Ezekiel 44 — Shan

1လိုၼ်းၼၼ်ႉ မၼ်းဢဝ်ၵဝ်ၶိုၼ်းမႃး ၸွမ်းသဵၼ်ႈတၢင်းၽၵ်းတူ ဢၼ်ၵႃႈၼွၵ်ႈတီႈထႃႇၼႃႉ တီႈမူတ်းၸၢင်ႇဢၼ်ဝၢႆႇၼႃႈၵႂႃႇ ၽၢႆႇတၢင်းဝၼ်းဢွၵ်ႇ ၼၼ်ႉလႄႈ ၽၵ်းတူၼၼ်ႉ ဢိုတ်းႁပ်းဝႆႉယူႇဢေႃႈ။-

2ထႃႇဝရႃႉၽြႃး မီးဢမိင်ႉတီႈၵဝ်လႄႈဝႃႈ၊ ၽၵ်းတူၼႆႉ တၵ်းလႆႈမီးတၢင်းဢၼ်ဢိုတ်းႁပ်းဝႆႉယူႇလႄႈ ဢမ်ႇလႆႈၽုၺ်ႇလႆႈပိုတ်ႇလႃးလႃး။ ၵူၼ်းဢမ်ႇလႆႈၶဝ်ႈ ၵႃႈၼႂ်းမၼ်းသေၵေႃႉသေၵူၼ်း။ လွင်ႈမၼ်းၸမ်ႉ ၵွပ်ႈပိူဝ်ႈဢၼ် ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ လႆႈၶဝ်ႈၵႃႈၼႂ်းမၼ်းယဝ်ႉလႄႈ တၵ်းလႆႈ မီးတၢင်းဢၼ်ဢိုတ်းႁပ်းဝႆႉဢေႃႈ။-

3ပဵၼ်ပုၼ်ႈၶုၼ်ဢေႃႈ။ ၶုၼ်ၼၼ်ႉ တၵ်းလႆႈ ၼင်ႈၵႃႈၼႂ်းမၼ်း သေလႄႈ ၵိၼ်ၶူပ်းၵႃႈတီႈၽၢႆႇၼႃႈ ထႃႇဝရႃႉၽြႃးဢေႃႈ။ ၶုၼ်ၼၼ်ႉ တၵ်းလႆႈ ၶဝ်ႈၵႃႈၼႂ်းမုၵ်ႈၽၵ်းတူ ၼၼ်ႉလႄႈ ဢွၵ်ႇၵႃႈၼႂ်းမၼ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။

4မိူဝ်ႈၼၼ်ႉ မၼ်းဢဝ်ၵဝ်ၸွမ်းသဵၼ်ႈတၢင်းၽၵ်းတူ တၢင်းႁွင်ႇၵႂႃႇ ၵႃႈတီႈၽၢႆႇၼႃႈႁိူၼ်းၸဝ်ႈလႄႈ ၵဝ်တူၺ်းႁၼ်မုၼ်ၽုင်း ထႃႇဝရႃႉၽြႃး မီးတဵမ်ဝႆႉၵႃႈၼႂ်းႁိူၼ်း ထႃႇဝရႃႉၽြႃး ၼၼ်ႉလႄႈ ၵဝ်ၶုပ်ႉမူပ်ႇယူႇဢေႃႈ။-

5ထႃႇဝရႃႉၽြႃး မီးဢမိင်ႉတီႈၵဝ်လႄႈဝႃႈ၊ လုၵ်ႈၵူၼ်းဢိူၺ်း၊ မၢတ်ႈတွင်းဝႆႉလႄႈ ဢဝ်တႃမႂ်းလူတူၺ်းဝႆႉတႃႉ။ ဢဝ်ႁူမႂ်းထွမ်ႇငိၼ်း ၵႃႈဢၼ်ၵဝ်ဢဝ် လွင်ႈထုင်းၽိင်ႈတြႃး ႁိူၼ်းထႃႇဝရႃႉၽြႃး ၵႃႈမီး ဢိၵ်ႇတင်း ပိင်းၺၢပ်ႈတြႃးမၼ်း ၵႃႈမီးၸိူဝ်းၼၼ်ႉတႃႉ။ မၢတ်ႈတွင်း ႁူးၽၵ်းတူ ဢၼ်ၶဝ်ႈၸူးႁိူၼ်းၸဝ်ႈ ဢိၵ်ႇတင်း ႁူးၽၵ်းတူ ဢၼ်ဢွၵ်ႇသေ ၵႃႈတီႈထႃႇၼႃႉတီႈမူတ်းၸၢင်ႇၵႃႈမီးၼၼ်ႉဝႆႉတႃႉ။-

