႈထႃႇၼႃႉတီႈမူတ်းၸၢင်ႇၼၼ်ႉဢေႃႈ။-

22ၼႂ်းဝၼ်းတူႉတီႉယႃႉၵေႃႈ၊ မႂ်းတၵ်းလႆႈဢဝ် ပႄႉပေႃႈဢွၼ်ႇဢၼ်ဢမ်ႇပႃးဢပႅတ်ႈၼၼ်ႉလႄႈ ပုၵ်ႈၸေႃႇပုၼ်ႈယိတ်ႈ ဢၼ်ၽေႇဢပႅတ်ႈဢေႃႈ။ ၶဝ်တၵ်းလႆႈဢွၼ်ၵၼ်ႁႂ်ႈ ယိတ်ႈပလၢင်ႇမူတ်းသႂ် မိူၼ်ၸိူဝ်ႉၼင်ႇဢၼ် ဢဝ်လိူတ်ႈဝူဝ်းၼၼ်ႉ ႁႂ်ႈမူတ်းသႂ်ဢေႃႈ။-

23ၼင်ႇၼၼ်လႄႈ လိုၼ်းသေ ဢၼ်မႂ်းႁႂ်ႈယိတ်ႈပလၢင်ႇ မူတ်းသႂ်ယဝ်ႉၼၼ်ႉ၊ မႂ်းတၵ်းလႆႈဢဝ်ဝူဝ်းပေႃႈၼုမ်ႇ ဢိၵ်ႇတင်း ပႄႉပေႃႈ ဢၼ်ဢမ်ႇပႃးဢပႅတ်ႈၼၼ်ႉ ပုၵ်ႈၸေႃႇဢေႃႈ။-

24မၼ်းတၵ်းလႆႈဢဝ်ၸိူဝ်းၼၼ်ႉ မႃးၵႃႈတီႈၽၢႆႇၼႃႈ ထႃႇဝရႃႉၽြႃး လႄႈ ယိတ်ႈပရေႃးႁဵၵ်ႈ တင်းလၢႆ တၵ်းလႆႈဢွၼ်ၵၼ်ဢဝ်ၵိူဝ်သႂ်ႇ သေလႄႈ ဢဝ်တူဝ်ၸိူဝ်းၼၼ်ႉ တုတ်ႇၽႆးပုၵ်ႈၸေႃႇတီႈ ထႃႇဝရႃႉၽြႃးဢေႃႈ။-

25ၸဵတ်းဝၼ်းတဵမ်တဵမ် ယေႈဝၼ်းယေႈဝၼ်း၊ မႂ်းတၵ်းလႆႈဢဝ် ပႄႉတူဝ်ၼိုင်ႈ မႄးႁဵတ်းမႄးႁႅၼ်းယိတ်ႈ ဢၼ်ၽေႇဢပႅတ်ႈဢေႃႈ။ ဝူဝ်းပေႃႈၼုမ်ႇတူဝ်ၼိုင်ႈ ဢိၵ်ႇတင်း သူဝ်းပေႃႈဢၼ်ဢမ်ႇပႃး ဢပႅတ်ႈတူဝ်ၼိုင်ႈၵေႃႈ တၵ်းလႆႈ မႄးႁဵတ်းမႄးႁႅၼ်းဢေႃႈ။-

26ၸဵတ်းဝၼ်းတဵမ်တဵမ်၊ ၶဝ်တၵ်းလႆႈဢွၼ်ၵၼ်ႁဵတ်းႁႂ်ႈ ယိတ်ႈပလၢင်ႇမူတ်းသႂ်လႄႈ ၶၢဝ်ၸၢင်ႇဢေႃႈ။ ၼင်ႇၼၼ်လႄႈ ၶဝ်တၵ်းလႆႈဢွၼ်ၵၼ်ၶၢၼ်း ယိတ်ႈပလၢင်ႇဝႆႉ ၵႃႈၼႂ်းဢရႃႇမၼ်းဢေႃႈ။-

27လိုၼ်းသေဢၼ် ၸေးၸဵတ်းဝၼ်းၼၼ်ႉ ယဝ်ႉၼၼ်ႉ၊ ဢဝ်ဝၼ်းဢႃႉထမႃႉၼၼ်ႉ ၵႂႃႇမိူဝ်းၼႃႈၼၼ်ႉ၊ ယိတ်ႈပရေႃးႁဵၵ်ႈ တင်းလၢႆ တၵ်းလႆႈဢွၼ်ၵၼ်ပုၵ်ႈၸေႃႇယိတ်ႈ တုတ်ႇၽႆးသူ ဢိၵ်ႇတင်း ယိတ်ႈမိၵ်ႉသႃႇႁႃယႃႉသူ တင်းလၢႆ ၵႃႈၼိူဝ်ယိတ်ႈပလၢင်ႇ ၼၼ်ႉဢေႃႈ။ ၵဝ်တၵ်းႁပ်ႉတုင်းဢဝ်သူဢေႃႈ၊ ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉဢေႃႈ။

← Chapter 42 Jump to: Chapter 44 →