Ezekiel 23 — Shan

1လႆႈသမ်ႉ ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃးတီႈၵဝ်လႄႈဝႃႈၸမ်ႉ၊-

2လုၵ်ႈၵူၼ်းဢိူၺ်း၊ မီးမႄႈယိင်းသွင်ၵေႃႉဢၼ်ပဵၼ်လုၵ်ႈယိင်း မႄႈၵေႃႉလဵဝ်ၵၼ်ဢေႃႈ။-

3ၶဝ်ၼၼ်ႉ ဢွၼ်ၵၼ်ႁဵတ်းမေႇထုင်ႇ ဢၼ်ဢမ်ႇတြႃး ၵႃႈၼႂ်းမိူင်း ဢေႇၵိပ်ႉတူႉ လႄႈ ဢွၼ်ၵၼ်ႁဵတ်းမေႇထုင်ႇ ဢၼ်ဢမ်ႇတြႃး ၼႂ်းမိူဝ်ႈဢၼ်ဢသၢၵ်ႈၶဝ် ယင်းလဵၵ်ႉယင်းၼုမ်ႇၼၼ်ႉဢေႃႈ။ တဝ်ႈၼူမ်းလႆႈၶၢမ်ႇတၢင်းဢၼ် ပိူၼ်ႈၽၼ်ႉပိူၼ်ႈၼူတ်ႈ ၵႃႈတီႈမိူင်းၼၼ်ႉလႄႈ ပိူၼ်ႈဢွၼ်ၵၼ်ၼွၼ်းၼႅၼ်ႉတိၼ်ႇၼူမ်း တၢင်းဢၼ်ၶဝ်ပဵၼ်သၢဝ်ၼၼ်ႉၵႃႈတီႈမိူင်းၼၼ်ႉဢေႃႈ။-

4ၵေႃႉပီႈၼၢင်းၸမ်ႉ၊ လႆႈၸိုဝ်ႈ ဢႁေႃႇလႃႉ လႄႈ ၵေႃႉၼွင်ႉယိင်းၸမ်ႉ၊ လႆႈၸိုဝ်ႈ ဢႁေႃႇလီႉပႃႉ ဢေႃႈ။ သွင်ၶႃၼၼ်ႉ ပဵၼ်မႄႈယိင်း ၵဝ်လႄႈ ဢွၼ်ၵၼ်ၵိူတ်ႇလဵင်ႉ လုၵ်ႈၸၢႆးလုၵ်ႈယိင်းဢေႃႈ။ ၵေႃႉဢၼ်လႆႈၸိုဝ်ႈ ဢႁေႃႇလႃႉ ၼၼ်ႉ ပဵၼ် သမႃႇရီႉ ၊ ၵေႃႉဢၼ်လႆႈၸိုဝ်ႈ ဢႁေႃႇလီႉပႃႉ ၼၼ်ႉ ပဵၼ် ယေႇရူႉသလႅမ်ႇ ဢေႃႈ။-

5ဢႁေႃႇလႃႉ ၼၼ်ႉႁဵတ်းမေႇထုင်ႇ ဢၼ်ဢမ်ႇတြႃး ၼႂ်းမိူဝ်ႈဢၼ်မၼ်းယင်းတိုၵ်ႉပဵၼ် မႄႈယိင်းၵဝ်ယူႇၼၼ်ႉလႄႈ မၼ်းၸႂ်ၸပ်းၸႂ်ပႅၼ်း ၸူႉမၼ်းတင်းလၢႆ ဢၼ်ဝႃႈၵူၼ်းမဵဝ်း ဢႃႇသူႉရီႉ ၵူၼ်းႁိူၼ်းၸမ်ၵၼ်တင်းမၼ်း၊-

6ဢၼ်ၼုင်ႈၶူဝ်း ဢၼ်သွမ်ႇလီ၊ ၶုၼ်ပူဝ်ႇ၊ ၶုၼ်ဝုၼ်ႇ ဢၼ်ပဵၼ်ၵူၼ်း ဢၼ်ယင်းၼုမ်ႇယင်းၵမ် ဢၼ်လီႁၵ်ႉလီပႅင်း၊ ဢၼ်ပဵၼ် ႁူဝ်ႁၢၼ်ၵူၼ်းသိုၵ်းၶီႇမႃႉ ၵႃႈမီးၼၼ်ႉဢေႃႈ။-

7မၼ်းၼၼ်ႉ ႁဵတ်းမေႇထုင်ႇ ဢၼ်ဢမ်ႇတြႃး လူၺ်ႈၵၼ်တင်းၶဝ်ဢၼ်ဝႃႈ ၵူၼ်းလီၵူၼ်းမျၢတ်ႈ ဢႃႇသူႉရီႉ ၵႃႈမီးၼၼ်ႉလႄႈ ႁႂ်ႈတူဝ်မၼ်းၵူဝ်ႈၵိူၵ်ႇ လူၺ်ႈၵၼ်တင်းၶဝ်ၸိူဝ်းဢၼ် မၼ်းၸႂ်ၸပ်းၸႂ်ပႅၼ်းၼၼ်ႉ ဢိၵ်ႇတင်း ရုၵ်ႈထူႉၶဝ်ၼၼ်ႉဢေႃႈ။-

