Ezekiel 46

Shan

← Chapter 45 Jump to: Chapter 47 →

1ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၽၵ်းတူတမ်ႇတိူင်း ဢၼ်ၵႃႈၼႂ်း ဢၼ်ဝၢႆႇၼႃႈၵႂႃႇၽၢႆႇတၢင်းဝၼ်းဢွၵ်ႇၼၼ်ႉ တၵ်းလႆႈမီးတၢင်းဢၼ်ဢိုတ်းႁပ်းဝႆႉယူႇ ၼႂ်းဝၼ်းဢၼ်ႁဵတ်းတၢင်းႁဵတ်း ႁူၵ်းဝၼ်းတဵမ်တဵမ်ၼၼ်ႉလႄႈ ၼႂ်းဝၼ်းၵမ်သိၼ် ဢိၵ်ႇတင်း ဝၼ်းလိူၼ်မႂ်ႇၼၼ်ႉ တၵ်းလႆႈၽုၺ်ႇဝႆႉဢေႃႈ။-

2ၶုၼ်ၼၼ်ႉ တၵ်းလႆႈၶဝ်ႈသဵၼ်ႈ တၢင်းမုၵ်ႈၽၵ်းတူၽၢႆႇၼွၵ်ႈမၼ်းၼၼ်ႉလႄႈ ၸုၵ်းၵႃႈတီႈႁိမ်းသဝ်ၽၵ်းတူဢေႃႈ။ ယိတ်ႈပရေႃးႁဵၵ်ႈတင်းလၢႆ တၵ်းလႆႈမႄးႁဵတ်းမႄးႁႅၼ်း ယိတ်ႈဢၼ်တုတ်ႇၽႆးမၼ်း ဢိၵ်ႇတင်း ယိတ်ႈမိၵ်ႉသႃႇႁႃယႃႉမၼ်းတင်းလၢႆလႄႈ မၼ်းတၵ်းလႆႈၵူမ်ႈႁူဝ်ၵွမ်းႁူဝ်မၼ်း ၵႃႈတီႈၶူင်ႇၽၵ်းတူသေလႄႈ ဢွၵ်ႇၵႂႃႇၵႃႈတီႈၼွၵ်ႈဢေႃႈ။ ၵူၺ်းၵႃႈ ဢမ်ႇလႆႈဢိုတ်းလႆႈႁပ်း ၽၵ်းတူၼၼ်ႉ ထိုင်ႁွတ်ႈ ၶိင်ႇႁူဝ်ၶမ်ႈၼၼ်ႉ။-

3မိူၼ်ၸိူဝ်ႉၼင်ႇၼၼ်၊ ၼႂ်းဝၼ်းၵမ်သိၼ် ဢိၵ်ႇတင်းၼႂ်းဝၼ်းလိူၼ်မႂ်ႇၼၼ်ႉ ၵူၼ်းဝၢၼ်ႈၵူၼ်းမိူင်းတင်းလၢႆ တၵ်းလႆႈဢွၼ်ၵၼ်ၵူမ်ႈႁူဝ်ၵွမ်းႁူဝ် ၵႃႈတီႈႁိမ်းၽၵ်းတူၼၼ်ႉ ၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။-

4ယိတ်ႈဢၼ်တုတ်ႇၽႆး ဢၼ်ၶုၼ်တၵ်းလႆႈဢဝ် ပုၵ်ႈၸေႃႇတီႈထႃႇဝရႃႉၽြႃး ၼႂ်းဝၼ်းၵမ်သိၼ်ၼၼ်ႉၸမ်ႉ၊ ပဵၼ်သူဝ်းဢွၼ်ႇ ဢၼ်ဢမ်ႇပႃးဢပႅတ်ႈ ႁူၵ်းတူဝ်၊ သူဝ်းပေႃႈဢၼ်ဢမ်ႇပႃးဢပႅတ်ႈ တူဝ်ၼိုင်ႈဢေႃႈ။-