6မႂ်းတၵ်းလႆႈလၢတ်ႈဝႆႉ တီႈၵူၼ်းမဵဝ်း ဢီႉသရေႇလႃႉ ဢၼ်ၸၢင်ႈပုင်ႇၵၢၼ်ႇ ၸိူဝ်းၼၼ်ႉလႄႈဝႃႈ၊ ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၵူၼ်းမဵဝ်း ဢီႉသရေႇလႃႉ ၶဝ်ဢိူၺ်း၊-

7သူဢွၼ်ၵၼ် မီးတၢင်းဢၼ် ပေႇၸႂ်ဢိမ်ႇၸႂ် လွင်ႈတၢင်းဢၼ် လီႁင်ႈဢဵတ်ႇသဵတ်ႇသူၵႃႈမီး ဢၼ်ဝႃႈ ၼႂ်းလွင်ႈဢၼ်သူဢဝ် ၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်ႁူဝ်ၸႂ်ဢမ်ႇၶၢမ်ႇတၢင်းဢၼ်ထိူဝ်ႁိမ်း၊ ဢၼ်ၼိူဝ်ႉၼင်ၶဝ်ဢမ်ႇၶၢမ်ႇတၢင်းဢၼ်ထိူဝ်ႁိမ်း ၸိူဝ်းၼၼ်ႉ သႂၢင်းၶဝ်ႈ ၵႃႈၼႂ်းထႃႇၼႃႉ တီႈမူတ်းၸၢင်ႇၵဝ်သေလႄႈ ၶျႃးတီႈယူႇပၼ်ႁႂ်ႈလႆႈ ႁႂ်ႈႁိူၼ်းၵဝ်ၵူဝ်ႈၵိူၵ်ႇ ၼႂ်းမိူဝ်ႈဢၼ် သူပုၵ်ႈၸေႃႇၽေႃးၸဵၼ်ႇၵဝ် ဢၼ်ဝႃႈ ၵွၼ်ႈၶႆၵွၼ်ႈမၼ်း ဢိၵ်ႇတင်း လိူတ်ႈၼၼ်ႉတႃႉ။ လိူဝ်သေလွင်ႈတၢင်းဢၼ် လီႁင်ႈဢဵတ်ႇသဵတ်ႇသူၸိူဝ်းၼၼ်ႉလႄႈ ၶဝ်ၼၼ်ႉ ဢွၼ်ၵၼ် ယႃႉပတီႉၺိၺ်ႇၵဝ်ပႅတ်ႈထႅင်ႈယဝ်ႉ။-

8သူဢမ်ႇပႂ်ႉၶိူင်ႈပိူင် ဢၼ်မူတ်းၸၢင်ႇၵဝ် တင်းလၢႆ။ သူဢွၼ်ၵၼ် ၸွမ်းလူၺ်ႈဢလူဝ်ႇသူ သေလႄႈ ၶၢၼ်းၶဝ်ၸိူဝ်းဢၼ် ပႂ်ႉၵႃႈတီႈထႃႇၼႃႉ တီႈမူတ်းၸၢင်ႇၵဝ်ၼၼ်ႉ ဝႆႉယဝ်ႉ။-

9ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်ႁူဝ်ၸႂ်ဢမ်ႇၶၢမ်ႇတၢင်းဢၼ်ထိူဝ်ႁိမ်း ဢၼ်ၼိူဝ်ႉၼင် ဢမ်ႇၶၢမ်ႇတၢင်းဢၼ်ထိူဝ်ႁိမ်း ဢၼ်ပဵၼ်ၵူၼ်း တၢင်ႇၸိူဝ်ႉတၢင်ႇၶိူဝ်းလႄႈ ယူႇၵႃႈၼႂ်းၵူၼ်း မဵဝ်း ဢီႉသရေႇလႃႉ တင်းလၢႆၼၼ်ႉ ဢမ်ႇလႆႈၶဝ်ႈၵႃႈၼႂ်းထႃႇၼႃႉ တီႈမူတ်းၸၢင်ႇၵဝ်။

