Ezekiel 20 — Shan

1ၼႂ်းပီႊဢၼ် ထူၼ်ႈထိုင်ၸဵတ်းပီႊ၊ လိူၼ်ပိၼ်ႇၸမႃႉသိပ်းဝၼ်းၼၼ်ႉ ၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ် ၼႂ်းမဵဝ်း ဢီႉသရေႇလႃႉ ၵမ်ႈၽွင်ႈၼၼ်ႉ ဢွၼ်ၵၼ်မႃး ႁႂ်ႈလႆႈလဝ်ႊထၢမ်တီႈ ထႃႇဝရႃႉၽြႃးလႄႈ ၼင်ႈယူႇၵႃႈတီႈၽၢႆႇၼႃႈၵဝ်ဢေႃႈ။-

2ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃးတီႈၵဝ်လႄႈဝႃႈၸမ်ႉ၊-

3လုၵ်ႈၵူၼ်းဢိူၺ်း၊ မႂ်းလၢတ်ႈတီႈၶဝ်ၸိူဝ်းဢၼ် ပဵၼ်ၵႄႇပဵၼ်ႁူဝ်ၼႂ်း မဵဝ်း ဢီႉသရေႇလႃႉ ၼၼ်ႉလႄႈဝႃႈ၊ ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ သူဢွၼ်ၵၼ်မႃးႁႂ်ႈလႆႈလဝ်ႊထၢမ်တီႈၵဝ်ႁိုဝ်။ ၵႃႈၼင်ႇဢၼ်ၵဝ်ဢသၢၵ်ႈလိပ်းယူႇၼၼ်ႉ၊ ၵဝ်ဢမ်ႇၶၢမ်ႇတၢင်းဢၼ် သူလဝ်ႊသူထၢမ်။-

4ၵူၼ်းဢိူၺ်း၊ မႂ်းတၵ်းဢမ်ႇၸႅတ်ႈထၢမ်ၸႅတ်ႈတူၺ်းၶဝ်ႁိုဝ်။ မႂ်းတၵ်းဢမ်ႇၸႅတ်ႈထၢမ်ၸႅတ်ႈတူၺ်းၶဝ်ႁိုဝ်။ ၽုၺ်ႇဢွၵ်ႇၼႄပျႃး လွင်ႈတၢင်းဢၼ် လီႁင်ႈဢဵတ်ႇသဵတ်ႇ ဢၼ်ပူႇၶဝ်မွၼ်ႇၶဝ်ႁဵတ်းမႃးယဝ်ႉၼၼ်ႉလႄႈ၊-

5လၢတ်ႈတီႈၶဝ်လႄႈဝႃႈ၊ ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၼႂ်းမိုဝ်ႉဝၼ်းဢၼ် ၵဝ်လိူၵ်ႈၵဵပ်းဢဝ် မဵဝ်း ဢီႉသရေႇလႃႉ လႄႈ ယုၵ်ႉမိုဝ်းတိူင်ႇဝႃႈတီႈမဵဝ်း ယႃႇၵုပ်ႈ သေလႄႈ ပေႃႇမႃးတီႈၶဝ် ၵႃႈၼႂ်းမိူင်း ဢေႇၵိပ်ႉတူႉ ၼႂ်းမိူဝ်ႈဢၼ်ၵဝ်ယုၵ်ႉမိုဝ်းတိူင်ႇဝႃႈ တီႈၶဝ် လႄႈဝႃႈ၊ ၵဝ်ပဵၼ် ထႃႇဝရႃႉၽြႃး ၽြႃးပဵၼ်ၸဝ်ႈသူဢေႃႈ၊ ဝႃႈၼင်ႇၼႆၼၼ်ႉ၊-

6ၼႂ်းမိုဝ်ႉဝၼ်းၼၼ်ႉ ၵဝ်ယုၵ်ႉမိုဝ်းတိူင်ႇဝႃႈတီႈၶဝ် ႁႂ်ႈလႆႈၼုၵ်ႈဢဝ်ၶဝ် ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ လႄႈ ဢဝ်ၶဝ်ၵႂႃႇ ၵႃႈတီႈမိူင်းဢၼ်ၵဝ်ႁၼ်ဝႆႉပုၼ်ႈၶဝ်၊ မိူင်းဢၼ်ၼမ်ႉၼူမ်း တင်းၼမ်ႉၽိုင်ႈၸၢင်ႈလႆယူႇ၊ မိူင်းဢၼ်ပဵၼ်ၸိၵ်းပဵၼ်ၸွမ် ဝၢၼ်ႈမိူင်း တင်းသဵင်ႈတင်းလူင် ၼၼ်ႉဢေႃႈ။-

7ပိၵ်ႉသမ်ႉၵဝ် လၢတ်ႈတီႈၶဝ်လႄႈဝႃႈ၊ သူဢွၼ်ၵၼ် ၸုၼ်ႉပႅတ်ႈလွင်ႈတၢင်း ဢၼ်လီႁင်ႈဢဵတ်ႇသဵတ်ႇ တီႈမၢၵ်ႇတႃသူၸိူဝ်းၼၼ်ႉ ႁင်းၽႂ်ႁင်းမၼ်းတႃႉ။ ယႃႇပေဢဝ်ရုၵ်ႈထူႉမိူင်း ဢေႇၵိပ်ႉတူႉ ၸိူဝ်းၼၼ်ႉ ႁႂ်ႈတူဝ်သူလႆႈၵူဝ်ႈလႆႈၵိူၵ်ႇ။ ၵဝ်ပဵၼ် ထႃႇဝရႃႉၽြႃး ၽြႃးပဵၼ်ၸဝ်ႈသူဢေႃႈ၊ ဝႃႈၼင်ႇၼႆသေၵေႃႈ၊-