8မႅၼ်ႈၸွမ်းၵႃႈၼင်ႇဢၼ် ၶဝ်ယူႇလူၺ်ႈၼွၼ်းလူၺ်ႈၵၼ်တင်းမၼ်း ၼႂ်းမိူဝ်ႈဢၼ် ဢသၢၵ်ႈယင်းလဵၵ်ႉယင်းၼုမ်ႇၼၼ်ႉလႄႈ ၼွၼ်းၼႅၼ်ႉတိၼ်ႇၼူမ်း တၢင်းဢၼ် မၼ်းပဵၼ်သၢဝ်ၼၼ်ႉသေလႄႈ ဢဝ်မေႇထုင်ႇ ဢၼ်ဢမ်ႇတြႃးၶဝ်သွၼ်းလေႃႇ ၵႃႈၼိူဝ်မၼ်း ၼၼ်ႉ၊ မၼ်းယင်းဢမ်ႇၸုၼ်ႉဢမ်ႇပႅတ်ႈ မေႇထုင်ႇဢၼ်မၼ်းလႆႈ ၵႃႈတီႈမိူင်း ဢေႇၵိပ်ႉတူႉ မႃးၼၼ်ႉ လႄႈယူႇဢေႃႈ။-

9ပိူဝ်ႈဢၼ် ပဵၼ်ၼင်ႇၼၼ်လႄႈ ၵဝ်ဢဝ်မၼ်းဢၢပ်ႈပၼ် ၵႃႈၼႂ်းမိုဝ်းၸူႉမၼ်း ဢၼ်ဝႃႈ ၵူၼ်း ဢႃႇသူႉရီႉ ဢၼ်မၼ်းၸႂ်ၸပ်းၸႂ်ပႅၼ်းယူႇ ၸိူဝ်းၼၼ်ႉလႄႈ၊-

10ၶဝ်ၼၼ်ႉ ဢွၼ်ၵၼ်ႁဵတ်းတၢင်းဢၼ် ၽုၺ်ႇပိုတ်ႇၶူဝ်းၼုင်ႈမၼ်းဢေႃႈ။ ၶဝ်ဢွၼ်ၵၼ်သိမ်းဢဝ်လုၵ်ႈၸၢႆးလုၵ်ႈယိင်းမၼ်း ၵႂႃႇလႄႈ ဢဝ်မၼ်းတၢႆလူၺ်ႈလၢပ်ႇလူၺ်ႈလႅဝ်းဢေႃႈ။ ၶဝ်ႁဵတ်းတၢင်းဢၼ် ၸီႇယၢင်ႇဢပႅတ်ႈၸိူဝ်ႉၼင်ႇၼၼ် တီႈမၼ်းလႄႈ မၼ်းပဵၼ်မႄႈယိင်း ဢၼ်ၸိုဝ်ႈဢွၵ်ႇသဵင်ဢွၵ်ႇ ၵႃႈၼႂ်းမႄႈယိင်းတင်းလၢႆဢေႃႈ။-

11ၼွင်ႉယိင်းမၼ်း ဢႁေႃႇလီႉပႃႉ ႁၼ်လွင်ႈတၢင်းၼၼ်ႉလႄႈ ယဵင်ႈၶႅၼ်းမီးၸႂ်ဢၼ်ၸပ်းပႅၼ်း လိူဝ်တွၼ်းၼႃႇသေပီႈၼၢင်း မၼ်းလႄႈ ယဵင်ႈၶႅၼ်းႁဵတ်းမေႇထုင်ႇ ဢၼ်ဢမ်ႇတြႃး လိူဝ်တွၼ်းၼႃႇသေပီႈၼၢင်းမၼ်းဢေႃႈ။-

12မၼ်းၸႂ်ၸပ်းၸႂ်ပႅၼ်းၵူၼ်းမဵဝ်း ဢႃႇသူႉရီႉ ၊ ၶုၼ်ပူဝ်ႇ၊ ၶုၼ်ဝုၼ်ႇ၊ ၵူၼ်းႁိူၼ်းၸမ်ၵၼ်တင်းမၼ်း ဢၼ်ၼုင်ႈၶူဝ်းၼုင်ႈ ဢၼ်ႁၢင်ႈလီႁၢင်ႈငၢမ်း ဢၼ်ပဵၼ်ႁူဝ်ႁၢၼ်ၵူၼ်းသိုၵ်းၶီႇမႃႉ လႄႈပဵၼ်ၵူၼ်း ဢၼ်ယင်းၼုမ်ႇယင်းၵမ် ဢၼ်လီႁၵ်ႉလီပႅင်းၵႃႈမီးၼၼ်ႉ ယူႇဢေႃႈ။-

13မိူဝ်ႈၼၼ်ႉ ၵဝ်ႁၼ်လွင်ႈဢၼ် မၼ်းၵူဝ်ႈၵိူၵ်ႇလႄႈ သွင်ၶႃၸွမ်းသဵၼ်ႈတၢင်းလဵဝ်ၵၼ် ၼၼ်ႉဢေႃႈ။-

