Ezekiel 42

Shan

← Chapter 41 Jump to: Chapter 43 →

1လိုၼ်းၼၼ်ႉ မၼ်းႁွင်ႉဢဝ်ၵဝ် ၸွမ်းသဵၼ်ႈတၢင်း ၼႃႈတၢင်းႁွင်ႇၵႂႃႇၸူး ၵႃႈၼႂ်းတမ်ႇတိူင်း ဢၼ်ၵႃႈၼွၵ်ႈလႄႈ ဢဝ်ၵဝ်သူင်ႇႁွတ်ႈ ၵႃႈၼႂ်းလုၵ်းဢၼ် ဝၢႆႇၼႃႈတေႃႇတီႈဢၼ်ပဝ်ႇဢၼ်လၢပ်ႈလႄႈ ဝၢႆႇၼႃႈတေႃႇႁိူၼ်း ၵႃႈတီႈၽၢႆႇတၢင်းႁွင်ႇၼၼ်ႉဢေႃႈ။-

2ၵႃႈတီႈၽၢႆႇၼႃႈ ၼႃႈယၢဝ်းပၢၵ်ႇသွၵ်ႇၼၼ်ႉ မီးၽၵ်းတူၼႃႈတၢင်းႁွင်ႇလႄႈ ၼႃႈပွတ်းမၼ်း မီးႁႃႈသိပ်းသွၵ်ႇဢေႃႈ။-

3ၵႃႈတီႈဢၼ်တေႃႇၵၼ်သိုဝ်ႈၵၼ်တင်းသၢဝ်းသွၵ်ႇ ဢၼ်ၸၢပ်ႈသႅင်ႇၵၼ်တင်းတမ်ႇတိူင်း ဢၼ်ၵႃႈၼႂ်း ဢိၵ်ႇတင်း တေႃႇၵၼ် သိုဝ်ႈၵၼ်တင်းမၢၵ်ႇႁိၼ်သိူဝ်ႇ ဢၼ်ၸၢပ်ႈသႅင်ႇၵၼ်တင်း တမ်ႇတိူင်းဢၼ် ၵႃႈၼွၵ်ႈၼၼ်ႉ မီးၸၢၼ်းလုၵ်းသၢမ်ႁၢၼ်ႉဢေႃႈ။-

4ၵႃႈတီႈၽၢႆႇၼႃႈလုၵ်း ၸိူဝ်းၼၼ်ႉ၊ မီးတီႈဢၼ်ၽၢႆႈသၢင်းၵျၢၼ်ႇ ဢၼ်ၵႂၢင်ႈသိပ်းသွၵ်ႇလႄႈ ၶဝ်ႈၵႂႃႇၽၢႆႇတၢင်းၼႂ်းၼၼ်ႉ ဢိၵ်ႇလူၺ်ႈၵၼ်တင်း သဵၼ်ႈတၢင်းဢၼ်ၵႂၢင်ႈသွၵ်ႇၼိုင်ႈ ဢေႃႈ။ ၽၵ်းတူလုၵ်း ၸိူဝ်းၼၼ်ႉ ဝၢႆႇၼႃႈၵႂႃႇတီႈၽၢႆႇတၢင်းႁွင်ႇယူႇဢေႃႈ။-

5လုၵ်းဢၼ်ၵႃႈၼိူဝ် ၸိူဝ်းၼၼ်ႉ ပဵၼ်ဢၼ်လဵၵ်ႉဢၼ်ၵႅပ်ႈဢေႃႈ။ ၸၢၼ်းၶဝ်ၼၼ်ႉ သုတ်ႉၶဝ်ႈယိုတ်းၶဝ်ႈလႄႈ ႁႂ်ႈၶဝ်လဵၵ်ႉၼႃႇ သေၸၢၼ်းလုၵ်းဢၼ် ၵႃႈတႂ်ႈ ဢိၵ်ႇတင်း ၸၢၼ်းလုၵ်းဢၼ်ၶိုင်ႈၵၢင် ၸိူဝ်းၼၼ်ႉဢေႃႈ။-