8ၶဝ်ဢွၼ်ၵၼ် ပုင်ႇၵၢၼ်ႇၵဝ်လႄႈ ဢမ်ႇထွမ်ႇဢမ်ႇဢဝ်ၵႂၢမ်းၵဝ်။ ၶဝ်ယင်းဢမ်ႇၸုၼ်ႉပႅတ်ႈလွင်ႈတၢင်း ဢၼ်လီႁင်ႈဢဵတ်ႇသဵတ်ႇ တီႈမၢၵ်ႇတႃၶဝ်ၸိူဝ်းၼၼ်ႉ ႁင်းၽႂ်ႁင်းမၼ်းလႄႈ ယင်းဢမ်ႇဝႄႈပႅတ်ႈရုၵ်ႈထူႉ ဢေႇၵိပ်ႉတူႉ ၸိူဝ်းၼၼ်ႉလႄႈ ဢွၼ်ၵၼ်ယူႇဢေႃႈ။ ပိူဝ်ႈဢၼ်ပဵၼ်ၼင်ႇၼၼ်လႄႈ ၵဝ်ၵျၢမ်ႇပွင်တၵ်းဢဝ်ဢၢႆႁႅင်းတၢင်းၸႂ်မႆႈၶႆႈၸႃႉၵဝ် သွၼ်းလေႃႇၵႃႈၼိူဝ်ၶဝ် ႁႂ်ႈၸႂ်တေႃးသႃႉၵဝ်လႆႈပေႇ တီႈၶဝ် ၵႃႈၼႂ်းမိူင်း ဢေႇၵိပ်ႉတူႉ ၼၼ်ႉဢေႃႈ။-

9ၼႂ်းဝႃႈၼၼ်သေၵေႃႈ ၵဝ်ၸီႇယၢင်ႇ ႁဵတ်းပုၼ်ႈၼႃႇမႃႉၸိုဝ်ႈသဵင်ၵဝ် ႁႂ်ႈသရေႇဢမ်ႇလႆႈလူႉ ၵႃႈတီႈၽၢႆႇၼႃႈၵူၼ်းတၢင်ႇၸိူဝ်ႉ တၢင်ႇမဵဝ်း တီႈဢၼ်ၶဝ်ယူႇၶဝ်သဝ်းလႄႈ ၵဝ်ထၢင်ႇသႃးပေႃႇမႃး ၵႃႈတီႈၽၢႆႇၼႃႈၵူၼ်း တၢင်ႇၸိူဝ်ႉတၢင်ႇမဵဝ်းယူႇ သေလႄႈ ၼုၵ်ႈဢဝ်ၶဝ်ဢွၵ်ႇသေ ၵႃႈၼႂ်းမိူင်း ဢေႇၵိပ်ႉတူႉ မႃးၼၼ်ႉဢေႃႈ။-

10ၼင်ႇၼၼ်လႄႈ ၵဝ်ႁႂ်ႈၶဝ်ဢွၵ်ႇသေ ၵႃႈၼႂ်းမိူင်း ဢေႇၵိပ်ႉတူႉ လႄႈ ဢဝ်ၶဝ်သူင်ႇႁွတ်ႈ ၵႃႈတီႈၼႂ်းထိူၼ်ႇသေယဝ်ႉ၊-

11ၵဝ်ပၼ် ထုင်းၽိင်ႈတြႃးၵဝ် တင်းလၢႆ တီႈၶဝ်လႄႈ ၽုၺ်ႇဢွၵ်ႇၼႄပျႃး လွင်ႈတၢင်းဢၼ်ၵဝ်ၸီႇယၢင်ႇဝႆႉ ဢၼ်ပဵၼ်လွင်ႈဢၼ်ဢသၢၵ်ႈ ၵေႃႉဢၼ်ၵမ်ၵျၢင်ႉၼၼ်ႉ တၵ်းလႆႈလိပ်းၼၼ်ႉ ၸိူဝ်းၼၼ်ႉဢေႃႈ။-

12လိူဝ်သေၼၼ်ႉ ၵဝ်ပၼ်ဝၼ်းၵမ်သိၼ်ၵဝ် တင်းလၢႆ ဝႆႉတီႈၶဝ်ႁႂ်ႈပဵၼ်လၢၵ်ႈၶၼႃႇသၢၵ်ႈသေႇ ၵႃႈတီႈၵႄႈဝူင်ႈၵၢင်ႁဝ်းတင်းၶဝ်ႁႂ်ႈၶဝ်လႆႈႁူႉ လွင်ႈဢၼ်ၵဝ် ထႃႇဝရႃႉၽြႃး ႁႂ်ႈၶဝ်မူတ်းၸၢင်ႇ ၼၼ်ႉဢေႃႈ။-

13ၼႂ်းဝႃႈၼၼ်သေၵေႃႈ မဵဝ်း ဢီႉသရေႇလႃႉ ပုင်ႇၵၢၼ်ႇၵဝ်ၵႃႈၼႂ်းထိူၼ်ႇလႄႈ ဢမ်ႇၸွမ်းသဵၼ်ႈတၢင်းထုင်းၽိင်ႈတြႃးၵဝ် တင်းလၢႆၼၼ်ႉ။ ၶဝ်ဢွၼ်ၵၼ် ႁဵတ်းဢမ်ႇပေႃးၼင်ႇႁိုဝ် တီႈလွင်ႈတၢင်းဢၼ်ၵဝ်ၸီႇယၢင်ႇဝႆႉ ဢၼ်ပဵၼ်လွင်ႈဢၼ် ဢသၢၵ်ႈ ၵေႃႉဢၼ်ၵမ်ၵျၢင်ႉၼၼ်ႉ တၵ်းလႆႈလိပ်းၼၼ်ႉလႄႈ ၶျႃးဝၼ်းၵမ်သိၼ်ၵဝ်တင်းလၢႆ တူၵ်းတီႈတႅမ်ႇၼႃႇလူင်လၢင်ဢေႃႈ။ မိူဝ်ႈၼၼ်ႉ ၵဝ်ၵျၢမ်ႇပွင် တၵ်းဢဝ်ဢၢႆႁႅင်းတၢင်းၸႂ်မႆႈၶႆႈၸႃႉၵဝ် သွၼ်းလေႃႇၵႃႈၼိူဝ်ၶဝ် ႁႂ်ႈလႆႈယႃႉၽဵဝ်ႈၶဝ်ပႅတ်ႈဢေႃႈ။-