10ၵူၼ်း လေႇဝီႉ ဢၼ်ၽၢတ်ႇယၢၼ်ၵဝ်ၵႂႃႇ ၵႆၼႃႇလူင်လၢင် ၼႂ်းမိူဝ်ႈဢၼ် မဵဝ်း ဢီႉသရေႇလႃႉ ၽိတ်းတၢင်းပိူင်ႈတၢင်းၵႂႃႇ ၼၼ်ႉလႄႈ ဢွၵ်ႇသေ ၵႃႈတီႈၵဝ်ၽိတ်းတၢင်းၵႂႃႇ သေလႄႈ ၸွမ်းလင်ရုၵ်ႈထူႉသၢင်းထူႉၶဝ်ၵႂႃႇယူႇၼၼ်ႉ ၸိူဝ်းၼၼ်ႉၵေႃႈ တၵ်းလႆႈၶၢမ်ႇဢပႅတ်ႈ တူဝ်ၸဝ်ႈၵဝ်ႇဢေႃႈ။-

11ၼႂ်းဝႃႈၼၼ်သေၵေႃႈ ၶဝ်တၵ်း လႆႈပဵၼ်ၵူၼ်းပႂ်ႉဢမူႉ ၵႃႈၼႂ်းထႃႇၼႃႉတီႈမူတ်းၸၢင်ႇၵဝ်လႄႈ ပႂ်ႉၽၵ်းတူႁိူၼ်းၸဝ်ႈတင်းလၢႆယူႇ၊ ၵိုတ်ႉႁၢပ်ႇဢမူႉၸဝ်ႈ ၵႃႈၼႂ်းႁိူၼ်းၸဝ်ႈယူႇဢေႃႈ။ ၶဝ်တၵ်းလႆႈဢွၼ်ၵၼ်ဢဝ် ယိတ်ႈဢၼ်တုတ်ႇၽႆး ဢိၵ်ႇတင်း တူဝ်ယိတ်ႈဢၼ် ပုၵ်ႈၸေႃႇပုၼ်ႈၵူၼ်း တင်းလၢႆ ၸိူဝ်းၼၼ်ႉ တၢႆလႄႈ ၸုၵ်းယူႇၵႃႈတီႈၽၢႆႇၼႃႈၵူၼ်း တင်းလၢႆ ႁႂ်ႈလႆႈၵိုတ်ႉႁၢပ်ႇဢမူႉၸဝ်ႈ ပုၼ်ႈၶဝ်ဢေႃႈ။-

12ၵွပ်ႈပိူဝ်ႈဢၼ် ၶဝ်ၵိုတ်ႉႁၢပ်ႇဢမူႉၵူၼ်း တင်းလၢႆ ၵႃႈတီႈၽၢႆႇၼႃႈရုၵ်ႈထူႉၶဝ်လႄႈ ယၢမ်ႈလႆႈပဵၼ်လွင်ႈဢၼ် မဵဝ်း ဢီႉသရေႇလႃႉ တိူဝ်ႉမႅၼ်ႈလႄႈလူမ်ႉသႂ်ႇ ၵႃႈၼႂ်းတူႉၸရိူၵ်ႈၼၼ်ႉလႄႈ၊ ၵဝ်ယဵတ်ႇယိုၼ်ႈမိုဝ်းၵဝ်ယူႇၽၢႆႇၼိုင်ႈတင်းၶဝ်ဢေႃႈ။ ၶဝ်ၼၼ်ႉ တၵ်းလႆႈဢွၼ်ၵၼ်ၶၢမ်ႇဢပႅတ်ႈ တူဝ်ၸဝ်ႈၵဝ်ႇဢေႃႈ၊ ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉဢေႃႈ။-