14လွင်ႈဢၼ်မၼ်းႁဵတ်းမေႇထုင်ႇ ဢၼ်ဢမ်ႇတြႃး ယဵင်ႈၶႅၼ်းလိူဝ်တွၼ်းၼႃႇၼၼ်ႉၸမ်ႉ၊ မၼ်းႁၼ်ႁၢင်ႈ ၵူၼ်းဢၼ်ပိူၼ်ႈတႅမ်ႈသႂ်ႇဝႆႉ ၵႃႈတီႈၽႃဢုတ်ႇ ဢၼ်ဝႃႈပုင်ႇႁၢင်ႈၵူၼ်း ၶႃႇလတေး ဢၼ်ပိူၼ်ႈဢဝ်ႁၢၼ်လႅင်တႅမ်ႈသႂ်ႇဝႆႉ၊-

15ဢၼ်ႁတ်ႉသၢႆဢႅဝ်ယူႇ၊ ဢၼ်ၶဵၼ်းၶဵၼ်းႁူဝ် ဢၼ်ယွမ်ႉမွၵ်ႇယူႇ၊ ဢၼ်ႁဵတ်းႁၢင်ႈၶုၼ်ပူဝ်ႇမိူၼ်ၸိူဝ်ႉၼင်ႇ ၵူၼ်းဝဵင်း ပႃႇပူႉလုၼ်ႇ မိူင်း ၶႃႇလတေး တီႈဢၼ်ၶဝ်ၵိူတ်ႇလဵင်ႉမႃးၼၼ်ႉ ၸိူဝ်းၼၼ်ႉဢေႃႈ။-

16မိူဝ်ႈဢၼ်မၼ်းႁၼ်ၸိူဝ်ႉၼင်ႇၼၼ် ၼၼ်ႉၸိုင် မၼ်းမီးၸႂ်ဢၼ်ၸပ်းဢၼ်ပႅၼ်းလႄႈ ပွႆႇၸႂ်ႉၵူၼ်းၸႂ်ႉၵူၼ်းသွႆ ၵႂႃႇၸူးၵႃႈတီႈ မိူင်း ၶႃႇလတေး ဢေႃႈ။-

17ၵူၼ်းဝဵင်း ပႃႇပူႉလုၼ်ႇ ၸိူဝ်းၼၼ်ႉ ဢွၼ်ၵၼ်မႃးၸူးတီႈမၼ်း ၵႃႈၼိူဝ်ၵူႇတီႈၼွၼ်းမၼ်း ဢၼ်ႁဵတ်းသမ်ႇဝႃႇသႃႉၼၼ်ႉလႄႈ ႁဵတ်းႁႂ်ႈမၼ်းၵူဝ်ႈၵိူၵ်ႇလူၺ်ႈ မေႇထုင်ႇဢၼ်ဢမ်ႇတြႃးၶဝ်ၼၼ်ႉဢေႃႈ။ မၼ်းၵေႃႈ လႆႈၶၢမ်ႇတၢင်းဢၼ်ၵူဝ်ႈၵိူၵ်ႇယူႇ တေႃႇထိုင်ႁွတ်ႈ ထၼ်ႈပေႃးၸၢၼ်ႈပေႃးမိူဝ်ႇၶဝ် ၼၼ်ႉဢေႃႈ။-

18ၼင်ႇၼၼ်လႄႈ ၵွပ်ႈပိူဝ်ႈဢၼ်မၼ်း ၽုၺ်ႇဢွၵ်ႇၼႄပျႃး တၢင်းဢၼ်မၼ်းႁဵတ်းမေႇထုင်ႇဢၼ်ဢမ်ႇတြႃး ဢိၵ်ႇတင်း ၽုၺ်ႇဢွၵ်ႇၼႄပျႃး တၢင်းဢၼ်မၼ်းယူႇတူဝ်ပူၺ်ၼၼ်ႉလႄႈ၊ ၸိူဝ်ႉၼင်ႇဢၼ်ၵဝ်မိူဝ်ႇၸၢၼ်ႈပီႈၼၢင်းမၼ်းၼၼ်ႉ ၵဝ်မိူဝ်ႇၸၢၼ်ႈ မၼ်းဢေႃႈ။-

19မၼ်းၶုၵ်းၸႂ်လႆႈၶႆႈၸႂ်ထူပ်း မိုဝ်ႉဝၼ်းဢၼ် ဢသၢၵ်ႈမၼ်းယင်းလဵၵ်ႉယင်းၼုမ်ႇလႄႈ မၼ်းၽိတ်းပိူင်ႈၵႃႈၼႂ်းမိူင်း ဢေႇၵိပ်ႉတူႉ ၼၼ်ႉ ယူႇသေလႄႈ ႁဵတ်းတၢင်းဢၼ်ၽိတ်းပိူင်ႈဢၼ် ယဵင်ႈၶႅၼ်းၼမ်ၼႃႇဢေႃႈ။-

20မၼ်းၸႂ်ၸပ်းၸႂ်ပႅၼ်းၸူႉမၼ်း ဢၼ်မီးၼိူဝ်ႉၼင်မိူၼ်ၸိူဝ်ႉၼင်ႇ ၼိူဝ်ႉၼင်တူဝ်လီႈဢၼ်မီးၼမ်ႉသုၵ်ႉ မိူၼ်ၸိူဝ်ႉၼင်ႇ ၼမ်ႉသုၵ်ႉမႃႉၼၼ်ႉၸိူဝ်းၼၼ်ႉလူင်ပႄႇ။-