14ၵူၺ်းၵႃႈ ၵဝ်ၸီႇယၢင်ႇႁဵတ်းပုၼ်ႈၼႃႇမႃႉၸိုဝ်ႈသဵင်ၵဝ် ႁႂ်ႈသရေႇဢမ်ႇလႆႈလူႉ ၵႃႈတီႈၽၢႆႇၼႃႈၵူၼ်း တၢင်ႇၸိူဝ်ႉတၢင်ႇမဵဝ်း ဢၼ်ႁၼ် ၵျေးၸူးတၢင်းဢၼ်ၵဝ်ၼုၵ်ႈဢဝ်ၶဝ် ဢွၵ်ႇမႃးၼၼ်ႉဢေႃႈ။-

15လႆႈသမ်ႉ ၵဝ်ယုၵ်ႉမိုဝ်းတိူင်ႇဝႃႈ တီႈၶဝ်ၵႃႈၼႂ်းထိူၼ်ႇၼၼ်ႉ လူၺ်ႈလွင်ႈဢၼ်ၵဝ် တၵ်းဢမ်ႇဢဝ်ၶဝ်သူင်ႇႁွတ်ႈ ၵႃႈၼႂ်းမိူင်းဢၼ်ၵဝ်ပၼ်တီႈၶဝ်၊ မိူင်းဢၼ် ၼမ်ႉၼူမ်းတင်းၼမ်ႉၽိုင်ႈၸၢင်ႈလႆယူႇ၊ မိူင်းဢၼ် ပဵၼ်ၸိၵ်းပဵၼ်ၸွမ်မိူင်း တင်းသဵင်ႈတင်းလူင် ၼၼ်ႉဢေႃႈ။-

16လွင်ႈမၼ်းၸမ်ႉ ၵွပ်ႈပိူဝ်ႈဢၼ်ၶဝ် ၸႂ်ၸပ်းၸႂ်ပႅၼ်းရုၵ်ႈထူႉလႄႈ ၶဝ်ဢွၼ်ၵၼ်ႁဵတ်းဢမ်ႇပေႃးၼင်ႇႁိုဝ်တီႈ လွင်ႈတၢင်းဢၼ် ၵဝ်ၸီႇယၢင်ႇဝႆႉၸိူဝ်းၼၼ်ႉလႄႈ ဢမ်ႇၸွမ်းသဵၼ်ႈတၢင်း ထုင်းၽိင်ႈတြႃးၵဝ် တင်းလၢႆသေလႄႈ ၶျႃးဝၼ်းၵမ်သိၼ်ၵဝ်တူၵ်းတီႈတႅမ်ႇဢေႃႈ။-

17ၼႂ်းဝႃႈၼၼ်သေၵေႃႈ မၢၵ်ႇတႃၵဝ်သေလၢႆၶဝ် ၼႂ်းတၢင်းဢၼ် တၵ်းယႃႉၶဝ်ပႅတ်ႈၼၼ်ႉလႄႈ ဢမ်ႇႁဵတ်းႁႂ်ႈၶဝ်သုမ်းၸွမ်းပႅတ်ႈ ၵႃႈၼႂ်းထိူၼ်ႇၼၼ်ႉ။-

18ၵဝ်လၢတ်ႈတီႈလုၵ်ႈၶဝ်လၢၼ်ၶဝ် ၵႃႈၼႂ်းထိူၼ်ႇၼၼ်ႉလႄႈဝႃႈ၊ ယႃႇပေဢွၼ်ၵၼ်ၸွမ်းသဵၼ်ႈတၢင်း ထုင်းၽိင်ႈတြႃး ပူႇသူမွၼ်ႇသူၸိူဝ်းၼၼ်ႉ။ ယႃႇပေၵမ်ၵျၢင်ႉ လွင်ႈတၢင်းဢၼ်ၶဝ်ၸီႇယၢင်ႇဝႆႉ ၸိူဝ်းၼၼ်ႉ။ ယႃႇပေႁႂ်ႈတူဝ်သူလႆႈၵူဝ်ႈၵိူၵ်ႇ လူၺ်ႈရုၵ်ႈထူႉၶဝ်ၸိူဝ်းၼၼ်ႉ။-

19ၵဝ်ၼႆႉပဵၼ် ထႃႇဝရႃႉၽြႃး ၽြႃးပဵၼ်ၸဝ်ႈ သူဢေႃႈ။ ဢွၼ်ၵၼ် ၸွမ်းသဵၼ်ႈတၢင်း ထုင်းၽိင်ႈတြႃး ၵဝ်ၸိူဝ်းၼၼ်ႉလႄႈ ၵမ်ၵျၢင်ႉလွင်ႈတၢင်းဢၼ်ၵဝ်ၸီႇယၢင်ႇဝႆႉ ၸိူဝ်းၼၼ်ႉသေလႄႈ ႁဵတ်းၸွမ်းတႃႉ။-