6လွင်ႈမၼ်းၸမ်ႉ ပိၵ်ႉသမ်ႉပဵၼ်သၢမ်ႁၢၼ်ႉသေၵေႃႈ၊ ၶဝ်ဢမ်ႇမီးသဝ်မိူၼ်ၸိူဝ်ႉၼင်ႇ သဝ်တီႈတမ်ႇတိူင်းၸိူဝ်းၼၼ်ႉ။ ပိူဝ်ႈဢၼ်ပဵၼ် ၼင်ႇၼႆလႄႈ ဢၼ်ၵႃႈၼိူဝ် ယဵင်ႈၶႅၼ်းၵႅပ်ႈသေ ဢၼ်ၵႃႈတႂ်ႈ ဢိၵ်ႇတင်း ဢၼ်ၶိုင်ႈၵၢင်ၼၼ်ႉဢေႃႈ။-

7ၽႃဢၼ်မီးၵႃႈၼွၵ်ႈ ၵႃႈတီႈႁိမ်းလုၵ်း ၸိူဝ်းၼၼ်ႉ ဢၼ်သိုဝ်ႈၵၼ်တင်းတမ်ႇတိူင်း ဢၼ်ၵႃႈၼွၵ်ႈၵႃႈတီႈၽၢႆႇၼႃႈလုၵ်း ၸိူဝ်းၼၼ်ႉၼၼ်ႉ၊ ဢၼ်ယၢဝ်းမၼ်းမီးႁႃႈသိပ်းသွၵ်ႇဢေႃႈ။-

8လုၵ်းဢၼ်ၸၢပ်ႈသႅင်ႇၵၼ်တင်း တမ်ႇတိူင်း ဢၼ်ၵႃႈၼွၵ်ႈၸိူဝ်းၼၼ်ႉ ဢၼ်ယၢဝ်းမၼ်းမီးႁႃႈသိပ်းသွၵ်ႇဢေႃႈ။ ဢၼ်ယၢဝ်း ၵႃႈတီႈၽၢႆႇၼႃႈပိၵ်ႈမၢၼ်ႇၸဝ်ႈၼၼ်ႉ မီးပၢၵ်ႇသွၵ်ႇဢေႃႈ။-

9ၵႃႈတီႈတိၼ်လုၵ်းၸိူဝ်းၼႆႉ မီးတၢင်းဢၼ်ၶဝ်ႈၸူးၵႃႈၼႂ်း ၵႃႈတီႈၽၢႆႇၼႃႈတၢင်းဢွၵ်ႇၼၼ်ႉ မိူဝ်ႈဢၼ်လုၵ်ႉသေၵႃႈတီႈ တမ်ႇတိူင်း ဢၼ်ၵႃႈၼွၵ်ႈၶဝ်ႈမႃးၼၼ်ႉဢေႃႈ။-

10ၵႃႈၼႂ်းၼႃႈၽႃတမ်ႇတိူင်း ဢၼ်မီးၽၢႆႇတၢင်းဢွၵ်ႇ ၵႃႈတီႈၽၢႆႇၼႃႈတီႈဢၼ်ပဝ်ႇဢၼ်လၢပ်ႈ ဢိၵ်ႇတင်းၵႃႈတီႈၽၢႆႇၼႃႈႁိူၼ်းၼၼ်ႉၵေႃႈ မီးလုၵ်း တင်းလၢႆဢေႃႈ။-

11တီႈဢၼ်ၽၢႆႈသၢင်းၵျၢၼ်ႇ ဢၼ်မီးၵႃႈတီႈၽၢႆႇၼႃႈၶဝ်ၼၼ်ႉ မိူၼ်ၸိူဝ်ႉၼင်ႇ တီႈဢၼ်ၽၢႆႈသၢင်းၵျၢၼ်ႇ လုၵ်းၼႃႈတၢင်းႁွင်ႇ ၸိူဝ်းၼၼ်ႉ ၼၼ်ႉလႄႈ ၸွမ်းလူၺ်ႈၼႃႈပွတ်းၶဝ်၊ ၼႃႈယၢဝ်းၶဝ် သေလႄႈ၊ တီႈဢၼ်ၶဝ်ႈဢၼ်ဢွၵ်ႇၵႃႈမီးၼၼ်ႉၵေႃႈ ၸွမ်းလူၺ်ႈပုင်ႇႁၢင်ႈၶဝ် ဢိၵ်ႇတင်း ၽၵ်းတူၶဝ်ၼၼ်ႉဢေႃႈ။-