21ၼင်ႇၼၼ်လႄႈ ၵွပ်ႈပိူဝ်ႈဢၼ်မႂ်းၶုၵ်းၸႂ်လႆႈၶႆႈၸႂ်ထူပ်း ဢမူႉဢၼ်ႁၢႆႉယုတ်ႈ ဢၼ်မႂ်းႁဵတ်းၼႂ်း မိူဝ်ႈဢၼ်ဢသၢၵ်ႈမႂ်း ယင်းလဵၵ်ႉယင်းၼုမ်ႇလႄႈ ၵူၼ်း ဢေႇၵိပ်ႉတူႉ တင်းလၢႆ ဢွၼ်ၵၼ်ၼွၼ်းၼႅၼ်ႉတိၼ်ႇၼူမ်းမႂ်းယူႇ၊ ၽၼ်ႉၼူတ်ႈၼူမ်းသၢဝ်မႂ်းယူႇ ၼၼ်ႉလႄႈ၊

22ဢႁေႃႇလီႉပႃႉ ဢိူၺ်း၊ ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ တူၺ်းလူး။ ၵဝ်တၵ်းႁႂ်ႈၸူႉဢၼ်မႂ်းမိူဝ်ႇၸၢၼ်ႈၼၼ်ႉ ဢွၼ်ၵၼ်လုၵ်ႉ ယူႇၽၢႆႇၼိုင်ႈတင်းမႂ်းလႄႈ ဢဝ်ၶဝ်လုၵ်ႉသေၵႃႈတီႈ ၵူႈၽၢႆႇၵူႈပႃႈ မႃးတိုၵ်းမႂ်းဢေႃႈ။-

23ၶဝ်ၼၼ်ႉ ပဵၼ်ၵူၼ်း ပႃႇပူႉလုၼ်ႇ တင်းလၢႆ၊ ၵူၼ်း ၶႃႇလတေး ၵႃႈမီး ဢၼ်ဝႃႈၵူၼ်း ၽီႉၵုတ်ႉ ၊ ၵူၼ်း သူဝ်းဢႃႇ ၊ ၵူၼ်း ၵူဝ်းဢႃႇ ၸိူဝ်းၼၼ်ႉ ဢိၵ်ႇတင်းၵူၼ်း ဢႃႇသူႉရီႉ ၵႃႈမီး ဢၼ်ဝႃႈ ၶဝ်ၸိူဝ်းဢၼ် ၵူၼ်းၼုမ်ႇၵူၼ်းၵမ်ဢၼ်လီႁၵ်ႉလီပႅင်း၊ ၵႃႈပဵၼ်ၶုၼ်ပူဝ်ႇ၊ ၶုၼ်ဝုၼ်ႇ၊ မူးမၢတ်ႈၽွင်းမိူင်း၊ ၵႃႈပဵၼ်ႁူဝ်ႁၢၼ်ၵူၼ်းသိုၵ်းၶီႇမႃႉ ၸိူဝ်းၼၼ်ႉဢေႃႈ။-

24ၶဝ်ၼၼ်ႉ တၵ်းဢွၼ်ၵၼ်ပႃးဢဝ် လၢၵ်ႈၼၢၵ်ႈတိုၵ်းသိုၵ်း ဢိၵ်ႇတင်း လေႃႉရထႃးတင်းလေႃႉတင်းလႅင်တင်းမူႇၵူၼ်းၽုင်ၵူၼ်း ၼမ်ၼႃႇသေလႄႈ မႃးယူႇၽၢႆႇၼိုင်ႈတင်းမႂ်းလႄႈ ဢဝ်ၶိူင်ႈႁႄႉလၢၵ်ႈၼၢၵ်ႈ ၶိူင်ႈႁႄႉလၢပ်ႇ၊ ၵုပ်းလဵၵ်းတင်းလၢႆ ၶၢင်းတပ်ႉၶၢင်းငႃး ၵႃႈတီႈလဵပ်ႈႁွပ်ႈမႂ်းဢေႃႈ။ ၵဝ်တၵ်း ဢဝ်ဢၶႂၢင်ႉဢၼ်ၸီႇယၢင်ႇတြႃး ဢၢပ်ႈပၼ်တီႈၶဝ်လႄႈ ၶဝ်တၵ်းဢွၼ်ၵၼ်ၸီႇယၢင်ႇမႂ်း ၸွမ်းၼင်ႇထုင်းၽိင်ႈၶဝ်ၼၼ်ႉဢေႃႈ။-

25ၵဝ်တၵ်းႁဵတ်းႁႂ်ႈလွင်ႈဢၼ် ၶဝ်တၵ်းဢမ်ႇယုမ်ႇမႂ်းၼၼ်ႉ ယူႇၽၢႆႇၼိုင်ႈတင်းမႂ်းလႄႈ ၶဝ်ၼၼ်ႉ တၵ်းဢွၼ်ၵၼ်ၸီႇယၢင်ႇမႂ်း ၵျၢမ်းထၢမ်းၼႃႇ လူင်လၢင်ဢေႃႈ။ ၶဝ်တၵ်းဢွၼ်ၵၼ် တႅပ်းၶူႈလင်မႂ်း ႁူမႂ်းပႅတ်ႈလႄႈ ဢဝ်လၢပ်ႇဢဝ်လႅဝ်းၽၼ်း ၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇ ၼၼ်ႉပႅတ်ႈဢေႃႈ။ ၶဝ်တၵ်းဢွၼ်ၵၼ် သိမ်းဢဝ်လုၵ်ႈၸၢႆးလုၵ်ႈယိင်းမႂ်းၵႂႃႇလႄႈ ဢဝ်ၽႆးတုတ်ႇၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇ ၼၼ်ႉပႅတ်ႈဢေႃႈ။-