5ၶိူင်ႈပုၵ်ႈၸေႃႇၽေႃးၸဵၼ်ႇ ဢၼ်ၸၢပ်ႈသႅင်ႇၵၼ်တင်းသူဝ်းပေႃႈတူဝ်ၼိုင်ႈၼၼ်ႉ တၵ်းလႆႈပဵၼ်ၽွင်ၶဝ်ႈမုၼ်း ဢေးၽႃႇ ၼိုင်ႈ လႄႈ ၶိူင်ႈပုၵ်ႈၸေႃႇၽေႃးၸဵၼ်ႇဢၼ်ၸၢပ်ႈသႅင်ႇၵၼ်တင်းသူဝ်းဢွၼ်ႇၸိူဝ်းၼၼ်ႉ တၵ်းလႆႈပဵၼ်ၵႃႈၼင်ႇဢၼ် မၼ်းမီးဢလူဝ်ႇၶႂ်ႈပၼ်ၼၼ်ႉဢေႃႈ။ ၼမ်ႉမၼ်းတၵ်းလႆႈပႃးယေႈ ႁီႉၼႃႉ ပုၼ်ႈယေႈ ဢေးၽႃႇ ၼၼ်ႉဢေႃႈ။-

6ၼႂ်းဝၼ်းလိူၼ်မႂ်ႇၼၼ်ႉ မၼ်းတၵ်းလႆႈပုၵ်ႈၸေႃႇဝူဝ်းပေႃႈၼုမ်ႇ ဢၼ်ဢမ်ႇပႃးဢပႅတ်ႈတူဝ်ၼိုင်ႈ၊ သူဝ်းဢွၼ်ႇႁူၵ်းတူဝ်၊ သူဝ်းပေႃႈ တူဝ်ၼိုင်ႈဢၼ်ဢမ်ႇပႃးဢပႅတ်ႈၼၼ်ႉဢေႃႈ။-

7မၼ်းတၵ်းလႆႈပွင်ႁႅၼ်းပွင်မႄး ၶိူင်ႈပုၵ်ႈၸေႃႇၽေႃးၸဵၼ်ႇဢၼ်ဝႃႈ ၽွင်ၶဝ်ႈမုၼ်း ဢေးၽႃႇ ၼိုင်ႈပုၼ်ႈဝူဝ်းတူဝ်ၼိုင်ႈ၊ ဢေးၽႃႇ ၼိုင်ႈ ပုၼ်ႈသူဝ်းပေႃႈတူဝ်ၼိုင်ႈ ၵႃႈဢၼ်မီးဢလူဝ်ႇၼၼ်ႉပုၼ်ႈသူဝ်းဢွၼ်ႇ ဢိၵ်ႇတင်းၼမ်ႉမၼ်း ယေႈ ႁီႉၼႃႉ ပုၼ်ႈယေႈ ဢေးၽႃႇ ၼၼ်ႉဢေႃႈ။

8မိူဝ်ႈဢၼ်ၶုၼ်ၼၼ်ႉၶဝ်ႈၼၼ်ႉ၊ မၼ်းတၵ်းလႆႈၶဝ်ႈ ၸွမ်းသဵၼ်ႈတၢင်းမုၵ်ႈၽၵ်းတူၼၼ်ႉလႄႈ တၵ်းလႆႈဢွၵ်ႇၸွမ်းသဵၼ်ႈတၢင်း ၼၼ်ႉဢေႃႈ။-