13ၶဝ်ဢမ်ႇလႆႈဢွၼ်ၵၼ် သုတ်ႉၸပ်းသုတ်ႉၸူးတီႈၵဝ် ႁႂ်ႈလႆႈႁဵတ်းယိတ်ႈပရေႃးႁဵၵ်ႈ။ ၶဝ်ဢမ်ႇလႆႈဢွၼ်ၵၼ် သုတ်ႉၸပ်းသုတ်ႉၸူး ၶိူင်ႈပိူင်ဢၼ်မူတ်းၸၢင်ႇ တင်းလၢႆ ၵႃႈတီႈထႃႇၼႃႉတီႈမူတ်းၸၢင်ႇၼႃႇသေပိူၼ်ႈၼၼ်ႉ။ ၶဝ်တၵ်းလႆႈဢွၼ်ၵၼ် ၶၢမ်ႇတၢင်းဢၼ်တူဝ်ၸဝ်ႈၵဝ်ႇသရေႇလူႉ၊ လွင်ႈတၢင်းဢၼ် လီႁင်ႈဢဵတ်ႇသဵတ်ႇ ဢၼ်တူဝ်ၸဝ်ႈၵဝ်ႇႁဵတ်း ၸိူဝ်းၼၼ်ႉဢေႃႈ။-

14ၵူၺ်းၵႃႈ ၵဝ်တၵ်းၶၢၼ်းၶဝ်ဝႆႉ ႁႂ်ႈၶဝ်လႆႈပႂ်ႉႁိူၼ်းၸဝ်ႈ ဢိၵ်ႇတင်း ဢမူႉမၼ်းၵႃႈမီး တင်းလွင်ႈတၢင်းဢၼ် တၵ်းလႆႈၵိုတ်ႉႁၢပ်ႇ ၵႃႈၼႂ်းမၼ်းၵႃႈမီးၼၼ်ႉဢေႃႈ။

15ယိတ်ႈပရေႃးႁဵၵ်ႈ လုၵ်ႈလၢၼ် ၸႃႇတုၵ်ႉ ၊ မဵဝ်း လေႇဝီႉ ဢၼ်ပႂ်ႉထႃႇၼႃႉတီႈမူတ်းၸၢင်ႇၵဝ် ၼႂ်းမိူဝ်ႈဢၼ် ၵူၼ်းမဵဝ်း ဢီႉသရေႇလႃႉ တင်းလၢႆ ဢွၵ်ႇသေ ၵႃႈၼႂ်းတီႈၵဝ်ၽိတ်းတၢင်းပိူင်ႈတၢင်းၵႂႃႇၼၼ်ႉ ၸိူဝ်းၼၼ်ႉ တၵ်းလႆႈဢွၼ်ၵၼ် သုတ်ႉၸပ်းသုတ်ႉၸူး ၵႃႈတီႈၵဝ်ႁႂ်ႈလႆႈၵိုတ်ႉႁၢပ်ႇဢမူႉၸဝ်ႈဢေႃႈ။ ၶဝ်တၵ်းလႆႈဢွၼ်ၵၼ်ၸုၵ်းယူႇ ၵႃႈတီႈၽၢႆႇၼႃႈၵဝ် ႁႂ်ႈလႆႈပုၵ်ႈၸေႃႇ ၵွၼ်ႈၶႆၵွၼ်ႈမၼ်း ဢိၵ်ႇတင်း လိူတ်ႈၸိူဝ်းၼၼ်ႉတီႈၵဝ်ဢေႃႈ၊ ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉဢေႃႈ။-

16ၶဝ်ၼၼ်ႉ တၵ်းလႆႈဢွၼ်ၵၼ်ၶဝ်ႈၵႃႈၼႂ်းထႃႇၼႃႉတီႈမူတ်းၸၢင်ႇၵဝ်လႄႈ သုတ်ႉၸပ်းသုတ်ႉၸူး ၵႃႈတီႈႁိမ်းၶူင်ႇတီႈၵိၼ်ၵဝ် ႁႂ်ႈလႆႈ ပွင်ႁဵတ်းဢမူႉၵဝ်လႄႈ ပဵၼ်ၵေႃႉဢၼ်ပႂ်ႉဢမူႉၵဝ်ဢေႃႈ။-

17မိူဝ်ႈဢၼ်ၶဝ် ၶဝ်ႈၵႃႈၼႂ်းၽၵ်းတူတမ်ႇတိူင်း ဢၼ်ၵႃႈၼႂ်းၼၼ်ႉၸိုင်၊ ၶဝ်တၵ်းလႆႈဢွၼ်ၵၼ်ၼုင်ႈၶူဝ်းၼုင်ႈပိၵ်ႈၶျေႃးၵူၺ်း ဢေႃႈ။ ၼႂ်းမိူဝ်ႈဢၼ်ၶဝ်ယင်းတိုၵ်ႉၵိုတ်ႉႁၢပ်ႇဢမူႉၸဝ်ႈ ၵႃႈၼႂ်းၽၵ်းတူတမ်ႇတိူင်းဢၼ်ၵႃႈၼႂ်း ဢိၵ်ႇတင်း ၵႃႈတီႈၼႂ်းၼၼ်ႉ ယူႇၼၼ်ႉ၊ ၶဝ်ဢမ်ႇလႆႈဢွၼ်ၵၼ် ၼုင်ႈၶူဝ်းၼုင်ႈၶူၼ်သူဝ်း။-