26ၶဝ်တၵ်းဢွၼ်ၵၼ် ထွတ်ႇဢဝ်ၶူဝ်းၼုင်ႈမႂ်းလႄႈ သိမ်းဢဝ်ၶိူင်ႈ ဢၼ်ႁၢင်ႈလီႁၢင်ႈငၢမ်းမႂ်းဢေႃႈ။-

27ၼင်ႇၼၼ်လႄႈ ၵဝ်တၵ်းႁႂ်ႈဢမူႉ ဢၼ်ႁၢႆႉဢၼ်ယုတ်ႈ ဢၼ်မႂ်းႁဵတ်းဢိၵ်ႇတင်း မေႇထုင်ႇဢၼ်ဢမ်ႇတြႃး ဢၼ်မႂ်းဢဝ်ၵႃႈတီႈမိူင်း ဢေႇၵိပ်ႉတူႉ မႃးၼၼ်ႉ ထၢတ်ႇယဵၼ်သေတီႈမႂ်းထၼ်ႈပေႃး မႂ်းဢမ်ႇဢဝ်တႃမႂ်းမုင်ႈလူမုင်ႈတူၺ်းၶဝ်၊ ဢမ်ႇၶုၵ်းၸႂ်လႆႈ ၶႆႈၸႂ်ထူပ်း မိူင်း ဢေႇၵိပ်ႉတူႉ မိူဝ်ႈၵမ်းလိုၼ်းၼၼ်ႉဢေႃႈ။-

28လႆႈသမ်ႉ ၸဝ်ႈထႃႇဝရႃႉၽြႃး မီးဢမိင်ႉလႄႈဝႃႈၸမ်ႉ၊ ၵဝ်တၵ်းဢဝ်မႂ်းဢၢပ်ႈပၼ် ၵႃႈၼႂ်းမိုဝ်းၶဝ်ၸိူဝ်းဢၼ်မႂ်းၸင်း၊ ၵႃႈၼႂ်းမိုဝ်းၶဝ်ၸိူဝ်းဢၼ်မႂ်းမိူဝ်ႇမႂ်းၸၢၼ်ႈၼၼ်ႉလႄႈ၊-

29ၶဝ်ၼၼ်ႉ တၵ်းဢွၼ်ၵၼ်ႁဵတ်းၸွမ်း ၵႃႈၼင်ႇဢၼ်ၶဝ်ၸင်းၼၼ်ႉသေလႄႈ သိမ်းဢဝ်ဢုၵ်ႉၸႃႇၵႃႈဢၼ်မႂ်း ၵျူဝ်းၸႃးႁွမ်ဝႆႉ သိမ်းဝႆႉၼၼ်ႉၵႂႃႇလႄႈ ႁႂ်ႈမႂ်းယင်းဢမ်ႇမီးၶူဝ်းၼုင်ႈၶူဝ်းမႆလႄႈ ပဵၼ်တူဝ်ပူၺ်ၵိုတ်းဝႆႉဢေႃႈ။ တၢင်းဢၼ်မႂ်းၽိတ်းပိူင်ႈလႄႈ ပဵၼ်ဢၼ် မဝ်မၢင်၊ တၢင်းဢၼ်မႂ်းႁဵတ်းဢၼ်ႁၢႆႉဢၼ်ယုတ်ႈ၊ တၢင်းဢၼ်မႂ်းၸွမ်းမေႇထုင်ႇ ဢၼ်ဢမ်ႇတြႃးၸိူဝ်းၼၼ်ႉ တၵ်းလႆႈထၢင်ႇသႃးဢေႃႈ။-

30တၵ်းလႆႈ ၸီႇယၢင်ႇႁဵတ်းလွင်ႈတၢင်းၸိူဝ်းၼႆႉတီႈမႂ်း ၵွပ်ႈပိူဝ်ႈဢၼ်မႂ်းၽိတ်းပိူင်ႈ လူၺ်ႈၵၼ်တင်း ၵူၼ်းတၢင်ႇၸိူဝ်ႉတၢင်ႇမဵဝ်း တင်းလၢႆလႄႈ ၶၢမ်ႇတၢင်းဢၼ် ၵူဝ်ႈၵိူၵ်ႇလူၺ်ႈၵၼ် တင်းရုၵ်ႈထူႉၶဝ်ၼၼ်ႉ ၸိူဝ်းၼၼ်ႉဢေႃႈ။-