20ဢွၼ်ၵၼ် ႁႂ်ႈဝၼ်းၵမ်သိၼ်ၵဝ်တင်းလၢႆ မူတ်းၸၢင်ႇတႃႉ။ ဝၼ်းၵမ်သိၼ်ၸိူဝ်းၼၼ်ႉ တၵ်းပဵၼ်လၢၵ်ႈၶၼႃႇသၢၵ်ႈသေႇ ၵႃႈတီႈ ၵႄႈဝူင်ႈၵၢင်သူတင်းၵဝ် ႁႂ်ႈသူလႆႈႁူႉလွင်ႈဢၼ် ၵဝ်ပဵၼ် ထႃႇဝရႃႉၽြႃး ၽြႃးပဵၼ်ၸဝ်ႈသူဢေႃႈ၊ ဝႃႈၼင်ႇၼႆဢေႃႈ။-

21ၵူၺ်းၵႃႈ လုၵ်ႈၶဝ်လၢၼ်ၶဝ်ၼၼ်ႉ ဢွၼ်ၵၼ်ပုင်ႇၵၢၼ်ႇၵဝ်လႄႈ ဢမ်ႇၸွမ်းသဵၼ်ႈတၢင်း ထုင်းၽိင်ႈတြႃး ၵဝ်ၸိူဝ်းၼၼ်ႉ၊ ဢမ်ႇၵမ်ၵျၢင်ႉလွင်ႈတၢင်းဢၼ် ၵဝ်ၸီႇယၢင်ႇဝႆႉ ဢၼ်ပဵၼ်လွင်ႈဢၼ် ဢသၢၵ်ႈၵေႃႉဢၼ်ၵမ်ၵျၢင်ႉၼၼ်ႉ တၵ်းလႆႈလိပ်းၼၼ်ႉလႄႈ ၶျႃးဝၼ်းၵမ်သိၼ်ၵဝ်တင်းလၢႆ တူၵ်းတီႈတႅမ်ႇဢေႃႈ။ မိူဝ်ႈၼၼ်ႉ ၵဝ်ၵျၢမ်ႇပွင်တၵ်းဢဝ် ဢၢႆႁႅင်းတေႃးသႃႉ တၢင်းၸႂ်မႆႈၶႆႈၸႃႉၵဝ် သွၼ်းလေႃႇ ၵႃႈၼိူဝ်ၶဝ် ႁႂ်ႈၸႂ်တေႃးသႃႉၵဝ်ပေႇတီႈၶဝ် ၵႃႈၼႂ်းထိူၼ်ႇၼၼ်ႉဢေႃႈ။-

22ၼႂ်းဝႃႈၼၼ်သေၵေႃႈ ၵဝ်ယိုတ်းဢဝ်မိုဝ်းၵဝ်ၶိုၼ်းလႄႈ ၸီႇယၢင်ႇႁဵတ်းပုၼ်ႈၼႃႇမႃႉၸိုဝ်ႈသဵင်ၵဝ် ႁႂ်ႈသရေႇဢမ်ႇလႆႈလူႉ ၵႃႈတီႈ ၽၢႆႇၼႃႈၵူၼ်း တၢင်ႇၸိူဝ်ႉတၢင်ႇမဵဝ်း ဢၼ်ႁၼ်ၵျေးၸူးတၢင်းဢၼ်ၵဝ် ၵႄႇသႄႇၼုၵ်ႈဢဝ်ၶဝ် ဢွၵ်ႇမႃးၼၼ်ႉဢေႃႈ။-

23လႆႈသမ်ႉ ၵဝ်ယုၵ်ႉမိုဝ်းတိူင်ႇဝႃႈ တီႈၶဝ်ၵႃႈၼႂ်းထိူၼ်ႇၼၼ်ႉ ႁႂ်ႈလႆႈဢဝ်ၶဝ်ၸၢတ်ႇပိုၼ်ပႅတ်ႈ ၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းလႄႈ ၽၢတ်ႇၽႄၵၼ်ၵႂႃႇ ၵႃႈၼႂ်းၵူႈသိုင်ႇၵူႈမိူင်းဢေႃႈ။-

24လွင်ႈမၼ်းၸမ်ႉ ၵွပ်ႈပိူဝ်ႈဢၼ်ၶဝ် ၸႂ်ၸပ်းၸႂ်ပႅၼ်းရုၵ်ႈထူႉ ပူႇၶဝ်မွၼ်ႇၶဝ်ၸိူဝ်းၼၼ်ႉလႄႈ၊ ၶဝ်ယင်းဢမ်ႇပႂ်ႉၵမ်ပႂ်ႉၸွမ်း လွင်ႈတၢင်းဢၼ် ၵဝ်ၸီႇယၢင်ႇဝႆႉၸိူဝ်းၼၼ်ႉလႄႈ ဢွၼ်ၵၼ်ႁဵတ်းဢမ်ႇပေႃးၼင်ႇႁိုဝ် တီႈထုင်းၽိင်ႈတြႃး ၵဝ်ၸိူဝ်းၼၼ်ႉ သေလႄႈ ၶျႃးဝၼ်းၵမ်သိၼ်ၵဝ် တင်းလၢႆ တူၵ်းတီႈတႅမ်ႇဢေႃႈ။-

25ပိူဝ်ႈဢၼ် ပဵၼ်ၼင်ႇၼၼ်လႄႈ ၵဝ်ပၼ်ထုင်းၽိင်ႈတြႃး ဢၼ်လီဢၼ်ငၢမ်း ဢိၵ်ႇတင်း လွင်ႈတၢင်းဢၼ်ၸီႇယၢင်ႇ ဢၼ်ဢသၢၵ်ႈဢမ်ႇလႆႈလိပ်းၸိူဝ်းၼၼ်ႉ ဝႆႉတီႈၶဝ်ဢေႃႈ။-