18ၶဝ်တၵ်းလႆႈဢွၼ်ၵၼ်တိုဝ်းမွၵ်ႇႁူဝ်ပိၵ်ႈၶျေႃး ၵႃႈၼိူဝ်ႁူဝ်ၶဝ် သေလႄႈ ၼုင်ႈၵူၼ်ပိၵ်ႈၶျေႃး ၵႃႈတီႈဢႅဝ်ၶဝ်ဢေႃႈ။ ၶဝ်ဢမ်ႇလႆႈဢွၼ်ၵၼ်ၼုင်ႈၶူဝ်းၼုင်ႈ ဢၼ်ၸၢင်ႈႁႂ်ႈႁိူဝ်ႇဢွၵ်ႇၼၼ်ႉ။-

19မိူဝ်ႈဢၼ် ၶဝ်ဢွၵ်ႇၸူးၵႃႈတီႈတမ်ႇတိူင်းဢၼ်ၵႃႈၼွၵ်ႈဢၼ်ဝႃႈ တမ်ႇတိူင်းဢၼ်ၵႃႈၼွၵ်ႈ တီႈဢၼ်ၵူၼ်းတင်းလၢႆမီးၼၼ်ႉၸိုင်၊ ၶဝ်တၵ်းလႆႈဢွၼ်ၵၼ်ထွတ်ႇၶူဝ်းၼုင်ႈ ဢၼ်ၼုင်ႈၼႂ်းမိူဝ်ႈဢၼ် ၶဝ်ယင်းတိုၵ်ႉ ပွင်ႁဵတ်းဢမူႉၸဝ်ႈယူႇၼၼ်ႉလႄႈ ဢဝ်ဝႆႉၵႃႈၼႂ်းလုၵ်း ဢၼ်မူတ်းၸၢင်ႇၸိူဝ်းၼၼ်ႉ သေယဝ်ႉ၊ ၼုင်ႈၶူဝ်းၼုင်ႈ တၢင်ႇၸိူဝ်ႉတၢင်ႇဢၼ် ႁႂ်ႈၵူၼ်း တင်းလၢႆ ဢမ်ႇလႆႈမူတ်းၸၢင်ႇ ၵွပ်ႈပိူဝ်ႈၶူဝ်းၼုင်ႈ ဢၼ်ဢွၼ်တၢင်းၼၼ်ႉဢေႃႈ။-

20ၶူၼ်ႁူဝ်ၶဝ်ၵေႃႈ ဢမ်ႇလႆႈထႃ။ ဢမ်ႇလႆႈႁႂ်ႈၶူၼ်ႁူဝ်ယၢဝ်း။ တၵ်းလႆႈႁဵတ်း တၢင်းဢၼ်ၵႅတ်းႁႆးပႅတ်ႈၵူၺ်းဢေႃႈ။-

21ယိတ်ႈပရေႃးႁဵၵ်ႈ ဢမ်ႇလႆႈသူတ်ႉလႆႈၵိၼ်ၼမ်ႉၸပိတ်ႈ ၼႂ်းမိူဝ်ႈဢၼ် ၶဝ်ႈၵႃႈၼႂ်းတမ်ႇတိူင်း ဢၼ်ၵႃႈၼႂ်းၼၼ်ႉ။-