9မိူဝ်ႈဢၼ်ၵူၼ်းဝၢၼ်ႈၵူၼ်းမိူင်းတင်းလၢႆ ၶဝ်ႈၸူးၵႃႈတီႈၽၢႆႇၼႃႈထႃႇဝရႃႉၽြႃး၊ ၼႂ်းမိုဝ်ႉဝၼ်းပွႆး ဢၼ်ၸီႇယၢင်ႇၶၢၼ်းဝႆႉၸိူဝ်းၼၼ်ႉ ၼၼ်ႉၸိုင်၊ ၵေႃႉဢၼ်ၶဝ်ႈၽၵ်းတူ ၼႃႈတၢင်းႁွင်ႇ ႁႂ်ႈလႆႈၵူဝ်းၵႂၢႆႇၼၼ်ႉ တၵ်းလႆႈဢွၵ်ႇၽၵ်းတူၼႃႈတၢင်းၸၢၼ်းလႄႈ ၵေႃႉဢၼ်ၶဝ်ႈ ၽၵ်းတူ ၼႃႈတၢင်းၸၢၼ်းၼၼ်ႉ တၵ်းလႆႈဢွၵ်ႇၽၵ်းတူၼႃႈတၢင်းႁွင်ႇဢေႃႈ။ မၼ်းဢမ်ႇလႆႈၶိုၼ်းဢွၵ်ႇၽၵ်းတူ ဢၼ်မၼ်းၶဝ်ႈၼၼ်ႉ။ တၵ်းလႆႈဢွၵ်ႇၵႂႃႇသိုဝ်ႈၼႃႈမၼ်းၵမ်းလဵဝ်ဢေႃႈ။-

10ၵေႃႉဢၼ်ပဵၼ်ၶုၼ်ၼၼ်ႉ တၵ်းလႆႈၸွမ်းၵႃႈၼႂ်း ၶိုင်ႈၵၢင်ၵူၼ်းတင်းလၢႆသေလႄႈ ၶဝ်ႈၵႃႈၼႂ်းလႄႈ ဢွၵ်ႇလူၺ်ႈၵၼ်တင်းၶဝ် ဢေႃႈ။-

11ၼႂ်းပွႆးတင်းလၢႆ ဢိၵ်ႇတင်းၼႂ်းတီႈၸူႉတီႈတုမ်ထမ်ႇမႃႉၵၼ်ၸိူဝ်းၼၼ်ႉ၊ ၶိူင်ႈပုၵ်ႈၸေႃႇၽေႃးၸဵၼ်ႇ တၵ်းလႆႈပဵၼ် ၽွင်ၶဝ်ႈမုၼ်း ဢေးၽႃႇ ၼိုင်ႈပုၼ်ႈဝူဝ်းတူဝ်ၼိုင်ႈ၊ ဢေးၽႃႇ ၼိုင်ႈ ပုၼ်ႈသူဝ်းပေႃးတူဝ်ၼိုင်ႈ ဢိၵ်ႇတင်း ၵႃႈဢၼ်မီးဢလူဝ်ႇၼၼ်ႉပုၼ်ႈ သူဝ်းဢွၼ်ႇတင်းလၢႆ တင်းၼမ်ႉမၼ်း ယေႈ ႁီႉၼႃႉ ပုၼ်ႈယေႈ ဢေးၽႃႇ ဢေႃႈ။

12မိူဝ်ႈဢၼ်ၶုၼ်ၼၼ်ႉ ဢဝ်ၶိူင်ႈပုၵ်ႈၸေႃႇ ဢၼ်ၸွမ်းလူၺ်ႈဢလူဝ်ႇတူဝ်ၸဝ်ႈၵဝ်ႇသေလႄႈ ႁဵတ်းဢၼ်ဝႃႈ ယိတ်ႈဢၼ်တုတ်ႇၽႆး၊ ယိတ်ႈမိၵ်ႉသႃႇႁႃယႃႉ ဢၼ်ယူႇဢလူဝ်ႇလူဝ်ႇလႄႈႁဵတ်းၼၼ်ႉ တီႈထႃႇဝရႃႉၽြႃးၼၼ်ႉၸိုင်၊ တၵ်းလႆႈၽုၺ်ႇ ၽၵ်းတူ ဢၼ်ဝၢႆႇၼႃႈၵႂႃႇတၢင်းဢွၵ်ႇၼၼ်ႉ ပုၼ်ႈမၼ်းလႄႈ မၼ်းတၵ်းလႆႈမႄးႁဵတ်းမႄးႁႅၼ်း ယိတ်ႈဢၼ်တုတ်ႇၽႆးမၼ်း၊ ယိတ်ႈမိၵ်ႉသႃႇႁႃယႃႉမၼ်း မိူၼ်ၸိူဝ်ႉၼင်ႇၼႂ်းဝၼ်းၵမ်သိၼ်ၼၼ်ႉဢေႃႈ။ လိုၼ်းၼၼ်ႉမၼ်းတၵ်းလႆႈဢွၵ်ႇၵႂႃႇလႄႈ မၼ်းဢွၵ်ႇၵႂႃႇ သေယဝ်ႉ၊ တၵ်းလႆႈဢိုတ်းၽၵ်းတူဝႆႉဢေႃႈ။