31ၵွပ်ႈပိူဝ်ႈဢၼ် မႂ်းၸွမ်းသဵၼ်ႈတၢင်းဢၼ် ပီႈၼၢင်းမႂ်းၸွမ်းၼၼ်ႉလႄႈ ၵဝ်တၵ်းဢဝ်ၵွၵ်း ဢၼ်မၼ်းၵိၼ်ၼၼ်ႉ သႂ်ႇပၼ်ၵႃႈၼႂ်းမိုဝ်း မႂ်းဢေႃႈ။-

32ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ မႂ်းတၵ်းလႆႈဢိုၵ်ႉၵိၼ်ၵွၵ်းဢၼ် ပီႈၼၢင်းမႂ်းၵိၼ်၊ ၵွၵ်းဢၼ်ၵႂၢင်ႈၼႃႇလႄႈ လိုၵ်ႉၼႃႇၼၼ်ႉဢေႃႈ။ မႂ်းတၵ်းလႆႈၶၢမ်ႇတၢင်းဢၼ်သႄႉသွမ်း ဢိၵ်ႇတင်း တၢင်းဢၼ်ႁဵတ်းပျၢၵ်ႈဢေႃႈ။ ၵွၵ်းၼၼ်ႉ ၶဝ်ႈၼမ်ၼႃႇလူင်လၢင်ဢေႃႈ။-

33မႂ်းတၵ်းလႆႈဢိမ်ႇတဵမ်ဝႆႉတင်း တၢင်းဢၼ်မဝ်းလဝ်ႈမဝ်းၵမ်၊ တၢင်းဢၼ်မႆႈၸႂ်ယၢပ်ႇၸႂ် ဢိၵ်ႇတင်း ၵွၵ်းဢၼ်ၸၢင်ႈႁႂ်ႈငဝ်ငိူဝ်ႈၵႂင်ၸႂ်လႄႈ ပဵၼ်ဢၼ်သဵတ်ႇဢၼ်ယဵၼ် ဢၼ်ဝႃႈ ၵွၵ်းဢၼ်ပီႈၼၢင်းမႂ်း သမႃႇရီႉ ဢိုၵ်ႉၵိၼ်ၼၼ်ႉဢေႃႈ။-

34မႂ်းတၵ်းလႆႈဢိုၵ်ႉၵိၼ်ၵွၵ်းၼၼ်ႉလႄႈ သူတ်ႉႁုတ်ႇသေယဝ်ႉ၊ ၶူပ်းငၢၼ်ႈၽၢၵ်ႇၵွၵ်းလႄႈ တိုတ်ႉၶၢတ်ႇၼူမ်းမႂ်းဢေႃႈ။ ၵဝ်လၢတ်ႈယဝ်ႉ၊ ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉဢေႃႈ။-

35ပိူဝ်ႈၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉလႄႈဝႃႈ၊ ၵွပ်ႈပိူဝ်ႈဢၼ်မႂ်းလူင်လိုမ်းၵဝ်လႄႈ ဢဝ်ၵဝ်ထိမ်ႈပႅတ်ႈၵႃႈတီႈၽၢႆႇတၢင်းလင်မႂ်း ၼၼ်ႉလႄႈ၊ မႂ်းၶၢမ်ႇဢပႅတ်ႈဢမူႉဢၼ်ႁၢႆႉယုတ်ႈမႂ်း ဢိၵ်ႇတင်းဢမူႉမေႇထုင်ႇ ဢၼ်ဢမ်ႇတြႃးမႂ်းၸိူဝ်းၼၼ်ႉတႃႉ၊ ဝႃႈၼင်ႇၼႆဢေႃႈ။

36လႆႈသမ်ႉ ထႃႇဝရႃႉၽြႃး မီးဢမိင်ႉတီႈၵဝ်လႄႈဝႃႈၸမ်ႉ၊ လုၵ်ႈၵူၼ်းဢိူၺ်း၊ မႂ်းတၵ်းၸႅတ်ႈထၢမ်ၸႅတ်ႈတူၺ်း ဢႁေႃႇလႃႉ ဢိၵ်ႇတင်း ဢႁေႃႇလီႉပႃႉ ၼၼ်ႉႁိုဝ်။ ၽုၺ်ႇဢွၵ်ႇၼႄပျႃး လွင်ႈတၢင်းဢၼ်လီႁင်ႈဢဵတ်ႇသဵတ်ႇ ဢၼ်ၶဝ်ႁဵတ်းၼၼ်ႉတႃႉ။-

37လွင်ႈမၼ်းၸမ်ႉ ၶဝ်ၼၼ်ႉဢွၼ်ၵၼ်လဵၼ်ႈၽူဝ်ဢွၼ်ႇယဝ်ႉ။ ဢပႅတ်ႈလိူတ်ႈမီးၵႃႈၼႂ်းလိူတ်ႈၶဝ်ယဝ်ႉ။ ၶဝ်ဢွၼ်ၵၼ်လဵၼ်ႈၸူႉ လူၺ်ႈရုၵ်ႈထူႉၶဝ်ယဝ်ႉ။ လုၵ်ႈၸၢႆးဢၼ်ၶဝ်ၵိူတ်ႇလဵင်ႉမႃးပုၼ်ႈၵဝ် ၸိူဝ်းၼၼ်ႉၵေႃႈ ၶဝ်ဢွၼ်ၵၼ်ဢဝ်ၽႆးပုၵ်ႈၸေႃႇ ပုၼ်ႈဢၼ်ရုၵ်ႈထူႉတၵ်းၵိၼ်ၼၼ်ႉယဝ်ႉ။-