22ၶဝ်ဢမ်ႇလႆႈပဵၼ်ၵူပ်ႉပဵၼ်ၵူႈ လူၺ်ႈၵၼ် တင်းမႄႈမူၵ်းမႄႈမၢႆႈ။ ဢမ်ႇလႆႈပဵၼ်ၵူပ်ႉပဵၼ်ၵူႈ လူၺ်ႈၵၼ် တင်းမႄႈယိင်းဢၼ်ၽူဝ်ပႅတ်ႈၼၼ်ႉ။ ၶဝ်တၵ်းႁူမ်ႈပွင်း ပဵၼ်ၵူပ်ႉပဵၼ်ၵူႈ လူၺ်ႈၵၼ် တင်းၵၼ်ႇၺႃႇလုၵ်ႈယိင်းသၢဝ် မဵဝ်း ဢီႉသရေႇလႃႉ ၊ ဢမ်ႇၼၼ် တင်းမႄႈမူၵ်းမႄႈမၢႆႈ ဢၼ်ယၢမ်ႈလႆႈပဵၼ်မေး ယိတ်ႈပရေႃးႁဵၵ်ႈၼၼ်ႉၵူၺ်းဢေႃႈ။-

23တၵ်းလႆႈဢွၼ်ၵၼ်သင်ႇသွၼ်ပၼ် ႁႂ်ႈၵူၼ်းၵဝ် တင်းလၢႆ ၸၵ်းၽႄလွင်ႈတၢင်းဢၼ်မူတ်းၸၢင်ႇလႂ် တင်းလွင်ႈတၢင်းဢၼ်ဢမ်ႇမူတ်းၸၢင်ႇလႂ် ဢိၵ်ႇတင်း ႁႂ်ႈၶဝ်ႁူႉလွင်ႈတၢင်းဢၼ် မူတ်းသႂ်လႂ် တင်းလွင်ႈတၢင်းဢၼ်ဢမ်ႇမူတ်းသႂ်လႂ်ဢေႃႈ။-

24ၼႂ်းတၢင်းဢၼ် ပိူၼ်ႈထူပ်းတြႃးၵၼ် ၼၼ်ႉၸိုင်၊ ၶဝ်တၵ်းလႆႈၸုၵ်းယူႇ သေလႄႈ ၸီႇယၢင်ႇဢေႃႈ။ ၶဝ်တၵ်းလႆႈဢွၼ်ၵၼ်ၸီႇယၢင်ႇ ၸွမ်းၼင်ႇ ထမ်ႇမသၢတ်ႈၵဝ်ဢေႃႈ။ ပေႃးၵိုတ်ႉႁၢပ်ႇပွႆးထမ်ႇမႃႉပွႆးၵဝ်ၸိုင်၊ ၶဝ်တၵ်းလႆႈဢွၼ်ၵၼ် ပႂ်ႉၵမ်ပႂ်ႉၸွမ်းတြႃး ဢၼ်ၵဝ်ၸီႇယၢင်ႇဝႆႉ ဢိၵ်ႇတင်း ထုင်းၽိင်ႈတြႃးၵဝ် ၸိူဝ်းၼၼ်ႉလႄႈ ႁႂ်ႈဝၼ်းၵမ်သိၼ်ၵဝ် တင်းလၢႆ မူတ်းၸၢင်ႇဢေႃႈ။-

25ၶဝ်ဢမ်ႇလႆႈ သုတ်ႉၸပ်းသုတ်ႉၸူး တူဝ်တၢႆလႄႈ ႁႂ်ႈတူဝ်ၸဝ်ႈၵဝ်ႇၵူဝ်ႈၵိူၵ်ႇ။ ၵူၺ်းၵႃႈ မီးဢၶႂၢင်ႉဢၼ် ႁႂ်ႈတူဝ်ၸဝ်ႈၵဝ်ႇၵူဝ်ႈၵိူၵ်ႇ ၵွပ်ႈပိူဝ်ႈ ပေႃႈမႄႈတူဝ်ၸဝ်ႈၵဝ်ႇ၊ လုၵ်ႈၸၢႆးလုၵ်ႈယိင်း တူဝ်ၸဝ်ႈၵဝ်ႇ၊ ပီႈၼၢင်း ၼွင်ႉယိင်း တူဝ်ၸဝ်ႈၵဝ်ႇ ဢၼ်ဢမ်ႇပႆႇမီးၽူဝ်ၼၼ်ႉ ၵူၺ်းဢေႃႈ။-