12ၽၵ်းတူလုၵ်းၼႃႈတၢင်းၸၢၼ်း ၸိူဝ်းၼၼ်ႉၸမ်ႉ၊ မီးႁူးၽၵ်းတူႁူဝ်ႉ သဵၼ်ႈတၢင်းဢၼ်ဝႃႈ သဵၼ်ႈတၢင်းဢၼ်သိုဝ်ႈၵႃႈတီႈ ၽၢႆႇၼႃႈၽႃဢၼ်တေႃႇၵၼ် သိုဝ်ႈၵၼ်တင်းၼႃႈတၢင်းဢွၵ်ႇၼၼ်ႉ မိူဝ်ႈဢၼ်ၶဝ်ႈၸူး ၵႃႈၼႂ်းၶဝ်ၼၼ်ႉဢေႃႈ။-

13မၼ်းၼၼ်ႉ လၢတ်ႈတီႈၵဝ်လႄႈဝႃႈ၊ လုၵ်းၼႃႈတၢင်းႁွင်ႇ ဢိၵ်ႇတင်း လုၵ်းၼႃႈ တၢင်းၸၢၼ်းဢၼ်ဝၢႆႇၼႃႈတေႃႇတီႈဢၼ်ပဝ်ႇဢၼ်လၢပ်ႈယူႇ ၸိူဝ်းၼၼ်ႉ ပဵၼ်လုၵ်းဢၼ်မူတ်းၸၢင်ႇ၊ တီႈဢၼ်ယိတ်ႈပရေႃးႁဵၵ်ႈ ဢၼ်လႆႈ သုတ်ႉၸပ်းသုတ်ႉၸူးၵႃႈတီႈ ထႃႇဝရႃႉၽြႃး ၸိူဝ်းၼၼ်ႉ လႆႈၵိၼ်လွင်ႈတၢင်းဢၼ် မူတ်းၸၢင်ႇၼႃႇလူင်လၢင် ၸိူဝ်းၼၼ်ႉဢေႃႈ။ ၵွပ်ႈပိူဝ်ႈဢၼ် ၵႃႈတီႈၼၼ်ႈပဵၼ်ဢၼ်မူတ်းၸၢင်ႇလႄႈ၊ တၵ်းလႆႈဢဝ်လွင်ႈတၢင်းဢၼ်မူတ်းၸၢင်ႇၼႃႇလူင်လၢင် တင်းလၢႆ ဢိၵ်ႇတင်း ၶိူင်ႈပုၵ်ႈၸေႃႇၽေႃးၸဵၼ်ႇ၊ ယိတ်ႈဢၼ်ၽေႇဢပႅတ်ႈ၊ ယိတ်ႈဢၼ်ၽေႇတူႉၸရိူၵ်ႈ ၸိူဝ်းၼၼ်ႉ ဝႆႉၵႃႈတီႈၼၼ်ႈဢေႃႈ။-

14မိူဝ်ႈဢၼ် ယိတ်ႈပရေႃးႁဵၵ်ႈ တင်းလၢႆ ၶဝ်ႈၼၼ်ႉၸိုင်၊ ၶဝ်ဢမ်ႇလႆႈလုၵ်ႉသေၵႃႈတီႈဢၼ် မူတ်းၸၢင်ႇၼၼ်ႉ ဢွၵ်ႇၸူး ၵႃႈတီႈတမ်ႇတိူင်း ဢၼ်ၵႃႈၼွၵ်ႈ။ တၵ်းလႆႈဢဝ်ၶူဝ်းၼုင်ႈ ဢၼ်ၶဝ်ဢဝ်ပွင်ႁဵတ်းဢမူႉၸဝ်ႈၼၼ်ႉ ဝႆႉၵႃႈတီႈၼၼ်ႈ ၵွပ်ႈပိူဝ်ႈ ဢၼ်ၶူဝ်းၼုင်ႈၼၼ်ႉ ပဵၼ်ဢၼ်မူတ်းၸၢင်ႇ ၼၼ်ႉလႄႈ ၼုင်ႈၶူဝ်းၼုင်ႈ တၢင်ႇၸိူဝ်ႉတၢင်ႇဢၼ်သေယဝ်ႉ ၸင်ႇတၵ်းလႆႈဢွၼ်ၵၼ် ဢွၵ်ႇၵႂႃႇၸူး ၵႃႈတီႈဢၼ်ၵူၼ်းတင်းလၢႆမီးၼၼ်ႉဢေႃႈ၊ ဝႃႈၼင်ႇၼႆဢေႃႈ။