38လိူဝ်သေၼၼ်ႉ၊ လွင်ႈတၢင်းဢၼ်ၶဝ်ႁဵတ်းတီႈၵဝ်ၸမ်ႉ၊ ၼႂ်းမိုဝ်ႉဝၼ်းၼၼ်ႉ ၶဝ်ဢွၼ်ၵၼ် ႁႂ်ႈထႃႇၼႃႉတီႈမူတ်းၸၢင်ႇၵဝ် ၵူဝ်ႈၵိူၵ်ႇလႄႈ ၶျႃးဝၼ်းၵမ်သိၼ်ၵဝ် တင်းလၢႆ တူၵ်းတီႈတႅမ်ႇယဝ်ႉ။-

39ၶဝ်ဢွၼ်ၵၼ် ဢဝ်လုၵ်ႈလၢင်းၶဝ်တၢႆ ၵႃႈတီႈၽၢႆႇၼႃႈရုၵ်ႈထူႉသေယဝ်ႉ၊ ၼႂ်းမိုဝ်ႉဝၼ်းၼၼ်ႉ ၶဝ်ဢွၼ်ၵၼ်ၶဝ်ႈမႃး ၵႃႈၼႂ်း ထႃႇၼႃႉတီႈမူတ်းၸၢင်ႇၵဝ် ႁႂ်ႈမၼ်းလႆႈၵူဝ်ႈၵိူၵ်ႇဢေႃႈ။ ၶဝ်ဢွၼ်ၵၼ်ႁဵတ်းၸိူဝ်ႉၼင်ႇၼၼ် ၵႃႈၼႂ်းၶိုင်ႈၵၢင်ႁိူၼ်းၵဝ်ယဝ်ႉလူင်ပႄႇ။-

40ၼွၵ်ႈသေၼၼ်ႉ မႂ်းပွႆႇၸႂ်ႉတမၢၼ်ႇသေလႄႈ ႁွင်ႉဢဝ်ၵူၼ်းၸၢႆး ၵႃႈတီႈဢၼ်ၵႆလႄႈ ၶဝ်ၼၼ်ႉ ဢွၼ်ၵၼ်မႃးဢေႃႈ။ ပုၼ်ႈၶဝ်ၼၼ်ႉ မႂ်းဢၢပ်ႇၼမ်ႉသီတူဝ်မႂ်း၊ တႅမ်ႈၶူၼ်တႃမႂ်း၊ ႁၢင်ႈၶိူင်ႈႁၢင်ႈၽၢင်မႂ်းသေလႄႈ၊-

41ၼင်ႈယူႇၵႃႈၼိူဝ် ၵူႇဢၼ်ႁၢင်ႈလီၼႃႇလႄႈ ဢဝ်ၶူင်ႇတီႈၵိၼ်ဢၼ်တၢင်ႇသႂ်ႇၼၢမ်ႇသႃႇ တင်းၼမ်ႉမၼ်းၵဝ်ၼၼ်ႉတမ်းဝႆႉ ၵႃႈတီႈၽၢႆႇၼႃႈၵူႇၼၼ်ႉဢေႃႈ။-

42လႆႈငိၼ်းသဵင် မုၵ်ႉၵူၼ်းၸိူဝ်းၵူၼ်း ဢၼ်မူၼ်ႈပျေႃႇလူၺ်ႈၵၼ်တင်းမၼ်း ၼၼ်ႉလႄႈ ႁူမ်ႈလူၺ်ႈၵၼ်တင်းၵူၼ်းပၢၼ်ၵၢင် ၸိူဝ်းၼၼ်ႉ၊ ၶဝ်ၸိူဝ်းဢၼ်ၵိၼ်လဝ်ႈမဝ်းၵမ်ပူၼ်ႉလိူဝ် ဢၼ်လုၵ်ႉသေၵႃႈတီႈထိူၼ်ႇမႃးလႄႈ ဢဝ်ဝႅၼ်တိုဝ်းပၼ်တီႈမိုဝ်းသွင်ၶႃ၊ ဢဝ်မွၵ်ႇႁူဝ်သရၽူႇ တိုဝ်းပၼ်တီႈႁူဝ်သွင်ၶႃၼၼ်ႉၵေႃႈပႃးဢေႃႈ။-

43ၵဝ်ၵေႃႈ ဢဝ်လွင်ႈမႄႈယိင်းဢၼ်ႁဵတ်းမႄႈမွၵ်ႇယႃႈ တေႃႇထိုင်ႁွတ်ႈထၼ်ႈပေႃးထဝ်ႈ ၼၼ်ႉလႄႈဝႃႈ၊ ၶဝ်ၼၼ်ႉ တၵ်းဢွၼ်ၵၼ်ႁဵတ်း မေႇထုင်ႇ ဢၼ်ဢမ်ႇတြႃး လူၺ်ႈၵၼ်တင်းမၼ်းလႄႈ မၼ်းတၵ်းႁဵတ်းလူၺ်ႈၵၼ်တင်းၶဝ်ဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