26မၼ်းႁဵတ်း တၢင်းဢၼ်မူတ်းသႂ်သေယဝ်ႉ၊ တၵ်းလႆႈယူႇၸဵတ်းဝၼ်းဢေႃႈ။-

27ၼႂ်းဝၼ်းဢၼ်မၼ်းၶဝ်ႈၵႃႈၼႂ်း ထႃႇၼႃႉတီႈမူတ်းၸၢင်ႇတမ်ႇတိူင်း ဢၼ်ၵႃႈၼႂ်းႁႂ်ႈလႆႈ ၵိုတ်ႉႁၢပ်ႇဢမူႉၸဝ်ႈ ၵႃႈၼႂ်းထႃႇၼႃႉတီႈ မူတ်းၸၢင်ႇၼၼ်ႉ မၼ်းတၵ်းလႆႈပုၵ်ႈၸေႃႇ ယိတ်ႈဢၼ်ၽေႇဢပႅတ်ႈမၼ်းဢေႃႈ၊ ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉဢေႃႈ။-

28လွင်ႈတၢင်းၼၼ်ႉ တၵ်းလႆႈပဵၼ် ဢမူၺ်ႇဢုၵ်ႉၸႃႇၶဝ်ဢေႃႈ။ ၵဝ်ၼႆႉပဵၼ် ဢမူၺ်ႇဢုၵ်ႉၸႃႇၶဝ်ဢေႃႈ။ သူဢမ်ႇလႆႈပၼ် လိၼ်ဢမူၺ်ႇတီႈၶဝ် ၵႃႈၼႂ်းမိူင်း ဢီႉသရေႇလႃႉ ။ ၵဝ်ပဵၼ်ဢမူၺ်ႇၶဝ်ဢေႃႈ။-

29ၶဝ်တၵ်းလႆႈဢွၼ်ၵၼ်ၵိၼ် ၶိူင်ႈပုၵ်ႈၸေႃႇၽေႃးၸဵၼ်ႇ။ ယိတ်ႈဢၼ်ၽေႇဢပႅတ်ႈ ဢိၵ်ႇတင်း ယိတ်ႈဢၼ်ၽေႇတူႉၸရိူၵ်ႈ ဢေႃႈ။ ၵႃႈဢၼ်ၵူၼ်း မဵဝ်း ဢီႉသရေႇလႃႉ ၵိၼ်ႇဝႃႈလႄႈ ပုၵ်ႈၸေႃႇၼၼ်ႉၵေႃႈ တၵ်းလႆႈ ပဵၼ်ၶွင်ၶဝ်ဢေႃႈ။-

30မၢၵ်ႇဢၼ် မၢၵ်ႇဢွၼ်တၢင်းသုတ်း ၼႂ်းမၢၵ်ႇဢၼ်မၢၵ်ႇဢွၼ်တၢင်းပိူၼ်ႈ ၵူႈၸိူဝ်ႉၵူႈပိူင် ဢိၵ်ႇတင်း ၶိူင်ႈပုၵ်ႈၸေႃႇ ဢၼ်ယုၵ်ႉယွင်ႈ ၵႃႈဢၼ်ပႃးၵႃႈၼႂ်းၶိူင်ႈပုၵ်ႈၸေႃႇ ဢၼ်ယုၵ်ႉယွင်ႈ ၵူႈၸိူဝ်ႉၵူႈပိူင်ၼၼ်ႉ တၵ်းလႆႈပဵၼ်ပုၼ်ႈ ယိတ်ႈပရေႃးႁဵၵ်ႈတင်းလၢႆဢေႃႈ။ သူတၵ်းလႆႈဢဝ် ၶဝ်ႈမုၼ်းလိပ်း ဢၼ်ၼူတ်ႈဢွၼ်တၢင်းပိူၼ်ႈၼၼ်ႉ လူႇတၢၼ်းတီႈ ယိတ်ႈပရေႃးႁဵၵ်ႈ ႁႂ်ႈမၼ်းလႆႈ ႁႂ်ႈတၢင်းလီမင်ႇၵလႃႇ တူၵ်းႁွတ်ႈၵႃႈၼိူဝ်ႁိူၼ်းမႂ်းဢေႃႈ။-

31ပဵၼ်ၼူၵ်ႉသေဢမ်ႇဝႃႈ၊ ပဵၼ်တူဝ်သေဢမ်ႇဝႃႈ၊ တူဝ်ဢၼ်တၢႆၵူၺ်းမၼ်း၊ တူဝ်ဢၼ်တူဝ်ႁၢႆႉၶူပ်းလႄႈ တၢႆၼၼ်ႉၸိုင်၊ ယိတ်ႈပရေႃးႁဵၵ်ႈဢမ်ႇလႆႈၵိၼ်။