15လိုၼ်းသေ ဢၼ်မၼ်းတႅၵ်ႈတူၺ်း ပိၵ်ႈမၢၼ်ႇၸဝ်ႈ ၵႃႈၼႂ်းၼၼ်ႉယဝ်ႉၼၼ်ႉ၊ မၼ်းႁွင်ႉဢဝ်ၵဝ် ဢွၵ်ႇၵႃႈတီႈၼွၵ်ႈၸွမ်းသဵၼ်ႈတၢင်းၽၵ်းတူ ၽၢႆႇဝၼ်းဢွၵ်ႇသေလႄႈ တႅၵ်ႈတူၺ်းၵႃႈတီႈ ၸွမ်းႁိမ်းလဵပ်ႈႁွပ်ႈမၼ်းဢေႃႈ။-

16မၼ်းဢဝ်လႅမ်ႈမႆႉဢေႃႈ ဢၼ်တၵ်းတႅၵ်ႈၼၼ်ႉ တႅၵ်ႈတူၺ်းၼႃႈၽၢႆႇဝၼ်းဢွၵ်ႇ ၼၼ်ႉလႄႈ ၸွမ်းႁိမ်းမၼ်းမီးႁႃႈပၢၵ်ႇ တႅၵ်ႈလႅမ်ႈ မႆႉဢေႃႈ ၼၼ်ႉဢေႃႈ။-

17မၼ်းတႅၵ်ႈတူၺ်းၼႃႈၽၢႆႇတၢင်းႁွင်ႇ ၼၼ်ႉလႄႈ ၸွမ်းႁိမ်းမၼ်းမီးႁႃႈပၢၵ်ႇတႅၵ်ႈလႅမ်ႈမႆႉဢေႃႈ ၼၼ်ႉဢေႃႈ။-

18မၼ်းတႅၵ်ႈတူၺ်းၼႃႈၽၢႆႇတၢင်းၸၢၼ်း ၼၼ်ႉလႄႈ ၸွမ်းႁိမ်းမၼ်းမီးႁႃႈပၢၵ်ႇတႅၵ်ႈ လႅမ်ႈမႆႉဢေႃႈ ၼၼ်ႉဢေႃႈ။-

19မၼ်းတႅၵ်ႈတူၺ်းၼႃႈၽၢႆႇဝၼ်းတူၵ်း ၼၼ်ႉလႄႈ ၸွမ်းႁိမ်းမၼ်းမီးႁႃႈပၢၵ်ႇတႅၵ်ႈ လႅမ်ႈမႆႉဢေႃႈ ၼၼ်ႉဢေႃႈ။-

20မၼ်းတႅၵ်ႈတူၺ်း သီႇၼႃႈမၼ်းၼၼ်ႉလႄႈ မၼ်းၼၼ်ႉမီးတမ်ႇတိူင်း ၵႃႈတီႈၸွမ်းႁိမ်းလဵပ်ႈႁွပ်ႈမၼ်းယူႇ ႁႂ်ႈလႆႈၸၵ်းၽႄတီႈဢၼ် မူတ်းၸၢင်ႇ ဢိၵ်ႇတင်း တီႈဢၼ်ဢမ်ႇမူတ်းၸၢင်ႇယူႇ သေလႄႈ ၼႃႈယၢဝ်းမၼ်းမီး ႁႃႈပၢၵ်ႇတႅၵ်ႈ၊ ၼႃႈပွတ်းမၼ်းမီးႁႃႈပၢၵ်ႇတႅၵ်ႈဢေႃႈ။

← Chapter 41 Jump to: Chapter 43 →