26ၵဝ်ႁႂ်ႈၶဝ်ၵူဝ်ႈၵိူၵ်ႇလူၺ်ႈတႃႇၼႃႉတၢင်းလူႇၶဝ် ၼႂ်းလွင်ႈဢၼ်ၶဝ် ဢဝ်လုၵ်ႈတူၼ်ႈၶဝ် တင်းသဵင်ႈတင်းလူင် ပုၵ်ႈၸေႃႇ လူၺ်ႈၽႆးၼၼ်ႉ ႁႂ်ႈလႆႈယႃႉၽဵဝ်ႈၶဝ်ပႅတ်ႈလႄႈ ႁႂ်ႈၶဝ်လႆႈႁူႉလွင်ႈဢၼ် ၵဝ်ပဵၼ်ထႃႇဝရႃႉၽြႃးဢေႃႈ၊ ဝႃႈၼင်ႇၼႆတႃႉ။-

27ပိူဝ်ႈဢၼ်ပဵၼ်ၼင်ႇၼႆလႄႈ လုၵ်ႈၵူၼ်းဢိူၺ်း၊ မႂ်းလၢတ်ႈတီႈမဵဝ်း ဢီႉသရေႇလႃႉ လႄႈဝႃႈ၊ ထႃႇဝရႃႉၽြႃး မီးဢမိင်ႉလႄႈဝႃႈ၊ ပူႇသူမွၼ်ႇသူၸိူဝ်းၼၼ်ႉ ဢွၼ်ၵၼ်ၽိတ်းပိူင်ႈၵဝ် ၼႂ်းလွင်ႈဢၼ် ၶဝ်ႁဵတ်း တၢင်းဢၼ်ပႅတ်ႉဢၼ်လႅၼ်သေလႄႈ ပူၼ်ႉလိူဝ်ၵဝ်ၼၼ်ႉၸမ်ႉ၊-

28မိူဝ်ႈဢၼ်ၵဝ် ဢဝ်ၶဝ်သႂၢင်းၶဝ်ႈ ၵႃႈၼႂ်းမိူင်းဢၼ် ၵဝ်ယုၵ်ႉမိုဝ်းတိူင်ႇဝႃႈ ႁႂ်ႈလႆႈပၼ်တီႈၶဝ်ၼၼ်ႉ ၶဝ်ဢွၼ်ၵၼ်လူတူၺ်းလွႆဢၼ်သုင်ၵႃႈမီး၊ တူၼ်ႈမႆႉဢၼ်ၼႃတၼ်ၼႃႇၵႃႈမီးၼၼ်ႉလႄႈ ပုၵ်ႈၸေႃႇယိတ်ႈၵႃႈတီႈၼၼ်ႈ။ တၢင်ႇတမ်းတႃႇၼႃႉတၢင်းလူႇ ဢၼ်တိုၵ်းယူင်း တၢင်းၸႂ်မႆႈၶႆႈၸႃႉၵဝ် ၵႃႈတီႈၼၼ်ႈလႄႈ ဢဝ်ၶိူင်ႈပုၵ်ႈၸေႃႇဢၼ်သွၼ်းလေႃႇ သွၼ်းလေႃႇၵႃႈတီႈၼၼ်ႈဢေႃႈ။-

29ၵဝ်ၵေႃႈ ထၢမ်တီႈၶဝ်လႄႈဝႃႈ၊ တီႈဢၼ်သုင် ဢၼ်သူၸၢင်ႈၵႂႃႇၸူးၼၼ်ႉၸမ်ႉ၊ ပဵၼ်ၸိူဝ်ႉၼင်ႇႁိုဝ်။ ဝႃႈၼင်ႇၼႆသေၵေႃႈ၊ တီႈၼၼ်ႈ လႆႈၶၢမ်ႇတၢင်းဢၼ်ႁွင်ႉႁဵၵ်ႈၸိုဝ်ႈ ထႃႇၼႃႉတီႈသုင်ယူႇတေႃႇထိုင်ႁွတ်ႈ ဝၼ်းမိူဝ်ႈၼႆႉဢေႃႈ၊ ဝႃႈၼင်ႇၼႆဢေႃႈ၊ ဝႃႈၼင်ႇၼႆတႃႉ။-

30ပိူဝ်ႈဢၼ်ပဵၼ်ၼင်ႇၼႆလႄႈ မႂ်းလၢတ်ႈတီႈၵူၼ်းမဵဝ်း ဢီႉသရေႇလႃႉ လႄႈဝႃႈ၊ ၸဝ်ႈထႃႇဝရႃႉၽြႃး မီးဢမိင်ႉလႄႈဝႃႈၸမ်ႉ၊ သူယင်းတိုၵ်ႉႁႂ်ႈတူဝ်သူၵူဝ်ႈၵိူၵ်ႇ ၸွမ်းၵႃႈၼင်ႇ ထုင်းၸၢမ်ႇပူႇသူမွၼ်ႇသူၼၼ်ႉယူႇႁိုဝ်။ သူယင်းတိုၵ်ႉႁဵတ်းၸွမ်း လွင်ႈတၢင်းဢၼ် လီႁင်ႈဢဵတ်ႇသဵတ်ႇ ဢၼ်ၶဝ်ႁဵတ်းၼၼ်ႉလႄႈ ၽိတ်းပိူင်ႈယူႇႁိုဝ်။-