13ၵူႈဝၼ်းၵူႈဝၼ်း၊ မႂ်းတၵ်းလႆႈဢဝ်သူဝ်းဢွၼ်ႇ ဢၼ်ဢမ်ႇပႃးဢပႅတ်ႈလႄႈ ဢမ်ႇပႆႇၶွပ်ႈၶူပ်ႇၼၼ်ႉတူဝ်ၼိုင်ႈ မႄးႁဵတ်းမႄးႁႅၼ်း ပုၼ်ႈယိတ်ႈဢၼ်တုတ်ႇၽႆးတီႈထႃႇဝရႃႉၽြႃးဢေႃႈ။ ၼႂ်ၼိုင်ႈယဝ်ႉၼႂ်ၼိုင်ႈ မႂ်းတၵ်းလႆႈမႄးႁဵတ်းမႄးႁႅၼ်းသေႇသေႇဢေႃႈ။-

14ၼႂ်ၼိုင်ႈယဝ်ႉၼႂ်ၼိုင်ႈ မႂ်းတၵ်းလႆႈပွင်ႁႅၼ်းပွင်မႄး ၶိူင်ႈပုၵ်ႈၸေႃႇၽေႃးၸဵၼ်ႇ ဢၼ်ႁူမ်ႈလူၺ်ႈၵၼ်တင်းသူဝ်းဢွၼ်ႇၼၼ်ႉ ဢၼ်ဝႃႈ ၽွင်ၶဝ်ႈမုၼ်း ဢေးၽႃႇ ႁူၵ်းပုၼ်ႈ ပုၼ်ႈၼိုင်ႈ ဢိၵ်ႇတင်း ၼမ်ႉမၼ်း ႁီႉၼႃႉ သၢမ်ပုၼ်ႈပုၼ်ႈၼိုင်ႈ ႁႂ်ႈလႆႈယမ်းၽွင်ၶဝ်ႈမုၼ်းၼၼ်ႉဢေႃႈ။ ဢၼ်ၼႆႉၸမ်ႉ၊ ပဵၼ်ၶိူင်ႈပုၵ်ႈၸေႃႇၽေႃးၸဵၼ်ႇ ဢၼ်တၵ်းလႆႈႁဵတ်းတီႈထႃႇဝရႃႉၽြႃးယူႇသေႇသေႇ ၸွမ်းၼင်ႇထုင်းၽိင်ႈတြႃးထႃႇဝရႃႉဢေႃႈ။-

15ၼင်ႇၼၼ်လႄႈ ၼႂ်ၼိုင်ႈယဝ်ႉၼႂ်ၼိုင်ႈ ၶဝ်တၵ်းလႆႈပွင်ႁႅၼ်းပွင်မႄးသူဝ်းဢွၼ်ႇၶိူင်ႈပုၵ်ႈၸေႃႇၽေႃးၸဵၼ်ႇ ဢိၵ်ႇတင်းၼမ်ႉမၼ်းပုၼ်ႈဢၼ် တၵ်းပုၵ်ႈၸေႃႇယိတ်ႈ ဢၼ်တုတ်ႇၽႆးယူႇသေႇသေႇဢေႃႈ။

16ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ပေႃးၶုၼ်ၼၼ်ႉ ပၼ်လၢၵ်ႈသွင်ႇသေၸိူဝ်ႉသေပိူင် တီႈလုၵ်ႈၸၢႆးမၼ်းၸိုင်၊ လၢၵ်ႈသွင်ႇၼၼ်ႉ တၵ်းလႆႈပဵၼ်ဢမူၺ်ႇဢုၵ်ႉၸႃႇၶဝ်လႄႈ ပဵၼ်ၶွင်လုၵ်ႈၸၢႆးမၼ်းၸိူဝ်းၼၼ်ႉဢေႃႈ။ တၵ်းလႆႈပဵၼ်တီႈဢၼ်ၶဝ်ၶၢမ်ႇဢမူၺ်ႇလႄႈသိမ်းဢဝ်ဢေႃႈ။-