44ၶဝ်ၼၼ်ႉ ဢွၼ်ၵၼ်ၶဝ်ႈၸူးတီႈမၼ်း မိူၼ်ၸိူဝ်ႉၼင်ႇဢၼ် ၵူၼ်းၸၢႆးၸၢင်ႈၶဝ်ႈၸူးတီႈ မႄႈမွၵ်ႇယႃႈၼၼ်ႉလႄႈ ၶဝ်ၼၼ်ႉ ဢွၼ်ၵၼ်ၶဝ်ႈၸူးတီႈ ဢႁေႃႇလႃႉ ဢိၵ်ႇတင်း ဢႁေႃႇလီႉပႃႉ မႄႈယိင်းဢၼ်ႁၢႆႉယုတ်ႈၼၼ်ႉဢေႃႈ။-

45ပိူဝ်ႈၼႆလႄႈ ၵွပ်ႈပိူဝ်ႈဢၼ်ၶဝ်ပဵၼ် မႄႈယိင်းဢၼ် လဵၼ်ႈၽူဝ်ဢွၼ်ႇ၊ မႄႈယိင်းဢၼ် ၵႃႈၼႂ်းမိုဝ်းၶဝ်မီးဢပႅတ်ႈ လိူတ်ႈၼၼ်ႉလႄႈ၊ ၶဝ်ၸိူဝ်းဢၼ် သိုဝ်ႈတေႃႇၼၼ်ႉ တၵ်းဢွၼ်ၵၼ်ၸီႇယၢင်ႇ သွင်ၶႃမိူၼ်ၸိူဝ်ႉၼင်ႇဢၼ် ၸီႇယၢင်ႇမႄႈယိင်း ဢၼ်လဵၼ်ႈၽူဝ်ဢွၼ်ႇ၊ မႄႈယိင်းဢၼ် ၵႃႈၼႂ်းမိုဝ်းၶဝ်မီးဢပႅတ်ႈလိူတ်ႈၼၼ်ႉဢေႃႈ။-

46ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၵဝ်တၵ်းႁႂ်ႈမုၵ်ႉၵူၼ်း ၸိူဝ်းၵူၼ်းၶီႇသိုၵ်းၸူးတီႈ မႄႈယိင်းၸိူဝ်းၼၼ်ႉလႄႈ တၵ်းပၼ် ဢၶႂၢင်ႉ ႁႂ်ႈသွင်ၶႃ လႆႈၶၢမ်ႇတၢင်းဢၼ်ဢဝ်ထိမ်ႈၵႂႃႇထိမ်ႈၶိုၼ်းလႄႈ ႁိမ်ႁူင်ႇသိမ်းဢဝ်ၵႂႃႇဢေႃႈ။-

47မုၵ်ႉၵူၼ်းၸိူဝ်းၵူၼ်းၼၼ်ႉ တၵ်းဢွၼ်ၵၼ်ဢဝ်မၢၵ်ႇႁိၼ် ထိမ်ႈသႂ်ႇသွင်ၶႃလႄႈ ဢဝ်လၢပ်ႇလႅဝ်းၽၼ်းသွင်ၶႃပႅတ်ႈဢေႃႈ။ ၶဝ်တၵ်းဢွၼ်ၵၼ် ဢဝ်လုၵ်ႈယိင်းလုၵ်ႈၸၢႆးသွင်ၶႃတၢႆလႄႈ ဢဝ်ၽႆးတုတ်ႇႁိူၼ်းသွင်ၶႃပႅတ်ႈဢေႃႈ။-

48ၼင်ႇၼၼ်လႄႈ ၵဝ်တၵ်းပႄႇဢမူႉ ဢၼ်ႁၢႆႉယုတ်ႈပႅတ်ႈသေၵႃႈၼႂ်းမိူင်းၸဝ်ႈ မူတ်းမူတ်းသဵင်ႈသဵင်ႈထၼ်ႈပေႃး ႁႂ်ႈမႄႈယိင်းၵႃႈမီး လႆႈသွၼ်ဢဝ် လွင်ႈတၢင်းဢၼ်တၵ်းဢမ်ႇႁဵတ်း ဢမူႉဢၼ်ႁၢႆႉယုတ်ႈ မိူၼ်ၸိူဝ်ႉၼင်ႇဢၼ် သွင်ၶႃႁဵတ်းၼၼ်ႉဢေႃႈ။-

49ၶဝ်ၼၼ်ႉ တၵ်းၸီႇယၢင်ႇၸွမ်းၼင်ႇဢပႅတ်ႈ ဢမူႉဢၼ်ႁၢႆႉယုတ်ႈသွင်ၶိူဝ်ၼၼ်ႉလႄႈ သွင်ၶိူဝ်တၵ်းလႆႈၶၢမ်ႇဢပႅတ်ႈ ဢၼ်ၸၢပ်ႈသႅင်ႇၵၼ်တင်း ရုၵ်ႈထူႉသွင်ၶိူဝ်ၸိူဝ်းၼၼ်ႉလႄႈ သွင်ၶိူဝ်တၵ်းလႆႈႁူႉလွင်ႈဢၼ် ၵဝ်ပဵၼ် ထႃႇဝရႃႉၽြႃးဢေႃႈ၊ ဝႃႈၼင်ႇၼႆဢေႃႈ။