31ၼႂ်းမိူဝ်ႈဢၼ် သူပုၵ်ႈၸေႃႇတႃႇၼႃႉတၢင်းလူႇသူ၊ ၼႂ်းမိူဝ်ႈဢၼ် သူဢဝ် လုၵ်ႈသူလၢင်းသူပုၵ်ႈၸေႃႇလူၺ်ႈၽႆးၼၼ်ႉ ယူႇၼၼ်ႉၸိုင်၊ သူႁႂ်ႈတူဝ်သူၵူဝ်ႈၵိူၵ်ႇလူၺ်ႈ ရုၵ်ႈထူႉသူၵႃႈမီးၼၼ်ႉ တေႃႇထိုင်ႁွတ်ႈဝၼ်းမိူဝ်ႈၼႆႉ ယူႇႁိုဝ်။ ပိူဝ်ႈၼႆလႄႈ ၵဝ်တၵ်းလႆႈၶၢမ်ႇတၢင်းဢၼ်သူလဝ်ႊသူထၢမ်ႁိုဝ်။ မဵဝ်း ဢီႉသရေႇလႃႉ ဢိူၺ်း၊ ၵႃႈၼင်ႇဢၼ်ၵဝ် ထႃႇဝရႃႉၽြႃး ဢသၢၵ်ႈလိပ်းယူႇၼၼ်ႉ၊ ၵဝ်တၵ်းဢမ်ႇၶၢမ်ႇတၢင်းဢၼ် သူလဝ်ႊသူထၢမ်ၼၼ်ႉ။-

32တၢင်းၵျၢမ်ႇတၢင်းပွင်ဢၼ်သူ ၵျၢမ်ႇပွင်ၼႂ်းၸႂ်လႄႈဝႃႈ၊ ႁဝ်းတၵ်းပဵၼ်ၸိူဝ်ႉၼင်ႇ ၵူၼ်းတၢင်ႇၸိူဝ်ႉတၢင်ႇမဵဝ်း တင်းလၢႆလႄႈ၊ တၵ်းပဵၼ်ၸိူဝ်ႉၼင်ႇ ၵူၼ်းဝၢၼ်ႈၵူၼ်းမိူင်း တင်းလၢႆ ဢၼ်ၵူဝ်းၵႂၢႆႇႁဵတ်းဝၢတ်ႈတီႈၽြႃးမႆႉ ၽြႃးမၢၵ်ႇႁိၼ် ၸိူဝ်းၼၼ်ႉဢေႃႈ၊ ဝႃႈၼင်ႇၼႆၼၼ်ႉ၊ တၵ်းဢမ်ႇလႆႈပဵၼ်လႃးလႃး။

33ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၵႃႈၼင်ႇဢၼ် ၵဝ်ဢသၢၵ်ႈလိပ်းယူႇၼၼ်ႉ၊ ၵဝ်တၵ်းဢဝ်မိုဝ်းဢၼ်ႁႅင်းယႂ်ႇၼႃႇ၊ ၶႅၼ်ဢၼ်ယဵတ်ႇယိုၼ်း၊ ဢၢႆႁႅင်းတေႃးသႃႉ ဢၼ်သွၼ်းလေႃႇၼၼ်ႉ ဢုပ်ႉပိူင်ႇသူဢေႃႈ။-

34ၵဝ်တၵ်းဢဝ်မိုဝ်းဢၼ်ႁႅင်းယႂ်ႇ၊ ၶႅၼ်ဢၼ်ယဵတ်ႇယိုၼ်း၊ ဢၢႆႁႅင်းတေႃးသႃႉ ဢၼ်သွၼ်းလေႃႇၼၼ်ႉ ၼုၵ်ႈဢဝ်သူဢွၵ်ႇ သေၵႃႈၼႂ်းမဵဝ်းၵူၼ်းတင်းလၢႆမႃးလႄႈ ဢဝ်သူဢွၵ်ႇသေၵႃႈၼႂ်း ၵူႈသိုင်ႇၵူႈမိူင်း တီႈဢၼ်သူ လႆႈၶၢမ်ႇတၢင်းဢၼ်ဢဝ်ၸၢတ်ႇပိုၼ်ပႅတ်ႈ ၸိူဝ်းၼၼ်ႉမႃး ၸူႉၵၼ်တုမ်ၵၼ်ဢေႃႈ။-

35ၵဝ်တၵ်းဢဝ်သူ မႃးၵႃႈၼႂ်းထိူၼ်ႇ ဢၼ်ၸၢပ်ႈသႅင်ႇၵၼ်တင်း မဵဝ်းၵူၼ်းတင်းလၢႆလႄႈ၊ ၵဝ်တၵ်းဢဝ်ၼႃႈတေႃႇၼႃႈၵၼ် တင်းသူ ထူပ်းတြႃးၵၼ်တင်းသူ ၵႃႈတီႈၼၼ်ႈဢေႃႈ။-

36ၸိူဝ်ႉၼင်ႇဢၼ်ၵဝ်ထူပ်းတြႃး ၵၼ်တင်းပူႇသူမွၼ်ႇသူ ၵႃႈၼႂ်းထိူၼ်ႇ မိူင်း ဢေႇၵိပ်ႉတူႉ ၼၼ်ႉ၊ ၵဝ်တၵ်းထူပ်းတြႃးၵၼ် တင်းသူဢေႃႈ။-

37ၵဝ်တၵ်းႁႂ်ႈသူလႆႈၵႂႃႇလႆႈပႆ ၵႃႈတီႈတႂ်ႈၶွၼ်ႉၶႂမ်ႈၶွၼ်ႉႁေႃႈလႄႈ ၶၢမ်ႇတၢင်းဢၼ် ဢဝ်ပတီႉၺိၺ်ႇမတ်ႉဝႆႉၽုၵ်ႇဝႆႉဢေႃႈ။-