17ပေႃးမၼ်းပၼ်ဢုၵ်ႉၸႃႇဢမူၺ်ႇ လၢၵ်ႈသွင်ႇသေၸိူဝ်ႉသေပိူင် တီႈၶႃႈမၼ်းၸမ်ႉ၊ ၶႃႈၼၼ်ႉတၵ်းလႆႈပိူင်ႇတေႃႇထိုင်ႁွတ်ႈ သၵ်ႈၵရဵတ်ႈပီႊဢၼ်လွတ်ႈၼၼ်ႉၵူၺ်းဢေႃႈ။ လိုၼ်းၼၼ်ႉ တၵ်းလႆႈၶိုၼ်းႁွတ်ႈထိုင် ၵႃႈၼႂ်းမိုဝ်းၶုၼ်ဢေႃႈ။ ဢမူၺ်ႇမၼ်းၼၼ်ႉၸမ်ႉ၊ လုၵ်ႈၸၢႆးမၼ်းတၵ်းလႆႈၶၢမ်ႇဢဝ်ဢေႃႈ။-

18လိူဝ်သေၼၼ်ႉ ၶုၼ်ၼၼ်ႉဢမ်ႇလႆႈႁဵတ်းပႄႉႁဵတ်းၼႅင်ႇ ဢဝ်လိၼ်ဢမူၺ်ႇၵူၼ်းဝၢၼ်ႈၵူၼ်းမိူင်းလႄႈ ႁေႃႈၸဝ်ႈလိၼ်ၼၼ်ႉ ဢွၵ်ႇပႅတ်ႈသေၵႃႈၼႂ်းတီႈဢၼ်မၼ်းပိူင်ႇၼၼ်ႉ။ မၼ်းတၵ်းလႆႈဢဝ်ၵႃႈၼႂ်းလိၼ်ဢမူၺ်ႇ ဢၼ်မၼ်းပိူင်ႇၼၼ်ႉ ပၼ်ဢမူၺ်ႇ တီႈလုၵ်ႈၸၢႆးမၼ်းတင်းလၢႆ ႁႂ်ႈၵူၼ်းၵဝ်တင်းလၢႆ ဢမ်ႇလႆႈၶၢမ်ႇတၢင်းဢၼ် ၸၢတ်ႇပိုၼ်ပႅတ်ႈသေ ၵႃႈတီႈလိၼ်ဢမူၺ်ႇ ဢၼ်ၶဝ်ပိူင်ႇ ၼၼ်ႉဢေႃႈ။

19လိုၼ်းၼၼ်ႉ ၵေႃႉၼၼ်ႉ ဢဝ်ၵဝ်ၸွမ်းသဵၼ်ႈတၢင်း ႁူးဝၢင်းဢၼ်မီး ၵႃႈတီႈႁိမ်းၽၵ်းတူၼၼ်ႉသေလႄႈ သႂၢင်းၶဝ်ႈၵႃႈၼႂ်းလုၵ်းဢၼ်မူတ်းၸၢင်ႇ ယိတ်ႈပရေႃးႁဵၵ်ႈတင်းလၢႆ ဢၼ်ဝၢႆႇၼႃႈၵႂႃႇၽၢႆႇတၢင်းႁွင်ႇၸိူဝ်းၼၼ်ႉသေယဝ်ႉ၊ ၵဝ်ႁၼ်တီႈဢၼ်မီးၵႃႈတီႈ ၽၢႆႇလင်တၢင်းတူၵ်းၼၼ်ႉ တီႈၼိုင်ႈဢေႃႈ။-