38ၵဝ်တၵ်း ၼုၵ်ႈထွၼ်ၶဝ်ၸိူဝ်းဢၼ်ပုင်ႇၵၢၼ်ႇၵဝ် ဢိၵ်ႇတင်း ၶဝ်ၸိူဝ်းဢၼ်ၽိတ်းပိူင်ႈၵဝ်ၼၼ်ႉပႅတ်ႈ သေၵႃႈၼႂ်းသူလႄႈ ပိၵ်ႉသမ်ႉၵဝ်လႆႈဢဝ်ၶဝ်ဢွၵ်ႇသေ ၵႃႈၼႂ်းမိူင်း တီႈဢၼ်ၶဝ်သွၼ်ႈပိုင်ႈယူႇၼၼ်ႉယဝ်ႉ သေၵေႃႈ၊ ၶဝ်ဢမ်ႇလႆႈဢွၼ်ၵၼ်ၶဝ်ႈ ၵႃႈၼႂ်းမိူင်း ဢီႉသရေႇလႃႉ ။ သူတၵ်းလႆႈႁူႉလွင်ႈဢၼ်ၵဝ်ပဵၼ် ထႃႇဝရႃႉၽြႃးၼၼ်ႉဢေႃႈ။-

39မဵဝ်း ဢီႉသရေႇလႃႉ ဢိူၺ်း၊ ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ဢွၼ်ၵၼ်ၵႂႃႇလႄႈ ႁဵတ်းဝၢတ်ႈတီႈရုၵ်ႈထူႉသူၸိူဝ်းၼၼ်ႉ ႁင်းၽႂ် ႁင်းမၼ်းတႃႉ။ ၼႂ်းဝႃႈၼၼ်သေၵေႃႈ ၵမ်းလိုၼ်း ပိၵ်ႉသမ်ႉသူဢမ်ႇထွမ်ႇဢမ်ႇဢဝ်ၵႂၢမ်းၵဝ်သေၵေႃႈ၊ ၼႃႇမႃႉၸိုဝ်ႈသဵင်ၵဝ် ဢၼ်မူတ်းၸၢင်ႇၼၼ်ႉ ယင်းဢမ်ႇလႆႈၶၢမ်ႇတၢင်းဢၼ်ၶျႃးတူၵ်းတီႈတႅမ်ႇ ၵွပ်ႈပိူဝ်ႈတႃႇၼႃႉတၢင်းလူႇသူ ဢိၵ်ႇတင်းရုၵ်ႈထူႉသူၸိူဝ်းၼၼ်ႉလႄႈ တၵ်းလႆႈယူႇ ဢေႃႈ။-

40လွင်ႈမၼ်းၸမ်ႉ ၵူၼ်းမဵဝ်း ဢီႉသရေႇလႃႉ ၵႃႈမီး၊ ၵူၼ်းဝၢၼ်ႈၵူၼ်းမိူင်း တင်းသဵင်ႈတင်းလူင် တၵ်းဢွၼ်ၵၼ်ႁဵတ်းဝၢတ်ႈတီႈၵဝ် ၵႃႈၼိူဝ်လွႆဢၼ်မူတ်းၸၢင်ႇၵဝ်၊ ၵႃႈၼိူဝ်လွႆ ဢီႉသရေႇလႃႉ ဢၼ်သုင်ၼႃႇသေပိူၼ်ႈ ၼၼ်ႉဢေႃႈ။ ၵဝ်ၵေႃႈတၵ်းႁပ်ႉတုင်းဢဝ်ၶဝ် ၵႃႈတီႈၼၼ်ႈလႄႈ ယွၼ်းဢဝ်တၢင်းပုၵ်ႈၸေႃႇ ဢၼ်သူႁဵတ်း တင်းလၢႆ ဢိၵ်ႇတင်း မၢၵ်ႇႁူင်းဢၼ်လႆႈလိူၵ်ႈဢဝ် ၵႃႈၼႂ်းမၢၵ်ႇ ဢၼ်မၢၵ်ႇဢွၼ်တၢင်းသူၸိူဝ်းၼၼ်ႉ တင်းၶိူင်ႈဢၼ်မူတ်းၸၢင်ႇသူၵႃႈမီးၼၼ်ႉ ၵႃႈတီႈၼၼ်ႈဢေႃႈ။-

41မိူဝ်ႈဢၼ်ၵဝ် ၼုၵ်ႈဢဝ်သူဢွၵ်ႇသေ ၵႃႈၼႂ်း မဵဝ်းၵူၼ်းတင်းလၢႆမႃးလႄႈ ဢဝ်သူဢွၵ်ႇသေ ၵႃႈၼႂ်းၵူႈသိုင်ႇၵူႈမိူင်း တီႈဢၼ်သူလႆႈၶၢမ်ႇတၢင်းဢၼ် ဢဝ်ၸၢတ်ႇပိုၼ်ပႅတ်ႈၸိူဝ်းၼၼ်ႉ မႃးၸူႉၵၼ်တုမ်ၵၼ်ၼၼ်ႉၸိုင် ၵဝ်တၵ်းႁပ်ႉတုင်းဢဝ်သူ ဢိၵ်ႇလူၺ်ႈၵၼ်တင်းၼၢမ်ႇသႃႇ ဢၼ်ႁွမ်ဢၼ်ႁူၺ်းသူၼၼ်ႉလႄႈ ၶၢမ်ႇတၢင်းဢၼ်မူတ်းၸၢင်ႇ ၵႃႈၼႂ်းသူသိုဝ်ႈၼႃႈတႂ်ႈတႃ ၵူၼ်းၵူႈၸိူဝ်ႉၵူႈမဵဝ်းဢေႃႈ။-

42သူတၵ်းလႆႈႁူႉလွင်ႈဢၼ်ၵဝ်ပဵၼ် ထႃႇဝရႃႉၽြႃး ၼႂ်းမိူဝ်ႈဢၼ်ၵဝ်ဢဝ်သူ သႂၢင်းၶဝ်ႈၵႃႈၼႂ်းမိူင်း ဢီႉသရေႇလႃႉ မိူင်းဢၼ် ၵဝ်ယုၵ်ႉမိုဝ်းတိူင်ႇဝႃႈ ႁႂ်ႈလႆႈပၼ် တီႈပူႇသူမွၼ်ႇသူၼၼ်ႉဢေႃႈ။-