20ၵေႃႉၼၼ်ႉလၢတ်ႈတီႈၵဝ်လႄႈဝႃႈ၊ တီႈၼႆႉၸမ်ႉ၊ ပဵၼ်တီႈဢၼ်ယိတ်ႈပရေႃးႁဵၵ်ႈတင်းလၢႆ တၵ်းလႆႈဢဝ် ယိတ်ႈဢၼ်ၽေႇတူႉၸရိူၵ်ႈ၊ ယိတ်ႈဢၼ်ၽေႇဢပႅတ်ႈ တူမ်ႈလႄႈ ၽဝ်ၶိူင်ႈပုၵ်ႈၸေႃႇၽေႃးၸဵၼ်ႇ ႁႂ်ႈဢမ်ႇလႆႈဢဝ်ၸိူဝ်းၼၼ်ႉ ဢွၵ်ႇၸူးၵႃႈၼႂ်းတမ်ႇတိူင်း ဢၼ်ၵႃႈၼွၵ်ႈ ႁႂ်ႈၵူၼ်းတင်းလၢႆ လႆႈမူတ်းၸၢင်ႇၼၼ်ႉဢေႃႈ၊ ဝႃႈၼင်ႇၼႆဢေႃႈ။

21လႆႈသမ်ႉ ၵေႃႉၼၼ်ႉ ဢဝ်ၵဝ်သႂၢင်းၶဝ်ႈ ၵႃႈၼႂ်းတမ်ႇတိူင်းဢၼ်ၵႃႈၼွၵ်ႈလႄႈ ႁႂ်ႈၵဝ်ပႆလဵပ်ႈၵႂႃႇ ၵႃႈတီႈၸဵင်ႇတမ်ႇတိူင်းသီႇၸဵင်ႇ သေယဝ်ႉ၊ ၵဝ်ႁၼ်တမ်ႇတိူင်းဢွၼ်ႇ မီးၵႃႈတီႈသီႇၸဵင်ႇၸိူဝ်းၼၼ်ႉ ယေႈဢၼ်ၼင်ႇၵၼ်ဢေႃႈ။-

22တမ်ႇတိူင်းဢွၼ်ႇဢၼ်မီး ၵႃႈၼႂ်းသီႇၸဵင်ႇတမ်ႇတိူင်းလူင်ၸိူဝ်းၼၼ်ႉ၊ ၼႃႈယၢဝ်းမီးသီႇသိပ်းသွၵ်ႇ၊ ၼႃႈပွတ်းသၢမ်သိပ်းသွၵ်ႇလႄႈ တၢင်းဢၼ်ၶပ်ႉဢၼ်တႅၵ်ႈသီႇဢၼ် ၵႃႈၼႂ်းၸဵင်ႇၸိူဝ်းၼၼ်ႉ တၢၼ်ႇပဵင်းၵၼ်ဢေႃႈ။-

23ၵႃႈတီႈလဵပ်ႈႁွပ်ႈ တၢင်းၼႂ်းသီႇၸဵင်ႇၸိူဝ်းၼၼ်ႉ၊ မီးထႅဝ်ပုၼ်ႈၽၢႆႇပုၼ်ႉဢၼ် တၵ်းတူမ်ႈတၵ်းႁုင်လႄႈ ၵႃႈတီႈတႂ်ႈထႅဝ်ဢၼ် လဵပ်ႈႁွပ်ႈၸိူဝ်းၼၼ်ႉ ပဵၼ်ၵူင်ပဵၼ်ႁူးဝႆႉဢေႃႈ။-

24ၵေႃႉၼၼ်ႉလၢတ်ႈတီႈၵဝ်လႄႈဝႃႈ၊ ၵႃႈတီႈၸိူဝ်းၼႆႉၸမ်ႉ၊ ပဵၼ်တီႈတူမ်ႈတီႈႁုင် တီႈဢၼ်ၶဝ်ၸိူဝ်းဢၼ်ပႂ်ႉဢမူႉႁိူၼ်းၸဝ်ႈၼၼ်ႉ လႆႈတူမ်ႈတူဝ်ယိတ်ႈ ဢၼ်ၵူၼ်းတင်းလၢႆပုၵ်ႈၸေႃႇ ၸိူဝ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။

← Chapter 45 Jump to: Chapter 47 →