43သူတၵ်းၶုၵ်းၸႂ်လႆႈၶႆႈၸႂ်ထူပ်း သဵၼ်ႈတၢင်းသူ၊ လွင်ႈတၢင်းဢၼ်သူ ၵမ်ၵျၢင်ႉသၢင်ႈႁဵတ်းၵႃႈမီး ဢၼ်သူႁႂ်ႈတူဝ်သူၵူဝ်ႈၵိူၵ်ႇ လူၺ်ႈၼၼ်ႉၸိူဝ်းၼၼ်ႉ ၵႃႈတီႈၼၼ်ႈလႄႈ တူဝ်သူတၵ်းလီႁင်ႈတူဝ်သူ ၵွပ်ႈပိူဝ်ႈတူႉၸရိူၵ်ႈ ၵႃႈဢၼ်သူႁဵတ်းမႅၼ်ႈ ၼၼ်ႉဢေႃႈ။-

44ၵူၼ်းမဵဝ်း ဢီႉသရေႇလႃႉ ၶဝ်ဢိူၺ်း၊ သူတၵ်းလႆႈႁူႉလွင်ႈဢၼ်ၵဝ်ပဵၼ် ထႃႇဝရႃႉၽြႃး ၼႂ်းမိူဝ်ႈဢၼ် ထွၵ်ႈလူၺ်ႈၼႃႇမႃႉၸိုဝ်ႈသဵင်ၵဝ် သေလႄႈ ၸီႇယၢင်ႇတီႈသူ ဢမ်ႇမႅၼ်ႈၸွမ်းတူႉၸရိူၵ်ႈသူ ဢိၵ်ႇတင်း တၢင်းၵမ်တၢင်းၵျၢင်ႉ ဢၼ်ႁၢႆႉယုတ်ႈသူၸိူဝ်းၼၼ်ႉဢေႃႈ၊ ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉယဝ်ႉ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။

45လႆႈသမ်ႉ ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃးတီႈၵဝ်လႄႈဝႃႈ၊-

46ၵူၼ်းဢိူၺ်း၊ ဝၢႆႇၼႃႈမႂ်းၵႂႃႇၽၢႆႇတၢင်းၸၢၼ်းယူႇ သေလႄႈ ဢွၵ်ႇသူပ်းဝႃႈယူႇၽၢႆႇၼိုင်ႈ တၢင်းၼႃႈတၢင်းၸၢၼ်းၼၼ်ႉလႄႈ ႁေႃးလၢတ်ႈယူႇၽၢႆႇၼိုင်ႈ တၢင်းထိူၼ်ႇ ဢၼ်မီးၵႃႈၼႂ်း ပွတ်းတၢင်းၸၢၼ်းၼၼ်ႉ သေလႄႈ၊-

47လၢတ်ႈတီႈပႃႇမႆႉပႃႇတွၵ်ႇ တီႈထိူၼ်ႇတီႈၶိူဝ်း ဢၼ်မီးၵႃႈၼႂ်း ပွတ်းတၢင်းၸၢၼ်းၼၼ်ႉလႄႈဝႃႈ၊ ထွမ်ႇငိၼ်းဢမိင်ႉ ၸဝ်ႈထႃႇဝရႃႉၽြႃးတႃႉ။ ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၵဝ်တၵ်းဢဝ်ၽႆးၸပ်းတီႈမႂ်းလႄႈ ၽႆးၼၼ်ႉ တၵ်းမႆႈတူၼ်ႈဢၼ်လိပ်းဢၼ်ၶဵဝ် ဢိၵ်ႇတင်းတူၼ်ႈ ဢၼ်လွၵ်ႈဢၼ်ႁႅင်ႈ ၵႃႈဢၼ်မီးၵႃႈတီႈမႂ်းၼၼ်ႉဢေႃႈ။ ပဵဝ်ၽႆးဢၼ်မႆႈၼၼ်ႉ ဢမ်ႇလႆႈမွတ်ႇလႆႈယဵၼ်။ တၵ်းမႆႈၼႃႈၵူၼ်း ၵႃႈမီးဢဝ်ၵႃႈတီႈၽၢႆႇတၢင်းၸၢၼ်း တေႃႇထိုင်ႁွတ်ႈၽၢႆႇတၢင်းႁွင်ႇဢေႃႈ။-

48သတ်ႉတဝႃႇ တင်းသဵင်ႈတင်းလူင် တၵ်းလႆႈႁူႉလွင်ႈဢၼ်ၵဝ် ဢဝ်ၽႆးၼၼ်ႉ တုတ်ႇၼၼ်ႉလႄႈ ၽႆးၼၼ်ႉ ဢမ်ႇလႆႈမွတ်ႇယဵၼ်လႃးလႃး၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။-

49ၵဝ်ၵေႃႈလဝ်ႊလၢတ်ႈလႄႈဝႃႈ၊ ၸဝ်ႈထႃႇဝရႃႉၽြႃး တီႈၶႃႈ၊ ၶဝ်ဢွၼ်ၵၼ် ဢဝ်လွင်ႈၶႃႈၸဝ်ႈ သေလႄႈ လၢတ်ႈလႄႈဝႃႈ၊ ၵေႃႉၼႆႉ ၸၢင်ႈဢဝ်ၵႂၢမ်းဢပုမ်ႇတႅၵ်ႈသေလႄႈ ႁေႃးလၢတ်ႈၵူၺ်းဢမ်ႇၸႂ်ႈႁိုဝ်။ ဝႃႈၼင်ႇၼႆတီႈၶႃႈယဝ်ႉ၊ ဝႃႈၼင်ႇၼႆဢေႃႈ။